Nuhe Ahọluduta Jiwheyẹwhe Tọn Na Wà
Nuhe Ahọluduta Jiwheyẹwhe Tọn Na Wà
“Ahọludu towe ni wá. Ojlo towe ni yin wiwà to aigba go, dile e te to olọn mẹ.”—MATIU 6:10.
1. Etẹwẹ wiwá Ahọluduta Jiwheyẹwhe tọn na zẹẹmẹdo?
TO WHENUENA Jesu plọn hodotọ etọn lẹ nado hodẹ̀ na Ahọluduta Jiwheyẹwhe tọn, e yọnẹn dọ wiwá etọn na hẹn opodo wá na gandudu owhe fọtọ́n susu gbẹtọvi tọn lẹ he tin to mẹdekannu mẹ sọn Jiwheyẹwhe dè. To ojlẹ enẹ lẹpo whenu, ojlo Jiwheyẹwhe tọn ma ko yin wiwà to aigba ji to paa mẹ gba. (Psalm 147:19, 20) Ṣigba to Ahọluduta lọ zizedai to olọn mẹ godo, ojlo Jiwheyẹwhe tọn dona yin wiwà to filẹpo. Ojlẹ na diọdo jiawu sọn gandudu gbẹtọ tọn mẹ hlan Ahọluduta olọn mẹ Jiwheyẹwhe tọn mẹ to sisẹpọ tlala.
2. Etẹwẹ na dohiagona diọdo lọ sọn gandudu gbẹtọ tọn mẹ dohlan gandudu Ahọluduta tọn?
2 Ohia didogona diọdo ehe na yin ojlẹ lọ he Jesu ylọ dọ “nukunbibia daho . . . , ehe hunkọ ma ko tin sọn whẹwhẹwhenu aihọn tọn kakajẹ dinvie, lala, mọtọn hunkọ ma to na tin gbede.” (Matiu 24:21) Biblu ma dọ lehe ojlẹ enẹ na dẹnsọ gba, ṣigba nugbajẹmẹji he na wá aimẹ to whelọnu lẹ na ylan hugan nudepope he aihọn lọ ko mọ pọ́n gbede. To bẹjẹeji nukunbibia daho lọ tọn, nude na jọ he na yin nupaṣamẹ tlala de na suhugan gbẹtọ lẹ tọn to aigba ji: yèdọ vasudo sinsẹ̀n lalo lẹpo tọn. Enẹ ma na yin nupaṣamẹ de hlan Kunnudetọ Jehovah tọn lẹ gba, na yé ko to nukundo ehe na whenu dindẹn. (Osọhia 17:1, 15-17; 18:1-24) Nukunbibia daho lọ na wá opodo to Amagẹdọni mẹ to whenuena Ahọluduta Jiwheyẹwhe tọn na gbà titonu Satani tọn blebu do flinflin.—Daniẹli 2:44; Osọhia 16:14, 16.
3. Nawẹ Jẹlemia basi zẹẹmẹ sọgodo tasinyẹntọ lẹ tọn gbọn?
3 Etẹwẹ ehe na zẹẹmẹdo na gbẹtọ “he ma yọ́n Jiwheyẹwhe . . . podọ yé he ma setonuna wẹndagbe” gando Ahọluduta olọn mẹ tọn etọn to alọ Klisti tọn mẹ go lẹ? (2 Tẹsalonikanu lẹ 1:6-9) Dọdai Biblu tọn dọna mí dọmọ: “Doayi e go, oylan na tọ́n yì sọn akọta de jẹ akọta de, podọ yè na hẹn jẹhọn sinsinyẹn daho de tite sọn opodo petepete aigba lọ tọn dali. Podọ alántọṣiọ OKLUNỌ tọn lẹ na tin to azán nẹ gbè sọn opodo de aigba lọ tọn yèdọ jẹ opodo awetọ aigba lọ tọn; yè ma to na ví yé gba, kavi dọnpli, kavi di gba; yé na yin ogbó to nukunmẹ aigba lọ tọn ji.”—Jẹlemia 25:32, 33.
Opodo Kanyinylan Tọn
4. Naegbọn Jehovah do yin whẹsuna na opodo hinhẹnwa na titonu ylankan ehe?
4 Na owhe fọtọ́n susu lẹ, Jehovah Jiwheyẹwhe ko na dotẹnmẹ kanyinylan, na ojlẹ dindẹn sọmọ bọ ahunjijlọnọ lẹ ko mọ dọ gandudu gbẹtọvi tọn yin nugbajẹmẹji tọn de. Di apajlẹ, to owhe kanweko 20tọ kẹdẹ mẹ, hugan gbẹtọ livi 150 wẹ yin hùhù to awhàn lẹ, gufinfọn lẹ, po tukla tovi lẹ tọn po mẹ, sọgbe hẹ asisa dopo. Kanyinylan gbẹtọ tọn na titengbe tọn yin mimọ to Wẹkẹ-Whàn II whenu to whenuena gbẹtọ livi 50 delẹ yin hùhù, he susu yetọn kú okú ylankan to osla opá yasanamẹ Nazi tọn lẹ mẹ. Kẹdẹdile Biblu dọ dọdai do, to ojlẹ mítọn mẹ ‘mẹylankan lẹ, po mẹklọtọ lẹ po ko ylan deji.’ (2 Timoti 3:1-5, 13) To egbehe, fẹnnuwiwa, sẹ́nhẹngba, danuwiwa, mẹhodu, po wangbẹna nujinọtedo Jiwheyẹwhe tọn lẹ po gbayipe. Enẹwutu, Jehovah ko yin whẹsuna mlẹnmlẹn to hinhẹn titonu ylankan ehe wá opodo etọn mẹ.
5, 6. Basi zẹẹmẹ kanyinylan he tin-to-aimẹ to Kanani hohowhenu tọn mẹ.
5 Ninọmẹ lọ yin onú dopolọ hẹ dehe tin to Kanani owhe 3 500 delẹ die wayi. Biblu dọmọ: “Osùnú hlan OKLUNỌ lọ lẹpo, he ewọ gbẹwanna, wẹ yé ko wà hlan yẹwhe yetọn lẹ; na yèdọ visunnu yetọn lẹ po viyọnnu yetọn lẹ po wẹ yé ko mẹ̀ to miyọ́n lọ mẹ hlan yẹwhe yetọn lẹ.” (Deutelonomi 12:31) Jehovah dọna akọta Islaeli tọn dọmọ: “Na kanyinylan akọta helẹ tọn wẹ OKLUNỌ lọ Jiwheyẹwhe towe do yàn yé jẹgbonu sọn nukọn towe.” (Deutelonomi 9:5) Whenuho-kàntọ Biblu tọn Henry H. Halley doayi e go dọmọ: “Sinsẹ̀n-bibasi Baali tọn, Aṣitalọti, po yẹwhe Kanani tọn devo lẹ po nọ bẹ hùnwhẹ paṣadudu zẹjlẹgo tọn lẹ hẹn; tẹmpli yetọn lẹ wẹ yin ahọ́nkan ylanwiwa tọn.”
6 Halley do lehe kanyinylan yetọn ko ylan susọ hia, na to dopo to adà susu mọnkọtọn lẹ mẹ, lẹnunnuyọnẹntọ dòkuntọ lẹ “mọ sọha daho tọ̀zẹ́n lẹ tọn he mẹ oṣiọ ovi he ko yin yiyido sanvọ́ na Baali lẹ tin te.” E dọmọ: “Lẹdo lọ blebu sọawuhia nado yin yọwhé de na ovi-yẹyẹ lẹ. . . . Kananinu lẹ nọ basi sinsẹ̀n, gbọn titlọ biọ mawé mẹ, taidi hùnwhẹ sinsẹ̀n tọn de dali, to yẹwhe yetọn lẹ nukọn; podọ to enẹgodo, gbọn ovi plọnji yetọn lẹ hùhù, taidi avọ́sinsan de dohlan yẹwhe ehe dopolọ lẹ dali. E taidi dọ, to obá he yiaga mẹ, aigba Kanani tọn ko lẹzun wunmẹ Sọdọmi po Gọmọla tọn po to didọ ẹ taidi akọta de liho. . . . Be nukunhunhun osùnú gblezọn po kanyinylan mọnkọtọn tọn po tindo jlọjẹ depope nado gbẹsọ pò to aimẹ ya? . . . E paṣa lẹnunnuyọnẹntọ dòkuntọ he kùn gbakija tòdaho Kananinu lẹ tọn dọ Jiwheyẹwhe ma yawu và yé sudo hugan lehe e wà do.”
Ogú Aigba Tọn Dùdù
7, 8. Nawẹ Jiwheyẹwhe na klọ́ aigba ehe wé gbọn?
7 Kẹdẹdile Jiwheyẹwhe klọ́ Kanani wé do, to madẹnmẹ e na klọ́ aigba lọ blebu wé bo na na ẹn mẹhe to ojlo etọn wà lẹ. “Nugbonọ wẹ na nọ̀ aigba lọ ji, yé he pé lẹ wẹ na nọ̀ e mẹ. Ṣigba mẹylankan lẹ wẹ yè na sán sọn aihọn mẹ.” (Howhinwhẹn lẹ 2:21, 22) Dile psalm-kàntọ lọ dọ do: “Whenu pẹẹde, mẹylankan lẹ ma na tin ba . . . Ṣigba homẹmiọnnọ lẹ na dugu aigba tọn; yé na hẹn homẹhun yéde to jijọho susu mẹ.” (Psalm 37:10, 11) Mẹhe nasọ yin didesẹ wẹ Satani, bọ ‘e ma na do klọ akọta lẹ ba, kaka owhe fọtọ́n na do pé.’ (Osọhia 20:1-3) Mọwẹ, “aihọn sọ to jujujei po wantuntun etọn po: ṣigba ewọ he to ojlo Jiwheyẹwhe tọn wà wẹ na nọte kakadoi.”—1 Johanu 2:17.
8 To whenuena e to todido daho he tin na mẹhe jlo nado nọgbẹ̀ kakadoi to aigba ji lẹ tọn bladopọ, Jesu dọmọ: “[Ayajẹnọ] wẹ homẹmimiọnnọ lẹ; na yé na dugu aigba tọn.” (Matiu 5:5) Vlavo e to alọdlẹndo Psalm 37:29, he dọ dọdai dọmọ: “Dodonọ wẹ na dugu aigba tọn, bo nasọ nọ nọ̀ e mẹ kakadoi.” Jesu yọnẹn dọ lẹndai Jehovah tọn wẹ e yin nado tindo gbẹtọ ahunjijlọnọ lẹ nado nọ̀ aigba paladisi tọn de ji kakadoi. Jehovah dọmọ: “Yẹn wẹ ko basi aigba, gbẹtọ lọ podọ gbekanlin lọ he tin to nukunmẹ aigba tọn ji, gbọn huhlọn daho dali . . . yẹn [ko] na ẹn hlan mẹhe e sọawuhia jlọjẹ hlan mi.”—Jẹlemia 27:5.
Aihọn Yọyọ Jiawu De
9. Aihọn wunmẹ tẹwẹ Ahọluduta Jiwheyẹwhe tọn na hẹnwa aimẹ?
9 To Amagẹdọni godo, Ahọluduta Jiwheyẹwhe tọn na hẹn “aigba yọyọ” jiawu de wá aimẹ to ehe mẹ ‘dodowiwa na nọ nọ̀.’ (2 Pita 3:13) Pọngbọ sẹhundaga nankọtọn die e na yin na mẹhe lùn Amagẹdọni tọ́n lẹ nado yin whinwhlẹngán sọn titonu ylankan kọgbidinamẹ tọn ehe mẹ! Lehe yé na yin homẹhunnọ do sọ nado biọ aihọn yọyọ dodowiwa tọn lọ mẹ to gandudu Ahọluduta olọn mẹ tọn glọ, gọna dona jiawu lẹ po ogbẹ̀ madopodo po to pọndohlan mẹ!—Osọhia 7:9-17.
10. Onú ylankan tẹlẹ wẹ ma nasọ tin to gandudu Ahọluduta tọn glọ ba?
10 Gbẹtọ lẹ ma na yin budona gbọn awhàn, sẹ́nhẹngba, huvẹ, kavi etlẹ yin gbọn kanlin nuwledutọ lẹ dali gba. “Yẹn bo nasọ basi alẹnu jijọho tọn de po [omẹ ṣie lẹ] po, bosọ hẹn gbekanlin ylankan lẹ nado gbòdò sọn aigba lọ mẹ . . . Atin danji tọn lọ na nọ jo sinsẹ́n etọn, podọ aigba lọ nasọ nọ jo jideji etọn, yé bo nasọ yin masavonọ to aigba yetọn mẹ.” “Yé bo nasọ yí ohí yetọn lẹ do tùn glepọ̀nugàn lẹ, podọ owhán yetọn lẹ do ohànvi lẹ mẹ; akọta ma nasọ ze ohí daga do akọta ji, mọ yé ma nasọ plọn awhàn gbede ba. Ṣigba yé na sinai omẹ dopodopo to vẹntin etọn glọ podọ to ovotin etọn glọ; podọ mẹde ma nasọ hẹn yé savò gba.”—Ezekiẹli 34:25-28; Mika 4:3, 4.
11. Naegbọn mí sọgan tindo jidide dọ awufiẹsa agbasa tọn lẹ na wá opodo?
11 Azọ̀n, awubla, podọ etlẹ yin okú na yin didesẹ. “Finẹnu lẹ ma to na dọmọ, yẹn to azọ̀njẹ: yè na jo ylankan mẹhe nọ nọ̀ finẹ lẹ tọn na yé.” (Isaia 33:24) “[Jiwheyẹwhe] nasọ súnsún dasin lẹpo sẹ̀ sọn nukun yetọn mẹ; okú ma nasọ tin ba, kavi awubla, kavi avi, mọ awufiẹsa ma na tin ba: na onú tintan lẹ ko juwayi. . . . Pọ́n, yẹn diọ onú lẹpo zun yọyọ.” (Osọhia 21:4, 5) To whenuena e tin to aigba ji, Jesu do nugopipe etọn nado wà onú enẹlẹ gbọn huhlọn he Jiwheyẹwhe ko na ẹn dali hia. Po godonọnamẹ gbigbọ wiwe tọn po, Jesu gbọn aigba lọ blebu ji bo to azọ̀nhẹngbọna sẹkunọ lẹ bosọ to awutunọ lẹ hẹn jẹgangan.—Matiu 15:30, 31.
12. Todido tẹwẹ tin to finẹ na oṣiọ lẹ?
12 Jesu tlẹ wà hugan mọ. E fọ́n oṣiọ lẹ sọnku. Nawẹ gbẹtọ whiwhẹnọ lẹ yinuwa gbọn? To whenuena e fọ́n viyọnnu owhe 12 mẹvi de sọnku, ‘avò sọ vò mẹjitọ etọn lẹ tlala.’ (Malku 5:42) Ehe yin apajlẹ devo nuhe Jesu na wà lẹdo aigba pé to gandudu Ahọluduta tọn glọ, na to whenẹnu “fọnsọnku dodonọ lẹ tọn, po mawadodonọ lẹ po tọn de na tin.” (Owalọ lẹ 24:15) Lẹnnupọndo aglinjijẹ daho lọ ji whenuena pipli debọdo-dego oṣiọ lẹ tọn na lẹkọwa ogbẹ̀ bo nasọ vọ́ kọndopọ hẹ mẹyiwanna yetọn lẹ! Matin ayihaawe azọ́n mẹpinplọn tọn daho de na tin to anademẹ Ahọluduta lọ tọn glọ bọ “aihọn na gọ́ na nuyọnẹn OKLUNỌ tọn, dile osin ṣinyọ́n ohù ji do.”—Isaia 11:9.
Nupojipetọ-Yinyin Jehovah Tọn Yin Whẹsuna
13. Nawẹ jlọjẹnọ-yinyin gandudu Jiwheyẹwhe tọn tọn na yin didohia gbọn?
13 To vivọnu gandudu owhe fọtọ́n Ahọluduta tọn, whẹndo gbẹtọvi tọn na ko yin hinhẹngọwa pipé ayiha po agbasa po tọn mẹ. Aigba na yin jipa globu Edẹni tọn de, yèdọ paladisi de. Jijọho, ayajẹ, hihọ́, po ogbẹ́ owanyinọ gbẹtọvi tọn po na ko yin mimọyi. Onú mọnkọtọn ma ko yin mimọ to gandudu Ahọluduta tọn mẹ to whenuho gbẹtọvi tọn mẹ pọ́n gbede gba. Vogbingbọn daho nankọtọn die ko yin didohia to whenẹnu to owhe fọtọ́n susu he wayi heyin gandudu awubla tọn gbọn gbẹtọvi lẹ dali podọ to gandudu jiawu lọ gbọn Ahọluduta olọn mẹ tọn Jiwheyẹwhe tọn heyin owhe fọtọ́n tọn dali ṣẹnṣẹn! Gandudu Jiwheyẹwhe tọn gbọn Ahọluduta etọn dali na ko yin didohia nado yin nupojipetọ mlẹnmlẹn to adà lẹpo mẹ. Jlọjẹ Jiwheyẹwhe tọn nado dugán, yèdọ nupojipetọ-yinyin etọn, na ko yin whẹsuna mlẹnmlẹn.
14. Etẹwẹ na jọ do atẹṣitọ lẹ go to whenuena owhe fọtọ́n lọ na wá opodo?
14 To vivọnu owhe fọtọ́n tọn, Jehovah na dikena gbẹtọvi pipé lẹ nado yí nudide mẹdekannujẹ tọn yetọn zan gando mẹhe yé jlo nado sẹ̀n go. Biblu dohia dọ ‘Satani na yin tuntundote sọn oganpa etọn mẹ.’ E na tẹnpọn whladopo dogọ nado klọ gbẹtọvi lẹ, delẹ he na de mẹdekannujẹ tintindo sọn Jiwheyẹwhe dè. Nado glọnalina ‘ayimajai sọn finfọndote whla awetọ mẹ’, Jehovah na và Satani, aovi etọn lẹ, po mẹhe ṣiatẹ sọta nupojipetọ-yinyin Jehovah tọn po lẹpo sudo. Mẹdepope ma na jẹagọdonu dọ gbẹtọvi depope he yin vivasudo kakadoi to ojlẹ enẹ mẹ ma tindo dotẹnmẹ kavi dọ aliho gbẹzan ylankan tọn yetọn yin na mapé wutu gba. Lala, yé na yin pipé taidi Adam po Evi po, he desọn ojlo mẹ wá bo ṣiatẹ sọta gandudu dodowiwa Jehovah tọn.—Osọhia 20:7-10; Nahumi 1:9.
15. Haṣinṣan tẹwẹ nugbonọ lẹ na tindo hẹ Jehovah?
15 To alọ devo mẹ, vlavo susugege gbẹtọ lẹ tọn na de nado nọgodona nupojipetọ-yinyin Jehovah tọn. Po viva atẹṣitọ lẹpo sudo po, dodonọ lẹ na nọte to Jehovah nukọn, to whenuena yé ko lùn mẹtẹnpọn nugbonọ-yinyin tọn godo tọn tọ́n. To whenẹnu nugbonọ ehelẹ na yin alọkẹyi gbọn Jehovah dali taidi visunnu po viyọnnu etọn lẹ po. Enẹwutu yé na lẹkọwa haṣinṣan he Adam po Evi po tindo hẹ Jiwheyẹwhe whẹpo yé do ṣiatẹ mẹ. Gbọnmọ dali, Lomunu lẹ 8:21 na yin hinhẹndi dọmọ: “Yè na whlẹn nudida [gbẹtọvi lẹ] lọsu sọn mẹglọnọ hẹngble tọn mẹ do mẹdekannujẹ he do gigo ovi Jiwheyẹwhe tọn lẹ tọn mẹ.” Yẹwhegán Isaia dọ dọdai dọmọ: “[Jiwheyẹwhe] na ze okú mi [kakadoi]; OKLUNỌ JIWHEYẸWHE nasọ súnsún dasin sọn nukun lẹpo mẹ.”—Isaia 25:8.
Todido Ogbẹ̀ Madopodo Tọn
16. Naegbọn e do sọgbe nado pọ́n nukọn hlan na ahọsumẹ lọ heyin ogbẹ̀ madopodo tọn?
16 Nukundido jiawu nankọtọn die to tenọpọn nugbonọ lẹ, nado yọnẹn dọ Jiwheyẹwhe na kọ̀n alemọyi gbigbọmẹ tọn po agbasa tọn susugege po do yé ji kakadoi! Psalm-kàntọ lọ gbọn gbesisọ dali dọmọ: “Hiẹ kẹ̀ alọ towe, bosọ hẹn nupekọna ojlo nutẹgbẹ lẹpo tọn.” (Psalm 145:16) Jehovah na tuli mẹhe yin ogbẹ́ aigba ji tọn lẹ nado tindo todido ogbẹ̀ tọn to Paladisi mẹ taidi apadewhe yise yetọn tọn to ewọ mẹ. Dile etlẹ yindọ whẹho nupojipetọ-yinyin Jehovah tọn yin nujọnu taun, e ma nọ biọ to gbẹtọ lẹ si nado sẹ̀n ẹn matin nukundido ahọsumẹ tọn de gba. To Biblu lọ blebu mẹ, nugbonọ-yinyin hlan Jiwheyẹwhe podọ todido ogbẹ̀ mavọmavọ tọn yin nuhe yè kọndopọ pẹkipẹki taidi adà titengbe yise Klistiani tọn to Jiwheyẹwhe mẹ. “Ewọ he ja Jiwheyẹwhe dè, ma sọgan nọma yise dọ e tin, podọ ewọ wẹ ahọsutọ yé he whesọ do dín in lẹ tọn.”—Heblu lẹ 11:6.
17. Nawẹ Jesu dohia dọ e sọgbe nado yin hinhẹn lodo gbọn todido mítọn dali do?
17 Jesu dọmọ: “Ehe wẹ ogbẹ̀ madopodo, dọ yé ni yọ́n hiẹ ṣokẹdẹ Jiwheyẹwhe nugbo, podọ ewọ mẹhe hiẹ dohlan, yèdọ Jesu Klisti.” (Johanu 17:3) Tofi e kọ̀n Jiwheyẹwhe po lẹndai etọn lẹ yinyọnẹn po dopọ hẹ ahọsumẹ he ehe nọ hẹnwa. Di apajlẹ, to whenuena ylanwatọ de biọ nado yin finflin to whenuena Jesu wá Ahọluduta etọn mẹ, Jesu dọmọ: “Hiẹ na nọ̀ hẹ mi to paladisi mẹ.” (Luku 23:43) E ma dọna dawe lọ nado tindo yise eyin e ma tlẹ mọ ahọsumẹ de yí. E yọnẹn dọ Jehovah jlo dọ devizọnwatọ etọn lẹ ni tindo todido ogbẹ̀ madopodo tọn to aigba paladisi tọn de ji nado gọalọna yé nado doakọnna dile yé to pipehẹ whlepọn voovo lẹ to aihọn ehe mẹ. Gbọnmọ dali, nukọn pinpọnhlan ahọsumẹ lọ yin alọgọ nujọnu tọn de to akọndidonanu taidi Klistiani de mẹ.
Sọgodo Ahọluduta lọ Tọn
18, 19. Etẹwẹ na jọ do Ahọlu lọ po Ahọluduta lọ po go to vivọnu Gandudu owhe Fọtọ́n lọ tọn?
18 To whenuena e yindọ Ahọluduta lọ wẹ yin gandudu alọgọnamẹtọ de he Jehovah yizan nado hẹn aigba lọ po gbẹtọvi he tin to e ji lẹ po wá pipé kọ̀n bosọ gbọwhẹ hẹ ewọ, azọngban tẹwẹ tin to finẹ na Ahọlu lọ Jesu Klisti gọna ahọlu po yẹwhenọ 144 000 lẹ po to owhe Fọtọ́n lọ godo? “Whenẹnu wẹ opodo wá, whenuena e na ko jo ahọludu hlan Jiwheyẹwhe, yèdọ Otọ́; whenuena e na ko zín ogán lẹpo, po yẹyi lẹpo po, po huhlọn po do odò. Na e ma na nọ ma duahọlu, kaka e na do zín kẹntọ lẹpo dai to afọ etọn glọ.”—1 Kọlintinu lẹ 15:24, 25.
19 To whenuena Klisti na gọ̀ Ahọluduta jo na Jiwheyẹwhe, nawẹ wefọ he dọho gandego taidi nuhe na nọte kakadoi lẹ na yin nukunnumọjẹemẹ gbọn? Wadotana Ahọluduta lọ tọn lẹ na gbọṣi aimẹ kakadoi. Klisti na yin gbégbòna kakadoi na azọngban etọn to azọ́nwiwa na whẹsuna nupojipetọ-yinyin Jiwheyẹwhe tọn mẹ. Ṣigba to whenuena e yindọ ylando po okú po na yin didesẹ mlẹnmlẹn, podọ gbẹtọvi lẹ na yin fifligọ, ehe hẹn opodo wá na nuhudo etọn taidi Mẹfligọtọ de. Gandudu owhe Fọtọ́n Ahọluduta lọ tọn na ko sọ yin hinhẹnwa tadona kọ̀n mlẹnmlẹn; enẹwutu nuhudo depope ma na tin na gandudu alọgọnamẹtọ de nado gbọṣi aimẹ to Jehovah po gbẹtọvi tonusetọ lẹ po ṣẹnṣẹn gba. Gbọnmọ dali, “Jiwheyẹwhe [na] yin popo to onú popo mẹ.”—1 Kọlintinu lẹ 15:28.
20. Nawẹ mí sọgan wá yọ́n nuhe tin to sọgodo na Klisti po 144 000 lẹ po gbọn?
20 Azọngban sọgodo tọn tẹwẹ Klisti po ganduhẹmẹtọgbẹ́ etọn lẹ po na tindo to whenuena Gandudu owhe Fọtọ́n tọn wá vivọnu godo? Biblu ma dọ gba. Ṣogan, mí sọgan tindo nujikudo dọ Jehovah na na yé lẹblanulọkẹyi sinsẹ̀nzọn tọn susu dogọ do nudida etọn lẹ ji. Na mímẹpo to egbehe ni nọgodona nupojipetọ-yinyin Jehovah tọn bosọ yin nina ogbẹ̀ madopodo, bọ to sọgodo, mí na tin to ogbẹ̀ nado mọ nuhe Jehovah ko lẹndai na Ahọlu lọ po ahọlu lẹ gọna yẹwhenọ hatọ etọn lẹ po, mọdopolọ na wẹkẹ jiawu etọn!
Nuagokun lẹ na Dogbapọnna
• Diọdo nankọtọn to gandudu mẹ wẹ mí to sisẹpọ?
• Nawẹ Jiwheyẹwhe na dawhẹna mẹylankan lẹ po dodonọ lẹ po gbọn?
• Ninọmẹ tẹlẹ wẹ na tin-to-aimẹ to aihọn yọyọ lọ mẹ?
• Nawẹ nupojipetọ-yinyin Jehovah tọn na yin whẹsuna mlẹnmlẹn gbọn?
[Kanbiọ Oplọn Tọn Lẹ]
[Yẹdide to weda 17]
‘Fọnsọnku dodonọ lẹ po mawadodonọ lẹ po tọn de na tin’
[Yẹdide to weda 18]
Nugbonọ lẹ na lẹkọwa haṣinṣan dagbe de mẹ hẹ Jehovah