Mea o le a Faia e le Malo o le Atua
Mea o le a Faia e le Malo o le Atua
“Ia oo mai lou malo, Ia faia lou finagalo, I le lalolagi e pei ona faia i le lagi.”—MATAIO 6:10.
1. O le ā o le a uiga i ai le oo mai o le Malo o le Atua?
INA ua aʻoaʻoina e Iesu ona soo e tatalo mo le Malo o le Atua, na ia silafia o le oo mai o lea Malo o le a faaiʻuina ai le faitau fia afe tausaga o faia pulega a tagata e tutoʻatasi ese mai le Atua. I lena taimi atoa lava, sa leʻi faia ai i se tulaga lautele le finagalo o le Atua i le lalolagi. (Salamo 147:19, 20) Ae pe a māeʻa ona faavaeina le Malo i le lagi, ona faia loa lea o le finagalo o le Atua i so o se vaipanoa. Ua matuā lalata mai lava le taimi mo le suiga sili ona ofoofogia, mai pulega faaletagata ae suia atu i le pulega o le Malo faalelagi a le Atua.
2. O le ā o le a faailogaina ai le suiga mai pulega faaletagata i le pulega o le Malo?
2 O le a faailogaina lenei suiga i le vaitaimi na taʻua e Iesu faapea o le “puapuaga tele, e leai sona tusa talu le amataga o le lalolagi, ua oo lava i ona po nei; e le toe faapea foi amuli.” (Mataio 24:21) E lē o taʻu maia e le Tusi Paia po o le ā le umi o lena vaitaimi, peitaʻi o mala o le a tutupu ai i lena taimi o le a sili atu ona mataʻutia na i lo se isi lava mea na vaai muamua i ai le lalolagi. I le amataga o le puapuaga tele, o le a tupu ai se mea e matuā faateʻia ai lava le toʻatele o tagata i le lalolagi: le faaumatiaga o lotu sesē uma. O le a lē faateʻia ai Molimau a Ieova i lena mea, auā o le mea lenei ua leva ona latou faatalitalia. (Faaaliga 17:1, 15-17; 18:1-24) E faaiʻuina le puapuaga tele ia Amaketo pe a tuʻimomomoina e le Malo o le Atua le faiga o mea uma faa-Satani.—Tanielu 2:44; Faaaliga 16:14, 16.
3. E faapefea ona faamatalaina e Ieremia le taunuuga o ē lē usiusitai?
3 O le ā le uiga o lenei mea i tagata o “e ua le iloa le Atua, ma ua le anaana i le tala lelei” e uiga i lona Malo faalelagi i aao o Keriso? (2 Tesalonia 1:6-9) Ua taʻu mai e valoaga a le Tusi Paia ia i tatou e faapea: “Faauta, e alu atu le malaia e afua i le tasi nuu e oo atu i le tasi nuu, e tupu mai le afā tele mai tuluiga o le lalolagi. O le fasi a Ieova i lea aso e afua mai i le tasi pito lalolagi e oo atu i le tasi pito lalolagi; e leai ni e taufaitagituʻi ia te i latou, e le aofia i latou, e le tanumia foi i latou; e fai i latou ma otaota i luga o le laueleele.”—Ieremia 25:32, 33.
Le Iʻuga o le Amioleaga
4. Aiseā ua tonu ai Ieova i lona faaiʻuina o lenei faiga o mea amioleaga?
4 Ua faitau afe tausaga o faapalepale mai pea Ieova le Atua i le amioleaga, ua lava ma totoe lena umi e iloa ai e tagata e saʻo o latou loto le matuā malapagā o iai pulega faaletagata. Mo se faaaʻoaʻoga, ua taʻua i se tasi faamaumauga e faapea, e silia ma le 150 miliona tagata na maliliu i taua, o fouvalega, ma isi feteenaʻiga a tagatanuu o atunuu lava latou, i totonu o le na o le 20 senituri lava ia. Sa matuā iloga ona aliali mai uiga feʻai o tagata i le taimi o le Taua Lona Lua a le Lalolagi ina ua fasiotia le tusa ma le 50 miliona tagata, ma o le toʻatele o nisi o i latou sa maliliu i ni oti sili ona mataʻutia i nofoaga o faasalaga mamafa a le ʻau Nasi. E pei lava ona valoia mai e le Tusi Paia, i o tatou aso ‘ua alualu ai pea lava le leaga o tagata amio leaga.’ (2 Timoteo 3:1-5, 13) I aso nei, ua matuā taatele amioga lē mamā, o soligatulafono, o faiga sauā, o faiga piʻopiʻo, ma le ʻinoʻino i tapulaa a le Atua. O lea la, ua matuā tonu ai lava le aumaia e Ieova o le iʻuga i lenei faiga o mea amioleaga.
5, 6. Faamatala mai le amioleaga sa iai i le nuu anamua o Kanana.
5 E talitutusa lava le tulaga o mea i le taimi nei ma taimi o Kanana i le tusa ma le 3,500 tausaga ua mavae. Ua faapea mai le Tusi Paia: “O mea uma e inosia e Ieova, o loo inosia lava e ia, ua latou faia i o latou atua; auā ua latou susunu i le afi o latou atalii ma o latou afafine e fai ma taulaga i o latou atua.” (Teuteronome 12:31) Na logoina e Ieova le nuu o Isaraelu: “O le amio leaga a ia nuu e tulia ai i latou e Ieova lou Atua ai ou luma.” (Teuteronome 9:5) Na taʻua e le alii tusitala o talafaasolopito o le Tusi Paia, o Henry H. Halley e faapea: “O le tapuaiga ia Paala, Asaira, ma isi atua o Kanana na faia aʻe i faiga faaletapuaiga e matuā lē pulea lava; na avea a latou malumalu ma nofoaga tutotonu o mea leaga.”
6 Na faaalia mai e Halley le matuā mataʻutia na oo i ai a latou amioga leaga, auā i se tasi o nofoaga mai le tele o nofoaga faapena, “na maua ai [e tagata suʻesuʻe i toegamea mai le palapala] le tele o faguele, o loo iai toega o tamaiti sa faia ai taulaga ia Paala.” Na ia faapea mai: “Na avea lena nofoaga atoa ma fanuatanu o pepe fou faatoʻā fananau mai. . . . Na tapuai tagata Kanana, e ala i le tafili saunoa i amioga lē mamā, o se vaega o a latou sauniga faalelotu, i luma o o latou atua; ma, e ala i le fasiotia o a latou tamaiti ulumatua, e osi ai taulaga i nei lava atua. E foliga mai, i se tulaga tele, sa avea le nuu o Kanana e pei o Sotoma ma Komoro i se fua faaleatunuu. . . . Pe sa iai ea i se tupulaga e faapena lona lē mamā ma le sauā se aiā tatau e tumau ai pea? . . . Ua maofa tagata suʻesuʻe i toegamea mai le eleele, o ē sa eliina mea na faaumatia o aai o Kanana, i le leʻi vave ona faaumatia i latou e le Atua, na i lo le mea na ia faia.”
ʻAināina o le Lalolagi
7, 8. O le a faapefea ona faamamāina e le Atua lenei lalolagi?
7 E pei lava ona sa faia e le Atua le faamamāina o Kanana, o le a lē pine foʻi ona ia faamamāina lea o le lalolagi atoa ma tuuina atu ia i latou o ē faia lona finagalo. “O e amio saʻo, latou te mau i le nuu; ma e ua sao a latou amio, e faatotoeina ai i latou; a e vavaeeseina o e amio leaga ai le laueleele.” (Faataoto 2:21, 22) Ma ua faapea mai le faisalamo: “E toe itiiti, ona leai lea o le tagata amio leaga . . . A o e agamalu, e fai mo latou le nuu; e faafiafia foi i latou ia te i latou ona o le manuia e tele.” (Salamo 37:10, 11) O le a tafiesea foʻi Satani, ina ia “le toe faaseseina e ia o nuu, seia atoa ia tausaga e afe.” (Faaaliga 20:1-3) Ioe, “e mavae atu foi le lalolagi, atoa ma lona tuʻinanau, a o lē fai le finagalo o le Atua, e tumau lea e faavavau.”—1 Ioane 2:17.
8 I se aotelega o le faamoemoe sili mo i latou o ē mananaʻo e ola e faavavau i le lalolagi, na fetalai ai Iesu: “Amuia ē agamalu; auā e fai mo latou tofi le nuu.” (Mataio 5:5) E foliga mai sa ia faasino atu i le Salamo 37:29, lea e valoia mai e faapea: “E fai lava le nuu mo tagata amiotonu, e nonofo ai pea i latou.” Na silafia e Iesu o le fuafuaga a Ieova ina ia ola e faavavau i se lalolagi parataiso i latou o ē saʻo o latou loto. Ua fetalai mai Ieova: “O aʻu nei, ua ou faia le lalolagi, o tagata ma manu ua i luga o le fogāeleele, i loʻu mana tele . . . , ua ou tuuina atu ai foi i le ua tatau ma loʻu manatu.”—Ieremia 27:5.
Se Lalolagi Fou Ofoofogia
9. O le ā le ituaiga o lalolagi o le a aumaia e le Malo o le Atua?
9 Pe a mavae Amaketo, o le a aumaia e le Malo o le Atua se “lalolagi fou” ofoofogia lea e “mau ai le amiotonu.” (2 Peteru 3:13) Maʻeu se mapusaga matagofie o le a iai mo ē faasaoolaina atu ia Amaketo i le aveesea o lenei faiga o mea e sili ona amioleaga ma faigatā! Maʻeu so latou fiafia o le a iai i le ulu atu i se lalolagi fou amiotonu i lalo o le pulega a le Malo faalelagi, faatasi ai ma le faamoemoe o faamanuiaga ofoofogia ma le ola e faavavau!—Faaaliga 7:9-17.
10. O ā mea leaga o le a lē toe iai pe a pule le Malo?
10 O le a lē toe faamataʻuina tagata i taua, o soligatulafono, le matelāina, pe oo lava foʻi i manu taufeʻai. “Ou te osia foi ma [oʻu tagata] le feagaiga e manuia ai, ou te faaumatia manu feai i le nuu . . . E fua mai le laau o le fanua lona fua; e fua mai foi le laueleele lona fua; latou te nonofo filemu foi i lo latou nuu.” “Ona latou tuʻi ai lea i a latou pelu e fai ma uamea o suotosina, o latou tao foi o fai e fai ma polo teu vine; e le sii atu foi le pelu e le tasi nuu i le tasi nuu, latou te le toe aʻoaʻo foi i taua. A e taitasi ma nofo i lalo o lona vine, ma lalo o lona mati; e leai foi se na te faamatau mai.”—Esekielu 34:25-28; Mika 4:3, 4.
11. Aiseā tatou te mautinoa ai o le a faaiʻuina maʻi faaletino?
11 O le a soloiesea maʻi, o faanoanoaga, e oo lava i le oti. “E le fai mai foi se tasi ua mau ai, Ou te maʻi; e faamagaloina agasala a le nuu e nonofo ai.” (Isaia 33:24) “E sōloiesea foi e le Atua loimata uma i o latou mata; e leai foi se toe oti, po o se faanoanoa, po o se aue, e leai foi se toe puapuaga; auā ua mavae atu mea muamua. . . . ‘Faauta, ou te faia ia fou mea uma lava.’” (Faaaliga 21:4, 5) A o iai Iesu i le lalolagi, sa ia faataʻitaʻia mai lona tomai e faia ai na mea e ala i le mana na foaʻi atu e le Atua ia te ia. Ona o le lagolago ane a le agaga paia, na feafioaʻi ai Iesu i le nuu e faasavavali i ē pipili ma faamālōlō ē mamaʻi.—Mataio 15:30, 31.
12. O le ā se faamoemoe o iai mo ē ua maliliu?
12 E sili atu foʻi nisi mea na faia e Iesu. Na ia faatutūina ē na maliliu. Sa faapeʻī le tali ane a tagata lotomaulalo? Ina ua ia faatūina nai le oti se teineitiiti e 12 ona tausaga, ‘ona segia lea o mauli’ o ona mātua. (Mareko 5:42) O se tasi lena o faaaʻoaʻoga o mea o le a faia e Iesu i le lalolagi aoao i lalo o le pulega o le Malo, auā o le a “toe tutū mai e ua amiotonu atoa ma e ua amioletonu.” (Galuega 24:15) Seʻi faaata i le mafaufau se matuā fiafia o le a iai pe a oo ina auauaʻi mai taʻi vaega ona toe feola mai i latou o ē na maliliu ma toe faatasia ma ē pele ia i latou! E lē taumatea o le a faia se galuega tele tau aʻoaʻoga i lalo o le vaavaaiga a le Malo, ina ia “tumu [ai] le lalolagi i le malamalama o Ieova, e pei ona ufitia o le iliti tai i le suāsami.”—Isaia 11:9.
Ua Faaeaeaina le Pule Silisili Ese a Ieova
13. O le a faapefea ona faaalia le tonu o le pulega a le Atua?
13 E oo ane i le iʻuga o le afe tausaga o le pulega a le Malo, ua toe faafoʻisia le aiga faaletagata i le lelei atoatoa o le mafaufau ma le tino. O le a avea ai le lalolagi o se faatoʻaga o Etena i le lalolagi aoao, o se parataiso. O le a mauaina le filemu, le fiafia, le saogalemu, ma se sosaiete o tagata e alolofa. Sa leʻi vaaia muamua lava i le talafaasolopito o le tagata se mea faapenei a o leʻi oo mai le pulega o le Malo. Maʻeu la se eseesega tele o le a faataʻitaʻia mai i le vā o le faitau afe o tausaga ua mavae atu o pulega leaga a tagata, ma le pulega matagofie o le a iai a le Malo faalelagi a le Atua mo le afe tausaga! O le a faaalia mai le matuā silisili o le pulega a le Atua e ala mai i lona Malo, i vala uma lava. O le aiā a le Atua e pule ai, o lana pule silisili ese, o le a matuā faaeaeaina.
14. O le ā o le a tupu i tagata fouvale pe a iʻu le afe tausaga?
14 I le iʻuga o le afe tausaga, o le a faataga ai e Ieova tagata lelei atoatoa e faatino la latou filifiliga saʻoloto po o ai latou te fia auauna atu i ai. Ua faaalia e le Tusi Paia faapea “ona tatalaina lea o Satani ai le mea na puipuiina ai o ia.” O le a ia toe taumafai foʻi e taʻitaʻisesēina tagata, o nisi o i latou na o le a filifili e tutoʻatasi ese mai le Atua. Ina ia taofia ‘le tupu faalua mai o le puapuaga,’ o le a faatamaʻia aʻiaʻi ai e Ieova Satani, o ana temoni, ma i latou uma e fouvale i le pule silisili ese a Ieova. E leai se tasi e mafai ona finau mai faapea sa leʻi maua e nisi o tagata ua faaumatiaina e faavavau i lena taimi se avanoa, pe faapea foʻi o le māfuaaga o lo latou ala sesē ona o le tulaga lē lelei atoatoa. E leai, o le a pei i latou o Atamu ma Eva i le tulaga lelei atoatoa, o ē na filifili ma le loto i ai e fouvale i le pule amiotonu a Ieova.—Faaaliga 20:7-10; Nauma 1:9.
15. O le ā le faiā o le a iai i ē faamaoni ma Ieova?
15 I le isi itu, e foliga mai o le vaega sili ona toʻatele o tagata o le a filifili latou te sapasapaia le pule silisili ese a Ieova. Pe afai o le a faaumatia aʻiaʻi tagata fouvale uma, o le a tutū atu ai ē amiotonu i luma o Ieova, ua latou manumalo mai le tofotofoga faaiʻu o le faamaoni. Ona talia ai lea e Ieova nei tagata faamaoni e fai mona atalii ma afafine. Ona latou toe foʻi ai lea i le faiā lea sa iai muamua Atamu ma Eva faatasi ma le Atua a o la leʻi fouvale. Ona faataunuu ai lea o le Roma 8:21: “Ia tuusaunoa ia lava mea na faia [fanau a tagata] ia le faapologaina e le iu vale, a e oo i le saolotoga o le fanau a le Atua e manuia ai.” Ua vavalo mai le perofeta o Isaia: “E faaumatia e [le Atua] le oti e faavavau; e soloiesea foi e le Alii o Ieova o loimata i mata uma lava.”—Isaia 25:8.
Le Faamoemoe o le Ola e Faavavau
16. Aiseā e talafeagai ai le tulimataʻi atu i le taui o le ola e faavavau?
16 Maʻeu se faamoemoe matagofie o loo faatalia maia tagata faamaoni, i le iloa o le a faavavau ona faatotō ifo e le Atua ia i latou le fau ma soloi o manuia faaleagaga ma faaletino! Na tonu le faapea mai o le faisalamo: “O loo e faamafola lou aao, ma faamaoona le manao [talafeagai] o mea ola uma.” (Salamo 145:16) Ua faalaeiauina e Ieova i latou o le vasega e ola i le lalolagi ina ia avea lenei faamoemoe o le ola i le Parataiso o se vaega o lo latou faatuatua ia te ia. E ui ina sili atu le tāua o le mataupu i le pule silisili ese a Ieova, ae na te lē o tāpā tagata ina ia auauna atu ia te ia e aunoa ma le faamoemoe atu i se taui. I le Tusi Paia atoa, ua matuā mausalī ai le tuufaatasia o le faamaoni i le Atua ma le faamoemoe o le ola e faavavau e avea o ni vaega e matuā manaʻomia o le faatuatua o se Kerisiano i le Atua. “E tatau i lē alu atu i le Atua ona talitonu o loo soifua o ia, o ia foi na te tauia mai o e matuā saili ia te ia.”—Eperu 11:6.
17. Na faaalia faapefea e Iesu le talafeagai ona faatumauina i tatou e lo tatou faamoemoe?
17 Na fetalai Iesu: “O le uiga lenei o le ola e faavavau, ia latou mauaina pea le poto e uiga ia te oe, le Atua moni e toatasi, ma lē ua e auina mai, o Iesu Keriso lea.” (Ioane 17:3, NW ) Ua ia faafesootaʻia iinei le iloaina o le Atua ma ana fuafuaga, faatasi ai ma le taui e aumaia e lenei poto. O se faaaʻoaʻoga, ina ua talosaga atu le pagota ia Iesu ina ia manatua mai o ia pe a afio mai i lona Malo, na fetalai atu Iesu: “Ta te faatasi ai ma oe i parataiso.” (Luka 23:43) E leʻi fai atu o ia i le tamāloa ia faatuatua e tusa lava pe na te lē maua se taui. Sa ia silafia e finagalo Ieova ina ia maua e ana auauna le faamoemoe o le ola e faavavau i luga o se lalolagi parataiso, e fesoasoani ai ia i latou ia tutumau a o latou fesagaʻia puapuaga eseese i lenei lalolagi. O lea, o le tulimataʻi atu i le taui o se fesoasoani e matuā tāua i le faatumauina o se Kerisiano.
Le Lumanaʻi o le Malo
18, 19. O le ā o le a tupu i le Tupu ma le Malo i le iʻuga o le Pulega Faa-Meleniuma?
18 Talu ai o le Malo o se pulega lagolago na faaaogā e Ieova na te aumaia le lalolagi ma ē o ʻaināina i se tulaga lelei atoatoa ma faia ai se leleiga ma ia, o le ā la se matafaioi o le a iai mo le Tupu o Iesu Keriso ma tupu ma ositaulaga e 144,000 pe a mavae le Meleniuma? “Ona oo ai lea i le gataaga, e tuuina atu ai e ia le malo i le Atua, o le Tamā lea, pe a uma ona faaumatia e ia o alii sili uma, ma faipule uma, ma e malolosi. Auā e tatau ona pule o ia, seia tuuina e ia ona fili uma lava i lalo o ona vae.”—1 Korinito 15:24, 25.
19 Pe a toe tauaao atu e Keriso le Malo i le Atua, o le ā la se faamalamalamaga o mau ia sa taʻua ai le malo e peiseai e tumau e faavavau? O le a tumau e faavavau mea e faataulauina e le Malo. O le a faavavau ona faamamaluina Keriso ona o lana matafaioi i le gaoioi e faaeaeaina le pule silisili ese a le Atua. Peitaʻi talu ai o le a soloiesea e faavavau i lena taimi le agasala ma le oti, ma ua togiolaina foʻi le fanau a tagata, ua iʻu ai la iinā le manaʻoga o le avea o ia ma Togisala. O le a faataunuuina atoatoa foʻi le Pulega Faa-Meleniuma o le Malo; o lona uiga, o le a lē toe iai se manaʻoga mo se pulega lagolago e iai i le vā o Ieova ma le fanau a tagata usiusitai. Ona “pule aoao [ai lea o] le Atua i le aoao o mea.”—1 Korinito 15:28.
20. E faapefea ona tatou iloa po o le ā se lumanaʻi o le a iai mo Keriso ma le 144,000?
20 O le ā se matafaioi i le lumanaʻi o le a mauaina e Keriso ma ē latou te pule faatasi pe a faamāeʻaina le Pulega Faa-Meleniuma? E lē o iai se faamatalaga a le Tusi Paia i lena itu. Peitaʻi, e mafai ona tatou mautinoa o le a foaʻi atu e Ieova ia i latou le tele o nisi faaeaga o le auaunaga i le faagasologa o lana foafoaga. Tau ina ia sapasapaia e i tatou uma i aso nei le pule silisili ese a Ieova ma tatou maua ai le ola e faavavau, ina ia oo atu i le lumanaʻi, ae o le a tatou ola pea e iloaina mea ua fuafuaina e Ieova mo le Tupu ma ē ua avea ma tupu ma ositaulaga faatasi ma ia, faapea foʻi i lana vateatea aoao ofoofogia!
Manatu mo le Autaluga
• O le ā le suiga i pulega ua tatou lalata atu nei i ai?
• O le a faapefea ona faamasinoina e le Atua o ē amioleaga ma ē amiotonu?
• O ā tulaga o le a iai i le lalolagi fou?
• O le a faapefea ona faaeaeaina atoatoa le pule silisili ese a Ieova?
[Fesili mo le Suʻesuʻega]
[Faamatalaga i le itulau 17]
“O le a toe tutū mai e ua amiotonu atoa ma e ua amioletonu”
[Faamatalaga i le itulau 18]
O le a toe foʻi ē faamaoni i se faiā talafeagai ma Ieova