Kon Ano an Pagbubuhaton han Ginhadian han Dios
Kon Ano an Pagbubuhaton han Ginhadian han Dios
“Kumanhi an imo ginhadian. Matuman an imo pagburut-an, sugad ha langit, amo man ha tuna.”—MATEO 6:10.
1. Ano an magigin kahulogan han pag-abot han Ginhadian han Dios?
HAN gintutdoan ni Jesus an iya mga sumurunod nga mag-ampo para han Ginhadian han Dios, maaram hiya nga an pag-abot hito magtatapos han yinukot ka tuig na nga pagmando han tawo nga bulag ha Dios. Durante hito ngatanan nga panahon, an kaburut-on han Dios diri natutuman dinhi ha tuna ha kabug-osan. (Salmo 147:19, 20) Kondi katapos matukod an Ginhadian ha langit, an kaburut-on han Dios matutuman ha bisan diin. Nagtitikahirani na gud an panahon para han makatarag-ob nga pagbalhin tikang ha pagmando han tawo ngadto ha pagmando han langitnon nga Ginhadian han Dios.
2. Ano an magtitigaman han pagbalhin tikang ha pagmando han tawo ngadto ha pagmando han Ginhadian?
2 An magtitigaman hini nga pagbalhin amo an peryodo han panahon nga gintawag ni Jesus nga “daku nga kagol-anan sugad han waray pa mahinabo tikang ha tinikangan han kalibotan tubtob yana, ngan diri na gud mahinanabo.” (Mateo 24:21) An Biblia waray magsumat kon mationan-o kahilawig ito nga peryodo han panahon, kondi an mga kalamidad nga mahitatabo durante hito magigin mas maraot gud kay ha bisan ano nga nahitabo ha kalibotan. Ha tinikangan han daku nga kagol-anan, mayada mahitatabo nga makakalisang gud ha kadam-an nga mga tawo ha tuna: an kabungkagan han ngatanan palso nga relihiyon. Diri ito makakalisang ha mga Saksi ni Jehova, tungod kay maiha na nga ginpapamulat nira ini. (Pahayag 17:1, 15-17; 18:1-24) An daku nga kagol-anan matatapos ha Armagedon kon bungkagon na han Ginhadian han Dios an bug-os nga sistema ni Satanas.—Daniel 2:44; Pahayag 16:14, 16.
3. Paonan-o iginsaysay ni Jeremias an dadangatan han mga matinalapasnon?
3 Ano an magigin kahulogan hini ha mga tawo “nga waray kumilala ha Dios ngan ha waray pagtuman han maopay nga sumat” mahitungod han iya langitnon nga Ginhadian ha mga kamot ni Kristo? (2 Tesalonika 1:6-9) An tagna han Biblia nagsusumat ha aton: “Kitaa, an karaotan magawas tikang ha nasud, ngadto ha nasud, ngan an usa ka daku nga bagyo pababangunon tikang ha gikakatapusani nga mga bahin han tuna. Ngan an mga pamamatayon ni Jehova makikita hadto nga adlaw tikang ha usa nga kataposan han tuna bisan ngadto ha luyo nga kataposan han tuna; diri hira pagtatangisan, diri man pagtitirukon, o diri ipanlulubong; hira magigin baya dida ha nawong han tuna.”—Jeremias 25:32, 33.
An Kataposan han Karaotan
4. Kay ano nga makatadunganon hi Jehova ha pagtapos hinin maraot nga sistema?
4 Yinukot ka tuig na, gintugotan ni Jehova nga Dios an karaotan, igo na an kaiha basi makita han tangkod-an-kasingkasing nga mga indibiduwal nga an pagmando han tawo napakyas gud. Pananglitan, han ika-20 ka siglo la, sobra 150 milyon ka tawo an ginpatay ha mga girra, mga rebolusyon, ngan ha iba nga mga kasamok, sumala ha usa nga surok. An kabangis han tawo nakita labi na gud durante han Girra ha Kalibotan II han mga 50 milyon an ginpatay, upod an damu ha ira nga namatay ha makangingirhat nga kamatayon ha mga kampo nga prisohan han mga Nazi. Sugad la han igintagna han Biblia, ha aton panahon ‘an magraot ngan mga impostor nagtubo ha maraot ngan labi pa gud nga maraot.’ (2 Timoteo 3:1-5, 13) Yana nga panahon, nahitatabo ha bisan diin an imoralidad, krimen, kamadarahog, panlimbong, ngan pagpasipara ha mga suruklan han Dios. Salit, makatadunganon gud para kan Jehova nga tapuson na inin maraot nga sistema.
5, 6. Isaysay an karaotan nga iniksister ha kadaan nga Kanaan.
5 An kahimtang yana pariho han ha Kanaan mga 3,500 ka tuig na an naglabay. An Biblia nasiring: “An tagsatagsa nga mangil-ad kan Jehova, nga iya gindudumtan, ira ginhimo ha ira mga diosdios; kay bisan an ira mga anak nga lalaki ngan an ira mga anak nga babaye ira pinanununog ha kalayo para han ira mga diosdios.” (Deuteronomio 12:31) Ginsumatan ni Jehova an nasud han Israel: “Tungod han pagkamaraot hini nga mga nasud, hi Jehova nagpaiwas ha ira tikang ha imo atubangan.” (Deuteronomio 9:5) An historyador han Biblia nga hi Henry H. Halley nagsiring: “An pagsingba kan Baal, Astoret, ngan iba nga dios ha Kanaan nag-upod han pinakamalaw-ay nga pagpatagbaw ha sekso; an ira mga templo mga sentro han bisyo.”
6 Ipinakita ni Halley nga duro an ira karaotan, kay ha usa han damu han sugad nga mga lugar, an mga arkeologo “nakabiling hin damu nga mga tibod nga nagsusulod han mga tul-an han kabataan nga iginhalad kan Baal.” Hiya nagsiring: “An bug-os nga lugar nagin sementeryo han natawo pala nga kabataan. . . . An mga Kanaanita nagsingba, pinaagi han pagpatagbaw ha sekso, sugad nga relihiyoso nga seremonya, ha atubangan han ira mga dios; ngan pinaagi han pagpataya han ira suhag nga mga anak, sugad nga halad hini mismo nga mga dios. Baga in, ha kadak-an, an bug-os nga nasud han Kanaan nagin pariho han Sodoma ngan Gomorra. . . . An sibilisasyon ba han sugad mangil-ad nga kahugaw ngan kamadarahog mayada katungod nga umiksister hin maiha? . . . An mga arkeologo nga nakaukab han mga guba ha mga siyudad han Kanaan nahipausa kon kay ano nga waray dayon hira bungkaga han Dios.”
Pakapanunod han Tuna
7, 8. Paonan-o lilimpyohon han Dios ini nga tuna?
7 Sugad la han paglimpyo han Dios ha Kanaan, ha diri na mag-iiha lilimpyohon han Dios an bug-os nga tuna ngan ihahatag ito hadton nagbubuhat han iya kaburut-on. “An matadong maukoy dida ha tuna, ngan an hingpit mapabilin dida hini. Kondi an magraot paghihinginlan tikang ha tuna. Ngan an mga malingoon pagrarabuton tikang dida.” (Proberbios 2:21, 22) Ngan an salmista nasiring: “Diri mag-iiha, ngan an mga magraot pagwawad-on . . . Kondi an maaghop makakapanunod han tuna, ngan maglilipay hira tungod han kahuraan han kamurayaw.” (Salmo 37:10, 11) Pagwawad-on liwat hi Satanas, basi “diri na niya paglimbongan an mga nasud, ngada ha katapos han usa ka yukot ka tuig.” (Pahayag 20:1-3) Oo, “an kalibotan nawawara, ngan an iya kairiphon; kondi an nagbubuhat han kaburut-on han Dios nagpapadayon ha gihapon.”—1 Juan 2:17.
8 Ha pagsuma han urusahon nga paglaom hadton karuyag mabuhi ha waray kataposan ha tuna, hi Jesus nagsiring: “Bulahan an mga maaghop, kay hira makakapanunod han tuna.” (Mateo 5:5) Sigurado nga ginkokotar niya an Salmo 37:29, nga nagtagna: “An mga magtadong makakapanunod han tuna, ngan maukoy hira dida hin waray kataposan.” Maaram hi Jesus nga katuyoan ni Jehova nga an mga magtadong mabuhi ha paraiso nga tuna ha waray kataposan. Hi Jehova nasiring: “Akon ginhimo an tuna, an mga tawo ngan an mga mananap nga aada ha nawong han tuna, pinaagi han akon daku nga gahum . . . , ngan akon ini ihinatag ngadto ha ginhuhunahuna nga maopay ha akon.”—Jeremias 27:5.
An Urusahon Bag-o nga Kalibotan
9. Ano nga klase hin kalibotan an pagdadad-on han Ginhadian han Dios?
9 Katapos han Armagedon, an Ginhadian han Dios magdadara han urusahon “bag-o nga tuna” diin “mag-uukoy an katadongan.” (2 Pedro 3:13) Daku gud nga katalwasan ito para ha mga makakatalwas ha Armagedon nga waray na inin matalumpiguson maraot nga sistema han mga butang! Malilipay gud hira ha pagsulod ha matadong bag-o nga kalibotan ilarom han langitnon nga Ginhadian nga gobyerno, upod an urusahon nga mga bendisyon ngan kinabuhi nga waray kataposan!—Pahayag 7:9-17.
10. Ano nga magraot nga mga butang an diri na maeksister ilarom han pagmando han Ginhadian?
10 Waray na magtatarhog ha mga tawo pinaagi han girra, krimen, gutom, o bisan han magbangis nga mga hayop. “Ako makikighimo ha [akon katawohan] hin kauyonan ha pagdait, ngan akon papangiwason an magraot nga kamanampan tikang ha tuna . . . Ngan an kahoy ha uma mahatag han iya bunga, ngan an tuna mahatag han iya tubo, ngan hira magmamasarig dida ha ira tuna.” “Ira hihimoon an ira mga kampilan nga mga arado, ngan an ira mga bangkaw nga mga garab nga ipangarapon; an nasud diri mawaay hin kampilan patok ha nasud, diri na man hira mag-aaram hin away. Kondi hira an tagsatagsa nga tawo malingkod ha sirong han iya balagon han ubas ngan ha sirong han iya kahoy nga igera; ngan waray bisan hin-o nga maghahadlok ha ira.”—Esekiel 34:25-28; Mika 4:3, 4.
11. Kay ano nga makakasarig kita nga matatapos na an pisikal nga mga sakit?
11 Pagwawad-on an sakit, kabidoan, ngan bisan an kamatayon. “An umurukoy diri masiring: Ako masakit; an katawohan nga naukoy dida pasasayloon han ira karat-an.” (Isaias 33:24) “Papahiron niya [Dios] an ngatanan nga luha tikang ha ira mga mata; ngan mawawaray na kamatayon; ngan mawawaray na an kabidoan, bisan pagtangis, bisan kasakit pa gud; kay an siyahan nga mga bagay nag-agi na. . . . Kitaa, akon ginhihimo an ngatanan nga mga butang nga bag-o.” (Pahayag 21:4, 5) Han nakanhi hiya ha tuna, ipinakita ni Jesus an iya abilidad ha pagbuhat hiton nga mga butang pinaagi han gahum han Dios nga iginhatag ha iya. Pinaagi han bulig han baraan nga espiritu, linakat hi Jesus ha tuna nga nananambal han mga piang ngan mga may sakit.—Mateo 15:30, 31.
12. Ano an paglaom han mga patay?
12 Labaw pa an ginbuhat ni Jesus. Ginbanhaw niya an mga patay. Mationan-o ginmios an mapainubsanon nga mga tawo? Han ginbanhaw niya an 12-anyos nga daragita, an iya mga ginikanan ‘nanhipausa ha daku nga kalipay.’ (Markos 5:42) Usa pa nga ehemplo ini han pagbubuhaton ni Jesus ha bug-os nga tuna ilarom han pagmando han Ginhadian, kay hiton nga panahon “may pagkabanhaw han mga minatay han mga magtadong ngan diri man magtadong.” (Buhat 24:15) Hunahunaa an daku nga kalipay kon an mga grupo han mga patay nababanhaw ngan makighiusa ha ira mga hinigugma! Sigurado magkakaada daku nga buruhaton ha pagtutdo ilarom han pagdumara han Ginhadian kay “an tuna mapupuno han hibaro ni Jehova, sugad nga an katubigan nagpupuno han dagat.”—Isaias 11:9.
Nabindikar an Pagkasoberano ni Jehova
13. Paonan-o ipapakita an pagkahusto han pagmando han Dios?
13 Ha kataposan han usa ka yukot ka tuig han pagmando han Ginhadian, an tawhanon nga pamilya nahibalik na ha pagkahingpit han hunahuna ngan lawas. An tuna magigin bug-os globo nga hardin han Eden, usa ka paraiso. Madadangat na an kamurayawan, kalipayan, kasigurohan ngan an mahigugmaon tawhanon nga sosiedad. Waray pa gud nakita nga sugad hini ha kasaysayan han tawo antes han pagmando han Ginhadian. Kabaliktaran gud kon sugad an makikita tikang ha naglabay nga yinukot ka tuig han makalolooy nga pagmando han mga tawo ngada ha urusahon usa ka yukot ka tuig nga pagmando han langitnon nga Ginhadian han Dios! An pagmando han Dios pinaagi han iya Ginhadian bug-os nga ipinakita nga hitaas gud ha ngatanan nga bahin. An katungod han Dios ha pagmando, an iya pagkasoberano, bug-os nga nabindikar.
14. Ano an mahitatabo ha mga rebelde kon matapos na an usa ka yukot ka tuig?
14 Ha kataposan han usa ka yukot ka tuig, tutugotan ni Jehova an hingpit nga mga tawo nga buhaton an ira kagawasan ha pagpili kon hin-o an karuyag nira pag-alagaron. Ipinapakita han Biblia nga “bubuhian hi Satanas tikang ha iya bilanggoan.” Mangangalimbasog na liwat hiya nga limbongan an mga tawo, nga pipilion han iba nga bumulag ha Dios. Basi malikyan an ‘kasakit ha ikaduha ka beses,’ bubungkagon ni Jehova hi Satanas, an iya mga demonyo, ngan an ngatanan nga nagrirebelde ha pagkasoberano ni Jehova. Waray mariwa nga bisan hin-o nga mga tawo nga ginbungkag ha kadayonan hiton nga panahon waray hatagi hin higayon o nga an ira sayop nga buhat amo an tungod han pagkadiri-hingpit. Diri, magigin pariho hira han hingpit nga hi Adan ngan hi Eva, nga kinaburut-on nga nagpili ha pagrebelde ha matadong nga pagmando ni Jehova.—Pahayag 20:7-10; Nahum 1:9.
15. Ano an magigin relasyon han mga maunungon kan Jehova?
15 Ha luyo nga bahin, sigurado nga pipilion han kadam-an nga mga tawo an pagparig-on han pagkasoberano ni Jehova. Tungod kay ginbungkag na an ngatanan nga rebelde, an magtadong matindog ha atubangan ni Jehova, nga nakapasar ha ultimo nga pagsari han pagkamaunungon. Dida hito ini nga mga maunungon kakarawaton ni Jehova sugad nga iya mga anak nga kalalakin-an ngan kababayin-an. Salit mabalik hira ha relasyon hadto ni Adan ngan Eva ha Dios antes hira magrebelde. Salit, an Roma 8:21 matutuman: ‘An mga linarang [katawohan] ngahaw matatalwas tikang ha pagkauripon han pagkamadinunuton ngan magkakaada mahimayaon nga katalwasan han mga anak han Dios.’ Hi propeta Isaias nagtagna: “Iya [Dios] linamoy ha kadayonan an kamatayon; ngan an Ginoo nga hi Jehova magpapahid han mga luha tikang ha ngatanan nga nawong.”—Isaias 25:8.
An Paglaom han Kinabuhi nga Waray Kataposan
16. Kay ano nga husto laoman an balos nga kinabuhi nga waray kataposan?
16 Urusahon gud nga paglaom an naghuhulat ha mga magtinumanon, an mahibaro nga an Dios magbububo ha ira ha kadayonan han hura espirituwal ngan materyal nga mga kapulsanan! An salmista husto nga nagsiring: “Imo binubuklad an imo kamot ngan ginbubusog an [husto nga] tinguha han tagsa nga buhi.” (Salmo 145:16) Gindadasig ni Jehova adton ha tunan-on nga klase nga ini nga paglaom han kinabuhi ha Paraiso magin bahin han ira pagtoo ha iya. Bisan kon mas importante an isyu han pagkasoberano ni Jehova, diri niya ginsasagda an mga tawo nga mag-alagad ha iya nga waray paglaom han usa nga balos. Ha bug-os nga Biblia, an pagkamaunungon ha Dios ngan an paglaom han kinabuhi nga waray kataposan magkaupod gud sugad nga importante nga mga bahin han pagtoo ha Dios han usa nga Kristiano. “Kay kinahanglan nga an nadaop ha Dios tumoo nga amo hiya, ngan nga hiya magbabalos han ngatanan nga nagbibiling ha iya.”—Hebreo 11:6.
17. Paonan-o ipinakita ni Jesus nga husto nga maparig-on han aton paglaom?
17 Hi Jesus nagsiring: “Ini amo an kinabuhi nga waray kataposan, nga hira kumilala ha imo, nga amo la an matuod nga Dios, ngan hi Jesu-Kristo nga imo ginpakanhi.” (Juan 17:3) Dinhi iginkaw-ing niya an pagkilala ha Dios ngan ha iya mga katuyoan ha balos nga ighahatag hini. Sugad nga ehemplo, han an magburuhat hin maraot naghangyo nga hinumduman hiya kon adto na hi Jesus ha iya Ginhadian, hi Jesus nagsiring: “Mabunyog ka ha akon ngadto ha Paraiso.” (Lukas 23:43) Waray niya sumati an lalaki nga magkaada pagtoo bisan kon waray niya makarawat an balos. Maaram hiya nga karuyag ni Jehova nga an iya mga surugoon magkaada paglaom han kinabuhi nga waray kataposan ha paraiso nga tuna basi mabuligan hira ha pag-ilob han magkalainlain nga mga pagsari hini nga kalibotan. Salit, an paglaom ha balos usa ka mapulsanon nga bulig ha pag-ilob sugad nga Kristiano.
An Tidaraon han Ginhadian
18, 19. Ano an mahitatabo ha Hadi ngan ha Ginhadian ha kataposan han Milenyo nga Pagmando?
18 Tungod kay an Ginhadian usa ka sanga nga gobyerno nga ginamit ni Jehova ha pagdara han tuna ngan han tawhanon nga mga umurukoy hito ngada ha kahingpitan ngan kahiuli ha iya, ano an magigin buruhaton han Hadi nga hi Jesu-Kristo ngan han 144,000 nga mga hadi ngan mga saserdote katapos han Milenyo? “Niyan maabot an kataposan, nga amo na an iya pagtubyan ha ginhadian ngadto ha Dios, nga Amay; kon iya na pagwad-on an ngatanan nga pagdumara ngan an ngatanan nga kagamhanan, ngan gahum. Kay kinahanglan nga maghadi hiya, ngada han hibutang niya han ngatanan nga iya mga kaaway ha ilarom han iya mga tiil.”—1 Korinto 15:24, 25.
19 Kon ihatag na ni Kristo an Ginhadian ha Dios, paonan-o sasabuton an mga kasuratan nga nag-uunabi hito sugad nga ha kadayonan? Nga magpapabilin an mga kalamposan han Ginhadian ha kadayonan. Pasisidunggan hi Kristo ha kadayonan tungod han iya bahin ha pagbindikar han pagkasoberano han Dios. Kondi tungod kay an sala ngan kamatayon bug-os nga ginwara na, ngan an katawohan natubos na, magtatapos ini han pagkinahanglan ha iya sugad nga Manunubos. An Milenyo nga Pagmando han Ginhadian bug-os nga natuman na; salit diri na ginkikinahanglan an sanga nga gobyerno nga magpapabilin ha butnga ni Jehova ngan han masinugtanon nga katawohan. Dida hito, “an Dios nagin an ngatanan ha ngatanan.”—1 Korinto 15:28.
20. Paonan-o naton mahibabaroan kon ano an tidaraon ni Kristo ngan han 144,000?
20 Ano an magigin buruhaton ni Kristo ngan han iya kaupod nga mga magmarando katapos han Milenyo nga Pagmando? Waray ginsisiring an Biblia. Kondi, makakasiguro kita nga ihahatag ni Jehova ha ira an damu dugang nga mga pribilehiyo han pag-alagad ha ngatanan han iya mga linarang. Hinaot parig-onon naton ngatanan yana an pagkasoberano ni Jehova ngan hatagan kita hin kinabuhi nga waray kataposan, basi ha tidaraon, mabubuhi kita basi makita kon ano an gintuyo ni Jehova para han Hadi ngan han iya mga igkasi-hadi ngan mga saserdote, ngan han iya bug-os makatarag-ob nga uniberso!
Mga Punto ha Repaso
• Nagtitikahirani na kita ha ano nga pagbalhin ha pagmando?
• Paonan-o huhukman han Dios an magraot ngan an magtadong?
• Ano nga mga kahimtang an maeksister ha bag-o nga kalibotan?
• Paonan-o bug-os nga mabibindikar an pagkasoberano ni Jehova?
[Mga Pakiana]
[Mga Retrato ha pahina 17]
‘Magkakaada pagkabanhaw han magtadong ngan diri-magtadong’
[Retrato ha pahina 18]
An mga maunungon mahibabalik ha husto nga relasyon kan Jehova