1. San sa pasa te Gado en Kownukondre kon?

YESUS ben leri den bakaman fu en fu begi Gado fu meki en Kownukondre kon. A ben sabi taki te a Kownukondre dati ben o kon, dan dati ben sa tyari wan kaba kon na den dusundusun yari fu libisma tiri sondro a yepi fu Gado. Na ini a heri pisi ten dati, Gado en wani no ben pasa na grontapu te yu luku en bun (Psalm 147:19, 20). Ma baka te a Kownukondre seti na ini hemel, dan Gado en wani musu pasa na ala presi. A ten fu a kefalek bigi kenki, pe libisma tiri sa meki presi gi Gado en hemel Kownukondre tiri, e kon krosibei srefisrefi.

2. San sa de a pisi ten te a kenki sa feni presi fu libisma tiri go na a Kownukondre tiri?

² Yesus ben taki fu a pisi ten te a kenki disi sa feni presi, èn a ben kari a pisi ten disi a „bigi banawtu [di] sa de, soleki fa no ben pasa ete fu sensi a bigin fu grontapu te now, nôno, èn no sa pasa moro tu” (Mateus 24:21). Bijbel no e taki o langa a pisi  ten disi sa teki, ma den rampu di sa pasa na ini a ten disi sa ogri moro iniwan sani di oiti sma si pasa na grontapu. Na a bigin fu a bigi banawtu, wan sani sa pasa di sa skreki furu sma na grontapu: ala den falsi kerki sa kisi pori. A sani dati no sa skreki Yehovah Kotoigi, bika langa ten kaba den e fruwakti a sani disi (Openbaring 17:1, 15-17; 18:1-24). A bigi banawtu e kaba na ini Armagedon te Gado en Kownukondre e masi a heri sistema fu Satan.—Danièl 2:44; Openbaring 16:14, 16.

3. Fa Yeremia e taki fu a sani di sa pasa nanga den wan di no e gi yesi?

³ San disi sa wani taki gi den sma „di no sabi Gado èn . . . den wan di no e gi yesi na a bun nyunsu” fu Gado en hemel Kownukondre na ini Krestes en anu? (2 Tesalonikasma 1:6-9) Bijbel profeititori e fruteri wi: „Luku! Wan rampu e go fu a wan nâsi na a tra nâsi, èn wan bigi winti srefi sa opo na den moro farawe pisi fu grontapu. Èn na a dei dati, den sma di Yehovah kiri sa didon seiker fu a wan kabapisi fu grontapu te na a tra kabapisi fu grontapu. Sma no sa krei gi den, èn den no sa tyari den kon na wan noso beri den. Leki mest na tapu a gron den sa tron.”—Yeremia 25:32, 33.

4. Fu san ede Yehovah abi reti fu tyari wan kaba kon na a godelowsu seti fu sani disi?

⁴ Dusundusun yari langa, Yehovah Gado gi pasi meki godelowsufasi de; èn den dusundusun yari dati langa nofo fu meki opregti sma si taki a tiri fu libisma na wan rampu. Fu eksempre, soleki fa wan buku e taki, dan soso na ini a di fu 20 yarihondro, moro leki 150 milyun sma ben lasi libi na ini feti, na ini revo, èn na ini tra bruya fu sma na ini a libimakandra. Spesrutu na ini a di fu Tu Grontapufeti wi ben si o ogri libisma de, di so wan 50 milyun sma ben lasi libi, èn furu fu den dede wan ogri dede na ini den Nazi strafuman kampu. Neleki fa Bijbel ben taki na fesi kaba, dan na ini wi ten ’godelowsu sma nanga bedrigisma e kon moro ogri’ (2 Timoteus 3:1-5, 13). Noyaso, na ala presi sma e du hurudu, ogridu, kruktudu, èn den no abi lespeki gi den markitiki fu Gado srefisrefi. So bun, Yehovah abi ala reti fu tyari wan kaba kon na a godelowsu seti fu sani disi.

5, 6. Fruteri fu a godelowsufasi di ben de na ini Kanan fu owruten.

⁵ Noyaso, a situwâsi gersi di fu Kanan so wan 3500 yari pasa. Bijbel e taki: „Ibri sani di takru gi Yehovah di trutru a no wani si na ai, na den sani di den du gi den gado fu den, bika srefi den manpikin nanga den umapikin fu den, den [sma] e bron na ini faya gi den gado fu den doronomo” (Deuteronomium 12:31). Yehovah ben taigi a nâsi Israèl: „A godelowsufasi fu den nâsi disi, e meki taki Yehovah yu Gado e yagi den puru na yu fesi” (Deuteronomium 9:5). A Bijbel historia skrifiman Henry H. Halley ben taki: „Na anbegi di sma ben anbegi Bâ-al, Astoret, nanga tra gado fu Kanan ben abi fu du nanga den moro takru sortu bradyari fesa; den tempel fu den ben de prenspari presi fu takrudu.”

⁶ Halley ben sori o ogri a godelowsufasi fu den ben tron, bika na ini wán fu den furu presi disi, den sabidensiman fu owruten sani „ben feni furu watrakan di ben abi na ini san ben tan abra fu den pikin-nengre di ben òfer leki srakti-ofrandi na Bâ-al”. Halley ben taki: „A heri presi ben de wan beripe fu nyunyun beibi. . . . Den Kanansma ben du hurudu, leki wan kerki gwenti na fesi den gado fu den èn na so na anbegi fu den ben de; èn baka dati den ben kiri den fosi gebore pikin fu den èn den ben òfer den pikin disi leki wan srakti-ofrandi na den srefi gado disi. Te yu luku en bun, dan a gersi leki a heri kondre fu Kanan ben tron wan sortu Sodom nanga Gomora. . . . A de so, taki so wan libimakandra di ben fisti èn ben ogri srefisrefi, abi a reti fu tan moro langa? . . . Sabidensiman fu owruten sani ben diki na ini den brokobroko presi fu a foto fu Kanan di ben kisi pori. Èn den sabidensiman di ben du disi e fruwondru fu san ede Gado no ben pori den Kanansma moro esi.”

7, 8. Fa Gado sa krin a grontapu disi?

⁷ Neleki fa Gado ben krin a kondre Kanan, na so heri esi a sa krin a heri grontapu èn a sa gi en na den wan di e du en wani. „Den opregti  sma na den wan di sa libi na grontapu, èn den wan sondro fowtu na den wan di sa tan abra na en tapu. Fu taki fu den ogri sma, den sa koti den puru fu grontapu srefi” (Odo 2:21, 22). Èn a psalm skrifiman e taki: „Ete wan syatu pisi ten moro èn a godelowsuwan no sa de moro . . . Ma den safri-atisma srefi sa abi grontapu leki a gudu fu den, èn den sa feni trutru switi prisiri na ini vrede pasa marki” (Psalm 37:10, 11). So srefi Satan sa puru na pasi, so taki „a no ben sa kori den nâsi moro te leki den dusun yari ben kon na wan kaba” (Openbaring 20:1-3). Iya, „grontapu e pasa gowe èn so srefi a lostu fu en, ma a sma di e du a wani fu Gado, e tan fu têgo”.—1 Yohanes 2:17.

⁸ Yesus ben taki syatu fu a bigi howpu gi den wan di wani libi na grontapu fu têgo, di a ben taki: „Koloku fu den safri-atiwan, bika den sa kisi grontapu” (Mateus 5:5). Kande Yesus ben sori go na Psalm 37:29, pe ben taki na fesi: „Na den regtfardiki sma srefi sa abi grontapu leki a gudu fu den, èn den sa libi na tapu fu têgo” (Psalm 37:29). Yesus ben sabi taki Yehovah ben abi na prakseri fu meki opregti sma libi na grontapu fu têgo. Yehovah e taki: „Misrefi meki grontapu, den libisma nanga den meti di e waka na tapu grontapu, nanga yepi fu mi bigi krakti . . . ; èn mi gi grontapu na a wan di bun na ini mi ai.”—Yeremia 27:5.

9. Sortu grontapu Gado en Kownukondre sa tyari kon?

⁹ Baka Armagedon, dan Gado en Kownukondre sa tyari wan kefalek moi „nyun grontapu” kon, pe „regtfardikifasi sa de” (2 Petrus 3:13). Gi den sma di sa pasa Armagedon libilibi, dati sa de wan frulusu trutru fu no kisi fu du moro nanga a godelowsu seti fu sani disi di e kwinsi den! Dati sa de trutru wan prisiri sani fu go na ini a regtfardiki nyun grontapu! A grontapu dati di sa de na ondro a hemel Kownukondre tiri, pe kefalek moi blesi sa de fu kisi èn pe têgo libi sa de fu feni.—Openbaring 7:9-17.

10. Sortu takru sani no sa de moro langa na ondro a Kownukondre tiri?

¹⁰ Feti, ogridu, angriten, noso srefi werdri meti no sa meki a libi fu sma kon na ini kefar moro langa. „Mi sa sroto wan frubontu fu vrede nanga [mi pipel] èn seiker mi sa meki den yagi den werdri meti fu a kondre gowe . . . Èn a bon fu a gron musu gi en nyanyan èn a kondre srefi sa gi en froktu, èn trutru den sa sori fu de na tapu a gron fu den na ini seikerfasi.” „Den sa abi fu naki den feti-owru fu den kon tron prugu èn den lansri fu den kon tron grasinefi. Nâsi teige nâsi, den no sa opo feti-owru moro, èn den no sa leri feti moro. Èn den sa sidon trutru, ibriwan na ondro en droifibon èn na ondro en figabon, èn no wan sma sa de di e meki den beifi.”—Esekièl 34:25-28; Mika 4:3, 4.

11. Fu san ede wi kan de seiker taki ala sortu siki fu a skin no sa de moro?

¹¹ Siki, sari, nanga srefi dede sa wai puru. „No wan sma di e libi drape sa taki: ’Mi siki.’ Den sma di e libi na ini a kondre sa de den wan di sa kisi pardon fu den fowtu fu den” (Yesaya 33:24). „[Gado] sa figi puru ala watra na den ai, èn dede no sa de moro, no wan sari, no wan babari, no wan pen no sa de moro. Den fositen sani pasa kaba. . . . ’Luku! Mi e meki ala sani kon nyun’” (Openbaring 21:4, 5). Di Yesus ben de na grontapu, dan a ben sori taki a ben man du den sani dati nanga yepi fu a krakti di Gado ben gi en. Nanga yepi fu a santa yeye, Yesus ben waka a heri kondre fu dresi malengriwan èn fu dresi den sikiwan.—Mateus 15:30, 31.

12. Sortu howpu den dedewan abi?

 ¹² Yesus ben du moro srefi. A ben opo dede sma baka. San den sma di abi sakafasi ben du? Wan umapikin ben abi 12 yari. Di Yesus ben opo na umapikin disi baka, dan a papa nanga a mama fu na umapikin „ben abi bigi prisiri srefisrefi” (Markus 5:42). Disi na wan tra eksempre fu den sani di Yesus sa du na heri grontapu na ondro a Kownukondre tiri, bika na a ten dati „wan opobaka o de fu den regtfardikiwan nanga den onregtfardikiwan” (Tori fu den Apostel 24:15). Prakseri fu a bigi prisiri di sa de te den dedewan sa opo baka na ini grupu èn te den sa de makandra baka nanga den lobiwan fu den! Sondro tweifri, wan bigi leriwroko sa de na ondro a tiri fu a Kownukondre, so taki „grontapu sa kon furu nanga a sabi fu Yehovah trutru, soleki fa watra e tapu se”.—Yesaya 11:9.

13. Fa a sa de fu si taki Gado abi a reti fu tiri?

¹³ Na a kaba fu a dusun yari tiri fu a Kownukondre, dan a libisma famiri sa kon bun baka nanga volmaakti frustan èn nanga volmaakti skin. A heri grontapu sa de leki a dyari fu Eden, wan paradijs. Vrede, koloku, nanga seikerfasi sa de, èn so srefi wan libimakandra pe ala libisma abi lobi. Noiti ete na ini a historia fu libisma, so wan sani ben pasa bifo a Kownukondre tiri ben kon. Trutru wan bigi difrenti sa de fu si krinkrin na a ten dati! A difrenti na mindri den dusundusun yari fu libisma tiri di takru srefisrefi, èn a kefalek moi tiri fu Gado en hemel Kownukondre fu dusun yari langa. A tiri fu Gado nanga yepi fu en Kownukondre, na ala fasi sa sori fu de a moro bun wan krinkrin. Buweisi sa de bogobogo, taki na Gado abi a reti fu tiri.

14. San sa pasa nanga sma di opo densrefi teige Yehovah te den dusun yari kaba?

¹⁴ Na a kaba fu den dusun yari, Yehovah sa gi den volmaakti libisma na okasi fu gebroiki den fri wani fu bosroiti suma den wani dini. Bijbel e sori taki „den sa lusu Satan baka, komoto na en dungru-oso”. Agen, Satan sa pruberi fu kori libisma, èn wan tu fu den sma disi sa teki a bosroiti taki den wani de fri fu a tiri fu Gado. Fu no meki ’banawtu opo kon wan di fu tu tron’, dan Yehovah sa pori Satan, den ogri yeye fu en, nanga den wan di opo densrefi teige a reti di Yehovah abi fu tiri. No wan sma ben kan kragi dati iniwan libisma di sa kisi pori fu têgo na a ten dati, no ben kisi na okasi fu du tra fasi, noso taki den ben meki wan fowtu fu di den ben de onvolmaakti. Nôno, den sma dati sa de leki volmaakti Adam nanga Efa, di fu espresi ben teki a bosroiti fu opo densrefi teige a reti di Yehovah abi fu tiri.—Openbaring 20:7-10; Nahum 1:9.

15. Sortu matifasi den loyaal wan sa abi nanga Yehovah?

¹⁵ Na a tra sei, soleki fa a sori, dan moro furu sma sa teki a bosroiti taki den wani horibaka gi a reti di Yehovah abi fu tiri. Te ala den wan di opo densrefi teige Yehovah sa pori kaba krinkrin, dan den regtfardikiwan sa tanapu fesi Yehovah, fu di den doro a momenti taki den pasa a lasti tesi fu loyaalfasi. Dan Yehovah sa teki den loyaal sma disi leki den manpikin nanga den umapikin fu en. Fu dati ede den sma disi e kon na ini wan matifasi baka nanga Gado neleki fa Adam nanga Efa ben de mati fu Gado, bifo den opo densrefi. Na so fasi, Romesma 8:21 sa kon tru na a ten dati: „Den sani srefi di Gado meki sa kon fri tu fu a katibo fu porifasi èn den sa abi a glori fri fu den pikin fu Gado.” A profeiti Yesaya ben taki na fesi: „[Gado] sa swari dede trutru fu têgo, èn a Soeverein Masra Yehovah trutru sa figi den watra-ai puru fu ala den fesi.”—Yesaya 25:8.

16. Fu san ede a fiti fu abi a howpu fu libi fu têgo?

¹⁶ Dati na trutru wan moi howpu gi den getrow sma! A howpu taki Gado sa kanti bogobogo winimarki na yeye fasi èn na skin sei, na tapu den getrow sma disi fu têgo. Nanga reti a psalm skrifiman ben taki: „Yu e opo yu anu èn e meki den [yoisti] lostu fu ala libisani kon tru” (Psalm 145:16). Yehovah e gi den sma fu a grupu disi na grontapu, deki-ati fu abi a howpu fu libi na ini wan Paradijs na grontapu leki wan pisi fu a bribi di den e bribi na ini en. Ala di a  strei di abi fu du nanga a reti di Yehovah abi fu tiri na a moro prenspari sani, toku Yehovah no e aksi sma fu dini en sondro taki den e fruwakti fu kisi pai fu dati. Na ini a heri Bijbel, loyaalfasi na Gado nanga a howpu fu libi fu têgo, na tu sani di tai na makandra leki sani di de fanowdu gi wan Kresten di abi bribi. „A sma di e kon na Gado, musu bribi taki a de èn taki a e tron a sma di e pai den wan di e suku en seryusu.”—Hebrewsma 11:6.

17. Fa Yesus ben sori taki a de wan yoisti sani fu kisi krakti fu a howpu di wi abi?

¹⁷ Yesus ben taki: „Disi wani taki têgo libi, fu den e teki sabi na ini den fu yu, a wan-enkri tru Gado èn fu en di yu seni kon, Yesus Krestes” (Yohanes 17:3). Dyaso, Yesus ben sori taki a sabi di wan sma sabi Gado nanga den sani di Gado abi na prakseri, abi fu du tu nanga den winimarki di e kon nanga den. Fu eksempre, di wan ogriman ben aksi Yesus fu memre en te Yesus ben o de na ini en Kownukondre, dan Yesus ben taki: „Yu sa de nanga mi na ini Paradijs” (Lukas 23:43). Yesus no ben taigi a man fu abi bribi, srefi efu a no ben o kisi wan pai fu dati. Yesus ben sabi taki Yehovah wani taki den futuboi fu en musu abi a howpu fu libi fu têgo na tapu wan paradijs grontapu; so taki a howpu dati kan yepi den te den e kisi fu du nanga difrenti sortu tesi na ini a grontapu disi. So bun, a howpu di wan Kresten e howpu fu kisi winimarki, na wan kefalek prenspari sani fu yepi en fu horidoro.

18, 19. San sa pasa nanga a Kownu nanga a Kownukondre na a kaba fu a Dusun Yari Tiri?

¹⁸ A Kownukondre ben de wan tirimakti di Yehovah ben gebroiki fu meki grontapu nanga den sma na tapu kon de volmaakti baka èn fu meki den kon bun baka nanga en. Fu di dati ben de a marki fu a Kownukondre, dan san sa pasa nanga a Kownu Yesus Krestes nanga den 144.000 kownu nanga priester baka a Dusun Yari Tiri? „Baka dati a kaba, te a e gi a kownukondre abra na en Gado nanga Tata, te a meki ala tiri nanga ala makti nanga ala krakti kon tron noti. Bika a musu tiri leki kownu te leki Gado poti ala feanti na ondro en futu.”—1 Korentesma 15:24, 25.

¹⁹ Te Krestes e langa a Kownukondre gi Gado, dan san wi kan taki fu den tekst di e taki dati a Kownukondre sa tan fu têgo? Den sani di a Kownukondre du, na sani di sa tan fu têgo. Fu têgo, Krestes sa kisi grani fu di a ben wroko fu tyari buweisi taki Gado abi a reti fu tiri. Ma fu di sondu nanga dede no sa de moro kwetikweti, èn fu di libisma no sa de na ini katibo moro, dati meki Krestes no sa abi fu de wan Frulusuman moro. A Dusun Yari Tiri fu a Kownukondre so srefi sa doro ala en marki kaba; so bun a no sa de moro langa fanowdu taki wan tra tirimakti musu tanapu na mindri Yehovah nanga a libisma famiri di e gi yesi na en. So bun, „Gado kan de ala sani gi ibriwan sma”.—1 Korentesma 15:28.

20. Fa wi kan kon sabi san sa pasa nanga Krestes èn nanga den 144.000 kompe-tiriman?

²⁰ San sa pasa nanga Krestes èn nanga den kompe-tiriman fu en baka te a Dusun Yari Tiri kaba? Bijbel no e taki san sa pasa. Ma toku, wi kan de seiker taki Yehovah sa gi den moro furu grani fu dini na ini a heri mekisani fu en. Meki a de so taki wi alamala sori taki wi e horibaka gi a reti di Yehovah abi fu tiri, èn meki a de so taki wi kisi a grani fu libi fu têgo. Dati sa meki taki na ini a ten di e kon, wi sa de na libi fu si san Yehovah abi na prakseri nanga a Kownu èn nanga den kompekownu nanga priester, èn so srefi san Yehovah abi na prakseri gi en kefalek bigi universum!