Au Akaraanga Meitaki—Te Puapinga ra Ainei Koe mei ia Ratou?

“E KUA riro oki kotou ei akaraanga na te aronga katoa i akarongo i Makedonia ua e i Akaia nei.” Kua tata te apotetoro ko Paulo i teia au tuatua ki te au Kerititiano tiratiratu te noo ra i Tesalonia. Te akaraanga tei akanooia e ratou no te au taeake irinaki ra e mea meitaki tikai. Noatu rai, te ariu ra to Tesalonia ki te akaraanga tei akanooia e Paulo e tona au taeake. Kua tuatua a Paulo e: “I te mea kare ta matou evangelia i tae tuatua vaa ua atu ia kotou na, ma te mana katoa ra, e ma te Vaerua Tapu, e ma te kite pu tikai; kua kite oki kotou i to matou tu i rotopu ia kotou, kia meitaki kotou. E i riro mai nei oki kotou ei aru ia matou.”​—1 Tesalonia 1:​5-7.

Ae, e maata atu ta Paulo i rave i te akakite ua anga i te au tuatua. E tu oraanga akakeu anga tona​—e akaraanga no te akarongo, te akakoromaki, e te akaatinga uaorai. No teia, kua riro mai a Paulo e tona au taeake ei akakeu anga ririnui ki te au oraanga o to Tesalonia ra, te akanekeanga ia ratou kia ariki i te tuatua mou “ma te mate maata.” Inara, kare, e ko Paulo ua e tona au taeake tei akakeu papu i taua aronga irinaki ra. Te akaraanga o tetai atu tei akakoromaki i te mate maata kua riro katoa ei akamaroiroi anga. Kua tata a Paulo ki to Tesalonia: “Riro atura oki kotou, e te au taeake, ei aru i te au ekalesia a te Atua i roto i te Mesia ra ia Iesu i Iudea ra; okotai rai tu to kotou uaorai, e to ratou i te ngati Iuda.”​—1 Tesalonia 2:14.

Iesu Karaiti​—Te Akaraanga Mua Tikai

Noatu rai kua akanoo a Paulo i tetai akaraanga tau tikai kia aruia, kare aia i kore ana i te tou atu kia Iesu Karaiti e ko te akaraanga maata ka tau te au Kerititiano ra kia aru. (1 Tesalonia 1:6) Ko Karaiti oki i teianei to tatou Akaraanga mua tikai. Kua tata te apotetoro ko Petero: “I kapikiiaʼi oki kotou; i mate katoa oki te Mesia uaorai no kotou; e kua vaoo oki i te akaraanga na kotou, kia aru kotou i tona takainga vaevae.”​—1 Petero 2:21.

Inara, kua akaoti a Iesu i tona oraanga ei tangata vaitata rai e 2,000 mataiti i topa. Teianei ‘te noo ra [aia] ki roto i te mārama kare e taea e te tangata katoa’ ei vaerua mate kore. No te reira, “ko tei kore rava oki i akaraia e te tangata katoa, e kare takiri oki e tika kia akara” ia aia. (1 Timoteo 6:16) Akapeea, i reira, tatou i te aru anga iaia? Ko tetai mataara na te apiianga i nga tataanga Pipiria e a no runga i te oraanga o Iesu. Te oronga maira te au Evangeria i te kite oonu i roto i tona tu tangata, te oraanga, e te “tu ngakau.” (Philipi 2:​5-8) Ka rauka katoa tetai atu kite oonu na te apii meitaki anga i te puka Te Tangata Maata Rava Atu Tei Ora Ana, tei uriuri i te au tupu anga o te oraanga o Iesu ma te maata e na roto i te papaanga tau. *

Kua akatupu te akakeu anga ririnui o te akaraanga akaatinga uaorai o Iesu i te apotetoro ko Paulo. Kua akakite aia i te au Kerititiano Korinetia: “E kua tika rava iaku i te akaope i toku nei ririnui e kia ope rava no to kotou vaerua.” (2 Korinetia 12:15) Mei teaa ra ia tu aite ki to Karaiti ra! Ia tatou e manakonako ra i te akaraanga apa kore o Karaiti, ka tau katoa tatou kia akanekeia kia aru iaia i roto i to tatou uaorai oraanga.

Ei akatauanga, kua apii mai a Iesu ia tatou e kia irinaki tatou ki runga i te taputou a te Atua kia oronga mai i te au mea pae kopapa. Inara e maata atu tana i rave. Kua akatutu aia i taua akarongo e  te irinaki papu ki roto ia Iehova i te au ra ravarai. Kua tuatua aia: “E ana to te suoli, e toanga to te manu o te reva, kareka te Tamaiti a te tangata, kare ona urunga upoko.” (Mataio 6:25; 8:20) Te autu ra ainei te au manako anga apinga i taau e manako ra e te rave anga? Me kare te oronga ra ainei toou oraanga i te kiteanga e te kimi ra koe i te Patireia na mua? E akapeea toou tu ki te angaanga a Iehova? Te aite ra ainei te reira mei to tatou Akaraanga, ko Iesu? Te akaari maira te Pipiria e kare a Iesu i tutu aere ua i te maroiroi inara kua akatutu i taua tu maroiroi tikai ra i etai au atianga e manganui. (Ioane 2:​14-17) Pera katoa, mei teaa te meitaki i te akaraanga ta Iesu i akanoo no runga i te aroa! No teaa, kua akaatinga aia i tona uaorai oraanga no tana au pipi! (Ioane 15:13) Te aru ra ainei koe ia Iesu na te akaarianga i te aroa ki toou au taeake Kerititiano? Me kare te akatika ra ainei koe i te tu apa ua o etai kia arai i toou inangaro no ratou?

I ta tatou tautaanga i te aru i te akaraanga o Karaiti, e putuputu te taime ka inga tatou. Inara papu tikai te mareka maira a Iehova i ta tatou tauta anga kia ‘tuku ra i ta te Atu i ta Iesu Mesia ki runga’ ia tatou.​—Roma 13:14.

‘Ei Kaveinga ra no te Anana’

Te vaira ainei tetai au tangata tataki tai i roto i te putuputuanga i teia tuatau te ka riro ei au akaraanga no tatou? Papu rai te vaira! Kia akanoo tikai te au taeake i roto i te au turanga akataoongaia ma te apainga i tetai akaraanga. Kua akakite a Paulo kia Tito, tei tavini i te au putuputuanga i Kereta e tei akataoonga i te au akaaere, e kia riro tetai tangata pakari akataoongaia ei “tangata apa kore.” (Tito 1:​5, 6) Ma te aiteite kua ako maira te apotetoro ko Petero i te “aronga orometua” kia riro mai ‘ei kaveinga ra no te anana.’ (1 Petero 5:​1-3) Akapeea te aronga te tavini ra ei au orometua tavini? Kia riro katoa rai ratou ei “aronga oki i rave meitaki ana i te taoonga diakono ra.”​—1 Timoteo 3:13.

E tikai, kare i te mea tika tikai kia tapapa e ka karape tikai te aronga pakari katoatoa me kare tetai orometua tavini i te au tu ravarai o te angaanga orometua Kerititiano. Kua akakite a Paulo ki te au Kerititiano i Roma: “E taoonga ke ke anake to tatou, e tau i te meitaki i orongaia mai kia tatou nei.” (Roma 12:6) Tukeke te au taeake te tere ra ki mua i etai atu au ngai tukeke. Kare i te mea tau kia tapapa atu e ka rave te aronga pakari e ka tuatua i te au mea na roto i te tu apa kore. “Te apa anake nei tatou i te au mea katoa e manganui,” i na te Pipiria ei ia Iakobo 3:2. “E kia kore tetai tangata e apa i te tuatua ra, e tangata meitaki rava aia, e tika iaia kia tapeka i te kopapa katoa ra.” Inara, noatu to ratou au tu apa ua, ka riro rai te aronga pakari, mei ia Timoteo rai, “ei akaraanga ra koe na tei akarongo ra, i te tuatua, i te aerenga, i te aroa, i te tu o te ngakau ra, i te akarongo ra, i te viivii kore.” (1 Timoteo 4:12) Me akapera te aronga pakari, ka taangaanga ua te anana i te ako anga ia Ebera 13:7: “E akamanako i to kotou au arataki, . . . e aru atu i to ratou akarongo, ma te manako i te openga o ta ratou tuatua.”

Tetai atu Au Akaraanga o Teia Tuatau

I te au ngauru mataiti i topa, e manganui te aronga tei akaari ia ratou uaorai ei au akaraanga meitaki. Akapeea te au tauatini au mitinari tei akaatinga ia ratou uaorai i “akaruke ei i te are, e te au taeake, e te au tuaine, e te metua tane, e te metua vaine, e te vaine, e te tamariki, e te enua” kia akatupu i te akauenga Kerititiano i te au ngai ke? (Mataio 19:29) E akamanako, katoa, i te au akaaere tutaka e ta ratou au vaine, te au tane e te au vaine tei tavini ei aronga oronga ua i te au opati o te Taiate Punanga Tiaki, e te au painia tei tavini ra i te au putuputuanga. Ka rauka ainei i taua au akaraanga i te akakeu i tetai atu? Kua maara i tetai tangata evangeria Kerititiano i Asia tetai mitinari mei te pupu varu o te Apii Pipiria Punanga Tiaki o Gileada. Kua tuatua aia e kua “puareinga [ua teia taeake tiratiratu] i te aro atu i te au namu e te reka kore o te reva. . . . Tei umere rava atu kua rauka iaia i te tuatua i nga reo e rua te Tinito e te Malay noatu e no Engarani mai aia.” Te tupu anga o teia akaraanga meitaki?  Kua tuatua te taeake e: “Kua akauru tona tu maru e te irinaki papu iaku kia riro mai ei mitinari me maata mai au.” Kare i poitirere ana, kua riro mai teia taeake ei mitinari.

Kua ki te Watch Tower Publications Index i te papaanga o te au tua oraanga e maata ua atu tei kiteaia i roto i te au makatini Te Punanga Tiaki e te Awake! Te akakite ra teia au tua i te au tangata tataki tai tei akaruke i ta ratou au angaanga o te ao e te au akakoroanga, kua autu i te au tu paruparu, kua rave i te au taui anga tu tangata, kua akono i te tu papu noatu te tumatetenga, e kua akaari i te tu angaanga pakari, te akakoromaki, te tiratiratu, te akaaka, e tetai tu akaatinga uaorai. Kua tata tetai vaine tatau no runga i teia au tataanga: “Te akariro maira ratou iaku ei Kerititiano akaaka e te akameitaki ua iaku e tatau ra i ta tetai atu i na roto, e kua tauturu mai ratou iaku auraka kia manako maata iaku uaorai me kare kia manako noinoi.”

Pera katoa, auraka e ngaropoina i te au akaraanga meitaki i roto i taau putuputuanga: te au upoko ngutuare tangata tei akono autu kore i te au umuumu anga i te pae kopapa e te pae vaerua o to ratou ngutuare tangata; te au tuaine​—kapiti mai i te au metua vaine kare i akaipoipo​—tei akono i te au taomianga no te utuutuanga i tetai tamaiti koi rave maroiroi ei i te angaanga orometua; te aronga pakarikari e tei maki tei tamou tiratiratu ua atu noatu te maata o te tu paruparu e te kino i te pae kopapa. Kare ainei koe i akanekeia e taua au akaraanga?

E tika, te ki ra te ao i te au akaraanga kino. (2 Timoteo 3:13) Noatu rai, e akamanako ana i ta Paulo raurau anga ki te au Kerititiano e noo ra i Iudea. I muri ake i te manako anga i te tu meitaki o te au tane taito e te au vaine akarongo e manganui, kua raurau te apotetoro ko Paulo: “E teianei, kua akapiniia tatou e taua urupu maata i kite nei, . . . e oro tamou marie ei i teianei oroanga i tukuia mai ki mua ia tatou nei, ma te akara tamou kia Iesu i te tumu e te akaoti i to tatou akarongo.” (Ebera 12:​1, 2) Te koropiniia nei rai te au Kerititiano i teia tuatau e tetai ‘urupu maata’ meitaki te au akaraanga​—i te tuatau taito e i teia tuatau. Te puapingaia ra ainei koe mei ia ratou? Ka rauka ia koe me te tauta ra koe “auraka e aru atu i te tuatua kino, i te tuatua meitaki ra.”​—3 Ioane 11.

[Tataanga Rikiriki i Raro]

[Tataanga i te kapi 20]

Kare i te mea tika tikai kia tapapa e ka karape tikai te aronga pakari katoatoa me kare tetai orometua tavini i te au tu ravarai o te angaanga orometua Kerititiano

[Au Tutu i te kapi 21]

Kia riro te aronga pakari ‘ei kaveinga ra no te anana’