Ico Ubufumu bwa kwa Lesa Bukacita
Ico Ubufumu bwa kwa Lesa Bukacita
“Ubufumu bwenu bwise. Ukufwaya kwenu kucitwe pano nse nga mu muulu.”—MATEO 6:10.
1. Bushe ukwisa kwa Bufumu bwa kwa Lesa kukapilibula nshi?
ILYO Yesu afundile abakonshi bakwe ukupepela Ubufumu bwa kwa Lesa, alishibe ukuti ukwisa kwa buko kwali no kupesha imitekele yanunuka kuli Lesa iya bantunse iyabako pa makana ya myaka. Pali iyi nshita yonse, ukufwaya kwa kwa Lesa takwalecitwa pano isonde. (Amalumbo 147:19, 20) Lelo pa numa ya kwimikwa kwa Bufumu mu muulu, ukufwaya kwa kwa Lesa kuli no kucitwa fye mpanga yonse. Inshita ya uko kwaluka kwa kutiinya ukufuma ku mitekele ya buntunse ukuya ku mitekele ya Bufumu bwa kwa Lesa ubwa mu muulu ilepalamina nga nshi.
2. Cinshi cikeshibisha ukwaluka kwa mitekele ya bantunse ukuya ku mitekele ya Bufumu?
2 Icikeshibisha uku kwaluka ni nshita Yesu aitile ati “ubucushi bukalamba ubushatala abubako ukutula pa kutendeka kwa pano isonde ukufika kuli nomba, nangu takwakabeko.” (Mateo 24:21) Baibolo tailanda inshita ubucushi bukalamba bukasenda, lelo utuyofi tukabako pali yo nshita tukacila na po ukubipisha pa cabipa conse icaponenapo abantu. Pa kutendeka kwa bucushi bukalamba, kukacitikapo icintu cimo icikafulunganya nga nshi abengi pano isonde: ubonaushi bwa mipepele yonse iya bufi. Ico tacakafulunganye Inte sha kwa Yehova, pantu ni kale batendeka ukwenekela ici. (Ukusokolola 17:1, 15-17; 18:1-24) Ubucushi bukalamba bukapwila pa Armagedone ilyo Ubufumu bwa kwa Lesa bukashonaula ubwikashi bwa kwa Satana.—Daniele 2:44; Ukusokolola 16:14, 16.
3. Ni shani fintu Yeremia alondolola impela ya bacintomfwa?
3 Cinshi cikacitikila abantu “abakaano kwishiba Lesa, na ku bashinakila mbila nsuma” pa lwa Bufumu bwa mu muulu ubutekwa na Kristu? (2 Abena Tesalonika 1:6-9) Ukusesema kwa mu Baibolo kutweba ati: “Moneni, ububi bukatula ku nko bukaya ku nko, inkuuka nkalamba ikabuushiwa ukufuma ku mbali sha pano isonde. Mu bushiku ubo indase sha kwa Yehova shikabapo ukufuma ku mpela ya pano isonde ukufika ku mpela ya pano isonde; tabakalooshiwe, tabakalonganikwe nangu kushiikwa, bakabo mufundo pa muulu wa mushili.”—Yeremia 25:32, 33.
Impela ya Bubifi
4. Mulandu nshi cibelele icalinga ukuti Yehova onaule buno bwikashi bwabipa?
4 Yehova Lesa alileka ububifi ukutwalilila pa myaka iingi, pa kuti aba mitima yalungama bamone ukuti imitekele ya bantunse ya kayofi. Ku ca kumwenako, muli ba 1900 fye mweka, abantu ukucila pa mamilioni 150 e baipaiwe mu nkondo, mu kwalula kwa mabuteko, na mu fimfulunganya fye fimbi ifya bana calo, ukulingana ne fyasosele ulupapulo lumo. Ubunkalwe bwa muntu bwamonekele maka maka mu Nkondo ya Calo iya Cibili lintu abantu mupepi na mamilioni 50 baipaiwe, na bengi ukufwa imfwa shabipisha mu nkambi sha kucushiwilwamo isha baNazi. Ukulingana fye ne fyasobele Baibolo, pali ino inshita ‘abantu ababifi kabili abafutika na balundulukila ku kubipo kucila.’ (2 Timote 3:1-5, 13) Ndakai, bucisenene, bumpulamafunde, ulukaakala, amafisakanwa, no kusuula ifipimo fya kwa Lesa fili fye mpanga yonse. E co, nacilingisha ukuti Yehova onaule buno bwikashi bwabipa.
5, 6. Londololeni ububifi bwali mu Kanaani wa ku kale.
5 Ifilecitika nomba fipalene ne fyalecitika mu Kanaani mupepi ne myaka 3,500 iyapitapo. Baibolo itila: “Bacita ku milungu yabo conse ica muselu kuli Yehova, ico apata; pantu na bana babo abaume na bana babo abanakashi baboca mu mulilo ku milungu yabo.” (Amalango 12:31) Yehova aebele uluko lwa bena Israele ati: “Bubifi bwa nko ishi e co Yehova Lesa wenu aleshipyanunwina ku cinso cenu.” (Amalango 9:5) Kalemba wa lyashi lya kale ilya Baibolo Henry H. Halley atile: “Ukupepa Baali, Astarte, ne milungu imbi iya cina Kanaani kwasanshishemo maka maka bucisenene; amatempele ya iko yali fifulo fya bulalelale.”
6 Halley alangilile ifyo ububifi bwabo bwabipishe, pantu pali imo iya isho ncende ishingi, abashula ifyashikama “basangile imitondo iingi umwali amafupa ya bana abapeelwe ilambo kuli Baali.” Atile: “Incende fye yonse yali ni nshishi ya tucece. . . . Imipepele ya bena Kanaani yasanshishemo ukulacitila bucisenene pali tulesa twabo no kwipaya amabeli yabo ayo balepeela ilambo kuli tulesa twine utu. Cimoneke fyo, icalo conse ica Kanaani cabele fye nga Sodomu na Gomora. . . . Bushe bulya bwikashi bwa bantu babipishe fyo kabili abakatu bwali no kusuminishiwa ukutwalilila? . . . Abashula ifyashikama mu fitantaala fya mu misumba ya Kanaani balapapa ico Lesa ashayonawilile mu kwangufyanya.”
Ukupyaninine Sonde
7, 8. Bushe Lesa akawamya shani lino isonde?
7 Nga fintu fye Lesa asangulwile Kanaani, e fyo alaswa awamye ne sonde lyonse no kulipeela ku bacita ukufwaya kwakwe. “Abatambalala bakekala mu calo, na ba mpomfu bakashalamo; lelo ababifi bakaputulwa mu calo.” (Amapinda 2:21, 22) Kabili kemba wa malumbo atile: “Pashala panono, e lyo umubifi takabepo . . . lelo abalanda bakapyaninine calo, no kuilemeno bwingi bwa mutende.” (Amalumbo 37:10, 11) Uukafumishiwapo na umbi ni Satana, pa kuti ‘ekalufya kabili inko ikasuke aifishiwapo imyaka ikana limo.’ (Ukusokolola 20:1-3) Cine cine, “pano isonde paleya no lunkumbwa lwa pako; lelo uucito kufwaya kwa kwa Lesa ekalilila umuyayaya.”—1 Yohane 2:17.
8 Pa kusupula isubilo likalamba ilya abo bafwaya ukwikala kuli pe na pe pe sonde, Yesu atile: “Balishuka abafuuka; pantu bakakwate calo.” (Mateo 5:5) Cilepala kwati alelosha ku Amalumbo 37:29, apasobele ati: “Abalungama bakapyaninine calo, no kwikalamo inshiku pe.” Yesu alishibe ukuti cali kufwaya kwa kwa Yehova ukuti abalungama bekale muli paradise wa pe sonde kuli pe na pe. Yehova asosa ati: “Ine nacitile icalo, na bantu ne nama ifili pa muulu wa calo, ku maka yandi yakalamba . . . , kabili ncipeela ku o cawama mu menso yandi.”—Yeremia 27:5.
Icalo Cipya Icawamisha
9. Calo ca musango nshi Ubufumu bwa kwa Lesa bukaleta?
9 Pa numa ya Armagedone, Ubufumu bwa kwa Lesa bukaleta “icalo cipya” icawamisha umo “mwaikalo bulungami.” (2 Petro 3:13) Mwandini abakapusuka Armagedone bakelululwa pa kubafumishapo buno bwikashi bwabipa kabili ubwa mutitikisha! Fintu bakaanga ukwingila mu calo cipya icalungama icikatekwa kuli kamfulumende wa Bufumu bwa ku muulu, umukaba amapaalo yawamisha no kwenekela umweo wa muyayaya!—Ukusokolola 7:9-17.
10. Fintu nshi ifyabipa fishakabemo mu kuteka kwa Bufumu?
10 Abantu tabakatale abatiinishiwa ku nkondo, bumpulamafunde, insala, nelyo fye ni ku nama mbi. “Nkapinga [ku bantu bandi] cipingo ca mutende, nkalenga ne nama mbi ukupwa mu calo . . . Umuti wa mpanga ukapeele fisabo fya uko, no mushili ukafumyo bulimi bwa uko, kabili bakabo mutelelwe mu mpanga yabo.” “Bakasuka abafule mpanga shabo shibe baplao, na mafumo yabo yabe ifya kutungwilako imiti; uluko talwakasumbwile ku luko lunankwe ulupanga, nangu kusambilila kabili ubulwi. Bakekalo muntu onse mwi samba lya mwangashi wakwe, kabili mwi samba lya mukunyu wakwe, tapakabe na wa kututumya.”—Esekiele 34:25-28; Mika 4:3, 4.
11. Mulandu nshi twingacetekelela ukuti amalwele yakapwa?
11 Amalwele, ubulanda, ne mfwa yine fili no kufumishiwapo. “Umwikashi wa mu calo takasose, ati, Nindwala; abantu abaikalamo, bantu abalekelelwa amampulu yabo.” (Esaya 33:24) “[Lesa] akafute filamba fyonse ku menso yabo, ne mfwa tayakabeko kabili iyo; takwakabe kabili ukuloosha nangu kukuuta nangu kucululuka; pa kuti ifya ntanshi nafiya. . . . Moneni ifintu fyonse nafilenge fipya.” (Ukusokolola 21:4, 5) Ilyo ali pano isonde, Yesu acitile ifya musango yo ku maka Lesa amupeele. Pa kwafwilishiwa no mupashi wa mushilo, Yesu aendawike mu mushi onse ukuposha abalemana na balwala.—Mateo 15:30, 31.
12. Lisubilo nshi lyabako ku bafwa?
12 Yesu acitile ne fyacilapo. Aimishe na bafwa. Bushe abantu yaweyawe bacitilepo shani pa fyo acitile? Ilyo abuushishe umukashana wa myaka 12, abafyashi bakwe “bapeshiwe amano nga nshi.” (Marko 5:42) Ici cali cilangililo na cimbi ica fyo Yesu ali no kucita pano isonde fye ponse mu kuteka kwa Bufumu, pantu pali iyo nshita “kukabo kwima ku bafwa kwa balungama na bashalungama.” (Imilimo 24:15) Elenganyeni fintu kukaba ukupeshiwa amano ilyo abafwa bakalabuushiwa mu mabumba mabumba no kwikatana capamo na batemwikwa babo na kabili! Tatuletwishika ukuti kukaba umulimo ukalamba uwa kusambilisha uukatungululwa no Bufumu ica kuti “icalo cikesulamo ukwishiba Yehova, ifyo amenshi yafimba pali bemba.”—Esaya 11:9.
Bumulopwe bwa kwa Yehova Bwaebelwa
13. Cikalangwa shani ukuti Lesa e walinga ukuteka?
13 Ilyo ukuteka kwa Bufumu ukwa myaka ikana ku kalaya kulepwa, ulupwa lwa buntunse lukaba nalubweshiwa ku kupwililika kwa muntontonkanya no mubili. Isonde likaba libala lya Edene, lyonse fye likaba paradise. Abantunse bakaba na bakwata umutende, insansa, umutelelwe, no bwikashi bwa batemwana. Takwatala akubako ica musango yo pa ntanshi ya kuteka kwa Bufumu. We bupusano bukabapo ukulolesha pa makana ya myaka umuntu acula ku mitekele ya bantunse ukulinganya na ku mitekele ya Bufumu bwa mu muulu ubwa kwa Lesa ubwa myaka ikana limo! Abantu bakaba nabamona ukuti imitekele ya kwa Lesa ukupitila mu Bufumu e isuma muli fyonse fye. Ukuti Lesa e walinga ukuteka, no kuti e mulopwe, fikaba na fyebelwa mu kukumanina.
14. Cinshi cikacitikila bacipondoka ilyo imyaka ikana limo ikapwa?
14 Pa mpela ya myaka ikana, Yehova akasuminisha abantunse bapwililika ukusalapo uo balefwaya ukubombela. Baibolo ilangilila ukuti “Satana akakakulwa mu cifungo cakwe.” Na kabili akesha ukulufya abantunse, bamo pali abo bakasalapo no kukanatungululwa na Lesa. Ku kucingilila ‘ukuilandula pa balwani bakwe umuku walenga ibili,’ Yehova akonaula Satana, ifibanda fyakwe, na bonse abapondokela bumulopwe bwakwe. Takuli uukatila abantu abakonaulwa ku ciyayaya pali yo nshita tabapeelwe insambu sha kusala nelyo ukuti balecita ifyabipa pa mulandu wa kukanapwililika. Bakaba abapwililika nga Adamu na Efa, abo baitemenwe ukupondokela imitekele yalungama iya kwa Yehova.—Ukusokolola 20:7-10; Nahumu 1:9.
15. Kumfwana nshi kukaba pa bantu ba bucishinka na Yehova?
15 Lubali lumbi, cilepala kwati abengi nga nshi bakasalapo ukusansabika bumulopwe bwa kwa Yehova. Libe ninshi bacipondoka bonse nabonaulwa, abalungama bakeminina pa cinso ca kwa Yehova, pa numa ya kupita mu bwesho bwa kupelekeshako ubwa bucishinka. Lyene Yehova akapokelela abantu ba bucishinka ukuba abana bakwe abaume na banakashi. Bakatendeka ukumfwana na Lesa nga fintu Adamu na Efa baleumfwana nankwe ilyo bashilapondoka. Na muli fyo, amashiwi ya pa Abena Roma 8:21 yakafikilishiwa ayatila: “Ifibumbwa [abantunse] na fyo fikalubulwa ku busha bwa kubola no kutwalwa mu buntungwa bwa bukata bwa bana ba kwa Lesa.” Kasesema Esaya asobele ati: “[Lesa] akamine mfwa ukumina kwa pe. Shikulu Yehova akafuuta ne filamba pa finso fyonse.”—Esaya 25:8.
Isubilo lya Mweo wa Muyayaya
16. Mulandu nshi calingila ukulaenekela icilambu ca mweo wa muyayaya?
16 We cilolelo cawamisha cilolela abacishinka, ukwishiba ukuti Lesa akabapaala icine cine lwa ku mupashi na lwa ku mubili! Kemba wa malumbo alilungike ilyo atile: “Ni mwe mufumbatule minwe yenu, no kwikusha conse ica mweo [ifyalinga] ifyo cilefwaya.” (Amalumbo 145:16) Yehova akoselesha bonse abakekala pe sonde ukulenga ili subilo lya mweo mu Paradise ukuba ulubali lwa citetekelo cabo muli wene. Nangu ca kuti umulandu wa bumulopwe bwa kwa Yehova e wacindamisha, talomba abantu ukulamubombela fye apabula ne cilolelo ca kulambulwa. Muli Baibolo, bucishinka kuli Lesa ne subilo lya mweo wa muyayaya tafyatala afilekanina, lyonse fyendela pamo nge mbali shikabilwa isha citetekelo ca Mwina Kristu muli Lesa. “Uupalamina kuli Lesa ali no kutetekelo kuti e ko ali, no kuti aba kalambula wa bamufwayafwaya.”—AbaHebere 11:6.
17. Ni shani fintu Yesu alangishe ukuti calilinga ukutungililwa ne subilo lyesu?
17 Yesu atile: “Awe uyu e mweo wa muyayaya ukuti bamwishibe, mwe Lesa wine wine mweka, no yo mwatumine, ni Yesu Kristu.” (Yohane 17:3) Pano akumbinkenye ukwishiba Lesa ne mifwaile yakwe ku cilambu ico ici cileta. Ku ca kumwenako, lintu incitatubi yaipwishe ukuibukisha ilyo Yesu ali no kwisa mu Bufumu bwakwe, Yesu atile: “Ukaba na ine mu Paradise.” (Luka 23:43, NW) Taebele ulya mwaume ukuba ne citetekelo nangu ca kuti tapokelele icilambu. Alishibe ukuti Yehova afwaya ababomfi bakwe ukuba ne subilo lya mweo wa muyayaya pe sonde lya paradise ku kubafwa ukucimfya amesho yapusanapusana ayo bapitamo muli cino calo. Kanshi, ukulaenekela icilambu ca kwafwa cacindama ku Mwina Kristu nga ali no kushipikisha.
Icikacitika ku Bufumu
18, 19. Cinshi cikacitika ku Mfumu na ku Bufumu pa mpela ya Kuteka kwa Myaka Ikana?
18 Apo Ubufumu bwali fye ni kamfulumende wa cibili Yehova abomfeshe ku kulenga isonde na bekashi baliko ukupwililika no kuwikishiwa kuli wene, mulimo nshi Imfumu Yesu Kristu ne shamfumu kabili bashimapepo ababa 144,000 bakakwata ilyo Imyaka Ikana ikapwa? “E pakonke mpela, ilyo akalubwilo bufumu kuli Lesa Wishi, ilyo akafubalisha bumulopwe bonse no lupaka lonse na maka. Pantu ali no kuteka, akasuke abika abalwani bonse pa nshi ya makasa yakwe.”—1 Abena Korinti 15:24, 25.
19 Nga ca kuti Kristu akalubwila Ubufumu kuli Lesa, kuti twaumfwikisha shani amalembo yatila bukekalilila umuyayaya? Ifyo Ubufumu bukapwishisha fikekalilila umuyayaya. Kristu akacindikwa ku ciyayaya pa mulandu wa mulimo wakwe uwa kulenga bumulopwe bwa kwa Lesa ukwebelwa. Lelo apo nomba ninshi ulubembu ne mfwa nafifumishiwapo umupwilapo, kabili na bantunse na balubulwa, ici cikalenga umulimo wakwe uwa Bukalubula ukupwa. Ukuteka kwa Myaka Ikana nako kukapwishishiwa; e co takwakabe na kabili ukukabila kamfulumende wa cibili uwa kuba pa kati ka kwa Yehova na bantu bacumfwila. Nga ca be fyo, ‘Lesa akaba fyonse mulu fyonse.’—1 Abena Korinti 15:28.
20. Kuti twaishiba shani ifyo cikaba kuli Kristu na kuli ba 144,000?
20 Mulimo nshi ukakwata Kristu na bakateka banankwe pa numa ya Kuteka kwa Myaka Ikana Limo? Baibolo tayalanda. Lelo, kuti twashininkisha ukuti Yehova akabapeela imilimo iingi iyalundwapo iya mu bubumbo bwakwe. Shi ifwe bonse natutungilile bumulopwe bwa kwa Yehova no kwisapeelwa umweo wa muyayaya, pa kuti ku nshita ya ku ntanshi, tukabe aba mweo no kwishiba ico Yehova ateyanishisha Imfumu ne mfumu shinankwe kabili bashimapepo, capamo no bubumbo bwakwe bonse ubwa kupapusha!
Ifishinka fya Kupitulukamo
• Kwaluka nshi mu mitekele ukulepalama?
• Ni shani fintu Lesa akapingula ababifi na balungama?
• Finshi fikabamo mu calo cipya?
• Ni shani fintu bumulopwe bwa kwa Yehova bukebelwa umupwilapo?
[Amepusho]
[Ifikope pe bula 17]
“Kukabo kwima ku bafwa kwa balungama na bashalungama”
[Icikope pe bula 18]
Aba bucishinka bakatendeka ukumfwana kwine kwine na Yehova