Iea Ngai e Kiteai e Koe te Au i Roto Roa?

Te vaira te au tu tuke tuke e manganui i rotopu i to tatou tuatau e to Thoreau, tei taikuia i roto i te atikara i mua ake nei. Ko tetai tu tuke roa koia oki i teia tuatau kare e kore ana te ako anga e akapeea e raukai te au o te manako. Te oronga maira te au taote i te pae manako e te aronga tata i te au puka tauturu ia koe uaorai​—pera te aronga tata nuti pepa​—i to ratou uaorai au manako. Penei ko ta ratou e ako maira ka tauturu i tetai tuatau poto ua; inara no tetai au pau anga roa, te anoano maataia ra tetai apinga oonu ra. Ko te reira ta te au tangata tataki taki tei taikuia i roto i te atikara i mua ake nei i kite ra.

KUA aere mai a Antônio, Marcos, Gerson, Vania, e Marcelo mei te au ngai tukeke e e tuke rai te au manamanata. Inara kua aiteite e toru au apinga i rotopu ia ratou. Te mea mua, kua vai ana te tuatau no ratou e “e manakoanga kore, e te Atua kore i te ao nei.” (Ephesia 2:12) Te rua, kua anoano ratou i te au o te manako. E te toru, kua kitea pouroa e ratou te au i roto roa ta ratou i inangaro i muri ake i to ratou ariki anga i tetai apii Pipiria ma te Au Kite o Iehova. Ia ratou e tere ra ki mua, kua kite mai ratou e te manako maira te Atua ia ratou. E tikai, mei ta Paulo i akakite ki te au tangata Atene i tona tuatau, ‘kare ra te Atua i atea ke atu ia tatou katoa nei.’ (Angaanga  17:27) Te irinaki ngakau tae anga i teia e tumu maata ia i te raukaanga te au i roto roa.

Eaa ra i Iti Uai te Au?

Te oronga maira te Pipiria e rua nga tumu i kore ei te au i roto i te ao​—te au i roto roa me kare te au i rotopu i te tangata. Te mea mua kua akamaramaia ia Ieremia 10:23: “E kare tei te tangata uaorai tona aerenga: kare tei te tangata e aere nei, i te akono i tona uaorai takainga tapuae.” Kare e tei te tangata te pakari me kare te kite oonu kia tutara iaia uaorai ma te kore te tauturu, e te aere maira te tauturu puapinga tikai mei te Atua. Ko te au tangata kare i kimi i te arataki anga a te Atua kare rava e rauka te au mutu kore. Te rua o te tumu no te kore o te au ka kiteia i roto i te au tuatua a te apotetoro ko Ioane: “Te vai ua nei rai to te ao ravarai i raro ake i taua vaerua kino ra.” (1 Ioane 5:19) Ma te kore te arataki anga tu-Atua, ka tamanamanata uaia ta te tangata tauta anga kia rauka te au e te au angaanga a tei kore e kiteia inara te tika tikai ra​—e te ririnui​—te “vaerua kino,” ko Satani.

No teia nga tumu e rua​—kare te maata anga o te tangata e kimi ana i te arataki anga a te Atua e te maroiroi nei a Satani i te ao​—tei roto te au tangata ravarai ma te katoa anga i tetai turanga maromaroa. Kua akataka meitaki te apotetoro ko Paulo i te reira: “Te ngunguru anake nei te au mea katoa i angaia mei te mamae anau ra e tae rava akenei i teianei rā.” (Roma 8:22) Koai te ka patoi atu i taua akara anga? I roto i te au enua puapinga e pera katoa te mea putaua, te au manamanata ngutuare tangata, te ta ua, te tika kore, te au maro anga tu tangata, te papu kore i te pae moni, te au makitakita anga i te pae eteniki e te kopu, te takinga kino anga, te maki, e te vai atura, te keia ra mei te tangata i to ratou au o te manako.

Iea Ngai e Kiteai te Au i Roto Roa

I te apii anga a Antônio, Marcos, Gerson, Vania, e Marcelo i te Tuatua a te Atua, te Pipiria, kua apii ratou i te au mea tei taui i to ratou au oraanga. Ko tetai mea, kua apii ratou e a tetai ra ka tuke te turanga o te ao. Kare teia i tetai manakonakoanga puapinga kore e ka meitaki mai te au apinga i te openga ra. E irinaki anga akatumu meitakiia e te tika tikai ta te Atua i akakoro no te tangata ravarai e i teianei ka puapingaia tatou mei taua akakoroanga me rave tatou i tona anoano. Kua taangaanga ratou ki to ratou au oraanga i ta ratou e apii ra mei te Pipiria, e kua meitaki mai te au mea no ratou. Kua kitea e ratou te mataora maata e te au kare ratou i manako ana e ka rauka.

Kare a Antônio i piri akaou ki roto i te au patoi anga e te putoto anga i te pae angaanga. Kua kite aia e kua kotingaia e e mea poto ua te au taui anga te ka raveia na te reira tu. Kua apii teia tangata arataki angaanga mua no runga i te Patireia o te Atua. Ko te Patireia ia te pure ra te au mirioni me tuatua taokioki ratou i te Pure a te Atu (me kare, e to Matou Metua) e ka tuatua ki te Atua: “Kia aere mai toou patireia.” (Mataio 6:10a, New International Version) Kua apii a Antônio e e kavamani tika tikai i te rangi ra te Patireia o te Atua te ka apai mai i te au tikai ki te tangata ravarai.

Kua apii a Marcos i te taangaanga i te ako anga pakari a te Pipiria no runga i te tumu manako o te akaipoipo anga. Tei tupu mai, kua taokotai mataora ia teia tangata poritiki i mua ana ma tana vaine. Te akara atu nei aia i te tuatau, kare e roaia ka tae mai, te Patireia o te Atua e ka mono atu i teia akatereanga o teianei ao manako iaia uaorai e te noinoi ma tetai tei meitaki atu. E kiteanga oonu tona i te tuatua i roto i te Pure a te Atu te tatau ra: “Kia raveia toou anoano i te enua nei e i te rangi ra.” (Mataio 6:10e, NIV) Me raveia to te Atua anoano i runga i te enua nei, ka kite te tangata i tetai tu oraanga meitaki kare rava i kiteia ana i mua ana.

Akapeea a Gerson? Kare aia i te tangata aere ua e te keia. E aiteanga to te oraanga o teia tangata noo i runga i te mataara no te mea te taangaanga ra aia i tona maroiroi i te tauturuanga i tetai atu kia kimi i te au i roto roa. Mei ta teia au kite anga e akaari maira, te apiianga i te Pipiria e te taangaangaanga i ta te reira e tuatua ra ka rauka tikai i te taui maata i te oraanga o tetai tangata e kia meitaki atu.

 Au i Roto Roa i Roto i Tetai Ao Manamanata

Te tangata maata o te tuatua enua tei rave ana i te anoano o te Atua ko Iesu Karaiti, e me apii te tangata i te Pipiria ma te Au Kite o Iehova, e maata ta ratou ka apii no runga iaia. I te po i anauiai aia, kua imene te au angera i te au akapaapaa anga a te Atua: “Kia akakakāia te Atua i runga i te rangi teitei, e ei au to to teianei ao, e kia kite aroaia mai te tangata nei.” (Luka 2:14) I te maata anga mai a Iesu, kua manako maata aia i te akameitaki i te au oraanga o te tangata. Kua kite aia i to ratou manako ngakau e kua akaari i te tu tangi aroa tuke ua ake no tei takinga kinoia e tei maki ra. E kia rotai ma te au tuatua a te au angera, kua apai mai aia i tetai tu au i roto roa ki te aronga maru. I te openga o tana angaanga orometua, kua tuatua aia ki tana au pipi: “E au taku e vaio ia kotou nei, ko taku nei au taku e o atu no kotou: kare mei ta to te ao oronga, taku oronga ia kotou. Eiaa e taitaia to kotou ngakau, auraka oki e mataku.”​—Ioane 14:27.

E maata atu a Iesu i te tangata tauturu ua. Kua akaaite aia iaia uaorai ki tetai tiaki, e kua akaaite aia i tana aronga aru akaaka ki te mamoe i te tuatua anga aia: “I aere mai nei ra au kia rauka to ratou ora, e kia maata ua atu te ora. Ko au te tiaki mamoe meitaki ra: ka oronga te tiaki mamoe meitaki i tona uaorai ora no te mamoe.” (Ioane 10:​10, 11) Ae, me akatuke ia atu ki te aronga arataki e manganui i teia tuatau tei manako mua e te maata ia ratou uaorai, kua oronga a Iesu i tona oraanga no tana mamoe.

Akapeea tatou i te puapinga anga mei ta Iesu i rave ra? E manganui tei matau i te au tuatua: “I aroa mai te Atua i to te ao nei, kua tae rava ki te oronga anga mai i tana Tamaiti anau tai, kia kore e mate te akarongo iaia, kia rauka ra te ora mutu kore.” (Ioane 3:16) Te umuumu maira te akonoanga i te akarongo i roto ia Iesu, i te mea mua, te kite no runga iaia e tona Metua, ko Iehova. Ka taki atu te kite i te Atua e Iesu Karaiti ki tetai pirianga vaitata ma te Atua ko Iehova te ka tauturu ia tatou kia rauka te au o te manako.

Kua tuatua a Iesu: “Ka akarongo mai taku mamoe i toku reo, taku rai oki i karanga atu na kia kotou, kua kite oki au ia ratou, e ka aru mai oki ratou iaku: E oronga atu au i te ora mutu kore no ratou; kare rava ratou e mate, e kare rava oki ratou i roto i toku nei rima e riro ia etai ke, me aru mai.” (Ioane 10:​27, 28) Mei teaa atu te pumaana i taua au tuatua ra! E tika, kua tuatua a Iesu no runga i te reira vaitata e rua tauatini mataiti i topa, inara e maata te ririnui o te reira i teianei e mei tei tuatuaia i taua taime ra. Auraka e ngaropoina te ora nei e te maroiroi nei a Iesu Karaiti, te tutaraanga i teianei e ko te Ariki akateronoia o te Patireia i te rangi ra o te Atua. Mei iaia i aaere i te enua i taua au mataiti e manganui i topa, te manako maata nei rai aia no runga i te aronga akaaka tei anoano ra i te au o te manako. Pera katoa, koia rai te Tiaki o tana mamoe. Me aru tatou iaia, ka tauturu aia ia tatou kia rauka te au i roto roa, te ka kapiti maira i te tapapa anga irinaki papu no te kiteanga a te tuatau ki mua i te au tikai​—te aite anga kua kore te takinga kino, te tamaki, e te ta ua.

Te aere maira te au puapinga tikai mei te kiteanga e te irinakianga e ka tauturu a Iehova, na roto ia Iesu, ia tatou. E akamaara ana ia Vania, ei tamaine mapu kua akarukeia mai ma te au apainga maata e te manako anga e kua ngaropoina aia i te Atua? I teianei kua kite a Vania e kare te Atua i akaruke iaia. Kua tuatua aia: “Kua apii mai au e e peretana tika tikai te Atua ma te au tu puapinga tikai. Kua akaneke tona inangaro iaia kia tuku mai i tana Tamaiti ki te enua kia oronga mai i te oraanga no tatou. E mea puapinga i te kite i teia.”

Kua akapapu a Marcelo i tona pirianga ma te Atua e e mea tika tikai. Kua tuatua teia tangata tarekareka i mua ana e: “E putuputu te taime kare te au mapu e kite e eaa te ka rave, e kua o atu ratou i te takinga kino anga ia ratou uaorai. Ka o atu tetai ki roto i te akakino anga apinga akakona, mei iaku rai. Te manakonako nei au e maata atu te ka akameitakiia, mei iaku rai, na te apiianga i te tuatua mou no runga i te Atua e tana Tamaiti.”

 Na roto i tetai apii meitaki anga i te Pipiria, kua akatupu a Marcelo raua ko Vania i te akarongo pakari i roto i te Atua e te irinaki anga papu i tona puareinga anga i te tauturu ia raua kia akono i to raua au manamanata. Me rave tatou i ta raua i rave​—apiianga i te Pipiria e te taangaangaanga i ta te reira e tuatua ra​—ka kite tatou i te maata o te au i roto roa, mei ta raua i rave. Ka tau i reira te akamaroiroianga a te apotetoro ko Paulo ki to tatou turanga: “Auraka rava kotou e apiapi i te au mea katoa nei; e akakite ua ra ki te Atua i to kotou anoano i te au mea katoa ra i te pure, e te pati anga atu ma te akameitaki. E na te au o te Atua, ko tei maata ua atu i te kite tangata, e akamaroiroi mai i to kotou ngakau e to kotou manako i te Mesia nei ia Iesu.”​—Philipi 4:​6, 7.

Kiteaanga i te Au Tikai i Teia Tuatau

Te arataki ra a Iesu Karaiti i te aronga pongi i te tuatua mou ki runga i te mataara te taki ra ki te ora mutu kore i roto i tetai parataito i te enua. Iaia e taki ra ia ratou ki te akamori anga ma a te Atua, te kite ra ratou i te au aiteite atu ki tei akatakaia i roto i te Pipiria: “E noo oki toku ra iti-tangata ki roto i te are au nuingangare, e te nooanga mataku kore e te ngai kanga koreia mai.” (Isaia 32:18) E e tamata anga te reira o te au ka rekareka ratou a te tuatau ki mua. Ka tatau tatou: “Kareka te aronga maru ra, ka noo ïa i te enua, e ka rekareka ratou i te maata o te au ra. Ka riro te enua no te aronga tuatua-tika, ka noo tamou rai ratou i reira.”​—Salamo 37:​11, 29.

No reira ka rauka ainei ia tatou te au i roto roa i teia tuatau? Ae. Pera katoa, ka papu ia tatou a te tuatau ki mua te vaitata maira, ka akameitaki te Atua i te au tangata akarongo ravarai ma te au tei kore i pera i mua ana. Eaa i kore ei, i reira, e pati kiaia na roto i te pure kia oronga mai kia koe i tona au? Me e au manamanata toou te keia ra i te au mei ia koe, e pure mei ta te Ariki ko Davida ra i pure: “Kua maata io nei te mamae o toku ngakau: e akaora koe iaku i toku au tumatetenga nei. E akara mai koe i toku mate e toku mamae; e e akakore mai koe i taku au ara katoa nei.” (Salamo 25:​17, 18) Kia papu e te akarongo maira te Atua i taua au pure. Te oora maira aia i tona nga rima e te tuku maira i te au ki te katoatoa te kimi ra i te reira ma te ngakau tae. Te akapapu aroaia maira tatou: “Te vaitata mairā Iehova i te aronga i kapiki atu iaia, i te aronga i kapiki atu iaia ma te pikikaa kore. E akatika aia i te anoano o te aronga i mataku iaia; ka akarongo mai aia i ta ratou kapiki, e ka akaora oki aia ia ratou.”​—Salamo 145:​18, 19.

[Tataanga i te kapi 5]

Kare e tei te tangata te pakari me kare te kite oonu kia tutara iaia uaorai ma te kore te tauturu, e te aere maira te tauturu puapinga tikai mei te Atua

[Tataanga i te kapi 6]

Ka taki atu te kite i te Atua e Iesu Karaiti ki tetai pirianga vaitata ma te Atua ko Iehova te ka tauturu ia tatou kia rauka te au o te manako

[Tutu i te kapi 7]

Aruanga i te ako anga Pipiria ka akamaata atu i te au o te oraanga ngutuare tangata