Magdanay na Marigon na Garo Baga Nakaheheling kan Saro na Dai Naheheling!

“[Si Moises] nagpadagos na marigon na garo baga nakaheheling kan Saro na dai naheheling.”​—HEBREO 11:27.

1. Anong pambihirang tataramon manongod sa Dios an sinabi ni Jesus sa saiyang Sermon sa Bukid?

SI Jehova iyo an Dios na dai naheheling. Kan makiolay si Moises na maheling an Saiyang kamurawayan, si Jehova nagsimbag: “Dai mo maheheling an sakuyang lalauogon, huli ta mayong tawo na makaheheling sa sako asin mabubuhay.” (Exodo 33:20) Asin si apostol Juan nagsurat: “Mayo nin tawong nakaheling sa Dios kasuarin man.” (Juan 1:18) Kan si Jesu-Cristo tawo pa digdi sa daga, maski sia dai nakaheling sa Dios. Minsan siring, sa saiyang Sermon sa Bukid, si Jesus nagsabi: “Maogma an mga dalisay an puso, huli ta maheheling ninda an Dios.” (Mateo 5:8) Ano an boot sabihon ni Jesus?

2. Taano ta dai niato maheheling an Dios paagi sa satong pisikal na mga mata?

 ² Si Jehova ipinamimidbid kan Kasuratan bilang sarong Espiritu na dai naheheling. (Juan 4:24; Colosas 1:15; 1 Timoteo 1:17) Huli kaini, dai sinasabi ni Jesus na kitang mga tawo puedeng aktuwal na maheling si Jehova paagi sa satong pisikal na mga mata. Totoo, an linahidan na mga Kristiano maheheling si Jehova Dios sa langit pakatapos na sinda buhayon liwat bilang espiritung linalang. Alagad an mga tawo na “dalisay an puso” asin igwa kan paglaom na mabuhay sagkod lamang digdi sa daga ‘makaheheling’ man sa Dios. Paano ini posible?

3. Paano mamamansayan nin mga tawo an nagkapira sa mga kualidad nin Dios?

³ May manonodan kita manongod ki Jehova paagi sa maingat na pagmasid sa mga bagay na linalang nia. Sa siring puede kitang mapahanga sa saiyang kapangyarihan asin mapahiro na midbidon sia bilang Dios na Kaglalang. (Hebreo 11:3; Kapahayagan 4:11) Mapadapit digdi, si apostol Pablo nagsurat: “An . . . dai naheheling na mga kualidad [nin Dios] malinaw nang naheheling poon pa sa paglalang kan kinaban padagos, huli ta sinda namamansayan paagi sa mga bagay na ginibo, minsan an saiyang daing sagkod na kapangyarihan asin pagka-Dios.” (Roma 1:20) Kaya kabale sa mga tataramon ni Jesus manongod sa pakaheling sa Dios an kakayahan na mamansayan an nagkapira sa mga kualidad ni Jehova. An pakaheling na iyan nakabasar sa tamang kaaraman asin namamansayan sa espirituwal paagi sa ‘mga mata kan puso.’ (Efeso 1:18) An mga tataramon asin ginibo ni Jesus dakol man an ihinahayag manongod sa Dios. Huli kaini, si Jesus nagsabi: “Sia na nakaheling sa sako nakaheling man sa Ama.” (Juan 14:9) Eksaktong ipinabanaag ni Jesus an personalidad ni Jehova. Sa siring, an kaaraman dapit sa buhay asin katokdoan ni Jesus puedeng makatabang sa sato na maheling, o mamansayan, an nagkapira sa mga kualidad nin Dios.

Mahalagang Marhay an Espirituwalidad

4. Paano ipinaheheling kan dakol ngonyan an kawaran nin espirituwalidad?

⁴ Ngonyan, bibihira nanggad an pagtubod asin tunay na espirituwalidad. “An pagtubod bakong sadiri nin gabos na tawo,” sabi ni Pablo. (2 Tesalonica 3:2) Dakol an bangkag nin biyo sa saindang personal na mga okupasyon asin mayo nin pagtubod sa Dios. An saindang makasalan na gawe-gawe asin kawaran nin espirituwalidad inoolang sinda na maheling sia paagi sa mga mata nin pakasabot, ta si apostol Juan nagsurat: “An naggigibo nin maraot dai nakaheling sa Dios.” (3 Juan 11) Huling an siring na mga indibiduwal dai nakaheheling sa Dios paagi sa saindang pisikal na mga mata, sinda minahiro na garo baga dai nia naheheling an saindang ginigibo. (Ezequiel 9:9) Minemenos ninda an espirituwal na mga bagay, kaya dai ninda nakukua an “mismong kaaraman nin Dios.” (Talinhaga 2:5) Angay nanggad, kun siring, na si Pablo nagsurat: “An pisikal na tawo dai nag-aako kan mga bagay kan espiritu nin Dios, huli ta an mga iyan kamangmangan para sa saiya; asin dai nia iyan maaraman, huli ta an mga iyan sinisiyasat sa espirituwal na paagi.”​—1 Corinto 2:14.

5. Anong katunayan an narerealisar kan mga tawong espirituwal an kaisipan?

⁵ Minsan siring, kun espirituwal an satong kaisipan, danay niatong marerealisar na minsan ngani si Jehova bakong Dios na parahanap nin sala, aram nia talaga kun isinasagibo ta an maraot na mga kaisipan asin pagmawot. Tunay nanggad, “an mga dalan nin tawo nasa atubangan kan mga mata ni Jehova, asin ta pinagmamasdan nia an gabos niang dana.” (Talinhaga 5:21) Enkaso daogon kita nin kasalan, kita napahihiro na magsolsol asin hagadon an pagpapatawad ni Jehova huli ta namomotan ta sia asin habo tang makolgan an saiyang boot.​—Salmo 78:41; 130:3.

Ano an Nagpapangyari sa Sato na Magin Marigon?

6. Ano an boot sabihon kan pagigin marigon?

⁶ Minsan ngani si Jehova dai naheheling kan satong mga mata, pirme niatong girumdomon na kita naheheling nia. An pakarealisar sa saiyang pag-eksister asin marigon na pagtubod na sia harani sa gabos na nag-aarang sa saiya makatatabang na papangyarihon kitang magin marigon​—pusog asin dai natatanyog sa satong pagigin fiel sa saiya. (Salmo 145:18) Puede kitang magin arog ki Moises, na dapit sa saiya nagsurat si Pablo: “Huli sa pagtubod sia naghale sa Egipto, alagad dai sia natatakot sa kaanggotan kan hade, huli ta sia nagpadagos na marigon na garo baga nakaheheling kan Saro na dai naheheling.”​—Hebreo 11:27.

7, 8. Ano an nagtao nin kosog nin boot ki Moises sa atubangan ni Faraon?

⁷ Sa paggibo kan sugo sa saiya nin Dios na pangenotan an mga Israelita paluwas sa kaoripnan sa  Egipto, si Moises parateng minaatubang sa maringis na Faraon sa sarong palasyo nin hade na pano nin haralangkaw na opisyal sa relihion asin militar. Posibleng marhay na an mga lanob kan palasyo pano nin mga idolo. Alagad si Jehova, minsan ngani dai naheheling, tunay para ki Moises, bakong arog kan gabos na idolo na nagrerepresentar sa daing buhay na mga dios nin Egipto. Bakong makangangalas na si Moises dai natakot ki Faraon!

⁸ Ano an nagtao ki Moises nin kosog nin boot na umatubang nin paorootro ki Faraon? An Kasuratan nagsasabi sa sato na “an tawong si Moises iyo an pinakamahoyo sa gabos na tawo na yaon sa ibabaw kan daga.” (Bilang 12:3) Malinaw nanggad, an saiyang makosog na espirituwalidad asin marigon na pagtubod na an Dios nasa saiya an nagtao ki Moises kan kosog na kaipuhan tanganing irepresentar an “Saro na dai naheheling” sa atubangan kan daing herak na hade kan Egipto. Ano an nagkapirang paagi tanganing ikapahayag kan mga “nakaheheling” sa Dios na dai naheheling an saindang pagtubod sa saiya ngonyan?

9. Ano an sarong paagi na kita makakapadagos na marigon?

⁹ An sarong paagi na ipahayag an pagtubod asin magpadagos na marigon na garo baga nakaheheling kan Saro na dai naheheling iyo an paghuhulit na may kosog nin boot sa ibong nin paglamag. Nagpatanid si Jesus sa saiyang mga disipulo: “Ikaoongis kamo nin gabos na tawo huli sa ngaran ko.” (Lucas 21:17) Sinabihan man nia sinda: “An oripon bakong orog sa saiyang kagurangnan. Kun ako pinaglamag ninda, kamo man paglalamagon ninda.” (Juan 15:20) Tamang-tama sa mga tataramon ni Jesus, dai nahaloy pagkagadan nia, an saiyang mga parasunod nag-agi nin paglamag paagi sa mga patakot, pag-arestar, asin pambubugbog. (Gibo 4:​1-3, 18-21; 5:​17, 18, 40) Minsan ngani sunod-sunod kaidto an paglamag, an mga apostol ni Jesus asin iba pang disipulo padagos na naghulit kan maogmang bareta na may pagkapusoan.​—Gibo 4:​29-31.

10. Paano nakatatabang sa sato sa ministeryo an satong kompiansa sa nagpoprotehir na pag-ataman ni Jehova?

¹⁰ Arog ki Moises, an enot na mga parasunod ni Jesus dai natakot sa dakol nindang naheheling na kaiwal. An mga disipulo ni Jesus may pagtubod sa Dios, asin bilang resulta, natagalan ninda an grabeng paglamag na inagihan ninda. Iyo, sinda nagpadagos na marigon na garo baga nakaheheling kan Saro na dai naheheling. Ngonyan, an danay na pakarealisar sa nagpoprotehir na pag-ataman ni Jehova nagpapangyari sa sato na magin pusoan, na nagtatao sa sato nin kosog nin boot asin kadaihan nin takot sa satong paghuhulit kan Kahadean. An Tataramon nin Dios nagsasabi na “an pagtakig sa mga tawo sarong siod, alagad an nagtitiwala ki Jehova iingatan.” (Talinhaga 29:25) Bilang resulta, dai kita minasibog huli sa pagkatakot sa paglamag; ni ikinasusupog niato an satong ministeryo. Minomotibar kita kan satong pagtubod na magpatotoo na may kosog nin boot sa mga kataed, katrabaho, kaeskuela, asin iba pa.​—Roma 1:​14-16.

Ginigiyahan kan Saro na Dai Naheheling an Saiyang Banwaan

11. Segun ki Pedro asin Judas, paano nagpaheling nin kawaran nin espirituwalidad an nagkapirang asosyado sa Kristianong kongregasyon?

¹¹ Pagtubod an nagtatabang sa sato na helingon si Jehova bilang an saro na naggigiya sa saiyang daganon na organisasyon. Sa siring linilikayan niato an pagigin mapagkritika sa mga nagsasaabaga nin paninimbagan sa kongregasyon. Si apostol Pedro sagkod an tugang ni Jesus sa ina na si Judas nagpatanid dapit sa nagkapira na mayong-mayo nin espirituwalidad kaya sinda nagtataram na may panlilibak dapit sa mga lalaking nangengenot sa tahaw kan mga Kristiano. (2 Pedro 2:​9-12; Judas 8) Mataram daw kutana nin siring sa presensia ni Jehova an mga parahanap na iyan nin sala kun sia naheheling ninda nin literal? Dai nanggad! Alagad huling dai naheheling an Dios, dai inisip kan makalaman na mga tawong idto na sinda maninimbag sa saiya.

12. Anong aktitud an maninigo tang ipaheling sa mga nangengenot sa kongregasyon?

¹² Totoo, an Kristianong kongregasyon kompuesto nin bakong sangkap na mga tawo. An mga naglilingkod bilang kamagurangan nasasala na kun beses puedeng personal na makaapektar sa sato. Minsan siring, ginagamit ni Jehova an mga lalaking iyan bilang mga pastor kan saiyang aripompon. (1 Pedro 5:​1, 2) Rinerekonoser kan mga lalaki asin babae na espirituwal an kaisipan na ini sarong paagi nin paggiya ni Jehova sa saiyang banwaan. Kun siring, bilang mga Kristiano, linilikayan niato an mapagkritika, mapagreklamong aktitud asin ipinaheheling an paggalang sa teokratikong mga areglo nin Dios. Paagi sa pagigin makinuyog sa mga nangengenot sa sato, ipinaheheling niato na naheheling niato an Saro na dai naheheling.​—Hebreo 13:17.

 Pagheling sa Dios Bilang Satong Kaharohalangkaweng Paratokdo

13, 14. Ano an kahulogan para sa saindo kan pagheling ki Jehova bilang an Kaharohalangkaweng Paratokdo?

¹³ May saro pang kabtang na nagkakaipo nin espirituwal na pakamansay. Ihinula ni Isaias: “An saimong mga mata maninigong mga mata na nakakaheling sa saimong Kaharohalangkaweng Paratokdo.” (Isaias 30:20) Kaipuhan an pagtubod tanganing midbidon na si Jehova an saro na nagtotokdo sa sato paagi sa saiyang daganon na organisasyon. (Mateo 24:​45-47) An kahulogan nin pagheling sa Dios bilang satong Kaharohalangkaweng Paratokdo bako sanang pagpapadanay nin marahay na ugale sa pag-adal sa Biblia asin regular na pag-atender sa Kristianong mga pagtiripon. Iyan nangangahulogan nin lubos na pag-aprobetsar sa espirituwal na mga probisyon nin Dios. Halimbawa, kaipuhan kitang magtao nin orog kisa dating atension sa paggiyang itinatao ni Jehova paagi ki Jesus tanganing dai kita ikaanod parayo sa espirituwal na paagi.​—Hebreo 2:1.

¹⁴ Kun beses kaipuhan an espesyal na paghihingoa tanganing makua an lubos na pakinabang sa espirituwal na pagkakan. Halimbawa, tibaad may tendensia kita na basahon sana nin madali an nagkapirang pagkasaysay sa Biblia na nadedepisilan kitang saboton. Kun binabasa an magasin na Torrengbantayan asin Awake!, tibaad linalaktawan ta ngani an nagkapirang artikulo huli ta an tema bakong partikularmenteng interesante sa sato. O tibaad tinotogotan ta an satong isip na maglagawlagaw sa Kristianong mga pagtiripon. Minsan siring, puede kitang magdanay na alisto kun maingat niatong pinag-iisipan an mga puntong pinag-oolayan. An satong hararom na apresasyon sa inaako tang espirituwal na pagtotokdo nagpapaheling na minimidbid ta si Jehova bilang satong Kaharohalangkaweng Paratokdo.

Maninimbag Kita

15. Paano guminawe an nagkapira na garo baga dai sinda naheheling ni Jehova?

¹⁵ Nangorogna ta lakop na marhay an karatan sa “panahon [na ini] kan katapusan,” mahalagang marhay an pagtubod sa Saro na dai naheheling. (Daniel 12:4) Lakop an pandadaya asin seksuwal na inmoralidad. Siempre, madonong na girumdomon na minamasdan ni Jehova an satong mga  hiro dawa kun dai kita naheheling kan mga tawo. An nagkapira nawaran nin pakarealisar sa katunayan na ini. Kun mayo nin ibang nakaheheling sa sainda, tibaad bakong sono sa Kasuratan an iginagawe ninda. Halimbawa, an iba dai linabanan an sugot na magdalan nin nakararaot na aling-alingan asin pornograpiya sa Internet, telebisyon, asin iba pang porma nin modernong teknolohiya. Huli ta an pagkaimbuelto sa siring na mga bagay puedeng mangyari kun nagsosolo, an nagkapira guminawe na garo baga dai naheheling ni Jehova an saindang gawe-gawe.

16. Ano an maninigo na tumabang sa sato na sunodon an halangkaw na mga pamantayan ni Jehova?

¹⁶ Marahay na girumdomon an mga tataramon ni apostol Pablo: “An lambang saro sa sato maninimbag sa Dios para sa saiyang sadiri.” (Roma 14:12) Kaipuhan niatong marealisar na kada magkasala kita, kita nagkakasala tumang ki Jehova. An pakaaram kaini maninigo na makatabang sa sato na sunodon an saiyang halangkaw na mga pamantayan asin likayan an maating gawe-gawe. An Biblia nagpapagirumdom sa sato: “Mayo nin linalang na bakong hayag sa saiyang pagheling, kundi an gabos na bagay huba asin bukas sa mga mata kaidtong satong paninimbagan.” (Hebreo 4:13) Totoo, maninimbag kita sa Dios, alagad sierto nanggad na an satong hararom na pagkamoot ki Jehova an pangenot na rason kun taano ta ginigibo ta an saiyang kabotan asin kinukuyog an saiyang matanos na mga pamantayan. Kun siring gumamit kita nin diskresion sa mga bagay na arog kan satong pagpili nin aling-alingan asin satong paggawe sa mga bakong kasekso.

17. May anong interes na minamasdan kita ni Jehova?

¹⁷ Si Jehova odok na interesado sa sato, alagad dai boot sabihon kaiyan na hinahalat nia kitang makagibo nin mga sala tangani nia kitang kastigohon. Imbes, minamasdan nia kita na may mamomoton na pagmakolog, na arog nin sarong ama na gustong tawan nin premyo an saiyang makinuyog na mga aki. Abaa kanakararangang maaraman na an satong langitnon na Ama naoogma sa satong pagtubod asin iyo “an parabalos sa mga maigot na naghahanap sa saiya”! (Hebreo 11:6) Logod na gumibo kita nin lubos na pagtubod ki Jehova asin ‘maglingkod sa saiya sa bilog na puso.’​—1 Cronica 28:9.

18. Huling minamasdan kita ni Jehova asin minamangno an satong pagigin fiel, ano an pag-asegurar sa sato kan Kasuratan?

¹⁸ An Talinhaga 15:3 nagsasabi: “An mga mata ni Jehova yaon sa gabos na lugar, na nagbabantay sa mga maraot asin sa mga marahay.” Iyo, binabantayan nin Dios an mga tawong maraot asin inaaksionan sinda segun sa saindang gawe-gawe. Minsan siring, kun kita kabilang sa “mga marahay,” makaseseguro kita na minamangno ni Jehova an satong fiel na mga gibo. Abaa kanakapakokosog sa pagtubod na maaraman na ‘an satong pagpapagal bakong sayang sana dian sa Kagurangnan’ asin na an saro na dai naheheling dai ‘malilingawan an satong ginibo asin an pagkamoot na satong ipinaheling para sa saiyang ngaran’!​—1 Corinto 15:58; Hebreo 6:10.

Pag-agda ki Jehova na Siyasaton Kita

19. Ano an nagkapira sa mga pakinabang na ibinubunga kan makosog na pagtubod ki Jehova?

¹⁹ Bilang fiel na mga lingkod ni Jehova, kita mahal na marhay nia. (Mateo 10:​29-31) Minsan ngani sia dai naheheling, sia puedeng magin tunay para sa sato, asin puede niatong pakamahalon an satong mahalagang marhay na relasyon sa saiya. An pagkaigwa nin siring na aktitud sa satong langitnon na Ama nagtatao sa sato nin dakol na pakinabang. Tinatabangan kita kan satong makosog na pagtubod na magkaigwa nin malinig na puso asin marahay na konsensia sa atubangan ni Jehova. An pagtubod na mayo nin pagsaginsagin minaolang man sa sato na magkaigwa nin duwang klaseng buhay. (1 Timoteo 1:​5, 18, 19) An satong daing urong-sulong na pagtubod sa Dios nagtatao nin marahay na halimbawa asin puedeng magkaigwa nin positibong epekto sa mga nasa palibot niato. (1 Timoteo 4:12) Apuera dian, an siring na pagtubod nagpapaoswag nin diosnon  na paggawe, na nagpapagayagaya sa puso ni Jehova.​—Talinhaga 27:11.

20, 21. (a) Taano ta marahay na magpabantay kita ki Jehova? (b) Paano ta ikaaaplikar sa satong sadiri an Salmo 139:​23, 24?

²⁰ Kun kita totoong madonong, naoogma kitang magpabantay ki Jehova. Bako sanang boot niato na helingon nia kita kundi mawot man niato na siyasaton nia nin lubos an satong kaisipan asin mga hiro. Sa pamibi, marahay na agdahon ta si Jehova na siyasaton kita asin mansayon kun baga kita igwa nin ano man na salang mga inklinasyon. Seguradong matatabangan nia kita na atubangon an satong mga problema asin gumibo nin ano man na kinakaipuhan na mga pagliliwat. Angay nanggad, si salmista David nag-awit: “Rekisaha ako, O Dios, asin midbida an sakong puso. Siyasata ako, asin arama an sakong nakariribok na mga kaisipan, asin helinga kun baga igwa sa sako nin ano man na nakararaot na dalan, asin giyahe ako sa dalan nin daing talaan na panahon.”​—Salmo 139:​23, 24.

²¹ Nakimaherak si David na siyasaton sia ni Jehova tanganing helingon kun igwa nin ano man na “nakararaot na dalan” sa saiya. Arog kan salmista, bako daw na minamawot ta na siyasaton nin Dios an satong puso asin helingon kun baga igwa kita nin salang mga motibo? Kun siring, may pagtubod na hagadon ta ki Jehova na siyasaton kita. Alagad kumusta man kun kita riniribok nin pagkahadit sa sarong nagibong sala o igwa sa boot niato nin sarong bagay na nakararaot? Kun siring padagos kitang mamibi nin odok sa satong mamomoton na Dios, si Jehova, asin mapakumbabang sumunod sa paggiya kan saiyang banal na espiritu asin sa hatol kan saiyang Tataramon. Makakokompiar kita na susukorohan nia kita asin tatabangan kita na lumakaw sa dalan na pasiring sa buhay na daing katapusan.​—Salmo 40:​11-13.

22. Ano an maninigo na magin determinasyon niato mapadapit sa Saro na dai naheheling?

²² Iyo, bebendisyonan kita ni Jehova nin buhay na daing sagkod kun maabot niato an saiyang mga kahagadan. Siempre, dapat niatong midbidon an saiyang kapangyarihan asin autoridad, arog kan ginibo ni apostol Pablo kan sia sumurat: “Mapasa Hade sa panahon na daing sagkod, dai nin pagkalapa, dai naheheling, an solamenteng Dios, an onra asin kamurawayan sagkod noarin pa man. Amen.” (1 Timoteo 1:17) Logod na pirme niatong ipaheling an siring na odok sa pusong reberensia ki Jehova. Asin ano man an mangyari, nungka kitang mag-urong-sulong sa satong determinasyon na magpadagos na marigon na garo baga nakaheheling kan Saro na dai naheheling.

Ano an Isisimbag Nindo?

• Paano mahihimo kan mga tawo na maheling an Dios?

• Kun si Jehova tunay para sa sato, paano kita mahiro kun kita pinaglalamag?

• Ano an boot sabihon kan pagheling ki Jehova bilang satong Kaharohalangkaweng Paratokdo?

• Taano ta maninigo niatong mawoton na siyasaton kita ni Jehova?

[Mga Hapot Para sa Pag-adal]

[Ritrato sa pahina 18]

Si Moises, na dai natakot ki Faraon, naghiro na garo baga naheheling nia si Jehova, an Dios na dai naheheling

[Ritrato sa pahina 21]

Nungka kitang gumawe na garo baga dai naheheling ni Jehova an satong ginigibo

[Ritrato sa pahina 23]

Odok niatong hinahagad an kaaraman dapit sa Dios huli ta hineheling niato sia bilang satong Kaharohalangkaweng Paratokdo