Panarian na Dios​—Balon Pananguley Diad Dalin

“[Say] panarian . . . buybuyaken to naani tan upoten to naani so saraya ya amin a panarian, et sikato so mansiansia lawas.”​—DANIEL 2:44.

1. Anton talek so niwala’d sikatayo nipaakar ed Biblia?

 SAY Biblia et panangiparungtal na Dios ed totoo. Insulat nen apostol Pablo: “Sanen inawat yo ed sikami so salita ya ingganggan, a salanti salita na Dios, inako yo ya aliwan singa salita na totoo, balet unong ed katuaan, say salitay Dios.” (1 Tesalonica 2:13) Lugan na Biblia so nakaukolan tayon nakabatan nipaakar ed Dios: impormasyon a nipaakar ed personalidad to, saray gagala to, tan saray kakaukolanen to ed sikatayo. Walaan itan na sankaabigan a simbawa nipaakar ed bilay na pamilya tan inagew-agew a kondukta. Idadalatdat na satan iray propesiya ya asumpal la nensaman, nasusumpal natan, tan saray nasumpal ni ed arapen. On, “amin a sulat ya impuyan na Dios sikato met so maabig a pakaaralan, pakasumalan, pakasimbawaan, tan pakapanontonan a sikato so wala ed katunongan. Pian say too na Dios anggapo komon so pankulangan to, a nabangatan a maong ed amin a gawa a maabig.”​—2 Timoteo 3:16, 17.

2. Panon so impangidanet nen Jesus ed tema na Biblia?

² Say sankaimportantian ed Biblia et say tema na satan: say kiyalangon na inkasoberano na Dios (say kanepegan ton manuley) panamegley na mangatatawen a Panarian to. Inyapasakey itan nen Jesus ed ministeryo to. “Ginmapoy Jesus a nampulong, tan nankuan, Mansibkel kayo; ta asingger la so panariay tawen.” (Mateo 4:17) Impabitar to no anto so manepeg a pasen na satan ed kabibilay tayo, ya oniay impaseseg to: “Ingen anapen yo nin unona so panarian, tan say inkatunong to; et amin iraya a bengatla niarum ira ed sikayo.” (Mateo 6:33) Impanengneng to met so kaimportantian na satan nen imbangat toray patumbok to ya oniay ipikasi da ed Dios: “Onsabi komon so panarian mo. Nagawa komon so  linawam, unong ed tawen, ontan met ed dalin.”​—Mateo 6:10.

Balon Pananguley Diad Dalin

3. Akin a say Panarian na Dios et walaan na direktan kaimportantian ed sikatayo?

³ Akin ya ontanlan kaimportanti so Panarian na Dios ed saray totoo? Lapud magano lan umanen na satan so pananguley ed sayan dalin diad ando lan ando. Oniay indalatdat na propesiya ed Daniel 2:44: “Dia ed saray agew naani na saratan ya arari, say Dios na tawen mamaalagey naani na sakey a panarian [sakey a gobierno ed tawen] ya anggan kapigan agnaani naderal tan say pananguley to agnaani niiter ed sananey a baley: balet buybuyaken to naani tan upoten to naani so saraya ya amin a panarian [saray gobierno diad dalin], et sikato so mansiansia lawas.” Sano sigpot lan manuley so mangatatawen a Panarian na Dios, aglan balot kontrolen na totoo so dalin. Say naapag-apag tan agmakapenek ya uley na too so sigpot lan naandi.

4, 5. (a) Akin a si Jesus labat so sankakualipikadoan a magmaliw ya Ari ed Panarian? (b) Anto so nipabtang naani ed si Jesus diad asingger lan arapen?

⁴ Diad silong na direktan panangidirehi nen Jehova, si Kristo Jesus so sankakualipikadoan a Manunan Manuley ed mangatatawen a Panarian. Sakbay ya onla diad dalin, sikatoy nambilay la’d tawen bilang “uloen a komikimey” na Dios, say inmuna-una ed amin a pinalsa na Dios. (Uliran 8:22-31) “Sikato so talintaoy Dios ya agnanengneng, say panguloan ed amin a pinalsa; ta dia ed sikato apalesa so amin a bengatla, dia ed katawenan tan tapew na dalin.” (Colosas 1:15, 16) Tan sanen si Jesus so imbaki na Dios diad dalin, ginawa to so linawa na Dios ed amin a panaon. Sinungdoan to so sankairapan iran subok tan inatey a matoor ed Ama to.​—Juan 4:34; 15:10.

⁵ Lapud katooran to ed Dios angga ed patey, si Jesus so atumangan. Sikato so pinaoli na Dios ed tawen tan niiter ed sikatoy kanepegan a magmaliw ya Ari ed mangatatawen a Panarian. (Gawa 2:32-36) Bilang Ari ed Panarian, si Kristo Jesus so makapakelkelaw a pabtangan na Dios a mangidaulo ed nilaksalaksan makapanyarin espiritun pinalsa diad pangekal da ed uley na too diad dalin tan panlinis ed dalin tayo manlapud amin a karelmengan. (Uliran 2:21, 22; 2 Tesalonica 1:6-9; Apocalipsis 19:11-21; 20:1-3) Insan say mangatatawen a Panarian na Dios so magmaliw la’d satan a balon manuley, say alenleneg a gobierno ed intiron dalin.​—Apocalipsis 11:15.

6. Anton klase na uley so nailaloan tayo’d Ari ed Panarian?

⁶ Oniay kuan na Salitay Dios nipaakar ed balon Manuley diad dalin: “Sikato so naikdan na panuley, tan gayaga, tan sakey a panarian, ya amin so saray baley, saray nasyon, tan pansasalita manlingkor ira komon ed sikato.” (Daniel 7:14) Lapud aligen nen Jesus so panangaro na Dios, niwala so pirmi a deen tan liket diad silong na pananguley to. (Mateo 5:5; Juan 3:16; 1 Juan 4:7-10) “Nipaakar ed ilaknab na gobierno to tan ed say kareenan, anggapo so anggaan, . . . pian itandoro itan tekep na inkahustisya tan tekep na inkatunong.” (Isaias 9:7, Revised Standard Version) Agaylan bendision so pakawalaan na sakey a Manuley a manguley tekep na aro, inkahustisya, tan inkatunong! Kanian, ipapasakbay na 2 Pedro 3:13: “Unong ed sipan to alagden tayo so saray tawen a balo [mangatatawen a Panarian na Dios] tan dalin a balo [sakey a balon sosyedad ed dalin], a sikara so panayaman na katunongan.”

7. Panon a nasusumpal natan so Mateo 24:14?

⁷ Maseguron say Panarian na Dios so sankaabigan a balita parad amin a mangaaro ed kaptekan. Satan so rason no akin a, bilang kabiangan ed tanda a manbibilay tayo la natan ed “kaunoran iran agew” na sayan marelmeng a sistema, impasakbay nen Jesus a: “Saya ya ebanghelyo na panarian nipulong naani ed sankamundoan ya onkanan pamintuan ed saray amin a nasyones; et saman la onsabi so anggaan.” (2 Timoteo 3:1-5; Mateo 24:14) Nasusumpal la natan itan a propesiya, lapud manguusar so ngalngali anemiran milyon a Tastasi nen Jehova ed 234 a dalin na masulok a sakey bilyon ya oras ed tinaon, ya itotongtong da’d arum so nipaakar ed Panarian na Dios. Matukoy sirin a saray pasen a pandadayewan na ngalngali lan 90,000 a kongregasyon ed sankamundoan so tawagen a Kingdom Hall. Ditan so panaaralan na totoo nipaakar ed onsabin balon gobierno.

 Kaiba Iran Manuley

8, 9. (a) Iner so panlapuan na saray nakaiba nen Kristo a manuley? (b) Anton talek so niwala’d sikatayo diad panuley na Ari tan saray miuley ed sikato?

⁸ Wala met iray nakaiba nen Kristo Jesus a manuley ed mangatatawen a Panarian na Dios. Impasakbay na Apocalipsis 14:1-4 a walay 144,000 a totoo ya ‘asaliw dia ed saray totoo’ tan napaoli ira ed mangatatawen a bilay. Laktipen na saraya so lalaki tan bibii ya, imbes a panlingkoran et mapaabeban nanlingkor ed Dios tan ed kapara ran totoo. “Sikara so nagawa a saserdote na Dios tan si Kristo, et miari ra ed sikato ed sanlibon taon.” (Apocalipsis 20:6) Say bilang da et daiset no ikompara ed “baleg ya ulop, a sikato so agnayari a bilangen na too a nanlapu ed balang nasyon tan amin na saray kailalakan, tan binaleybaley, tan salita” a makaliktar ed anggaan ed sayan sistema. Saraya met so mangisasaklang ed Dios na ‘[sagradon] panaglingkor ed agew tan labi,’ balet ag-ira natawag ed tawen. (Apocalipsis 7:9, 15) Tugyopen da so pinagkasentro na balon dalin bilang uuleyan na mangatatawen a Panarian na Dios.​—Salmo 37:29; Juan 10:16.

⁹ Diad impanpili nen Jehova ed saramay miuley ed si Kristo diad tawen, pinili to iramay matoor a totoo ya akaeksperiensia la’d bilay a walaan na amin a klase na problema. Asagmak na sarayan arari-saserdote so amin lawarin sasagmaken na totoo. Kanian say impanbilay da diad dalin so makatulong ed panuley da ed totoo. Anggan si Jesus a mismo et “inaral to so katutulok lapu ed saray bengatlan intepel to.” (Hebreos 5:8) Oniay inkuan nen apostol Pablo nipaakar ed sikato: “Anggapo so sakey ya atagey a saserdote tayo ya agmakayarin mangasi ed saray kakapuyan tayo; noag say sakey a tinukso ed amin a singa sikatayo, ingen anggapo so kasalanan to.” (Hebreos 4:15) Agaylan makaligliwa so pakaamta a diad matunong a balon mundo na Dios et saray totoo so uleyan na saray maaro, mililiknan arari tan saserdote!

Kabiangan Kasi ed Gagala na Dios so Panarian?

10. Akin a say Panarian ed tawen et agkabiangan ed orihinal a gagala na Dios?

¹⁰ Kabiangan kasi so mangatatawen a Panarian ed orihinal a gagala na Dios sanen pinalsa to si Adan tan Eva? Diad salaysay na Genesis nipaakar ed panamalsa, ag-asaglawi so sakey a Panarian a manuley ed katooan. Si Jehova a mismo so Manuuley ed sikara, tan agla nakaukolan so antokaman nin pananguley, daput no ontulok ira ed sikato. Ipapabitar na Genesis kapitulo 1 ya akideneng si Jehova ed si Adan tan Eva, a posiblin diad panamegley na panguloan ya Anak to ed tawen. Inusar na salaysay iray balikas ya “inkuan na Dios ed sikara” tan “intuloy ya inkuan na Dios” ed sikara.​—Genesis 1:28, 29, NW; Juan 1:1.

11. Anto so ayadyarin gapoan na katooan?

¹¹ Inkuan na Biblia: “Say Dios anengneng to so amin a bengatla a ginawa to, et nia maong iran tuloy.” (Genesis 1:31) Amin a bengatlan walad hardin na Eden so nasnaspot. Nanayam si Adan tan Eva ed sakey a paraiso. Ayadyari so kanonotan tan laman da. Sikara so makapitongtong ed Nanggawa’d sikara tan ontan to met ed sikara. Tan  manilalak iray ayadyarin totoo no mansiansia iran matoor. Agla nakaukolan so sakey a balon gobierno ed tawen.

12, 13. Diad idakel na ayadyarin katooan, akin a siansia nin makapitalosan so Dios ed sikara?

¹² Diad idarakel na totoo, panon a makapitalosan so Dios ed sikaran amin? Nodnonoten paray bibitewen ed tawen. Saratan so atugyop bilang pulpulo ed uniberso a tatawagen a galaksi. Walaray galaksi a walaan na binilyon a bibitewen. Say arum et walaan na ngalngali sakey a trilyon. Tan akalkula na saray sientista a wala so ngalngali 100 bilyon a galaksi ed nanengneng ya uniberso! Ingen, inkuan na Manamalsa: “Itangay yo so saray mata yo ed tagey, tan nengnengen yo no siopa so amalsa ed saraya, a sikato alaen to so saray ehersito ra ed bilang; sikato tawagen to ra ya amin ed ngaran; lapu ed kabaleg a tuloy na biskeg to ed pakapanyari, tan lapu ed mabiskeg ed pakayari, anggapo so kulang anggan sakey.”​—Isaias 40:26.

¹³ Lapud nayarian na Dios a suysoyen so amin na sarayan palsa ed katawenan, maseguron agto pamproblemaan so panuysoy ed mas daiset a bilang na totoo. Anggan natan, inagew-agew a manpipikasi ed sikato iray minilyon a lingkor to. Saratan a pikakasi so makasabin tampol ed Dios. Kanian aliwan problema ed biang to so pitalosan ed amin ya ayadyarin totoo. Agto la kaukolan so sakey a mangatatawen a Panarian pian natonton tora. Agaylan abig ya uksoyan​—so pagmaliw nen Jehova a manuley tayo, pian direktan makaasingger ed sikato, tan nawalaan na ilalo ya aglan balot ompatey, a manbilay na ando lan ando diad paraison dalin!

“Aliwa a Wala ed Too”

14. Akin a nakaukolan na totoo so andi-anggaan ya uley nen Jehova?

¹⁴ Balet anggano ayadyari lay totoo, magnayon da nin nakaukolan so uley nen Jehova. Akin? Lapud ag-ira pinalsa nen Jehova a walaan na kapasidad ya ontalona no onsian ira ed uley to. Satan so pananontonan na katooan, unong ya inaksobi nen propetan Jeremias: “O Jehova, amtak a say dalan na too anggapo ed sikato lanlamang; aliwa a wala ed too a manakar a mangitonton ed saray kurang to. O Jehova, dusaen [“ipetek,” NW] mo ak.” (Jeremias 10:23, 24) Kakulangkulangan ed biang na totoo so panisip a matalona ran nakontrol so sosyedad ya anggapo so uley nen Jehova ed sikara. Misumlangan itan ed inkagawa ra. Maseguron say isian manlapud uley nen Jehova so mansumpal ed inkasiblet, gula, inkaruksa, karawalan, guerra, tan ipapatey. ‘Say too so nawalaan na pakayari ed sananey pian pankaugsan to.’​—Eclesiastes 8:9.

15. Antoray nansumpalan na makapuy a pinili na inmunan atateng tayo?

¹⁵ Makapaermen ta impulisay na inmunan atateng tayo so Dios bilang Manuley da, tan pinili ra so manbilay a sian ed sikato. Bilang nansumpalan, agla impansiansia nen Jehova so inkayadyari ra. Singara kagawaan ya apakset manlapud koryenti. Kanian sinmabi panaon et sikaray kinmapuy tan tinmunda​—diad patey. Nagmaliw iran singa depektibon pangaaligan, tan ontan a kipapasen so impasa ra ed amin ya ilalak da. (Roma 5:12) “Say Dampay [Jehova], ayadyari so gawa to; ta kaptekan so saray amin a dalan to . . . Mauges so ginawa ra ed sikato, sikara agto ra anak, sikato so akabalawan da; sika so mauges tan pikewet a kapolian.” (Deuteronomio 32:4, 5) Tua, si Adan tan Eva so inimpluensiaan na rebeldin espiritun pinalsa a nagmaliw a Satanas, balet ta walaan ira na naspot a kanonotan tan impulisay da komon so mauges ya isusugsog to’d sikara.​—Genesis 3:1-19; Santiago 4:7.

16. Panon so pamapaneknek na awaran ed epekto na isian ed Dios?

¹⁶ Unong ed awaran et dakerakel so paneknek ed epekto na isian ed Dios. Diad loob la na nilibon taon, sinali na totoo so amin a klase na gobiernoy too, amin lan sistema ed ekonomya tan sosyedad. Ingen ta say karelmengan so nantultuloy ya ‘inmuges lan inmuges.’ (2 Timoteo 3:13) Pinaneknekan itan na koma-20 a siglo. Napno itan na pirmin panggugulaan tan kasmak a karawalan, panlalaban, eras, kairapay-bilay, tan irap nen say antokaman a panaon ed awaran. Tan anggan panon lay iyaabanti ed medisina, amin et ompatey lanlamang. (Eclesiastes 9:5, 10) Diad panasali ran itonton so dilin kurakurang da, saray totoo so nampabiktima ed si Satanas tan saray demonyo to, kanian ontanlay impanawag na Biblia ed si Satanas a “dios na sayan sistema na bengabengatla.”​—2 Corinto 4:4, NW.

 Say Langkap a Bulos a Panagdesisyon

17. Panon a nausar so langkap na Dios a bulos a panagdesisyon?

¹⁷ Akin ya inabuloyan nen Jehova so totoo a magmaliw ya independenti? Lapud pinalsa toran walaay makapakelkelaw a langkap a bulos a panagdesisyon, say nisipor lan kawayangan dan manpili. “No iner so kawalaan na espiritu na Katawan, diman so kawalaan na kawayangan,” so kuan nen apostol Pablo. (2 Corinto 3:17) Anggapo so malabay a magmaliw a robot, a dia ed kada segundo ed sanagew et walay mandesidi no anto so ibaga tan gawaen to. Balet say kinaukolan nen Jehova ed totoo et say responsablin pangusar ed langkap a bulos a panagdesisyon, a tebeken da so kakabatan ed panggaway linawa to tan mansiansian manpasakop ed sikato. (Galacia 5:13) Kanian aliwan absoluto so kawayangan da, lapud satan so manresulta ed anarkiya (panangibaliwala ed antokaman a pananguley). Kaukolan a wala so mangontrol ed satan diad loob na saray ketegan na makagungguna iran ganggan na Dios.

18. Anto so impatnag na Dios sanen inyabuloy to’d too so mangagamil na bulos a panagpili?

¹⁸ Diad impangiyabuloy to’d sankatooan a magmaliw ya independenti, aminpinsan ya impanengneng na Dios a nakaukolan tayo so pananguley to. Say paraan na pananguley to, say inkasoberano to, so alenleneg a dugan paraan. Manresulta itan ed pirmin liket, inkapnek, tan aligwas. Lapud denisinyo nen Jehova so kanonotan tan laman tayo a mamawalay sankaabigan sano mitunosan iratan ed saray ganggan to. “Siak si Jehova a Dios mo, ya angibangat ed sika na nipaakar ed nabang mo, a mangitonton ed sika ed dalan a laen mo komon.” (Isaias 48:17) Say bulos a panagpili unong ed saray ganggan na Dios so agmakapabelat noagta manresulta itan ed panliket ed nanduruman tagano, ayaman, dunong, tan musika. No agamilen so bulos a panagdesisyon ed dugan paraan, satan so manresulta ed makapakelkelaw, lawas makapasagyat a bilay diad paraiso ed dalin.

19. Anton instrumento so usaren na Dios pian makapipulangan so totoo ed sikato?

¹⁹ Balet, lapud makapuy ya impanpili ra, insian na totoo so inkasikara manlapud si Jehova, a nagmaliw ira ya ag-ayadyari, makapuy, tan ompapatey. Kanian nakaukolan a narondon ira manlapud  satan a makapasinagem a kipapasen tan nipawil ira ed suston siglaotan ed Dios bilang ananak ton lalaki tan bibii. Say instrumenton usaren na Dios pian nagawaan iya et say Panarian, tan say Mananondon et si Jesu-Kristo. (Juan 3:16) Panamegley na sayan uksoyan, saray peteg a manbabawi​—singa say managdarak ya anak ed ilustrasyon nen Jesus​—so makapipulangan ed Dios tan awaten tora bilang ananak to.​—Lucas 15:11-24; Roma 8:21; 2 Corinto 6:18.

20. Panon a nasumpal so gagala na Dios panamegley na Panarian?

²⁰ Maseguron nagawa so linawa nen Jehova diad dalin. (Isaias 14:24, 27; 55:11) Panamegley na Panarian to diad silong nen Kristo, sigpot lan iyalangon (ikatunongan odino paneknekan) na Dios so kanepegan to bilang Soberano tayo. Panganggaen la naani na Panarian so pananguley na too tan demonyo ed sayan dalin, tan satan lambengat so manuley ed loob na sanlibon taon. (Roma 16:20; Apocalipsis 20:1-6) Balet legan na satan a panaon, panon a nipatnag so inkatalonggaring na paraan na pananguley nen Jehova? Tan kayari na sanlibon taon, anto la so betang naani na Panarian? Saratan a tepet so konsideraen ed ontumbok ya artikulo.

Saray Punton Repasoen

• Anto so tema na Biblia?

• Siopa so tugyopen na balon pananguley diad dalin?

• Akin ya agbalot ontalona so uley na too a sian ed Dios?

• Panon ya agamilen so bulos a panagdesisyon?

[Tepetepet Parad Panagaral]

[Litrato ed pahina 10]

Nidanet ed bangat nen Jesus so pananguley na Dios panamegley na Panarian

[Saray litrato ed pahina 12]

Diad amin a dalin, manunaan ya ibabangat na saray Tastasi nen Jehova so nipaakar ed Panarian

[Saray litrato ed pahina 14]

Papaneknekan na awaran so mauges iran epekto na isian ed Dios

[Credit Lines]

Saray sundalo nen Guerra Mundial I: U.S. National Archives photo; panangipangawan a kampo: Oświęcim Museum; ugaw: UN PHOTO 186156/J. Isaac