Kua Akariro Ainei Au i te Vaerua Tapu Ei Tauturu Iaku Uaorai?

E MAATA te au manako tuke tuke o te aronga apiipii akonoanga, e tetai atu au tangata no runga i te tu tikai o te vaerua tapu o te Atua. Inara, kare e anoanoia te reira manako papu kore. Te akamarama meitaki maira te Pipiria e eaa tikai te vaerua tapu. Kare i tetai peretana, mei ta tetai e tuatua ra, e mana ririnui te reira ta te Atua e taangaanga ra no te akono i tona anoano.​—Salamo 104:30; Angaanga 2:33; 4:31; 2 Petero 1:21.

I te mea te vaitata ra te vaerua tapu ki te akatupu anga i to te Atua au akakoroanga, ka tika tatou kia akono i to tatou oraanga kia rotai ma te reira. Ka inangaro tatou i te reira kia riro ei tauturu no tatou uaorai.

E Tauturu​—Eaa ra ka Anoanoiai?

Te tapapaanga i tona akaruke anga i te enua, kua akapapu a Iesu i tana au pipi: “Naku oki e pati atu i te Metua ra, e nana e oronga mai i tetai Akapumaana ia kotou, kia noo tikai ki o kotou nei e tuatau ua atu.” I te na ko anga: “E tuatua-mou ra taku e karanga atu kia kotou nei, E meitaki ei kotou ko au e aere ke nei: angairi au kare e aere ke, kare e riro mai te Akapumaana kia kotou nei: kia aere ke ra au, naku ïa e tono mai iaia kia kotou nei.”​—Ioane 14:​16, 17; 16:7.

Kua oronga a Iesu ki tana au pipi i tetai akauenga pakari na te ikuikuanga ia ratou: “E teianei, ka aere kotou, e akariro i to te pa enua katoa ei pipi; ka bapetizo atu ei ia ratou i te ingoa o te Metua, e no te Tamaiti, e no te [v]aerua [t]apu; Ma te apii atu ia ratou, kia akono i te au mea katoa taku i akaue atu kia kotou.” (Mataio 28:​19, 20) Kare teia i te angaanga ngoie, no te mea ka akatupuia teia noatu te patoi anga.​—Mataio 10:​22, 23.

Te patoi anga mei vao mai ka kapitiia atu e tetai tu patoi anga maata mei roto atu i te putuputuanga. “E teianei, e ako atu au ia kotou, e te au taeake,” i tata ei a Paulo ki te au Kerititiano i Roma i te 56 T.N., “ka akara meitaki io na kotou i te aronga i akataka ke, e te akatupu i te mea e turori ei ra, e te tau kore i te tuatua i apiiia kotou na; ka ariu ke atu kotou ia ratou.” (Roma 16:​17, 18) Ka kino atu teia turanga me mate te au apotetoro. Kua akamatakite a Paulo: “Kua kite oki au kia riro ke atu au, ka o mai ei te luko taae ki roto ia kotou na, kare e akaperepere i te anana. E ka tu mai oki te tangata mei roto ia kotou uaorai, e tuatua mai i te tuatua mingi, kia aruia ratou e te pipi.”​—Angaanga 20:​29, 30.

Ka anoanoia ta te Atua tauturu e raukai i te tapu i teia au araianga. Kua rave aia i teia na roto ia Iesu. I muri ake i tona akatu angaia, i te ra o Penetekote 33 T.N., kua ‘ki akera [etai 120 o tana au pipi] ravarai i te vaerua tapu.’​—Angaanga 1:15; 2:4.

Kua kite te au pipi e ko te vaerua tapu tei riringiia mai i teia atianga ko te tauturu ia ta Iesu i taputou mai. Kare e ekoko anga e kua marama meitaki ratou i teianei i te akataka anga ta Iesu i oronga mai: “Na te [a]kapumaana ra, na te [v]aerua [t]apu, ko ta te Metua e tono mai ma toku ingoa, nana e apii mai ia kotou i te au mea katoa, ka akakite akaou mai oki kia kotou i te au tuatua katoa, taku i karanga atu kia kotou na.” (Ioane 14:26) Kua tapa katoa aia i te reira ‘te akapumaana, te vaerua tuatua-mou.’​—Ioane 15:26.

Akapeea te Vaerua i te Riro Anga ei Tauturu?

Ka tavini te vaerua ei tauturu i te au mataara tuke tuke. Te mea mua, kua taputou a Iesu e ka akaoki mai te reira ki te au manako o tana au pipi i te au mea tana i akakite kia ratou. Na roto i teia te manako ra aia e maata ua atu i te tauturu ua anga ia ratou kia maara i te au tuatua. Ka tauturu te vaerua ia ratou kia marama i te aite anga oonu  e te puapinga no runga i tana i apii ra. (Ioane 16:​12-14) Ma te tapoto, ka arataki te vaerua i tana au pipi kia marama meitaki tikai i te tuatua mou. I muri mai kua tata te apotetoro ko Paulo: “Kua akakite maira te Atua ia tatou i taua au mea ra i tona [v]aerua: e kimi oki te [v]aerua i te au mea katoa nei, e te au mea oonu rai o te Atua ra.” (1 Korinetia 2:10) E raukai i te au pipi akatainuia a Iesu i te oronga i te kite tika tikai ki tetai atu, ka anoanoia to ratou marama kia akatumu meitakiia.

Te rua, kua apii a Iesu i tana au pipi kia pure e kia rave putuputu i te reira. Me kare ratou i papu i tetai taime no runga i ta ratou ka pure, ka rauka i te vaerua i te tauru mai me kore tauturu ia ratou. “Te tauturu katoa mai nei oki te [v]aerua i to tatou apikepike: kare oki tatou i kite meitaki i te mea e tau kia pure tatou: na te [v]aerua uaorai e pati i ta tatou ma te ngunguru e kore e tika kia tuatua ra.”​—Roma 8:26.

Te toru, ka tauturu te vaerua i te au pipi a Iesu i te paruru anga i te tuatua mou i te ngai papuriki. Kua akamatakite aia ia ratou: “Ka tuku oki ratou ia kotou ki te sunederi, e papa oki ia kotou i roto i to ratou au sunago; E noku nei e taki naiaʼi kotou ki mua i te aroaro o te au tutara, e te ui ariki, ei kite no ratou, e no te au etene. Kia tuku ra ratou ia kotou, auraka e taitaia i te tu o ta kotou ka karanga atu; e akakiteia mai kotou i te tuatua i reira ra. Kare oki ko kotou tei karanga atu, ko te [v]aerua ra o to kotou Metua tei tuatua i roto ia kotou na.”​—Mataio 10:​17-20.

Ka tauturu katoa te vaerua tapu i te akataka i te putuputuanga Kerititiano e ka akakeu i to te reira au mema kia tuku i te au iki anga pakari nona uaorai. Ka uriuri ana tatou ma te maata i teia nga tuanga e rua o teia tumu tuatua e kia kite i te puapinga o te reira no tatou i teia tuatau.

Kia Riro ei Akairo Akataka Anga

No tetai au anere mataiti kua tavini te ngati Iuda i raro ake i te Ture a Mose ei iti tangata ikiia e te Atua. No te mea kua kopae ratou ia Iesu e ko te Mesia, kua totou aia e kare e roa atu ka kopae katoa ia ratou uaorai: “Kare kotou i tatau i tei tataia ra e, ‘Ko te toka i akarukeia e te aronga patu are ra, ko tei akariroia ei toka tiavā: na te Atu teia i rave, e te akara atu nei tatou ma te umere?’ E teianei, e karanga atu au kia kotou, E apai keia te basileia o te Atua nei ia kotou, e tukuia atu ki te aronga e akaua mai i te ua ra.” (Mataio 21:​42, 43) I te akanoo angaia te putuputuanga Kerititiano ia Penetekote 33 T.N., kua riro mai te au pipi a Karaiti e ko te “aronga e akaua mai i te ua ra.” Mei reira mai, kua riro teia putuputuanga e ko te aerenga komunikeiti anga o te Atua. Ei akariro i te tangata kia kite i teia taui anga o te mareka anga tu-Atua, kua oronga mai te Atua i tetai akairo akataka tikai kare e ekokoia.

Ia Penetekote kua akariro te vaerua tapu i te au pipi kia tuatua i te au reo ke kare ratou i apii ana, te akatupuanga i te aronga e akara maira kia umere e kia ui: “Eaa ra oki teia i akarongo ei tatou ravarai nei i te reo, tonao tonao, i anau ei ra?” (Angaanga 2:​7, 8) Te kite i te tuatua anga i te au reo kare i kiteia, i te pae mai i te “manganui te mea umere e te akairo i raveia e te au aposetolo ra,” kua taki atu i etai toru tauatini tangata kia kite e te angaanga tikai ra te vaerua o te Atua.​—Angaanga 2:​41, 43.

Pera katoa, na te akatupu anga i “ta te [v]aerua e akatupu”​—te inangaro, te rekareka, te au, te akakoromaki, te takinga-meitaki, te meitaki, te pikikaa kore, te maru, te akono meitaki​—kua akataka meitaki ia te au pipi a Karaiti ei au tavini no te Atua. (Galatia 5:​22, 23) Ko te tika, te aroa te akataka meitaki ra i te putuputuanga Kerititiano mou. Kua totou a Iesu: “Ko te mea teia e kite ei te tangata katoa e e pipi kotou naku, kia aroa kotou ia kotou uaorai.”​—Ioane 13:​34, 35.

Kua ariki te au mema o te putuputuanga Kerititiano mua i te arataki anga a te vaerua tapu o te Atua e kua akono meitaki i te tauturu ta te reira e oronga maira. Koi kite ei te au Kerititiano i teia tuatau e kare te Atua e akatu ana i te mate i teianei e e rave ana i te au temeio mei tei tupu i te anere mataiti mua, kua akatika ratou i te ua o te vaerua o te Atua kia akataka ia ratou ei au pipi mou na Iesu Karaiti.​—1 Korinetia 13:8.

E Tauturu i te Tuku Anga i te Au Iki Anga Naau Uaorai

E apinga te Pipiria na te vaerua tapu. No reira, me akatika tatou ia tatou uaorai kia akakeuia e te Pipiria, mei te mea atura e te ako maira te vaerua tapu ia tatou. (2 Timoteo 3:​16, 17) Ka tauturu te reira ia tatou kia tuku i te au iki anga pakari. Inara te akatika ra ainei tatou i te reira?

 Akapeea ta tatou iki anga i tetai angaanga, me kore ngai angaanga? Ka rauka i te vaerua tapu i te tauturu ia tatou kia akamanako i tetai angaanga mei to Iehova ra manako. Kia rotai ta tatou ngai angaanga ma te au kaveinga a te Pipiria, e kia rauka i te reira i te tauturu ia tatou kia rave i te au akakoroanga teokaratiki. Te tutaki anga me kore te rongonui e te teitei te kapiti ra ma tetai angaanga kare ia i te mea maata. Te mea puapinga maata koia oki me te oronga maira te reira i tei anoanoia i te oraanga e te akatika ra i tetai taime tau e te tuatau no tatou kia akatupu i ta tatou au apainga Kerititiano.

Tetai anoano no te rekareka i te oraanga e mea matauia e te tau. (Koheleta 2:24; 11:9) No reira penei ka aruaru tetai Kerititiano parani i te tarekareka anga ei akaangaroi e te rekareka anga. Inara kia iki aia i te tarekareka anga te akaata ra i te ua o te vaerua, kare e ko te tu o “te au angaanga a te kopapa.” Kua akamarama a Paulo: “E teianei, te au angaanga a te kopapa, kua kitea meitakiia ïa; koia oki te moeaana, te akaturi, te tuatua viivii ra, e te kanga, Te akamori idolo, te purepure, te makitakita, te tamaki, te akarere, te riri, te karo, te pae ke, te tuatua tarevake, Te vareae, te ta tangata, te konā kava, te kariei, e mei te reira te tu.” I te riro anga mai e kia “akateitei puapinga kore ua, i te akaongoongo anga tetai ki tetai, e te vareae anga tetai ki tetai” kia kopae katoaia.​—Galatia 5:​16-26.

Te aite katoa ra ma te iki anga i te au oa. E mea pakari i te iki ia ratou ki tau i te pae vaerua, kare e kia tau ki te akaraanga i vao me kore au apinga. Te tangata ko Davida e oa ia no te Atua, kua akataka te Atua iaia e “e tangata e tau i [tona] ngakau.” (Angaanga 13:22) I te kopaeanga i te akara anga o vao, kua iki te Atua ia Davida kia riro mai ei ariki no Iseraela, kia tau ki te kaveinga: “E kare oki ta Iehova akara anga e tau ki ta te tangata; e akara oki te tangata ki te tu i vao ake, karekā Iehova e akara ïa i te ngakau.”​—1 Samuela 16:7.

Kua akakinoia etai au piri anga e tauatini ua atu no te mea kua akanoo ratou i te reira ki runga i te akara anga o vao me kore ki runga i te au apinga. Te au pirianga oa tei akanooia ki runga i te au apinganui ka ope viviki ia. (Maseli 14:20) Te ako maira te Tuatua a te Atua tei akauruia e te vaerua ia tatou me iki i te au oa, e iki tatou i te aronga te ka tauturu ia tatou i te tavini ia Iehova. Te akakite maira te reira ia tatou kia manako maata ki runga i te oronga anga kare i te rauka anga no te mea te apai maira te orongaanga i te rekareka maata. (Angaanga 20:35) Ko te taime e te tangi aroa tetai o te au apinga akaperepereia ka rauka ia tatou i te oronga ki to tatou au oa.

Ki tetai Kerititiano te kimi ra i tetai tokorua akaipoipo, te oronga maira te Pipiria i te ako anga akauruia e te vaerua. Na tetai tu, te na ko ra te reira: ‘E akara mamao atu i te kite mata e te tutu. E akara i te vaevae.’ Te vaevae? Ae, na roto i te tu: Te taangaangaia ra ainei te reira kia rave i ta Iehova angaanga tutu aerenga i te tuatua meitaki, e te maru ra ainei ratou, mei tera te tu, i tona mata? Kua akapapaia ainei ratou ma te tuatua mou e te tuatua meitaki o te au? Ka tatau tatou e: “Te manea o te vaevae o te karere ki runga i te maunga, o tei apai mai i te tuatua meitaki ra, o tei tutu aere i te au ra; o tei apai mai i te tuatua meitaki ra, o tei tutu aere i te ora ra, o tei tuatua mai kia Ziona, Tei to Atua ra te au!”​—Isaia 52:7; Ephesia 6:15.

Ia tatou e noo nei i roto i te “tupu [anga o] te kino maata i taua tuatau openga ra,” ka anoano tatou i te tauturu e raukai i te rave i to te Atua anoano. (2 Timoteo 3:1) Te tauturu, te vaerua tapu o te Atua, kua oronga i te turuanga ririnui ki te angaanga a te au Kerititiano i te anere mataiti mua, kapiti mai i te tauturu anga ia ratou uaorai. Ko tetai mataara maata koia oki ko te apii maroiroi anga i te Tuatua a te Atua, e apinga na te vaerua tapu, ka rauka ia tatou i te akariro i te vaerua tapu ei tauturu no tatou uaorai. Kua pera ainei tatou?

 [Tutu maata i te kapi 23]