Reste Ferm Konmsi Ou Pe War Sa Enn Ki Envizib!
Reste Ferm Konmsi Ou Pe War Sa Enn Ki Envizib!
“[Moiz] ti reste ferm konmsi i ti pe war sa enn ki envizib.”—EBRE 11:27.
1. Ki deklarasyon remarkab Zezi ti fer lo Bondye dan son Sermon lo Montanny?
ZEOVA i sa Bondye envizib. Kan Moiz ti demande pour war Son laglwar, Zeova ti reponn: “Ou pa kapab war mon figir, akoz napa okenn zonm ki kapab war mwan e pourtan kontinyen viv.” (Egzod 33:20) Zapot Zan ti ekrir: “Personn pa’n deza war Bondye.” (Zan 1:18) Ni menm Zezi Kri ler i ti lo later konman en zonm pa ti kapab war Bondye. Toudmenm, dan son Sermon lo Montanny, Zezi ti dir: “Byennere bann ki annan leker pir, akoz zot pou war Bondye.” (Matye 5:8) Ki Zezi ti oule dir par sa?
2. Akoz nou pa kapab war Bondye avek nou lizye fizik?
2 Labib i idantifye Zeova konman en Lespri envizib. (Zan 4:24; Kolosyen 1:15; 1 Timote 1:17) Alor, Zezi pa ti pe dir ki nou imen nou vreman kapab war Bondye avek nou lizye fizik. I vre ki bann Kretyen swazir pou kapab war Bondye dan lesyel apre ki zot pou resisite konman bann kreatir spirityel. Me bann imen ki “annan leker pir” e ki annan lespwar pour viv pour touzour lo later, zot osi zot kapab “war” Bondye. Konman ki sa i posib?
3. Ki mannyer bann imen i kapab persevwar serten kalite ki Bondye i annan?
3 Nou kapab aprann serten keksoz lo Zeova kan nou obzerv atantivman bann keksoz ki i’n kree. An rezilta, nou kapab enpresyonnen par son pwisans e motive pour rekonnet ki se li ki Bondye e Kreater. (Ebre 11:3; Revelasyon 4:11) An rapor avek sa, zapot Pol ti ekrir: “Bann kalite envizib [Bondye], setadir, son pisans eternel ek son natir konman Bondye in ganny revele par bann keksoz ki in fer.” (Romen 1:20) Alor sa ki Zezi ti dir konsernan war Bondye i enkli abilite pour persevwar bann kalite ki Zeova i annan. Pour arive war sa, i enportan pour annan konnesans egzakt e pour war dan en fason spirityel avek ‘lizye nou leker.’ (Efezyen 1:18, NW ) Parol Zezi ek son aksyon i osi revel en kantite keksoz lo Bondye. Se pour sa rezon ki Zezi ti dir: “Sa ki’n war mwan in osi war mon Papa.” (Zan 14:9) Zezi ti reflekte personnalite Zeova dan en fason parfe. Alor, en konnesans lo lavi ek lansennyman Zezi i kapab ed nou pour war, oubyen persevwar, serten kalite ki Bondye i annan.
Spirityalite i esansyel
4. Konman ki bokou dimoun ozordi i demontre ki zot mank spirityalite?
4 Ozordi, lafwa ek vre spirityalite i vreman rar. “Pa tou dimoun ki annan lafwa,” Pol ti dir. (2 Tesalonisyen 3:2) Bokou dimoun i konpletman okipe dan zot aktivite personnel e zot napa lafwa dan Bondye. Vi ki zot annan bann move kondwit e ki zot mank spirityalite, sa i anpes zot war li avek zot lizye konpreansyon, parski zapot Zan ti ekrir: “Sa ki fer sa ki mal pa’n war Bondye.” (3 Zan 11) Akoz sa bann endividi pa war Bondye avek zot lizye fizik, zot konport zot konmsi Bondye pa war sa ki zot pe fer. (Ezekyel 9:9) Zot mepriz bann keksoz spirityel, ki fer ki zot pa kapab arive ganny “konnesans Bondye.” (Proverb 2:5) Alor, Pol in byen ekrir: “En zonm fizik pa resevwar bann keksoz lespri Bondye, parski zot en sotiz pour li; e i pa kapab konn zot, akoz zot ganny egzaminen dan en fason spirityel.”—1 Korentyen 2:14, NW.
5. Ki bann dimoun ki atas lenportans avek bann keksoz spirityel i konsyan?
5 Toutfwa, si nou atas en gran lenportans avek bann keksoz spirityel, nou pou touzour konsyan ki menm si Zeova pa en Bondye ki pe toultan get zis nou defo, i konnen kan ki nou azir selon nou move panse ek dezir. Anfet, “semen zonm i devan lizye Zeova, e i egzamin tou son latras.” (Proverb 5:21) Si nou arive fer pese, nou santi nou pouse pour repantir e demann Zeova pour pardonn nou akoz nou kontan li e nou pa anvi bles li.—Psonm 78:41; 130:3.
Kwa ki fer nou reste ferm?
6. Ki savedir reste ferm?
6 Kantmenm nou pa war Zeova avek nou lizye, annou touzour kit antet ki li i war nou. Kan nou konsyan ki i egziste e konvenki ki i pros avek bann ki envok li, sa pou ed nou reste ferm e napa okenn lezitasyon pour reste fidel avek li. (Psonm 145:18) Nou kapab vin parey Moiz ki Pol ti dir sa lo li: “Par lafwa, Moiz ti kit Lezip, san ki i ti per lakoler lerwa. I ti reste ferm konmsi i ti pe war sa enn ki envizib.”—Ebre 11:27.
7, 8. Ki sa ki ti donn Moiz kouraz pour al devan Faraon?
7 Pandan ki i ti pe akonpli son misyon ki Bondye ti donn li pour delivre bann Izraelit anba lesklavaz bann Ezipsyen, Moiz ti souvan al devan Faraon dominer dan lakour rwayal ki ti plen avek bann sef relizye e militer. I kapab ki miray pale ti anlinyen avek bann zidol. Me kontrerman avek tou sa bann zidol ki ti pe reprezant bann bondye Lezip ki ti napa okenn lavi dan zot, Zeova ti reel pour Moiz kantmenm i ti envizib. I pa sirprenan ki Moiz pa ti per Faraon!
8 Kwa ki ti donn Moiz sa kouraz pour al devan Faraon plizyer fwa? Labib i dir nou ki “sa zonm, Moiz, ti annan plis limilite ki tou zonm ki ti lo sirfas later.” (Nonm 12:3) I kler ki sa bon spirityalite ki Moiz ti annan ek son konviksyon ki Bondye ti avek li ti donn li sa lafors ki i bezwen pour reprezant ‘sa enn ki envizib’ devan sa lerwa Ezipsyen kriyel. Ki mannyer bann ki “war” Bondye envizib i manifeste zot lafwa dan li ozordi?
9. Nonm en fason ki nou kapab kontinyen reste ferm?
9 En fason ki nou kapab demontre lafwa e kontinyen reste ferm konmsi nou pe war sa Enn ki envizib se par pres avek kouraz malgre persekisyon. Zezi ti averti son bann disip: “Tou dimoun pou ay zot akoz mon non.” (Lik 21:17) I ti osi dir zot: “ ‘Okenn serviter pa pli gran ki son met.’ Si zot in persekit mwan, zot osi, zot pou ganny persekite.” (Zan 15:20) Parey Zezi ti dir, zis apre son lanmor, son bann disip ti sibir diferan kalite persekisyon tel konman menas, arestasyon, ek bate. (Akt 4:1-3, 18-21; 5:17, 18, 40) Kantmenm ti annan en persekisyon eksepsyonnel, bann zapot Zezi ek lezot disip ti kontinyen pres sa bon nouvel avek lardyes.—Akt 4:29-31.
10. Konman ki nou konfyans ki Bondye i la pour protez nou i ed nou dan predikasyon?
10 Parey Moiz, bann premye disip Zezi pa ti les zot bann lennmi, ki zot ti kapab war, fer zot per. Bann disip Zezi ti annan lafwa dan Bondye, se pour sa ki zot ti kapab andir sa persekisyon sever ki zot ti gannyen. Wi, zot ti kontinyen reste ferm konmsi zot ti war sa Enn ki envizib. Ozordi, si nou touzour konsyan ki Zeova i la pour protez nou, sa pou donn nou lardyes ek kouraz, e i pou fer nou pa per pour pres konsernan Rwayonm. Parol Bondye i dir “tranble devan zonm se sa ki poz en latrap, me sa ki met konfyans dan Zeova pou ganny proteze.” (Proverb 29:25) Alors, nou pa rekile akoz nou per persekisyon e nou pa ni onte akoz nou prese. Nou lafwa i pous nou pour avek kouraz temwanny avek nou vwazen, nou koleg travay, nou kanmarad lekol, ek lezot.—Romen 1:14-16.
Sa Enn ki envizib i diriz son Pep
11. Dapre Pyer ek Zid, konman ki serten ki ti pe asosye avek kongregasyon Kretyen ti demontre ki zot mank spirityalite?
11 Lafwa i ed nou pour war Zeova konman sa enn ki diriz son lorganizasyon lo later. Alor nou evite annan sa latitid pour kritik bann ki aksepte pour desarz responsabilite dan kongregasyon. Zapot Pyer ek Zid, ki ti demi frer Zezi, ti tou le de averti serten ki ti telman mank spirityalite ki zot ti koz an mal lo bann zonm ki ti annan responsabilite pour diriz kongregasyon Kretyen. (2 Pyer 2:9-12; Zid 8) Eski sa bann ki ti pe toultan kritike ti pou koz koumsa dan prezans Zeova si zot ti kapab war li fizikman? Pa ditou! Me vi ki Bondye i envizib, sa bann zonm fizik pa ti kapab mazinen ki zot pou rann kont avek li.
12. Ki latitid nou devret annan anver bann ki annan responsabilite pour diriz kongregasyon?
12 I vre ki kongregasyon Kretyen i konpoze avek bann imen enparfe. Parfwa bann ki servi konman ansyen i fer bann fot ki kapab afekte nou personnelman. Toudmenm, Zeova pe servi sa bann zonm pour vey son troupo. (1 Pyer 5:1, 2) Bann frer ek ser ki vreman spirityel i rekonnet ki sa i en fason ki Zeova pe servi pour diriz son pep. Alor, konman Kretyen, nou evite annan sa leta lespri pour kritike e konplent, e nou montre respe pour laranzman ki Bondye in fer pour diriz son pep. Par obeir bann ki pe dirize parmi nou, nou montre ki nou war sa Enn ki envizib.—Ebre 13:17.
War Bondye konman nou Gran Ansennyan
13, 14. Dapre ou ki savedir war Zeova konman Gran Ansennyan?
13 I annan en lot domenn kot nou bezwen persepsyon spirityel. Izai ti profetize: “Zot lizye i devret vin bann lizye ki pe vwar zot Gran Ansennyan.” (Izai 30:20) I demann lafwa pour rekonnet ki se Zeova ki pe ansenny nou atraver son lorganizasyon teres. (Matye 24:45-47) War Bondye konman nou Gran Ansennyan i enplik plis ki mentenir en bon progranm letid e asiste bann renyon Kretyen regilyerman. I vedir profit o maksimonm tou bann provizyon spirityel ki Bondye i donn nou. Par egzanp, nou bezwen pli atantif ki labitid anver gidans ki Zeova i donnen atraver Zezi afen ki nou pa ganny elwannyen spirityelman.—Ebre 2:1
14 Parfwa i demann zefor ekstra pour retir otan benefis ki nou kapab dan sa nouritir spirityel. Par egzanp, nou kapab annan sa tandans pour pas vitman lo serten resi Labib ki nou vwar difisil pour konpran. Petet i annan serten lartik dan magazin Latour Veyer ek Réveillez-vous! ki nou pa ni menm lir akoz sa size ki i pe koz lo la pa enteres nou. Oubyen i kapab ki dan renyon nou asize dan gran mazinasyon. Toutfwa, nou kapab reste alert si nou rezonn byen lo sa bann pwen ki pe ganny konsidere. Lapresyasyon profon pour sa lenstriksyon spirityel ki nou gannyen i montre ki nou rekonnet ki Zeova i nou Gran Ansennyan.
Nou bezwen rann Kont
15. Ki mannyer serten in azir konmsi Zeova pa war sa ki zot fer?
15 Lafwa dan sa Enn ki envizib i esansyel sirtou akoz mesanste i sitan komen dan sa “letan lafen.” (Danyel 12:4) Malonnekte ek imoralite seksyel pe rennyen. Byensir, i ti pou saz lo nou par si nou kit antet ki Zeova pe obzerv sa ki nou fer menm kan imen pa kapab war nou. I annan serten ki nepli konsyan sa. Kan lezot pa war zot, petet zot kondwir zot dan en fason ki kontrer avek prensip Labib. Par egzanp, i annan serten ki’n les zot ganny antrennen par tantasyon pour regard bann divertisman ek pornografi lo Internet, televizyon, ek lezot form teknolozi modern ki en danze pour zot. Lefe ki zot kapab fer sa bann keksoz an sekre, serten in azir konmsi Zeova pa war sa ki zot fer.
16. Kwa ki devret ed nou pour aksepte bann standar eleve Zeova?
16 I byen ki nou kit antet parol zapot Pol: “Sakenn antre nou pou bezwen rann kont devan Bondye pour son prop lekor.” (Romen 14:12) Nou bezwen konsyan ki sak fwa ki nou fer pese, nou pe fer li kont Zeova. Ler nou konn sa i ed nou pour viv an akor avek son bann standar eleve e pour evit bann kondwit enpir. Labib i rapel nou: “Napa nanryen ki kasyet devan Bondye. Tou lansanm kreasyon i ekspoze devan lizye sa enn avek ki nou bezwen rann kont.” (Ebre 4:13) I vre ki nou bezwen rann kont Bondye me nou rezon prensipal pour fer son lavolonte e aksepte son bann standar drwat, se byensir nou lanmour profon ki nou annan pour li. Alors, annou montre pridans dan bann keksoz tel konman nou swa divertisman ek nou kondwit anver bann sèks opoze.
17. Zeova i obzerv nou avek ki kalite lentere?
17 Zeova i annan en gran lentere dan nou, me sa pa vedir ki i pe veye kan nou fer fot pour li pini nou. Okontrer, i pe obzerv nou avek en lentere senser, parey en papa ki anvi rekonpans son zanfan pour son lobeisans. Konman i rekonfortan pour konnen ki nou Papa seles i pran plezir dan nou lafwa e i “rekonpans tou bann ki rod li”! (Ebre 11:6) Fotespere ki nou demontre en lafwa total dan Zeova e ki nou “servi li avek en leker konplet.”—1 Kronik 28:9.
18. Vi ki Zeova i obzerv nou e i remark nou fidelite, ki lasirans Labib i donn nou?
18 Proverb 15:3 i dir: “Lizye Zeova i partou, pe sirvey bann ki move ensi ki bann ki bon.” Wi, Zeova i vey bann move dimoun e i azir avek zot selon zot kondwit. Toutfwa, si nou parmi “bann ki bon,” nou kapab asire ki Zeova i remark nou fidelite. Pa i ranforsi nou lafwa kan nou konnen ki ‘dan Senyer nou travay pa anven’ e ki sa enn ki envizib pa pou ‘oubliy travay ki nou’n fer, ni lanmour ki nou’n montre pour li’!—1 Korentyen 15:58; Ebre 6:10.
Envit Zeova pour egzamin nou
19. Ki bann benefis nou kapab gannyen kan nou annan en lafwa solid dan Zeova?
19 Etan donnen ki nou bann serviter Zeova, nou presye pour li. (Matye 10:29-31) Kantmenm i envizib, i kapab vin reel pour nou, e nou kapab seri nou relasyon presye ki nou annan avek li. Kan nou annan en tel latitid anver nou Papa seles sa i anmenn bokou benefis pour nou. Nou lafwa for i ed nou pour annan en leker pir ek en bon konsyans devan Bondye. Lafwa san lipokrizi i osi ed nou pour evite annan de kalite lavi. (1 Timote 1:5, 18, 19) Nou lafwa solid dan Bondye i donn en bon legzanp e i kapab annan en lefe pozitif lo bann ki otour nou. (1 Timote 4:12) Deplis en tel lafwa i promot en kondwit ki Bondye i aprouve e sa i fer son leker rezwir.—Proverb 27:11.
20, 21. (a) Akoz nou devret kontan ki Zeova pe vey nou? (b) Ki mannyer nou kapab aplik Psonm 139:23, 24 lo nou menm?
20 Si nou vreman saz, nou pou kontan ki Zeova pe vey nou. Nou pa senpleman anvi ki i war nou me nou osi anvi ki i egzamin nou bann panse ek aksyon oprofon. I ti a byen si dan nou lapriyer nou envit Zeova pour egzamin nou e gete si nou annan okenn move tandans. Sirman i kapab ed nou pour fer fas avek nou bann problenm e pour fer okenn sanzman neseser. Dan menm laliny, psalmis David ti sante: “Egzamin mwan byen, O Bondye, e konn mon leker. Egzamin mwan, e konn bann panse ki trouble mwan, e vwar si i annan dan mwan okenn semen douloure, e kondwir mwan dan semen letan endefini.”—Psonm 139:23, 24.
21 David ti sipliy Zeova pour egzamin li pour war si napa okenn “semen douloure” dan li. Eski parey sa psalmis nou anvi ki Bondye i egzamin nou leker e war si nou annan okenn move motivasyon? Alor, avek lafwa, annou demann Zeova pour egzamin nou. Me sipoze nou annan serten lenkyetid konsernan en fot ki nou’n fer oubyen i annan en keksoz ki pe fer nou soufer dan silans? Dan sa ka, annou kontinyen priy nou Bondye lanmour avek senserite, e avek limilite soumet avek lenstriksyon son lespri sen ek konsey ki trouve dan son Parol. Nou kapab annan konfyans ki i pou donn nou son lasistans e i pou ed nou pour pourswiv en lavi ki pou anmenn ver lavi eternel.—Psonm 40:11-13.
22. Ki nou devret determinen pour fer an rapor avek sa Enn ki envizib?
22 Wi, Zeova pou donn nou lavi eternel konman en benediksyon si nou ranpli son bann legzizans. Byensir, nou bezwen rekonnet son pwisans ek lotorite, zis parey zapot Pol ti fer ler i ti ekrir: “Annou rann loner ek laglwar Lerwa eternel, sel Bondye imortel e envizib pour touzour. Amenn.” (1 Timote 1:17) Annou touzour demontre en respe senser pour Zeova. E nenport kwa ki arive, annou pa zanmen ezite dan nou determinasyon pour kontinyen reste ferm konmsi nou pe war sa Enn ki envizib.
Ki ou pou reponn?
• Ki mannyer i posib pour imen war Bondye?
• Si Zeova i reel pour nou, ki mannyer nou pou reazir kan nou ganny persekite?
• Ki i vedir pour war Zeova konman nou Gran Ansennyan?
• Akoz nou devret anvi ki Zeova i egzamin nou?
[Kestyon]
[Portre lo paz 14]
Moiz pa ti les Faraon fer li per, i ti azir konmsi i ti war Zeova, Bondye envizib
[Portre lo paz 17]
Annou pa zanmen azir konmsi Zeova pa war sa ki nou fer
[Portre lo paz 19]
Nou seryezman rod konnesans lo Bondye akoz nou war li konman nou Gran Ansennyan