Ginhadian han Dios—Bag-o nga Pagmando ha Tuna

“An ginhadian . . . magpipinitpinit ngan mag-aanaw hini ngatanan nga ginhadian,ngan ini matindog ha kadayonan.”—DANIEL 2:44.

1. Ano an masasarigan naton ha Biblia?

AN BIBLIA amo an kapahayagan han Dios ha mga tawo. Hi apostol Pablo nagsurat: “Han iyo pagkarawat ha amon han baraan nga pulong han sumat, nga amo an pulong han Dios, iyo kinarawat ito, diri sugad nga pulong han mga tawo, kondi, ha pagkamatuod, nga pulong han Dios.” (1 Tesalonika 2:13) An Biblia nagsusulod han ginkikinahanglan naton basi mahibaro mahitungod ha Dios: impormasyon mahitungod han iya personalidad, han iya mga katuyoan, ngan han iya mga ginkikinahanglan ha aton. Mayada ito gimaopayi nga sagdon ha kinabuhi han pamilya ngan ha adlaw-adlaw nga paggawi. Mayada ito mga detalye han mga tagna nga natuman ha naglabay, natutuman yana, ngan matutuman ha tidaraon. Oo, “an ngatanan nga mga Baraan nga Surat nga ginpakaaghat han Dios may kapulsanan man ha pagtutdo, ha pagbadlong, ha pagsaway, ha panutdoan nga ha katadongan: Basi nga an tawo han Dios mahingpit, ngan maandam tungod ha ngatanan nga maopay nga buhat.”​—2 Timoteo 3:​16, 17.

2. Paonan-o pinabug-atan ni Jesus an tema han Biblia?

² An pinakaimportante gud ha Biblia amo an tema hito: an pagbindikar han pagkasoberano han Dios (an iya katungod ha pagmando) pinaagi han iya langitnon nga Ginhadian. Ginhimo ni Jesus ito nga pinakaimportante nga bahin han iya ministeryo. “Tikang hadto nga panahon hi Jesus nagtikang panwali ngan pagsiring: Magbasol kamo, kay an ginhadian han langit tikahirani na.” (Mateo 4:17) Ipinakita niya kon ano an lugar hito ha aton mga kinabuhi, nagsasagda: “Kondi pamilnga niyo siyahan an ginhadian han Dios, ngan an iya katadongan.” (Mateo 6:33) Ipinakita liwat niya nga importante gud ito pinaagi han pagtutdo ha iya mga sumurunod nga mag-ampo ha Dios: “Kumanhi an imo  ginhadian. Matuman an imo pagburut-an, sugad ha langit, amo man ha tuna.”​—Mateo 6:10.

Bag-o nga Pagmando ha Tuna

3. Kay ano nga importante gud ha aton an Ginhadian han Dios?

³ Kay ano nga importante gud ha mga tawo an Ginhadian han Dios? Tungod kay ha diri na mag-iiha magios ito nga magbabag-o han pagmando hini nga tuna ha kadayonan. An tagna ha Daniel 2:44 nasiring: “Ha mga adlaw hito nga kahadian [nagmamando yana ha tuna] an Dios ha langit magpapabangon hin usa nga ginhadian [gobyerno ha langit], nga diri gud magugunaw, diri man an kagamhanan hini itatapod ha iba nga katawohan; kondi ini magpipinitpinit ngan mag-aanaw hini ngatanan nga ginhadian [tunan-on nga mga gobyerno], ngan ini matindog ha kadayonan.” Kon an langitnon nga Ginhadian han Dios bug-os nga nagmamando na, diri na gud magmamando utro an mga tawo ha tuna. An nagkakabahinbahin ngan diri-makapatagbaw nga pagmando han tawo mawawaray na ha kadayonan.

4, 5. (a) Kay ano nga hi Jesus an usa nga kuwalipikado gud nga magin Hadi han Ginhadian? (b) Magkakaada ano nga toka hi Jesus ha hirani nga tidaraon?

⁴ An Punoan nga Magmarando ha langitnon nga Ginhadian, ilarom han giya ni Jehova, amo an kuwalipikado gud​—hi Kristo Jesus. Antes kumanhi ha tuna, naeksister na hiya ha langit sugad nga ‘maabtik nga magburuhat’ han Dios, nga amo an siyahan ha ngatanan nga mga linarang han Dios. (Proberbios 8:​22-31) “Hiya amo an dagway han Dios nga diri sadang makita, an siyahan nga natawo han ngatanan nga mga binuhat; Kay tungod ha iya ginbuhat an ngatanan nga mga buhat, aadto ha mga langit ngan hahani ha tuna.” (Kolosas 1:​15, 16) Ngan han sinugo han Dios hi Jesus nganhi ha tuna, ginbuhat niya an kaburut-on han Dios ha ngatanan nga panahon. Gin-ilob niya an pinaka-makuri nga mga pagsari ngan namatay nga matinumanon ha iya Amay.​—Juan 4:34; 15:10.

⁵ Tungod han iya pagkamaunungon ha Dios bisan ha kamatayon, ginbalosan hi Jesus. Ginbanhaw hiya han Dios ngadto ha langit ngan iginhatag ha iya an katungod nga magin Hadi han langitnon nga Ginhadian. (Buhat 2:​32-36) Sugad nga Hadi han Ginhadian, hi Kristo Jesus magkakaada makatarag-ob nga toka tikang ha Dios basi pangunahan an minilyon han gamhanan espiritu nga mga linarang ha pagkuha han pagmando han tawo tikang ha tuna ngan pagwad-on an ngatanan nga karaotan ha aton tuna. (Proberbios 2:​21, 22; 2 Tesalonika 1:​6-9; Pahayag 19:​11-21; 20:​1-3) Ngan an langitnon nga Ginhadian han Dios ilarom ni Kristo amo an magigin bag-o nagmamando nga awtoridad, an amo la nga gobyerno ha bug-os nga tuna.​—Pahayag 11:15.

6. Ano nga klase hin pagmando an malalaoman naton tikang ha Hadi han Ginhadian?

⁶ An Pulong han Dios nasiring mahitungod han bag-o nga Magmarando han tuna: “Iginhatag ha iya an kagamhanan, ngan an himaya, ngan an usa nga ginhadian, nga an ngatanan nga mga katawohan, mga nasud, ngan mga yinaknan mag-alagad ha iya.” (Daniel 7:14) Tungod kay susubaron ni Jesus an gugma han Dios, mahuhura an kamurayaw ngan kalipay ilarom han iya pagmando. (Mateo 5:5; Juan 3:16; 1 Juan 4:​7-10) “Mawawaray kataposan an pagtubo han iya gobyerno ngan kamurayawan, . . . ha pagparig-on hito pinaagi han hustisya ngan han katadongan.” (Isaias 9:​7, Revised Standard Version) Bendisyon gud an pagkaada hin usa nga Magmarando nga magmamando ha gugma, hustisya, ngan katadongan! Salit, an 2 Pedro 3:13 nagtatagna: “Kondi, sumala ha iya saad, naghuhulat kita hin mga bag-o nga langit [langitnon nga Ginhadian han Dios] ngan bag-o nga tuna [bag-o tunan-on nga sosiedad], diin mag-uukoy an katadongan.”

7. Paonan-o natutuman yana nga panahon an Mateo 24:14?

⁷ Sigurado nga an Ginhadian han Dios amo an gimaopayi nga sumat para ha ngatanan nga nahigugma han matadong. Salit, sugad nga bahin han tigaman nga nagkikinabuhi na kita yana ha “kataposan nga mga adlaw” hinin maraot nga sistema, hi Jesus nagtagna: ‘Inin maopay nga sumat han ginhadian igwawali ha bug-os inuukyan nga tuna ha pagpamatuod ha ngatanan nga mga nasud; ngan niyan an kataposan maabot.’ (2 Timoteo 3:​1-5; Mateo 24:14) Ito nga tagna natutuman na yana, samtang an mga unom ka milyon nga mga Saksi ni Jehova ha 234 nga nasud nagasto hin sobra usa ka bilyon ka oras ha usa ka tuig ha pagsumat ha iba mahitungod han Ginhadian han Dios. Angayan, an tagsa han ira mga lugar han pagsingba para ha mga 90,000 nga kongregasyon ha bug-os nga kalibotan tinatawag nga Kingdom Hall. Didto, napakadto an mga tawo basi mahibaro han tiarabot bag-o nga gobyerno.

 Kaupod nga mga Magmarando

8, 9. (a) Tikang diin an mga igkasi-magmarando ni Kristo? (b) Ano an masasarigan naton ha pagmando han Hadi ngan han iya mga igkasi-magmarando?

⁸ Hi Jesu-Kristo magkakaada kaupod nga mga magmarando ha langitnon nga Ginhadian han Dios. An Pahayag 14:​1-4 nagtagna nga 144,000 ka tawo an ‘ginpalit tikang ha katawohan’ ngan ginbanhaw ngadto ha langitnon nga kinabuhi. Nag-uupod ini han kalalakin-an ngan kababayin-an nga, imbes nga mangnoan, mapainubsanon nga nag-alagad ha Dios ngan ha mga igkasi-tawo. “Magkakahihimo hira nga mga saserdote han Dios ngan ni Kristo, ngan maghahadi hira upod niya hin usa ka yukot ka tuig.” (Pahayag 20:6) An ira ihap gurogutiay kay ha “kadam-an nga mga tawo, nga waray tawo nga sadang makaihap, tikang ha tagsatagsa nga nasud ngan ha ngatanan nga mga panon, ngan mga katawohan ngan mga yinaknan” nga matatalwas ha kataposan hini nga sistema. Hira liwat nagbubuhat hin ‘baraan nga pag-alagad ha adlaw ngan gab-i,’ kondi waray hira langitnon nga pagtawag. (Pahayag 7:​9, 15) Hira an pagtitikangan han bag-o nga tuna sugad nga mga sakop han langitnon nga Ginhadian han Dios.​—Salmo 37:29; Juan 10:16.

⁹ Ha pagpili hadton magmamando upod ni Kristo ha langit, ginpili ni Jehova an matinumanon nga mga tawo nga nakaeksperyensya han kinabuhi upod an ngatanan nga mga problema. An ngatanan nga naeksperyensyahan han mga tawo naeksperyensyahan liwat hini nga mga hadi-saserdote. Salit an ira kinabuhi ha tuna magpapauswag han ira abilidad ha pagmando ha mga tawo. Bisan hi Jesus mismo “nahibaro hiya ha pagkamasinugtanon tungod ha mga bagay nga iya gin-antos.” (Hebreo 5:8) Hi apostol Pablo nagsiring mahitungod ha iya: ‘Mayada kita usa nga hitaas nga saserdote, diri usa nga diri sadang makahimo hin pagbati ha aton mga kakurian; kondi hiya man ginsulay ha ngatanan nga paagi sugad ha aton, kondi waray sala.’ (Hebreo 4:15) Makaliaw gud an paghibaro nga ha matadong bag-o nga kalibotan han Dios, an mga tawo pagmamandoan han mahigugmaon, mapinairon nga mga hadi ngan mga saserdote!

Bahin ba han Katuyoan han Dios an Ginhadian?

10. Kay ano nga an Ginhadian han langit diri bahin han orihinal nga katuyoan han Dios?

¹⁰ Bahin ba han orihinal nga katuyoan han Dios an langitnon nga Ginhadian han ginlarang niya hi Adan ngan Eva? Ha asoy han paglarang ha Genesis, waray pag-unabi han Ginhadian nga magmamando ha katawohan. Hi Jehova mismo an ira Magmarando, ngan tubtob nga nasugot hira ha iya, diri kinahanglan an bisan ano iba nga pagmando. Ipinapakita han Genesis kapitulo 1 nga hi Jehova, bangin pinaagi han iya suhag langitnon nga Anak, nakig-upod kan Adan ngan Eva. Ginamit han asoy an mga ekspresyon sugad han “An Dios nagsiring ha ira” ngan “An Dios siniring” ha ira.​—Genesis 1:​28, 29; Juan 1:1.

11. Ano an hingpit nga tinikangan han katawohan?

¹¹ An Biblia nasiring: “An Dios nakakita han ngatanan nga iya ginhimo, ngan iini, ito duro hin kaopay.” (Genesis 1:31) An ngatanan ha hardin han Eden hingpit gud. Hi Adan ngan Eva nag-ukoy ha paraiso. Mayada hira hingpit nga mga hunahuna ngan hingpit nga mga lawas. Nagkukomunikar hira  ha ira Maglalarang ngan hiya ha ira. Ngan pinaagi han pagpabilin nga matinumanon, manganganak hira hin hingpit nga mga anak. Diri na gud unta magkikinahanglan hin bag-o langitnon nga gobyerno.

12, 13. Samtang nagdadamu an hingpit nga katawohan, kay ano nga makakagkomunikar pa gihapon an Dios ha ira?

¹² Samtang nagdadamu an tawhanon nga pamilya, paonan-o magkukomunikar an Dios ha ira ngatanan? Tagda an mga bitoon ha langit. Gingrupo-grupo hira ha isla han uniberso tinatawag nga mga galaksi. An iba nga mga galaksi nagsusulod hin usa ka bilyon nga bitoon. An iba nagsusulod hin mga usa ka trilyon. Ngan an mga syentista nagbanabana nga mayada mga 100 ka bilyon nga galaksi ha nakikita nga uniberso! Kondi, an Maglalarang nasiring: “Alsaha ha hitaas an iyo mga mata, ngan kitaa kon hin-o an naghimo hini, nga nagpakita han ira panon ha kadam-an; iya hira ngatanan pinanawag ha ngaran; pinaagi han kadaku han iya gahum, ngan kay hiya makusog ha gahum, waray usa nga nakukulang.”​—Isaias 40:26.

¹³ Tungod kay maaram an Dios kon hain ini ngatanan nga mga linarang ha langit, sigurado nga diri problema para ha iya nga hibaroan an mas gutiay nga ihap han mga tawo. Bisan yana, minilyon han iya mga surugoon an nag-aampo ha iya kada adlaw. Ito nga mga pag-ampo nadangat dayon ha Dios. Salit an pagkomunikar ha ngatanan hingpit nga mga tawo diri magigin problema para ha iya. Diri hiya magkikinahanglan hin langitnon nga Ginhadian basi hibaroan kon hain hira. Pagkaurusahon nga kahikayan​—nga hi Jehova an Magmarando, nga direkta nga makakatawag kita ha iya, ngan magkaada paglaom nga diri na gud mamamatay, nga mabubuhi ha waray kataposan ha paraiso nga tuna!

“Diri Aada ha Tawo”

14. Kay ano nga an mga tawo magkikinahanglan han pagmando ni Jehova ha kadayonan?

¹⁴ Kondi, an mga tawo​—bisan an mga hingpit​—magkikinahanglan gud han pagmando ni Jehova ha kadayonan. Kay ano? Tungod kay hi Jehova waray maglarang ha ira nga may kapasidad nga maglampos nga bulag ha iya pagmando. Ito an balaud han tawo, sugad han kinilala ni propeta Jeremias: “O Jehova, maaram ako nga an paagi han tawo diri aada ha iya ngahaw, diri aada ha tawo nga naglalakat an pagmando han iya mga pitad. O Jehova, waydongi ako.” (Jeremias 10:​23, 24) Magigin kalurongan para han mga tawo an paghunahuna nga maglalampos hira ha pagmando ha sosiedad nga bulag ha pagmando ni Jehova ha ira. Kabaliktaran ito ha paagi han paglarang ha ira. An pagbulag tikang ha pagmando ni Jehova sigurado nga magriresulta ha kahakog, kapungot, kabangis, kamadarahog, mga girra, ngan kamatayon. ‘An tawo nagmando ha tawo ha iya karaotan.’​—Eklesiastes 8:9.

15. Ano an mga resulta tikang ha sayop nga pagpili han aton siyahan nga mga ginikanan?

¹⁵ Makasurubo, an aton siyahan nga mga ginikanan nagdesisyon nga diri nira ginkikinahanglan an Dios sugad nga ira Magmarando, ngan ginpili nira nga mag-ukoy nga bulag ha iya. Sugad nga resulta, an Dios waray na sumuporta ha ira ha kahingpitan. Pariho na hira yana ha garamiton nga de-koryente nga gin-utod tikang ha surok han koryente. Salit inabot an panahon, nga hira nagtikaluya ngan hinunong​—ha kamatayon. Nagin pariho hira han may depekto nga hurmaan, ngan iton nga kahimtang an naipasa nira ha ira mga anak. (Roma 5:12) “An Bato nga bantilis [Jehova], an iya buhat hingpit; Kay an ngatanan niya nga mga dalan amo an katadongan. . . . Hira nagbuhat ha mahugaw ha iya, diri hira iya mga anak, ito ira kasurusnan.” (Deuteronomio 32:​4, 5) Totoo, naimpluwensyahan hi Adan ngan hi Eva han rebelde nga espiritu nga linarang nga nagin Satanas, kondi mayada hira hingpit nga mga hunahuna nga mahihimo nira unta isalikway an iya sayop nga mga suhestyon.​—Genesis 3:​1-19; Jakobo 4:7.

16. Paonan-o pinamamatud-an han kasaysayan an resulta han pagbulag ha Dios?

¹⁶ An kasaysayan nagpapamatuod han resulta han pagbulag ha Dios. Yinukot ka mga tuig na, an mga tawo nagsari han tagsa nga porma han gobyerno han tawo, han tagsa nga sistema han ekonomiya ngan sosiedad. Kondi, nagpapadayon an karaotan nga “maraot ngan labi pa gud nga maraot.” (2 Timoteo 3:13) Pinamatud-an ito han ika-20 ka siglo. Puno ito han maraot nga kapungot ngan duro nga kamadarahog, mga girra, kagutom, kakablas, ngan pag-antos ha ngatanan nga panahon ha kasaysayan. Ngan bisan pa han mga pag-uswag ha medisina, diri nag-iiha an ngatanan namamatay. (Eklesiastes 9:​5, 10) Tungod ha pangalimbasog ha pagmando han ira kalugaringon nga mga pitad, gintutugotan han mga tawo an ira kalugaringon nga magin mga  biktima ni Satanas ‘an dios hini nga sistema han mga butang.’​—2 Korinto 4:4.

An Regalo han May Kagawasan nga Pagbuot

17. Paonan-o gagamiton an regalo han Dios han may kagawasan nga pagbuot?

¹⁷ Kay ano nga tutugotan ni Jehova an mga tawo nga buhaton an ira karuyag? Tungod kay ginlarang niya hira nga mayada urusahon nga regalo han may kagawasan nga pagbuot, an kagawasan ha pagpili. “Kon hain an Espiritu han Ginoo, aadto man an kaluwasan,” siring ni apostol Pablo. (2 Korinto 3:17) Waray naruruyag nga magin robot, nga iba an nagdidesisyon kada segundo han adlaw kon ano an iya sisidngon ngan bubuhaton. Kondi ginkinahanglan ni Jehova an mga tawo nga gamiton ito nga regalo han may kagawasan nga pagbuot ha husto nga paagi, basi makita an kinaadman han pagbuhat han iya kaburut-on ngan magpabilin nga nagpapasakop ha iya. (Galasia 5:13) Salit an kagawasan diri bug-os, kay magriresulta ito hin kasamok. Kinahanglan mayada magmamando hito ha sulod han mga tubtoban han maopay nga mga balaud han Dios.

18. Ano an ipinapakita han Dios ha pagtugot ha tawo nga magbuhat hin may kagawasan nga pagpili?

¹⁸ Ha pagtugot ha tawhanon nga pamilya nga buhaton an karuyag hito, ipinakita han Dios, ha makausa ngan ha ngatanan nga panahon, nga ginkikinahanglan naton an iya pagmando. An iya paagi han pagmando, an iya pagkasoberano, amo la an husto nga paagi. Nagriresulta ito ha gidadakui nga kalipayan, katagbaw, ngan kauswagan. Tungod ini kay an aton mga hunahuna ngan mga lawas gindisenyo ni Jehova nga magbuhat hin gimaopayi kon nauyon ito ha iya mga balaud. “Ako hi Jehova nga imo Dios, nga nagtututdo ha imo ha pagpahimulos, nga nagmamando ha imo ha dalan nga imo paglalaktan.” (Isaias 48:17) An may kagawasan nga pagpili ha sulod han mga tubtoban han mga balaud han Dios diri mabug-at kondi magriresulta ha makaruruyag magkalainlain nga klase hin pagkaon, mga balay, arte, ngan musika. Kon husto nga buhaton, an kagawasan ha pagbuot magriresulta hin maopay, makalilipay gud nga kinabuhi ha paraiso nga tuna.

19. Ano nga ahensya an ginagamit han Dios ha pagpahiuli han mga tawo ha iya?

¹⁹ Kondi tungod han ira sayop nga pagpili, an mga tawo nagpahirayo kan Jehova, nagin diri-hingpit, ngan namamatay. Salit kinahanglan tubuson  hira tikang hiton masurub-on nga kahimtang ngan ibalik ha husto nga relasyon ha Dios sugad nga iya mga anak nga kalalakin-an ngan kababayin-an. An ahensya nga ginpili han Dios ha pagbuhat hini amo an Ginhadian, ngan an Manunubos amo hi Jesu-Kristo. (Juan 3:16) Pinaagi hini nga kahikayan, an totoo nga mga mabinasulon​—pariho han anak nga makaragon ha ilustrasyon ni Jesus​—magpapahiuli ha Dios ngan kakarawaton niya sugad nga iya mga anak.​—Lukas 15:​11-24; Roma 8:21; 2 Korinto 6:18.

20. Paonan-o matutuman an katuyoan han Dios pinaagi han Ginhadian?

²⁰ Sigurado, an kaburut-on ni Jehova matutuman dinhi ha tuna. (Isaias 14:​24, 27; 55:11) Pinaagi han iya Ginhadian ilarom ni Kristo, bug-os nga igbibindikar han Dios (ipapakita o pamamatud-an) an iya katungod nga magin aton Soberano. Tatapuson han Ginhadian an pagmando han tawo ngan han demonyo hini nga tuna, ngan ito gud la an magmamando tikang ha langit ha usa ka yukot ka tuig. (Roma 16:20; Pahayag 20:​1-6) Kondi durante hiton nga panahon, paonan-o ipapakita an pagkahitaas han paagi ni Jehova ha pagmando? Ngan katapos han usa ka yukot ka tuig, ano an magigin bahin han Ginhadian? An masunod nga artikulo amo an maghihisgot hini nga mga pakiana.

Mga Punto ha Repaso

• Ano an tema han Biblia?

• Hin-o an nagkukompuwesto han bag-o nga pagmando ha tuna?

• Kay ano nga an pagmando han tawo nga bulag ha Dios diri gud maglalampos?

• Paonan-o bubuhaton an may kagawasan nga pagbuot?

[Mga Pakiana]

[Retrato ha pahina 10]

An katutdoan ni Jesus nagpabug-at han pagmando han Dios pinaagi han Ginhadian

[Retrato ha pahina 12]

Ha tagsa nga nasud ginhihimo han mga Saksi ni Jehova an Ginhadian nga ira importante nga katutdoan

[Mga Retrato ha pahina 14]

Pinamamatud-an han kasaysayan an maraot nga mga resulta han pagbulag ha Dios

[Ginkuhaan han Retrato]

WWI nga mga sundalo: U.S. National Archives photo; kampo nga prisohan: Oświęcim Museum; bata: UN PHOTO 186156/J. Isaac