Pathian Lalram—Lei Rorêlna Thar
Pathian Lalram—Lei Rorêlna Thar
“[Lalram chuan] hêng ram zawng zawngte hi a tikeh sawmin a tiral zâwk ang a, kumkhuain a ding reng ang.—DANIELA 2:44.
1. Bible-ah eng rinna nge kan neih theih?
BIBLE hi mihringte hnêna Pathian thu puanchhuahna a ni a. Tirhkoh Paula chuan: “Pathian thu kan hnên ata in hriat, in pawm lai khân, mihring thu pawmin in pawm lo va, Pathian thu pawmin in pawm zâwk avâng khân; chu chu Pathian thu a ni rêng a,” tiin a ziak a ni. (1 Thessalonika 2:13) Bible-ah chuan Pathian chanchin kan hriat ngai te: a mizia te, a thiltum te, leh a thil min phût te chungchâng thute a awm vek a. Chhûngkaw nun leh nî tin nungchang chungchânga thurâwn ṭha ber berte a awm bawk. Tûn hmaa hrilh lâwkna tûn hmaa thleng famkim tawh te, tûna thleng famkim mêk te, leh nakina la thleng famkim tûrte chu chipchiar takin a sawi a ni. Ni e, “Pathian Lehkha Thu zawng zawng hi Pathian thâwk khuma pêk a ni a, zirtîr kawngah te, zilh kawngah te, thiam loh chantîr kawngah te, zilh kawngah te, felna zirtîr kawngah te a sâwt bawk a ni; Pathian mi chu hna ṭha tinrêng thawk tûra kim taka inthuamin a famkim theih nân.”—2 Timothea 3:16, 17.
2. Bible thupui ber chu Isua’n engtin nge a sawi uar?
2 Bible-a pawimawh ber chu a thupui: a van lam Lalram hmanga Pathian lal chungnunna thiamchantîrna (rorêl tûra a dikna) chu a ni. Isua chuan chu chu a rawngbâwlnaah dah pawimawh berin: “ ‘Sim rawh u! vân ram a hnai tawh e,’ tiin a hril ṭan,” a ni. (Matthaia 4:17) Pathian lal chungnunna thiamchantîrnain kan nuna a hmun chan tûr chu sawiin, Isua chuan: “A ram leh a felna chu zawng hmasa zâwk rawh u,” tiin mi a fuih a. (Matthaia 6:33) Tin, a hnungzuitute hnênah: “I ram lo thleng rawh se. I duhzâwng vâna an tih angin leia mi’n ti rawh se,” tia Pathian hnêna ṭawngṭai tûra zirtîrin chu mi pawimawhzia chu a kawhhmuh bawk.—Matthaia 6:10.
Lei Lam Rorêlna Thar
3. Engvângin nge Pathian Lalram chu kan tân ngaihven vat tûr thil pawimawh tak a nih?
3 Engvângin nge Pathian Lalram chu mihirngte tân chutiang khawpa a pawimawh? He lei rorêlna chatuan atâna thlâk tûra a rawn thawh thuai dâwn avângin a ni. Daniela 2:44-a hrilhlâwk thu chuan: “Chûng lalte [tûn lai khawvêl rorêltute] nîah chuan vân Pathianin ram [vân sawrkârna] a rawn din ang a, chu chu a chhe ngai tawh lo vang a, a lalna pawh mi dangte tân hnutchhiah a ni hek lo vang; hêng ram [lei sawrkârte] zawng zawngte hi a tikeh sawmin a tiral zâwk ang a, kumkhuain a ding reng ang,” tiin a sawi a ni. Pathian van lam Lalramin lei a awp pumhlûm hun chuan, mihringin he lei a thunun tawh ngai lo vang. Inṭhendarhna leh lungngaihnaa khat mihring rorêlna chu thil hmasate a ni kumkhua tawh ang.
4, 5. (a) Lalrama Lal ni tûr chuan engvângin nge Isua chu mi tling ber a nih? (b) Nakin lawkah Isua’n eng chanvo nge a dawn ang?
4 Vân Lalrama Rorêltu Lû, Jehova hnuai chiaha mi chu, mi tling ber, Isua Krista chu a ni. Ani chu he leia a lo kal hmain, Pathian thil siam bul ber niin, vânah Pathian tâna “mi themthiam” angin a awm tawh a ni. (Thufingte 8:22-31) “Ani chu hmuh theih loh Pathian anpui, thil siam zawng zawnga piang hmasa ber chu a ni a, amahah chuan engkim siam a ni.” (Kolossa 1:15, 16) Tichuan, he leia Pathianin a rawn tirh khân a chhûn a zânin Pathian duhzâwng a tireng ṭhîn. Fiahna khirh ber chu a tuarchhuak a, a Pa lakah thih thlengin a rinawm a ni.—Johana 4:34; 15:10.
5 Thih thlenga Pathian laka a rinawm avângin Isua chu chawimawi a ni a. Pathianin a kaitho va, vân Lalrama Lal ni tûrin thuneihna chu a pe ta a ni. (Tirhkohte 2:32-36) Pathian Lalrama Lal a nih angin, Isua Krista chuan thlarau thil siam thiltithei chhiarsên lohte hruaiin, hna thawh tûr ropui tak, he leia mihring rorêlna leh suahsualna zawng zawng tihbona chanvo Pathian pêk chu a dawng ang. (Thufingte 2:21, 22; 2 Thessalonika 1:6-9; Thu Puan 19:11-21; 20:1-3) Tichuan, Krista hnuaia Pathian van Lalram chu khawvêl pum puia sawrkâr awm chhun, lei rorêlna thar a lo ni ang.—Thu Puan 11:15.
6. Lalrama Lal hnên aṭang chuan, eng ang rorêlna nge kan beisei theih?
6 Pathian Thu chuan lei Lal thar chungchâng chu hetiang hian a sawi a: “Rorêlna te, ropuina te, ram te a hnêna pêk a ni a, mi tin te, hnam tin te leh ṭawng tinte zawng zawng chuan a rawng an bâwl nân,” tiin. (Daniela 7:14) Isua chuan Pathian hmangaihna a entawn dâwn avângin, a awpna hnuaiah chuan remna leh lâwmna chu a nasa hle ang. (Matthaia 5:5; Johana 3:16; 1 Johana 4:7-10) “A ram a zauh zêlna leh remna chuan tâwpintai a nei lovang a, . . . felna leh rorêl diknain a rawn tinghet ang.” (Isaia 9:7, Revised Standard Version) Hmangaihna te, dikna te, leh felna te nêna awp, Rorêltu neih chu malsâwmna a va ni dâwn êm! Chuvâng chuan 2 Petera 3:13 chuan: “A thutiam ang chuan vân tharte [Pathian van lam Lalram] leh lei thar [lei lam mipui thar], a chhûnga felna awmte chu kan beisei a ni,” tiin a lo sawi lâwk a ni.
7. Matthaia 24:14 thu hi engtin nge kan hunah a thlen famkim?
7 Thu dik ngainatute tân chuan Pathian Lalram chu chanchin thar ṭha ber a ni chiang mai. Chuvângin, he kal hmang suaksual “ni hnuhnûngahte” kan awm tawh a ni tih chhinchhiahnate telhin Isua’n: “He ram Chanchin Ṭha hi hnam zawng zawng hriattîrna tûrin khawvêl zawng zawngah hrilhin a awm ang; chu mi zawhah chuan tâwpna chu a lo thleng ang,” tiin a sawi lâwk a ni. (2 Timothea 3:1-5; Matthaia 24:14) Chu hrilh lâwk thu chu a thleng famkim mêk a ni: ram 234-a Jehova Thuhretu maktaduai 60 vêl chuan mi dangte hnêna Pathian Lalram chanchin hrilh nân kum khatah dârkâr tlûklehdingâwn khat aia tam an hman avângin. Inchawih tak maiin, khawvêl pum puia kohhran 90,000 vêla Pathian an biakna hmun chu Kingdom Hall tia vuah ṭheuh a ni. Chutah chuan, sâwrkâr thar lo thleng tûr chanchin zir tûrin mite an kal ṭhîn a ni.
Rorêlpuitute
8, 9. (a) Krista rorêlpuite chu khawi aṭanga lo kal nge an nih? (b) Lal leh a rorêlpuite awpnaah chuan eng rintâwkna nge kan neih theih?
8 Pathian van Lalramah chuan Isua Krista rorêlpuitu tûr an awm dâwn a. Thu Puan 14:14 chuan mi 1,44,000-te chu “mihring zîng ata tlan,” an ni ang a, vân nunnaa kaih thawh an ni ang tih a sawi lâwk a ni. Hêng mite hi mi dangte rawng bâwlsaka awm lovin, anmahni ngeiin Pathian leh an mihring puite rawng inngaithlâwm takin an bâwlsak zâwk a ni. Anni chu “Pathian leh Krista puithiamte an ni ang a, amah nên kum sângkhat rorêlin an awm zâwk ang.” (Thu Puan 20:6) Anni chu he kalhmang tâwpnaa dam khawchuak tûr “mipui tam tak tuma chhiar sên loh, hnam tin zînga mi te, chi tin zînga mi te, mi tin zînga mi te, ṭawng tin zînga mi te” ai chuan an tlêm zâwk êm êm a ni. Chûng mipui tam takte pawh chuan “achhûn azânin . . . a rawng an bâwl ṭhîn” a; mahse, van lam kohna erawh an chang lo. (Thu Puan 7:9, 15) Anni chu Pathian vân Lalram hnuaia intulûtin, lei thar bul inṭanna an lo ni ta a ni.—Sâm 37:29; Johana 10:16.
9 Vâna Krista rorêlpui tûr atân, Jehova chuan mi rinawm, nun harsatna zawng zawng tuar chhuakte a thlang a. Hêng lal puithiamte’n an tawn ngai loh harsatna dang a awm lo a tih theih ngei ang. Chuvângin, leia an nun kawng chuan mihringte awp tûra an theihna chu a tiphuisui ngei ang. Isua ngei pawhin “a thil tuarahte chuan thu awih a zir” a nih kha. (Hebrai 5:8) Hetiang hian tirhkoh Paula chuan a chungchâng thu a lo sawi a ni: “Puithiam Lalber kan chak lohnate min hriatpui thei lo nei kan ni si lo; keimahni anga kawng tinrênga thlêmna tâwk tawh, sual erawh chu sual lo, nei kan ni zâwk e,” tiin. (Hebrai 4:15) Pathian felna khawvêl tharah chuan, mite chu hmangaihna leh hriat thiamna nei tak lalte leh puithiamte’n ro an rêl dâwn tih hriat chu a va thlamuan thlâk êm!
Lalram Hi Pathian Thiltumah A Tel Rêng Em?
10. Engvângin nge vân Lalram chu Pathian thiltum hmasak zîngah a tel loh?
10 Adama leh Evi a siam khân, van Lalram hi Pathian thiltumah a tel rêng em? Genesis-a thil siam chungchâng thuziakah chuan Lalram, mihringte chunga rorêl tûr âwm engmah sawi lan a ni lo. Jehova ngei chu an Rorêltu a ni a, a thu an zawm chhûng chuan rorêlna dang mamawh a ni lo. Pathian Jehova chuan Adam leh Evi a dâwr tih Genesis bung 1-na chuan a târ lang a, chu chu a vân lam Fatîr hmangin a dâwr a nih a rinawm hle. Thuziak chuan, ‘Pathianin a ti’ tih leh ‘Pathian vêkin a ti’ tih ang chi ṭawngkamte a hmang a ni.—Genesis 1:28, 29; Johana 1:1.
11. Mihringin eng bulṭanna ṭha famkim nge a neih?
11 Bible chuan: “Pathianin a thil siam tinrêng chu a en a, ngai teh, ṭha a ti êm êm a,” tiin a sawi a. (Genesis 1:31) Eden huana thil awm engkim mai chu duhthusâm vek a ni. Adama leh Evi chu paradis-ah an khawsa a, rilru leh taksa ṭha famkim an nei bawk. An Siamtu nên an inbe tawn thei a ni. Tin, an rinawm reng chuan fanau ṭha famkim an nei thei ang a, vân lam sâwrkâr thar din a ngai hauh lo vang.
12, 13. Mihring ṭha famkim lo pung zêl pawh nise, engvângin nge Pathian chuan a biakpawh theih vek ang?
12 Mihring chu an lo pun zêl chuan, Pathianin engtin nge anni chu a biak ang? Vân arsite khi ngaihtuah teh. Anni chu arsi hlâwm tia koh vânlâwt khawmualah an infin khâwm a ni. Arsi hlâwm ṭhenkhatah chuan arsi tlûklehdingâwn khat lai a awm a. A ṭhenah chuan tlûklehdingâwn sângkhat lai a awm thung a ni. Vânlâwt han hmuh theih chinah mai pawh khian, arsi hlâwm tlûklehdingâwn za vêl awm niin mi thiamte chuan an chhût tlat mai! Chutichung pawh chuan, Siamtu chuan: “Chung lamah khian in mitte lên chho ula, khîngte khi tu siam nge ni en rawh u; ani chuan sipaihote khi indawt zêlin a hruai chhuak ṭhîn a, an hmingin a ko ṭheuh ṭhîn a; a chakna nasatna avâng leh, thiltihtheihna lama a chak avângin pakhat mah kim lo an awm ngai lo,” a ti a ni.—Isaia 40:26.
13 Pathian chuan hêng van lam thilte zawng zawngte a hriat theih si chuan, chûng aia tlêm zâwk daih mihringte hriat chu thil harsa a ni hauh lo vang. Tûnah pawh, a chhiahhlawh nuai tam takte chuan a hnênah nî tin an ṭawngṭai reng a. An ṭawngṭainate chu a hnênah a thleng nghâl thuai ṭhîn a ni. Chuvângin, mihring ṭha famkim zawng zawngte nêna inbiakpawh chu a tân chuan thil harsa a ni lo. Anni hriat nân van lam Lalram chu a mamawh hauh lo bawk. Jehova ngei Rorêltua neih te, amah nêna tlang taka inbiakpawh theihna neih te, thi ngai lo va he lei paradis-a chatuana nun beiseina neih te chu ruahmanna ropui a va ni êm!
“Mahni Thu Mai A Ni Lo”
14. Engvângin nge mihringte’n Jehova awpna an mamawh kumkhua ang?
14 Nimahsela, mihringte chuan—ṭha famkimte pawh nise—Jehova awpna chu an mamawh kumkhua a ni. Engvângin nge? A awpna ata inlahrang thei tûra a siam an nih loh vâng a ni. “Aw LALPA, mihring awm dân chu mahni thu mai a ni lo tih ka hre ta: Tungchova kal mihringah hian a pheikhai hruai tûr a awm lo. Aw LALPA mi thunun la,” tia zâwlnei Jeremia pawm ang chiah hi mihringte nihphung a ni. (Jeremia 10:23, 24) Chuvângin, Jehova awpna tel lova mihringin hlawhtling taka ro an inrêl theih rin chu âtthlâk tak a ni ang. Siam an nih dân nên a inkalh hle dâwn a ni. Jehova awpna ata inlâkhranna chuan mahni hmasialna te, huatna te, nunrâwnna te, tharumthawhna te, indona te, leh thihna te a rah chhuak a ni. “Mi, mi dang chungah pawi khawpin a intilal ṭhîn” si a.—Thuhriltu 8:9.
15. Kan nu leh pa hmasate duh thlan dik lo hian thil ṭha lo eng nge a ngawng chhuah?
15 Lungchhiatthlâk tak maiin, kan nu leh pa hmasate chuan Pathian chu an Awptu atân an duh lo va, a laka inlâk hran chu an lo thlang ta a. Chuvângin, Pathian chuan anni chu ṭhat famkimnain a châwm ta lo a ni. Tichuan, electric chakna nêna a inzawmna pawhchahsak hmanrua ang mai an lo ni ta a ni. Chuvângin, an chak lo tial tial a, a tâwpah chuan thihnaah an châwl ta a ni. Sawisêlkai an lo ni ta a, chu mi dinhmun chauh chu an thlahte lakah an hlan chhâwng thei ta a ni. (Rom 5:12) “Lungpuia chu, a thiltih a fel famkim; a awm dân zawng zawng chu dân a ni: . . . Ṭha lo takin a chungah an ti a, a fate an ni lo, an sawisêl kaina a ni.” (Deuteronomy 32:4, 5) Adama leh Evi chuan Setana lo ni ta, thlarau thil siam hel thlêmna tâwk mah se, ṭha famkim an ni a, a rawtna sual chu hnâwl thei reng an ni.—Genesis 3:1-19; Jakoba 4:7.
16. Pathian laka inlâkhranna rah chhuah chu engtin nge mihring chanchin hian a târ lan?
16 Pathian laka inlâkhranna rah chhuah chu mihring chanchinah a lang tam khawp mai. Mihring chuan kum sâng tam tak chhûng chu mihring sawrkârna chi hrang hrang, khawtlâng leh ei leh bâr lama inenkawl dân chi hrang hrang an chhin tawh a. Mahse, suahsualna chu a “zual deuh deuh” si zawng a nih hi. (2 Timothea 3:13) Chu chu kum zabi 20-na hian a tichiang a ni. Chu chu a ber kai ṭhah inhuatna te, tharum thawhna te, indona te, ṭamna te, retheihna te, leh tawrhna tein a khat vek a ni. Damdawi lamah hmasâwn hle mah se, mi tin hian thih hun an nei ṭheuh tho a ni. (Thuhriltu 9:5, 10) Mahni pheikhai hruai tumna lamah mihringte chu Setana leh a ramhuaiho kutah an tlulût a, an intukluh nasat êm avângin Bible chuan Setana chu “he khawvêl pathian” a ti thei hial a ni.—2 Korinth 4:4.
Zalên Taka Duhthlan Theihna Thilthlâwnpêk
17. Pathian thilthlâwnpêk zalên taka duhthlan theihna chu eng anga hman tûr nge ni?
17 Engvângin nge Jehova’n mihringte chu an duhthua inlâkhran a phal? A chhan chu zalên taka duhthlan theihna thilthlâwnpêk mak tak neia a siam vâng a ni. Tirhkoh Paula chuan: “Lalpa thlarau awmna apiangah chuan zalênna a awm ṭhîn” tiin a sawi a. (2 Korinth 3:17) Tumahin an sawi tûr leh tih tûr apiang mai lo hrilh zêl ngai, robot ang mai nih chu an duh lo vang. Jehova chuan zalên taka duhthlan theihna thilthlâwnpêk chu mihringte pe mah se, a duhzâwng tih leh a hnêna intukluh reng a fin thlâkzia hriatthiam nân, mawhphurhna nei taka hmang tûrin a phût a ni. (Galatia 5:13) Chuvângin, zalenna chuan chintâwk a neih loh chuan buaina a thlen dâwn avângin, chintâwk nei lo a ni tûr a ni lo va, Pathian khawngaihna dân chhûnga hman tûr a ni.
18. Mihringte chu zalên taka duhthlan theihna hmantîrin, Pathianin eng nge a târ lan?
18 Mihringte chu mahni thua kaltîrin, Pathian chuan a rorêlna kan mamawhzia chatuan atân a lantîr a ni. Rorêlna a kenkawh dân te, a lalchungnunna te chu kawng dik awm chhun a nih avângin hlimna nasa ber, lungawina nasa ber, leh hausakna nasa ber a rah chhuak ṭhîn. A chhan chu kan rilru leh taksate chu Jehova dânte nêna a inmil chauhva hman tûra a ruahman a nih vâng a ni. “Kei hi LALPA in Pathian, in ṭhatna tûra nangmahni zirtîrtu, in kalna tûr kawnga hruaitu che u chu ka ni.” (Isaia 48:17) Pathian dân chhûnga zalên taka duhthlan theihna chu a khirh lo va, chaw tuihnai chi hrang hrang, in nalh tak chi hrang hrang, lemziak mawi chi hrang hrang, leh rimawi duhawm chi hrang hrang a thlen zâwk ang. Ṭha taka hman zalên taka duhthlan theihna chuan he lei paradis-a nun mak tak leh ropui tak a rah chhuak ngei ang.
19. Mihringte nêna an inremleh nân Pathianin eng hmanrua nge a hman?
19 Mahse, an thlan fuh loh avângin, mihringte chu Jehova lakah an lo inlahrang ta a, ṭha famkim lo, leh thi tûr an lo ni ta a ni. Chuvângin chu dinhmun lungchhiatthlâk tak ata a fate anga Pathian nêna inlaichînna ṭha nei leh tûra hruaikîr nân, tlan an lo ngai ta a. Chu mi tihpuiltlin nâna Pathian hmanraw hman chu a Lalram a ni a, Chhandamtu chu Isua Krista a ni. (Johana 3:16) He ruahmanna hmang hian mi inlamlêt tak takte—Isua tehkhin thua fapa tlânbo angte—chu Pathian nên a inremleh ang a, a fa duhtak angin a pawm leh ang.—Luka 15:11-24; Rom 8:21; 2 Korinth 6:18.
20. Engtin nge Lalramin Pathian thiltum chu a tihfamkim ang?
20 Jehova duhzâwng chu he leiah hian a lo thleng ngei ngei dâwn. (Isaia 14:24, 27; 55:11) Krista hnuaia a Lalram hmangin, Pathian chuan kan Lal Chungnung Ber ni tûra dikna a neihzia a tichiang dâwn a ni. Chu Lalram chuan he khawvêl, mihring leh ramhuaite awpna hi a titâwp ang a; tin, kum sângkhat chhûng vân aṭangin a awp ang. (Rom 16:20; Thu Puan 20:1-6) Mahse, chu mi hun chhûng chuan, Jehova awp dân kalhmang a ropui zâwkzia chu eng anga lantîr nge ni dâwn? Kum sângkhat zawhah chuan, chu Lalram chuan eng chanvo nge a chelh ang? Hêng zawhnate hi thuziak dawtlehin a chhâng ang. (w00 10/15)
Ennawn Tûr Thu Pawimawhte
• Bible thupui ber chu eng nge ni?
• Tute’n nge lei rorêlna thar siam?
• Pathian laka inlahrang mihring inawpna hi engvângin nge a hlawhtlin ngai loh vang?
• Zalên taka duhthlan theihna chu eng anga hman tûr nge?
[Zirlai Atâna Zawhnate]
[Phêk 22-naa milem]
Isua zirtîrna chuan Lalram hmanga Pathian rorêlna a sawi uar