Ye so Royaume ti Nzapa Ayeke Sala Ande
Ye so Royaume ti Nzapa Ayeke Sala Ande
“Zia royaume ti mo aga! Zia a sala na sese ye so bê ti mo aye legeoko tongana a sala ni na yayu!”—MATTHIEU 6:10, NW.
NA NGOI so Jésus afa na adisciple ti lo ti sambela teti Royaume ti Nzapa, lo hinga so gango ti Royaume ni ayeke hunzi komandema so azo asala teti angu saki mingi nde na Nzapa. Na ngoi ni so kue, azo mingi pepe asala na ndo sese ye so bê ti Nzapa aye. (Psaume 147:19, 20) Me, na peko ti ziango Royaume na yayu, fade a yeke sala ye so bê ti Nzapa aye na ndo kue. Ngoi ti gbiango ye ti mbito ni, ti londo na komandema ti azo ti si na Royaume ti Nzapa na yayu, ayeke ndulu mingi ti si.
2 Fä ti gbiango ye so ayeke duti ande ngoi so Jésus ahiri ni ‘kota ye ti vundu so ade aga pepe a to nda ni na ngoi so a sala sese juska fadeso, na fade ye tongaso alingbi ti si mbeni lâ oko pepe.” (Matthieu 24:21, NW) Bible afa pepe ngoi oke ye so ayeke ninga, me aye ti ngangu so ayeke si ande na ngoi ni so ayeke duti sioni mingi ahon ye kue so sese aba kozoni. Na tongo nda ti kota ye ti vundu, mbeni ye ayeke si ande so ayeke yengi azo ti sese ngangu mingi: a yeke futingo ti alege ti vorongo ti wataka kue. Me singo ti ye so ayeke yengi pepe aTémoin ti Jéhovah, teti ala ku ni kungo kozo ni. (Apocalypse 17:1, 15-17; 18:1-24) Kota ye ti vundu ayeke hunzi na Har–Maguédôn tongana Royaume ti Nzapa aneka bungbi ti aye kue ti Satan.—Daniel 2:44; Apocalypse 16:14, 16.
3 So aye ti tene nyen teti “azo so ahinga Nzapa pepe, na ala so ake ti mä Tene-nzoni” na ndo Royaume ti yayu so ayeke na tïtî Christ? (2 aThessalonicien 1:6-9) Prophétie ti Bible atene na e: “L’Eternel Ti Sabaoth atene tongaso, Ba, fade sioye asi na mara oko si a hon na mbeni mara, na fade kota gingisale alondo na nda ti sese. Na lâ ni kâ, fade kuâ ti azo so L’Eternel afâ ala ayeke na mbage oko ti sese juska na mbeni mbage ni; fade a toto kuâ ti ala pepe, wala a bungbi kuâ ni pepe, wala a lu ala pepe; fade ala ga tongana puru na ndo lê ti sese.”—Jérémie 25:32, 33.
Hunzingo ti Sioye
4 Teti angu saki mingi, Jéhovah Nzapa azia lege na sioye teti angu mingi si azo so bê ti ala ayeke mbilimbili alingbi ti ba so komandema ti azo ayeke lingu ti kota kpale. Na tapande, mbeni tondo afa so, gi na yâ siècle 20 ni, a fâ azo ahon kutu 150 na yâ abira, akengo yanga-ti-komande, na ambeni wusuwusu na popo ti azo. A ba mbilimbili sioye ti azo na yâ Use Bira so Amu Sese Kue so na yâ ni a fâ azo kutu 50, na mingi ti ala awara kuâ ti ngangu na yâ akando ti sana ti aNazi. Tongana ti so Bible afa kozoni, na ngoi ti e “azo ti sioni na azo ti handa ayeke ga gi sioni ahon.” (2 Timothée 3:1-5, 13, NW) Laso, ye ti pitan, kengo ndia, salango ngangu, ye so abuba, na bango na nene ni pepe akpengba ndia ti nzoni tambela ti Nzapa amu ndo kue. Tongaso, a yeke na lege ni kue teti Jéhovah ti futi bungbi ti aye ti sioni ti laso.
5 Ye so asi laso ayeke legeoko na ti so ayeke na kodoro ti Canaan a sala ndulu na angu 3 500 awe. Mbeti ti Nzapa atene: “Ye kue so L’Eternel ake, ye so ayeke sioni mingi na lê ti Lo, ala sala ye so na anzapa ti ala; ala zö amolenge ti ala ti koli na amolenge ti ala ti wali na wâ teti anzapa ti ala.” (Deutéronome 12:31) Jéhovah atene na mara ti Israël: “A yeke ngbanga ti siokpari ti amara so, si L’Eternel Nzapa ti mo atomba ala na gbele mo.” (Deutéronome 9:5) Wasungo mbaï ti Bible Henry H. Halley atene: “A voro giriri Baal, Aschtoreth, nga na ambeni nzapa ti Canaan na lege ti apumba ti kirikiri mingi; atemple ti ala ayeke la ni akota ndo ti salango ye ti kirikiri mingi.”
6 Halley afa tongana nyen sioye ti ala aga kota mingi, teti na yâ mbeni oko ti ando so, awasenda-mbeso “awara akete ta mingi so na yâ ni abio ti aforoto so amu ala na sadaka ayeke dä.” Lo tene: “Ndo ni kue aga gi mbeni cimetière teti aforoto. . . . Azo ti Canaan ayeke voro anzapa ti ala na salango aye ti pitan mingi, tongana mbeni ngobo ti salango ye ti lege ti vorongo, na gbele anzapa ti ala; nga na pekoni, na fango akozo molenge ti ala, tongana asadaka na a-oko nzapa so. A lingbi ti tene so, na yâ aye mingi, kodoro ti Canaan kue aga tongana mbeni Sodome na Gomorrhe. . . . Mbeni lege ti dutingo ti azo, so afuti na asala ye na ngangu mingi tongaso alingbi la ni biani ti ngbâ? . . . Awasenda-mbeso so agi ye na yâ ye so angbâ na peko ti agbata ti Canaan ahunda tele ti ala ngbanga ti nyen Nzapa afuti ala hio kozoni pepe na ti so Lo sala.”
Warango Sese Tongana Ye ti Héritier
7 Legeoko tongana ti so Nzapa asukula giriri Canaan, na yâ ngoi kete, fade lo yeke sukula sese kue na lo yeke mu ni na ala so ayeke sala ye so bê ti lo aye. “Teti azo so asala ye mbilimbili ayeke ala so ayeke duti ande na ndo sese, nga ala so tene ayeke na li ti ala pepe ayeke ala so ayeke ngbâ ande na ndo ni. Ti azo ti sioni, fade alungula ala na sese.” (aProverbe 2:21, 22, NW) Na mbage, wasungo Psaume atene: “A ngbâ ngoi kete, na fade zo ti sioni ayeke mbeni pepe; . . . Me fade azo ti tâ be-ti-molenge awara sese, na biani fade ala wara kota ngia na yâ ti siriri so asi singo.” (Psaume 37:10, 11) Nga a yeke lungula Satan, ti tene “lo lingbi handa amara mbeni pepe juska angu saki oko ni ahunzi.” (Apocalypse 20:1-3, NW) Biani, “sese ni ayeke hon, na nzala ni nga, me zo so asala ye so bê ti Nzapa aye, lo ngbâ lakue lakue.”—1 Jean 2:17.
8 Na fango peko ti kota beku ti ala so aye ti wara fini teti lakue lakue na ndo sese na ndulu tene, Jésus atene: “Ngia ayeke na azo so ayeke na tâ be-ti-molenge, teti fade sese so aga ye ti héritier ti ala.” (Matthieu 5:5) Peut-être lo yeke bi bê la ni na Psaume 37:29, so atene kozoni: “Sese ni aga ye ti héritier ti azo ti mbilimbili, na fade ala duti dä lakue.” Jésus ahinga la ni so a yeke na yâ ye so Jéhovah aleke ti sala ti wara teti lakue lakue na ndo sese so aga paradis azo so bê ti ala ayeke mbilimbili. Jéhovah atene: “Na lege ti kota ngangu ti Mbi, . . . Mbi sala sese, na azo na anyama so ayeke na ndo lê ti sese; na Mbi mu ye so na zo so bê ti Mbi aye ti mu ye na lo.”—Jérémie 27:5.
Mbeni Pendere Fini Sese
9 Na peko ti Har–Maguédôn, fade Royaume ti Nzapa ayeke ga na mbeni pendere “sese ti fini” so “mbilimbili aduti na yâ ni.” (2 Pierre 3:13) So tâ kota ye ti dengo bê si a yeke duti ande teti ala so asö fini ti ala na Har–Maguédôn ti tene a zi ala na yâ sioni bungbi ti aye ti Satan so ayeke sala ngangu na ndo azo! So tâ ye ti mungo ngia teti ala ti lï na fini sese ti mbilimbili na gbe ti komandema ti Royaume ti yayu, na apendere deba nzoni nga na fini ti lakue lakue na gbele ala!—Apocalypse 7:9-17.
10. Asioni ye wa ayeke duti ande mbeni pepe na gbe ti komandema ti Royaume?
10 Fade bira, kengo ndia, nzala, wala même asioni nyama ayeke sala mbito na azo mbeni pepe. “Fade Mbi te mbele ti siriri na [azo ti mbi], na Mbi sala si anyama ti sioni awe na sese ni. . . . Fade keke ti yaka alë le-keke, na sese alë le-kobe, na fade ala duti na siriri na sese ti ala.” “Fade ala pika épée ti ala si a ga soc, na likongo ti ala si a ga zeme ti fâ tikeke; fade mara ayä épée na tele ti mbeni mara pepe, na ala manda ti sala bira mbeni pepe. Fade azo oko oko kue aduti na gbe ti vigne ti ala mveni, na gbe ti keke ti figue ti ala mveni; zo oko ti mu mbito na ala ayeke pepe.”—Ezéchiel 34:25-28; Michée 4:3, 4.
11. Ngbanga ti nyen e lingbi ti hinga na bê kue so fade akpale na lege ti mitele ayeke hunzi?
11 Fade a yeke lungula biani kobela, vundu, na même kuâ. “Fade mbeni wakodoro oko atene pepe: ‘Tele ti mbi aso.’ Fade a mu pardon na sioni ti azo so alango na kodoro ni.” (Esaïe 33:24, NW) ‘Fade [Nzapa] ambô ngule kue na lê ti ala, na fade kui ayeke mbeni pepe, fade mua wala wuluwulu wala pasi ayeke mbeni pepe. Angbele ye ahon awe. . . . ‘Ba! Mbi yeke sala ye kue fini.’” (Apocalypse 21:4, 5, NW) Na ngoi so lo yeke na sese, Jésus afa na gigi ngangu ti lo ti sala aye so na lege ti ngangu so Nzapa amu na lo. Na lege ti ngangu ti yingo ti nzoni-kue, Jésus ague na yâ kodoro ni na mungo sava ti tele na azo so azin nga na azo ti kobela.—Matthieu 15:30, 31.
12. Beku wa ayeke teti azo so akui awe?
12 Jésus asala même ahon so. Lo zingo akuâ. Tongana nyen azo ti tâ be-ti-molenge aba ni? Tongana lo yä mbeni molenge ti wali ti ngu 12 na popo ti awakinda, ‘bê ti ababâ na mama ti lo adö mingi mingi.’ (Marc 5:42) Ye so ayeke la ni mbeni fä nde ti ye so Jésus ayeke sala ande na ndo sese kue na gbe ti komandema ti Royaume, teti na lâ ni kâ fade “londongo ti awakinda kue, azo ti mbilimbili, na azo ti kirikiri” ayeke duti dä. (Kusala 24:15) Bi bê kete na ndo ye ti dongo bê mingi mingi so ayeke duti ande tongana abungbi ti azo na peko ti tele ayeke londo na fini ti kiri ti duti na azo so ala ndoye ala! Kite ayeke pepe so fade kota kusala ti fango ye ayeke duti ande dä na gbe ti bango ndo ti Royaume tongaso si na nda ni “sese asi singo biani na hingango ye ti Jéhovah tongana ti so ngu ahon ndo ti ngu-ingo kue.”—Esaïe 11:9, NW.
A Fa na Gigi Mbilimbili ti Kota Yanga-ti-komande ti Jéhovah
13. Tongana nyen a yeke fa so komandema ti Nzapa ayeke na tâ lege ni?
13 Na nda ti komandema ti ngu saki oko ti Royaume, fade sewa ti azo ayeke kiri ti wara mbilimbili-kue ti bibe na ti tele. Fade sese kue ayeke ga mbeni kota yaka ti Éden, mbeni paradis. Na ngoi ni kâ, a yeke wara ande siriri, tâ ngia, nzoni dutingo, na mbeni bungbi ti azo na yâ ndoye. Dutingo ti azo kozoni na komandema ti Royaume aduti tongaso lâ oko pepe. So tâ kota kangbi si a yeke fa ande tongaso na gigi na popo ti kozo sioni komandema so azo asala teti angu saki mingi awe, na pendere komandema ti ngu saki oko ti Royaume ti Nzapa na yayu! A yeke fa ande na gigi polele so komandema ti Nzapa na lege ti Royaume ti lo ayeke kota mingi ahon na yâ ye kue. Fade a yeke fa na gigi polele mbilimbili ti ngangu ti Nzapa ti komande wala ti kota yanga-ti-komande ti lo.
14. Ye nyen ayeke si ande na azo ti kpengba-li tongana ngu saki oko ahunzi?
14 Na nda ti komandema ti ngu saki oko, fade Jéhovah ayeke zia lege na azo ti mbilimbili-kue na sese ti sala kusala na ngangu ti ala ti soro ye so bê ti ala aye ti soro zo wa ala ye ti sala na lo. Bible afa so “fade a yeke zi ande Satan na yâ da ti kanga ti lo.” Fade lo yeke kiri ti gi lege ti handa azo, na ambeni na popo ti azo ayeke soro ti mu lege ti bê ti ala nde na Nzapa. Ti kanga lege na vundu ‘ti londo lege use,’ fade Jéhovah ayeke futi Satan, adémon ti lo, na azo kue so ake kota yanga-ti-komande ti Lo. Fade zo oko alingbi ande pepe ti tene so azo so a futi ala teti lakue lakue na ngoi ni so awara la ni pasa pepe wala so sioni tambela ti ala alondo na dutingo ti ala so ayeke mbilimbili-kue pepe. Oko pepe, ala yeke duti ande tongana Adam na Ève so ayeke mbilimbili-kue me so asoro ti ke komandema ti mbilimbili ti Jéhovah.—Apocalypse 20:7-10, NW; Nahum 1:9.
15. Mara ti songo wa azo ti be-biani ayeke duti ande na ni na Jéhovah?
15 Na mbeni mbage nde, peut-être mingi ti azo ni ayeke soro ande ti mu mbage ti kota yanga-ti-komande ti Jéhovah. Tongana a futi azo ti kengo yanga kue, fade azo ti mbilimbili ayeke luti na gbele Jéhovah, tongana azo so ahon awe ndangba tara ti dutingo be-biani. Fade Jéhovah ayeke yeda na azo ti be-biani so tongana amolenge ti lo ti koli na ti wali. Tongaso, ala yeke kiri na songo so Adam na Ève ayeke la ni na ni na Nzapa kozoni si ala ke yanga. Tongaso, aRomain 8:21 ayeke ga tâ tene: “Création mveni [azo] aku si A zi lo na yâ ye ti futi so asala lo na ngba, na A zia lo na yâ liberté ti gloire ti amolenge ti Nzapa.” Prophète Isaïe atene kozoni: ‘[Nzapa] ahunzi kui teti lakue lakue; fade Seigneur L’Eternel ambô ngule na lê ti azo kue.’—Esaïe 25:8.
Beku ti Fini ti Lakue Lakue
16. Ngbanga ti nyen a yeke na lege ni ti ku na ngia ti wara futa ti fini ti lakue lakue?
16 So tâ pendere beku si ayeke ku abe-ta-zo, ti hinga so Nzapa ayeke tuku ande na ndo ala gbâ ti adeba nzoni ti yingo na ti mitele teti lakue lakue! A yeke na lege ni si wasungo psaume atene: “Mo lungula maboko ti mo na mo kaï [tâ] nzala ti ye kue so ayeke na fini.” (Psaume 145:16, NW) Jéhovah awa ala so ayeke na beku ti ngbâ na sese ti ba zendo ti fini na yâ Paradis so tongana mbage ti mabe ti ala na lo. Atä so tene ti kota yanga-ti-komande ti Jéhovah ayeke nene ye mingi ahon, lo hunda pepe na azo ti sala na lo na dutingo pepe na beku ti wara futa. Na yâ alembeti ti Bible, dutingo be-biani na Nzapa nga beku ti fini ti lakue lakue abungbi tele oko tongana akota mbage ti mabe ti Chrétien na Nzapa. “Zo so aga ndulu na Nzapa, a yeke ngbanga ti lo ti mä na bê so Nzapa ayeke, na lo yeke zo ti futa ye na ala so agi lo na bê ti ala kue.”—aHébreu 11:6, NW.
17. Tongana nyen Jésus afa so a yeke na lege ni ti tene beku ti e amu maboko na e?
17 Jésus atene: “So ayeke fini ti lakue lakue: ti tene ala manda ti hinga mo, oko tâ Nzapa, na lo so mo to lo, Jésus Christ.” (Jean 17:3, NW) Ge, lo fa so hingango Nzapa na aye so lo leke ti sala ague legeoko na futa so aye so ayeke ga na ni. Na tapande, tongana mbeni zo ti kengo ndia ahunda Jésus ti da bê na lo tongana Lo lï na yâ Royaume ti lo, Jésus atene: “Mo yeke duti ande na mbi na yâ Paradis.” (Luc 23:43, NW) Lo tene pepe na zo ni ti duti na mabe, même tongana lo wara pepe mbeni futa. Lo hinga so Jéhovah aye si awakua ti lo aduti na beku ti fini ti lakue lakue na yâ mbeni paradis na ndo sese ti mu maboko na ala tongana ala yeke tingbi na atara nde nde na yâ sese so. Tongaso, ti ku na ngia ti wara futa ni ayeke tâ ye ti mungo maboko na zo ti gbu ngangu tongana Chrétien.
Ye so Ayeke Si Ande na Royaume Ni
18, 19. Ye wa ayeke si ande na Gbia ni nga na Royaume ni na nda ti Komandema ti Ngu Saki Oko?
18 Teti Royaume ayeke gi mbeni kete yanga-ti-komande na gbe ni so Jéhovah asala na kusala ti ga na sese nga na azo ti lo na yâ dutingo so ayeke mbilimbili-kue, nga na yâ songo na lo, kungba wa Gbia Jésus Christ na agbia na aprêtre 144 000 ayeke wara na peko ti Ngu Saki Oko ni? “Na pekoni, fade nda ni asi, lâ ni so Lo mu royaume na Nzapa Babâ mveni; tongana Lo lungula akozo-gere-ti-komande, na ayanga-ti-komande kue, na angangu kue. Teti a yeke ngbanga ti Lo ti komande, juska Lo zia awato ti Lo kue na gbe ti gere ti Lo.”—1 aCorinthien 15:24, 25.
19 Tongana Christ amu ande Royaume ni na Nzapa, tongana nyen a lingbi a gbu nda ti aversê so atene fade Royaume ni ayeke ngbâ teti lakue lakue? Aye so Royaume ni asala ayeke ngbâ ande teti lakue lakue. Fade a yeke yekia Christ lakue lakue teti kusala so lo sala ti fa na gigi mbilimbili ti kota yanga-ti-komande ti Nzapa. Me, teti so a lungula siokpari na kui kue awe, na a ton azo awe, kusala ti Jésus ti Zo Ti Ton Azo ayeke hunzi ge. Fade a yeke hunzi biaku kusala kue ti Komandema ti Ngu Saki Oko ti Royaume; tongaso, fade a yeke hunda mbeni pepe ti wara mbeni yanga-ti-komande na gbe ni ti duti na popo ti Jéhovah na azo ti mango yanga. Na lege so, “Nzapa alingbi ga ye kue na yâ ye kue.”—1 aCorinthien 15:28.
20 Kusala wa Christ na afon lo mokonzi ayeke wara ande na nda ti Komandema ti Ngu Saki Oko? Bible afa ni pepe. Me e lingbi ti hinga na bê kue so fade Jéhovah ayeke mu na ala ambeni matabisi ti kusala mingi na yâ création ti lo. Zia e kue laso e mu mbage na kota yanga-ti-komande ti Jéhovah na e wara fini ti lakue lakue, tongaso si na yâ gigi ti kekereke, e yeke duti ande na fini ti hinga ye so Jéhovah aleke teti Gbia ni na afon lo gbia na prêtre, nga teti ndagigi kue so ayeke ye ti dongo bê!
Ndulu Tene ti Dango Bê
• E yeke ndulu na gbiango ye wa so ayeke si na yâ komandema?
• Tongana nyen Nzapa ayeke fâ ngbanga ande na ndo azo ti sioni na azo ti mbilimbili?
• Fini ayeke duti ande tongana nyen na yâ fini sese?
• Tongana nyen a yeke fa ande na gigi mbilimbili ti kota yanga-ti-komande ti Jéhovah?
[Hundango Tene ti Manda na Ye]
1. Gango ti Royaume ti Nzapa aye ande ti tene nyen?
2. Ye nyen ayeke duti ande fä ti kota gbiango ye, ti londo na komandema ti azo ti si na ti Nzapa?
3. Tongana nyen Jérémie afa peko ti ye so ayeke si ande na azo ti kengo yanga?
4. Ngbanga ti nyen a yeke na lege ni teti Jéhovah ti futi bungbi ti aye ti sioni ti laso?
5, 6. Fa peko ti sioye so ayeke la ni na Canaan ti giriri.
7, 8. Tongana nyen Nzapa ayeke sukula ande sese so?
9. Mara ti sese wa Royaume ti Nzapa ayeke ga ande na ni?
20. Tongana nyen e lingbi ti hinga ande ye so ayeke ku Christ na azo 144 000 kekereke?
[Afoto na lembeti 15]
“Londongo ti awakinda kue, azo ti mbilimbili, na azo ti kirikiri” ayeke duti ande dä
[Foto na lembeti 16]
Azo ti be-biani ayeke kiri ande ti lë tâ songo na Jéhovah