Samting Kingdom Bilong God Bae Duim
Samting Kingdom Bilong God Bae Duim
“Letem kingdom bilong iu kam. Letem will bilong iu kamap long earth, olsem long heven.”—MATTHEW 6:10.
1. Wanem nao kakam bilong Kingdom bilong God bae minim?
TAEM Jesus lanem olketa follower bilong hem for prea for Kingdom bilong God, hem savve kakam bilong datwan bae finisim planti thousand year bilong independent rul bilong man from God. Long evri year hia, will bilong God no kamap evribit long earth. (Psalm 147:19, 20) Bat bihaen Kingdom hem start for rul long heven, will bilong God bae kamap long evri ples. Taem for nambawan wei wea rul bilong Kingdom bilong God long heven hem changem rul bilong man hem klosap tumas.
2. Wanem nao bae markem change from rul bilong man go long rul bilong Kingdom?
2 Samting wea bae markem disfala change nao hem wanfala sekson bilong taem wea Jesus kolem “bigfala trabol bae kamap wea nating happen bifor from taem world hem start kam kasem distaem, and hem bae no happen moa.” (Matthew 24:21) Bible no talem hao long nao datfala sekson bilong taem, bat olketa trabol wea happen insaed datfala taem bae nogud winim eni samting wea world lukim. Long start bilong datfala big trabol, samting bae happen wea mekem planti pipol long earth seke fogud: evri giaman religion bae finis evribit. Datwan bae no mekem Olketa Jehovah’s Witness seke, bikos olketa weitim for longtaem finis. (Revelation 17:1, 15-17; 18:1-24) End bilong datfala big trabol hem long Armageddon taem Kingdom bilong God pisisim full system bilong Satan.—Daniel 2:44; Revelation 16:14, 16.
3. Hao nao Jeremiah storyim samting wea bae kasem olketa wea no obey?
3 Wanem nao diswan bae minim for pipol “wea no savve long God and olketa wea no obeyim gud nius” abaotem Kingdom bilong hem long heven wea Christ rulim? (2 Thessalonians 1:6-9) Profesi bilong Bible talem iumi: “Lukim! Wanfala trabol hem go aot from wanfala nation go kasem narafala nation, and wanfala bigfala wind bae kamap long farawe ples long earth and go raon long evri part bilong earth. And olketa wea Jehovah killim dae bae start long wanfala saed bilong earth go kasem narafala saed. Pipol bae no krae for olketa and bae no hipimap or berem olketa tu. Olketa bae kamap olsem siti long graon.”—Jeremiah 25:32, 33.
End Bilong Wicked Fasin
4. Why nao Jehovah garem gud reason for finisim disfala wicked system?
4 For planti thousand year, Jehovah God letem wicked fasin go ahed, hem letem mekem olketa wea garem stretfala heart lukim hao rul bilong man hem iusles. Olsem example, wanfala buk sei long mek-20 century nomoa, winim 150 million pipol dae long olketa war, faet, and narafala raoa bilong kantri. Wei wea man hem raf tumas barava showaot long World War II taem samting olsem 50 million pipol dae, and planti long olketa dae long barava nogud wei insaed olketa Nazi concentration camp. Olsem Bible profesi talem, long taem bilong iumi ‘olketa wicked man and man for giaman kamap worse.’ (2 Timothy 3:1-5, 13) Distaem, dirty fasin, criminal fasin, raf fasin, raverave fasin, and wei for lukdaonem olketa mark bilong God hem big tumas. So, Jehovah hem garem barava gud reason for finisim disfala wicked system.
5, 6. Storyim wicked fasin wea stap long Canaan bifor.
5 Living distaem hem klosap semsem witim living long Canaan long samting olsem 3,500 year go finis. Bible hem sei: “Evri nogud samting wea Jehovah heitim olketa duim long god bilong olketa, olketa bonem tu son and dota bilong olketa evritaem insaed fire for god bilong olketa.” (Deuteronomy 12:31) Jehovah talem datfala nation bilong Israel: “Hem from wicked fasin bilong olketa nation hia nao Jehovah God bilong iu hem aotem olketa front long iu.” (Deuteronomy 9:5) Man for raetem history bilong Bible Henry H. Halley hem sei olsem: “Wei for worshipim Baal, Ashtoreth, and olketa narafala god bilong Canaan hem join witim olketa barava wild party; olketa temple bilong olketa hem main ples bilong dirty fasin.”
6 Halley talemaot hao wicked fasin bilong olketa barava kamap nogud tumas, bikos long wanfala long olketa area olsem, pipol wea studyim old samting “faendem staka botol wea garem asis bilong olketa pikinini wea olketa sakrifaesim long Baal.” Hem sei: “Datfala full area hem wanfala beregraon for olketa baby wea just born. . . . Pipol bilong Canaan worship, long wei for duim bigfala dirty fasin, olsem part long worship, front long olketa god bilong olketa; and then, long wei for killim dae olketa firstborn pikinini bilong olketa, olsem wanfala sakrifaes long olketa sem god hia. Hem luk olsem, long bigfala wei, land bilong Canaan hem kamap olsem Sodom and Gomorrah long full kantri. . . . Waswe, ples wea garem kaen living olsem wea barava dirty and raf tumas hem fit for go ahed for stap? . . . Olketa man wea studyim oldfala samting long olketa taon bilong Canaan bifor no savve why nao God no finisim evribit disfala taon kwiktaem.”
Kasem Earth
7, 8. Hao nao God bae klinim earth?
7 Olsem God klinim Canaan, klosap nao hem bae klinim full earth and givim long olketa wea duim will bilong hem. “Olketa wea raeteous bae stap long earth, and olketa wea no garem blame bae stap long hem. Bat olketa wicked pipol, olketa bae finis evribit from earth.” (Proverbs 2:21, 22) And man wea raetem Psalm sei olsem: “Lelebet taem nomoa, and wicked wan bae finis . . . Bat olketa wea garem kwaet fasin bae kasem earth, and olketa bae hapi tumas long bigfala peace.” (Psalm 37:10, 11) Satan tu bae no stap, mekem “hem no savve giamanim olketa nation moa go kasem taem datfala thousand year hem finis.” (Revelation 20:1-3) Tru nao, “world hem redy for finis and evri samting wea hem wantem tu, bat man wea duim will bilong God bae stap olowe.”—1 John 2:17.
8 Taem hem storyim nambawan hope for olketa wea laek for laef olowe long earth, Jesus hem sei: “Hapi nao olketa wea garem kwaet fasin, from olketa bae kasem earth.” (Matthew 5:5) Maet hem storyim Psalm 37:29, wea talem profesi olsem: “Olketa raeteous wan seleva bae kasem earth, and olketa bae stap olowe long hem.” Jesus savve hem purpose bilong Jehovah for olketa wea garem stretfala heart for laef olowe long wanfala paradaes earth. Jehovah sei: “Miseleva mekem earth, olketa man and animal wea stap antap long earth from bigfala paoa bilong mi . . . , and mi givim diswan long man wea pruvim hem stret long eye bilong mi.”—Jeremiah 27:5.
Wanfala Nambawan Niu World
9. Wanem kaen world nao Kingdom bilong God bae mekem kamap?
9 Bihaen long Armageddon, Kingdom bilong God bae mekem wanfala nambawan “niu earth” kamap wea “raeteous fasin bae stap.” (2 Peter 3:13) Olketa wea winim Armageddon bae hapi tumas for lukim end bilong disfala wicked system wea raf tumas! Olketa bae hapi tumas for go insaed long raeteous niu world anda long Kingdom gavman bilong heven, witim hope for olketa nambawan blessing and laef olowe!—Revelation 7:9-17.
10. Wanem nogud samting nao bae no stap moa anda long rul bilong Kingdom?
10 Pipol bae no stap moa long danger bilong war, criminal fasin, hangre, or animal wea savve killim man tu. “Mi bae mekem wanfala covenant bilong peace witim [pipol bilong mi], and mi bae mekem wild animal wea savve spoelem man for no stap long land . . . And tree bilong field mas garem frut, and land seleva mas givim harvest bilong hem, and olketa bae stap sef long graon bilong olketa.” “Olketa mas hammerim sword bilong olketa for kamap hou, and spia bilong olketa for kamap naef for katem tree. Olketa bae no iusim sword, nation againstim nation, and bae olketa no lanem war moa. And olketa bae sidaon, evriwan anda long vine bilong hem and anda long fig tree bilong hem, and no eniwan bae mekem olketa seksek.”—Ezekiel 34:25-28; Micah 4:3, 4.
11. Why nao iumi sure olketa sik long body bae finis?
11 Sik, sorre, and dae tu bae finis. “No eniwan bae sei: ‘Mi sik.’ Pipol wea stap long datfala land hem olketa wea kamap free from sin bilong olketa.” (Isaiah 33:24) “[God] bae aotem evri wata from eye bilong olketa, and dae bae nomoa, sorre and krae and pain bae nomoa tu. Evri samting bifor hem finis nao. . . . ‘Lukim! Mi bae mekem evri samting kamap niu.’” (Revelation 21:4, 5) Taem hem stap long earth, Jesus showimaot wei wea hem savve duim olketa samting hia witim paoa wea God givim long hem. Witim saport bilong holy spirit, Jesus go long planti ples and healim olketa wea cripple and sik.—Matthew 15:30, 31.
12. Wanem hope nao stap for olketa wea dae finis?
12 Jesus duim moa samting tu. Hem resurrectim olketa wea dae finis. Diswan affectim hambol pipol long wanem wei? Taem hem resurrectim wanfala girl wea 12 year, dadi and mami bilong girl hia “barava hapi tumas.” (Mark 5:42) Datwan hem nara example bilong wanem Jesus bae duim evriwea long earth anda long rul bilong Kingdom, bikos long datfala taem “wanfala resurrection bae kamap for olketa wea raeteous and wea no raeteous.” (Acts 24:15) Tingim barava bigfala hapi taem wanfala grup bihaenem nara grup olketa laef bak and meetim moa olketa wea lovem them! Luk olsem, bigfala education waka bae kamap anda long datfala Kingdom mekem “earth bae fulap witim savve bilong Jehovah olsem wata hem kavarem sea.”—Isaiah 11:9.
Vindicatem Olmaeti Rul Bilong Jehovah
13. Hao nao wei wea God fit for rul bae showaot?
13 Kasem end bilong thousand year wea Kingdom hem rul, famili bilong olketa man bae kasem bak finis wei for perfect long mind and body. Full earth bae hem wanfala garden bilong Eden, wanfala paradaes. Peace, hapi, sef living, and loving community bilong olketa man bae stap. No enitaem long history bilong olketa man Kingdom rul olsem hem stap. Hem bae difren tumas sapos iumi markem olketa thousand year bifor wea olketa man rul long nogud wei witim nambawan thousand year rul bilong Kingdom bilong God long heven! Evri samting bae showimaot klia hao rul bilong God thru long Kingdom bilong hem moa hae long evri wei. Diswan bae vindicatem evribit wei wea God fit for rul, olmaeti rul bilong hem.
14. Wanem nao bae happen long olketa wea bighed long end bilong datfala thousand year?
14 Long end bilong datfala thousand year, Jehovah bae letem olketa perfect man for iusim free will bilong olketa for chusim hu nao olketa laek for servem. Bible hem sei “Satan bae aot from prison bilong hem.” Hem bae trae moa for giamanim olketa man, and samfala bae chus for independent from God. For stopem ‘safa for kamap mek-tu taem,’ Jehovah bae finisim evribit Satan, olketa demon bilong hem, and evriwan wea againstim olmaeti rul bilong Jehovah. No eniwan savve komplen for sei eni man wea finis for olowe long datfala taem no garem eni chance or hem followim rong gogo from wei for no perfect. Nomoa nao, olketa bae olsem Adam and Eve wea perfect, wea willing for chus for bighed againstim raeteous rul bilong Jehovah.—Revelation 20:7-10; Nahum 1:9.
15. Wanem wei for fren nao olketa loyal wan bae garem witim Jehovah?
15 Long narasaed, maet klosap evriwan bae chus for saportim olmaeti rul bilong Jehovah. From evriwan wea bighed dae finis, olketa wea raeteous bae standap front long Jehovah, olketa pasim finis lastfala test bilong loyal fasin. Jehovah acceptim olketa loyal wan hia olsem olketa son and dota bilong hem. So olketa kasem moa wei for fren witim God wea Adam and Eve garem bifor tufala bighed. So, Romans 8:21 bae fulfill nao: “Creation seleva tu [olketa man] bae kamap free from slave bilong wei for rotten and kasem nambawan freedom olsem olketa pikinini bilong God.” Profet Isaiah talem profesi olsem: “[God] bae finisim dae evribit, and Sovereign Lord Jehovah bae aotem evri krae from evri feis.”—Isaiah 25:8.
Hope Bilong Laef Olowe
16. Why nao hem stret for luk forward long reward bilong laef olowe?
16 Nambawan hope stap for olketa faithful wan, for savve hao God bae givim olketa gudfala spiritual and material samting for olowe! Man wea raetem Psalm hem sei: “Iu openem hand bilong iu and satisfaem [gudfala] want bilong evri samting wea laef.” (Psalm 145:16) Jehovah encouragem sekson wea bae stap long earth for garem disfala hope bilong laef insaed Paradaes olsem part long faith bilong olketa long hem. Nomata kwestin abaotem olmaeti rul bilong hem moa important, hem no askem pipol for servem hem and no garem hope for kasem reward. Insaed long Bible, loyal fasin long God and hope for laef olowe hem barava join tugeta olsem important part long faith long God wea Christian hem garem. “Man wea kam long God mas biliv hem stap and hem kamap man wea givim reward long olketa wea barava lukaotem hem.”—Hebrews 11:6.
17. Hao nao Jesus showimaot hem stret for kasem strong from hope bilong iumi?
17 Jesus hem sei: “Diswan nao minim laef olowe, for olketa kasem savve long iu, only trufala God, and abaotem datwan wea iu sendem kam, Jesus Christ.” (John 17:3) Long hia hem joinim wei for savve long God and olketa purpose bilong hem witim reward bilong diswan. Olsem wanfala example, taem wanfala criminal askem Jesus for tingim hem taem hem kasem Kingdom bilong hem, Jesus sei: “Iu bae stap witim mi long Paradaes.” (Luke 23:43) Hem no talem datfala man for garem faith nomata sapos hem no kasem wanfala reward. Hem savve Jehovah laekem olketa servant bilong hem for garem hope bilong laef olowe long wanfala paradaes earth for helpem olketa taem olketa kasem difren test insaed disfala world. From diswan, wei for luk forward long reward hem important for helpem Christian go ahed strong.
Future Bilong Kingdom
18, 19. Wanem nao bae happen long King and Kingdom long end bilong Thousand Year Rul?
18 From Kingdom hem wanfala mek-tu gavman wea Jehovah iusim for mekem earth and olketa man insaed kamap perfect and fren bak moa witim hem, wanem waka nao King Jesus Christ and 144,000 king and priest bae duim bihaen long datfala Thousand Year Rul? “Then, long end, taem hem givim go kingdom long God and Father bilong hem, taem hem mekem kamap olsem samting nating evri gavman and evri rul and paoa. From hem mas rul olsem king go kasem taem wea God putim olketa enemy anda long leg bilong hem.”—1 Corinthians 15:24, 25.
19 Taem Christ givim bak Kingdom long God, hao nao bae iumi minim olketa scripture wea sei hem for olowe? Olketa samting wea Kingdom duim bae stap for olowe. Christ bae kasem honor for olowe bikos long samting wea hem duim for vindicatem olmaeti rul bilong God. Bat bikos sin and dae finis evribit, and hem baem bak olketa man finis, need for hem olsem Man for baem bak hem nomoa nao. Thousand Year Rul bilong datfala Kingdom bae fulfill evribit; so no eni need moa for wanfala mek-tu gavman stap midolwan Jehovah and olketa man wea obey. So, “God mas kamap evri samting long evriwan.”—1 Corinthians 15:28.
20. Hao nao iumi savve faendemaot wanem nao bae happen long future for Christ and 144,000?
20 Wanem future waka nao Christ and olketa wea rul witim hem bae garem bihaen Thousand Year Rul hem finis? Bible no talem. Nomata olsem, iumi sure Jehovah bae givim olketa planti moa privilege bilong service long creation bilong hem. Letem iumi evriwan distaem saportim olmaeti rul bilong Jehovah and kasem laef olowe, mekem long future, iumi bae laef for faendemaot wanem nao purpose bilong Jehovah for datfala King and olketa nara king and priest, and tu for full universe bilong hem!
Olketa Point for Review
• Wanem change long rul nao iumi klosap kasem?
• Hao nao God bae judgem olketa wea wicked and olketa wea raeteous?
• Wanem living nao bae stap long niu world?
• Hao nao for vindicatem evribit olmaeti rul bilong Jehovah?
[Olketa Kwestin]
[Piksa long page 17]
“Wanfala resurrection bae kamap for olketa wea raeteous and wea no raeteous”
[Piksa long page 18]
Olketa wea loyal bae kasem bak gudfala wei for fren witim Jehovah