O Au Tupe po o Lou Ola?

Atonu ua e faalogo e faatatau i tagata faomea o ē e tuu a latou fana i foliga o tagata o loo latou osofaʻia, ma faamalosia i latou i le faapea atu: “O au tupe po o lou ola!” I aso nei, o nei faiga fia pule ua lauiloa o loo atagia mai i le faigatā o faafitauli o loo tatou fesagaʻia nei—aemaise lava i a i latou o loo nonofo i atunuu tamaoaiga. Peitaʻi, o le taimi nei, ua lē o ni tagata faomea ia e faamalosia lea manaʻoga. Na i lo lea, ua ala mai i le soona faatāua naʻuā e tagata o tupe ma le taulau manuia i le mauaina o meafaitino.

O NA mea ua faatāua ua tulaʻi mai ai ni mataupu ma ni popolega fou. O le ā le tele o mea o le a lafoaʻia ona o le tulituliloaina o tupe ma meafaitino? Pe e mafai ona tatou maua le lotomalie i nai meafaitino ua maua? Po o le mea moni ea ua faataulagaina e tagata “le ola moni” ona o le matapeʻapeʻa? Po o le mauaina ea o tupe o le auala lea i le mauaina o le olaga fiafia?

Le Manaʻo Tele i Tupe

I manaʻoga ma faalogona loloto faaletagata—pe talafeagai pe leai foʻi—o loo tauvā ai mo le tulaga muamua le uiga lea o le manaʻo i tupe. I le ese mai i manaʻoga mo faiga faaleituaiga ma meaʻai, o le manaʻo tele i tupe e mafai ona faifai pea ma e lē uma. E foliga mai e lē faamalieina lava lea manaʻoga pe a oo atu ina tagata matua. I le tele o tagata, o le agaʻi atu ina matutua e ono faateleina ai le naunau po o le manatu mamafa i tupe ma mea e mafai e tupe ona faatau mai.

O le manaʻo tele i tupe e foliga mai e faateteleina. Na faapea mai se tagata autū i se tasi o ata iloga: “E taulau le manaʻo tele i tupe. E aogā le manaʻo tele i tupe.” E ui ina faasino atu e le toʻatele ia vaitausaga mai le 1980 i le 1989 e faapea o Tausaga o le Manaʻo tele i tupe, ae o le tulaga o mea na iai a o leʻi oo atu i lena taimi ma ina ua mavae foʻi lena taimi ua faaalia ai e faapea, o uiga e faaalia e tagata i tupe e itiiti lava sina suiga i le faagasologa o tausaga.

O le mea e foliga mai e fou, o avanoa ia ua iloa e tagata e faamalieina vave ai le manaʻoga mo le mauaina o le tele o meafaitino. E foliga mai o le toʻatele lava o tagata o le lalolagi e faaaluina le tele o lo latou malosi i le fausia ma le taumafai e mauaina le tele ma tele o mea. Atonu e te ioe faapea, o le mauaina o meafaitino ma le faaaogāina o tupe ua avea ma mea ua matuā tiotio tele i ai—ma e masani lava ona faia i ni auala eseese—ia taumafaiga o le olaga i aso nei.

Ae po ua sili atu ea le fiafia o tagata ona o na mea? O le tali o lena fesili, lea na tusi mai ai le tupu poto ma na tele foʻi lona tamaoaiga, o Solomona, i le 3,000 tausaga ua tuanaʻi e faapea: “O le ua manao i le ario, e le malie o ia i le ario; o le ua manao foi i le oloa tele, e leai sana mea e maua ai; o le mea faatauvaa foi lea.” (Failauga 5:10) E faapena foʻi ni faaiʻuga mataʻina ua maua mai i ni mataupu tau i aʻoaʻoga o loo suʻesuʻeina ai tagata i le lautele i aso nei.

Tupe ma le Fiafiaga

O se tasi o mea e sili ona faateʻia ai na mauaina e tusa ai o amioga faaletagata e faapea, e lē avea le faateleina o tupe ma meafaitino ma mea e maua ai foʻi se faatelega tutusa i le mauaina o le faamalieina ma le fiafia. O le mea ua oo ina iloa e le tele o tagata suʻesuʻe, o le taimi lava e oo atu ai le tagata i se tulaga patino tau tamaoaiga, o lona mauaina o le faamalieina ma le fiafia e lē faalagolago lea i le tele o meafaitino ua ia maua.

O lea, o le soona saʻilia o meafaitino ma tupe ua oo ai ina tau mānatu le toʻatele, ‘E foliga mai o lea e  matou te olioli i mea fou taʻitasi e matou te faatauina mai; ae peitaʻi, aiseā lava, pe a toe manatunatu lelei i nei mea uma, o mea ia na manatu e maua ai le fiafia e lē o tele se faamalieina o aumaia ai?’

I lana tusi Happy People, na taʻua ai e le tusitala o Jonathan Freedman e faapea: “A ausia loa e se tasi se tupe lea ua ia manatu ua lava mo lona olaga solo lelei, o le a lē aumaia loa la e le tele o isi tupe e na te maua se tulaga fiafia. E tusa lava foʻi po ua tele teisi atu se tupe e maua, e lē tele lava se sao a tupe i le aumaia ai o le fiafia.” E toʻatele ua oo ina iloa e faapea, o le mea e sili ona tāua mo le fiafiaga o le tagata, o le mauaina lea o faamanuiaga faaleagaga, galuega uigā i le olaga, atoa ai ma le faatāuaina o mataupu silisili tau amio. E tāua foʻi le iai o se faiā lelei ma isi tagata, atoa ai ma le saʻoloto mai i feteenaʻiga po o taofiofiga ia e ono taofia ai i tatou i le olioli i mea ua tatou maua.

Ua iloa e le toʻatele e faapea o le pogai o le tele o le leaga i le tulaga lautele i aso nei, o le faanaunauga lea e faaaogā ia meafaitino, e foʻia ai faafitauli ia e mautinoa lava o faafitauli e sau mai i totonu o le tagata. O nisi o loo saʻiliʻilia ma talanoaina tulaga o faiā faaletagata i le lautele e faapea mai o le uiga masani lea ua iai, o le leai o se faamoemoe ma se fiafia. Ua latou mātauina foʻi le faateleina o faanaunauga o tagata i atunuu tamaoaiga, e saʻili atu i tagata e faia togafitiga (therapist), po o le saʻilia o le uiga moni o le olaga ma le filemu o le mafaufau mai faiaʻoga atamamai i mea o loo popole ai tagata (guru), i lotu taufaasesē, ma tagata o loo faapea mai e latou te aumaia ni vaifofō. Ua faamautinoa ai i lenei mea le lē taulau o mea faitino e maua ai le uiga moni lava o le olaga.

Le Malosi ma le Vaivai o le Tupe

O le mea moni, o loo iai i tupe le malosi. E mafai e le tupe ona faatauina fale mananaia, lavalava anagatā, ma meafale matagofie. E ono maua mai ai le viiga, e faatosina mai ai, po o le faaoleole ai, e mafai foʻi ona mauaina ai ni uō e lē tumau ae tali manaʻo. Ae e na o le pau lena o le mea e mafai ona faia e le malosi o le tupe. O le mea e sili tatou te manaʻomia, lea e lē mafai ona faatauina e le tupe—o le alofa o se uō moni, le filemu o le mafaufau, o sina faamāfanafanaga mai le loto i le taimi ua lalata atu i le oti. Ae mo i latou e faapelepele i la latou faiā ma Lē na Foafoaina Mea, e lē mafai e tupe ona faatauina le faamaoniga mai le Atua.

O le tupu o Solomona, o lē na iai mea lelei uma e ono mafai ona faatauina e tupe i na aso, na ia iloaina e faapea o le faatuatua i meafaitino e lē mauaina ai se fiafiaga tumau. (Failauga 5:12-15) E mafai ona leiloa tupe pe a gau se faletupe po o le fesuisuiaʻi o le aogā o le tupe. E mafai ona faaleagaina meatotino e se afā malosi. O aiāiga tau inisiua, e ui lava e mafai ona iai sina aogā i le toe suia o mea ua leiloloa, ae e lē mafai ona suia ai mafatiaga o faalogona. O tupe o loo teuina e mafai ona lē aogā i se pō e tasi i se paʻū faafuaseʻi tau tamaoaiga. E oo lava i se galuega e lelei le totogi, e mafai ona iai nei ae mou atu a taeao.

E faapefea la ona tatou faavasega le tupe i lona tulaga e tatau ona iai? O le ā le matafaioi a tupe po o meatotino e faia i o tatou olaga? Faamolemole seʻi iloilo atili le mataupu ina ia mafai ai ona iloa pe faapefea ona e mauaina se mea e matuā aogā moni lava—o “le ola moni.”

[Ata i le itulau 4]

E lē mafai e meafaitino ona aumaia le fiafiaga tumau