Trahando den e “Cunucu”—Promé Cu e Cosecha

E DISIPELNAN dje Gran Maestro tabata turdí. Jesus a caba di relatá un cuenta corticu tocante trigu i mal yerba. Esei tabata un dje hopi comparacionnan cu el a conta e dia ei. Ora el a caba, mayoria di su oyentenan a bai. Pero su siguidónan tabata sa cu su comparacionnan mester tabatin un nificacion special—foral esun tocante trigu i mal yerba. Nan tabata sa cu Jesus no tabata djis un bon contadó di cuenta.

Mateo ta informá cu nan a puntra: “Splica nos e ilustracion dje mal yerba den e cunucu.” Como contestá, Jesus a interpretá e comparacion, prediciendo un gran apostasia cu lo a desaroyá entre hende cu a bisa di ta su disipel. (Mateo 13:24-30, 36-38, 43) Esaki a sosodé en berdad, i apostasia a plama lihé despues di morto di apostel Juan. (Echonan 20:29, 30; 2 Tesalonicensenan 2:6-12) E efectonan dje apostasia tabata asina plamá,  cu e pregunta di Jesus, registrá na Lucas 18:8, a parce masha na su lugá: “Ora e Yu di Hende yega, realmente lo e haña fe riba tera?”

Jesus su yegada lo a marca cuminsamentu di “e cosecha” di cristiannan semehante na trigu. Esei lo tabata un marca dje ‘conclusion dje sistema di cosnan’ cu a cuminsá na 1914. P’esei, no mester ta un sorpresa pa nos cu algun hende a cuminsá interesá den e berdad di Bijbel den e periodo cu a hiba na comienso dje cosecha.—Mateo 13:39.

Un examinacion dje registro histórico ta mustra cu foral di siglo 15 padilanti, hende su interes a cuminsá lanta, asta entre e masa di cristiandad cu tabata manera “mal yerba,” esta, cristiannan di imitacion. Segun cu Bijbel a bira disponibel libremente i a prepará concordancianan bíblico, personanan di curason onrado a cuminsá investigá e Scritura cuidadosamente.

E Lus Ta Bira Mas Cla

Na cabamentu di siglo 19, Henry Grew (1781-1862), di Birmingham, Inglatera, tabata entre e hendenan ei. Na edad di 13 aña, e cu su famia a crusa Atlántico cu boto bai Merca, i nan a yega dia 8 di juli 1795. Nan a establecé na Providence, Rhode Island. Su mayornan a inculcá den dje un amor pa Bijbel. Na 1807, na edad di 25 aña, Grew a haña invitacion pa bai sirbi como pastor di Iglesia Baptista na Hartford, Connecticut.

El a tuma su responsabilidadnan di siña otro hende na serio i a purba yuda esnan bou di su cuido pa biba na armonia cu e Scritura. Sin embargo, e tabata kere den mantené e congregacion limpi di cualkier persona cu a practicá picá boluntariamente. De bes en cuando, e huntu cu otro hombernan responsabel den e iglesia mester a expulsá (scumulgá) esnan cu a cometé fornicacion of cu a participá den otro prácticanan impuru.

Den e iglesia tabatin otro problemanan cu a molesti’é. Nan tabatin hombernan cu no tabata miembro dje iglesia ta manehá asuntunan  financiero dje iglesia i dirigí e cantamentu durante sirbishi. Tambe e hombernan aki por a vota riba asuntunan di importancia p’e congregacion i asina nan tabatin un midí di control den asuntunan dje congregacion. Basá riba e principio pa ta separá di mundu, Grew a kere firmemente cu ta hombernan fiel so mester ehercé e funcionnan ei. (2 Corintionan 6:14-18; Santiago 1:27) Den su opinion, permití hende no-creyente canta cantica di alabansa na Dios, tabata un blasfemia. Na 1811, e iglesia a rechasá Henry Grew debí na su posicion. N’e mésun tempu, otro miembronan cu tabatin mésun punto di bista cuné, tambe a distanciá nan mes for dje iglesia.

Separando for di Cristiandad

E grupo aki, cu a incluí Henry Grew, a cuminsá un studio di Bijbel cu e meta di armonisá nan bida i actividadnan na su conseho. Rápidamente nan studio a hiba na un mihó comprendimentu di berdad bíblico i a pone nan saca na cla e erornan di cristiandad. Por ehempel, na 1824, Grew a skirbi un documento bon argumentá den cua e ta refutá e Trinidad. Ripará e lógica den e pasashi aki cu el a skirbi: “‘Ningun hende sa dje dia ei ni dje ora, no ni angelnan cu ta den shelu ni e Yu, sino e TATA.’ [Marco 13:32] Ripará aki e distincion cla di ser. Hende, Angelnan, Yu, Tata. . . . Nos Señor ta siña nos cu ta e Tata so tabata sa dje dia ei. Pero esaki lo no ta berdad si, manera algun hende ta kere, e Tata, e Palabra i Spiritu Santu ta tres persona den un solo Dios; pasobra, segun esaki [e siñansa dje doctrina di Trinidad,] e . . . Yu tabata sa di dje mescos cu e Tata.”

Grew a saca na cla e hipocresia di clero i comandantenan militar cu a pretendé di ta sirbi Cristo. Na 1828 el a declará: “Nos por imaginá nos un cos mas absurdo cu un cristian cu ta sali for di su kamber, caminda e tabata haci oracion pa su enemigunan, i ta manda su trupanan hinca nan armanan mortal cu un furia cruel, den curason di e mésun enemigunan ei? Den e promé caso, felismente e ta similar na su Doño ora e tabata muriendo; pero ken e ta parce den e otro caso? Jesus a haci oracion pa su asesinonan. Cristiannan ta mata esnan cu nan ta haci oracion p’e.”

Cu asta mas conviccion, Grew a skirbi: “Ki dia nos lo kere e Todopoderoso cu ta sigurá nos cu no por ‘tene mofa’ di dje? Ki dia nos lo comprendé e naturalesa, e genio, dje religion santu ei cu ta rekerí di nos pa abstené asta for di e ‘aparencia di maldad?’ . . . No ta un calumnia riba e Yu di esun bendicioná, pa suponé cu su religion ta rekerí pa den un situacion un hende comportá su mes manera un angel, i den un otro e ta permitié actua manera un demoño?”

Bida Eterno No Ta Inherente

Durante e añanan ei promé cu tabatin radio i television, un manera popular pa un hende expresá su punto di bista tabata di skirbi i distribuí pamfleta. Rond di aña 1835, Grew a skirbi un pamfleta importante cu a saca na cla cu e siñansanan di inmortalidad di alma i fiernu di candela no ta bíblico. E tabata di opinion cu e doctrinanan aki a blasfemá Dios.

E pamfleta aki lo tabatin efectonan di largu alcanse. Na 1837, George Storrs di 40 aña a haña un ehemplar den trein. Storrs tabata nativo di Lebanon, New Hampshire, pero pa e tempu ei e tabata biba na Utica, New York.

E tabata un pastor masha respetá dje Iglesia Episcopal Metodista. Ora el a lesa e pamfleta, el a keda impresioná p’e echo cu hende por a bin cu argumentonan asina fuerte contra e siñansanan básico di cristiandad cu e nunca promé a duda aden. E no tabata sa ken tabata autor dje pamfleta, i ta te cu algun aña despues numa, di mas tardá 1844, cu el a topa Henry Grew, tempu nan tur dos tabata biba na Filadelfia, Pennsylvania. Sin embargo, pa tres aña Storrs a studia e informacion riba su mes, i ta cu otro pastornan so el a papia tocante e asuntu.

Finalmente, ya cu niun hende por a refutá loke e tabata siñando, George Storrs a yega n’e  conclusion cu e no por ta fiel na Dios si e sigui forma parti di Iglesia Metodista. El a renunciá na 1840 i a muda bai Albany, New York.

Na principio di primavera aña 1842, Storrs a duna un seri di seis lectura durante seis siman riba e tema: “Un Investigacion: E Malbadonan Ta Inmortal?” E interes tabata asina grandi cu el a revisá e informacion pa publik’é, i durante e 40 añanan cu a sigui, el a alcansá un circulacion di 200.000 ehemplar na Merca i Gran Bretania. Storrs cu Grew a djoin otro den debatenan contra e doctrina di alma inmortal. Grew a sigui predicá celosamente te na su morto dia 8 di augustus 1862, na Filadelfia.

Djis despues cu Storrs a presentá e seis lecturanan mencioná ariba, el a interesá den e trabou di predicá di William Miller, kende tabata spera e regreso visibel di Cristo na 1843. Pa mas o ménos dos aña, Storrs a participá activamente den predicá e mensahe aki den henter nortoost Merca. Despues di 1844, e no kier a participá mas den pone fecha p’e regreso di Cristo, pero e no a bai contra si e otronan kier a investigá cronologia. Storrs a kere cu Cristo su regreso tabata cerca i cu tabata importante pa cristiannan keda lantá i spiritualmente alerto, cla p’e dia di inspeccion. Pero el a separá for dje grupo di Miller pasobra nan a aceptá doctrinanan no-bíblico manera inmortalidad di alma, kimamentu di mundu i cu no tin ningun speransa di bida eterno pa esnan cu a muri den ignorancia.

Na Kico e Amor di Dios Lo A Hiba?

E punto di bista di adventista di cu Dios lo resucitá hende malbado cu e único propósito di mata nan atrobe, a repugná Storrs. E no por a haña ningun evidencia den e Scritura pa un acto sin sentido i vengativo asina di parti di Dios. Storrs i su socionan a bai n’e otro extremo i a concluí cu hende malbado lo no a haña resureccion mes. Aunke nan tabatin dificultad pa splica cierto texto cu a referí na resureccion dje inhustunan, den nan opinion nan conclusion a parce di ta mas na armonia cu e amor di Dios. Un paso mas aleu den comprendé e propósito di Dios tabata na caminda.

Na 1870, Storrs a bira hopi malu i pa algun luna e no por a traha. Durante e tempu ei, e por a reexaminá tur loke el a siña atrabes di su 74 añanan. El a yega n’e conclusion cu el a hera un parti vital dje propósito di Dios pa humanidad cu e pacto abrahámico ta indicá, esta, cu ‘tur e famianan di tera lo bendicioná nan mes debí n’e echo cu Abraham a scucha Dios su bos.’—Génesis 22:18; Echonan 3:25.

 Esaki a dun’é un idea nobo. Si “tur e famianan” tin cu ser bendicioná, nan tur lo no tin cu tende e bon nobo? Con nan lo tend’é? Miyones di miyones no a muri caba? Ora el a bai examiná e Scritura mas aleu, el a yega n’e conclusion cu tabatin dos clase di hende “malbado” morto: esnan cu definitivamente a rechasá e amor di Dios, i esnan cu a muri den ignorancia.

Storrs a concluí cu e últimonan ei lo tin cu ser lantá for di morto pa nan haña un chens di beneficiá dje sacrificio di rescate di Cristo Jesus. Esnan cu acept’é lo biba pa semper riba tera. Esnan cu rechas’é lo ser destruí. Sí, Storrs a kere cu Dios lo no lanta ningun hende sin cu e ta duna nan un speransa. Cu tempu, ningun hende lo ta morto debí n’e picá di Adam, cu excepcion di Adam! Pero kico di esnan cu lo ta na bida durante e regreso di Señor Jesucristo? Finalmente Storrs a bin comprendé cu mester cuminsá un campaña mundial di predicá pa alcansá e hendenan aki. E no tabatin ni e mínimo idea con lo por a haci algu asina, pero cu fe el a skirbi: “Te ainda tin demasiado hende, cu ora nan no por comprendé precis con mester haci algu nan ta rechas’é, como si fuera tabata imposibel pa Dios hacié, pasobra nan no por mira con lo e bai hacié.”

George Storrs a muri na december 1879, den su cas na Brooklyn, New York, djis un par di blok for di loke despues lo a bira e punto central dje campaña mundial di predicá cu el a anticipá asina ansiosamente.

Tabatin Mester di Mas Lus

Hombernan manera Henry Grew i George Storrs tabatin un comprendimentu cla dje berdad manera nos tin awe? No. Nan tabata conciente di nan lucha, manera Storrs a skirbi na 1847: “Nos lo haci bon di corda cu nos a caba di sali for dje época di scuridad di iglesia; i lo no ta nada straño si nos ripará cu ainda nos ta bisti algun ‘paña babilónico’ como berdad.” Por ehempel, Grew a reconocé e balor dje rescate cu Jesus a percurá, pero e no a comprendé cu e tabata un “rescate corespondiente,” esta, cu e bida humano perfecto di Jesus a ser duná a cambio dje bida humano di Adam cu a bai perdí. (1 Timoteo 2:6) Tambe Henry Grew a kere eróneamente cu Jesus lo a bolbe i goberná visiblemente riba tera. Sin embargo, Grew tabata interesá den santificacion dje nomber di Jehova, un tópico cu desde siglo 2 E.C. padilanti, tabata interesá masha poco hende.

Asina tambe George Storrs no tabatin e comprendimentu corecto di algun punto importante. E por a mira e falsedad cu clero a promové, pero tabatin biaha cu el a bai na e otro extremo. Por ehempel, den un aparente reaccion exagerá riba e punto di bista cu clero ortodox tabatin di Satanas, Storrs a rechasá e idea cu Diabel ta un persona real. El a rechasá  Trinidad; tog, te cu djis promé cu su morto, e tabata insigur si e spiritu santu ta un persona of no. Aunke George Storrs a spera cu Cristo su regreso lo ta originalmente invisibel, el a pensa cu finalmente lo tin un aparicion visibel. Sin embargo, ta parce cu tur dos homber tabata onrado i sincero di curason, i nan a yega mas cerca dje berdad cu mayoria di otro hende.

E “cunucu” cu Jesus a describí den su comparacion di trigu i mal yerba no tabata cla ainda pa ser cosechá. (Mateo 13:38) Grew, Storrs i otronan tabata traha den e “cunucu” den preparacion p’e cosecha.

Charles Taze Russell, kende a cuminsá cu publicacion dje revista aki na 1879, a skirbi relacioná cu su promé añanan: “Señor a duna nos hopi yudansa pa studia Su palabra. Prominentemente entre nan tabatin nos ruman masha stimá i di edad, George Storrs, kende tantu den palabra como riba papel a yuda nos mashá; pero semper nos a soru pa nos no ta siguidó di hende, aunke nan ta bon hende i sabí, sino pa nos ta ‘Siguidónan di Dios manera yunan stimá.’” Sí, studiantenan di Bijbel sincero por a beneficiá dje esfuersonan cu hombernan manera Grew i Storrs a haci, pero ainda tabata vital pa nan examiná e Palabra di Dios, Bijbel, como e berdadero fuente di berdad.—Juan 17:17.

[Kuadro/Plachi na página 26]

Loke Henry Grew A Kere

Nan a difamá e nomber di Jehova, i mester santifik’é.

E doctrinanan di Trinidad, inmortalidad di alma i fiernu di candela ta falsu.

E congregacion cristian mester ta separá for di mundu.

Cristiannan no mester participá den guera dje nacionnan.

Cristiannan no ta bou di un ley di sabat di diasabra ni di diadomingo.

Cristiannan no mester pertenecé na sociedadnan secreto, manera esun di mazon.

No mester existí clase di clero i laico entre cristiannan.

Títulonan religioso ta originá cu e anticristo.

Tur congregacion mester tin un cuerpo di anciano.

Ancianonan mester tin un conducta santu, liber di reproche.

Tur cristian tin cu predicá e bon nobo.

Lo tin hende ta biba pa semper den Paradijs riba tera.

Canticanan cristian mester duna alabansa na Jehova i Cristo.

[Rekonosementu]

Potret: Collection of The New-York Historical Society/69288

[Kuadro/Plachi na página 28]

Loke George Storrs A Kere

Jesus a duna su bida como e prijs di rescate pa humanidad.

No a predicá e bon nobo ainda (na 1871).

P’esei, e fin no por tabata cerca n’e tempu ei (na 1871). Den futuro lo mester a bini un época cu lo a haci e trabou di predicá.

Lo tin hende cu ta heredá bida eterno riba tera.

Lo tin resureccion pa tur hende cu a muri den ignorancia. Esnan cu aceptá e sacrificio di rescate di Cristo lo ricibí bida eterno riba tera. Esnan cu rechas’é lo ser destruí.

Inmortalidad di alma i fiernu di candela ta doctrinanan falsu cu ta desonrá Dios.

E Cena di Señor ta un celebracion anual riba 14 di nísan.

[Rekonosementu]

Potret: SEIS SERMON, di George Storrs (1855)

[Plachinan na página 29]

Na 1909, C. T. Russell, redactor di “Zion’s Watch Tower,” a muda bai Brooklyn, New York, Merca