သင့်ငွေလော၊ သင့်အသက်လော
သင့်ငွေလော၊ သင့်အသက်လော
ဓားပြတိုက်ခံရသူ၏မျက်နှာတွင် သေနတ်ဖြင့်ဝှေ့ယမ်းလျက် “ငွေအရှုံးခံမလား၊ အသက်အရှုံးခံမလား!” ဟူ၍ မရမကတောင်းဆိုခဲ့သော ဓားပြများအကြောင်း သင်ကြားဖူးနားဝရှိမည်။ ယနေ့ ကျွန်ုပ်တို့အားလုံး၊ အထူးသဖြင့် ကြွယ်ဝချမ်းသာသောနိုင်ငံများ၌ နေထိုင်ကြသူအားလုံး ရုန်းထွက်ရခက်သောအကျပ်ရိုက်မှုတစ်မျိုးကို ရင်ဆိုင်ရချိန်တွင် မသိသူရှားသည့် ဤတောင်းဆိုမှုကို ထပ်ကြားရသည်။ သို့သော် ဤတစ်ကြိမ်တွင် ထိုသို့အပူတပြင်းတောင်းဆိုသူမှာ ဓားပြမဟုတ်ဘဲ ငွေကြေးနှင့် ရုပ်ပစ္စည်းအောင်မြင်မှုအပေါ် လူ့ဘောင်အဖွဲ့အစည်း၏ တိုး၍အလေးပေးလာမှုဖြစ်၏။
ယင်းသို့အလေးပေးမှုက အသစ်သောပြဿနာများနှင့် စိတ်ပူပန်မှုများကို ပေါ်ထွက်စေခဲ့သည်။ ငွေကြေးနှင့် ရုပ်ပစ္စည်းရဖို့အတွက် အဘယ်အရာကိုအရှုံးခံသင့်နည်း။ အနည်းငယ်လျှော့၍ ရောင့်ရဲတင်းတိမ်နိုင်မည်လော။ လူတို့သည် ရုပ်ပစ္စည်းအတွက် “မှန်သောအသက်” ကို အမှန်ပင်စွန့်လွှတ်နေကြသလော။ ပျော်ရွှင်သောဘဝအသက်တာအတွက် ငွေသာအဓိကလော။
ငွေအတွက်အရူးအမူး
လူ့လိုအင်ဆန္ဒများနှင့် မက်မောမှုတို့တွင်—တရားဝင်ဖြစ်စေ၊ မဖြစ်စေ—ငွေကိုတပ်မက်ခြင်းသည် အလုအယက်ဦးဆောင်လျက်ရှိ၏။ ငွေကိုအရူးအမူးဖြစ်ခြင်းသည် လိင်နှင့် အစားအသောက်မက်မောခြင်းတို့နှင့်မတူ အမြဲရှိပြီး အတောမသတ်နိုင်ဘဲဖြစ်နိုင်သည်။ အသက်ကြီးရင့်လာလျှင်ပင် ယင်းသည် လျော့မသွားချေ။ များသောအားဖြင့် လူတစ်ဦးသည် အသက်ကြီးလာလေ ငွေနှင့် ငွေဝယ်ပစ္စည်းများအပေါ် စိတ်ဝင်စားမှုနှင့် စိုးရိမ်မကင်းဖြစ်မှု ပိုတိုးလာလေဖြစ်တတ်သည်။
တပ်မက်မှု တိုးများလာနေဟန်ရှိ၏။ လူကြိုက်များသော ရုပ်ရှင်ဇာတ်ကားတစ်ကားတွင် အဓိကသရုပ်ဆောင်သူက “တပ်မက်ခြင်းဟာ အလုပ်ဖြစ်တယ်။ တတ်မက်ခြင်းဟာ အကျိုးရှိတယ်” ဟုပြောသည်။ ၁၉၈၀ ပြည့်လွန်နှစ်များကို တပ်မက်မှုခေတ်ဟု လူအများက ရည်ညွှန်းခဲ့ကြသော်လည်း ထိုအချိန်မတိုင်မီနှင့် ၎င်းနောက်ပိုင်း ခေတ်ကာလတစ်လျှောက်တွင် ငွေကြေးအပေါ် လူတို့၏တုံ့ပြန်မှုမှာ အပြောင်းအလဲမရှိလှချေ။
အသစ်ဖြစ်ဖွယ်ရှိသည်မှာ ပိုချမ်းသာလိုသည့် စိတ်လိုဘကို ချက်ချင်းဖြည့်ဆည်းနိုင်သည့် အခွင့်အလမ်းများကို မြင်လာသူ ပိုများလာခြင်းဖြစ်သည်။ ကမ္ဘာသားအများစုသည် များသောအားဖြင့် မိမိတို့၏စွမ်းအင်အများစုကို ရုပ်ပစ္စည်းများ ပိုမိုထုတ်လုပ်၍ စုဆောင်းရန် အချိန်ကုန်ခံနေကြပုံရှိ၏။ မျက်မှောက်ခေတ်တွင် ပစ္စည်းဥစ္စာနှင့်ငွေပိုရရှိရေးအတွက် များသောအားဖြင့် ကြံကြံဖန်ဖန် ရှာဖွေခြင်းသည် မက်မက်မောမော အားထုတ်စရာတစ်ခု ဖြစ်လာသည်ကို သင်သဘောတူပေမည်။
သို့သော် ယင်းကြောင့် လူတို့ ပိုပျော်လာကြသလော။ ထိုမေးခွန်းကိုဖြေဆိုရာ၌ ပညာရှိ၍ အလွန်ချမ်းသာကြွယ်ဝခဲ့သည့် ဘုရင်ရှောလမုန်သည် လွန်ခဲ့သောနှစ်ပေါင်း ၃,၀၀၀ က ဤသို့ရေးသားခဲ့၏– “ငွေကိုတပ်မက်သောသူသည် ငွေနှင့်အလိုဆန္ဒမပြေနိုင်။ စည်းစိမ်ကိုတပ်မက်သောသူသည် စည်းစိမ်တိုးပွားသော်လည်း မရောင့်ရဲနိုင်။ ထိုအမှုအရာသည်လည်း [အချည်းနှီး] ဖြစ်၏။” (ဒေ. ၅:၁၀) မျက်မှောက်ခေတ် လူမှုရေးရာ လေ့လာမှုများက စိတ်ဝင်စားစရာ အလားတူကောက်ချက်များကိုချစေသည်။
ငွေကြေးနှင့် ပျော်ရွှင်မှု
လူ့အပြုအမူနှင့်ပတ်သက်၍ အံ့အားသင့်စရာအကောင်းဆုံး တွေ့ရှိချက်တစ်ခုမှာ ငွေနှင့် ပစ္စည်းဥစ္စာတို့ တိုးများလာခြင်းက ရောင့်ရဲတင်းတိမ်မှုနှင့် ပျော်ရွှင်မှု ထပ်တူတိုးများလာမည်ဟု တထစ်ချမယူမှတ်နိုင်ခြင်းဖြစ်သည်။ သုတေသီများစွာ သိရှိလာကြသည်မှာ လူတစ်ဦးသည် ဥစ္စာဓနအတော်အသင့်ရှိလာပြီဆိုလျှင် သူ၏သာယာချမ်းမြေ့မှုမှာ ဥစ္စာမည်မျှရှိသည်အပေါ် မမူတည်တော့ကြောင်းဖြစ်သည်။
သို့ဖြစ်၍ အထိန်းအချုပ်မရှိ ရုပ်ပစ္စည်းများနှင့် ငွေကြေးနောက်ကောက်ကောက်ပါအောင်လိုက်ခြင်းက များစွာတို့ကို ဤသို့မေးမြန်းစေသည်၊ ‘ကျွန်ုပ်တို့သည် ပစ္စည်းအသစ်အဆန်းများကို ဝယ်ယူသည့်အခါတိုင်း
ပျော်မွေ့ကြဟန်ရှိ၏; သို့တိုင် အရာအားလုံးကိုခြုံငုံကြည့်ပြီးနောက် ဤပျော်မွေ့စရာများသည် သာ၍ကျေနပ်ရောင့်ရဲမှု အဘယ်ကြောင့်မဖြစ်စေသနည်း။’ပျော်ရွှင်သည့်လူများ စာအုပ်တွင် ကလောင်ရှင်ဂျော်နသန် ဖရီးမန်းက ဤသို့ဖော်ပြသည်– “ပုံမှန်ဝင်ငွေအနိမ့်ဆုံးအဆင့်လောက်ရှိလာတာနဲ့ သင့်မှာရှိလာတဲ့ အဲ့ဒီငွေပမာဏဟာ ပျော်ရွှင်မှုရရေးအတွက် အရေးမပါပါဘူး။ မဆင်းရဲရုံတမယ် ဝင်ငွေနဲ့ ပျော်ရွှင်မှုတို့ဟာ ဆက်စပ်မှုအလွန်နည်းတယ်။” ပျော်ရွှင်မှုရှိဖို့ အမှန်တကယ်အရေးပါသည်ကား တစ်ဦးချင်းစီ၌ ဝိညာဉ်ရေးအဖိုးတန်ရာများ၊ ဘဝ၌အဓိပ္ပာယ်ရှိသောဆောင်ရွက်မှုများနှင့် ကျင့်ဝတ်စံနှုန်းများရှိဖို့လိုကြောင်း လူများစွာ သိမြင်လာကြပေပြီ။ ထို့ပြင် လူအချင်းချင်း ဆက်ဆံရေးကောင်းခြင်းနှင့် မိမိပိုင်ဆိုင်ရာကို မမွေ့လျော်စေသော ပဋိပက္ခများ သို့မဟုတ် ကျဉ်းကျပ်မှုများ ကင်းလွတ်ခြင်းလည်း အရေးပါသည်။
လက်ရှိ လူမှုရေးပြဿနာအများစု၏ အရင်းအမြစ်သည် စိတ်တွင်းဆိုင်ရာအခက်အခဲများကို ငွေကြေးဥစ္စာဖြင့်ဖြေရှင်းရန် ကြိုးစားလိုသည့်သဘောထားဖြစ်ကြောင်း လူအများတွေ့ရှိကြသည်။ လူမှုရေးရာအစီရင်ခံသူအချို့က အဆိုးမြင်ခြင်းနှင့် ကျေနပ်မှုမရှိခြင်း ယေဘုယျသဘောထားအကြောင်း ပြောဆိုကြသည်။ ကြွယ်ဝချမ်းသာသော လူ့အဖွဲ့အစည်းများမှ လူတို့သည် အထူးပြုကုသသည့်ဆရာဝန်များနှင့်တိုင်ပင်ရန် သို့မဟုတ် ဂုရုများ၊ ဘာသာရေးဂိုဏ်းများနှင့် ကုထုံးဖြင့်ကုသပေးသည်ဟုဆိုသောအဖွဲ့များထံမှ ဘဝအဓိပ္ပာယ်နှင့် စိတ်ငြိမ်သက်မှုရရှိရန် ရှာကြံဖို့ဆန္ဒတိုးများလာနေကြောင်းကိုလည်း သူတို့သတိပြုမိကြသည်။ ယင်းက ရုပ်ပစ္စည်းသည် ဘဝကို အမှန်တကယ်အဓိပ္ပာယ်ရှိစေရန် မဖြည့်စွမ်းပေးနိုင်ကြောင်း အထင်အရှားပြသည်။
ငွေ၏အစွမ်းရှိမှုနှင့် အစွမ်းမဲ့မှု
ငွေ၌အစွမ်းရှိသည်ကား အမှန်ပင်။ ငွေဖြင့် အလွန်ကောင်းသောအိမ်များ၊ ကြော့ရှင်းသပ်ရပ်သောအဝတ်အစားများနှင့် သားနားသောပရိဘောဂများကို ဝယ်နိုင်ကြသည်။ အားကျခံရခြင်း၊ လိုက်လျောခံရခြင်း သို့မဟုတ် မြှောက်ပင့်ခံရခြင်းတို့ကိုလည်း ဝယ်ယူပေးနိုင်ပြီး ဝိုင်းဝန်းကူညီမည့် ယာယီမိတ်ဆွေအနည်းအကျဉ်းပင် ပေါ်ထွက်လာစေမည်။ သို့သော် ငွေ၏အစွမ်းတာသွားမှုမှာ ဤမျှလောက်သာဖြစ်၏။ ကျွန်ုပ်တို့အလိုအပ်ဆုံးအရာမှာ ငွေဖြင့်မဝယ်ယူနိုင်သော မိတ်ဆွေစစ်တစ်ဦး၏မေတ္တာ၊ စိတ်ငြိမ်သက်မှုနှင့် သေခါနီးတွင် အတန်ငယ်ဖြေသိမ့်မှုတို့ဖြစ်သည်။ ဖန်ဆင်းရှင်နှင့်ဆက်ဆံရေးကောင်းရှိခြင်းကို မြတ်နိုးသူတို့အတွက်မှာမူ ငွေသည် ဘုရားသခင့်မျက်နှာသာတော်ကို မဝယ်ပေးနိုင်ချေ။
မိမိအချိန်၌ ငွေဖြင့်ဝယ်ယူနိုင်သမျှ အရာအားလုံးတို့ကိုပိုင်ဆိုင်သော ရှောလမုန်ဘုရင်သည် စည်းစိမ်ဥစ္စာကိုကိုးစားခြင်းကား တည်မြဲသောပျော်ရွှင်မှု မပေးနိုင်ကြောင်း အသိအမှတ်ပြုခဲ့သည်။ (ဒေ. ၅:၁၂-၁၅) ဘဏ်ဒေဝါလီခံခြင်း သို့မဟုတ် ငွေဖောင်းပွမှုအားဖြင့် ငွေဆုံးရှုံးသွားနိုင်သည်။ မုန်တိုင်းထန်မှုကြောင့် မရွှေ့ပြောင်းနိုင်သောပစ္စည်းများ ပျက်စီးသွားနိုင်သည်။ အာမခံပေါ်လစီများက ဆုံးရှုံးသွားသော ပိုင်ဆိုင်မှုများကို အနည်းအကျဉ်းအစားထိုးပေးဆပ်နိုင်သော်လည်း စိတ်ပိုင်းဆိုင်ရာဆုံးရှုံးမှုကိုကား အစားထိုးပေးနိုင်မည်မဟုတ်ချေ။ စတော့များနှင့် ခံဝန်ချုပ်များသည် စီးပွားရေးကျဆင်းမှုကြောင့် ညတွင်းချင်းပင် တန်ဖိုးမဲ့သွားနိုင်သည်။ လစာကောင်းသောလုပ်ငန်းတစ်ခုပင် ယနေ့တည်ရှိပြီး မနက်ဖြန် ပျောက်သွားနိုင်သည်။
သို့ဆိုလျှင် ငွေအပေါ် မျှတသောအမြင် မည်သို့ရှိနိုင်သနည်း။ ကျွန်ုပ်တို့၏အသက်တာတွင် ငွေ သို့မဟုတ် ပိုင်ဆိုင်မှုများသည် အဘယ်အခန်းကဏ္ဍ၌ ရှိသင့်သနည်း။ အမှန်တကယ်တန်ဖိုးရှိရာတစ်ခုဖြစ်သည့် “မှန်သောအသက်” ကို သင်မည်သို့ပိုင်ဆိုင်နိုင်ကြောင်း သိရှိရန် ကျေးဇူးပြု၍ ဆက်လက်ဆန်းစစ်ကြည့်ပါလေ။
[စာမျက်နှာ ၄ ပါ ရုပ်ပုံ]
စည်းစိမ်ဥစ္စာပိုင်ဆိုင်ခြင်းသည် တည်မြဲသောပျော်ရွှင်မှုကို မပေးနိုင်ချေ