Takussaanngitsoq isigalugulusooq pinertusaarit!
Takussaanngitsoq isigalugulusooq pinertusaarit!
„[Mosesi] takussaanngitsumik isigisaqarlunilusooq pinertusaarpoq.“ — HEBRÆERIT 11:27.
1. Guuti pillugu Jiisusi qanoq maluginiarnartumik oqaaseqarpa?
JEHOVA Guutiuvoq takussaanngitsoq. Mosesip qinnuigimmani naalannassutsini takujumallugu Jehova akivoq: „Kiinara takussanngilat, uannik takunnittoq inuuginnarsinnaanngimmat.“ (2 Mosesi 33:20) Apustililu Johannesi allappoq: „Kialluunniit Guuti takusimanngisaannarpaa.“ (Johannesi 1:18) Jiisusi Kristusip nunarsuarmi inuugallarami allaat Guuti takusinnaanngilaa. Taamaakkaluartorli Jiisusi qaqqami oqaluutsimini oqarpoq: „Pilluarput uummatimikkut minguitsuusut, taakkuami Guuti takussavaat.“ (Matthæusi 5:8) Jiisusimuna tamanna qanoq isumaqartikkaa?
2. Sooq isitsinnik Guuti takusinnaanngilarput?
2 Biibilimi allassimavoq Jehova anersaajusoq takussaanngitsoq. (Johannesi 4:24; Kolossemiut 1:15; 1 Timotheusi 1:17) Jiisusi isumaqanngilaq Jehova isitsinnik takusinnaagipput. Ilumoorpoq kristumiut tanitat qilammi Jehova Guuti takujumaaraat pinngortitatut anersaatut makereerunik. Inuilli „uummatimikkut minguitsuusut“ nunarsuarmilu naassaanngitsumik inuunissamik neriugisallit aamma Guuti „takussavaat“. Qanoq?
3. Guutip pissusiisa ilaat qanoq paasisinnaavavut?
3 Jehova pillugu ilinniarsinnaavugut pinngortitai misissoqqissaarlugit. Qularnanngitsumik sunnerneqangaassaagut pinngortitarsuarmi pissaaneranik takussutissat malugigutsigik, Guutitsitullu Pinngortitsisitsitullu akueralugu. (Hebræerit 11:3; Saqqummersitat 4:11) Tamatumunnga atatillugu apustili Paulus allappoq: „Takussaanngitsuunerami, ittuinnartumik pissaanera Guutiussusialu, silarsuup pinngortitaaneraniilli takussaagaluarput suliaasigullu ilisimaneqarlutik.“ (Romamiut 1:20) Jiisusip Guutimik takunninneq eqqaagamiuk aamma pivaa Jehovap pissusiisa ilaannik paasinnissinnaaneq. Eqqorluartumik ilisimasaqartariaqarpugut ’uummatittalu isaanik’ anersaakkut isigisaqarsinnaasariaqarluta taamatut takunnissagutta. (Efesosimiut 1:18) Jiisusip oqaasii suliaalu aamma Guuti pillugu takutitsisuupput. Taamaattumik Jiisusi oqarpoq: „Uannik takunnittup Ataataq takuaa.“ (Johannesi 14:9) Jiisusip naammalluinnartumik Jehovap pissusii ersersippai. Taamaattumik Jiisusip inuuneranik ajoqersuutaanillu ilisimasaqarutta Guutip pissusiisa ilaat takusinnaassavavut imaluunniit paasisinnaassallugit.
Anersaakkut ittunik soqutigisaqarneq pingaaruteqarpoq
4. Ullumikkut inuppassuit qanoq takutittarpaat anersaakkut ittut pingaartinnagit?
4 Ullumikkut qaqutigortuupput inuit uppertut anersaakkut ittunik pingaartitsisut. ’Imaanngilarmi tamarmik upperneq pigigaat,’ Paulusi oqarpoq. (2 Thessalonikamiut 3:2) Inuppassuit namminneq anguniakkatik soqutigisatillu ulapputigaat Guutilu upperinagu. Ajortilittut ileqquisa anersaakkullu ittunik isiginnittaaseqannginnerisa silaqassutsip isaanik takusaqartissinnaanngilaat, apustili Johannesi allammat: „Ajortumik iliortup Guuti takusimanngilaa.“ (3 Johannesi 11) Isiminnik Guuti takusinnaannginnamikku taassumannga takuneqarsinnaanngitsutut iliuuseqartarput. (Ezekieli 9:9) Anersaakkut pingaartitassat nikagigamikkik ’Guuti ilisimalersinnaanngilaat’. (Ussatit 2:5) Paulusi eqqorluartumik allappoq: „Inuup tarnimut atasup Guutip Anersaavanit pisut ilassisanngilai; tamanna taassumunnga sianiitsuliorneruvoq, paasinerlu saperpaa, Anersaap uuttuutaa kisiat atorlugu misilitassaammat.“ — 1 Korinthimiut 2:14.
5. Inuit anersaakkut ittunik pingaartitsisut suna eqqaamajuarpaat?
5 Inuit anersaakkut ittunik pingaartitsisut eqqaamajuarpaat Jehovap kukkunersiuinianngikkaluarluni malugisaraa ajortumik pissuteqarluta iliuuseqarutta. Aap, „[Jehovap] isigisarpai angutip aqqutai, aqqusininngui malittareqqissaarpai.“ (Ussatit 5:21) Ajortuliorutta peqqissimissaagut Jehovamullu isumakkeerfigeqqulluta asagatsigu aliasutsikkumanagulu. — Tussiaat 78:41; 130:3.
Qanoq pinertusaarsinnaavugut?
6. Pinertusaarneq qanoq paasisariaqarpa?
6 Naak Jehova takussaanngikkaluartoq, eqqaamajuartigu taassuma takusinnaagaatigut. Nalunngilluinnaratsigu piusoq torlorfigisiminullu tamanut qanittoq, pinertusaarsinnaavugut taassumunngalu ilumoornitsinni aalajaattuarluta. (Tussiaat 145:18) Mosesitut iliorsinnaavugut, taanna pillugu Paulusi allammat: „Uppernikkut Egypteni qimappaa kunngip kamannera siooraginagu. Takussaanngitsumimmi isigisaqarlunilusooq pinertusaarpoq.“ — Hebræerit 11:27.
7, 8. Mosesip Faraomut sassarnissaminut sapiissuseq sumit pivaa?
7 Mosesimut Guutip Israelikkut Egyptenimit inussiataanermit aallaruteqqummagit arlaleriaqaluni kunngi Farao qunutitsisoq, upperisarsiornikkut sakkutooqarnikkullu niumasunik avatangiiseqartoq, sassarfigisariaqarpaa. Qularnanngitsumik illussaarsuup iigaani sanileriiaanik guutipiloqarpoq. Jehovali takussaanngikkaluarluni Mosesimut piviusuuneroqaaq guutipilunnit Egyptenip guutiisa uumassuseqanngitsut sinniisuinit tamanit. Taamaattumik tupinnanngilaq Mosesi Faraomut sassarami qunusuitsuummat!
8 Mosesip arlaleriarluni Faraomut sassarnissaminut sapiissuseq sumit pivaa? Biibilimi allassimavoq ’Mosesi inuusoq anneruniajuitsoq, inunnit nunarsuarmiittunit tamanit anneruniajuinnerpaasoq’. (4 Mosesi 12:3) Erseqqippoq Mosesi anersaamut tunngasunik pingaartitsingaarnerata Guutimillu najorneqarnermit tatiginninnerata ’takussaanngitsumut’ sinniisuulluni Egyptenimiut kunngiannut naakkittaatsumut sassarnissaanut nukissaqalersikkkaa. Ullumikkut Guutimik takussaanngitsumik takunnittut uppernertik qanoq takutissinnaavaat?
9. Qanoq pinertusaarsinnaavugut?
9 Ilaatigut uppernerput takutissinnaavarput takussaangitsumillu takunnittutut pinertusaarsinnaavugut malersorneqaraluarluta sapiilluta oqaluussinitsigut. Jiisusip ajoqersukkani ima mianersoqquai: „Ateralu pillugu tamanit uumissorneqassaasi.“ (Lukasi 21:17) Aamma oqarfigai: „Kiffaq naalakkaminit annerunngilaq. Uanga qinugisimaguninnga ilississaaq qinugiumaarpaasi.“ (Johannesi 15:20) Jiisusip oqaasiinut naapertuuttumik toqunerata kingunitsiannguagut ajoqersugai malersorneqartalerput, sioorasaarneqartalerlutik, tigusarineqartalerlutik unatarneqartalerlutillu. (Apustilit Suliaat 4:1-3, 18-21; 5:17, 18, 40) Malersorneqartaraluarlutik Jiisusip apustilii ajoqersugaalu allat siooranngivillutik nutaarsiassaq nuannersoq oqaluussissutigiuarpaat. — Apustilit Suliaat 4:29-31.
10. Jehovap isumassuilluni illersuineranut tatiginninnerput qanoq oqaluussinitsinni iluaqutigisarparput?
10 Mosesitut Jiisusip ajoqersugai siulliit akeqqaminnit takussaasunit amerlasuunit qunutitaanngillat. Jiisusip ajoqersugaasa Guuti upperaat, taamaattumillu sualuttumik malersorneqarnertik nikalluutiginngilaat. Aap, takussaanngitsumik takunnittutut pinertusaarput. Nalunnginnatsigu Jehovap isumassuilluni illersoraatigut sapiissuseqarpugut Guutillu naalagaaffianik oqaluussinitsinni qunusuilluta. Guutip oqaasiani allassimavoq ’inunnik qunugisaqarneq napiaaniutinngortartoq, [Jehovamilli] tatiginnittoq aarlerissutissaqanngitsoq’. (Ussatit 29:25) Taamaattumik malersugaanissatsinnut qunulluta tunuartinngilagut, Guutimillu kiffartuussineq kanngusuutiginngilarput. Uppernerup kajumissisippaatigut siooranata sanilitsinnut, suleqatitsinnut, atuaqatitsinnut allanullu oqaluussinissatsinnut. — Romamiut 1:14-16.
Guutip takussaanngitsup innuttani siulersorpai
11. Kristumiut ilaasa Petrusimit Judasimillu allaatigineqartut qanoq takutippaat anersaakkut ittunik pingaartitsinatik?
11 Upperneq iluaqutigalugu paasisinnaavarput Jehovap nunarsuarmi peqatigiissortani siulersorai. Taamaattumik ilagiinni akisussaaffillit isornartorsiussanngilavut. Apustili Petrusip Jiisusillu qatanngutissaata Judasip tamarmik inuit ilaat mianersoqqussutigaat anersaakkut ittunik ima pingaartitsinngitsigimmata kristumiuni siuttuusunik mitaatiginnillutik. (2 Petrusi 2:9-12; Judasi 8) Inuit assuarinnikkumatuut taakku Jehova takusinnaasuugunikku aamma taama oqalussagaluarnerlutik? Taamaagunanngilaq! Guutili takussaanngimmat inuit uinimmut sammisumik eqqarsariaasillit puiorpaat taassumunnga nassuertussaallutik.
12. Ilagiinni siulersuisut qanoq isigisariaqarpavut?
12 Ilumoorpoq kristumiut ilagiit inunnik naammalluinnanngitsunik ilaasortaqartut. Utoqqaanertat kukkusarput ilaannikkut sunnerneqaatigisakkatsinnik. Taamaattorli Jehovap angutit taamaattut savaatiminut paarsisuutippai. (1 Petrusi 5:1, 2) Angutit arnallu anersaakkut ittunik pingaartitsisut akueraat Jehovap ilaatigut taamatut innuttani siulersortarai. Taamaattumik kristumiuugutta isornartorsiuinatalu maalaartariaqanngilagut, akerlianilli aaqqissuussineq Guutimeersoq ataqqisariaqarparput. Akornatsinni siulersortit naalannerisigut takutittarparput takussaanngitsumik isigisaqarlutalusooq. — Hebræerit 13:17.
Guuti ilitsersortitut isigiuk
13, 14. Jehova ilitsersortittut isigissagukku qanoq iliortariaqarpit?
13 Aamma allatigut anersaakkut ittunik paasinnilluarsinnaasariaqarpugut. Esaja ima siulittuivoq: „Nammineq isinnik ilitsersortit takussavat.“ (Esaja 30:20) Akuerissagutsigu Jehovap peqatigiissortani nunamiusut aqqutigalugit ajoqersortaraatigut upperneq pisariaqartipparput. (Matthæusi 24:45-47) Guuti ilitsersortitut ’takusinnaassagaanni’ atuaqqissaartarnerup kristumiullu ataatsimiinnerisa aalajangersimasumik najuuffigisarnerata saniatigut aamma alla pisariaqarpoq. Aamma Guutip uagutsinnut anersaakkut tunissutai atorluarneqartariaqarput. Assersuutigalugu Jehovap Jiisusi aqqutigalugu ajoqersuinera sianigilluaqqissaarniartariaqarparput qimagukkiartoqqunata. — Hebræerit 2:1.
14 Ilaannikkut immikkut suliniuteqartariaqartarpugut nerisassat anersaakkut ittut pissarsiffigilluarniarlugit. Assersuutigalugu Biibilimi oqaluttuat ilaat immaqa qarsupittumik atuapallattarpavut paasiuminaatsikkatsigik. Napasuliaq Alapernaarsuiffik Iteritsi!-lu atuaraangatsigik immaqa allaaserisat ilaat atuanngitsoortarpavut sammineqartut soqutigerpiannginnatsigik. Immaqalu ataatsimiitilluta eqqarsaativut allamut saaqqajaasarput. Oqaluuserineqartulli eqqarsaatigeqqissaartarutsigit aalajangiussisinnaavugut. Anersaakkut siunnersuineq pingaartingaarutsigu takutissavarput Jehova ilitsersortitsitut isigigipput.
Tamatta nassuertussaavugut
15. Ilaat qanoq Jehovamit takuneqarsinnaanngitsutut iliuuseqarsimappat?
15 Maanna ’naggatissap’ nalaani ajussutsip atugaangaarfiani Guuti takussaanngitsoq upperissallugu ingammik pingaaruteqarpoq. (Danieli 12:4) Peqquserlunneq kinguaassiuutitigullu inuunerlunneq nalinginnaanerujartorput. Silatusaarnerussaaq eqqaamassallugu Jehovap iliuutsivut malugisarai inuit takusinnaanngikkaluaraatigulluunniit. Ilaasa tamanna puiortarunarpaat, kisimiitillutillu immaqa Biibilimut akerliusumik iliuuseqartarlutik. Assersuutigalugu Internettimi, fjernsynimi teknikkikkulluunniit nutaaliat allat atorlugit aliikkusersuutit ajoqutaasut tiingasulersaarutilluunniit isiginnaarnissaannut ussernartorsiortarput. Angerlarsimaffimmi taamaaliortoqarsinnaammat ilaat Jehovamit takuneqarsinnaanngitsutut iliuuseqarniartarput.
16. Suna Jehovap najoqqutassiaasa qutsissut maleruarnissaannut iluaqutigissavarput?
16 Paulusip oqaasii eqqaamasariaqarpavut: „Tamatta immikkut Guutimut nassuertussaavugut.“ (Romamiut 14:12) Paasisariaqarparput ajortulioraangatta Jehovamut ajortuliortartugut. Paasinninneq tamanna najoqqutassiaasa qutsissut maleruarnissaannut minguttuumillu iliunnginnissatsinnut iluaqutigissavarput. Biibilimi eqqaasinneqarpugut ’pinngortitamik sumilluunniit taassumunnga ersinngitsoqanngitsoq, suut tamarmik isaanut uleersimallutillu saqqumimmata. Taannaavorlu iliornivut pillugit akisussaaffigisassarput’. (Hebræerit 4:13) Jehovamut nassuertussaagaluarluta piumasaanik iliornitsinnut najoqqutassiaanillu naapertuilluartunik maleruaanitsinnut pissutigisarput pingaarnerpaaq tassaasariaqarpoq taassumunnga asanningaarnerput. Taamaattumik aliikkusersuutit suut qinissanerivut mianersuutiginiartigik, eqqarsaatigitigulu angutaagutta arnat qanoq iliorfiginerivut, arnaaguttalu angutit qanoq iliorfigisarlugit.
17. Jehovap qanoq soqutigaatigut?
17 Jehovap soqutigingaarpaatigut, tamannali ima paasisariaqanngilaq kukkunivut nakkutigigai pillarsinnaajumalluta. Akerlianik asannittumik soqutigaatigut ataataasutut meeqqaminik naalattunik nersuiumasutut. Tuppallernartorujussuuvoq nalunagu Ataatatta qilammiusup uppernerput nuannaarutigigaa ’ujarlersinilu akissarsisissagai’. (Hebræerit 11:6) Jehova aalajaalluta upperfigiuartigu ’kiffartorfigalugulu uummatikkut iluungarluta’. — 1 Nalunaarsuutit 28:9.
18. Jehovap uatsinnik nakkutiginninneranut atatillugu Biibilimi sumik neriorsoqqissaarneqarpugut?
18 Ussatit 15:3-mi allassimavoq: „[Jehovap] isai tamaginnut anngusimapput, ajortut ajunngitsullu nakkutigaat.“ Aap, Guutip ajortut nakkutigai iliuusiilu naapertorlugit iliorfigisarlugit. ’Ajunngitsuuguttali’ qularisariaqanngilarput Jehovap aalajaalluta suliniutivut malugissagai. Uppernermut nakussatsinnarpoq nalunagu ’suliniarnerput Naalakkami asuliinnaassanngitsoq’, Guutillu takussaanngitsup ’suliavut asanninnerpullu aqqanut takutissimasarput’ puigussanngikkai. — 1 Korinthimiut 15:58; Hebræerit 6:10.
Jehovamit misilitaaniarit
19. Jehovamut upperluarneq qanoq kinguneqarluartarpa?
19 Jehovamut kiffatut aalajaatsutut isaani naleqangaarpugut. (Matthæusi 10:29-31) Takussaanngikkaluartoq piviusuutissinnaavarput taassumunngalu qaninnerujartuinnarsinnaavugut. Ataatarput qilammiusoq taamatut isigigutsigu iluaqutigingaassavarput. Upperluarnerput iluaqutigalugu uummatikkut minguitsuusinnaavugut Jehovamullu ilerasuuteqartariaqarnata. Ilumoortuusaarnertaqanngitsumik uppernerup marloqiusamik inuuneqarnissarput aamma pinngitsoortissavaa. (1 Timotheusi 1:5, 18, 19) Aalajaatsumik upperutta maligassiuisinnaavugut ilagisartakkatsinnullu ajunngitsumik sunniuteqarsinnaalluta. (1 Timotheusi 4:12) Upperneq taamaattoq Guutip iluarisaanik ileqqoqarnissamut siuarsaataassaaq Jehovallu uummataa nuannaartissavarput. — Ussatit 27:11.
20, 21. (a) Sooq Jehovap uatsinnut nakkutiginninnera nuannaarutigisariaqarparput? (b) Tussiaat 139:23, 24 qanoq uagutsinnut attuumassuteqartissinnaavarput?
20 Ilisimassuseqarluarutta Jehovap uatsinnik nakkutiginninnera nuannaarutigissavarput. Jehovamit takuneqarnissarput kisiat pinnagu aammali eqqarsaatitta iliuutsittalu misissorneqarnissaat kissaatigissavarput. Silatusaarnerussaaq Jehova qinnuigigutsigu misissoqqulluta takusinnaaqqullugu ajortunik iliuuseqaqqajaasarnersugut. Taassuma ikiorsinnaavaatigut ajornartorsiutitta iliuuseqarfiginisssaannut pisariaqartunillu allannguinissatsinnut. Tussiaasiortoq Daavi taamaattumik ima erinarsorpoq: „Misissuiffiginnga, Guuti, ilisimajullu uummatiga, misilinnga, eqqarsaatikka ilisimaniakkit. Alapernaasinnga guutipiluit aqqutaannik atuaanersunga, ingerlatinngalu aqqutikkut naassaanngitsukkut!“ — Tussiaat 139:23, 24.
21 Daavip ilungersorluni Jehova qinnuigaa misissuiffigeqqulluni ’guutipiluit aqqutaannik’ imaluunniit ’naalliunnartumut aqqutaasumik’ atuaanerluni. Uaguttaaq tussiaasiortutut kissaatiginnginnerparput Jehovap uummativut misissussagai eqqunngitsunik tunngaviginiagaqarnersugut paasiniarlugu? Taamaattumik upperluta Jehova qinnuiginiartigu misissuiffigeqqulluta. Kukkusimanitsinnilli nanertugaagutta naalliuuteqarlutalu? Taava ilumoorluta Guuterput asannittoq Jehova qinnuigiuartariaqarparput maniguullutalu taassumannga siulersortittariaqarluta anersaakkut illernartukkut oqaasianillu ajoqersorneqarnikkut. Tatigisinnaavarput najussagaatigut ikiussallutalu inuunerup naassaanngitsup tungaanut ingerlanissatsinnut. — Tussiaat 40:12-14.
22. Sumut aalajangertariaqarpugut?
22 Jehovap inuunermik naassaanngitsumik pilluaqqussavaatigut piumasaqaatai naammassigutsigik. Soorunami pissaanera oqartussaaneralu akuerisariaqarpavut, soorluttaaq Paulusi taamaaliortoq allakkami: „Taanna naassaanngilluinnartumik kunngiusoq, atajuartussaq takussaanngitsorlu, kisimi Guutiusoq, unnersiutigineqarlunilu naalannartitaali naassaanngilluinnartumik! Amen.“ (1 Timotheusi 1:17) Jehova taamatut ataqqiuartigutoq. Qanorluunniillu pisoqassagaluarpat takussaanngitsoq isigalugulusooq pinertusaarnissatsinnut aalajangerniarta. (wE 15/6 01)
Qanoq akissavit?
• Inuit Guuti qanoq takusinnaavaat?
• Jehova piviusuutikkutsigu malersorneqarneq qanoq qisuariarfigissavarput?
• Jehova Ilitsersortitsitut isiginissaa qanoq paasisariaqarpa?
• Sooq kissaatigisariaqarparput Jehovap misissuiffigissagaatigut?
[Atuaqqissaarnermi apeqqutit]
[Qupp. 27-mi assiliartaq]
Mosesip Faraop kamannera siooraginngilaa, Jehovali Guuti takussaanngitsoq isigalugulusooq iliuuseqarluni
[Qupp. 30-mi assiliartaq]
Jehovamit takuneqarsinnaanngitsutut iliuuseqarnaveerta
[Qupp. 32-mi assiliartaq]
Kajumilluta Guuti ilisarilerniarparput ilitsersortitsitut isigigatsigu