Ginhimo Ko Bala ang Balaan nga Espiritu nga Akon Personal nga Mananabang?

ANG mga teologo, pati na ang mga tawo sa kabilugan, may lainlain nga mga ideya tuhoy sa kon ano ang balaan nga espiritu sang Dios. Apang, indi na ina kuntani kinahanglan. Ginapaathag sing maayo sang Biblia kon ano ang balaan nga espiritu. Sa baylo nga isa ka persona, subong sang ginasiling sang iban, ini amo ang gamhanan aktibo nga kusog nga ginagamit sang Dios sa paghimo sang iya kabubut-on.—Salmo 104:30; Binuhatan 2:33; 4:31; 2 Pedro 1:21.

Bangod naangot gid ang balaan nga espiritu sa katumanan sang mga katuyuan sang Dios, luyag naton magkabuhi sing nahisuno sa sini. Luyag naton ini mangin aton personal nga mananabang.

Mananabang—Ngaa Kinahanglanon?

Ginahunahuna ang iya pagbiya sa duta, ginpasalig ni Jesus ang iya mga disipulo: “Magapangayo ako sa Amay kag magahatag sia sa inyo sing isa pa ka mananabang nga mangin kaupod ninyo sing dayon.” Kag sa liwat: “Walay sapayan, nagasugid ako sa inyo sang kamatuoran, Para sa kaayuhan ninyo nga ako magtaliwan. Kay kon indi ako magtaliwan, ang mananabang indi mag-abot sa inyo; apang kon magtaliwan ako, ipadala ko sia sa inyo.”—Juan 14:16, 17; 16:7.

Ginhatagan ni Jesus ang iya mga disipulo sing isa ka serioso nga tulumanon paagi sa pagsugo sa ila: “Busa lakat kamo kag maghimo sing mga disipulo sa mga tawo sa tanan nga kapungsuran, nagabawtismo sa ila sa ngalan sang Amay kag sang Anak kag sang balaan nga espiritu, nagatudlo sa ila nga tumanon ang tanan nga butang nga ginsugo ko sa inyo.” (Mateo 28:19, 20) Indi ini mahapos nga tulumanon, kay dapat ini himuon walay sapayan sang pagpamatok.—Mateo 10:22, 23.

Ang pagpamatok halin sa guwa gin-updan sang pila ka di-pag-ugyunay sa sulod sang kongregasyon. “Nagapakiluoy ako karon sa inyo, mga kauturan,” sulat ni Pablo sa mga Cristiano sa Roma sang mga 56 C.E., “tandai ninyo ang mga ginabangdan sang mga pagbinahinbahin kag mga tion sang kasandaran nga supak sa panudlo nga inyo natun-an, kag likawi sila.” (Roma 16:17, 18) Magalain pa gid ini sa tion nga mapatay ang mga apostoles. Nagpaandam si Pablo: “Nahibaluan ko nga kon makahalin na ako magasulod ang mapiguson nga mga lobo sa tunga ninyo kag indi pakig-angutan ang panong sing mapinalanggaon, kag gikan sa inyo mismo magabangon ang mga tawo kag magpamulong sing tiko nga mga butang agod ipahilayo ang mga disipulo sunod sa ila.”—Binuhatan 20:29, 30.

Kinahanglan ang bulig sang Dios agod maatubang sing madinalag-on ining mga balagbag. Nagbulig sia paagi kay Jesus. Sa tapos si Jesus mabanhaw, sang adlaw sang Pentecostes 33 C.E., ang iya mga 120 ka sumulunod ‘napuno tanan sang balaan nga espiritu.’—Binuhatan 1:15; 2:4.

Nahangpan sang mga disipulo nga ang balaan nga espiritu nga ginpasagahay sini nga okasyon amo ang tabang nga ginsaad ni Jesus. Walay duhaduha nga nahangpan nila karon sing mas maayo ang pagpakilala nga ginhatag ni Jesus: “Ang mananabang, ang balaan nga espiritu, nga ipadala sang Amay sa akon ngalan, magatudlo sia sa inyo sang tanan nga butang kag magapahanumdom sa inyo sang tanan nga butang nga ginsiling ko sa inyo.” (Juan 14:26) Gintawag man niya ini nga ‘mananabang, ang espiritu sang kamatuoran.’—Juan 15:26.

Paano Mangin Mananabang ang Espiritu?

Nangin mananabang ang espiritu sa madamong paagi. Una, nagsaad si Jesus nga ipahanumdom sini sa iya mga disipulo ang mga butang nga ginsiling niya sa ila. Paagi sini ginapakita niya nga indi lamang niya sila buligan sa pagdumdom sang mga pulong. Ang espiritu magabulig sa ila nga mahangpan ang madalom pa nga kahulugan kag importansia sang gintudlo niya. (Juan 16:12-14) Sa malip-ot, tuytuyan sang espiritu ang iya mga disipulo agod mahangpan sing maayo pa ang kamatuoran. Nagsulat sang ulihi si apostol Pablo: “Sa aton  ginpahayag ini sang Dios paagi sa iya espiritu, kay ang espiritu nagausisa sang tanan nga butang, bisan sang madalom nga mga butang sang Dios.” (1 Corinto 2:10) Agod mapaambit sang hinaplas nga mga sumulunod ni Jesus ang sibu nga ihibalo sa iban, dapat napasad sing malig-on ang ila kaugalingon nga paghangop.

Ikaduha, gintudluan ni Jesus ang iya mga disipulo sa pagpangamuyo kag sa paghimo sini sing masunson. Kon indi nila mapat-od kon kaisa kon ano ang dapat nila ipangamuyo, makapatunga ukon makabulig sa ila ang espiritu. “Sa amo nga paagi ang espiritu nagabuylog man nga may bulig para sa aton kaluyahon; kay ang palaligban sa kon ano ang aton dapat ipangamuyo suno sa aton kinahanglanon wala naton mahibaluan, apang ang espiritu mismo ang nagapangabay para sa aton upod ang mga pag-ugayong nga di-mamitlang.”—Roma 8:26.

Ikatlo, ang espiritu magabulig sa mga disipulo ni Jesus sa dayag nga pagpangapin sa kamatuoran. Ginpaandaman niya sila: “Dalhon nila kamo sa lokal nga mga hukmanan, kag bunalon nila kamo sa ila mga sinagoga. Aba, dalhon kamo sa atubangan sang mga gobernador kag mga hari bangod sa akon, sa pagpanaksi sa ila kag sa mga pungsod. Apang, kon itugyan nila kamo, indi kamo magkabalaka kon paano ukon kon ano ang inyo ipamulong; kay ang inyo ipamulong ihatag sa inyo sa sina nga oras; kay indi lamang kamo ang nagahambal, kundi ang espiritu sang inyo Amay ang nagahambal paagi sa inyo.”—Mateo 10:17-20.

Ang balaan nga espiritu magabulig man agod makilala ang Cristianong kongregasyon kag magapahulag sa mga katapo sini agod makadesisyon sing maalamon. Binagbinagon naton ining duha ka bahin sini nga tema sing kapin ka detalyado kag tan-awon kon ano ang kahulugan sini para sa aton karon.

Agod Mangin Nagapakilala nga Tanda

Sa sulod sang mga siglo ang mga Judiyo nangin pinili nga katawhan sang Dios sa idalom sang Mosaikong Kasuguan. Bangod ginsikway nila si Jesus subong Mesias, gintagna niya nga sa dili madugay sikwayon man sila: “Wala gid bala ninyo mabasahi sa Kasulatan, ‘Ang bato nga ginsikway sang mga manugtukod amo ang nangin pangulo nga pamag-ang. Naghalin ini kay Jehova, kag makatilingala ini sa aton mga mata’? Amo sini kon ngaa nagasiling ako sa inyo, Ang ginharian sang Dios kuhaon sa inyo kag ihatag sa pungsod nga nagapatubas sing mga bunga sini.” (Mateo 21:42, 43) Sa tion nga ginpasad ang Cristianong kongregasyon sang Pentecostes 33 C.E., ang mga sumulunod ni Cristo nangin “pungsod nga nagapatubas sing mga bunga sini.” Kutob sadto, ini nga kongregasyon amo ang alagyan sang Dios sang komunikasyon. Agod mahantop sang mga tawo ini nga pagsaylo sang kahamuot sang Dios, naghatag ang Dios sing maathag nagapakilala nga tanda.

Sang Pentecostes ginbuligan sang balaan nga espiritu ang mga disipulo nga maghambal sing mga len­gua­he nga wala nila matun-an, nga nagpatingala sa mga nagatan-aw kag namangkot: “Paano bala nga mabatian naton, sang tagsa sa aton, ang iya kaugalingon nga hambal nga natawhan?” (Binuhatan 2:7, 8) Ang ikasarang sa paghambal sang wala mahibaluan nga mga len­gua­he, upod ang “madamo nga kalatingalahan kag tanda [nga] nahimo paagi sa mga apostoles,” nagdul-ong sa mga tatlo ka libo ka tawo nga mahisayran nga ang espiritu sang Dios nagapanghikot gid.—Binuhatan 2:41, 43.

Subong man, paagi sa pagpatubas sing “mga bunga sang espiritu”—gugma, kalipay, paghidait, pagkamainantuson, pagkalulo, pagkaayo, pagtuo, pagkakalmado, pagpugong-sa-kaugalingon—ang mga disipulo ni Cristo maathag nga nakilal-an subong mga alagad sang Dios. (Galacia 5:22, 23) Sa pagkamatuod, ang gugma talalupangdon gid nga nagapakilala sang matuod nga Cristianong kongregasyon. Si Jesus nagtagna: “Sa sini ang tanan makahibalo nga kamo mga disipulo ko, kon maghigugmaanay kamo.”—Juan 13:34, 35.

Ginbaton sang mga katapo sang unang Cristianong kongregasyon ang pagtuytoy sang balaan nga espiritu sang Dios kag ginhimuslan ang bulig nga ginatanyag sini. Samtang nahibaluan sang mga Cristiano karon nga wala na ang Dios nagabanhaw sang mga patay kag nagahimo sing mga milagro subong sang unang siglo, ginapahanugutan nila nga ipakilala sila sang mga bunga sang espiritu sang Dios subong matuod nga mga disipulo ni Jesucristo.—1 Corinto 13:8.

Isa ka Mananabang sa Paghimo Sing Personal nga mga Desisyon

Ang Biblia patubas sang balaan nga espiritu. Gani, kon pahanugutan naton nga mabuyok kita sang Biblia, daw subong bala nga ang balaan nga espiritu nagatudlo sa aton. (2 Timoteo 3:16, 17) Makabulig ini sa aton agod makadesisyon sing maalamon. Apang ginatugutan bala naton ini?

 Kamusta naman ang ginapili naton nga trabaho ukon palamugnan? Buligan kita sang balaan nga espiritu nga tamdon ang isa ka palaabuton nga trabaho suno sa pagtamod ni Jehova. Dapat nahisanto sa mga prinsipio sang Biblia ang aton trabaho, kag dapat ini magbulig sa aton nga malab-ot ang teokratiko nga mga tulumuron. Ang suweldo ukon pagkaprominente kag kabantugan nga dala sang isa ka trabaho indi gid importante. Mas importante kon ginahatag sini ang mga kinahanglanon sa kabuhi kag nagahatag sa aton sing bastante nga tion kag kahigayunan agod matuman ang aton Cristianong mga obligasyon.

Ang handum nga magkabuhi sing malipayon normal kag nagakaigo. (Manugwali 2:24; 11:9) Gani ang balanse nga Cristiano mahimo maglingawlingaw agod mapapagsik kag magkalipay. Apang dapat niya pilion ang kalingawan nga nagapabanaag sang mga bunga sang espiritu, indi ang sahi nga nagapadaku sang “mga buhat sang unod.” Si Pablo nagpaathag: “Karon dayag ang mga buhat sang unod, kag ini amo ang pagkamakihilawason, pagkadimatinlo, malaw-ay nga paggawi, idolatriya, pagbuhat sing espiritismo, mga pag-ilinaway, pagpinuyas, kaimon, mga pagsilabo sang kaakig, mga pagbaisay, mga pagbinahinbahin, mga sekta, mga pagkahisa, mga pagpahubog, magansal nga kinalipay, kag mga butang nga kaangay sini.” Dapat man likawan ang “magmangin bugalon, nga nagasulsol sang pagpaindisanay, nga nagahinisaay.”—Galacia 5:16-26.

Kaanggid ini sa pagpili sing mga abyan. Maalamon nga pilion sila suno sa espirituwalidad, indi suno sa naguwa nga hitsura ukon mga pagkabutang. Si David isa gid ka abyan sang Dios, kay ginlaragway sia sang Dios subong “tawo nga kalahamut-an sa [iya] tagipusuon.” (Binuhatan 13:22) Wala nagsapak sa naguwa nga hitsura, ginpili sang Dios si David nga mangin hari sa Israel, nahisuno sa prinsipio: “Ang Dios nagatan-aw indi subong sang pagtan-aw sang tawo, bangod ang tawo nagatulok sa kon ano ang makita sang mga mata; apang tuhoy kay Jehova, nagatulok sia sa tagipusuon.”—1 Samuel 16:7.

Linibo ka pag-abyanay ang naghuyang bangod ginpasad ini sa naguwa nga hitsura ukon sa mga pagkabutang. Ang mga pag-abyanay nga napasad sa di-masaligan nga manggad mahimo madula sing hinali. (Hulubaton 14:20) Ginalaygayan kita sang inspirado-sang-espiritu nga Pulong sang Dios nga kon nagapili sing mga abyan, dapat naton pilion yadtong makabulig sa aton sa pag-alagad kay Jehova. Ginasilingan kita sini nga magkonsentrar sa paghatag sa baylo sang pagbaton bangod ang paghatag nagahatag sing daku pa nga kalipay. (Binuhatan 20:35) Ang tion kag pagpalangga lakip sa labing hamili nga mga butang nga mahatag naton sa aton mga abyan.

Sa isa ka Cristiano nga nagapangita sing tiayon, nagahatag ang Biblia sing inspirado-sang-espiritu nga laygay. Sa isa ka pagtamod, nagasiling ini: ‘Indi lamang magtan-aw sa guya kag dagway. Tan-awa ang mga tiil.’ Ang mga tiil? Huo, sa sini nga kahulugan: Ginagamit bala ini sa pagtuman sang hilikuton ni Jehova nga pagbantala sing maayong balita, kag busa matahom bala ini, kon sa aton pa, sa iya panulok? Nasangkapan bala ini sang mensahe sang kamatuoran kag sang maayong balita sang paghidait? Aton mabasa: “Daw ano katahom sa mga bukid ang mga tiil sang isa nga nagadala sing maayong balita, ang isa nga nagabantala sing paghidait, ang isa nga nagadala sing maayong balita tuhoy sa butang nga maayo pa, ang isa nga nagabantala sing kaluwasan, ang isa nga nagasiling sa Sion: ‘Ang imo Dios nangin hari!’”—Isaias 52:7; Efeso 6:15.

Samtang nagakabuhi kita sa “makahalanguyos nga mga tion nga mabudlay pakigbagayan,” nagakinahanglan kita sing bulig agod mahimo ang kabubut-on sang Dios. (2 Timoteo 3:1) Ang mananabang, ang balaan nga espiritu sang Dios, nagsakdag sing mabaskog sa hilikuton sang mga Cristiano sang unang siglo, kag nangin personal nila ini nga mananabang. Ang maukod nga pagtuon sa Pulong sang Dios, nga isa ka patubas sang balaan nga espiritu, isa ka panguna nga paagi agod mahimo man naton ang balaan nga espiritu nga aton personal nga mananabang. Ginhimo na bala naton ini?

 [Retrato sa pahina 23]