Ako Bang Gihimo ang Balaang Espiritu nga Akong Kaugalingong Magtatabang?

ANG mga teologo, gawas pa sa mga tawo sa katibuk-an, adunay daghang ideya kon unsa ang balaang espiritu sa Diyos. Apan, dili kini angay nga ikalibog. Ang Bibliya klarong nagpatin-aw kon unsa ang balaang espiritu. Imbes nga usa ka persona, sama sa giingon sa uban, kini mao ang gamhanang aktibong puwersa nga gigamit sa Diyos sa pagtuman sa iyang kabubut-on.—Salmo 104:30; Buhat 2:33; 4:31; 2 Pedro 1:21.

Sanglit ang balaang espiritu dako kaayog kalangkitan sa katumanan sa mga katuyoan sa Diyos, buot gayod nato nga ang atong mga kinabuhi mahiuyon niini. Buot gayod nato kini nga mahimong atong kaugalingong magtatabang.

Magtatabang—Nganong Gikinahanglan?

Kay naglantaw sa iyang pagbiya sa yuta, gipasaligan ni Jesus ang iyang mga tinun-an: “Pagahangyoon ko ang Amahan ug siya mohatag kaninyo ug laing magtatabang nga mahiuban kaninyo hangtod sa hangtod.” Ug usab: “Bisan pa, ako nagasulti kaninyo sa kamatuoran, Maoy alang sa inyong kaayohan nga ako mobiya. Kay kon ako dili mobiya, ang magtatabang dili gayod moanha kaninyo; apan kon ako molakaw, ako siyang igapadala kaninyo.”—Juan 14:16, 17; 16:7.

Si Jesus naghatag sa iyang mga tinun-an ug usa ka seryosong buluhaton pinaagi sa pagsugo kanila: “Busa panglakaw kamo ug paghimog mga tinun-an sa katawhan sa tanang kanasoran, nga magabawtismo kanila sa ngalan sa Amahan ug sa Anak ug sa balaang espiritu, nga magatudlo kanila sa pagsunod sa tanang butang nga akong gisugo kaninyo.” (Mateo 28:19, 20) Dili kini sayon nga tahas, tungod kay pagatumanon kini atubangan sa pagsupak.—Mateo 10:22, 23.

Ang pagsupak gikan sa gawas pagaduyogan sa usa ka sukod sa panagbingkil gikan sa sulod sa kongregasyon. “Karon ako maawhagong magtambag kaninyo, mga igsoon,” gisulatan ni Pablo ang mga Kristohanon sa Roma niadtong mga 56 K.P., “nga ipunting ang inyong mata kanilang kinsa nagapahinabog panagkabahin ug mga higayong magpapandol sukwahi sa pagtulon-an nga inyong nakat-onan, ug maglikay kanila.” (Roma 16:17, 18) Kining kahimtanga mosamot sa dihang mamatay na ang mga apostoles. Si Pablo nagpasidaan: “Ako nahibalo nga human sa akong pagbiya ang malupigong mga lobo mosulod sa taliwala kaninyo ug dili magtratar sa panon uban ang kalumo, ug gikan sa taliwala kaninyo mismo may mga tawo nga motungha ug magasultig linubag nga mga butang aron ipahilayo ang mga tinun-an sunod sa ilang kaugalingon.”—Buhat 20:29, 30.

Gikinahanglan ang tabang sa Diyos aron masanta kining maong mga kababagan. Iya kining gihimo pinaagi kang Jesus. Human sa iyang pagkabanhaw, sa adlaw sa Pentekostes 33 K.P., mga 120 sa iyang mga sumusunod “tanan napuno sa balaang espiritu.”—Buhat 1:15; 2:4.

Nasabtan sa mga tinun-an nga ang balaang espiritu nga gibubo nianang higayona mao ang tabang nga gisaad ni Jesus. Walay duhaduha mas nasabtan na nila nianang tungora ang ilhanan nga gihatag ni Jesus: “Ang magtatabang, ang balaang espiritu, nga ipadala sa Amahan sa akong ngalan, kana siya motudlo kaninyo sa tanang butang ug ibalik sa inyong mga panumdoman ang tanang butang nga akong gisulti kaninyo.” (Juan 14:26) Iya usab kining gitawag ‘ang magtatabang, ang espiritu sa kamatuoran.’—Juan 15:26.

Sa Unsang Paagi ang Espiritu Usa ka Magtatabang?

Ang espiritu magsilbing magtatabang sa daghang paagi. Una, si Jesus nagsaad nga kini magpahinumdom sa iyang mga tinun-an sa mga butang nga iyang gisulti kanila. Sa pagsulti niini labaw pa ang iyang buot ipasabot kay sa pagtabang lamang kanila nga mahinumdom sa mga pulong. Ang espiritu magatabang kanila nga makasabot sa mas lawom nga kahulogan ug kahinungdanon sa iyang  gitudlo. (Juan 16:12-14) Sa mubo, ang espiritu magatultol sa iyang mga tinun-an aron mas masabtan ang kamatuoran. Si apostol Pablo misulat sa ulahi: “Nganhi kanato gipadayag sa Diyos kini sila pinaagi sa iyang espiritu, kay ginasusi sa espiritu ang tanang butang, bisan ang lawom nga mga butang sa Diyos.” (1 Corinto 2:10) Aron ikapasa sa dinihogang mga sumusunod ni Jesus ang tukmang kahibalo ngadto sa uban, ang ilang kaugalingong pagsabot kinahanglang lig-on ug pundasyon.

Ikaduha, gitudloan ni Jesus ang iyang mga tinun-an sa pag-ampo ug sa paghimo niini kanunay. Kon sila dili segurado usahay kon unsay ilang iampo, ang espiritu mahimong motabang o mangaliya alang kanila. “Sa samang paagi ang espiritu usab moduyog nga may pagtabang sa atong mga kahuyangon; kay ang suliran sa kon unsay atong iampo ingon nga kinahanglan nato kita wala mahibalo, apan ang espiritu mismo mangamuyo alang kanato uban ang mga pag-agulong wala-mabungat.”—Roma 8:26.

Ikatulo, ang espiritu magatabang sa mga tinun-an ni Jesus sa pagdepensa sa kamatuoran diha sa publiko. Iyang gipasidan-an sila: “Ila kamong itugyan sa lokal nga mga korte, ug sila maglapdos kaninyo diha sa ilang mga sinagoga. Oo, taralon kamo atubangan sa mga gobernador ug mga hari tungod ug alang kanako, ingong usa ka pagsaksi ngadto kanila ug sa kanasoran. Bisan pa, sa dihang ila kamong itugyan, ayaw kabalaka mahitungod sa kon unsaon o unsay inyong isulti; kay unsay inyong isulti igahatag kaninyo nianang taknaa; kay ang magapamulong dili lamang kamo, apan ang espiritu sa inyong Amahan mao ang mamulong pinaagi kaninyo.”—Mateo 10:17-20.

Ang balaang espiritu magatabang usab sa pagpaila sa Kristohanong kongregasyon ug magpalihok sa mga membro niini sa paghimog maalamong personal nga mga desisyon. Atong hisgotan kining duha ka bahin niining maong ulohan sa mas detalyadong paagi ug tan-awon kon unsa ka hinungdanon kini alang kanato karon.

Magsilbing Ilhanan

Sa daghang siglo ang mga Hudiyo nag-alagad ilalom sa Moisesnong Balaod ingong pinili nga katawhan sa Diyos. Tungod kay ilang gisalikway si Jesus ingong Mesiyas, iyang gitagna nga sa dili madugay sila mismo igasalikway: “Wala ba gayod ninyo mabasahi sa mga Kasulatan, ‘Ang bato nga gisalikway sa mga magtutukod mao ang nahimong pangulong bato nga pamag-ang. Gikan kang Jehova kini nahimo nga ingon, ug makapahibulong kini sa atong mga mata’? Mao kini nganong ako magaingon kaninyo, Ang gingharian sa Diyos kuhaon gikan kaninyo ug ihatag sa nasod nga magpatunghag mga bunga niini.” (Mateo 21:42, 43) Sa dihang ang Kristohanong kongregasyon gitukod niadtong Pentekostes 33 K.P., ang mga sumusunod ni Kristo nahimong ang ‘nasod nga nagpatunghag mga bunga niini.’ Sukad niadto, kining maong kongregasyon mao na ang agianan sa komunikasyon sa Diyos. Aron mailhan sa mga tawo kining pagbalhin sa pabor sa Diyos, ang Diyos nagtaganag tinong ilhanan.

Panahon sa Pentekostes ang balaang espiritu nakapasulti sa mga tinun-an sa mga pinulongang wala gayod nila matun-i, nga maoy hinungdan nga ang mga tumatan-aw nahingangha ug nangutana: “Naunsa ba nga kita nagapakadungog man, matag usa kanato, sa iyang kaugalingong natawhang pinulongan?” (Buhat 2:7, 8) Ang katakos sa pagsulti sa wala mahibaloing mga pinulongan, lakip sa “daghang tilimad-on ug mga ilhanan pinaagi sa mga apostol,” mitultol sa mga tulo ka libong tawo sa pag-ila nga ang espiritu sa Diyos tinuod nga nagalihok.—Buhat 2:41, 43.

Dugang pa, pinaagi sa pagpatungha sa “bunga sa espiritu”—gugma, kangaya, pakigdait, taas-nga-pailob, kalulot, pagkamaayo, pagtuo, kalumo, pagpugong-sa-kaugalingon—ang mga tinun-an ni Kristo klarong nailhan ingong mga alagad sa Diyos. (Galacia 5:22, 23) Ang gugma, sa pagkatinuod, nagpaila sa matuod nga Kristohanong kongregasyon sa talagsaong paagi. Si Jesus nagtagna: “Pinaagi niini ang tanan makaila nga kamo akong mga tinun-an, kon kamo adunay gugma taliwala kaninyo.”—Juan 13:34, 35.

Gidawat sa mga membro sa unang Kristohanong kongregasyon ang pagtultol sa balaang espiritu sa Diyos ug gipahimuslan ang tabang nga gitanyag niini. Bisan tuod ang mga Kristohanon karon nahibalo nga ang Diyos dili na karon magbanhaw sa mga patay ug maghimog mga milagro sama sa unang siglo, ilang gitugotan ang bunga sa espiritu sa Diyos sa pagpaila kanila ingong tinuod nga mga tinun-an ni Jesu-Kristo.—1 Corinto 13:8.

Usa ka Magtatabang sa Paghimog Personal nga mga Desisyon

Ang Bibliya maoy produkto sa balaang espiritu. Busa, sa dihang tugotan nato ang atong kaugalingon nga makombinsir sa Bibliya, maora bag ang balaang espiritu maoy nagtudlo kanato. (2 Timoteo 3:16, 17) Makatabang kini kanato sa paghimog  maalamong mga desisyon. Apan gitugotan ba nato kini nga motabang kanato?

Komosta ang bahin sa atong pagpilig trabaho? Ang balaang espiritu makapaarang kanato sa paglantaw sa gilaomang trabaho sumala sa panglantaw ni Jehova. Ang atong trabaho kinahanglang mahiuyon sa mga prinsipyo sa Bibliya, ug mas maayo kon kini makatabang kanato sa pagpangagpas sa teokratikanhong mga tumong. Ang suweldo o kabantog ug dungog nga nalangkit sa usa ka trabaho sa pagkatinuod dili dakog importansiya. Ang mas hinungdanon mao kon kini ba makatagana sa atong mga kinahanglanon sa kinabuhi ug mohatag kanatog igong panahon ug higayon sa pagtuman sa atong Kristohanong mga obligasyon.

Ang pagpangandoy nga malipay sa kinabuhi maoy normal ug husto. (Ecclesiastes 2:24; 11:9) Busa ang usa ka timbang nga Kristohanon mahimong maglingawlingaw aron molagsik ug malipay. Apan angay niyang pilion ang kalingawan nga mopabanaag sa bunga sa espiritu, dili ang matang nga mopasundayag sa “mga buhat sa unod.” Si Pablo nagpatin-aw: “Karon dayag ang mga buhat sa unod, ug kini sila mao ang pakighilawas, pagkadili-hinlo, malaw-ayng panggawi, idolatriya, pagbuhat sa espiritismo, mga panagdumtanay, panag-away, pangabugho, mga pagsinta sa kasuko, mga pakigtigi, mga panagkabahin, mga sekta, mga kasina, mga paghuboghubog, mga hudyaka, ug mga butang nga sama niini.” Kinahanglan usab nga likayang ‘magpakaimportante sa kaugalingon, mag-aghat ug panag-indigay sa usag usa, magsinahay sa usag usa.’—Galacia 5:16-26.

Ingon usab niini ang pagpilig mga higala. Maalamong pilion sila sumala sa espirituwalidad, dili sumala sa panggawas nga dagway o mga kabtangan. Ang tawong si David dayag nga higala sa Diyos, tungod kay gihubit siya sa Diyos ingong “usa ka tawong gikahimut-an sa [iyang] kasingkasing.” (Buhat 13:22) Wala manumbaling sa panggawas nga dagway, gipili sa Diyos si David nga mahimong hari sa Israel, sumala sa prinsipyo nga: “Ang pagtan-aw sa tawo dili sama sa pagtan-aw sa Diyos, tungod kay ang tawo nagatan-aw sa makita sa iyang mga mata; apan alang kang Jehova, siya nagatan-aw sa kasingkasing.”—1 Samuel 16:7.

Linibo ka panaghigalaay ang wala modurar tungod kay gibase kini sa panggawas nga dagway o sa mga kabtangan. Ang mga panaghigalaay nga gibase sa walay-kasegurohang bahandi mahimong kalit nga matapos. (Proverbio 14:20) Ang dinasig-sa-espiritu nga Pulong sa Diyos nagtambag kanato nga kon magpilig mga higala, angay natong pilion kadtong makatabang kanato sa pag-alagad kang Jehova. Kini nagsulti kanato nga isentro ang pagtagad diha sa paghatag inay kay sa pagdawat tungod kay ang paghatag mopatunghag mas dakong kalipay. (Buhat 20:35) Ang panahon ug pagmahal maoy lakip sa bililhong mga butang nga atong ikahatag sa atong mga higala.

Alang sa usa ka Kristohanon nga nangitag kapikas sa kaminyoon, ang Bibliya naghatag ug dinasig-sa-espiritu nga tambag. Sa usa ka paagi, kini nag-ingon: ‘Tan-aw saylo pa sa nawong ug porma sa lawas. Tan-awa ang mga tiil.’ Ang mga tiil? Oo, niini nga diwa: Kini ba gigamit sa pagtuman sa buluhaton ni Jehova sa pagsangyaw sa maayong balita, ug busa kini ba, ingnon ta, matahom sa iyang panan-aw? Kini ba sinul-oban sa mensahe sa kamatuoran ug sa maayong balita sa pakigdait? Atong mabasa: “Pagkatahom ibabaw sa kabukiran sa mga tiil sa usa nga nagdalag maayong balita, ang usa nga nagmantalag pakigdait, ang usa nga nagdalag maayong balita sa butang nga mas maayo, ang usa nga nagmantalag kaluwasan, ang usa nga nag-ingon ngadto sa Zion: ‘Ang imong Diyos nahimong hari!’”—Isaias 52:7; Efeso 6:15.

Kay nagkinabuhi kita sa “makuyaw nga mga panahong lisod sagubangon,” kita nanginahanglag tabang sa pagbuhat sa kabubut-on sa Diyos. (2 Timoteo 3:1) Ang magtatabang, ang balaang espiritu sa Diyos, naghatag ug gamhanang pagpaluyo sa buluhaton sa mga Kristohanon sa unang siglo, lakip sa pagkahimong ilang kaugalingong magtatabang. Ang makugihong pagtuon sa Pulong sa Diyos, nga usa ka produkto sa balaang espiritu, maoy pangunang paagi nga ato usab nga mahimo ang balaang espiritu nga atong kaugalingong magtatabang. Gihimo ba nato kini?

 [Tibuok-panid nga hulagway sa panid 23]