Ko e Mena ka Taute he Kautu he Atua
Ko e Mena ka Taute he Kautu he Atua
“Kia hoko mai hau a kautu. Kia eke hau a finagalo ke he lalolagi, tuga ne eke ke he lagi.”—MATAIO 6:10.
1. Ko e heigoa e kakano he Kautu he Atua ha ne hau?
HE MAGAAHO ne fakaako e Iesu e tau tutaki hana ke liogi ma e Kautu he Atua, nukua iloa e ia to ta mai he Kautu e fakaotiaga ke he tau afe tau he pule tokotaha he tagata mai he Atua. He magahala ia, kua nakai taute katoatoa e finagalo he Atua he lalolagi. (Salamo 147:19, 20) Ka e ka fakatu e Kautu i luga he lagi, to taute ai e finagalo he Atua ke he tau fahi oti. Ko e magaaho ma e hikiaga mai he pule he tagata ke he pule Kautu he Atua he lagi kua tata lahi mai.
2. Ko e heigoa ka fakamailoga e hikiaga mai he pule tagata ke he pule Kautu?
2 To fakamailoga he hikiaga ia e magaaho ne ui e Iesu ko e “vaha ia ke lahi ai e matematekelea lahi, nakai pihia taha mena tali mai he kamataaga he lalolagi, kua hoko ni ke he vaha nai; ti nakai pihia foki.” (Mataio 24:21) Kua nakai talahau he Tohi Tapu ko e fiha e loa he magaaho ia, ka ko e tau matematekelea ka tutupu he magahala ia to mua atu ke he ha mena nukua kitia he lalolagi. He kamataaga he matematekelea lahi, to fai mena tupu ka fakaofo lahi aki e laulahi he tau tagata he lalolagi: ko e moumouaga he tau lotu fakavai. To nakai ofo e mena ia ke he Tau Fakamoli a Iehova, ha kua leva he iloa e lautolu e mena nei. (Fakakiteaga 17:1, 15-17; 18:1-24) To fakaoti e matematekelea lahi ia Amaketo he magaaho ka fakamalipilipi he Kautu he Atua e fakatokaaga katoa faka-Satani.—Tanielu 2:44; Fakakiteaga 16:14, 16.
3. Ne fakamaama fefe e Ieremia e moui tukulagi ha lautolu ne omaoma?
3 Ko e heigoa e kakano he mena nei ke he tau tagata “kua nakai iloa e Atua, mo lautolu kua nakai omaoma ke he vagahau mitaki” hagaao ke he Kautu hana he lagi he tau lima he Keriso? (2 Tesalonia 1:6-9) Ne talamai e perofetaaga Tohi Tapu ki a tautolu: “Kitiala, to fina atu e malaia ke kamata mai he taha motu ke hoko atu ke he taha motu, to hake mai e afa lahi mai he tau kala he lalolagi. To ha i ai ke he aho ia a lautolu kua keli e Iehova ke kamata mai he taha potu he lalolagi ke hoko atu ke he taha potu he lalolagi; nakai tagi tatuki ai ha ko lautolu, to nakai fakapotopoto ai a lautolu, to nakai tanu a lautolu; to eke ni a lautolu mo otaota ke he fuga kelekele.”—Ieremia 25:32, 33.
Ko e Fakaotiaga he Mahani Kelea
4. Ko e ha kua tonuhia a Iehova ke fakaoti e fakatokaaga kelea nei?
4 Ke he tau afe tau, ne fakauka a Iehova ko e Atua ke he mahani kelea, ti kua loa lahi e magaaho ke mailoga he tau tagata loto tututonu nukua matematekelea e pule tagata. Ke fakatai ki ai, he senetenari ke 20 aki ni, ne molea e 150 miliona tagata ne mamate he tau felakutaki, fetotokoaki, mo e falu a mena fakaagitau he motu, he hagaao atu ke he taha talahauaga. Ko e mahani kelea muikau ne mua he tagata kua kitia lahi he magahala he Felakutaki II he Lalolagi he magaaho ne kavi ke 50 miliona ne mamate, mo e tokologa ia lautolu ne mamate fakakikiveka he tau kemu pagota Nasi. Tuga he talahau tuai he Tohi Tapu, he vaha ha tautolu ‘ko e tau tagata mahani kelea mo e tau tagata fakavai kua tolomaki atu ke au atu he kelea.’ (2 Timoteo 3:1-5, 13) He vaha nei, ko e mahani feuaki, holifono, matahavala, nakai fakamoli, mo e nakai fakalilifu ma e tau poakiaga he Atua kua holofa lahi. Ko e mena ia, kua tonu lahi ia Iehova ke ta mai e fakatokaaga nei ke he fakaotiaga.
5, 6. Fakamaama e mahani kelea ne ha ha i Kanana i tuai.
5 Ko e tuaga he mogonei kua tatai ki a Kanana he kavi ke 3,500 e tau tau kua mole. Ne talahau he Tohi Tapu: “Ko e tau mena fakalialia oti kia Iehova, kua vihiatia e ia kua eke ai e lautolu ke he ha lautolu a tau atua; ko e mena huhunu ai foki e lautolu ha lautolu a tau tama tane mo e ha lautolu a tau tama fifine ke eke mo poa ke he ha lautolu a tau atua.” (Teutaronome 12:31) Ne tala age e Iehova ke he motu ko Isaraela: “Ko e mahani kelea he tau motu ia kua vega kehe ai e Iehova hau a Atua a lautolu.” (Teutaronome 9:5) Kua mailoga he tagata fakamau tala tuai he Tohi Tapu ko Henry H. Halley: “Ko e tapuakiaga ki a Paala, Asaira, mo e falu atua Kanana kua puke he mahani feuaki teteki ne mua; ko e tau faituga ha lautolu ko e tau matapatu he tau gahua fakalialia.”
6 Ne fakakite e Halley e kelea muitui ha lautolu, ha ko e taha matakavi pihia, ne “moua [he tau tagata keli kelekele] loga e tau lupo lalahi ne toka ai e tau valavala kakano he fanau ne poa ki a Paala.” Ne talahau e ia: “Kua eke e kavi katoa ia mo tukuaga ma e tau tama mukemuke. . . . Kua tapuaki e tau Kanana, he putoia ke he mahani feuaki, ko e mena taute tumau, i mua he tau atua ha lautolu; ti oti keli e tau tama uluaki ha lautolu mo poa ke he tau atua ia ni. Kua tuga, ke he fuafuaaga lahi, kua eke e motu ko Kanana ke tatai mo Sotoma mo Komora. . . . Kua lata kia e kaufakalatahaaga he tau mena fakalialia muitui mo e kelea lahi pihia ke ha ha ai? . . . Ko e tau tagata ne keli kelekele he tau maaga malamalaega ha Kanana kua tuaha he nakai fakaotioti fakaave he Atua a lautolu.”
Tufaaga he Lalolagi
7, 8. To fakamea fefe he Atua e lalolagi nei?
7 Tuga ne fakamea he Atua a Kanana, to nakai leva ti fakamea e ia e lalolagi katoa mo e tuku age ki a lautolu ne taute hana finagalo. “Ko lautolu ne mahani hakohako to nonofo a lautolu ke he motu; mo lautolu ne katoatoa e mitaki ha lautolu a mahani to toe ai a lautolu; ka to vevehe kehe mai he motu a lautolu ne mahani kelea.” (Tau Fakatai 2:21, 22) Mo e pehe e salamo: “Toe tote, ti nakai ha i ai e tagata mahani kelea . . . Ka ko e tau tagata mahani molu, to eke ma lautolu e motu; ti fakafiafia foki e lautolu a lautolu ha ko e monuina kua lahi.” (Salamo 37:10, 11) To uta kehe foki a Satani, ke “nakai tuai fakahehe e ia e tau motu, ato katoatoa ai e tau tau ne taha e afe.” (Fakakiteaga 20:1-3) E, “ha ne mole atu foki e lalolagi katoa mo e hana tau manako lahi; ka ko e tagata kua eke e finagalo he Atua to tumau a ia tukulagi.”—1 Ioane 2:17.
8 He talahau fakahiku e amaamanakiaga mitaki lahi ma lautolu ne manako ke moui tukulagi he lalolagi, ne pehe a Iesu: “Uhoaki a lautolu ne mahani molu; ha ko e mena to eke ma lautolu e motu.” (Mataio 5:5) Moli kua hagaao a ia ke he Salamo 37:29, ne talahau tuai mai: “To eke ni e motu ma e tau tagata tututonu, to nonofo muatua ai a lautolu.” Ne iloa e Iesu ko e finagalo ha Iehova a ia ke nonofo tukulagi a lautolu ne loto hakohako he lalolagi parataiso. Ne talahau e Iehova: “Ko au nai, ne eke e au e lalolagi, ko e tau tagata mo e tau manu ha ha he fuga kelekele, ke he haku a malolo lahi . . . ti tuku atu ai e au kia lautolu kua lata mo e haku a manatu.”—Ieremia 27:5.
Ko e Lalolagi Fou Mitaki Lahi
9. Ko e lalolagi fefe ka ta mai he Kautu he Atua?
9 Ka mole a Amaketo, to ta mai he Kautu he Atua e “lalolagi fou” mitaki lahi ka “nofo ai e tututonu.” (2 Peteru 3:13) Ko e loto totoka lahi ha ia ma lautolu ne hao mai ia Amaketo ke uta kehe e fakatokaaga favale nei! Ko e fiafia ha ia ha lautolu ke o atu ke he lalolagi tututonu fou i lalo he fakatufono he Kautu he lagi, mo e tau monuina mitaki lahi mo e moui tukulagi i mua!—Fakakiteaga 7:9-17.
10. Ko e heigoa e tau mena kelea ka nakai liu ke ha ha ai i lalo he pule Kautu?
10 To nakai liu ke fakamatakutaku e tau tagata he tau felakutaki, holifono, hoge, po ke tau manu vale. “To eke foki e au [mo e tau tagata haku] e maveheaga ke monuina ai, to fakaoti ai e au e tau manu favale he vao ke he motu . . . To fua mai e akau he fonua hana tau fua; to fua mai foki e kelekele hana tau fua; to nonofo fakatekiteki foki a lautolu ke he ha lautolu a motu.” “Ti tukituki e lautolu e tau pelu ha lautolu ke eke mo tau hoko, ko e tau tao foki ha lautolu ke eke mo tau titipi ke taute aki e tau vine; to nakai nikiti atu he taha motu e pelu ke he taha motu, to nakai liu ako tau foki a lautolu. To takitokotaha a lautolu mo e nofo i lalo hana vine, mo lalo foki he hana mati; to nakai ha i ai foki taha ke fakamatakutaku ki ai.”—Esekielu 34:25-28; Mika 4:3, 4.
11. Ko e ha kua mauokafua ai a tautolu to fakaoti e tau gagao he tino?
11 To fakamahaikava e tau gagao, momoko, mo e mate foki. “To nakai pehe mai foki taha kua nofo ai, Kua gagao au; to fakamagalo ai e tau hala he tau tagata kua nonofo ai.” (Isaia 33:24) “To holoholo kehe he Atua e tau hihina mata oti mai he tau mata ha lautolu; ti nakai tuai fai mate, po ke fakatutuku, po ke tagi, ti nakai tuai fai matematekelea; ha kua mole atu e tau mena fakamua. . . . Kitiala, kua fakafou tuai e au e tau mena oti.” (Fakakiteaga 21:4, 5) He nofo a ia he lalolagi, ne fakakite e Iesu e malolo hana ke taute e tau mena ia ha ko e malolo mana ne age he Atua ki a ia. Ha ko e omoiaga he agaga tapu, ne fina atu a Iesu ke he motu katoa mo e fakamalolo a lautolu ne kulikuli mo e gagao.—Mataio 15:30, 31.
12. Ko e heigoa e amaamanakiaga ma e tau tagata mamate?
12 Kua mua atu foki e mena ne taute e Iesu. Ne fakatu mai e ia a lautolu ne mamate. Ka e fefe a lautolu ne loto fakatokolalo? He magaaho ne liu fakatu mai e ia e tama fifine 12 tau, ne ‘hohopo ai e tau ate’ he tau matua hana. (Mareko 5:42) Ko e taha mena anei ka taute e Iesu he lalolagi katoa i lalo he pule Kautu, ha ko e mogoia ‘ka liu foki tutu mai a lautolu ne tututonu katoa mo lautolu ne hepehepe.’ (Gahua 24:15) Manamanatu la ke he hohopo ate lahi he magaaho ka liliu momoui e tau matakau loga mo e liliu fakalataha mo e tau fakahele ha lautolu! Nakai fakauaua to ha i ai e gahua fakaako lahi i lalo he takitakiaga he Kautu ati “puke e lalolagi ke he maama kia Iehova, tuga ne toka kua ūfia ke he puke tahi.”—Isaia 11:9.
Kua Fakatokoluga e Pule Katoatoa a Iehova
13. To fakakite fefe e tonutika he pule he Atua?
13 He matahiku he afe tau he pule Kautu, to liuaki e magafaoa tagata ke mitaki katoatoa he manamanatuaga mo e tino. To eke katoa e lalolagi mo katene a Etena, ko e parataiso. To moua ai e mafola, fiafia, haohao mitaki, mo e fakalatahaaga fefakaalofaaki he tagata. Kua nakaila kitia he fakamauaga tuai he tagata e ha mena pehenei, ato pule la e Kautu. Ko e kehekehe lahi ha ia ka fakakite he vahaloto he pule kelea he tau afe tau kua mole he tau tagata, mo e pule mitaki lahi he Kautu he Atua he lagi ke he tau afe tau! Ko e pule he Atua he puhala he Kautu hana ka fakakite e tokoluga ue atu ke he tau mena oti. Ko e tonuhia he Atua ke pule, hana pule katoatoa, to fakatokoluga katoatoa.
14. Ko e heigoa ka tupu ki a lautolu ne totoko ka oti e tau afe tau?
14 He matahiku he tau afe tau, to fakaata e Iehova e tau tagata mitaki katoatoa ke fakagahuahua e fifiliaga tokanoa ha lautolu ko hai ka fekafekau ki ai. Ne fakakite he Tohi Tapu to “vevete ai a Satani mai he mena ne puipui ai a ia.” To liu a ia lali ke fakahehe e tau tagata, ti fai ka fifili ke tu tokotaha mai he Atua. Neke ‘tupu mai lagaua e matematekelea,’ to fakamahaikava e Iehova a Satani, tau temoni hana, mo lautolu oti ne totoko ke he pule katoatoa a Iehova. To nakai fai tagata ke talahau, ko e ha tagata ne fakaoti tukumalagi he magaaho ia kua nakai fai fifiliaga po kua hehe a lautolu ha ko e nakai mitaki katoatoa. Nakai, to eke a lautolu ke tuga a Atamu mo Eva ne mitaki katoatoa, ka e fifili pauaki ke totoko ke he pule tututonu a Iehova.—Fakakiteaga 20:7-10; Nahuma 1:9.
15. Ko e heigoa e fakafetuiaga ka moua e lautolu ne loto fakamoli ki a Iehova?
15 Ke he taha fahi, to liga ni tokologa e tagata ka fifili ke fakatokoluga e pule katoatoa a Iehova. He kua fakaotioti a lautolu ne totoko, to tutu a lautolu ne tututonu ki mua a Iehova, he paase mai he kamatamata fakahiku he loto fakamoli. To talia ai e Iehova a lautolu ne loto fakamoli nei mo tau tama tane mo e fifine hana. Ati liu moua e lautolu e fakafetuiaga ne ha ha ia Atamu mo Eva mo e Atua ato totoko a laua. Mogoia, ka fakamoli ai a Roma 8:21: “To toka noa ai e tau mena [tau tagata] ne eke mai he tupaaga ke he mena popo vave kia hoko atu ai ke he tokanoaaga ha ha he monuina he fanau he Atua.” Ne talahau tuai he perofeta ko Isaia: “To fakaoti tukulagi [he Atua] e mate; to holoholo kehe foki he Iki ko Iehova e tau hihina mata mai he tau mata oti.”—Isaia 25:8.
Ko e Amaamanakiaga he Moui Tukulagi
16. Ko e ha kua mitaki ke fakamahino atu ke he palepale he moui tukulagi?
16 Ko e amaamanakiaga homo ue atu ha ia ne tatali ki a lautolu ne tua fakamoli, ke iloa to foaki tukulagi he Atua e tau mena aoga fakaagaga mo e fakatino ki a lautolu! Ne hako e talahauaga he salamo: “Kua fakamafola e koe hāu a lima, mo e fakamakona e manako [mitaki] he tau mena momoui oti.” (Salamo 145:16) Ne fakamafana e Iehova a lautolu he vahega he lalolagi ke moua e amaamanakiaga he moui nei he Parataiso mo vala he tua ha lautolu ki a ia. Pete kua mua atu e aoga he pule katoatoa a Iehova, kua nakai ole e ia e tau tagata ke fekafekau ki a ia ka e nakai fai palepale. He Tohi Tapu katoa, ko e loto fakamoli ke he Atua mo e amaamanakiaga he moui tukulagi kua pipipipi fakalataha mo tau vala ne mua he tua he Kerisiano ke he Atua. “Ko e mena lata ia ia kua fina atu ke he Atua ke talia kua moui a ia, ko ia foki kua taui mai a lautolu kua kumi fakamakutu kia ia.”—Heperu 11:6.
17. Fakakite fefe e Iesu kua mitaki ke fakamalolo he amaamanakiaga ha tautolu?
17 Ne pehe a Iesu: “Ko e moui tukulagi foki hanai, kia iloa e lautolu a koe, ko e Atua moli tokotaha ni, katoa mo ia ne fakafano mai e koe, ko Iesu Keriso haia.” (Ioane 17:3) Hanei ne matutaki e ia e iloa e Atua mo e hana tau finagalo fakalataha mo e palepale ne ta mai he mena nei. Ke fakatai ki ai, he magaaho ne ole e tagata taute kelea ke manatu a ia ka hoko atu a Iesu ke he hana Kautu, ne pehe a Iesu: “To fakalataha a koe mo au i Parataiso.” (Luka 23:43, NW.) Ne nakai tala age a ia a ia ke he tagata ke tua pete ni kua nakai moua e ia e palepale. Iloa e ia nukua manako a Iehova ma e tau fekafekau hana ke moua e amaamanakiaga he moui tukulagi he lalolagi parataiso ke lagomatai a lautolu ke fakamalolo he fehagai mo e tau kamatamata loga he lalolagi nei. Ti, ke fakamahino atu ke he palepale ko e lagomatai kua lata he fakauka ko e Kerisiano.
Ko e Vaha Anoiha he Kautu
18, 19. Ko e heigoa ka tupu ke he Patuiki mo e Kautu he matahiku he Pule Meleniamu?
18 Ha ko e Kautu ko e fakatufono lagomatai ne fakaaoga e Iehova ke ta mai e lalolagi mo e tau tagata ne nonofo ai ke he mitaki katoatoa mo e fakafeilo ki a ia, ko e heigoa mogoia e matagahua ma e Patuiki ko Iesu Keriso mo e tau patuiki mo e tau ekepoa ne 144,000 ka mole e Meleniamu? “Ti hoko ai e fakahikuaga, ka oti he tuku atu e ia e kautu ke he Atua, ko e Matua haia, ka oti he fakaotioti e ia e tau iki ne mua oti kana, mo lautolu gotoa kua pule, mo lautolu kua malolo. Ha ko e mena to pule ni a ia ato tuku e ia hana tau fi oti ki lalo he na ve hana.”—1 Korinito 15:24, 25.
19 He magaaho ka tuku age he Keriso e Kautu ke he Atua, to maama fefe mogoia e tau kupu tohi ne vagahau hagaao ke he Kautu ke tu tukulagi? To tumau tukulagi ni e tau gahua he Kautu. To fakaheke tukulagi a Keriso ha ko e matagahua hana ne taute ke fakatokoluga e pule katoatoa he Atua. Ha kua fakaoti tukumalagi e hala mo e mate, mo e kua laveaki tuai e tau tagata, kua fakaoti mogoia e manako ki a ia ko e Laveaki. To fakakatoatoa foki e Pule Meleniamu he Kautu; ti kua nakai lata ke liu manako ma e fakatufono lagomatai ke tu he vahaloto a Iehova mo e tau tagata omaoma. Ko e mena ia, “kia pule okooko e Atua ke he tau mena oti kana.”—1 Korinito 15:28.
20. Maeke fefe a tautolu ke iloa e vaha anoiha ma Keriso mo e he 144,000?
20 Ko e heigoa e matagahua ha Keriso mo e tau hakega pule hana he vaha anoiha ka mole e fakakatoatoa he Pule Meleniamu? Kua nakai talahau he Tohi Tapu. Ka kua iloa e tautolu to foaki e Iehova ki a lautolu loga e tau kotofaaga he tufugatia katoa hana. Kia fakatokoluga ai e tautolu oti he vaha nei e pule katoatoa ha Iehova mo e moua e moui tukulagi, ti he vaha anoiha, to iloa e tautolu e finagalo ha Iehova ma e Patuiki mo e tau katofia patuiki mo e ekepoa hana, ti pihia foki ke he lalolagi mo e lagi fulufuluola katoatoa!
Tau Matakupu Fakamanatu
• Ko e hikiaga fe he tau pule ne kua tata mai?
• To fakafili fefe he Atua e tau tagata kelea mo e tututonu?
• To fefe e tau tutuaga he lalolagi fou?
• To fakatokoluga katoatoa fefe e pule katoatoa ha Iehova?
[Tau Huhu he Fakaakoaga]
[Fakatino he lau 13]
[Fakatino he lau 15]
‘To liu foki tutu mai a lautolu ne tututonu katoa mo lautolu ne hepehepe’
[Fakatino he lau 16]
To liu moua e lautolu ne loto fakamoli e fakafetuiaga mitaki mo Iehova