Kingdom Blong God—Niufala Gavman Blong Wol
Kingdom Blong God—Niufala Gavman Blong Wol
“Kingdom ya . . . bambae hem i smasem mo i finisim olgeta kingdom ya, mo hem nomo bambae i stanap olwe.”—Daniel 2:44, NW.
1. ?Yumi save trastem Baebol from wanem samting?
BAEBOL hem i tok we God i givim long ol man. Aposol Pol i raetem se: “Taem mifala i tekem tok blong God i kam long yufala, yufala i kasemgud. Yufala i no tekem olsem we i tok blong man nomo, yufala i kasemgud from we hem i tok blong God stret.” (1 Tesalonaeka 2:13) Baebol i tokbaot plante samting we yumi nidim blong save long saed blong God. Yumi kasem save long saed blong ol fasin blong hem, stamba tingting blong hem, mo wanem samting we hem i wantem yumi blong mekem. Baebol i holem ol beswan advaes long saed blong famle laef mo fasin blong yumi evri dei. Hem i tokbaot ol profet tok we oli bin kamtru bifo, we oli stap kamtru naoia, mo we bambae oli kamtru long fiuja. Yes, “olgeta tok blong Baebol oli kamaot long God fastaem. Hem i putum long tingting blong ol man ya bifo, nao oli raetem long buk. Ol tok ya i stret gud blong tijim yumi long ol trutok, mo blong blokem ol krangke tok. Mo i stret gud blong stretem ol krangke fasin, mo blong tijim yumi long ol stret fasin. Ol tok ya, God i givim blong bambae yumi ol man blong hem yumi save kam waes long olgeta samting, nao bambae yumi savegud ol rod blong mekem ol gudfala wok.”—2 Timoti 3:16, 17.
2. ?Olsem wanem Jisas i mekem stamba tok blong Baebol i kamaot long klia ples?
2 Samting we i impoten tumas insaed long Baebol, hemia stamba tok blong hem se God bambae i yusum Kingdom blong hem long heven blong leftemap hae rul (no raet blong rul) blong hem. Jisas i mekem minista wok blong hem i stanap long stamba tok ya. “Jisas i stap prij, i talem se, ‘Yufala i mas tanem tingting blong yufala from ol sin blong yufala, from we taem blong God i kam King blong olgeta man long wol, i kam klosap finis.’” (Matiu 4:17) Hem i soemaot se Kingdom ya i mas stap long wanem ples long laef blong yumi, taem hem i se: “Yufala i mas gohed blong lukaot kingdom mo stret fasin blong hem fastaem.” (Matiu 6:33, NW) Mo tu, hem i soemaot se kingdom ya i impoten tumas taem hem i tijim ol man blong hem blong prea long God se: “Yu letem kingdom blong yu i kam. Yu mekem ol samting we yu yu wantem oli kamaot long wol, olsem we oli kamaot finis long heven.”—Matiu 6:10, NW.
Niufala Gavman Long Wol
3. ?From wanem Kingdom blong God i impoten tumas long yumi naoia?
3 ?From wanem Kingdom blong God i impoten tumas long ol man? From we i no longtaem bambae hem i mekem sam samting we oli jenisim rul we i stap long wol blong olwe. Profet tok blong Daniel 2:44 (NW) i talem se: “Long taem blong ol king ya [we oli stap rul long wol naoia], God blong heven bambae i stanemap wan kingdom [wan gavman long heven] we neva i save brokdaon. Mo bambae kingdom ya i no save go long han blong narafala nesen. Bambae hem i smasem mo i finisim olgeta kingdom ya [ol gavman blong wol], mo hem nomo bambae i stanap olwe.” Taem Kingdom blong God long heven i rul fulwan, neva bambae ol man oli save bos long wol ya bakegen. Rul blong man we i mekem ol man oli seraot mo oli harem nogud bambae oli samting blong bifo nomo.
4, 5. (a) ?From wanem Jisas i beswan man blong stap olsem King long Kingdom? (b) ?Wanem spesel wok we Jisas bambae i mekem i no longtaem long fiuja?
4 Jif Rula blong Kingdom ya we i stap long heven, aninit long paoa blong Jeova, hem i wan man we i naf gud olgeta—hemia Jisas Kraes. Bifo we hem i kam long wol, hem i bin stap long heven olsem wan “nambawan man blong wok,” hem i faswan long olgeta samting we God i wokem. (Ol Proveb 8:22-31, NW) “Hem i pija blong God ya we yumi no save luk. Hem i fasbon blong olgeta samting we God i wokem, from we tru long hem, God i wokem olgeta narafala samting long heven mo long wol.” (Kolosi 1:15,16, NW) Mo taem God i sanem Jisas i kam long wol, oltaem hem i mekem samting we God i wantem. Hem i stanap strong long ol bigfala traem mo hem i stap tru long Papa blong hem go kasem taem we hem i ded.—Jon 4:34; 15:10.
5 From we Jisas i stap tru long God gogo kasem we hem i ded, hem i kasem blesing. God i mekem hem i laef bakegen blong go long heven mo i givim raet long hem blong kam King long Kingdom blong hem long heven. (Ol Wok 2:32-36) Olsem King long Kingdom, Jisas Kraes bambae i gat nambawan wok ya we God i givim long hem blong lidim plante milian strongfala spirit man oli go blong tekemaot rul blong ol man long wol mo finisim ol rabis fasin long wol ya. (Ol Proveb 2:21, 22; 2 Tesalonaeka 1:6-9; Revelesen 19:11-21; 20:1-3) Nao Kingdom blong God long heven, we Kraes i rul long hem, bambae i stap olsem niufala gavman ya we hem wan nomo i rulum ful wol.—Revelesen 11:15.
6. ?Yumi sua se rul blong King ya long Kingdom bambae i olsem wanem?
6 Baebol i tokbaot niufala Rula ya blong wol i se: “Oli givim paoa blong rul mo haenem mo kingdom long hem, blong olgeta pipol, mo olgeta nesen, mo olgeta lanwis, bambae oli mekem wok blong hem.” (Daniel 7:14, NW) From we Jisas i folem fasin blong God we i gat lav, bambae pis mo fasin glad oli bigwan aninit long rul blong hem. (Matiu 5:5; Jon 3:16; 1 Jon 4:7-10) “Gavman blong hem bambae i holem paoa mo givim pis we bambae i no save finis samtaem, . . . bambae hem i leftemap rul ya wetem stret fasin blong jajem man mo ol fasin we oli stret.” (Aesea 9:7, Revised Standard Version) !Bambae i wan blesing blong gat wan Rula we i rul wetem lav, i jajem man long stret fasin, mo we ol fasin blong hem oli stret gud! Taswe, 2 Pita 3:13 i talemaot se: “God i promes finis blong putum niufala skae [Kingdom blong God long heven] mo niufala wol [wan niufala grup blong man long wol], we stret fasin nomo bambae i stap long hem. Mo yumi stap wet long ol samting ya blong oli kamtru.”
7. ?Olsem wanem Matiu 24:14 i stap kamtru tede?
7 I sua se Kingdom blong God hem i beswan nius blong olgeta we oli laekem fasin we i stret. Taswe, taem Jisas i tokbaot saen ya we bambae i makemaot se yumi stap long ol ‘lasdei’ blong rabis wol ya, hem i talem se: “Bambae ol man oli stap talemaot gud nius ya, se God i King blong olgeta man. Bambae oli talemaot long olgeta ples long wol, blong oli witnes blong hem long fes blong olgeta man. Nao biaen, bambae [“en,” NW] i save kam.” (2 Timoti 3:1-5; Matiu 24:14) Profet tok ya i stap kamtru naoia. I gat raonabaot sikis milian Witnes blong Jeova long 234 kantri we oli spenem bitim wan bilian aoa evri yia blong talemaot Kingdom blong God long ol narafala man. I stret nomo we oli putum nem ya Haos Kingdom long ol wanwan haos wosip blong olgeta, we samwe long 90,000 kongregesen raon long wol oli stap yusum. Long ol haos ya, ol man oli save kam blong lanem moa long saed blong niufala gavman ya we bambae i kam.
Sam Narafala Rula
8, 9. (a) ?Olgeta we bambae oli joen wetem Kraes blong rul, oli kam long wea? (b) ?Yumi sua se rul blong King ya wetem ol narafala rula we oli joen wetem hem, bambae i olsem wanem?
8 Bambae i gat sam narafala rula we oli joen wetem Jisas Kraes long Kingdom blong God long heven. Revelesen 14:1-4 i talem se i gat 144,000 man we God i “tekemaot olgeta long ol narafala man” nao oli laef bakegen long ded blong go long heven. Olgeta ya oli ol man mo woman we oli no letem narafala i mekem wok blong olgeta, be oli gat tingting daon blong mekem wok blong God mo ol narafala man. “Olgeta ya bambae oli pris blong God mo blong Kraes, mo bambae oli joen wetem Kraes we hem i King, nao oli rul wetem hem, gogo wan taosen yia i pas.” (Revelesen 20:6) Namba blong olgeta ya i smol moa long “bigfala hip blong ol man, we olgeta i plante we plante, i no gat man i save kaontem olgeta. Ol man ya oli kamaot long olgeta kala, mo long olgeta kantri, mo long olgeta laen, mo long olgeta lanwis.” Bigfala hip man ya bambae oli laef tru long taem we rabis fasin blong wol ya i finis. Olgeta ya tu, ‘long dei mo long naet, oli stap mekem wosip long God.’ Be oli no gat hop ya blong go long heven. (Revelesen 7:9, 15) Oli stamba grup blong man we bambae oli laef long niufala wol aninit long Kingdom blong God long heven.—Ol Sam 37:29; Jon 10:16.
9 Taem Jeova i jusum olgeta we bambae oli rul wetem Kraes long heven, hem i jusumaot ol man we oli savegud se laef long wol ya, wetem ol problem blong hem, i olsem wanem. Klosap evri hadtaem we ol man long wol ya oli kasem, be ol king mo pris ya oli bin kasem tu. Taswe laef we oli gat long wol ya bambae i mekem se oli nafgud blong rul antap long ol man. Jisas tu hem i “lanem mining blong fasin ya blong obei long God, long ol samting we oli mekem hem i harem nogud long bodi blong hem.” (Hibrus 5:8) Aposol Pol i tokbaot Jisas se: “Hae Pris ya blong yumi, hem i savegud we yumi no gat paoa, nao hem i gat sore long yumi, from we olgeta samting blong traem yumi oli traem hem finis. Be wan samting nomo, hem i no mekem sin.” (Hibrus 4:15) !Yumi harem gud tumas blong save se long niufala wol blong God we stret fasin i stap long hem, ol man bambae oli stap aninit long rul blong ol king mo pris we oli gat lav mo fasin sore!
?Kingdom i Stap Long Stamba Tingting Blong God Fastaem?
10. ?From wanem Kingdom blong heven i no stap long stamba tingting we God i gat fastaem?
10 ?Kingdom long heven i stap insaed long stamba tingting blong God taem hem i wokem Adam mo Iv? Long stori blong Jenesis long saed blong taem we God i wokem evri samting, yumi no save faenem wan tok long saed blong wan Kingdom we bambae i rulum ol man. Jeova hem wan i Rula blong ol man, mo sipos oli stap obei long hem oltaem, bambae oli no nidim wan narafala rula. Jenesis japta 1 i soemaot se Jeova i toktok stret wetem Adam mo Iv, ating hem i yusum fasbon Pikinini blong hem long heven blong talemaot tok blong hem. Stori blong Jenesis i yusum ol tok olsem ‘God i talem long tufala’ mo ‘God i talem se.’—Jenesis 1:28,29; Jon 1:1.
11. ?Fastaem we God i wokem man mo woman, laef blong tufala i olsem wanem?
11 Baebol i talem se: “Mo taem [God] i luk olgeta wok ya we hem i mekem, hem i luk we oli gud we i gud tumas.” (Jenesis 1:31) Evri samting long garen blong Iden i stret gud olgeta. Adam mo Iv tufala i laef long wan paradaes. Tingting mo bodi blong tufala i stret gud. Tufala i save storian wetem Man ya we i Wokem tufala. Mo sipos tufala i stap tru, bambae tufala i save gat pikinini we i stretgud. Bambae oli no nidim wan niufala gavman long heven.
12, 13. ?Sipos ol stret man nomo oli bin fulumap wol, from wanem i no hadwok long God blong toktok wetem olgeta evriwan?
12 ?Be, sipos famle blong ol man i kam bigwan moa, olsem wanem God bambae i save toktok wetem olgeta evriwan? Tingbaot ol sta long heven. Oli stap tugeta long ol grup we oli kolem olgeta ol galaksi. Long sam galaksi i gat plante bilian sta, mo long sam narafala i gat plante moa sta bakegen. !Ol sayentis oli ting se i gat raonabaot 100 bilian galaksi we oli save luk wetem spesel glas! Nating se i olsem, Man ya we i Wokem evri samting i talem se: “!Yufala i traem luk antap long skae! Ol sta ya we yufala i stap luk, hem nomo i wokem olgeta. Oltaem hem i stap lidim olgeta i kam, olsem we komanda i lidim ol soldia blong hem. Hem i savegud hamas sta i stap, mo i stap singaot olgeta wanwan long nem blong olgeta. Mo from we paoa blong hem i strong we i strong, neva wan sta i mestem ples blong hem.”—Aesea 40:26.
13 Sipos God i save gud olgeta sta ya long skae, i sua se i no hadwok nating long hem blong save gud ol man long wol we namba blong olgeta i smol moa long ol sta ya. Plante milian man blong hem oli stap prea long hem evri dei. Ol prea ya oli go kasem God kwiktaem. Taswe sipos wol i bin fulap wetem ol stret man, i no hadwok long God blong toktok wetem olgeta evri wan. Mo sipos i olsem, hem i no nidim tu blong stanemap wan Kingdom long heven blong lidim olgeta. !I nambawan tumas sipos olgeta man oli gat Jeova olsem Rula blong olgeta, oli save toktok stret wetem hem, mo gat hop ya blong neva ded samtaem mo laef olwe long wan paradaes long wol!
‘I No Gat Man i Save Bos Long Laef Blong Hem’
14. ?From wanem ol man oli nidim rul blong Jeova blong olwe?
14 Be, ol man—olgeta we oli stretgud tu—bambae oli nidim rul blong Jeova olwe. ?From wanem? From we Jeova i no wokem olgeta wetem fasin ya we oli naf blong stap independen long rul blong hem. Hemia loa blong olgeta man, olsem profet Jeremaea i luksave: “Hae God. Mi mi save we i no gat man i save wanem samting bambae i kamtru long laef blong hem, mo we i no gat man i save kam bos long laef blong hem. Mifala i man blong yu. Plis yu stretem laef blong mifala.” (Jeremaea 10:23, 24) I krangke nomo sipos ol man oli ting se bambae oli naf blong bos long wol ya olgeta nomo, we Jeova i no rulum olgeta. Fasin ya i go agensem fasin we God i putum long olgeta taem hem i wokem olgeta. I sua se sipos ol man oli gowe long rul blong Jeova bambae oli gat fasin blong tingbaot olgeta nomo, bambae oli no laeklaekem olgeta, oli gat raf fasin, oli faet, mo oli ded. ‘Man i stap rulum ol man blong spolem olgeta nomo.’—Prija 8:9, NW.
15. ?Wanem frut i kamaot from nogud jus we faswan papa mama blong yumi i mekem?
15 Sore tumas we faswan papa mama blong yumi oli tingting se oli no nidim God olsem Rula blong olgeta, mo oli jusum blong lidim prapa laef blong olgeta. From samting ya, God i no moa holem tufala i stap olsem stret man. Tufala i olsem wan mesin we rop blong hem i no moa joen long stamba ples blong lektrik we i save mekem hem i wok. Taswe, taem i pas, nao tufala i lusum paoa blong tufala mo tufala i stop—tufala i ded. Tufala i gat sin, mo sin ya hemia nomo samting we tufala i save pasem i go long ol pikinini blong tufala. (Rom 5:12) “Bigfala Ston ya [Jeova], ol wok blong hem oli stret gud olgeta, from we olgeta fasin blong hem oli stret. . . . Be olgeta ya, oli jusum blong mekem ol nogud fasin, olgeta oli no pikinini blong hem, olgeta nomo oli mekem sin.” (Dutronome 32:4, 5, NW) I tru se, spirit man ya we i rebel agensem God mo i kam Setan, hem nao i pulum Adam mo Iv. Be tufala ya i gat wan tingting we i stret gud olgeta mo tufala i naf blong sakemaot ol rong tingting we hem i traem putum long tufala.—Jenesis 3:1-19; Jemes 4:7.
16. ?Olsem wanem histri i soemaot frut we i kamaot taem man i gowe long God mo i lidim hem wan?
16 Histri i soemaot klia wanem ol frut we oli kamaot from we man i lego God mo i lidim hem wan. Blong plante taosen yia, ol man oli traem ol defren kaen gavman mo olkaen stael blong ekonomi mo laef. Be, ol rabis fasin oli kam “mowas olgeta.” (2 Timoti 3:13) Ol yia 19 handred oli pruvum samting ya. Taem ya i fulap long ol fasin we oli rabis olgeta mo ol raf fasin, faet, hanggri, fasin pua, mo fasin safa, we i moa nogud i bitim ol narafala taem long histri. Mo nomata wanem save we man i kasem long saed blong meresin, olgeta man oli stap gohed yet blong ded. (Prija 9:5-10) Taem ol man oli traem lidim olgeta wan, oli foldaon long trap blong Setan mo ol rabis enjel blong hem, taswe Baebol i talem se Setan hem i “rabis god blong wol ya.”—2 Korin 4:4.
Presen Blong Fasin Fri Blong Jus
17. ?Ol man oli mas yusum fasin fri ya we God i givim olsem wanem?
17 ?From wanem Jeova i letem ol man oli gowe long hem? From we hem i wokem olgeta wetem nambawan presen ya se oli fri blong jusum samting we oli wantem. Aposol Pol i talem se: “Taem [“spirit,” NW] blong Masta blong yumi i stap long man, hem i stap mekem man ya i fri.” (2 Korin 3:17) I no gat wan long yumi we i wantem wok olsem wan mesin we oltaem wan man i mas talem long yumi wanem blong talem mo mekem. Man i laekem fasin fri blong jus. Be Jeova i wantem se ol man oli yusumgud fasin fri ya. Hem i wantem se oli luksave se i waes blong mekem wok blong hem mo stap obei long hem. (Galesia 5:13) Taswe fasin fri ya i no minim se oli fri fulwan, from we samting ya i save mekem bigfala trabol i kamaot. Fasin fri ya i no mas go bitim ol mak we God i putumap long ol gudfala loa blong hem.
18. ?Taem God i letem ol man oli fri blong jus hem i soemaot wanem?
18 Taem God i letem ol man oli folem rod blong olgeta, hem i soemaot klia, wantaem mo blong olwe, se yumi nidim rul blong hem. Fasin blong hem blong rul mo hae rul blong hem, hemia nomo stret rod. Rul ya i karem bigfala glad long ol man, i mekem oli harem gud mo oli gat plante samting. Hemia from we Jeova i wokem tingting mo bodi blong yumi long wan fasin we oli save wokgud moa taem oli folem ol loa blong hem. “Mi mi Hae God, mi God blong yufala. Mi nao mi stap tijim yufala blong givhan long yufala, mo mi stap lidim yufala long ol rod we i stret blong yufala i folem.” (Aesea 48:17) Fasin fri we man i gat folem mak we ol loa blong God i putum, i no save mekem i strong tumas long ol man, be bambae i mekem se oli harem gud from ol defren kaen kakae, haos, pleplei mo miusik. Sipos ol man oli yusumgud fasin fri ya bambae oli save gat wan nambawan laef long paradaes long wol, we i fulap long ol samting we i pulum intres blong olgeta.
19. ?Wanem plan we God i yusum blong tekem ol man oli kambak long hem?
19 Be from we ol man oli no mekem wan gudfala jus, oli gowe long Jeova, nao oli no moa stret gud olgeta, oli stat kam olfala, mo oli ded. Taswe oli nidim wan samting blong pemaot olgeta long trabol ya, blong oli save kam fren wetem God bakegen olsem ol pikinini boe mo gel blong hem. Rod we God i jusum blong mekem samting ya i kamtru, hemia Kingdom, mo Man blong Pemaot yumi hemia Jisas Kraes. (Jon 3:16) From plan ya, ol man we oli rili tanem tingting blong olgeta from sin blong olgeta—olsem pikinini ya we i lusum rod long pijatok blong Jisas—bambae oli save joengud bakegen wetem God mo hem i save tekembak olgeta olsem ol pikinini blong hem.—Luk 15:11-24; Rom 8:21; 2 Korin 6:18.
20. ?Olsem wanem Kingdom bambae i mekem stamba tingting blong God i kamtru?
20 I sua fulwan se bambae Jeova i mekem samting we hem i wantem i kamtru long wol. (Aesea 14:24, 27; 55:11) Tru long Kingdom blong God we Kraes i rul long hem, God bambae i leftemap (no i pruvum) raet we hem i gat blong stap olsem Hae Rula blong yumi. Kingdom ya bambae i finisim rul blong ol man mo ol rabis enjel long wol ya, mo hem nomo bambae i rul long heven blong wan taosen yia. (Rom 16:20; Revelesen 20:1-6) ?Be long taem ya, olsem wanem Jeova bambae i soemaot se fasin blong hem blong rul i hae moa long ol narafala rul? ?Mo afta long wan taosen yia, wanem wok we Kingdom ya bambae i mekem? Haf we i kam biaen bambae i tokbaot ol kwestin ya.
Ol Poen Blong Tingtingbak
• ?Wanem stamba tok blong Baebol?
• ?Hu olgeta we bambae oli rulum wol?
• ?From wanem rul blong man hem wan bambae i neva save karem gudfala frut?
• ?Olsem wanem man i mas yusum fasin fri ya we hem i gat blong jus?
[Kwestin]
[Tok blong pija long pej 10]
Tijing blong Jisas i soemaot klia rul blong God tru long Kingdom
[Tok blong pija long pej 12]
Long evri kantri ol Witnes blong Jeova oli tokbaot Kingdom olsem stamba tijing blong olgeta
[Tok blong pija long pej 14]
Histri i soemaot rabis frut we i kamaot from we man i lego God
[Credit Lines]
WWI soldiers: U.S. National Archives photo; concentration camp: Oświęcim Museum; child: UN PHOTO 186156/J. Isaac