Be Yẹn Ko Yí Gbigbọ Wiwe Do Basi Alọgọtọ Mẹdetiti Tọn Ṣie Ya?

SINSẸ̀N-NUPLỌNMẸTỌ lẹ, gọna gbẹtọ paa lẹ, tindo linlẹn voovo gando nuhe gbigbọ wiwe Jiwheyẹwhe tọn yin go. Ṣogan, ayihaawe tintindo mọnkọtọn mayin dandannu gba. Biblu basi zẹẹmẹ nuhe gbigbọ wiwe yin tọn hezeheze. Kakati dọ e ni yin gbẹtọ de, dile mẹdelẹ sọalọakọ́n do, huhlọn-yido-wazọ́n huhlọnnọ he Jiwheyẹwhe nọ yizan to ojlo etọn lẹ hinhẹndi mẹ wẹ e yin.—Psalm 104:30; Owalọ lẹ 2:33; 4:31; 2 Pita 1:21.

To whenuena e yindọ gbigbọ wiwe tindo kọndopọ pẹkipẹki hẹ lẹndai Jiwheyẹwhe tọn lẹ wiwadotana sọmọ, mí na jlo dọ gbẹzan mítọn lẹ ni tin to gbekọndopọmẹ hẹ ẹ. Mí dona jlo dọ e ni yin alọgọtọ mẹdetiti tọn mítọn.

Alọgọtọ de—Naegbọn Yè Tindo Nuhudo Etọn?

To nukundido mẹ na yìyì sọn aigba ji etọn, Jesu vọ́ jide na devi etọn lẹ dọmọ: “Yẹn nasọ hodẹ̀ hlan Otọ́, ewọ nasọ na [alọgọtọ NW ] devo mì, na dọ ewọ nido tin to mì dè kakadoi.” Podọ ga: “Ganṣo nugbo yẹn dọ hlan mì; E tin jẹ na mì dọ yẹn ni yì: na eyin yẹn ma yì, [alọgọtọ] lọ ma na wá mì dè gba: ṣigba eyin yẹn yì, yẹn na do e hlan mì.”—Johanu 14:16, 17; 16:7.

Jesu na azọngban titengbe de devi etọn lẹ gbọn didọna yé dali dọmọ: “Enẹwutu mì yì, bo hẹn akọta lẹpo zun nuplọntọ, bosọ nọ baptizi yé do oyín Otọ́ tọn, po Ovi tọn po, po [gbigbọ wiwe] tọn po mẹ: na mì ni sọ nọ plọn yé nado nọ do ayi onú lẹpo go, nudepope he yẹn degbena mì.” (Matiu 28:19, 20) Ehe ma na yin azọngban he bọawu de gba, na e dona yin wiwadotana to nukundiọsọmẹ glọ.—Matiu 10:22, 23.

To yidogọ mẹ na nukundiọsọmẹ sọn gbonu, gbèmanọpọ nasọ tin to agun lọ ṣẹnṣẹn jẹ obá de mẹ. Paulu wlan hlan Klistiani he tin to Lomu to nudi owhe 56 W.M. lẹ dọmọ: “Mẹmẹsunnu emi, yẹn vẹ̀ mì, mì nọ payi yé he nọ hẹn kinklan po ahlìda po wá lẹ, ehe jẹagọdo oplọn he mì plọn go; bosọ nọla na yé.” (Lomunu lẹ 16:17, 18) Ninọmẹ ehe na ylan deji dile apọsteli lẹ na ko kú vọ̀. Paulu na avase dọmọ: “Na yẹn yọ́n ehe dọ, to yìyì ṣie godo, ohla he dobu na biọ mì mẹ, ma pò apó yinte. Podọ to mìlọsu mẹ wẹ sunnusi lẹ na fọ́n sọn bo na to onú agọ̀ dọ, nado dọ̀n nuplọntọ lẹ do godo yetọn.”—Owalọ lẹ 20:29, 30.

Nuhudo tin na alọgọ Jiwheyẹwhe tọn nado nọavunte sọta aliglọnnamẹnu mọnkọtọn lẹ. E wàmọ gbọn Jesu gblamẹ. To fọnsọnku etọn godo, to azán Pẹntikọsti 33 W.M. gbè, nudi hodotọ 120 etọn delẹ “pó sọ gọ́ na gbigbọ wiwe.”—Owalọ lẹ 1:15; 2:4.

Devi lẹ yọnẹn dọ alọgọ he Jesu ko dopagbe etọn lọ wẹ gbigbọ wiwe heyin kinkọn jẹgbonu to nujijọ ehe whenu yin. Matin ayihaawe yé mọnukunnujẹ mẹyinyọnẹn he Jesu ko wleawuna todin lọ mẹ ganji dọmọ: “[Alọgọtọ] lọ, he yin gbigbọ wiwe, mẹhe Otọ́ na dohlan to oyín ṣie mẹ, ewọ na plọn onú lẹpo mì, bo nasọ hẹn nuhe yẹn dọ hlan mì lẹpo wá oflin mìtọn mẹ.” (Johanu 14:26, wekun flinflin lẹ yin mítọn.) E sọ ylọ ẹ dọ ‘alọgọtọ lọ, yèdọ gbigbọ nugbo tọn lọ’.—Johanu 15:26.

Nawẹ Gbigbọ lọ Yin Alọgọtọ de Gbọn?

Gbigbọ lọ na yinuwa taidi alọgọtọ to aliho voovo lẹ mẹ. Tintan, Jesu dopagbe dọ e na hẹn nuhe e ko dọna devi etọn lẹ lẹkọ wá ayiha yetọn mẹ. To ehe didọ mẹ nuhe dọ e te zẹẹmẹdo nususu hugan alọgigọna yé nado flin hodidọ lẹ poun. Gbigbọ na gọalọna yé nado mọnukunnujẹ zẹẹmẹ sisosiso po nujọnu-yinyin nuhe e plọn yé lẹ po tọn mẹ. (Johanu 16:12-14) Do glido, gbigbọ lọ na deanana devi etọn lẹ nado tindo nukunnumọjẹnumẹ sisosiso nugbo lọ tọn. Apọsteli Paulu wlan to godo mẹ dọmọ: “Na  Jiwheyẹwhe ko dè yé hia míwlẹ gbọn [gbigbọ] etọn mẹ: na [gbigbọ] wẹ to dodinna onú lẹpo, mọwẹ, onú sisosiso Jiwheyẹwhe tọn lẹ.” (1 Kọlintinu lẹ 2:10) Na hodotọ yiamisisadode Jesu tọn lẹ nido sọgan dọ oyọnẹn he pegan lọ na mẹdevo lẹ, nukunnumọjẹnumẹ yé lọsu lẹ tọn dona dolido ganji.

Awetọ, Jesu plọn devi etọn lẹ nado nọ hodẹ̀ podọ nado nọ wàmọ gbọzangbọzan. Eyin yé ma tlẹ tindo nujikudo to whedelẹnu dogbọn nuhe yé dona hodẹ̀ na lẹ dali, gbigbọ lọ sọgan yihodọ do ota yetọn mẹ kavi gọalọna yé. “Mọdopolọ wẹ [gbigbọ] lọ ga to alọgọna madogán mítọn: na mí ma yọ́n nuhe mí na hodẹ̀ na dile e jẹ na mí do; ṣigba [gbigbọ] lọsu yí winwẹn he yè ma sọgan dọtọ́n do to vẹ̀vẹ̀ na mí.”—Lomunu lẹ 8:26.

Atọ̀ntọ, gbigbọ na gọalọna devi Jesu tọn lẹ to avunlọ-yíyí na nugbo lọ to gbangba mẹ. E na avase yé dọmọ: “Yé na hẹn mì yì tòhódọtọ lẹ dè, yé nasọ hò mì to sinagọgu yetọn lẹ mẹ; yè na hẹn mì yì togán lẹ po ahọlu lẹ po nukọn na yẹn wutu, na okunnude do yé po [kosi] lẹ po go. Ṣigba whenuena yé yí mì do alọ yetọn mẹ, mì lẹn dọ, nawẹ kavi etẹ mì na dọ blo: na yè na na nuhe mì na dọ mì to ojlẹ nẹ mẹ. Na e ma yin mìwlẹ wẹ to hodọ gba, ṣigba gbigbọ Otọ́ mìtọn tọn wẹ to hodọ to mì homẹ.”—Matiu 10:17-20.

Gbigbọ wiwe nasọ gọalọ nado yọ́n agun Klistiani tọn bosọ whàn hagbẹ etọn lẹ nado nọ basi nudide nuyọnẹn tọn mẹdetiti tọn lẹ. Mì gbọ mí ni dọhodo adà awe to hosọ ehelẹ mẹ ji to gigọ́mẹ bosọ pọ́n zẹẹmẹ he yé tindo na míwlẹ to egbehe.

Nado Yinuwa Taidi Ohia Mẹyinyọnẹn Tọn De

Ju lẹ sẹ̀n to Osẹ́n Mose tọn glọ taidi gbẹtọ dide Jiwheyẹwhe tọn lẹ na owhe kanweko susu. Na yé gbẹ́ Jesu dai taidi Mẹssia lọ wutu, ewọ dọ dọdai dọ to madẹnmẹ yé lọsu na yin gbigbẹdai dọmọ: “Be mìwlẹ ma ko hia to Owe-wiwe lẹ mẹ gbede, dọ, zannu he didotọ lẹ gbẹ́ dai, doponẹ wẹ yè hẹn yin gángánsu họlọnglọnẹn tọn, ehe wẹ sọn Oklunọ dè, e sọ jiawu to nukun mítọn mẹ. Enẹwutu wẹ yẹn dọ hlan mì, dọ, yè na yí ahọludu Jiwheyẹwhe tọn sọn mì dè, yè nasọ yí na akọta de he na dè sinsẹ́n etọn jẹgbonu.” (Matiu 21:42, 43) Tlolo he agun Klistiani tọn yin didoai to Pẹntikọsti 33 W.M., hodotọ Klisti tọn lẹ lẹzun ‘akọta de he to sinsẹ́n etọn lẹ dè jẹgbonu.’ Sọn whenẹnu sọyi, agun ehe wẹ yin asisa hodọnamẹ Jiwheyẹwhe tọn. Nado gọalọna gbẹtọ lẹ nado yọnẹn dọ nukundagbe sọn olọn mẹ ko yin tẹndiọna, Jiwheyẹwhe wleawuna ohia mẹyinyọnẹn tọn de he họnwun taun.

To azán Pẹntikọsti tọn gbè gbigbọ wiwe hẹn devi lẹ penugo nado dọho to ogbè he yé ma ko plọn pọ́n gbede lẹ mẹ, bo hẹn nupọntọ lẹ nado yinuwa po awujiji po bosọ kanse dọmọ: “Etẹwutu wẹ mí mẹdopodopo do to sisè to ogbè mítọn mẹ, to fie yè ji mí te?” (Owalọ lẹ 2:7, 8) Nugopipe nado dọho to ogbè he mayin yinyọnẹn lẹ mẹ, to pọmẹ hẹ “azọ́njiawu po ohia susu po [he] yè gbọn alọ apọsteli lẹ tọn mẹ wà,” hẹn gbẹtọ foofọtọ́n delẹ nado yọnẹn dọ gbigbọ Jiwheyẹwhe tọn wẹ to nuyiwa na nugbo tọn.—Owalọ lẹ 2:41, 43.

Podọ ga, gbọn “sinsẹ́n gbigbọ tọn” lẹ didetọn jẹgbonu dali—yèdọ owanyi, ayajẹ, jijọho, linsinsinyẹn, homẹdagbe, dagbewà, yise, walọmimiọn, mawazẹjlẹgo—devi Klisti tọn lẹ yin yinyọnẹn hezeheze taidi devizọnwatọ Jiwheyẹwhe tọn lẹ. (Galatianu lẹ 5:22, 23) Na nugbo tọn, owanyi wẹ nọ do agun nugbo Klistiani tọn hia hugan. Jesu ko dọ jẹnukọn dọmọ: “Gbọn ehe dali wẹ gbẹtọ lẹpo na yọnẹn dọ nuplọntọ ṣie wẹ mì, eyin mìwlẹ tindo owanyi hlan mìnọzo.”—Johanu 13:34, 35.

Hagbẹ fliflimẹ agun Klistiani tọn lẹ kẹalọyi anademẹ gbigbọ wiwe Jiwheyẹwhe tọn bosọ basi yizan dagbe alọgọ he e namẹ tọn. Dile e yindọ Klistiani lẹ yọnẹn to egbehe dọ Jiwheyẹwhe ma to oṣiọ lẹ fọ́n bosọ to azọ́njiawu lẹ wà dile e yin do to owhe kanweko tintan whenu, yé nọ dike sinsẹ́n gbigbọ Jiwheyẹwhe tọn lẹ ni do yé hia taidi mẹhe yin devi nujọnu tọn Jesu Klisti tọn lẹ.—1 Kọlintinu lẹ 13:8.

Alọgọtọ de to Nudide Mẹdetiti Tọn lẹ Bibasi Mẹ

Biblu yin nudetọn gbigbọ wiwe tọn de. Enẹwutu, to whenuena mí na dotẹnmẹ mídelẹ nado yin linlẹndiọna gbọn Biblu dali, e nọ taidi dọ gbigbọ wiwe lọ to anadena mí wẹ nkọtọn. (2 Timoti 3:16, 17) E sọgan gọalọna mí nado basi nudide nuyọnẹn tọn lẹ. Ṣigba be mí nọ dike e ni wàmọ ya?

 Etẹwẹ dogbọn nudide azọ́n kavi agbasazọ́n mítọn tọn dali? Gbigbọ wiwe na hẹn mí penugo nado pọ́n agbasazọ́n sọgodo tọn de hlan sọn pọndohlan Jehovah tọn mẹ. Agbasazọ́n mítọn dona tin to kọndopọ mẹ hẹ nunọwhinnusẹ́n Biblu tọn lẹ, podọ e na pọnte hugan dọ e ni gọalọna mí nado doafọna yanwle yẹwhehọluduta tọn lẹ. Sunzankuẹ kavi yindidi po gigo he agbasazọ́n de tindo po mayin nujọnu sọmọ na nugbo tọn gba. Nuhe yin nujọnu hugan wẹ yindọ vlavo e wleawuna dandannu gbẹ̀mẹ tọn lẹ na mí bosọ na dotẹnmẹ ojlẹ po dotẹnmẹ hundote he pé tọn po mí nado hẹn azọngban Klistiani tọn mítọn lẹ di.

Ojlo nado duvivi ogbẹ̀ tọn yin nujọnu bosọ sọgbe. (Yẹwhehodọtọ 2:24; 11:9) Enẹwutu Klistiani he tin to jlẹkaji de sọgan doafọna ayidedai na kọfanamẹ podọ na awuvivi. Ṣigba e dona dè ayidedai he nọ do sinsẹ́n gbigbọ tọn lẹ hia, e mayin wunmẹ he nọ do “azọ́n agbasalan tọn lẹ” hia gba. Paulu basi zẹẹmẹ dọmọ: “Azọ́n agbasalan tọn lẹ sọawuhia dinvie, he yin ehelẹ: ayọdide, ogalilọ, mawé, wantuntun, boṣiọ-sinsẹ̀n, owọ́n, okẹ̀n, avùn, awuwhàn lẹ, homẹgble, wiwọ́, atẹ̀, plọngiglọ, nuvẹun, ahànnumu, gbẹduzẹjlẹgo, po onú mọnkọtọn lẹ po.” Lilẹzun mẹhe “to gigo ovọ́ jlo . . . , to homẹhẹngblena mínọzo mẹ, to mínọzo nuvivẹun mẹ” lẹ lọsu dona yin didapana.—Galatianu lẹ 5:16-26.

Onú dopolọ wẹ e yin na nuhe dù họntọn lẹ dide. Nuyọnẹnnu wẹ e yin nado dè yé sọgbe hẹ gbigbọnọ-yinyin, e mayin sọgbe hẹ awusọhia gbonu tọn kavi nutindo lẹ gba. E họnwun dọ dawe lọ Davidi yin họntọn Jiwheyẹwhe tọn, na Jiwheyẹwhe basi zẹẹmẹ etọn taidi ‘mẹhe ahun etọn kẹalọyi de.’ (Owalọ lẹ 13:22) To awusọhia gbonu tọn gbigbẹdai mẹ, Jiwheyẹwhe dè Davidi nado yin ahọlu Islaeli tọn, sọgbe hẹ nunọwhinnusẹ́n lọ dọmọ: “Na OKLUNỌ ma nọ mọnu dile gbẹtọ mọ do gba; na gbẹtọ nọ to awusọhia gbonu go tọn dali pọ́n, ṣigba ayiha pọ́n wẹ OKLUNỌ te.”—1 Samuẹli 16:7.

Họntọnjiji fọtọ́n susu wẹ ko gbakija na yé yin zize sinai do awusọhia gbonu tọn kavi nutindo lẹ ji wutu. Họntọnjiji heyin zize sinai do adọkun he yè ma sọgan deji do lẹ ji nọ wá vivọnu to ajiji mẹ. (Howhinwhẹn lẹ 14:20) Ohó Jiwheyẹwhe tọn he gbigbọ etọn gbọdo na avase mí dọ to whenuena mí to họntọn lẹ dè, mí dona ṣinyan mẹhe sọgan gọalọna mí nado sẹ̀n Jehovah lẹ. E dọna mí nado ze ayidonugo do ninamẹ ji hugan kakati ni yin do mimọyi ji na ninamẹ nọ hẹn ayajẹ daho wá wutu. (Owalọ lẹ 20:35) Ojlẹ po owanyi zogbe po tin to onú họakuẹ hugan he mí sọgan na họntọn mítọn lẹ mẹ.

Na Klistiani he to alọwlemẹ dín de, Biblu wleawuna avase heyin gbigbọdo gbọn gbigbọ dali lẹ. To apadewhe, e dọmọ: ‘Pọnnu zẹ̀ nukunmẹ po whanpẹ agbasa tọn po go. Pọ́n afọ lẹ.’ Etẹwutu e do yin afọ lẹ? Mọwẹ, to linlẹn ehe mẹ dọ: Be yé to yinyin yiyizan na azọ́n Jehovah tọn wiwà heyin yẹwheho wẹndagbe lọ tọn didọ, podọ be na enẹwutu yé yọnwhanpẹ, to yẹhiadonu liho, to pinpọn mẹ ya? Be yè yí owẹ̀n nugbo po wẹndagbe jijọho tọn po do doafọpa na yé ya? Mí hia dọmọ: “Na afọ ewọ he hẹn wẹndagbe wá tọn yin whanpẹnọ to osó ji le, he to owẹ̀n jijọho tọn dó, he to whlẹngán tọn dọ; he dọ hlan Ziọni dọ Jiwheyẹwhe towe duahọlu.”—Isaia 52:7; Efesunu lẹ 6:15.

Na míwlẹ to gbẹnọ to ‘ojlẹ he sinyẹnawu nado pehẹ lẹ’ mẹ wutu, mí tindo nuhudo alọgọ tọn to ojlo Jiwheyẹwhe tọn wiwà mẹ. (2 Timoti 3:1) Alọgọtọ lọ, yèdọ gbigbọ wiwe Jiwheyẹwhe tọn, na godonọnamẹ huhlọnnọ de hlan azọ́n Klistiani lẹ tọn to owhe kanweko tintan whenu, gọna yinyin alọgọtọ mẹdetiti tọn yetọn. Sọwhiwhe yíyí do plọn Ohó Jiwheyẹwhe tọn, heyin nudetọn gbigbọ wiwe tọn de, yin aliho titengbe dopo he mẹ mílọsu sọgan yí gbigbọ wiwe do basi alọgọtọ mẹdetiti tọn mítọn te. Be mí ko wàmọ ya?