Tartor U Aôndo—Mtemtor U He U Shin Tar
Tartor U Aôndo—Mtemtor U He U Shin Tar
“Tartor [la] . . . ua hembe ityartor igen ne cii avur avur, ua tim i, kpa u yô, ua lu gbem sha won.”—DANIEL 2:44.
1. Se fatyô u lun a nyi vangertiôr sha Bibilo?
BIBILO ka mpase u Aôndo he’ uumace. Apostoli Paulu yange nger ér: “Zum u ne ngohol kwaghôron u Aôndo u ne ungwa hen vese la yô, ne rumun un er ka kwaghôron u ior ga, kpa er ka kwaghôron u Aôndo man kape i lu kpaa je la.” (1 Mbatesalonika 2:13) Bibilo ngi a kwagh u i gbe u se fa sha kwagh u Aôndo yô: se hen kwagh sha mlu na man mbaawashima nav kua akaa a á soo he’ avese yô. Ngi a akaawan a a hembe doon sha kwagh u uma u he’ tsombor man ieren i sha use use yô. Ka i̱ pase akaaôron a profeti a a iv kera la vie vie man a a lu ivin hegen la kua a aa va iv ke’ hemen la kpaa. Een, “icighanruamabera cii ka Aôndo A ne i nger ye. Ngu a inja sha ityesen man sha mkôôm man sha myange man sha myese u ken perapera kpaa, sha u or u Aôndo nana̱ kuma nana̱ lu a agoyol sha ci u hanma tom u dedoo.”—2 Timoteu 3:16, 17.
2. Yesu yange kimbir itinekwagh i Bibilo la var var nena?
2 Kwagh u a hembe lun hange hange ke’ Bibilo je yô ka itinekwagh na la: mkende u kenden a hementor u Aôndo sha (ian na i hemen) sha ikyev i Tartor u sha la. Yesu yange ver kwagh la lu tamen kwagh ke’ tom na. “Yesu hii u ôron kwaghaôndo, gba kaan er: Gema nen asema, gadia tartor u Sha mgbôghom ve.” (Mateu 4:17) Yange tese ian i kwagh la una tôô ke’ uuma asev yô, a taver ior asema ér: “Kpa vande keren nen tartor Na man perapera Na.” (Mateu 6:33) Shi yange tese er kwagh la a lu hange hange sha u tesen mbadondon nav er vea eren msen he’ Aôndo yô, ér: “Tartor Wou u̱ va, i̱ er ishima You shin tar kpaa vough er i eren i Sha nahan.”—Mateu 6:10.
Mtemtor u He u shin Tar
3. Hii nan ve kwagh a gbe se a Tartor u Aôndo torough torougho?
3 Er nan ve Tartor u Aôndo ú lu a inja kpishi he’ uumace yumu? Ka sha er ica a kera gba ga tsô ua er kwagh u una gema hementor u sha tar ne gbem sha won yô. Kwaghôron u profeti u i nger ke’ Daniel 2:44 la kaa ér: “Sha ayange a utor mbara [mba ve hemen sha tar hegen ne], Aôndo u Sha Una ver tartor [gomoti u sha] ugen u ua gba mayange ga yô, man shi tahav mbu u kpaa mbua hingir sha ikev i ma ikur igen ga, kpa ua hembe ityartor igen [ugomoti mba shin tar] ne cii avur avur, ua tim i, kpa u yô, ua lu gbem sha won.” Zum u Tartor u Aôndo u sha la ua hemen jimin cii yô, mayange uumace vea kera lu a tahav sha tar ga. Hemen u van a mpav kua mkom ga la ua kera lu ga gbem sha won.
4, 5. (a) Hii nan ve Yesu a lu or u nan hembe kuman u lun Tor u Tartor nee? (b) Yesu una va lu a nyi tom ke’ hemene?
4 Orhemen u Tamen u sha Tartor u sha u̱ a lu sha ikyev i hemen u Yehova jighilii la ka un a hembe kuman ye—ka Kristu Yesu je la. Cii man yange va shin tar ne yô, vande lun sha er “or u fan tom” u̱ Aôndo nahan, shi lu u hiihii ke’ akaa a Aôndo a gbe cii. (Anzaakaa 8:22-31) “Un ka ibeen i Aôndo u i nengen a Na ga la, ka Waniunda ken akaa a i gbe a cii, gadia ka ken a Na man i gbe akaa cii ye, a a lu Sha man a a lu shin tar kpaa.” (Mbakolose 1:15, 16) Man zum u Aôndo yange tindi Yesu shin tar yô, lu ishima i Aôndo lu eren hanma shighe cii ye. Yange wa ishima a ican i hemban cii shi yange dondo Ter na zan zan kar kpen.—Yohane 4:34; 15:10.
5 Er Yesu yange ta ikyaa a Aôndo zan zan mkur yô, i na un injar. Aôndo yange nder un yem a na sha shi za na un ian i lun Tor u Tartor u sha. (Aerenakaa 2:32-36) Er Kristu Yesu a lu Tor u Tartor ne yô, una zua a iaventom i kpilighyol he’ Aôndo, una hemen ikyum i vesen i ujijingi mba i gbe ve ve lu a tahav la sha u karen a hemen u uumace sha tar kera shi been a hanma ityô ifer kpaa kera. (Anzaakaa 2:21, 22; 2 Mbatesalonika 1:6-9; Mpase 19:11-21; 20:1-3) Nahan Tartor u sha u Aôndo u sha ikyev i Kristu la ua lu tahav mbu hemen mbu hegh, man a lu gomoti u una lu sha tar cii je la.—Mpase 11:15.
6. Se ver ishima ser Tor u Tartor la una va a hemen u nyi?
6 Mkaanem ma Aôndo ôr kwagh u Orhemen u he u tar la ér: “I na Un tor sha won cii man icivir man tartor, sha u ior man akuraior man ijô cii ve̱ er Un tom.” (Daniel 7:14) Sha ci u Yesu una dondo dooshima u Aôndo yô, bem man msaanyol una dumbur sha hemen na. (Mateu 5:5; Yohane 3:16; 1 Yohane 4:7-10) “Mseer u tarkuran kua bem vea lu a ikighir je ga, . . . [ua] lu taveraa sha ijirôron i vough kua sha perapera.” (Yesaia 9:7) A lu iveren u lun a Orhemen u nana hemen sha dooshima man ijirôron i vough kua perapera yô! Sha nahan yô, 2 Peteru 3:13 tsengaôron ér: “Se mba keghen Usha mba hev je [Tartor u Aôndo u sha] man tar u he [nongoior u he u shin tar] u perapera una tema ker yô, sha ityendezwa Na la.”
7. Mateu 24:14 ngu ivin nyian nena?
7 Sha mimi yô, Tartor u Aôndo hemba kan abaver a doon jimin cii he’ mba kwagh u mimi a doo ve ishima yô. Ka nahan ve, Yesu yange tsengaôron vegher u ikyav i “ayange a masejime” a botar a se lu ker hegen ne nahan ye, ér: “Loho u Dedoo u tartor ne yô, á ôr u á tser tar, sha u u̱ lu mpase hen akuraior cii; ka zum la man mkur una kuma ye.” (2 Timoteu 3:1-5; Mateu 24:14) Kwaghôron u profeti la ngu ivin hegen er Mbashiada mba Yehova mba kuman miliôn ataratar nahan sha ityar 234 ve yaren tom a ahwa a hemban biliôn môm ke’ inyom sha u ôron mbagen kwagh u Tartor u Aôndo yô. Hanma ijiir i ve civir ker i i lu sha ci u atôônanongo a kuman 90,000 sha tar cii mba yer í sha inja vough nahan ér Iyou i Tartor. Ior ka ve va ker sha u va henen kwagh u gomoti u he u a lu van la.
Atiator
8, 9. (a) Ior mba hemen vea Kristu imôngo mbara due hana? (b) Ka ishimaveren i nyi se fatyô u lun a mi ke’ hemen u Tor man mbahemen a na imôngo laa?
8 Atiator aa lu hemen vea Kristu Yesu imôngo sha Tartor u Aôndo u sha la. Mpase 14:1-4 tsengakaan ér “i paa” iorov 144,000 “ken ior” mba i nder ve ér ve̱ za lu uma sha yô. Ior mban ka nomso man kasev mba ve hidi a iyol jime sha u shiren Aôndo man uumace mba lun er ve nahan tom, ve de ér mbagen ve̱ shiren ve a shire tom ga yô. “Vea lu upristi mba Aôndo man mba Kristu kpaa, vea tema tor a Na imôngo sha anyom dubu la.” (Mpase 20:6) Ingyegh ve ndahar hemba ‘zegeikpelaior i i lu, i ma or fatyô u ôron i iyenge ga, i i dugh ken hanma ikurior man hanma nongo man hanma nongoior man hanma zwa kpaa,’ i ia va war bo tar ne la. Mban ne kpaa mba eren Aôndo “tom ken tempel Na tugh man atetan” kpa kwar ve ngu ke’ myer u yemen sha la ga. (Mpase 7:9, 15) Ve ver imagh ki tar u he sha er ve lu mba va lun sha ikyev i Tartor u Aôndo u sha la yô.—Pasalmi 37:29; Yohane 10:16.
9 Er Yehova ngur tsuan ior mba vea tema tor vea Kristu imôngo sha yô, a tsua uumace mbananjighjigh mba ve kav kwagh u uma man mbamzeyol nav cii yô. Ma kwagh môm u a lu zan ior iyol u utor man upristi mban ve fe ga war ngun ga. Nahan uma ve u shin tar la una seer nan ve agee a hemen uumace. Yesu iyol na je kpa yange “hen iko i wan sha atsan a A ya la.” (Mbaheberu 5:8) Apostoli Paulu ôr kwagh na nahan ér: “Se mba a zegepristi u A fetyô u zungwen a vese imôngo ken aseer a ase ga ze, kpa ka u i mee Un sha hanma gbenda cii vough er se nahan, saa di isholibo tsô A er ga ye.” (Mbaheberu 4:15) Ka kwagh u nan ishima surun kpishi u fan er ke’ tar u he’ u Aôndo u perapera la yô, utor man upristi mba lun a dooshima man mhôônom vea lu hemen ior yô!
Tartor Yange Ú Lu ke’ Awashima u Aôndo?
10. Tartor u sha yange ú lu awashima u Aôndo hiihii ga sha ci u nyi?
10 Tartor u sha yange ú lu awashima u Aôndo sha shighe u yange gba Adam man Ifa laa? I ter Tartor u ua va hemen orumace ke’ kwaghngeren u igbetar u ke’ Genese la ga. Ka Yehova iyol na lu Orhemen ve ye, man er yange ve za hemen u ungwan imo na di tsô yô, kwagh gba sha hemen ugen ga. Genese ityough 1 tese ér alaghga yange i lu sha ikyev i wan na u hiihii u sha la, Yehova lamen a Adam man Ifa ye. Kwaghngeren la yar tom a asemberakaa amba er “Aôndo kaa a ve er” man ‘Aôndo shi kaa a ve er’ nahan.—Genese 1:28, 29; Yohane 1:1.
11. Yange i hii uumace sha mlu u vough u nyi?
11 Bibilo kaa ér: “Tsô Aôndo gema nenge hanma kwagh u Un er yô, lu u doon tsung.” (Genese 1:31) Hanma kwagh ke’ sule u Eden cii yange lu vough ape shin lu ga. Adam man Ifa ve lu ke’ paradiso. Yange ve lu a mbamhen mba vough man ayol a vough kpaa. Lu u vea fatyô u lamen a Orgban ve man un di kpaa una lamen a ve. Man lu u aluer ve za hemen u lun mbananjighjigh her yô, vea mar ônov mba lun vough. Yange kwagh tsô kpa gba sha gomoti u he u sha ga.
12, 13. Er orumace ngur ngeen seer yô, Aôndo yange ma fatyô u lamen a ve heregh nena?
12 Er tsombor u uumace ngu ngur ngeen seer yô, lu u Aôndo una er nan ve una lamen a ve ciili? Nenge ase mlu u asan a sha. I kohol á ke’ acile a sha mba yer á ér azuku-asan. Azuku-asan agen ka a lu a asan ubiliôn imôngo. Kpa agen ka a lu a mi i kuma dubu deri kwa dubu deri kwa deri. Man mbatôvonkwaghfan kaa ér azuku-asan a kuman biliôn 100 nahan nga sha aôndo ape a fatyô u nengen a mi yô! Nahan kpa, Orgbanakaa kaa ér: “Kende nen ashe a en sha, nenge nen: ka an nan gbe akaa ne, nan dugh a akum a ve sha iyenge ve, nan yer a cii sha ati ati? Sha mvese u agee a Na man sha ci u mtaver u tahav Nav, mô môm u lun ga ngu ga.”—Yesaia 40:26.
13 Er Aôndo una fatyô u fan hanma kwagh u akaa a sha aôndo ne yô, se mba a vangertiôr ser una fatyô u fan hanma kwagh u uumace mba ingyegh ve i hembe ndahar ne kpaa. Hegen je kpa, mbacivir un umiliôn imôngo mba eren msen he’ a na hanma sev. Mbamsen mban cii ka ve ar a Aôndo fese je. Nahan, u lamen a uumace mba lun vough la a lu ma ityôkyaa he’ a na ga. Yange kwagh ma gba un u veren Tartor u sha, sha u fan kwagh ve ga. Nenge imba mserakaa u dedoo ne sha wono—u Yehova lun Orhemen, u kporom ikyua a na jighilii, shi lun a ishimaveren i kpen mayange ga, kpa lun uma gbem ke’ paradiso shin tar la!
‘Mvershigh u Or Ngu sha Ikyev i Nan Ga’
14. Ka sha ci u nyi man kwagh a gba uumace sha hemen u Yehova gbem sha wono?
14 Er i lu cii kpa, uumace—kua mba vea va lu vough la je kpaa—a gba u vea veren ashe a hemen u Yehova gbem sha won. Sha ci u nyi? Sha ci u Yehova yange gba ve a tahav mbu hemen tsembelee sha tseeneke ve ga. Kwagh la ka tindi u uumace, er profeti Yeremia lumun a mi nahan, ér: “TERE, m fa, gbenda u or ngu sha ikev i nan ga; or u zenden la, mvershigh u iaven i angahar a nan ngu sha ikev i nan ga. TERE, tsaham.” (Yeremia 10:23, 24) A lu kwaghhômon kpishi u uumace henen ér vea fatyô u hemen ayol a ve a Yehova shio la. A lu sha mlu u yange i gba ve la ga. Mlu u lun sha tseeneke kera suur sha hemen u Yehova ga la una va a msoo u or soon iyol i nan tseegh man ihyom kua tswam man ipila kua ityav man ku je a bunde ga cii. ‘Lu u or a lu a tahav sha orgen yô, nana gba eren nan ican.’—Orpasenkwagh 8:9.
15. Mtsough u bo u mbamaren asev mbahiihii yange ve tsua la va se a nyi?
15 Kwagh ka a er i vihi yô, kwagh yange gba mbamaren asev mba hiihii mbara ér Aôndo a̱ lu Orhemen ve ga, nahan ve tsua ér vea lu sha tseeneke ve a na shio. Kwagh la na yô, Aôndo ti kpa kera kôr mlu ve u vough la dông ga. Ve hingir he shighe la er ka ityôndousu í í dugh í ke’ atse kera nahan. Lù u ica a gba ga tsô, vea hingir u gban ikyure maa pirin—shin ku. Ve hingir inja er ka ikyagh ki eren akaa agen shimi ki lun a acôghol iyol nahan, man mlu la yange lu kwagh u ve fatyô u nan mbayev vev cii je la. (Mbaromanu 5:12) “Ka vande, tom Na ngu vough; gadia igbenda Na cii, ngi jighilii. . . . Ve er a Na dang, ve kera mba ônov Nav ga, mba a acôghol iyol.” (Duteronomi 32:4, 5) Sha mimi yô, yange lu or u ken jijingi u hembanato u a hingir Satan la yange mgbegha Adam man Ifa ye, kpa yange ve lu a asema a vough nahan yange ma ve fatyô u vendan mbamhen nav mba sha ifer la kera.—Genese 3:1-19; Yakobu 4:7.
16. Tsegh ku mbayiase ku eren shiada sha kwagh u mlu u sha tseeneke a Aôndo shio a ve a mi la nena?
16 Tsegh ku mbayiase kú eren shiada wanger wanger sha kwagh u zayol u mlu u lun sha tseeneke kera suur sha Aôndo ga a ve a mi la. Ior ndera karen hanma ityô msertar, man gbenda kasua kua mlu imôngo udubu mbaanyomov kar hegen kpishi. Nahan kpa iferkwagh ngi yemen ‘hemen hemen hemban vihin a vihi cii.’ (2 Timoteu 3:13) Derianyom u sha 20 la tese nahan. Yange iv a ihyom i vihin tsung man ipila i hemban man ityav mbi nôngon kua ijen i gban kua ibanave man ican i yan i i lu a vande eren ke’ mlu u tar ne ga yô. Man ma mzehemen u i zough a mi ke’ twersôron cii kpa ica ka i gba ga tsô hanma or nan gba kpen je. (Orpasenkwagh 9:5, 10) Sha u uumace nôngon ér vea kôôm mvershigh ve yô, ve na ayol a ve sha atseregh a Satan man azôv na, je yô gande Bibilo yila Satan ér ka “aôndo u tar u ainge ne.”—2 Mbakorinte 4:4.
Iyua i Ian i Eren Kwagh u Or Soo La
17. Yange gba u a yar tom a iyua i ian i eren kwagh u or soo la nena?
17 Yehova yange de ér uumace ve̱ yem gbenda ve ér nena? Ka sha ci u yange gba ve a iyua i kpilighyol i lun a ian i eren kwagh u ve soo u eren la. Ka ian i tsuan kwagh u ve soo u tsuan je la. Ngise apostoli Paulu kaa ér: “Hen ape Jijingi u Ter A lu yô, ikangenev mbi her ga.” (2 Mbakorinte 3:17) Or môm kpa soo u lun atoki, sha u i lu orgen nana tsuan kwagh u nana ôr sha hanma sekônd u a kar sha iyange kua kwagh u nana eren kpaa la ga. Kpa Yehova soo ér uumace ve̱ yar tom a ian ve i tsuan kwagh u ve soo la sha inja, shi ve̱ nenge a ityôkyaa i eren ishima na shi zan hemen u ungwan un kpaa. (Mbagalatia 5:13) Nahan ian la yange gba pe ia gba lun a ikighir shio ga ze, sha ci u kwagh la una va a kwagh nzughul. Yange gba pe a kôôm í sha mver u atindi a Aôndo a ver sha ci u mkpeyol u or la.
18. Aôndo tese nyi kwagh sha u den or ér nana er ishima i nana?
18 Sha u nan ian ér tsombor u uumace u̱ yem kwagh u ú yô, Aôndo tese kwa môm nahan ér kwagh gba se sha hemen na, una kera shi kimbir tesen nahan ga. Ka mhemen u a hemen la man hementor na la tseegh u lu u shami ye. Ngu ve a msaanyol u hemban cii man mkom man uyôughyôugh kpaa. Kwagh ne ngu nahan sha ci u Yehova yange er mbamhen asev man ayol ase ér a̱ hemba eren tom sha inja shighe u se lu dondon sha atindi na yô. “TER Orpaan wou, Icighan u Iserael, ngu kaan nahan er: Mo M ngu TER Aôndo wou, M tese u kwagh u una lu u a inja yô, M hemen we sha gbenda u ú zenden sha mi la.” (Yesaia 48:17) U tsuan kwagh u sha ishima you kpa geman eren sha atindi a Aôndo la una fatyô u lun ikyáv mbi yuhwan ga kpa a fatyô u van a akaa a dedoo anza er kwaghyan man ya man tomaveegh kua ityogholough kpaa nahan. Aluer or yar tom a ian i eren kwagh u nan soo la sha inja yô, ia fatyô u zan a nan ke’ uma u doon gbem sha won ke’ paradiso shin tar.
19. Aôndo yar tom a nyi gbenda nahan sha u himen uumace a naa?
19 Kpa uumace yange ve palegh Yehova, nahan ve hingir u kera lun vough ga shi saan ishe shi kpen sha ci u ve tsua kwagh u a lu u shami ga yô. Sha nahan yô, gba pe a paa ve sha mlu u vihin la shi a hide a ve ke’ mye u yan ikyar i injaa a Aôndo er ka ônov nav mba nomso man mbakasev nahan. Gbenda u Aôndo yange tsua u eren kwagh ne yô lu Tartor, man Orpaan di gema ka Yesu Kristu. (Yohane 3:16) Ka ke’ mserakaa ne, mba ve gem asema sha kwaghbo ve sha mimi la—inja er wan u lu undu ter na ke’ injakwagh i Yesu la nahan—a hime ve a Aôndo man una hide a ngohol ve er ka ônov nav ye.—Luka 15:11-24; Mbaromanu 8:21; 2 Mbakorinte 6:18.
20. Tartor la ua iv mbaawashima mba Aôndo shin tar nena?
20 Awashima u Yehova a tar una kure kpee u bunden ka ga. (Yesaia 14:24, 27; 55:11) Sha ikyev i Tartor na u i lu Kristu a lu hemen la yô, Aôndo una paase ahon sha iyol na (shin una tsegha shin una tese) ian i i lu i na i lun Orhemen wase la. Tartor la ua bee a hemen u uumace man u azôv cii sha tar, shi ka ú tseegh ua hemen sha anyom dubu ye. (Mbaromanu 16:20; Mpase 20:1-6) Kpa sha shighe la, a fatyô u tesen mhembe u gbenda u Yehova a hemen la nena? Shi anyom dubu la aa karen kera yô, Tartor la ua lu a nyi tomo? Kwaghngeren u a dondo ne una nenge sha mbampin mban.
Asemaakaa a Hiden Umbur Kwagh
• Itinekwagh i Bibilo kanyi?
• Ka unô ve kohol ve lu hemen u he u shin tara?
• Hemen u uumace ve hemen sha tseeneke ve a Aôndo shio la ua fatyô u zan kera ga sha ci u nyi?
• Se er tom a ian i eren kwagh u se soo la nena?
[Study Questions]
[Picture on page 8]
Ityesen i Yesu yange i ôr kwagh u hemen u Aôndo sha ikyev i Tartor la var var
[Pictures on page 10]
Mbashiada mba Yehova tôô Tartor la hingir ve tine kwaghpasen sha hanma tar cii
[Pictures on page 12]
Tsegh ku mbayiase er shiada i akaabo a a ve ke’ mlu u lun sha tseeneke a Aôndo shio la yô
[Credit Line]
Ushoja mba WWI: Foto u sha ikyev i U.S. National Archives; Afo a mbakwarev: Oświęcim Museum; wanye: FOTO u UN 186156/J. Isaac