An Gigibohon kan Kahadean nin Dios

“Dumatong logod an kahadean mo. Gibohon logod an boot mo, kun paano sa langit, siring man sa daga.”—MATEO 6:10.

1. Ano an magigin kahulogan kan pagdatong kan Kahadean nin Dios?

KAN tokdoan ni Jesus an saiyang mga parasunod na mamibi para sa Kahadean nin Dios, aram nia na an pagdatong kaiyan matapos sa rinibong taon nin pamamahala nin tawo na independiente sa Dios. Durante kan bilog na panahon na iyan, an kabotan nin Dios dai nagigibo digdi sa daga sa pankagabsan. (Salmo 147:19, 20) Alagad pagkaestablisar kan Kahadean sa langit, an kabotan nin Dios gigibohon sa gabos na lugar. An panahon para sa makangingirhat na transisyon hale sa pamamahala nin tawo pasiring sa pamamahala kan langitnon na Kahadean nin Dios naghaharani nang marhay.

2. Ano an magigin tanda kan transisyon hale sa pamamahala nin tawo pasiring sa pamamahala kan Kahadean?

² Magigin tanda kan transisyon na ini an peryodo nin panahon na inapod ni Jesus  na “dakulang kahorasaan na dai pang kaagid na nangyari poon sa kapinonan kan kinaban sagkod ngonyan, dai pa, ni mangyayari pa giraray.” (Mateo 24:21) Dai sinasabi kan Biblia kun magigin gurano kahaloy an peryodong iyan nin panahon, alagad an mga kalamidad na mangyayari durante kaiyan magigin mas grabe kisa ano man na naeksperyensiahan kasuarin man kan kinaban. Sa kapinonan kan dakulang kahorasaan, may mangyayari na magigin grabeng kakubhanan para sa kadaklan na tawo sa daga: an paglaglag sa gabos na falsong relihion. Dai iyan magigin kakubhanan para sa mga Saksi ni Jehova, ta haloy na ninda ining inaantisipar. (Kapahayagan 17:1, 15-17; 18:1-24) An dakulang kahorasaan matatapos sa Armagedon pagrinonot na kan Kahadean nin Dios an enterong sistema ni Satanas.—Daniel 2:44; Kapahayagan 16:14, 16.

3. Paano ilinaladawan ni Jeremias an kaaabtan kan mga masinuway?

³ Ano an magigin kahulogan kaini para sa mga tawong “dai nakamimidbid sa Dios asin sa mga dai nagkukuyog kan maogmang bareta” manongod sa saiyang langitnon na Kahadean sa kamot ni Cristo? (2 Tesalonica 1:6-9) An hula sa Biblia nagsasabi sa sato: “Uya! May maluwas na kalamidad sa surunodsunod na nasyon, asin malataw an sarong dakulang bagyo hale sa kaporoporohi kan daga. Asin an pangagaradanon ni Jehova sa aldaw na iyan paghale sa sarong poro kan daga sagkod sa ibong na poro kan daga. Dai sinda tatangisan, ni sasarayon o ilolobong man sinda. Magigin sindang garo odo sa ibabaw kan daga.”—Jeremias 25:32, 33.

An Katapusan nin Karatan

4. Taano ta may katanosan si Jehova na taposon an maraot na sistemang ini?

⁴ Sa laog nin rinibong taon, tinogotan ni Jehova Dios an karatan, na igo nang lawig tanganing maheling kan mga tawong tama an kamugtakan nin puso na an pamamahala nin tawo sarong grabeng kapahamakan. Halimbawa, sa ika-20 siglo sana, labing 150 milyones katawo an nagadan sa mga guerra, rebolusyon, asin iba pang pagkariribok sibil, segun sa sarong reperensia. An karingisan nin tawo nangorognang naheling durante kan Guerra Mundial II na mga 50 milyones katawo an nagadan, na an dakol sa sainda nagadan sa makatatakot na paagi sa mga kampo de konsentrasyon nin Nazi. Siring nanggad sa ihinula kan Biblia, sa satong panahon ‘an mga maraot asin nandadaya orog na nagraraot.’ (2 Timoteo 3:1-5, 13) Ngonyan, lakop an inmoralidad, krimen, kadahasan, karatan, asin paglapastangan sa mga pamantayan nin Dios. Sa siring, si Jehova lubos na may katanosan na taposon an maraot na sistemang ini.

5, 6. Iladawan an karatan na nag-eksister sa suanoy na Canaan.

⁵ An situwasyon ngonyan kapareho kan sa Canaan kaidtong mga 3,500 na taon na an nakaagi. An Biblia nagsasabi: “An gabos na bagay na makauuyam nin makuri ki Jehova na saiyang ikinaoongis ginibo ninda sa saindang mga dios, huli ta minsan an saindang mga aking lalaki asin an saindang mga aking babae dayaday nindang sinosolo sa kalayo sa saindang mga dios.” (Deuteronomio 12:31) Pinaaram ni Jehova an nasyon nin Israel: “Huli sa karatan kan mga nasyon na ini na papahaleon sinda ni Jehova na saimong Dios sa atubangan mo.” (Deuteronomio 9:5) An historyador sa Biblia na si Henry H. Halley nagsabi: “Kabale sa pagsamba ki Baal, Astoret, asin iba pang dios kan mga Cananeo an pinakagrabeng pagpalabilabi sa sekso; an saindang mga templo sentro nin bisyo.”

⁶ Ipinaheling ni Halley kun gurano kagrabe an saindang nagin karatan, ta sa saro kan dakol na lugar na iyan, an mga arkeologo “nakakua nin kadakol na dulay na may laog na mga kalabera nin mga aki na iinatang ki Baal.” Sinabi nia: “An bilog na lugar nagin sementeryo para sa bagong mamundag na mga omboy. . . . An mga Cananeo nagsamba, paagi sa inmoral na pagpangana, bilang relihiosong seremonya, sa atubangan kan saindang mga dios; dangan, paagi sa paggadan sa saindang panganay na mga aki, bilang atang sa mga dios man sanang ini. Sa dakulang kabtang, an daga nin Canaan garo baga nagin siring sa Sodoma asin Gomorra sa nasyonal na sokol. . . . An sibilisasyon daw na siring kamakababalde an kaatian asin kabangisan igwa pa nin diretso na mag-eksister? . . . An mga arkeologong nagkotkot sa mga kagabaan kan mga siudad nin mga Cananeo nagngangalas kun taano ta dai pa sinda linaglag nin Dios nin mas amay kisa ginibo nia.”

Pagmana kan Daga

7, 8. Paano lilinigon nin Dios an dagang ini?

⁷ Kun paanong lininig nin Dios an Canaan, sa dai na mahahaloy lilinigon nia an bilog na daga  asin itatao iyan sa mga naggigibo kan saiyang kabotan. “An mga tanos iyo an mag-eerok sa daga, asin an mga daing katuyawan iyo an matatada dian. Kun dapit sa mga maraot, sinda popohoon sa mismong daga.” (Talinhaga 2:21, 22) Asin an salmista nagsasabi: “Dai na mahahaloy, asin ta an maraot mawawara na . . . Alagad an mga mahoyo mismo makasasadiri kan daga, asin manonompongan nanggad ninda an saindang nangongorog na dakulang kaogmahan sa nagsosopay na katoninongan.” (Salmo 37:10, 11) Hahaleon man si Satanas, tanganing “dai na nia ikalagalag an mga nasyon sagkod na matapos an sangribong taon.” (Kapahayagan 20:1-3) Iyo, “an kinaban maagi sana asin siring man an mawot kaiyan, alagad an naggigibo kan kabotan nin Dios magdadanay sagkod lamang.”—1 Juan 2:17.

⁸ Sa pagsumaryo kan marahayon na paglaom para sa mga gustong mabuhay sagkod lamang sa daga, si Jesus nagsabi: “Maogma an mga mahoyo, mantang mamanahon ninda an daga.” (Mateo 5:5) Posibleng marhay na pinanonongdan nia an Salmo 37:29, na naghula: “An mga matanos mismo magmamana kan daga, asin sinda mag-eerok dian sagkod lamang.” Aram ni Jesus na katuyohan ni Jehova na an mga tama an kamugtakan nin puso mabuhay sa sarong paraisong daga sagkod lamang. Si Jehova nagsasabi: “Ako an naggibo sa daga, sa mga tawo asin sa mga hayop na nasa ibabaw kan daga paagi sa sakong dakulang  kapangyarihan . . . , asin itinao ko iyan sa tama sa sakong mga mata.”—Jeremias 27:5.

Sarong Marahayon na Bagong Kinaban

9. Anong klaseng kinaban an poponan kan Kahadean nin Dios?

⁹ Pakatapos kan Armagedon, poponan kan Kahadean nin Dios an sarong marahayon na “bagong daga” na dian “magdadanay an katanosan.” (2 Pedro 3:13) Magigin kanigoan kadakulang kaginhawahan para sa mga makaliligtas sa Armagedon na mawara na an mapan-aping maraot na sistemang ini nin mga bagay! Magigin kanigoan an kaogmahan ninda na makalaog sa matanos na bagong kinaban sakop kan gobyerno kan langitnon na Kahadean, na nasa isip an makangangalas na mga bendisyon asin buhay na daing katapusan!—Kapahayagan 7:9-17.

10. Anong maraot na mga bagay an dai na maeksister sa pamamahala kan Kahadean?

¹⁰ An mga tawo dai na huhumaon nin guerra, krimen, gutom, o dawa nin naninibang mga hayop. “Magibo ako sa [sakong banwaan] nin tipan nin katoninongan, asin tunay na patotonongon ko sa daga an mabangis na hayop . . . Asin an kahoy sa kahiwasan dapat na tumao kan bunga kaiyan, asin an daga mismo mapaluwas kan bunga kaiyan, asin sinda aktuwal na mamumugtak sa saindang daga na may katiwasayan.” “Dadaragopdopon ninda an saindang mga espada na magin mga tarom nin arado asin an saindang mga budyak na magin mga sanggot. Dai sinda mabingat nin espada, an nasyon tumang sa nasyon, ni mag-aadal pa man sinda sa pakilaban. Asin sinda totoong magtutukaw, an lambang saro sa sirong kan saiyang ubas asin sa sirong kan saiyang higuerra, asin mayo nin siisay man na magpapatakig sa sainda.”—Ezequiel 34:25-28; Miqueas 4:3, 4.

11. Taano ta makasasarig kita na matatapos an pisikal na mga kamatean?

¹¹ Hahaleon an helang, kamondoan, asin kagadanan pa ngani. “Mayo nin nag-eerok na masabi: ‘Naghehelang ako.’ An mga tawo na nag-eerok sa daga iyo an mga pinatawad sa saindang kasalan.” (Isaias 33:24) “Papahidon [nin Dios] an gabos na luha sa saindang mga mata, asin an kagadanan mawawara na, dai na sagkod magkakaigwa nin pagmondo ni pagtangis ni kolog. An enot na mga bagay nakalihis na. . . . ‘Uya! ginigibo kong bago an gabos na bagay.’” (Kapahayagan 21:4, 5) Kan sia nasa daga, ipinaheling ni Jesus an saiyang kakayahan na gibohon an mga bagay na iyan paagi sa  kapangyarihan na itinao nin Dios sa saiya. Paagi sa pagsuportar kan banal na espiritu, si Jesus naglibot sa daga na nagpapaomay sa mga pilay asin nagbobolong sa mga may helang.—Mateo 15:30, 31.

12. Ano an paglaom para sa mga gadan?

¹² Orog pa an ginibo ni Jesus. Nagbuhay liwat sia nin mga gadan. Ano an nagin reaksion nin mapakumbabang mga tawo? Kan buhayon nia liwat an 12 anyos na aking babae, an saiyang mga magurang “haros mawara sa sadiri huli sa labi-labi kadakulang kaogmahan.” (Marcos 5:42) Saro pa ining halimbawa kan gigibohon ni Jesus sa bilog na daga sa pamamahala kan Kahadean, ta sa panahon na iyan “magkakaigwa nin pagkabuhay liwat an mga matanos sagkod an mga bakong matanos.” (Gibo 24:15) Imahinara an labi-labi kadakulang kaogmahan kun an sunod-sunod na grupo nin mga gadan buhayon na liwat asin makaibanan giraray an saindang mga namomotan! Daing duwa-duwa na magkakaigwa nin dakulang gibohon na pagtotokdo na didirehiran kan Kahadean kaya “an daga mapapano nanggad kan kaaraman dapit ki Jehova kun paanong an tubig nakatatahob sa mismong kadagatan.”—Isaias 11:9.

Nabindikar an Soberaniya ni Jehova

13. Paano ipaheheling an pagigin tama kan pamamahala nin Dios?

¹³ Sa katapusan kan sangribong taon na pamamahala kan Kahadean, an pamilya nin tawo ikinabalik na sa pagkasangkap nin isip asin hawak. An daga magigin lakop sa globong tatamnan nin Eden, sarong paraiso. An katoninongan, kaogmahan, katiwasayan, asin mamomoton na sosyedad nin tawo nakamtan na. Dai pang kaagid kaini na naheling kasuarin man sa kasaysayan nin tawo bago kan pamamahala kan Kahadean. Kanigoan kadakulang pagkakalaen sa panahon na iyan an ikinapaheling sa pag-oltanan kan nakaaging rinibong taon nin miserableng pamamahala nin mga tawo asin kan kahangahangang pamamahala kan langitnon na Kahadean nin Dios na sangribong taon! An pamamahala nin Dios paagi sa saiyang Kahadean ikinapaheling na biyong nakalalabi sa gabos na aspekto. An diretso nin Dios na mamahala, an saiyang soberaniya, biyo nang nabindikar.

14. Ano an mangyayari sa mga rebelde kun matapos na an sangribong taon?

¹⁴ Sa katapusan kan sangribong taon, totogotan ni Jehova an sangkap na mga tawo na gamiton an saindang libreng pagpili kun siisay an gusto nindang paglingkodan. Ipinaheheling kan Biblia na “si Satanas paluluwason sa saiyang bilanggoan.” Hihingoahon giraray nia na ilagalag an mga tawo, na an nagkapira pipilion an pagigin indipendiente sa Dios. Tanganing olangon ‘an kasakitan sa pagtindog nin makaduwa,’ popohoon ni Jehova si Satanas, an saiyang mga demonyo, asin an gabos na marebelde tumang sa soberaniya ni Jehova. Mayo nin puedeng magreklamo na an siisay man na tawong gagadanon nin daing sagkod sa panahon na iyan dai nagkaigwa nin oportunidad o na an saindang salang iginawe bunga kan pagkabakong sangkap. Dai, sinda magigin kapareho kan sangkap na si Adan asin Eva, na tuyong pinili an magrebelde tumang sa matanos na pamamahala ni Jehova.—Kapahayagan 20:7-10; Nahum 1:9.

15. Anong relasyon ki Jehova an kakamtan kan mga maimbod?

¹⁵ Sa ibong na kampi, posibleng marhay na an dakulaon na mayoriya nin mga tawo pipilion na magsuportar sa soberaniya ni Jehova. Pakatapos na mapoho an gabos na rebelde, an mga matanos matindog sa atubangan ni Jehova, na nakapasar sa pangultimong pagbalo sa kaimbodan. Dangan an mga maimbod na ini aakoon ni Jehova bilang saiyang mga aking lalaki asin babae. Kun siring mabalik na sinda sa relasyon na yaon kaidto ki Adan asin Eva sa atubangan nin Dios bago sinda nagrebelde. Huli kaini, an Roma 8:21 maootob: “An mga linalang man mismo [an katawohan] patatalingkason sa pagkaoripon sa kalapaan asin magkakaigwa kan mamuraway na katalingkasan kan mga aki nin Dios.” Si propeta Isaias naghula: “Totoong hahalonon [nin Dios] an kagadanan sagkod lamang, asin papahidon kan Soberanong Kagurangnan na si Jehova an mga luha sa gabos na lalauogon.”—Isaias 25:8.

An Paglaom na Buhay na Daing Katapusan

16. Taano ta tama na antisiparon an balos na buhay na daing katapusan?

¹⁶ Kanigoan kamakangangalas na paglaom an naghahalat sa mga fiel, an maaraman na an Dios mapaoran sa sainda sagkod lamang nin nagsosopay na espirituwal asin materyal na mga pakinabang! Tama sanang nagsabi an salmista: “Binibiklad mo an saimong kamot asin pinaninigoan an [tamang]  mawot nin lambang bagay na may buhay.” (Salmo 145:16) Dinadagka ni Jehova an mga kabilang sa daganon na grupo na magkaigwa kan paglaom na ini na buhay sa Paraiso bilang kabtang kan saindang pagtubod sa saiya. Minsan ngani orog na mahalaga an isyu dapit sa soberaniya ni Jehova, dai nia hinahagad sa mga tawo na maglingkod sa saiya na mayo nin malalaoman na balos. Sa bilog na Biblia, an kaimbodan sa Dios asin an paglaom na buhay na daing sagkod magkakonektar na marhay bilang mahalagang mga kabtang kan pagtubod nin sarong Kristiano sa Dios. “An minadolok sa Dios kaipuhan na magtubod na sia iyo nanggad asin na sia nagigin an parabalos sa mga maigot na naghahanap sa saiya.”—Hebreo 11:6.

17. Paano ipinaheling ni Jesus na tama na kita masusteniran kan satong paglaom?

¹⁷ Si Jesus nagsabi: “Ini nangangahulogan nin buhay na daing katapusan, an saindang paglaog sa isip nin kaaraman dapit sa saimo, na iyo sanang tunay na Dios, asin dapit sa saro na saimong sinugo, si Jesu-Cristo.” (Juan 17:3) Digdi ikinonektar nia an pakamidbid sa Dios asin pakaaram kan saiyang mga katuyohan sa balos na ibinubunga kaini. Bilang halimbawa, kan an sarong paragibo nin sala makiolay na girumdomon sia pagdatong ni Jesus sa saiyang Kahadean, si Jesus nagsabi: “Ika makakaibahan ko sa Paraiso.” (Lucas 23:43) Dai nia sinabihan an lalaki na magtubod dawa kun dai sia magkamit nin balos. Aram nia na boot ni Jehova na an saiyang mga lingkod magkaigwa kan paglaom na buhay na daing katapusan sa sarong paraisong daga tanganing makatabang na susteniran sinda mantang inaatubang ninda an laen-laen na pagbalo sa kinaban na ini. Sa siring, an pag-antisipar sa balos sarong mahalagang marhay na tabang sa pagtagal bilang Kristiano.

An Ngapit kan Kahadean

18, 19. Ano an mangyayari sa Hade asin sa Kahadean sa katapusan kan Milenyal na Paghade?

¹⁸ Mantang an Kahadean sarong subsidiaryong gobyerno na ginamit ni Jehova tanganing darahon sa pagkasangkap asin pakiulian sa saiya an daga asin an mga tawong nag-eerok dian, ano an magigin papel kan Hadeng si Jesu-Cristo asin kan 144,000 na hade asin saserdote pagkatapos kan Milenyo? “Masunod, an katapusan, kun itao na nia an kahadean sa saiyang Dios asin Ama, kun napara na nia an gabos na gobyerno asin gabos na autoridad asin kapangyarihan. Huli ta sia kaipuhan na mamahala bilang hade sagkod na ikinabugtak na nin Dios an gabos na kaiwal sa irarom kan saiyang mga bitis.”—1 Corinto 15:24, 25.

¹⁹ Kun itao na ni Cristo an Kahadean sa Dios, paano dapat saboton an tekstong iyan na nagsasabi na iyan magdadanay sagkod lamang? An mga nahaman kan Kahadean magdadanay sagkod lamang. Si Cristo tatawan nin onra sagkod lamang huli sa saiyang papel sa pagtabang na ibindikar an soberaniya nin Dios. Alagad huling an kasalan asin kagadanan biyo nang hinale sa panahon na iyan, asin nabalukat na an katawohan, tinatapos kaini an pangangaipo sa saiya bilang Parabalukat. An Milenyal na Pamamahala kan Kahadean lubos na man na natapos; kaya dai na kakaipuhanon pa an sarong subsidiaryong gobyerno na magdanay sa pag-oltanan ni Jehova asin kan makinuyog na katawohan. Sa siring, ‘an Dios magigin gabos na bagay sa gabos na tawo.’—1 Corinto 15:28.

20. Paano ta maaaraman kun ano an natatagama sa ngapit para ki Cristo asin sa 144,000

²⁰ Ano an magigin papel sa ngapit ni Cristo asin kan saiyang kairibang namamahala pagkatapos kan Milenyal na Paghade? Daing sinasabi an Biblia. Pero, makasisierto kita na tatawan sinda ni Jehova nin dakol pang pribilehio nin paglilingkod sa enterong linalang nia. Kita logod gabos ngonyan magsuportar sa soberaniya ni Jehova asin matawan nin buhay na daing sagkod, tanganing sa ngapit, mabuhay kita tanganing maaraman kun ano an katuyohan ni Jehova para sa Hade asin sa saiyang mga kapwa hade asin saserdote, siring man sa saiyang bilog na makangingirhat na uniberso!

Mga Punto Para sa Repaso

• Kita naghaharani na sa anong transisyon sa pamamahala?

• Paano hohokoman nin Dios an mga maraot asin an mga matanos?

• Ano an magigin mga kamugtakan sa bagong kinaban?

• Paano lubos na mabibindikar an soberaniya ni Jehova?

[Mga Hapot Para sa Pag-adal]

[Mga Ritrato sa pahina 17]

“Magkakaigwa nin pagkabuhay liwat an mga matanos sagkod an mga bakong matanos”

[Ritrato sa pahina 18]

An mga maimbod makakabalik sa tamang relasyon ki Jehova