Ginharian sang Dios—Bag-ong Pagginahom sa Duta

‘Ang ginharian . . . magadugmok kag magapapas sining tanan nga ginharian, kag magapadayon ini tubtob sa walay katubtuban.’—DANIEL 2:44.

1. Ano ang aton pagsalig sa Biblia?

ANG Biblia amo ang bugna sang Dios sa mga tawo. Si apostol Pablo nagsulat: “Sang mabaton ninyo ang pulong sang Dios, nga nabatian ninyo sa amon, ginbaton ninyo ini, indi subong pulong sang mga tawo, kundi, kon ano gid ini sa pagkamatuod, subong pulong sang Dios.” (1 Tesalonica 2:13) Yara sa Biblia ang kinahanglan gid nga mahibaluan naton tuhoy sa Dios: impormasyon tuhoy sa iya personalidad, sa iya mga katuyuan, kag sa iya mga ginapatuman sa aton. May labing maayo nga laygay ini tuhoy sa kabuhi sang pamilya kag sa adlaw-adlaw nga paggawi. Ginadetalye sini ang mga tagna nga natuman sang nagligad, nagakatuman sa karon, kag tumanon sa palaabuton. Huo, “ang bug-os nga Kasulatan ginbugna sang Dios kag mapuslanon sa pagpanudlo, sa pagsabdong, sa pagtadlong sang mga butang, sa pagdisiplina sa pagkamatarong, agod nga ang tawo sang Dios may lubos nga ikasarang, nga nasangkapan sing bug-os para sa tagsa ka maayong buhat.”—2 Timoteo 3:16, 17.

2. Paano ginpatalupangod ni Jesus ang tema sang Biblia?

² Ang labing importante gid sa Biblia amo ang tema sini: ang pagbindikar sa pagkasoberano sang Dios (ang iya kinamatarong sa paggahom) paagi sa iya langitnon nga Ginharian. Ginhimo ina ni Jesus nga pinakasentro sang iya ministeryo. “Ginsugdan ni Jesus ang pagbantala kag nagsiling: ‘Maghinulsol kamo, kay ang ginharian sang mga langit malapit na.’” (Mateo 4:17) Ginpakita niya kon ano ang nagakadapat nga duog sini sa aton kabuhi, nga nagalaygay: “Padayon, nian, nga pangitaa anay ang ginharian kag ang iya pagkamatarong.” (Mateo 6:33) Ginpakita man niya kon daw ano ini ka importante paagi sa pagtudlo sa iya mga sumulunod nga magpangamuyo sa Dios: “Magkari ang  imo ginharian. Paghimuon ang imo kabubut-on, kon paano sa langit, subong man sa duta.”—Mateo 6:10.

Bag-ong Pagginahom sa Duta

3. Ngaa importante gid sa aton ang Ginharian sang Dios?

³ Ngaa subong gid sina ka importante ang Ginharian sang Dios sa mga tawo? Bangod magapanghikot ini sa dili madugay nga magabalhin sing dayon sang pagginahom sa sining duta. Ang tagna sa Daniel 2:44 nagasiling: “Sa mga adlaw sadto nga mga hari [nga nagagahom karon sa duta] ang Dios sang langit magapatindog sing ginharian [isa ka panguluhan sa langit] nga indi gid malaglag. Kag ang ginharian mismo indi iliton sa iban nga katawhan. Dugmukon sini kag papason ini tanan nga ginharian [ang dutan-on nga mga panguluhan], kag magapadayon ini tubtob sa walay katubtuban.” Kon ang langitnon nga Ginharian sang Dios magagahom na sing bug-os, ang mga tawo indi na liwat magagahom sa duta. Ang nabahinbahin kag indi maayo nga paggahom sang tawo mangin isa na ka butang sang nagligad sing dayon.

4, 5. (a) Ngaa si Jesus isa nga labing kalipikado nga mangin Hari sang Ginharian? (b) Ano ang asaynment ni Jesus sa malapit nga palaabuton?

⁴ Ang Pangulo nga Manuggahom sa langitnon nga Ginharian, sa idalom sang panuytoy mismo ni Jehova, amo ang isa nga kalipikado gid—si Cristo Jesus. Antes magkari sa duta, nagkabuhi sia sa langit subong “batid nga manugpangabudlay” sang Dios, subong ang nahauna sa tanan nga tinuga sang Dios. (Hulubaton 8:22-31) “Sia ang larawan sang di-makita nga Dios, ang panganay sang tanan nga tinuga; bangod paagi sa iya ang tanan iban pa nga butang gintuga sa mga langit kag sa duta.” (Colosas 1:15, 16) Kag sang ginpadala sang Dios si Jesus sa duta, ginhimo niya ang kabubut-on sang Dios sa tanan nga tion. Ginbatas niya ang pinakamabudlay nga mga pagtilaw kag napatay nga matutom sa iya Amay.—Juan 4:34; 15:10.

⁵ Tungod sang katutom niya sa Dios bisan tubtob sa kamatayon, si Jesus ginpadyaan. Ginbanhaw sia sang Dios pakadto sa langit kag ginhatagan sing kinamatarong nga mangin Hari sang langitnon nga Ginharian. (Binuhatan 2:32-36) Subong Hari sang Ginharian, si Cristo Jesus may makahalawhaw nga asaynment gikan sa Dios nga pangunahan ang linaksa sang gamhanan nga espiritu nga mga tinuga sa paglaglag sang pagginahom sang tawo gikan sa duta kag sa pagdula sang tanan nga kalautan sa aton globo. (Hulubaton 2:21, 22; 2 Tesalonica 1:6-9; Bugna 19:11-21; 20:1-3) Nian ang langitnon nga Ginharian sang Dios sa idalom ni Cristo mangin ang bag-ong nagagahom nga awtoridad, ang lamang nga panguluhan sa ibabaw sang bug-os nga duta.—Bugna 11:15.

6. Ano nga sahi sang paggahom ang mapaabot naton gikan sa Hari sang Ginharian?

⁶ Ang Pulong sang Dios nagasiling tuhoy sa bag-ong Manuggahom sang duta: “Ginhatagan sia sing pagginahom kag kadungganan kag ginharian, agod nga ang mga katawhan, mga pungsod kag mga hambal mag-alagad tanan sa iya.” (Daniel 7:14) Bangod ilugon ni Jesus ang gugma sang Dios, magapangibabaw gid ang paghidait kag kalipay sa idalom sang iya paggahom. (Mateo 5:5; Juan 3:16; 1 Juan 4:7-10) “Tuhoy sa kabuganaan sang iya panguluhan kag sang paghidait wala sing katapusan, . . . agod sakdagon ini paagi sa katarungan kag paagi sa pagkamatarong.” (Isaias 9:7, ­Revised Standard Ver­sion) Daw ano gid nga pagpakamaayo nga makatigayon sing isa ka Manuggahom nga magagahom sing mahigugmaon, makatarunganon, kag matarong! Sa amo, ang 2 Pedro 3:13 nagatagna: “Nagahulat kita sing bag-ong mga langit [langitnon nga Ginharian sang Dios] kag bag-ong duta [bag-ong dutan-on nga katilingban] suno sa iya saad, kag sa sini magapuyo ang pagkamatarong.”

7. Paano karon natuman ang Mateo 24:14?

⁷ Pat-od gid nga ang Ginharian sang Dios amo ang labing maayo gid nga balita para sa tanan nga nagahigugma sang matarong. Amo kon ngaa, subong bahin sang tanda nga nagakabuhi na kita karon sa “katapusan nga mga adlaw” sining malauton nga sistema, si Jesus nagtagna: “Ining maayong balita sang ginharian ibantala sa bug-os napuy-an nga duta subong panaksi sa tanan nga kapungsuran; kag ugaling magaabot ang katapusan.” (2 Timoteo 3:1-5; Mateo 24:14) Ini nga tagna ginatuman karon, kay mga anom ka milyon nga Saksi ni Jehova sa 234 ka kadutaan ang nagahinguyang sing kapin sa isa ka bilyon nga oras sa isa ka tuig sa pagbantala sa iban tuhoy sa Ginharian sang Dios. Sing nagakaigo, ang tagsa sang ila mga duog sang pagsimba para sa mga 90,000 ka kongregasyon sa bug-os nga kalibutan ginatawag nga Kingdom Hall. Didto, ang mga tawo nagatuon tuhoy sa nagapakari nga bag-ong panguluhan.

 Kaupod nga mga Manuggahom

8, 9. (a) Diin magahalin ang kaupod nga mga manuggahom ni Cristo? (b) Ano ang pagsalig naton sa paggahom sang Hari kag sang iya kaupod nga mga manuggahom?

⁸ Si Cristo Jesus may kaupod nga mga manuggahom sa langitnon nga Ginharian sang Dios. Ang Bugna 14:1-4 nagtagna nga 144,000 ka tawo ang “ginbakal gikan sa katawhan” kag ginbanhaw padulong sa langitnon nga kabuhi. Ini sila nagalakip sa mga lalaki kag mga babayi nga, sa baylo nga alagaran, mapainubuson nga nag-alagad sa Dios kag sa mga isigkatawo. “Mangin mga saserdote sila sang Dios kag ni Cristo, kag magagahom sila subong mga hari kaupod niya sa isa ka libo ka tuig.” (Bugna 20:6) Mas diutay ang ila kadamuon sangsa “dakung kadam-an, nga wala sing tawo nga makaisip, gikan sa tanan nga pungsod kag tribo kag katawhan kag hambal” nga makalampuwas sa katapusan sining sistema. Nagahimo man sila sa Dios sing “sagrado nga pag-alagad adlaw kag ­gab-i,” apang indi sila langitnon. (Bugna 7:9, 15) Nagahuman sila sang sentro sang bag-ong duta subong mga sakop sang langitnon nga Ginharian sang Dios.—Salmo 37:29; Juan 10:16.

⁹ Sa pagpili kon sin-o ang magagahom kaupod ni Cristo sa langit, ginpili ni Jehova ang matutom nga mga tawo nga nakaeksperiensia sang kabuhi kag sang tanan nga problema sini. Halos wala sing butang nga naagihan ang mga tawo nga wala man maagihi sining mga hari-saserdote. Gani ang ila pagkabuhi sa duta magapauswag sang ila ikasarang agod magamhan ang mga tawo. Bisan si Jesus mismo ‘nakatuon sing pagkamasinulundon gikan sa mga butang nga gin-antos niya.’ (Hebreo 5:8) Si apostol Pablo nagsiling tuhoy sa iya: “May yara kita mataas nga saserdote, indi isa nga indi mahanuklog sa aton mga kaluyahon, kundi isa nga natilawan na sa tanan nga butang kaangay naton, apang wala sing sala.” (Hebreo 4:15) Makalulugpay gid mahibaluan nga sa matarong nga bag-ong kalibutan sang Dios, ang katawhan pagagamhan sang mahigugmaon, mahinuklugon nga mga hari kag mga saserdote!

Ang Ginharian Bala Bahin Anay Sang Katuyuan Sang Dios?

10. Ngaa ang Ginharian sang langit indi anay bahin sang orihinal nga katuyuan sang Dios?

¹⁰ Ang langitnon bala nga Ginharian bahin anay sang orihinal nga katuyuan sang Dios sang gintuga niya sanday Adan kag Eva? Sa kasaysayan sang Genesis tuhoy sa pagpanuga, wala ginsambit ang tuhoy sa isa ka Ginharian nga magagahom sa katawhan. Si Jehova mismo amo ang ila Manuggahom, kag tubtob matinumanon sila sa iya, indi na kinahanglan ang iban pa nga pagginahom. Ginapakita sang Genesis kapitulo 1 nga si Jehova, ayhan paagi sa iya panganay nga langitnon nga Anak, nakig-angot kanday Adan kag Eva. Ginagamit sang rekord ang mga ekspresyon subong sang “ang Dios nagsiling sa ila” kag “ang Dios nagpadayon sa pagsiling” sa ila.—Genesis 1:28, 29; Juan 1:1.

11. Ano ang himpit nga panugod sang katawhan?

¹¹ Ang Biblia nagasiling: “Nakita sang Dios ang tanan nga butang nga ginhimo niya kag, yari karon! tama gid ini kaayo.” (Genesis 1:31) Ang tanan nga butang sa hardin sang Eden himpit gid. Sanday Adan kag Eva nagpuyo sa paraiso. May himpit sila nga mga hunahuna kag himpit nga mga lawas. Mahimo sila makasugilanon sa ila Magbubuhat kag sia man sa ila. Kag paagi sa pagpabilin nga matutom, makapanganak sila sing himpit nga  mga anak. Indi na kinahanglan ang isa ka bag-ong langitnon nga panguluhan.

12, 13. Samtang nagamuad ang himpit nga katawhan, ngaa makakomunikar gihapon ang Dios sa ila?

¹² Samtang nagamuad ang pamilya sang tawo, paano ang Dios makakomunikar sa ila tanan? Binagbinaga ang mga kabituunan sa langit. Ginagrupo-grupo sila sa pulo nga mga uniberso nga ginatawag mga galaksiya. Ang pila ka galaksiya may 1 ka bilyon nga bituon. Ang iban naman may 1 ka trilyon. Kag ginabulubanta sang mga sientipiko nga may yara mga 100 bilyones nga galaksiya sa makita nga uniberso! Apang, ang Manunuga nagasiling: “Itangla ang inyo mga mata sa hitaas kag tan-awa. Sin-o ang nagtuga sining mga butang? Amo ang Isa nga nagapaguwa sang ila kasuldadusan suno sa kadamuon sini, nga sila tanan ginatawag niya sa ngalan. Bangod bugana sa dinamiko nga kusog, makusog man sia sa gahom, wala sing isa sa ila nga nakulang.”—Isaias 40:26.

¹³ Sanglit nahibaluan sang Dios ang kahimtangan sining tanan nga butang sa langit, indi gid problema para sa iya nga mahibaluan ang kahimtangan sang diutay kaayo nga kadamuon sang mga tawo. Bisan karon, minilyon sang iya mga alagad ang nagapangamuyo sa iya adlaw-adlaw. Ina nga mga pangamuyo nagalab-ot gilayon sa Dios. Gani ang pagpakigkomunikar sa tanan himpit nga katawhan indi problema para sa iya. Indi niya kinahanglan ang isa ka langitnon nga Ginharian agod mahibal-an ang kahimtangan nila. Daw ano gid ka tumalagsahon nga kahimusan—nga makatigayon sing Manuggahom subong ni Jehova, nga makakomunikar sing direkta sa iya, kag may paglaum nga indi na gid mapatay kag magkabuhi sing dayon sa isa ka paraiso nga duta!

“Wala sa Tawo”

14. Ngaa kinahanglan sing dayon sang katawhan ang paggahom ni Jehova?

¹⁴ Apang, ang mga tawo—bisan pa ang mga himpit—magakinahanglan sing dayon sang pagginahom ni Jehova. Ngaa? Bangod wala sila gintuga ni Jehova nga may ikasarang nga magmadinalag-on nga hilway sa iya paggahom. Amo ina ang kasuguan sang katawhan, subong sa ginbaton ni manalagna Jeremias: “Nahibaluan ko, O Jehova, nga ang dalanon sang dutan-on nga tawo wala sa iya kaugalingon. Wala sa tawo nga nagalakat bisan ang pagtuytoy sa iya tikang. Tadlunga ako, O Jehova.” (Jeremias 10:23, 24) Kabuangan para sa mga tawo nga hunahunaon nga sarang nila magamhan sing madinalag-on ang katilingban nga wala nagagahom sa ila si Jehova. Supak ini sa kon paano sila ginhimo. Ang kahilwayan gikan sa paggahom ni Jehova pat-od gid nga magaresulta sa kakagod, dumot, kapintas, kasingki, mga inaway, kag kamatayon. ‘Gamhan sang tawo ang tawo sa iya kasamaran.’—Manugwali 8:9.

15. Ano ang mga resulta bangod sang malain nga pagpili sang aton nahaunang mga ginikanan?

¹⁵ Sing makapasubo, ang aton nahaunang mga ginikanan namat-od nga indi nila kinahanglan ang Dios subong ila Manuggahom, kag ginpili nila nga magkabuhi sing hilway gikan sa iya. Subong resulta, ang Dios wala na magsakdag sa ila sa kahimpitan. Kaangay na karon sila sa isa ka de-koryente nga kasangkapan nga gingabot gikan sa ginakuhaan sini sing koryente. Gani sang ulihi, naghinay sila kag nagdulog—sa kamatayon. Nangin kaangay sila sang isa ka depektuso nga sulundan, kag ina nga kahimtangan amo lamang ang naliton nila sa ila mga kaanakan. (Roma 5:12) “Ang Igang [si Jehova], himpit ang iya binuhatan, kay ang tanan niya nga dalanon katarungan. . . . Nagpanghikot sila sing malaglagon sa bahin nila; sila indi niya mga anak, ang kasawayan ila.” (Deuteronomio 32:4, 5) Matuod, sanday Adan kag Eva gin-impluwensiahan sang rebelde nga espiritu nga tinuga nga nangin si Satanas, apang may himpit sila nga mga hunahuna kag masikway nila kuntani ang iya sayop nga mga panugda.—Genesis 3:1-19; Santiago 4:7.

16. Paano ginapamatud-an sang maragtas ang resulta sang kahilwayan gikan sa Dios?

¹⁶ Ang maragtas nagapamatuod sing bugana sa resulta sang kahilwayan gikan sa Dios. Sa sulod sang linibo ka tuig, gintilawan sang mga tawo ang tanan nga sahi sang tawhanon nga panguluhan, ang tanan nga sistema sa ekonomiya kag sa katilingban. Apang, ang kalautan padayon nga ‘nagalain kag nagalain pa.’ (2 Timoteo 3:13) Ginpamatud-an ina sang ika-20 nga siglo. Puno ini sing malain nga mga dumot kag pinakamadamo nga kasingki, inaway, gutom, kaimulon, kag pag-antos sa bisan ano nga tion sa maragtas. Kag bisan ano man nga pag-uswag sa medisina ang nahimo, sa ulihi ang tanan nagakapatay. (Manugwali 9:5, 10) Paagi sa pagtilaw nga tuytuyan ang ila mismo mga tikang, gintugutan sang mga tawo ang ila kaugalingon nga mangin biktima ni Satanas kag sang iya mga demonyo, amo kon ngaa ginatawag sang  Biblia si Satanas nga “dios sining sistema sang mga butang.”—2 Corinto 4:4.

Ang Dulot Sang Kahilwayan sa Pagbuot

17. Paano dapat gamiton ang dulot sang Dios nga kahilwayan sa pagbuot?

¹⁷ Ngaa gintugutan ni Jehova ang mga tawo nga mangin independiente? Bangod gintuga niya sila nga may tumalagsahon nga dulot sang kahilwayan sa pagbuot, ang ikasarang sang kahilwayan sa pagpili. “Kon diin ang espiritu ni Jehova, didto ang kahilwayan,” siling ni apostol Pablo. (2 Corinto 3:17) Wala sing isa ang luyag nga mangin robot, nga may iban nga magapamat-od kon ano ang iya ihambal kag himuon kada segundo kada adlaw. Apang ginsugo ni Jehova ang mga tawo nga gamiton sing masaligan ina nga dulot sang kahilwayan sa pagbuot, agod makita ang kaalam sang paghimo sang iya kabubut-on kag sang pagpabilin nga nagapasakop sa iya. (Galacia 5:13) Gani ang kahilwayan indi bug-os, kay mahimo ini magresulta sa anarkiya. Dapat ini kontrolon suno sa mga dulunan sang maayo nga mga kasuguan sang Dios.

18. Ano ang ginpakita sang Dios paagi sa pagtugot sa mga tawo nga makapili sing hilway?

¹⁸ Paagi sa pagtugot sa tawhanon nga pamilya sa paglakat sing kinaugalingon, ginpakita gid sang Dios nga kinahanglan naton ang iya pagginahom. Ang iya paagi sang paggahom, ang iya pagkasoberano, amo lamang ang husto nga paagi. Nagaresulta ini sa labing daku nga kalipay, kaayawan, kag kahamungaya. Ini bangod ang aton mga hunahuna kag mga lawas gindesinyo ni Jehova nga magapanghikot sing maayo gid kon nagahisanto sa iya mga kasuguan. “Ako, si Jehova, amo ang imo Dios, ang Isa nga nagatudlo sa imo sa kapuslanan, ang Isa nga nagatuytoy sa imo sa dalanon nga dapat mo laktan.” (Isaias 48:17) Ang hilway nga pagpili sa sulod sang mga dulunan sang mga kasuguan sang Dios indi kuntani nangin mabug-at kundi nagresulta sa makalilipay nga pagkananarisari sang pagkaon, puluy-an, taliambong, kag musika. Kon ginhimo sing nagakaigo, ang kahilwayan sa pagbuot nagresulta kuntani sa isa ka makalilipay, pirme-makawiwili nga kabuhi sa paraiso nga duta.

19. Ano nga ahensia ang ginagamit sang Dios agod mapasag-uli ang mga tawo sa iya?

¹⁹ Apang bangod sang ila sayop nga pagpili, ang mga tawo naghamulag sang ila kaugalingon kay Jehova, nga nangin di-himpit, nagaluya, kag nagakapatay. Gani kinahanglan sila tubson gikan sa  sinang malain nga kahimtangan kag ipasag-uli sa isa ka nagakaigo nga kaangtanan sa Dios subong mga anak niya. Ang ahensia nga ginpili sang Dios sa paghimo sini amo ang Ginharian, kag ang Manunubos amo si Jesucristo. (Juan 3:16) Paagi sini nga kahimusan, ang tunay nga mga mahinulsulon—kaangay sang buhaha nga anak sa ilustrasyon ni Jesus—mapasag-uli sa Dios kag batunon niya liwat subong mga anak niya.—Lucas 15:11-24; Roma 8:21; 2 Corinto 6:18.

20. Paano tumanon sang Ginharian ang katuyuan sang Dios?

²⁰ Pat-od gid nga ang kabubut-on ni Jehova matuman sa duta. (Isaias 14:24, 27; 55:11) Paagi sa iya Ginharian sa idalom ni Cristo, bug-os nga bindikahon (pakamatarungon ukon pamatud-an) sang Dios ang iya kinamatarong nga mangin ang aton Soberano. Tapuson sang Ginharian ang paggahom sang tawo kag sang demonyo sa ibabaw sini nga duta, kag ini lamang ang magagahom halin sa langit sa sulod sang isa ka libo ka tuig. (Roma 16:20; Bugna 20:1-6) Apang sa sina nga tion, paano ipakita ang pagkalabaw sang paagi sang paggahom ni Jehova? Kag pagkatapos sang isa ka libo ka tuig, ano na ang mangin papel sang Ginharian? Ini nga mga pamangkot binagbinagon sa masunod nga artikulo.

Mga Punto Para sa Repaso

• Ano ang tema sang Biblia?

• Sin-o ang nagahuman sa bag-ong pagginahom sa duta?

• Ngaa indi gid magmadinalag-on ang paggahom sang tawo nga hilway sa Dios?

• Paano dapat himuon ang kahilwayan sa pagbuot?

[Mga Pamangkot sa Pagtinuon]

[Retrato sa pahina 10]

Ginpadaku sang panudlo ni Jesus ang pagginahom sang Dios paagi sa Ginharian

[Mga retrato sa pahina 12]

Sa tanan nga kadutaan ang Ginharian amo ang panguna nga ginatudlo sang mga Saksi ni Jehova

[Mga retrato sa pahina 14]

Ginapamatud-an sang maragtas ang malain nga mga resulta sang kahilwayan gikan sa Dios

[Credit Lines]

WWI soldiers: U.S. National Archives photo; concentration camp: Oświęcim Museum; child: UN PHOTO 186156/J. Isaac