Iner so Pakaromogan Moy Akindalem a Kareenan?

Dakel so pidumaan na panaon tayo tan ed panaon nen Thoreau, ya asalambit ed akaunan artikulo. Say baleg a pidumaan et dakerakel natan so simbawa ed no panon so pakagamor na kareenan na nonot. Saray sikolohista tan managsulat na makatulong ed dili iran libro​—anggan saray kolumnista ed peryodiko​—so mangiiter na saray ideya ra. Say simbawa ra so nayarin makatulong a magano; balet parad manbayag iran solusyon et kaukolan so mas aralem a kakabatan. Ontan so adiskobre na saray asalambit ya indibidual diad akaunan artikulo.

NANDURUMAY ekperiensia ra’d bilay di Antônio, Marcos, Gerson, Vania, tan Marcelo tan walaan ira met na nanduruman problema. Balet anggan panon et walay taloran bengatla a pamparaan da. Unona, walay panaon sanen “anggapo so ilalo ra tan wala ra ed sayan mundo ya anggapo so Dios.” (Efeso 2:12) Komadua, nampirawatan day nawalaan na kareenan ed nonot. Tan komatlo, amin da so akaromog ed akindalem a kareenan a kinaliktan da sanen impaiyaralan ira na Biblia ed saray Tastasi nen Jehova. Legan iran onaaligwas, amoria ran interesado so Dios ed sikara. On, singa inkuan la nen Pablo ed saray taga-Atenas ed panaon to, say Dios so “ag-arawi ed sinansakey ed sikatayo.” (Gawa 17:27) Say pagmaliw a masimoon a  kombinsido ed saya et baleg a sengegan ed pakagamor na akindalem a kareenan.

Akin a Ngalngali Anggapo so Kareenan?

Mangiiter so Biblia na duaran manunan rason no akin ya anggapoy kareenan ed mundo​—balanglan akindalem a kareenan odino kareenan ed baetan na totoo. Say unona et say nipaliwawa diad Jeremias 10:23: “Say dalan na too anggapo ed sikato lanlamang; aliwa a wala ed too a manakar a mangitonton ed saray kurang to.” Andian so too na kakabatan tan pakaamta lan unona pian uleyan so inkasikato ya anggapoy tulong, tan say alenleneg a tulong a walaan na peteg a kablian et manlalapud Dios. Saray totoon agmanaanap ed panangiwanwan na Dios so agbalot makadampot na magnayon a kareenan. Say komaduan rason no akin ya anggapoy kareenan so natalosan ed saray salita nen apostol Juan: “Say sankamundoan mandukdukol ed pakayari na sakey a marelmeng.” (1 Juan 5:19, NW) No anggapoy panangigiya na Dios, lawas onsaew iray sagpot na too ed pakagamor na kareenan lapud saray aktibidad na agnanengneng balet ta peteg a wala​—tan mabiskeg a maong​—“sakey a marelmeng,” si Satanas.

Lapud sayan duaran rason​—a maslak a totoo so agmanaanap ed panangigiya na Dios tan si Satanas so aktibon maong ed mundo​—say rasa na too bilang intiraminti et walad pakaskasin kipapasen. Deneskriben maong itan nen apostol Pablo: “[Amin] a pinalsa maningel ira ya amin tan maniirap ira a mananak ya anggad natan.” (Roma 8:22) Siopa so ag-onabobon ed satan? Diad mayaman iran bansa ontan met ed saray mairap, saray problema na pamilya, krimen, ag-inkahustisya, gotgotan lapud personalidad, agmaligen ya ekonomya, pambubusolan na tribu tan etniko, panaglames, sakit, tan dakel ni, so mangeekal ed kareenan na nonot na totoo.

No Iner so Pakaromogan na Akindalem a Kareenan

Sanen nanaral ira di Antônio, Marcos, Gerson, Vania, tan Marcelo na Salitay Dios, say Biblia, naaralan daray bengatlan akapanguman ed kabibilay da. Say sakey lan naaralan da et onsabi panaon sano say kipapasen na mundo so onduma. Aliwa iyan anggapoy basiyan ya ilalo ya amin a bengatla so manresultan marakep diad kaunoran. Saya so tua tan peteg a napanmatalkan a say Dios so walaan na gagala parad katooan tan anggan natan et nagunggunaan itayo la manlapud satan a gagala no gawaen tayoy linawa to. Inyaplika ra’d bilay da so naaralan da ed Biblia, tan inmaligwas so kabibilay da. Aromog da so nagkalalo a liket tan kareenan nen say inisip dan posibli.

Agla akibabali si Antônio ed saray panagprotesta tan ed igogotgot na saray trabahador. Amta ton saray pananguman a nitarok ed ontan a paraan so limitado lambengat tan temporaryo. Naaralan na sayan datin lider na saray trabahador so nipaakar ed Panarian na Dios. Satan imay Panarian ya ipipikasi na minilyon no bitlaen day Pikakasi na Katawan (odino, say Ama Mi) tan ikerew da ed Dios ya: “Onsabi komon so panarian mo.” (Mateo 6:10a, New International Version) Naaralan nen Antônio a say Panarian na Dios et peteg a mangatatawen a gobierno a mangitarok na puron kareenan ed katooan.

Naaralan nen Marcos ya iyaplika so makabat a simbawa na Biblia nipaakar ed panamaley. Bilang resulta, sayan datin politiko so maliket la natan ya akikasakey ed akulaw to. Tatalaranan to met so panaon, a magano lan onsabi, sano salatan na say Panarian na Dios iyan maagum, masiblet a sistema na mundo na magmaong. Sikatoy walaan na aralem a tuloy a pakatalos ed saray balikas ed Pikakasi na Katawan ya oniay nabasa: “Nagawa komon so linawam ed dalin a singa ed tawen.” (Mateo 6:10b, NIV) Sano nagawa lay linawa na Dios ed dalin, naeksperiensia na totoo so klase na bilay ya agnin balot naeksperiensia.

Komusta met si Gerson? Sikatoy aliwa lan miluyos-luyos tan aliwa met lan matakew. Say bilay na sayan datin “kanto boy” et walaan lay kabaliksan natan lapud uusaren toy biskeg to diad panutulong ed arum pian naromog so akindalem a kareenan.  Singa ipapanengneng na sarayan eksperiensia, say panagaral ed Biblia tan pangiyaplika ed ibabaga na satan so mabiskeg a makapanguman ed bilay na too parad magmaong.

Akindalem a Kareenan Diad Magulon Mundo

Say manunan maawaran a persona ed pakasumpal na linawa na Dios et si Jesu-Kristo, tan sano paiyaralan iray totoo na Biblia ed saray Tastasi nen Jehova, dakel so naaralan da nipaakar ed sikato. Diad labin inkianak to, nankanta iray anghel na panangidayew ed Dios: “Gloria ed Dios ed sankatageyan, tan dia ed dalin deen ed saray totoo a sikara so panliketan ton maong.” (Lucas 2:14) Sanen binmaleg la si Jesus, sikatoy mapaga nipaakar ed pamaaligwas ed kabibilay na totoo. Atalosan toy liknaan da tan angipanengneng na nikaduman panangabagey parad saray apairap tan mansasakit. Tan, mitunosan ed saray salita na anghel, sikatoy angitarok na baleg ya akindalem a kareenan parad saray mauyamo. Diad sampot na ministeryo to, inkuanto ed saray babangatan to: “Say kareenan so itila’ko ed sikayo, say kareenan ko iter ko ed sikayo. Aliwan singa panangiter na mundo, so pangiter ko ed sikayo. Agnagonigon so puso yo, agmet sitatakot.”​—Juan 14:27.

Si Jesus so mas ni nen say makasi ed too. Impareng toy inkasikato bilang managpastol, tan inyaliling toray mauyamon babangatan to ed saray karnero sanen inkuanto: “Siak linma ak dia pian nawalaan ira na bilay, tan nawalaan ira na daakan. Siak so maong a pastol; say maong a pastol italaga to so bilay to nipaakar ed saray karnero.” (Juan 10:10, 11) On, miduma ed dakerakel a lider natan a say manunaan ya aasikasoen da et say inkasikara, inter nen Jesus so bilay to parad saray karnero to.

Panon tayon nagunggunaan manlapud ginawa nen Jesus? Dakel so mikabisado ed saray salitan: “Ontan lay impangaro na Dios ed mundo, ya inter to so bogbogtong ya Anak to, pian siopaman a manisia ed sikato agnatawtaw, noag ingen wala so bilay ton andi-anggaan.” (Juan 3:16) Say pangagamil na pananisia ed si Jesus et kakaukolanen toy, manuna ed amin, pikakabat nipaakar ed sikato tan ed Ama to, si Jehova. Say pikakabat ed Dios tan ed si Jesu-Kristo so makapangitonton ed maapit a siglaotan ed si Jehova a Dios ya ontulong ed sikatayon nadampot so kareenan ed nonot.

Inkuan nen Jesus: “Saray karnerok dengelen da so bosis ko, et kabat kora, tan ontumbok ira ed siak. Et iter ko ed sikara so maando a bilay; et ag-ira natawtaw anggan kapigan, tan anggapo so manamsam ed sikara ed limak.” (Juan 10:27, 28) Agaylan maligsa, makaligliwa iran salita! Tua, imbalikas nen Jesus iratan ngalngali duan libon taon lay linmabas, balet siansian mapuersa iratan natan a singa nensaman. Agbalot lilingwanan a siansia nin mabilay si Jesu-Kristo tan aktibo a manuuley la ed tawen bilang nitronon Ari na mangatatawen a Panarian na Dios. No panon so awawey to sanen sikatoy linma diad dalin dakel lan taon so apalabas, siansian sikatoy mapaga nipaakar ed saray mauyamo a manpipirawat a nawalaan na kareenan ed nonot. Sakey ni, sikato nin siansia so Pastol na saray karnero to. No sikatoy tumboken tayo, tulongan to itayon nagamoran so akindalem a kareenan, a mangilalaktip ed matalek a panilalo ed sigpot a kareenan ed arapen​—a kabaliksan na satan so kaandi la na karawalan, bakal, tan krimen.

Saray peteg a gungguna so manlapud pikabat tan panisia a si Jehova, diad panamegley nen Jesus, so ontulong ed sikatayo. Nanonotan yo ni si Vania, a sakey ya ugaw nin bii a nipudiran lay ambelat iran responsabilidad tan ninonot to a sikatoy nilingwanan la na Dios? Kabat la nen Vania natan a sikatoy ag-inkaindan na Dios. Inkuanto: “Naamtaan kon peteg a persona so Dios a walaan na maabig iran kualidad. Say aro To so amakiwas ed sikaton angibaki ed Anak to ed dalin pian mangiter ed sikatayo na bilay. Importantin tuloy a naamtaan iya.”

Pinaneknekan nen Marcelo a say siglaotan to ed Dios et peteg. Inkuan na sayan datin mahilig ed party: “Mabetbet ya ag-amta na saray kalangweran no antoy gawaen da, tan mansumpal ira ed kapasakitan dan mismo. Arum so alanor ed panag-abuso ed druga, a singa siak. Ilaloan ko a dakel ni komon  so nabendisionan, a singa siak, diad panaral na katuaan nipaakar ed Dios tan ed Anak to.”

Diad panamegley na maalwar a panagaral na Biblia, abayuboan di Vania tan Marcelo so mabiskeg a pananisia ed Dios tan kompiyansa ed inkamabulos ton ontulong ed sikaran manresolbi ed saray problema ra. No aralen tayoy Biblia tan iyaplika so ibabaga na satan, a singa ginawa ra, naromog tayoy baleg ya akindalem a kareenan, a singa agamoran da la. Diad ontan say panamaseseg nen apostol Pablo so talagan onaplika ed kipapasen tayo: “Agkayo mapaga ed antokaman; noag dia ed ganagana lapu ed pikakasi tan pikekerew a tekep na pisasalamat nipakabat komon ed Dios so saray kerew yo. Tan say deen na Dios, a talonaan ton amin a pakatalos, bantayan to so kapusoan yo tan saray nonot yo ed Kristo Jesus.”​—Filipos 4:6, 7.

Pakaromog ed Puron Kareenan Natan

Iwawanwan nen Jesu-Kristo iray narasan ed katuaan a totoo diad dalan a mangitonton ed andi-anggaan a bilay diad mangaraldalin a paraiso. Legan ya iwawanwan tora ed puron panangidayew ed Dios, naeksperiensia ra so kareenan a mipara ed adeskribe diad Biblia: “Say baley ko manayam naani ed mareen a panag-ayaman; tan dia ed maligen a paspasen, tan dia ed saray mareen a pampainawaan.” (Isaias 32:18) Pagpauna labat itan a kareenan a panggayagaan da ed arapen. Nabasa tayo: “Saray mauyamo tawiren da naani dalin: tan manliket ira a dili ed inkadaakan na kareenan. Say matunong tawiren to so dalin tan manayam diman lawas.”​—Salmo 37:11, 29.

Kanian nawalaan tayo kasi na akindalem a kareenan natan? On. Sakey ni, makaseguro itayo a diad asingger lan arapen, bendisionan na Dios so matulok a katooan tekep na kareenan ya agnin balot agawa. Sirin, akin ya ag-ipikasi ed sikato a pagamoran to kayo na kareenan to? No walaan kayo na saray problema a mangikikibot ed sikayo na kareenan, manpikasi unong ed paraan ya impanpikasi nen Arin David: “Saray gonigon na pusok apabaleg ira; o ipaway moak ed saray kaot-otan ko. Usdongan mo so kaermenan tan sakit ko; tan perdonaen mo so saray kasalanan ko.” (Salmo 25:17, 18) Maseguro kayo a talinengen na Dios so ontan iran pikakasi. Iyuunat to iray lima to tan papagamoran to na kareenan so amin a manaanap ed sikato tekep na masimoon a puso. Sikatayoy simamaaron apaseguroan: “Si Jehova asingger ed amin ya ontawag ed sikato, ed amin day ontawag ed sikato ed katuaan. Gawaen to so pilalek na saray ontakot ed sikato; sikato denglen to met so akis da, tan ilaban tora.”​—Salmo 145:18, 19.

[Blurb ed pahina 5]

Andian so too na kakabatan nisay pakaamta lan unona ed arapen pian uleyan so inkasikato ya anggapoy tulong, tan say alenleneg a tulong a walaan na peteg a kablian et manlalapud Dios

[Blurb ed pahina 6]

Say pikakabat ed Dios tan si ed Jesu-Kristo so makapangitonton ed maapit a siglaotan ed si Jehova a Dios ya ontulong ed sikatayon nadampot so kareenan ed nonot

[Litrato ed pahina 7]

Say panumbok ed simbawa na Biblia so ontulong ed kiwala na mareen a bilay na pamilya