Kautu he Atua—Pule Fou he Lalolagi
Kautu he Atua—Pule Fou he Lalolagi
“Ko e kautu . . . to tuki malipilipi mo e fakaotioti e tau kautu oti ia, ka ko ia to tumau tukulagi a ia.”—TANIELU 2:44.
1. Ko e heigoa e mauokafua kua maeke ke moua e tautolu i loto he Tohi Tapu?
KO E Tohi Tapu ko e fakakiteaga he Atua ke he tau tagata. Ne tohia he aposetolo ko Paulo: “Kua talia e mutolu e kupu he Atua ne fanogonogo mai ai a mutolu kia mautolu, ti talia ai e mutolu nakai ko e kupu he tau tagata, ka ko e kupu he Atua.” (1 Tesalonia 2:13) Kua toka ai he Tohi Tapu e tau mena nukua lata ke iloa e tautolu hagaao ke he Atua: tau fakailoaaga hagaao ke he hana mahani, hana tau finagalo, mo e hana tau poakiaga ma tautolu. Ha ha ai e tau fakatonuaga mitaki lahi ke he moui fakamagafaoa mo e tau mahani he tau aho oti. Kua talahau mai e tau perofetaaga ne fakamoli he vaha kua mole, hane fakamoli he vaha nei, mo e ka fakamoli he vaha anoiha. E, “ko e tau Tohi Tapu oti kana mai he Agaga he Atua ia, kua aoga ni ke fakaako ai, ke fakatonu ai, ke akonaki ai, ke fakailoilo ai foki ke he tututonu, kia katoatoa ai e mitaki he tagata he Atua, kia taute ni a ia ke he tau gahua mitaki oti kana.”—2 Timoteo 3:16, 17.
2. Peehi fefe e Iesu e matapatu tala he Tohi Tapu?
2 Ko e mena ne mua atu e aoga he Tohi Tapu ko e matapatu tala: ko e fakatokolugaaga he pule katoatoa he Atua (hana tonu ke pule) he kakano he hana Kautu he lagi. Ne taute e Iesu e mena ia ke uho he fekafekauaga hana. “Ne kamata ai ke fakamatala atu e Iesu, kua pehe atu, Kia tokihala a a mutolu; nukua tata tuai e kautu he lagi.” (Mataio 4:17) Ne fakakite e ia kua lata ke toka he na fe he tau momoui ha tautolu, he talahau: “Ka kia kumikumi fakamua a mutolu ke he kautu he Atua mo e hana tututonu.” (Mataio 6:33) Kua fakakite foki e ia e aoga ke fakaako e tau tutaki hana ke liogi ke he Atua: “Kia hoko mai hau a kautu. Kia eke hau a finagalo ke he lalolagi, tuga ne eke ke he lagi.”—Mataio 6:10.
Pule Fou he Lalolagi
3. Ko e ha kua aoga lahi e Kautu he Atua ki a tautolu?
3 Ko e ha ne aoga lahi ai e Kautu he Atua ke he tau tagata? Ha ko e mena nakai leva to hiki tukulagi e pule he laloalgi nei. Ne tohi he perofetaaga ia Tanielu 2:44: “Ko e vaha he tau patuiki ia [hane pule he lalolagi he mogonei] to fakatu ai he Atua he lagi e kautu [e fakatufono he lagi] nakai fakaoti tukulagi; ko e kautu foki ia nakai tuku atu ai ke he taha motu, to tuki malipilipi mo e fakaotioti e tau kautu oti ia [tau fakatufono he lalolagi], ka ko ia to tumau tukulagi a ia.” He magaaho ka pule katoatoa ai e Kautu he Atua he lagi, to nakai liliu e tau tagata ke pule ke he lalolagi. Ko e pule mavehevehe mo e nakai makona he tagata to eke tukulagi mo mena kua mole.
4, 5. (a) Ko e ha kua lata lahi ia Iesu ke Patuiki he Kautu? (e) Ko e heigoa e kotofaaga ka moua e Iesu he vaha anoiha ne tata mai?
4 Ko e Pule ne Mua he Kautu he lagi, i lalo he takitakiaga a Iehova, ko ia ne kua lata tonu—ko Keriso Iesu. Fakamua to hau ke he lalolagi, nukua moui a ia he lagi mo “tufuga” he Atua, ko e uluaki he tau tufugatia he Atua. (Tau Fakatai 8:22-31) “Ko ia ko e fakatai he Atua nakai kitia, ko e uluaki he tau mena oti kana kua eke; ha ko e mena ne eke e ia e tau mena oti kana, ko e tau mena ha he lagi, mo e tau mena ha he lalolagi.” (Kolose 1:15, 16) Mo e he magaaho ne fakafano mai he Atua a Iesu ke he lalolagi, ne eke e ia e finagalo he Atua he tau magaaho oti. Ne fakauka a ia ke he tau kamatamata kelea lahi mo e mate fakamoli ke he Matua hana.—Ioane 4:34; 15:10.
5 Ma e loto fakamoli hana ke he Atua ti hoko foki ke he mate, ne moua e Iesu e palepale. Ne liu fakatu mai he Atua a ia ke he lagi mo e tuku age ki a ia e tonu ke eke mo Patuiki he Kautu he lagi. (Gahua 2:32-36) Ko e Patuiki he Kautu, to moua e Keriso Iesu e kotofaaga mitaki lahi mai he Atua ke takitaki e tau hogofulu afe he tau mena momoui fakaagaga malolo lahi, ke uta kehe e pule tagata mai he lalolagi mo e uta kehe e tau mahani kelea oti he lalolagi katoa ha tautolu. (Tau Fakatai 2:21, 22; 2 Tesalonia 1:6-9; Fakakiteaga 19:11-21; 20:1-3) Ati eke ai e Kautu he Atua he lagi i lalo he Keriso mo pule fou, ko e fakatufono tokotaha he lalolagi katoa.—Fakakiteaga 11:15.
6. Ko e heigoa e pule ka tatali a tautolu ki ai mai he Patuiki he Kautu?
6 Ne talahau e Kupu he Atua hagaao ke he Pule fou he lalolagi: “Ti foaki age kia ia e pule, mo e fakahekeaga, mo e kautu, kia fekafekau kia ia e tau motu oti, mo e tau kautu, mo e tau vagahau kehekehe.” (Tanielu 7:14) Ha ko e mena to fifitaki e Iesu e fakaalofa he Atua, to lahi mogoia e mafola mo e fiafia i lalo he hana pule. (Mataio 5:5; Ioane 3:16; 1 Ioane 4:7-10) “Nakai fai mena ke liu mai ai e lilifu he hana pule mo e mafola he hana pule, . . . ke fakatu ai, mo e fakamau ke he fakafiliaga mo e mahani tututonu.” (Isaia 9:7) Ko e monuina ha ia ke ha ha ai e Pule ne pule mo e fakaalofa, fakafili tonu, mo e mahani tututonu! Ti talahau tuai mai he 2 Peteru 3:13: “Ka e fakatalitali a tautolu ke he lagi fou [Kautu he Atua he lagi] mo e lalolagi fou [ko e kaufakalatahaaga fou he lalolagi], tuga ne hana talahaua mai, ke nofo ai e tututonu.”
7. Kua fakamoli fefe a Mataio 24:14 he vaha nei?
7 Moli ni ko e Kautu he Atua ko e tala mitaki lahi ma lautolu oti ne fiafia ke he mena tonu. Ko e kakano haia, ha ko e vala he fakamailoga kua nonofo a tautolu mogonei he “tau aho fakamui” he fakatokaaga kelea nei, ne talahau tuai e Iesu: “To fakamatala atu foki e tala mitaki mai he kautu ke he lalolagi oti, ke eke mo talahau ke he tau motu oti, ti hoko mai ai e fakaotiaga.” (2 Timoteo 3:1-5; Mataio 24:14) Hane fakamoli e perofetaaga ia mogonei, he kavi ke ono miliona e Tau Fakamoli a Iehova he 234 e motu ne foaki ke molea e piliona e tau tula he tau he talatala atu ke he falu hagaao ke he Kautu he Atua. Kua lata ai he fakahigoa ha lautolu a tau fale tapuaki ma e kavi ke 90,000 he tau fakapotopotoaga he lalolagi katoa, ko e Fale he Kautu. Haia ne o ki ai e tau tagata ke fakaako hagaao ke he fakatufono fou hane hau.
Tau Hakega Pule
8, 9. (a) O mai i fe e tau hoa pule ha Iesu? (e) Ko e heigoa e mauokafua ka moua e tautolu ke he pule he Patuiki mo e he tau hoa pule hana?
8 To ha i ai e tau hakega pule mo Keriso Iesu he Kautu he Atua he lagi. Ne talahau tuai he Fakakiteaga 14:1-4 ko e 144,000 e tagata ne “fakafua mai he lalolagi” mo e liu fakatutu mai ke he moui he lagi. Kua putoia ki a lautolu nei e tau tagata tane mo e tau fifine ne, nakai fekafekau ki ai, ka e fekafekau loto fakatokolalo ke he Atua mo e katofia tagata ha lautolu. “Ti eke foki a lautolu mo tau patuiki fakalataha mo ia ke he tau tau ne taha e afe.” (Fakakiteaga 20:6) Kua tote lahi e numera ha lautolu ke he “moto tagata tokologa, kua nakai maeke ia taha ke totou, mai he tau motu oti, mo e tau faoa, mo e tau tagata kehekehe, mo e tau vagahau kehekehe” ka hao mai he fakaotiaga he fakatokaaga nei. Kua foaki foki e lautolu nei ke he Atua e “fekafekau kia ia ke he aho mo e po,” ka e nakai moua e lautolu e uiaga ke he lagi. (Fakakiteaga 7:9, 15) Ko lautolu nei e alito he lalolagi fou ko e tau tagata he Kautu he Atua he lagi.—Salamo 37:29; Ioane 10:16.
9 He fifili a lautolu ke pule mo Keriso he lagi, ne fifili e Iehova e tau tagata tua fakamoli mo e kua fita he iloa e puhala moui mo e tau mena vihi i ai. Kua nakai fai mena ne tupu ke he tau tagata ne nakai la tupu ke he tau ekepoa-patuiki nei. Ti fakatolomaki he moui ha lautolu he lalolagi e maeke ha lautolu ke pule ke he tau tagata. Ko Iesu foki “ko e tau mena ne mamahi ai a ia kua ako ai e ia e omaoma.” (Heperu 5:8) Ne talahau e aposetolo ko Paulo hagaao ki a ia: “Kua nakai ha ia tautolu e ekepoa ne mua kua nakai maeke ke mamahi fakaalofa fakalataha mo tautolu ke he tau mena kua lolelole ai a tautolu, ka kua kamatamata a ia ke he tau mena oti kana tuga a tautolu, ka e nakai fai hala a ia.” (Heperu 4:15) Kua mafanatia ha ia ke iloa ko e he lalolagi fou he Atua, to pule ke he tau tagata e tau patuiki mo e tau ekepoa loto fakaalofa!
Ko e Kautu Kia he Finagalo he Atua?
10. Ko e ha ne nakai ko e vala he finagalo fakamua he Atua e Kautu he lagi?
10 Ko e Kautu he lagi ko e vala kia he finagalo fakamua he Atua he magaaho ne tufuga e ia a Atamu mo Eva? He fakamauaga ia Kenese, kua nakai fai talahauaga ke he Kautu pihia ka pule ke he tau tagata. Ko Iehova tokotaha e Pule ha lautolu, mo e ka omaoma a lautolu ki a ia, kua nakai lata ma e ha pule foki. Ne fakakite he Kenese veveheaga 1 ne fehagai a Iehova, liga ni he puhala he Tama uluaki hana he lagi, mo Atamu mo Eva. Ne fakaaoga he fakamauaga e tau kupu tuga e “pehe atu e Atua ki a laua” mo e “pehe age e Atua” ki a laua.—Kenese 1:28, 29; Ioane 1:1.
11. Ko e heigoa e kamataaga mitaki katoatoa ne ha ha he tagata?
11 Ne talahau he Tohi Tapu: “Ti kitekite e Atua ke he tau mena oti ne eke e ia, kitiala, kua mitaki lahi ni.” (Kenese 1:31) Ko e tau mena oti kana he katene ko Etena kua mitaki katoatoa. Kua moui a Atamu mo Eva he parataiso. Kua mitaki katoatoa e tau manamanatuaga mo e tau tino ha laua. Kua maeke ia laua ke matutaki mo e Tufuga ha laua ti pihia foki a ia ki a laua. Ti ka tumau ke fakamoli, to fanafanau e laua e fanau mitaki katoatoa. Ti kua nakai lata ke moua e fakatufono fou he lagi.
12, 13. He tupu holofa e tau tagata mitaki katoatoa, ko e ha ne maeke agaia he Atua ke matutaki mo lautolu?
12 He tupu holofa e magafaoa he tagata, to maeke fefe e Atua ke matutaki mo lautolu oti? Manamanatu ke he tau fetu i luga he lagi. Kua fakavahega auloa a lautolu ke he tau atu aelani ne ui ko e tau fakatokatokaaga fetu. Falu fakatokatokaaga fetu kua toka ai e piliona he tau fetu. Ko e falu kua toka ai kavi ke tuliona. Mo e fuafua he tau saienetisi ko e kavi ke 100 piliona e tau fakatokatokaaga fetu he lagi likoliko! Ka kua talahau mai e Tufuga: “Hahaga hake a ki luga mo e kitekite ā mutolu, po ko hai ne eke e tau mena nai? Kua takitaki mai ha lautolu a tau kau kua totou, ti ui e ia a lautolu oti ke he tau higoa ha lautolu, ko e hana malolo lahi mo e hana mana lahi; nakai ni galo taha ia lautolu.”—Isaia 40:26.
13 Ha kua maeke he Atua ke totou e tau kau oti nei he pulagi, moli kua nakai uka ia ia ke totou e tau tagata ne ikiiki lalahi e tau numera. He mogonei foki, kua totou miliona he tau fekafekau hana ne liogi he tau aho oti ki a ia. Kua hokotia e tau liogi ia ke he Atua. Ti ke matutaki mo e tau tagata mitaki katoatoa oti kana kua nakai uka ki a ia. Kua nakai manako a ia ma e Kautu he lagi ke totou a lautolu. Ko e fakaholoaga homo lahi ha ia—ke eke a Iehova mo Pule, ke ataina ke o atu ki a ia, mo e moua e amaamanakiaga ke nakai mate, ke moui tukulagi he lalolagi parataiso!
“Kua Nakai Ha i Ai ke he Tagata”
14. Ko e ha ne manako tukumalagi e tau tagata ke he pule ha Iehova?
14 Pete he pihia, ko e tau tagata—ko lautolu foki ne mitaki katoatoa—kua lata tukulagi ke moua e pule a Iehova. Ko e ha? Ha kua nakai tufuga e Iehova a lautolu ke kautu he tu tokotaha mai he pule hana. Ko e fakatufono a ia he tagata, tuga ne fakailoa mai he perofeta ko Ieremia: “Iehova na e, kua iloa e au, kua nakai ha i ai ke he tagata hana puhala, nakai ha ha he tagata kua fano ke fakatonu e mena ke fano a ia ki ai. Iehova na e, kia akonaki mai a koe kia au.” (Ieremia 10:23, 24) Ko e mena hagahaga kelea a ia ma e tau tagata ke manatu kua maeke ia lautolu ke kautu he pule ke he kaufakalatahaaga ka e nakai pule a Iehova ki a lautolu. To kehe lahi mai he puhala ne tufuga ai a lautolu. Kua moli, ke tu tokotaha mai he pule ha Iehova ka fua mai e fulukovi, vihiatia, ekefakakelea, kolokolovao, tau felakutaki, mo e mate. “Kua pule ai e taha tagata ke he taha, ke kelea ai e ia ni.”—Fakamatalaaga 8:9.
15. Ko e heigoa e tau fua ne moua mai he fifiliaga hehe he tau matua fakamua ha tautolu?
15 Kua momoko lahi, he fifili e tau matua fakamua ha tautolu kua nakai manako a laua ke Pule e Atua ki a laua, mo e fifili a laua ke tu tokotaha mai ia ia. Ko e fua, ne nakai liu e Atua toka a laua he mitaki katoatoa. Kua tuga e matini hila a laua he mogonei kua fakatoka kehe mai he matapatu hila. Ti fai magaaho, ti lolelole hifo a laua mo e tu noa—he mamate. Kua eke a laua mo talagaaga kelea, ti ko e tuaga ia ni ka fakaholo atu e laua ke he fanau ha laua. (Roma 5:12) “Ko e Maka [ko Iehova] tumau a ia, kua katoatoa ni e mitaki hana gahua; ha kua tonu hana tau puhala oti ni . . . Kua kelea ni a lautolu, nakai ko e ila he hana fanau ha lautolu a ila.” (Teutaronome 32:4, 5) Moli, kua fakaohooho he mena moui fakaagaga totoko a Atamu mo Eva, ne eke ko Satani, ka kua mitaki katoatoa e tau manamanatu ha laua mo e kua lata ke fakaheu e mena ne talahau e ia.—Kenese 3:1-19; Iakopo 4:7.
16. Fakamoli fefe he fakamauaga tuai e fua he tu tokotaha mai he Atua?
16 Ne fakamoli lahi he fakamauaga tuai e fua he tu tokotaha mai he Atua. Ke he totou afe e tau tau, kua lali he tau tagata e tau fakatufono kehekehe he tagata, tau puhala fakatupe mo e fakatokaaga kaufakalataha oti. Ka kua fakatumau e kelea ke “au atu he kelea.” (2 Timoteo 3:13) Kua fakamoli he senetenari ke 20 aki e mena ia. Kua puke ai he tau fakavihia mo e kolokolovao, tau felakutaki, hoge, mativa, mo e matematekelea ne mua atu ke he ha vaha he fakamauaga tuai. Mo e ko e ha lotomatala fakaekekafo fou ne moua, to fakahiku ni e tagata ke mate. (Fakamatalaaga 9:5, 10) He lali ke o he puhala ni ha lautolu, ne fakaata he tau tagata a lautolu ke hele e Satani mo e tau temoni hana, kua kelea lahi ai ati ui he Tohi Tapu a Satani ko e “atua he lalolagi nai.”—2 Korinito 4:4.
Ko e Mena Fakaalofa he Fifiliaga Tokanoa
17. Kua lata ke fakaaoga fefe e fifiliaga tokanoa he Atua?
17 Ko e ha ne toka e Iehova e tau tagata ke o ni he puhala ha lautolu? Ha kua tufuga e ia a lautolu mo e mena fakaalofa mitaki lahi ko e fifiliaga tokanoa, ko e pule he tokanoa ke fifili. “Ko e mena ha i ai e Agaga he Iki ha ha i ai e tokanoaaga,” he talahau he aposetolo ko Paulo. (2 Korinito 3:17) Nakai fai tagata ne fia eke mo ropoto, ke toka taha tagata ke fifili he tau magaaho oti he aho e mena ke talahau mo e ke taute e ia. Ka kua manako a Iehova ke fakaaoga fakamitaki he tau tagata e mena fakaalofa ia he fifiliaga tokanoa, ke kitia e pulotu he taute hana finagalo mo e tumau ke omaoma ki a ia. (Kalatia 5:13) Ti kua nakai lata ke katoatoa e tokanoaaga, ha ko e mena tupu mai e kolokolovao ka pihia. Kua lata ke fai fuafuaaga i loto he tau katofia he tau fakatufono mitaki he Atua.
18. Ko e heigoa ne fakatata he Atua he toka e tagata ke fakagahuahua e fifiliaga tokanoa?
18 He toka e magafaoa tagata ke o he puhala ni ha lautolu, kua fakakite lagataha he Atua kua lata a tautolu mo e pule hana. Ko e puhala pule hana, ko e pule katoatoa hana, ko e puhala tokotaha ni a ia ne tonu. Kua fua mai e fiafia mahaki, makona, mo e mahuiga. Kua pihia e mena nei ha kua talaga e Iehova e tau manamanatu mo e tau tino ha lautolu ke gahuahua mitaki ka fakatatai atu ke he tau fakatufono hana. “Ko au ko Iehova, ko e hau a Atua, kua fakaako atu kia koe ke he tau mena ke aoga ai, kua takitaki e ia a koe ke he puhala ke fano ai a koe.” (Isaia 48:17) Ko e fifiliaga tokanoa i loto he tau katofia he fakatufono he Atua kua nakai mamafa, ka e to fua mai e tau mena kai kehekehe mitaki lahi, tau kaina, tau vali fakatino, mo e tau leo kofe. Ka fakagahuahua fakamitaki, to moua he fifiliaga tokanoa e moui homo ue atu he lalolagi parataiso.
19. Ko e heigoa e malolo ne fakaaoga he Atua ke fakafeilo mai e tau tagata ki a ia?
19 Ka ko e ha lautolu a fifiliaga hehe, ne fakamamao mai e tau tagata ia Iehova, kua nakai mitaki katoatoa, lolelole fakahaga, ti mamate. Ti kua lata a lautolu ke laveaki mai he tuaga kelea ia mo e liu fakatu ke he fakafetuiaga mitaki mo e Atua mo e hana tau tama tane mo e fifine. Ko e malolo ne fifili he Atua ke moua aki e mena nei ko e Kautu, ti ko e Laveaki ko Iesu Keriso. (Ioane 3:16) He puhala he fakaholoaga nei, ko lautolu ne tokihala moli—tuga e tama tane matahavala he fakataiaga ha Iesu—to fakafeilo ai ke he Atua mo e liu talia e ia mo fanau hana.—Luka 15:11-24; Roma 8:21; 2 Korinito 6:18.
20. Kua maeke fefe e finagalo he Atua ke fakamoli he Kautu?
20 Nakai kaumahala, to fakakatoatoa ai e finagalo ha Iehova he lalolagi. (Isaia 14:24, 27; 55:11) He kakano he Kautu hana i lalo he Keriso, to fakatokoluga katoatoa (fakatonu po ke fakamoli) he Atua e tonuhia hana ke eke mo Pule Katoatoa ha tautolu. To ta mai he Kautu e fakaotiaga ke he pule he tagata mo e tau temoni ke he lalolagi, mo e to pule tokotaha ai mai he lagi ke he afe tau. (Roma 16:20; Fakakiteaga 20:1-6) Ka e he magahala he vaha ia, to fakatata fefe e tokoluga he puhala pule ha Iehova? Mo e he mole e afe tau, ko e heigoa e matagahua ka moua he Kautu? To tali he vala ka mui e tau huhu nei.
Tau Matapatu Fakamanatu
• Ko e heigoa e matapatu tala he Tohi Tapu?
• Ko hai ne ha ha he pule fou he lalolagi?
• Ko e ha kua nakai kautu e pule tokotaha he tagata mai he Atua?
• Kua lata ke fakagahuahua fefe e fifiliaga tokanoa?
[Tau Huhu he Fakaakoaga]
[Fakatino he lau 8]
Ne peehi he fakaakoaga ha Iesu e pule he Atua he kakano he Kautu
[Tau Fakatino he lau 10]
He tau motu oti ne taute he Tau Fakamoli a Iehova e Kautu mo matapatu fakaakoaga ha lautolu
[Tau Fakatino he lau 12]
Kua fakamoli he fakamauaga tuai e tau fua kelea he tu tokotaha mai he Atua
[Credit Lines]
WWI soldiers: U.S. National Archives photo; concentration camp: Oświęcim Museum; child: UN PHOTO 186156/J. Isaac