Dapat Mo Bala Usisaon ang Iban nga mga Relihion?

“HALOS isa ka tuig ako nga nagtambong sa Cristianong mga miting, kag nalipay ako sa pagsugid sa iban tuhoy sa Ginharian sang Dios,” siling ni Miguel, nga isa na karon sang mga Saksi ni Jehova sa Bagatnan nga Amerika. “Nian nagsugod ako sa pagpamati sa relihioso nga mga programa sa radyo kag sa pagtan-aw sa relihioso nga mga manugwali sa telebisyon. Nagdumdom ako nga ining mga programa makabulig sa akon nga mahangpan sing maayo pa ang mga tawo sang iban nga mga relihion. Narealisar ko nga ang ila mga panudlo wala nahisuno sa Biblia, apang luyag ko lang mahibaluan.”

Sa amo man nga pungsod, si Jorge makugi sa pagtudlo sa iban tuhoy sa matuod nga pagsimba. Apang, sa isa ka tion, nagsugod man sia sa pagpamati sa relihioso nga mga programa sa radyo kag telebisyon. “Dapat mo mahibaluan ang ginahunahuna sang iban,” masami niya anay nga ginasiling. Kon ginapamangkot tuhoy sa mahimo nga mga katalagman sining pagpadayag sa butig nga mga panudlo, nagasabat sia: “Wala sing butang nga mahimo makapaluya sa pagtuo sang isa nga nakahibalo sang kamatuoran sang Biblia.” Ining mga eksperiensia nagapautwas sing importante nga pamangkot, Maalamon bala nga pamatian ang ginapatihan sang iban?

Pagkilala sa Matuod nga Cristianismo

Sang napatay ang mga apostoles, ang matuod nga pagsimba nadagtaan sang amat-amat nga pagtuhaw sang madamo nga porma sang huwad nga Cristianismo. Nagapaabot sini, ginsugid ni Jesus ang isa ka paagi agod makilala ining huwad nga mga porma sang Cristianismo gikan sa matuod nga Cristianismo. Una, nagpaandam sia: “Mangin mabinantayon kamo sa butig nga mga manalagna nga nagapalapit sa inyo nga nagapanapot sing karnero, apang sa sulod manunukob sila nga mga lobo.” Pagkatapos nagsiling pa sia: “Paagi sa ila mga bunga makilala ninyo sila.” (Mateo 7:15-23) Ginabuhat sang matuod nga mga sumulunod ni Jesus ang iya gintudlo, kag mahapos sila makilala paagi sa ila mga bunga. Subong sang ginhimo mismo ni Jesus, ginaduaw nila ang mga tawo agod ipaathag ang Ginharian sang  Dios gikan sa Kasulatan. Nagasunod sang halimbawa ni Jesus, wala sila nagapakigbahin sa politika sang kalibutan kag mga kasuayon sa katilingban. Ginabaton nila ang Biblia subong Pulong sang Dios kag ginatahod ini subong ang kamatuoran. Ginapakilala nila ang ngalan sang Dios. Kag bangod ginatinguhaan nila nga iaplikar ang gugma nga ginatudlo sang Dios, wala sila nagapakigbahin sa mga inaway. Sa baylo, ginapakig-angutan nila ang isa kag isa subong mga utod.—Lucas 4:43; 10:1-9; Juan 13:34, 35; 17:16, 17, 26.

Suno sa Kasulatan, posible nga ‘makita ang kinatuhayan sa ulot sang isa nga matarong kag sang isa nga malauton, sa ulot sang isa nga nagaalagad sa Dios kag sang isa nga wala nagaalagad sa iya.’ (Malaquias 3:18) Ang matuod nga mga sumilimba karon nahiusa sa panghunahuna kag sa buhat, subong anay sang unang-siglo nga mga Cristiano. (Efeso 4:4-6) Kon nakilala mo na ining hubon sang matuod nga mga Cristiano, ngaa dapat pa ikaw mangin mausisaon ukon interesado tuhoy sa pagtuluuhan sang iban?

Mag-andam sa Butig nga mga Manunudlo

Ginabaton sang Biblia nga bisan nahibaluan na ang kamatuoran sa Biblia, may katalagman nga madagtaan sa espirituwal gikan sa butig nga mga panudlo. Si apostol Pablo nagpaandam: “Magbantay: basi may isa nga magatangab sa inyo subong natukob niya paagi sa pilosopiya kag walay unod nga daya suno sa tradisyon sang mga tawo, suno sa nahauna gid nga mga butang sang kalibutan kag indi suno kay Cristo.” (Colosas 2:8) Daw ano kaathag nga paglaragway ang ginapakita sining teksto! Kaangay sang mga sapat nga luyag magtangab sa imo kag magtukob sa imo, ang butig nga mga manunudlo makatalagam gid.

Matuod, gintalupangod ni Pablo ang ginapatihan sang iban. Ginsugdan niya anay ang isa ka diskurso paagi sa pagsiling: “Mga lalaki sa Atenas, nakita ko nga sa tanan nga butang mas mahinadlukon kamo sa mga dios sangsa iban. Halimbawa, samtang nagaagi kag nagapanilag sing maayo sa mga butang nga inyo ginahangad nakita ko man ang isa ka halaran nga sa sini nasulatan ‘Sa Wala Makilal-i nga Dios.’” (Binuhatan 17:22, 23) Apang, wala ni Pablo ginpasulod sing tayuyon sa iya hunahuna ang mga pilosopiya sang Griegong mga orador.

Isa ka butang ang pagtigayon sing ihibalo tuhoy sa mga ginhalinan kag pagtuluuhan sang butig nga mga relihion apang tuhay naman ang padayon nga pagpasulod sini sa hunahuna. * Si Jehova nagtangdo sang “matutom kag mainandamon nga ulipon” sa pag-aman sing panudlo nga napasad sa iya Pulong. (Mateo 4:4; 24:45) Si Pablo mismo nagsulat: “Indi kamo makaambit sa ‘latok ni Jehova’ kag sa latok sang mga demonyo. Ukon ‘ginapukaw bala naton si Jehova sa kaimon’?”—1 Corinto 10:20-22.

Ang iban nga butig nga mga manunudlo mahimo nga matuod nga mga Cristiano anay, apang sa isa ka tion nagtalikod sila gikan sa kamatuoran pakadto sa sayop. (Judas 4, 11) Indi ini dapat magpakibot sa aton. Pagkatapos naghambal tuhoy sa “matutom kag mainandamon nga ulipon” nga nagatiglawas sa hubon sang hinaplas nga mga Cristiano, si Jesus naghambal tuhoy sa “malaut nga ulipon,” isa ka klase nga nagayamo, “ang akon agalon nagapalantang,” kag nagsugod sa pagsakit sa mga masigkaulipon. (Mateo 24:48, 49) Sa masami, ining mga indibiduwal kag ang ila mga sumulunod wala sing maathag nga mga panudlo nga ila kaugalingon; interesado lamang sila sa pagguba sa pagtuo sang iban. Tuhoy sa ila, si apostol Juan nagsulat: “Kon ang bisan sin-o magkadto sa inyo kag wala nagadala sining panudlo, indi sia pagbatuna sa inyo puluy-an ukon maghambal sing isa ka panamyaw sa iya.”—2 Juan 10; 2 Corinto 11:3, 4, 13-15.

Maayo nga binagbinagon sing maayo sang mga tawo nga nagapangita sing kamatuoran ang nabatian nila gikan sa nagkalainlain nga relihion. Sa ulihi, pakamaayuhon sang Dios ang bunayag-sing-tagipusuon nga mga indibiduwal nga nagapangita sing kamatuoran. Ang Biblia nagasiling tuhoy sa diosnon nga kaalam: “Kon padayon mo ini nga pangitaon subong sang pilak kag usisaon ini subong sang bahandi nga natago, kon amo . . . makita mo ang ihibalo mismo sa Dios.” (Hulubaton 2:4, 5) Bangod nakita na ining ihibalo sa Dios paagi sa Biblia kag sa Cristianong kongregasyon kag bangod nakita na kon paano ginapakamaayo ni Jehova ang mga ginatuytuyan sinang ihibalo, ang matuod nga mga Cristiano wala na nagapadayon sa pagpamati sa butig relihioso nga mga panudlo.—2 Timoteo 3:14.

[Nota]