Ol Gudfala Eksampol—?Yumi Stap Folem Olgeta?

“YUFALA i soemaot wan gudfala eksampol long fes blong ol man Masedonia mo ol man Akaea, blong oli biaen long yufala.” Aposol Pol i raetem ol toktok ya long ol Kristin long Tesalonaeka we oli gat strong bilif. I stret nomo we Pol i presem olgeta from gudfala eksampol we oli soem long ol narafala Kristin. Be ol Kristin ya long Tesalonaeka oli folem eksampol we Pol mo ol fren blong hem oli soemaot. Pol i talem se: “Taem mitrifala i tekem gud nius i kam long yufala, mifala i no toktok nating nomo. Mifala i toktok, mo mifala i stap mekem ol merikel long paoa blong [tabu spirit], mo mifala i bilif strong se gud nius ya i tru. Mo long taem ya we mifala i stap wetem yufala, yufala i luksave ol gudfala fasin we mifala i mekem, blong soemaot rod long yufala. Nao yufala i stap folem sem rod ya we mifala i folem.”—1 Tesalonaeka 1:5-7.

Yes, Pol i givim ol bigfala toktok long fored blong ol man, be hem i mekem sam samting moa. Ol samting we oli hapen long laef blong hem, oli toktok bigwan—hem i soem gudfala eksampol long saed blong bilif, fasin blong stanap strong long ol hadtaem, mo blong lego plante samting we hem nomo i wantem. From samting ya, fasin blong Pol mo ol fren blong hem i gat bigfala paoa long laef blong ol Kristin long Tesalonaeka, i pulum olgeta blong akseptem trutok long taem ya we oli “kasem plante trabol.” Be i no Pol wetem ol fren blong hem nomo, we oli soem gudfala eksampol long ol Kristin ya. Eksampol blong ol narafala we oli stanap strong tru long ol hadtaem, i leftemap tingting blong ol Kristin ya tu. Pol i raet long ol Kristin long Tesalonaeka i se: “Yufala i kasem trabol stret olsem we ol Kristin man long jos blong God long Judia oli kasem bifo. Ol man ples blong yufala oli mekem i nogud long yufala, stret olsem we ol laen blong Isrel oli mekem long ol Kristin man ya long Judia.”—1 Tesalonaeka 2:14.

Jisas Kraes—Faswan Eksampol

Nating se Pol i soemaot wan gudfala eksampol we i stret blong folem, hem i soem long yumi se Jisas Kraes nao i faswan eksampol we ol Kristin oli mas folem. (1 Tesalonaeka 1:6) Jisas Kraes, hem nao i faswan Eksampol blong yumi. Aposol Pita i raetem se: “Hemia wan fasin we God i singaot yufala blong karem, from we Kraes, hem i harem nogud long bodi blong hem, blong sevem yufala, mo hem i soemaot fasin ya long yufala, blong bambae yufala i biaen long hem.”—1 Pita 2:21.

Be, laef blong Jisas olsem wan man i finis samwe 2,000 yia bifo. Naoia hem i olsem wan spirit man we i no save ded samtaem, “hem i stap long delaet we i saen we i saen, we man i no save kam klosap long hem.” From samting ya, “i no gat man yet we i luk hem, mo i no gat man we bambae i save luk hem samtaem.” (1 Timoti 6:16) ?Olsem wanem nao yumi save folem eksampol blong hem? Wan rod, hemia blong stadi long ol fofala buk blong Baebol we oli tokbaot laef blong Jisas. Ol Gospel oli givim dip save long saed blong ol fasin blong hem, ol samting we hem i mekem, mo “tingting” blong hem. (Filipae 2:5-8) Bambae yumi kasem moa save sipos yumi stadigud long buk ya Man We i Hae Moa Long Olgeta Man. Hemia wan buk we i tokbaot klia ol samting we oli hapen long laef blong Jisas, stat long taem we hem i bon i go kasem we hem i ded.  *

Jisas i soem nambawan eksampol long fasin ya we hem i lego sam samting we hem nomo i wantem, mo eksampol ya i gat bigfala paoa long aposol Pol. Pol i talem long ol Kristin long Korin se: “Mi mi glad blong lusum olgeta samting blong mi, mo laef blong mi tu, blong givhan long yufala.” (2 Korin 12:15) !Yes, Pol i gat sem tingting olsem Kraes! Taem yumi tingbaot eksampol blong Kraes we i stret gud olgeta, samting ya i mas pusum yumi blong folem ol eksampol blong hem long laef blong yumi wanwan.

Eksampol, Jisas i tijim yumi se yumi mas trastem  promes blong God se bambae hem i givim ol samting we yumi nidim long saed blong bodi. Be hem i mekem moa long samting ya. Evri dei, hem i soemaot bilif long Jeova mo i trastem se Jeova bambae i givim ol samting we hem i nidim. Hem i talem se: “Ol wael dog oli gat ol hol blong slip blong olgeta, mo ol pijin oli gat ol bed blong olgeta. Be mi, mi Pikinini blong Man, mi no gat ples blong mi, blong go slip long hem.” (Matiu 6:25; 8:20) ?Olsem wanem long yu? ?Ol samting long saed blong bodi oli faswan samting we yu stap tingbaot mo bisi blong mekem? ?No laef blong yu i pruvum se yu putum Kingdom blong God fastaem? ?Wanem tingting blong yu long saed blong wok blong Jeova? ?Tingting blong yu i sem mak olsem tingting blong Eksampol blong yumi, Jisas? Baebol i soem se Jisas i no jes talemaot long ol man blong gat strong tingting, be hem wan i soemaot strong tingting ya plante taem long ol aksin blong hem. (Jon 2:14-17) !Antap long hemia, Jisas i soem nambawan eksampol long saed blong lav! !Tingbaot, hem i givim prapa laef blong hem from ol disaepol blong hem! (Jon 15:13) ?Olsem wanem long yu? ?Yu stap soem lav long ol Kristin brata blong yu olsem we Jisas i bin mekem? no ?Yu letem ol mastik blong ol narafala i blokem yu blong soem lav long olgeta?

Taem yumi stap traehad blong folem eksampol blong Kraes, samtaem bambae yumi mekem mastik. Be yumi sua se Jeova i glad long ol traehad we yumi mekem blong ‘putum Masta Jisas Kraes, olsem klos blong faet blong yumi, we i save blokem olgeta samting.’—Rom 13:14.

‘Soem Eksampol Long Ol Sipsip’

?I gat sam man insaed long kongregesen tede we oli gudfala eksampol blong folem? !Yes, i gat! Ol brata we oli gat wok long kongregesen, oli mas soem gudfala eksampol. Pol i talem long Taetas, we i bin wok long ol kongregesen long Krit mo i bin putumap ol elda, se wanwan long ol elda we hem i putumap i mas man we i “no gat rabis poen long hem.” (Taetas 1:5, 6) Long sem fasin, aposol Pita i givim advaes long “ol elda” se oli mas soem gudfala ‘eksampol long ol sipsip.’ (1 Pita 5:1-3) ?Mo olsem wanem long ol man blong givhan? Olgeta tu, oli mas “ol man we oli wok gud long wok ya.”—1 Timoti 3:13.

Be, samting ya i no minim se bambae olgeta elda evriwan oli mas gat gudhan long evri haf blong Kristin minista wok, nogat. Pol i talem long ol Kristin long Rom se: “Long gladhat blong God, hem i givim ol spesel paoa long yumi we oli naranarafala.” (Rom 12:6) Ol wanwan brata oli no sem mak, wan i save mekemgud wan wok, narafala i save mekemgud narafala wok. I no waes nating blong ting se ol elda bambae oli mekem mo talem evri samting long wan rod we i stret gud oltaem. Long Jemes 3:2, Baebol i talem se: “Plante taem, yumi evriwan i mekem i no stret. Be man we i no mekem mastik samtaem long toktok blong hem, hem i wan man we i stret gud olgeta.” Be nating se ol elda oli mekem mastik samtaem, oli save mekem olsem Timoti, oli ‘soemaot gudfala eksampol long ol Kristin man, blong oli save folem fasin blong toktok blong olgeta, mo mekem fasin we i stret, mo gat strong bilif, mo lavem ol man, mo gat wan laef we i klin gud.’ (1 Timoti 4:12) Taem ol elda oli mekem olsem, ol sipsip bambae oli rere blong folem advaes we i stap long Hibrus 13:7 we i talem se: “Bambae yufala i no fogetem ol man ya we . . . oli stap lidim yufala. . . . Oltaem yufala i mas tingbaot fasin blong olgeta, . . . nao yufala i mas biaen long olgeta, long fasin blong bilif blong olgeta.”

Ol Narafala Eksampol Long Taem Blong Yumi

Long ol yia we i jes pas, plante brata oli soem gudfala eksampol we yumi save folem. Sam long olgeta ya, hemia plante taosen misinari we oli ‘lego haos blong olgeta, brata sista blong olgeta, papa no mama blong olgeta, pikinini blong olgeta, no graon blong olgeta,’ blong go mekem Kristin wok long ol narafala kantri. (Matiu 19:29) Mo tu, tingbaot ol elda we oli stap goraon blong visitim ol kongregesen wetem ol waef blong olgeta, ol man mo ol woman we oli wok fri nomo long ol ofis blong Watch Tower Society, mo ol paenia we oli stap wok long ol kongregesen. ?Ol gudfala eksampol blong olgeta ya oli save pusum ol narafala blong mekem sem mak? Wan Kristin brata long Esia i tingbaot wan misinari we i kamaot long namba eit klas blong Watchtower Bible School of Gilead. Hem i talem se, brata ya we i gat strong bilif, hem i “rere blong go long ples we i hot tumas mo i gat fulap moskito. . . . Be samting we i mekem mi mi sapraes bigwan, hemia se hem i save prij long lanwis blong ol man Jaena mo Malesia, nating se hem i blong Inglan.” ?Nambawan  eksampol ya i karem wanem frut? Brata ya i talem se: “Kwaet fasin mo strong tingting blong hem i pusum mi blong wantem wok olsem misinari taem mi kam bigman.” I no wan samting blong sapraes se brata ya i kam wan misinari.

Buk ya, Watch Tower Publications Index i givim plante trufala stori we oli kamaot long Wajtaoa mo Wekap! magasin. Ol stori ya oli tokbaot ol brata mo sista we oli lego ol wok blong winim mane mo ol samting blong wol we oli bin wantem blong kasem, oli winim ol slak fasin, oli jenisim laef blong olgeta fulwan, oli holemtaet gudfala tingting taem oli fesem ol bigfala traem, oli soem se oli wok strong, oli stanap strong, oli stap tru long God, oli gat tingting daon, mo oli livim plante samting we olgeta nomo i wantem. Wan man we i ridim ol stori ya i talem se: “Taem mi ridim ol stori ya, oli mekem se mi kam wan Kristin we mi gat tingting daon mo mi gat fasin tangkiu, mo samting ya i halpem mi blong no tingbaot mi wan tumas.”

Antap long hemia, yu no mas fogetem ol nambawan eksampol blong olgeta we oli stap long kongregesen blong yu: ol hed blong famle we oltaem oli traehad blong givim ol samting we famle blong olgeta i nidim, long saed blong bodi mo spirit; ol sista—wetem ol mama we oli no gat hasban—we oli stap traehad blong lukaot long pikinini blong olgeta, mo long sem taem oli strong long wok blong prij. Mo tu, yumi no fogetem gudfala eksampol blong olgeta we oli olfala mo we oli sik be oli stap gohed wetem strong bilif, nating se oli no strong, mo helt blong olgeta i kam nogud. ?Ol eksampol ya oli pulum yu blong mekem sem mak?

I tru, wol ya i fulap long ol rabis eksampol. (2 Timoti 3:13) Nating se i olsem, makemgud advaes we Pol i givim long ol Kristin long Judia. Fastaem, aposol Pol i tokbaot plante gudfala eksampol blong ol man mo woman long taem bifo, we oli gat strong bilif. Ale biaen, hem i talem long ol Kristin ya blong Judia se: “Nao olgeta ya we oli stap bilif strong long God, mo oli witnes blong hem, olgeta oli stap raonabaot long yumi we oli plante we oli plante. Nao from samting ya, . . . yumi mas mekem tingting blong yumi i strong, blong yumi resis long rod ya we i stap long fes blong yumi. Mo oltaem yumi mas luk long Jisas we hem nomo i stamba blong bilif blong yumi, i stat long stat blong hem gogo i kasem en blong hem.” (Hibrus 12:1, 2) Tede tu, yumi ol Kristin, yumi gat “plante” gudfala eksampol—ol eksampol blong bifo mo tede tu. ?Yu yu stap folem ol eksampol ya? Yu save kasem gudfala frut sipos yu gat strong tingting blong ‘no folem ol fasin we i nogud, be blong folem ol fasin we i gud nomo.’—3 Jon 11.

[Futnot]

[Tok blong makem poen long pej 20]

I no stret blong ting se evri elda mo man blong givhan, olgeta evriwan oli mas gat gudhan long evri haf blong Kristin minista wok

[Tok blong pija long pej 21]

Ol elda oli mas kam olsem ol ‘gudfala eksampol long ol sipsip’