No Anto so Gawaen Naani na Panarian na Dios

“Onsabi komon so panarian mo. Nagawa komon so linawam, unong ed tawen, ontan met ed dalin.”​—MATEO 6:10.

1. Anto so kabaliksan na isabi na Panarian na Dios?

 SANEN imbangat nen Jesus iray patumbok to ya ipikasi da so Panarian na Dios, kabat to a diad isabi na satan et mangangga lay nilibolibo lan taon ya uley na too a sian ed Dios. Diad inlabas na amin na satan a panaon, ag-agawa so linawa na Dios ed inkalapagan. (Salmo 147:19, 20) Balet sanen niletneg la so Panarian ed tawen, nagawa la so linawa na Dios ed amin a pasen. Asingsingger lay panaon a makapakelkelaw lan salatan na mangatatawen ya uley na Panarian na Dios so uley na too.

2. Anto la so naimatonan no salatan lay uley na Panarian so uley na too?

² Say naimatonan diad kagawa la na satan a pansalat et samay panaon a tinawag nen Jesus a ‘baleg a kairapan, ya anggapo so ontan a nanlapud gapo na mundo ya angga  ed natan, anggapo, anggapo la naani.’ (Mateo 24:21) Ag-ibabaga na Biblia so kabayag na satan, balet saray desyang a nagawa kaleganan na satan so mas teribli nen say antokaman a naimatonan la ed mundo. Kagapo na baleg a kairapan, walay nagawa a pirmin pakatalagnawan na maslak a totoo diad dalin: say pakaderal na amin a palson relihyon. Aliwa itan a makapatalagnaw ed saray Tastasi nen Jehova, lapud ta abayag da lan tatalaranan itan. (Apocalipsis 17:1, 15-17; 18:1-24) Say baleg a kairapan so mamantok ed Armagedon sano buybuyaken la na Panarian na Dios so intiron sistema nen Satanas.​—Daniel 2:44; Apocalipsis 16:14, 16.

3. Panon so impaneskribe nen Jeremias ed pansumpalan na saray matungangan totoo?

³ Anto so kabaliksan na satan ed saramay totoon ‘agmikabat ed Dios, tan dia ed saramay ag-ontulok ed ebanghelyo’ nipaakar ed mangatatawen a Panarian diad pananguley nen Kristo? (2 Tesalonica 1:6-9) Oniay ibabaga ed sikatayo na propesiya na Biblia: “Nia, say mauges ompaway naani a manlapu ed nasyon angga ed nasyon et sakey a baleg a bagyo so onalagey naani a manlapu ed kasampotan a kabiangan na dalin. Et saray pinatey nen Jehova sikara naani ed satan ya agew manlapu ed sakey a sampot na dalin angga met lanlamang ed sananey a sampot na dalin: ag-ira naani napaney-eyan, tan ag-ira met natipon, no nitabon; sikara naani dutak ed tapew na dalin.”​—Jeremias 25:32, 33.

Say Anggaan na Karelmengan

4. Akin a si Jehova so napaneknekan a matunong no panganggaen to la iyan marelmeng a sistema?

⁴ Inanosan nen Jehova so karelmengan diad loob na nilibo lan taon, a magenap lan tuloy a panaon pian naamtaan na saray maptek-impanpuso a say uley na too et pirmin pakadesyangan. Alimbawa, nikuan ed sakey a report a dia lambengat ed koma-20 siglo et masulok a 150 milyon a totoo so inatey ed guerra, rebolusyon, tan arum niran gulo ed loob na bansa. Say inkaramsak na too so nagkalalo lan anengneng nen Guerra Mundial II sanen inatey so onliligada’d 50 milyon a totoo, a dakel ed sikara so makapasinagem ya inatey diad saray panangipangawan a kampo na Nazi. Unong ya impasakbay la na Biblia, diad panaon tayo et ‘saray totoo a mauges tan saray managsaol inmuges lara’n inmuges.’ (2 Timoteo 3:1-5, 13) Natan et kasmak lay imoralidad, krimen, karawalan, inkauges, tan panangipulisay ed saray estandarte na Dios. Kanian, si Jehova so sigpot a napaneknekan a matunong no panganggaen to la iyan marelmeng a sistema.

5, 6. Deskribien pa so walan karelmengan ed kadaanan a Canaan.

⁵ Say kipapasen natan so mipadpara ed Canaan nen manga 3,500 taon lay apalabas. Inkuan na Biblia: “Amin a makadimla ed kinen Jehova a kagulgula to, ginawa da ra ed saray kinondirios da; ta pati sara ni lalaki ya anak da tan bibii ya anak da a poolan da ra ed apoy a yapay da ed saray kinondirios da.” (Deuteronomio 12:31) Oniay impaamta nen Jehova ed nasyon na Israel: “Lapu ed inkauges na saraya a nasyon, pataynanen ira nen Jehova a Dios mo ed arap mo.” (Deuteronomio 9:5) Oniay kuan na manag-awaran na Biblia a si Henry H. Halley: “Say panagdayew ed si Baal, Ashtoreth, tan arum niran dirios na Canaan so walaan na sankagrabian iran ritual; saray templo ra so sentro na mauges iran agamil.”

⁶ Impabitar nen Halley so inkagrabe na karelmengan da, ta diad sakey ed saray lugar diman, “aromog [na saray arkeologo] so dakerakel a pasig ya akakarga iray pukel na ugugaw ya imbagat ed si Baal.” Inkuanto: “Say intiron pasen so talagan ponponan na saray kapangiyanak ya ugugaw. . . . Saray Canaanita so nandayew, diad imoral a kaalakan, bilang relihyoson ritual da, diad arap na saray dirios da; insan, pinapatey daray panguloan ya ananak da, bilang bagat ed saratan met lanlamang a dirios. Ompatnag a, diad malaklaknab a paraan, say dalin na Canaan so nagmaliw a nengneng na Sodoma tan Gomorra diad intiron nasyon. . . . Manepeg kasin mansiansia so sakey a sibilisasyon a walaan na ontan iran makapagulgulan karutakan tan inkaruksa? . . . Pankelawan na saray arkeologo a nankotkot ed saray deral ed saray syudad na Canaanita no akin ya ag-iran tampol dineral na Dios.”

 Panawir ed Dalin

7, 8. Panon so panlinis na Dios ed dalin?

⁷ Singa ed impanlinis na Dios ed Canaan, magano to lan linisan so intiron dalin tan iter to itan ed saramay manggagaway linawa to. “Say maptek manayam naani dia ed dalin, tan say ayadyari mansiansia naani ed sikato. Balet say marelmeng napegpeg a manlapu ed dalin, tan saray liputan nabagot ira ed sikato.” (Uliran 2:21, 22) Tan inkuan na salmista: “Wala ni so daiset, et say bagel onandi . . . Ingen ta saray mauyamo tawiren da naani dalin: tan manliket ira a dili ed inkadaakan na kareenan.” (Salmo 37:10, 11) Nagalpong met lay Satanas, ta “pian agto la tilaan so saray nasyones, angga ed kasumpal na sanlibon taon.” (Apocalipsis 20:1-3) On, “say mundo mangangga, tan saray penel to: sabalet so mangunor ed linawa na Dios onsiansia lawas.”​—1 Juan 2:17.

⁸ Bilang panegek ed engranden iilaloan na saramay mankaliktan a manbilay na andi-anggaan diad dalin, oniay inkuan nen Jesus: “Mapalar iray mauyamo: ta tawiren day dalin.” (Mateo 5:5) Nayarin tutukoyen to so Salmo 37:29, ya angipasakbay: “Say matunong tawiren to so dalin tan manayam diman lawas.” Kabat nen Jesus a gagala nen Jehova a manbilay ya andi-anggaan iray maptek-impanpuso diad paraison dalin. Oniay inkuan nen Jehova: “Ginawak so mundo,  saray totoo tan saray ayayep a wala ed tapew na dalin, lapu ed baleg a pakayarik . . . ; et sikato naani iter ko ed isipen a maptek ed siak.”​—Jeremias 27:5.

Sakey ya Alay Abig a Balon Mundo

9. Anton klase na mundo so itarya na Panarian na Dios?

⁹ Kayari na Armagedon, itarya na Panarian na Dios so alay abig a ‘balon dalin’ a ‘panayaman na inkatunong.’ (2 Pedro 3:13) Agaylan pakainawaan parad saramay makaliktar ed Armagedon lapud naandi lay maruksa tan marelmeng a sistema na bengabengatla! Agaylay liket da ta onloob ira ed matunong a balon mundo diad silong na mangatatawen a gobiernon Panarian, ya akatadia ed sikara so alay abig iran bendision tan andi-anggaan a bilay!​—Apocalipsis 7:9-17.

10. Antoran mauges a bengatla so aglan balot niwala naani ed silong na uley na Panarian?

¹⁰ Agla naani nasesga so totoo ed guerra, krimen, eras, odino anggan saray masesebeg ya ayayep. “Manggawa ak naani ed [totook] na sakey a sipan na deen, et patundaen ko naani so saray mauges ya ayep ed dalin . . . Et say kiew ed uma mamapaway naani na bunga to, tan say dalin mangiter naani na munat to, et mataletalek ira naani ed dalin da.” “Pitpiten da naani so saray kampilan da a tarem na lukoy, tan saray gayang da a kalkalawit; say nasyon agto naani yayag so kampilan a sumpa ed sananey a nasyon, tan ag-ira met la naani manaral na bakal. Balet onyurong ira naani balang sakey ed silong na kiew to ya ubas tan ed silong na kiew to ya igos; et anggapo naani manaktakot ed sikara.”​—Ezequiel 34:25-28; Miqueas 4:3, 4.

11. Akin a nawalaan itayo na talek a mangangga laray beblay ed pisikal?

¹¹ Say sakit, ermen, tan anggan say ipapatey so naandi la. “Say manaayam agto naani ikuan, Mabeblay ak: saray ombaley a manayam diman napaandi naani inkauges da.” (Isaias 33:24) “Punasen [na Dios] so amin a lua ed kamataan da; tan anggapo la naani ipatey; tan anggapo la naani onnangis o dageyem, o ot-ot: ta saray una a bengatla sikara so linmabas la. . . . Nia, siak gawaen ko a balo so saray amin a bengatla.” (Apocalipsis 21:4, 5) Sanen si Jesus so wadiad dalin, imparungtal to la so abilidad ton manggawa ed  saratan panamegley na pakayarin inter ed sikato na Dios. Lapud tulong na masanton espiritu, si Jesus so linma ed intiron pasen a pinapaabig toray piley tan tinatambal toray mansasakit.​—Mateo 15:30, 31.

12. Anto so ilalo na saray inaatey?

¹² Dakel ni so ginawa nen Jesus. Pinabilay toray inaatey. Panoy inkiwas na saray mapaabeban totoo? Sanen pinaoli to so 12-años a bii, say atateng na ugaw so “nikelkelawan tekep na pirmin panlikliket.” (Marcos 5:42, NW) Sakey met iyan alimbawa no anto so gawaen nen Jesus diad sankadalinan ed silong na uley na Panarian, ta diad satan a panaon et “wala naani kioli ed bilay na saray matunong tan agmatunong.” (Gawa 24:15) Isipen pa so pirmin liket sano mantutumbokan ya ombilay iray inaatey tan miabet ira ed saray inadaro ra’d bilay! Agpanduaruwaan a wala naani so malaklaknab a kimey na panagbangat diad silong na panangiwanwan na Panarian kanian “say dalin napano naani ed pikakabat ed Jehova, singa saray danum sakbongan da so dayat.”​—Isaias 11:9.

Naalangon so Inkasoberano nen Jehova

13. Panon a nipatnag so kaptekan na uley na Dios?

¹³ Diad pansampot na sanlibon taon ya uley na Panarian, say sankatooan so nipawil la ed inkayadyari na kanonotan tan laman. Say dalin so magmaliw a sankagloboan a hardin na Eden, sakey a paraiso. Narapat la naani so deen, liket, seguridad, tan maaron sosyedad na totoo. Anggapo nin balot so anengneng ed awaran na too a mipara ed uley na Panarian. Agaylan dumaruma ed satan so napatnagan ed baetan na akadkauna iran nilibon taon na makapasinagem a pananguley na totoo tan say agaylay abig a pananguley na mangatatawen a Panarian na Dios diad loob na sanlibon taon! Say uley na Dios panamegley na Panarian to so napatnagan naani a sankatalonggaringan ed amin ya aspekto. Say kanepegan na Dios a manuley, say inkasoberano to, so sigpot lan naalangon.

14. Anto so nagawa ed saray rebeldi sano mangangga lay sanlibon taon?

¹⁴ Diad anggaan na sanlibon taon, paagamil nen Jehova ed saray ayadyarin totoo so bulos a pampili ra no siopay labay dan panlingkoran. Ipapabitar na Biblia a “si Satanas nabulos ed inkipangaw to.” Palikdoen to lamet so totoo, ya arum ed saratan so desididon ombeneg ed Dios. Pian napaliisan la ‘so kairapan ya onalagey ed komaduan danay,’ galpongen nen Jehova si Satanas, saray demonyo to, tan saray amin a manrebeldi ed inkasoberano to. Agnikatunongan na siopaman a diad magnayon ya inkaderal na saratan a totoo et agni ra naikdan na pankanawnawa odino akagawa iray mauges lapud ag-ira ayadyari. Andi, mipadpara ira’d si ayadyarin Adan tan Eva, a mabulos a nanrebeldi ed matunong ya uley nen Jehova.​—Apocalipsis 20:7-10; Nahum 1:9.

15. Anton pisisiglaotan ed si Jehova so niwala ed saray matoor?

¹⁵ Diad biek a dapag, nayarin pilien na karaklan ed saray totoo so mangitandoro ed inkasoberano nen Jehova. Diad kada rebeldin nangurat, ontalindeg so matunong ed arap nen Jehova, ya akalabas la’d unor a subok ed katooran. Sarayan matoor so awaten la’d satan nen Jehova bilang ananak ton lalaki tan bibii. Napapawil da la’d satan sirin so pisisiglaotan da ed Dios a singa samay niwala’d di Adan tan Eva sakbay iran nanrebeldi. Kanian, nasumpal ed satan so Roma 8:21: “Say pinalsa a dili niliktar ed inkaaripen na kabulokan ya onloob ed kawayangan na gloria na saray anak na Dios.” Ipapasakbay nen propeta Isaias: “Inakmon [na Dios] so patey ed ando lan ando; et say Katawan a Jehova punasen to naani so saray lua ya onagus ed saray amin a lupa.”​—Isaias 25:8.

Say Ilalo ya Andi-anggaan a Bilay

16. Akin a manepeg so panilalo ed tumang ya andi-anggaan a bilay?

¹⁶ Agaylan abig so ilalo a manatalaran ed saray matoor, a naamtaan dan sikaray magnayon a palaboan na Dios na agnasabsabaan ya espiritual tan materyal iran gungguna! Dugaruga so inkuan na salmista: “Sika buskagen mo so limam, tan peneken mo so saray [manepeg a] pilalek na ami’ bengatlan mabilay.” (Salmo 145:16)  Papasesegen nen Jehova iramay walad mangaraldalin a klase a pansiansiaen da iyan ilalo na bilay diad Paraiso bilang kabiangan na pananisia ra ed sikato. Anggaman mas importanti so isyun nipaakar ed inkasoberano nen Jehova, agto panseserbien so totoo ed sikato ya anggapoy iilaloan dan tumang. Diad intiron Biblia, nantekep so katooran ed Dios tan say ilalo ed andi-anggaan a bilay bilang importantin kabiangan na pananisia na sakey a Kristiano ed Dios. “No anggapo so pananisia agnayarin paliketen [so Dios]: ta say ondago ed Dios nakaukolan a sisiaen to a wala, tan sikato so niiyan a mananumang ed saray mananap ed sikato.”​—Hebreos 11:6.

17. Panon ya impabitar nen Jesus a manepeg so napabiskeg ed ilalo tayo?

¹⁷ Inkuan nen Jesus: “Saya sikato so andi-anggaan a bilay, a naamtaan da ka a saksakey a tuan Dios, tan saman so imbakim, salanti Jesu-Kristo.” (Juan 17:3) Impansiglaotan to so pikakabat ed Dios tan saray gagala To katekep lay tumang a tarok na satan. Bilang alimbawa, sanen inkerew na sakey a managgaway-mauges a sikatoy nodnonoten nen Jesus ed Panarian to, oniay inkuan nen Jesus: “Wala ka ed siak dia ed Paraiso.” (Lucas 23:43) Agto imbaga ed samay laki a manisia labat anggano anggapoy tumang a nagamoran to. Kabat ton kaliktan nen Jehova a nawalaan iray lingkor to na ilalo ya andi-anggaan a bilay diad paraison dalin pian napabiskeg ira no aarapen da so nanduruman subok ed sayan mundo. Kanian, say pampirawat ed satan a tumang so makanan tulong pian makapansungdo so sakey a Kristiano.

Say Arapen na Panarian

18, 19. Anto so nagawa ed Ari tan say Panarian diad anggaan na Milenyon Uley?

¹⁸ Lapud say Panarian et sakey a segundaryon gobierno ya usaren nen Jehova pian nitarok so dalin tan saray manaayam a totoo diad inkayadyari tan makapipulangan ira ed sikato, anto so walan betang nen Arin Jesu-Kristo tan say 144,000 ya arari tan saserdote kayari na milenyo? “Insan onsabi kasampotan, sano iter to so panarian ed Dios tan Ama; sano naekal to la’ra ya ami panag-ari, tan ami pananguley tan pakayari. Ta sikato so nakaukolan a manari, angga ed pakapangiyan to’d saray kabusol to ed silong na saray sali to.”​—1 Corinto 15:24, 25.

¹⁹ Sano say Panarian so ipawil la nen Kristo ed Dios, panon tayon talosan iray kasulatan a manasaglawi ed pansiansia na satan ya andi-anggaan? Saray agawaan na Panarian so mansiansia ed ando lan ando. Si Kristo so magnayon a napagalangan lapud impangiyalangon to ed inkasoberano na Dios. Balet lapud sigpot lan naandi so kasalanan tan patey, tan arondon lay katooan, angangga la so betang to bilang Mananondon. Say Milenyon Uley na Panarian so sigpot met la’d satan ya asumpal; kanian agla nakaukolan a mansiansia ni so sakey a segundaryon gobierno ed baetan nen Jehova tan ed matulok a katooan. Kanian, “say Dios wala ed amin ed ami ganagana.”​—1 Corinto 15:28.

20. Panon tayon naimatonan so arapen a manatalaran ed Kristo tan say 144,000?

²⁰ Anto la naani so betang nen Kristo tan saramay miuley ed sikato diad arapen kayari na Milenyon Uley? Anggapo so ibabaga na Biblia. Ingen ta makaseguro itayon dakel nin pribilihyo na serbisyo so iter nen Jehova ed sikara diad intiron palsa to. Komon ta amin tayo natan so mangitandoro ed inkasoberano nen Jehova tan napagamoran itayo na andi-anggaan a bilay ta pian diad arapen et mabilay itayon makaimaton ed gagala ni nen Jehova ed say Ari tan saray kaiba ton arari tan saserdote, ontan met ed intiron makapakelkelaw ya uniberso to!

Saray Punton Repasoen

• Anton pansalat ed pananguley so asingger tayon lan naimatonan?

• Panon so pangukom na Dios ed marelmeng tan matunong?

• Antoran kipapasen so niwala naani diad balon mundo?

• Panon lan sigpot a naalangon so inkasoberano nen Jehova?

[Tepetepet Parad Panagaral]

[Saray litrato ed pahina 17]

“Wala naani kioli ed bilay na saray matunong tan agmatunong”

[Litrato ed pahina 18]

Makapawil iray matoor ed suston pisisiglaotan da ed si Jehova