Ncobuyoocita Bwami bwa Leza
Ncobuyoocita Bwami bwa Leza
“Abuze Bwami bwako, alucitwe luyando lwako, ansi ano mbubonya mbuli kujulu.”—MATAYO 6:10.
1. Ino kuboola kwa Bwami bwa Leza kuyooamba nzi?
JESU naakayiisya basikumutobela kupailila Bwami bwa Leza, wakalizi kuti ikuboola kwabo kwakali kuzoomanizya bweendelezi bwabantu buzandukide kuli Leza ibweendelezya kwazyuulu zyamyaka. Muciindi eco coonse, kunyina luyando lwa Leza nolwakali kucitwaa nyika pe. (Intembauzyo 147:19, 20) Pele Bwami bwakujulu bwaakulanganya zintu zyaanyika, luyando lwa Leza luyoocitwa koonse-koonse. Iciindi cakucinca oko kuyoosya kuzwa kubweendelezi bwabantunsi kuya kubweendelezi bwa Bwami bwa Leza bwakujulu cilaafwaafwi kapati.
2. Ncinzi ciyootalisya kucinca kuzwa kubweendelezi bwabantunsi kuya kubweendelezi bwa Bwami?
2 Iciyootalisya kucinca oku nciindi Jesu ncaakaamba kuti “mapenzi mapati aatana kubonwa kuzwa kumalengelo aanyika kusikila sunu, alimwi takoozooba limbi aali boobo pe.” (Matayo 24:21) Ibbaibbele talibwaambi bulamfwu bwaciindi eco pe, pele imapenzi aayoocitika lyaciindi eci anooli mabi kwiinda mapenzi aakacitika kale anyika. Kumatalikilo aamapenzi mapati, kuyoocitika cintu cimwi ciyoobagambya kapati bantu anyika: ilunyonyooko lwabukombi boonse bwakubeja. Eco tacikabagambyi pe Bakamboni ba Jehova nkaambo lyoonse balikucilangila. (Ciyubunuzyo 17:1, 15-17; 18:1-24) Mapenzi mapati ayoomana lya Harmagedoni eelyo Bwami bwa Leza bwaakupwayaula bweende bwa Saatani boonse.—Daniele 2:44; Ciyubunuzyo 16:14, 16.
3. Mbuti Jeremiya mbwapandulula ciyoocitika kuli baabo ibataswiilili?
3 Ino eci ciyooamba nzi kubantu “batamuzi Leza akutaswiilila Makani Mabotu” aa Bwami bwakwe bwakujulu bweendelezyegwaa Kristo? (2 Ba-Tesalonika 1:6-9) Businsimi bwamu Bbaibbele butwaambila kuti: “Amubone! Mapenzi alabuka mucisi cimwi acimwi, aguwo ipati lilabusigwa kumagolelo aanyika. Nkabela mubuzuba obo bajayidwe ba-Jehova bayoojanwa moonse munyika kuzwa kumagolelo amwi akusikila kumagolelo amwi. Tabakooyoolilwa nikuba kubambwa nikuba kuzikwa, pele bayooba bufumba buyo atala avu.”—Jeremiya 25:32, 33.
Mamanino Aabubi
4. Nkaambo nzi Jehova ncatakonzyi kupegwa mulandu wakunyonyoona bweende bwazintu obu bubyaabi?
4 Kwazyuulu zyamyaka, Jehova Leza walekelela bubi kwaciindi cilamfwu cakuti bantu babombe myoyo babone kuti bweendelezi bwabantunsi bwaalilwa ncobeni. Mucikozyanyo, ikweelana abbuku limwi, mumwaanda wamyaka wa 20 ulikke, ibantu bainda kutuulunzuma tuli 150 bakajaigwa munkondo, mukulwanina kucinca kwabukkale bwamucisi alimwi amumanyongwe aambi aazisi. Ikubija kwamuntu kwakalibonya ikapati lya Nkondo Yanyika Yabili ibantu bali tuulunzuma tuli 50 nobakajaigwa, ibanji akati kabaaba bakafwa lufwu lubyaabi munkambi zyacibbalo zyaba Nazi. Mbubwenya Bbaibbele mbolyakasinsima, kuciindi cesu ‘bantu babi babija cakubijila limwi.’ (2 Timoteo 3:1-5, 13) Mazubaano, ikutalilemeka, milandu, kulwana, lweeno alimwi akusulaika zyeelelo zya Leza kwayaambele kapati. Aboobo Jehova kunyina nanga wapegwa mulandu wakunyonyoona bweende bwazintu obu bubyaabi.
5, 6. Amupandulule bubi ibwakaliko mu Kanana yansiku.
5 Ibukkale buliko lino bulikozyenye abwabana Kanana imyaka ili 3,500 yainda. Ibbaibbele lyaamba kuti: “Bacitila baleza babo milimo yoonse iisesemya njasulide Jehova. Abana babo balombe abasimbi, balabatentela baleza babo.” (Deuteronomo 12:31) Jehova wakazibya cisi ca Israyeli kuti: “Nkaambo kabubi bwabantu aba Jehova ncaabatandila kubusyu bwanu.” (Deuteronomo 9:5) Haazibwene mumakani aa Bbaibbele aakaindi Henry H. Halley wakati: “Ibukombi bwa Baala, Asitaroti alimwi abaleza bamwi bana Kanana bwakazwide zilengwa zikankamanisya; mumatempele aabo momwakazwide bubi.”
6 Halley wakatondezya mbobwakaindide bubi bwabo, akaambo kakuti mubusena bumwi akati kamasena aayo manji basikuyandaula zyabasikale ibasya mumatongo “bakajana nkapu zinji zyakajisi tufwuwa-fwuwa twabana basyoonto bakatuulwa kuli Baala.” Wakati: “Ibusena boonse wakali namaumbwe wabana bavwanda. . . . Bana Kanana bakakomba kwiinda mukutalilemeka, kumbele lyabaleza babo; . . . mpoonya kwiinda mukujaya bana bakusaanguna kuti babe zituuzyo kuli baleza mbabonya aaba. Kuboneka kuti nyika ya Kanana yakazyooba kapati mbuli Sodoma a Gomora cisi coonse. . . . Sena lusumpuko lwakasofweede boobu alimwi lwalunya lwakacili kweelela kuti kaluciliko? . . . Basikuyandaula zyabasikale ibasya mumatongo aaminzi ya Kanana balanyandwa Leza ncaatakabanyonyooda kufwambaana kwiinda mbuli mbwaakacita.”
Ikukona Nyika
7, 8. Ino Leza uyooisalazya buti nyika eyi?
7 Mbubwenya Leza mbwaakasalazya Kanana, lino-lino uyooisalazya nyika yoonse mbwiibede akwiipa baabo ibacita kuyanda kwakwe. “Baluleme bayookala munyika; baololokede mbebayoosyaala mulinjiyo; pele basizibi bayoonyonyoonwa munyika.” (Tusimpi 2:21, 22) Alimwi sintembauzyo waamba kuti: “Kaba kaindi kaniini sizibi takooyoba wo; . . . Pele babombemyoyo bayoovuba nyika, bayookondwa muluumuno lunji.” (Intembauzyo 37:10, 11) Uumbi uuyogusigwa ngu Saatani, ikutegwa “ateeni limbi masi mane do yamana eyo myaaka iili cuulu.” (Ciyubunuzyo 20:1-3) Inzya, “nyika ilamana, azisusi zyayo, pele oyo uucita makanze aa-Taata ulakalilila kukabe kutamani.”—1 Johane 2:17.
8 Kakosola makani kujatikizya baabo ibayanda kupona kukabe kutamani anyika, Jesu wakati: “Bali acoolwe abo balibombya, nkaambo bazoovuba nyika.” (Matayo 5:5) Cakutadooneka wakali kwaamba Intembauzyo 37:29 iyakasinsima kuti: “Balulami bayookona nyika, bayookala alinjiyo lyoonse.” Jesu wakalizi kuti akali makanze aa Jehova kuti bantu babombe myoyo bakkale anyika yaparadaiso kukabe kutamani. Jehova waamba kuti: “Ndime ndakalenga nyika abantu abanyama boonse bakede alinjiyo. Ndakailenga kunguzu zyangu zigambya . . . alimwi ndaipa kufumbwa muntu ngunjanda.”—Jeremiya 27:5.
Inyika Mpya Mbotu Kapati
9. Ninyika iili buti njobuyooleta Bwami bwa Leza?
9 Yaakwiinda nkondo ya Harmagedoni, Bwami bwa Leza buyooleta ‘nyika mpya imunooli bululami.’ (2 Petro 3:13) Elo takulivwulili kaka kukatalukwa kunoojisi basikufwutuka Harmagedoni eelyo bweende bwazintu obu budyaaminina alimwi bubyaabi nobutacinooliko! Bayookkomana kapati kaka ikunjila munyika mpya yabululami yeendelezyegwaa mfwulumende ya Bwami bwakujulu kumwi kabalangila zilongezyo zitaliboteli abuumi butamani!—Ciyubunuzyo 7:9-17.
10. Nzintu nzi zibyaabi izitanooliko mubweendelezi bwa Bwami?
10 Kunyina alimwi ibantu nobayooba muntenda akaambo kankondo, milandu, nzala nobaba banyama balya banyamanyina. “Njootangana [abantu bangu] cizuminano caluumuno, nkabela njoolesya banyama babi munyika. . . . Ayalo misamu yamumyuunda iyoozyala micelo yayo, anyika iyookuzya zilyo, aboobo bayookala anyika yabo cakutayoowa.” “Bayoofula mapanga aabo abe maamba aakulimya, amasumo aabo abe zizibyo zyamisamu. Cisi tacikooyoobweza ipanga lyakulwisya cisinyina, nkaambo tabakwe nibayooiiya inkondo limbi pe. Banooyookede umwi aumwi mucisiko camusaansa wakwe amumukuyu wakwe, nkabela takukooyooba muntu naba omwe uubayoosya.”—Ezekieli 34:25-28; Mika 4:3, 4.
11. Nkaambo nzi ncotukonzya kubaa lusyomo lwakuti macise oonse ayoomana?
11 Malwazi, buumba alimwi alufwu ziyoogusigwa. “Takukooyooba naba omwe akati kabantu banyika uuamba kuti, Ndaciswa. Bantu boonse bakede mulinjiyo bayoolekelelwa milandu yabo.” (Isaya 33:24) “[Leza] uyoosindula misozi yoonse kumeso aabo, takukooyooba limbi lufu, nikuba kuomoka nikuba kulila nikuba kuciswa, nkaambo zintu zyakale zyamaninina. . . . Amubone, ndalengulula zintu zyoonse, zibe zipya.” (Ciyubunuzyo 21:4, 5) Naakali anyika, Jesu wakatondezya nguzu zyakucita zintu ezyo kwiinda munguzu nzyaakamupede Leza. Kwiinda mukugwasigwaa muuya uusalala, Jesu wakeendeenda koonse-koonse kaya buponya bantu balemene abaciswa.—Matayo 15:30, 31.
12. Ino mbulangizi nzi buliko kubantu bafwide?
12 Jesu wakacita azimbi. Wakababusya bakafwide. Ino bakali kulicesya bakalimvwa buti? Naakabusya musimbi wakalaa myaka yakuzyalwa iili 12, ibazyali bakwe “bakakankamana lukankamano lupati.” (Marko 5:42) Eci cakali cikozyanyo cimbi cazeezyo Jesu nzyayoocita nyika yoonse mbwiizulwa mubweendelezi bwa Bwami, nkaambo kuciindi eco “ku[yoo]ba kubuka kwabafu, akwabaluleme akwabataluleme.” (Incito 24:15) Amweezeezye lukkomano lunji lunooliko eelyo inkamu imwi aimwi yabantu bafwide nobanoobuka akuswaangana alimwi abayandwa babo! Cakutadooneka, kuyooba mulimo wakuyiisya mupati weendelezyegwaa Bwami ikutegwa ‘nyika ikazule luzibo lwa-Jehova mbubonya mbuli maanzi mbwaazuzya lwizi.’—Isaya 11:9.
Bulelo bwa Jehova Bwasinizigwa
13. Ino kululama kwabweendelezi bwa Leza kuyootondezyegwa buti?
13 Kumamanino aamyaka iili cuulu yabweendelezi bwa Bwami, ibantunsi boonse bayoopilusigwa kubulondosi mumizeezo alimwi akumubili. Inyika yoonse mbwiizulwa iyooba muunda wa Edeni, iyooba paradaiso. Kunooli luumuno, lukkomano, kuliiba alimwi abantu basiluyando. Kunyina mubukkale bwabantu ibweendelezi bwa Bwami kabutana nokwakali cintu cili boobu. Kunooli kwiimpana kupati kaka ciindi eco akati kazyuulu zyamyaka zyamusule zyabweendelezi bwabantunsi bwamapenzi alimwi abweendelezi bupati bwa Bwami bwa Leza bwakujulu bwamyaka iili cuulu! Ibweendelezi bwa Leza kwiinda mu Bwami bwakwe buyoozyibwa kuti bulisumpukide cakumaninina mumbazu zyoonse. Ikweelela kwa Leza kwakweendelezya, kunoosinizidwe cakumaninina.
14. Ncinzi ciyoocitika kuli basikuzanga imyaka iili cuulu yaakumana?
14 Imyaka iili cuulu yaakumana, Jehova uyoozumizya bantunsi kubelesya nguzu zyabo zyakulisalila kusala ooyo ngobayanda kubelekela. Ibbaibbele litondezya kuti “Saatani uyooangununwa muntolongo yakwe.” Uyoosola kweena bantunsi alimwi, elyo bamwi akati kabo bayoosala kulyeendelezya beni kakunyina kweendelezyegwaa Leza. Ikutegwa ‘mapenzi atakabuki lwabili,’ Jehova uyoomunyonyweeda limwi Saatani, madaimonaakwe alimwi abantu boonse ibazangila bulelo bwa Jehova. Kunyina uunga wadooneka kuti ibantunsi ibayoonyonyweedwa limwi kuciindi eco tiibakapegwa ciindi cinji naa kuti ikuleya kwabo kwakacitwa akaambo kakutalondoka. Peepe, banoolondokede mbubwenya bwakali ba Adamu a Eva ibakalisalila caali kuzangila bweendelezi bwa Jehova bululeme.—Ciyubunuzyo 20:7-10; Nahumu 1:9.
15. Ino basyomeka bayoobaa cilongwe cili buti a Jehova?
15 Kulubazu lumwi, kulangilwa kuti ibunji bwabantu bayoosala kutobela bulelo bwa Jehova. Mbwaanga basikuzanga boonse banoonyonyoodwe, ibalulami bayooima kubusyu bwa Jehova, kabazwidilide mumusunko wakusyomeka wamamanino. Mpoonya aaba bantu ibasyomeka bayootambulwaa Jehova kabali bana bakwe balombe abasimbi. Aboobo bayoopiluka kucilongwe mbuli cakajisi ba Adamu a Eva kabatanamuzangila Leza. Aboobo ibbuku eli lya Ba-Roma 8:21 liyoozuzikizigwa: “Zilenge zini [bantu boonse] zikalubulwe kubuzike bwabubozi, bube abulubulo bulemu bwabana ba-Leza.” Imusinsimi Isaya usinsima kuti: “Lufu [Leza] walumenenena mane kukabe kutamani. Mwami Jehova uyoosindula misozi kumasyu oonse.”—Isaya 25:8.
Bulangizi Bwabuumi Butamani
16. Nkaambo nzi ncocili kabotu kulangila bulumbu bwabuumi butamani?
16 Tabuliboteli kaka bulangizi mbobajisi bantu basyomeka, ikuzyiba kuti Leza unooyoobayungizizya zintu zinji zyakumuuya azyakumubili kukabe kutamani! Sintembauzyo wakaamba masimpe naakati: “Ulafumbatula ijanza lyako, ulakutya kusukama [kweelede] kwabaumi boonse.” (Intembauzyo 145:16) Jehova ukulwaizya baabo baciinga caanyika kubaa bulangizi bwakupona mu Paradaiso kuti bube cibeela calusyomo lwabo mulinguwe. Nokuba kuti ikaambo kakweelela kwabulelo bwa Jehova nkekaambo kayandika kapati, kunyina nayanda kuti bantu bamubelekele buyo kabanyina bulangizi bwabulumbu kumbele. Mu Bbaibbele lyoonse mbolizulwa, ikusyomeka kuli Leza alimwi abulangizi bwabuumi butamani nzintu ziswaangene izitakonzyi kwaandaanizigwa iziyandika kulusyomo lwa Munakristo muli Leza. “Woonse muntu uuswena kuli [Leza] uleelede kuzumina kuti Leza mpali akuti nguupa cilumbo kulibaabo bamuyandaula.”—Ba-Hebrayo 11:6.
17. Mbuti Jesu mbwaakatondezya kuti cakali kweelela kuyumizigwaa bulangizi bwesu?
17 Jesu wakati: “Mboobu buumi ubutamani, kuti bazibe nduwe, Leza mwini-mwini, ooli olike, ayooyo ngookatuma, nguwenya Jesu Kristo.” (Johane 17:3) Aawa wakaswaanganya kuzyiba Leza amakanze aakwe kubulumbu bujanwa mukucita boobo. Mucikozyanyo, simucita zibi naakalomba Jesu kuti akamuyeeye aakweendelezya mu Bwami bwakwe, Jesu wakati: “Tunooli ayebo mu-Paradaiso.” (Luka 23:43) Tanaakaambila mwaalumi oyo kuti abe alusyomo nokuba kuti tanaakali kuyoojana bulumbu. Wakalizi kuti Jehova uyanda kuti babelesi bakwe babe aabulangizi bwabuumi butamani anyika yaparadaiso ikutegwa bubayumye nobasikilwa masukusyo aayindene-indene munyika eyi. Aboobo ikulangila bulumbu ncintu cigwasya kapati mukuliyumya katuli Banakristo.
Bwami Kumbele
18, 19. Ncinzi ciyoocitika ku Mwami alimwi a Bwami kumamanino aa Bweendelezi bwa Myaka iili Cuulu?
18 Mbwaanga Bwami bwakali buyo mfwulumende Jehova njaakabelesya kupilusya nyika alimwi abantu bakkala mumo kubululami alimwi akukuyanzanisigwa kulinguwe, ino Mwami Jesu Kristo alimwi abami abapaizi ibali 144,000 banoojisi mulimo nzi yakwiinda myaka iili Cuulu? “Ndilyonya naayooba mamanino, nayootambika bwami kumaanza aa-Leza wisi, nayoolobesezya boonse beendelezi abami abasimutwe. Nkaambo uleelede kweendelezya mane do nanooyoobikide basinkondonyina boonse kunsi lyamaulu aakwe.”—1 Ba-Korinto 15:24, 25.
19 Kristo aakutambika Bwami kuli Leza, ino magwalo aamba kuti bwami obo bunooliko kukabe kutamani ayelede kuteelelwa buti? Izintu nzyobuyoocita Bwami zinooliko kukabe kutamani. Kristo uyoolemekwa kukabe kutamani akaambo kamulimo wakwe wakuzwidilizya kusinizigwa kwabulelo bwa Leza. Pele mbwaanga cibi alufwu kuciindi eco zinoogusidwe cakumaninina alimwi bantu banoofwutudwe, eci ciyoopa kuti kataciyandiki kuba Mufwutuli. Bweendelezi bwa Myaka iili Cuulu bwa Bwami abwalo bunoozwidilide; aboobo takucinooyandiki mfwulumende yakugwasilizya akati ka Jehova abantu bamumvwida. Aboobo, “Leza [uyooba] malondwedo aazintu zyoonse.”—1 Ba-Korinto 15:28.
20. Mbuti mbotunga twazyiba ncabambilidwe kumbele Kristo alimwi abali 144,000?
20 Ino Kristo alimwi abeendelezinyina banoojisi mulimo nzi kumbele Bweendelezi bwa Myaka iili Cuulu bwaakumana? Ibbaibbele talitwaambili pe. Pele tulakonzya kubaa lusyomo lwakuti Jehova uyoobapa zyoolwe zyamulimo zinji zimbi mububumbo bwakwe boonse. Toonse sunu atusumpule bulelo bwa Jehova akuyoopegwa buumi butamani ikutegwa kumbele, katunooli baumi ikuyoozyiba makanze aa Jehova kujatikizya Mwami abaminyina abapaizi, kubikkilizyaa bubumbo boonse ibuyoosya kapati!
Twaambo Twakwiindulula
• Nkucinca kwabweendelezi kuli buti kulaafwaafwi kucitika?
• Mbuti Leza mbwayoobeteka babi abaluleme?
• Mbukkale buli buti bunooliko munyika mpya?
• Ino kweelela kwabulelo bwa Jehova kuyoosinizigwa buti cakumanina?
[Mibuzyo yaciiyo]
[Zifwanikiso izili apeeji 15]
‘Kuyooba kubuka kwabafu, baluleme abataluleme’
[Cifwanikiso icili apeeji 16]
Ibantu basyomeka bayoobaa cilongwe cibotu alimwi a Jehova