Hmuh Theih Lova Chu Hmuin Tuar Ṭan Ṭan Rawh!
Hmuh Theih Lova Chu Hmuin Tuar Ṭan Ṭan Rawh!
“[Mosia chuan] hmuh theih lohva chu a hmuh avângin a tuar ṭan ṭan a ni.”—HEBRAI 11:27.
1. Tlâng chunga a Thusawiah Pathian chungchâng chhinchhiah tlâk tak eng nge Isua’n a sawi?
JEHOVA chu hmuh theih loh Pathian a ni a. Mosia’n A ropuina hmuh a dîl pawh khân: “Ka hmêl zawng i hmu thei lo vang: mi hmua nung reng thei tumah rêng rêng an awm si lo va,” tiin a chhâng a ni. (Exodus 33:20) Tin, tirhkoh Johana pawhin: “Tuman eng lai mahin Pathian an hmu lo,” tiin a lo ziak bawk. (Johana 1:18) Isua Krista ngei pawhin he leia a awm lai khân Pathian a hmu thei bîk lo. Nimahsela, Tlâng chunga a Thusawiah: “Thinlunga thianghlimte chu an eng a thâwl e; Pathian an la hmu dâwn si a,” a ti tlat si. (Matthaia 5:8) Eng a tihna nge ni ta ang?
2. Engvângin nge Pathian chu kan hring mitin kan hmuh theih loh?
2 Pathian Lehkha Thu chuan, Jehova chu hmuh theih loh Thlarau a ti a. (Johana 4:24; Kolossa 1:15; 1 Timothea 1:17) Chuvângin, Isua’n khatia a sawi khân Jehova chu mihring mit ngeiin an hmu ang a tihna a ni lo. Kristian hriak thihte erawh chuan thlarauva kaihthawh an nih hnuah vânah Pathian Jehova chu an hmu ngei dâwn. Mahse, “thinlunga thianghlim,” mihring he leia chatuan nun beiseina neite pawh hian Pathian chu an “hmu” thei a ni. Engtin nge a nih theih?
3. Engtin nge mihringin Pathian mize ṭhenkhat an hriat theih?
3 A thil siamte chanchin ngun taka zirin Jehova chungchâng engemaw kan hria a. Chuvângin, a thiltihtheihna chuan kan rilru a khawihin, Siamtu Pathian a ni tih min pawmtîr ta a ni. (Hebrai 11:3; Thu Puan 4:11) He mi chungchângah hian tirhkoh Paula chuan heti hian a ziak a: “[Pathian] thil hmuh theih loh a chatuan thiltihtheihna leh a Pathianzia chu khawvêl siam tirh ata fiah taka hmuhin a awm a, thil siamah chuan a lang a ni; chuvâng chuan chhuanlam tûr an nei lo,” tiin. (Rom 1:20) Chuvângin, Pathian hmuh chungchâng Isua sawiah chuan Jehova mizia ṭhenkhat hriat theihna a tel tihna a ni. Chutianga hmuhna chu hriatna dikah a innghat a; tin, ‘thinlung mita’ thlarauva hmuh a ni. (Ephesi 1:18) Isua thusawi leh a thiltihte chuan Pathian chungchâng tam tak a tilang a. Chuvâng a ni, Isua’n: “Tupawh mi hmu chu Pa hmu a ni,” a tih ni. (Johana 14:9) Isua chuan Jehova mizia chu a la chiang hle a. Chuvângin, Isua nun leh a zirtîrnate hriatna chuan Pathian mizia hmu thei, a nih loh leh hre thei tûrin min ṭanpui thei a ni.
Thlarau Lam Thilte Hriatthiam leh Hlut A Pawimawh
4. Tûn laia mi tam takte’n engtin nge thlarau lam thlâkchhamna an lntîr?
4 Tûn laiah chuan rinna leh thlarau lam thil hriatthiamna leh hlutna chu a vâng tak zet a. “Mi zawng zawngin rinna an nei vek si lo va,” tiin Paula’n a sawi a ni. (2 Thessalonika 3:1, 2) Tam takte chu an mi mal hnaah an buai pumhlûm ṭhak a, Pathianah rinna rêng an nei lo. An khawsakzia sual tak leh thlarau lam thil hriatthiamna leh hlutna an tlâkchhamna chuan hriatthiamna mita amah an hmuhna chu a dang a ni; tirhkoh Johana’n hetianga a lo ziah avângin: “Thil sual titu chuan Pathian a hmu ngai lo,” tiin. (3 Johana 11) Chûng mite chuan Pathian chu an mita an hmuh theih loh avângin an thiltihte pawh Pathianin a hmu lo ang hrimin an khawsa a ni. (Ezekiela 9:9) Thlarau lam thilte an hmusit avângin, “Pathian hriatna” an nei thei lo. (Thufingte 2:5) Chuvângin Paula chuan: “Khawvêl mi chuan Pathian thlarau lam thilte chu a lâwm ṭhîn lo, ani ngaih chuan âtthlâk a ni si a; thlarauva hriat fiah a nih avângin a hre thei lo rêng rêng bawk a ni,” tiin inhmeh takin a ziak a ni.—1 Korinth 2:14.
5. Thlarau lam thilte ngaihtuah mi chuan eng nge a hriat reng?
5 Thlarau lam thilte ngaihven mi kan nih erawh chuan, Pathian chu thil tihsual chauh hmun chhuah tum Pathian ni lo mah se, ngaihtuahna leh châkzâwng sualte anga thil kan tih hi a hre vek tih chu kan hre reng thung ang. “Mihring kawng chu LALPA mithmuhah a awm a, a kawng zawng zawng a tihrualremsak ṭhîn,” tak zet a ni. (Thufingte 5:21) Sualnain min hneh châng pawhin, Jehova kan hmangaih avâng leh a thinlung tihnat kan duh loh avângin kan inchhîr a, a ngaihdamna kan dîl ṭhîn.—Sâm 78:41; 130:3.
Engin Nge Min Tuar Ṭan Ṭantîr?
6. Tuar ṭan ṭan tih hi eng tihna nge ni?
6 Jehova chu kan mitin hmu thei lo mah ila, ani chuan min hmu thei tih i hre reng ang u. Ani chu a awm ngei a ni tih hriatna leh amah kotu apiangte tân a hnai reng a ni tih rin tlatna chuan min tuar ṭan ṭantîr thei a, amaha rinawmna nghet leh nghîng thei lo min neihtîr thei a ni. (Sâm 145:18) Paula’n: “Rinnain lal thinurna chu hlau lovin Aigupta ram a kalsan a, hmuh theih lohva chu a hmuh avângin a tuar ṭan ṭan a ni,” tia a ziah, Mosia ang hi kan ni thei a ni.—Hebrai 11:27.
7, 8. Engin nge Mosia chu Pharaoa hmaah huaisenna pe?
7 Aigupta mite phuarna aṭanga Israel mite hruai chhuak tûra Pathian hna hlen chhuah a tumnaah, Mosia chu sakhaw mi leh sipai hotu lu ber berte vên khup, lal in-ah chuan mi nunrâwng tak Pharaoa hmaah vawi tam tak a va inlâr a. Chu lal in bangte chu milema chei vek a nih hmêl hle. Mahse, chûng Aigupta pathian nunna nei lo milemte chu a hmuh theih angin Jehova chu hmuh theih loh mah se, Mosia tân chuan a tak êm êm a ni. Chuvângin Mosia’n Pharaoa a hlau lo pawh chu a mak lo ve!
8 Pharaoa hmaa inlan fo tûrin Mosia chu engin nge tihuaisen le? Pathian Lehkha Thu chuan Mosia chu “lei chunga mihring zawng zawnga zaidam lâwtlak a ni,” tiin min hrilh bawk a. (Number 12:3) Chuvângin, Aigupta lal nunrâwng tak hmaa ‘hmuh theih Lohva’ ai awh tûra mamawh chakna chu a thlarau lam ngaihsakna nasa tak leh Pathianin a awmpui a ni tih a rin tlatna hian a pe tih a chiang hle. Tûn laia hmuh theih loh Pathian ‘hmutute’n’ an rinna an târ lan dân kawng ṭhenkhatte chu eng nge ni?
9. Kan tawrh ṭan ṭan zêl theihna kawng khat hi eng nge ni?
9 Rinna leh hmuh theih Lova hmua kan tawrh ṭan ṭan zêlzia lantîrna kawng khat chu tihduhdahna tâwk reng chung pawha huai taka thu hril hi a ni. Isua chuan: “Keima hming avângin mi zawng zawng huat in ni ang,” tiin a zirtîrte chu a hrilh lâwk a. (Luka 21:17) Chu bâkah: “‘Bâwih a pu aiin a ropui lo,’ tih thu ka hrilh tawh che u kha hre reng rawh u. Annin kei mi tihduhdah tawh chuan nangni pawh an tiduhdah ang che u,” tiin a hrilh bawk. (Johana 15:20) Isua sawi ang ngeiin, a thih hnu lawk chuan a hnungzuitute chu vau te, man te, leh vuak tein an awm ta mai a. (Tirhkohte 4:1-3, 18-21; 5:17, 18, 40) Tihduhdahnate chu awm reng mah se, Isua tirhkohte leh zirtîr dangte chuan huai takin chanchin ṭha an hrilh chhunzawm zêl a ni.—Tirhkohte 4:29-31.
10. Jehova’n min vêng a ni tih rin tlatna chuan engtin nge kan rawngbâwlnaah min ṭanpui theih?
10 Mosia ang bawkin, Isua hnungzuitu hmasate pawh chu an hmuh theih hmêlmate chuan an tihlau lo. Isua zirtîrte chuan Pathianah rinna an nei a; chuvângin, tihduhdahna râpthlâk tak an tawnte pawh an tuar chhuak thei a ni. Ni e, hmuh theih Lova chu hmuin an tuar ṭan ṭan zêl a ni. Tûn laiah pawh, Jehova’n min vêng tlat a ni tih hriat rengna chuan min tihuaisen thei a, Lalram thu hrilh rawngbâwlnaah huaisenna leh zâm lohna min pe thei a ni. Pathian Thu chuan: “Midang ngaih dân pawisak luat a hlauhawm a, LALPAa innghah erawh chu a him,” a ti. (Thufingte 29:25) Chuvângin, tihduhdahna hlauh avângin kan hnung tawlh lo va; kan rawngbâwlna hi kan zahpui bawk hek lo. Kan rinna chuan kan ṭhenawmte, hnathawhpuite, school kalpuite, leh midangte hnêna huaisen taka thuhril tûrin min chêttîr a ni.—Rom 1:14-16.
Hmuh Theih Lova Chuan A Mite A Kaihruai
11. Petera leh Juda sawi dânin, Kristian kohhrana mi ṭhenkhatte’n engtin nge thlarau lam thilte an tlâk chhamzia an lantîr?
11 Rinna chuan Jehova chu a lei lam inawpna pâwl kaihruaitu anga hmu tûrin min ṭanpui a. Chuvângin, kohhrana mawhphurhna neite sawisêl vak mai chu kan pumpelh a ni. Tirhkoh Petera leh Isua unaupa Juda chuan, thlarau lam thilte ngaih pawimawhna nei lo va, Kristian hotute sawichhiat chîngtute chu an vaukhân a ni. (2 Petera 2:9-12; Juda 8) Chûng mi dang sualna zawng reng mite chuan Jehova chu a takin hmu thei ta se, chutiang chuan an sawi kher ang em? An sawi miah lo vang! Mahse, Pathian chu hmuh theih loh a nih avângin, chûng mite chuan a laka mawhphurhna an neih chu an theihnghilh a ni.
12. Kohhrana hotute chungah eng rilru put hmang nge kan lantîr tûr?
12 Kristian kohhran hi mihring ṭha famkim lote hmanga din chu a ni ngei mai. Upate pawhin thil an tisualin, a châng phei chuan an thil tihsual chuan a mi mal zâwngin min nghawng mai thei. Nimahsela, chûng mite chu Jehova’n a berâmte vêng tûrin a hmang tlat si. (1 Petera 5:1, 2) Chu chu Jehova’n a mite a kaihhruai dân kawng khat a ni tih thlarau lam thil ngaihven mite chuan an hria a ni. Chuvângin, Kristian kan nih angin, sawisêlna leh inrêlna te pumpelhin, a mite kaihhruai nâna Pathian ruahmanna chungah zahna kan lantîr a ni. Kan zînga hotute thu awihin, hmuh theih Lova chu kan hmuhzia kan lantîr a ni.—Hebrai 13:17.
Pathian Chu Min Zirtîrtu Ropui Anga Hmuin
13, 14. Zirtîrtu Ropui anga Jehova hmuhna chuan i tân eng awmzia nge a neih?
13 Thlarau lam hriatthiamna neih a ngaihna dang a la awm a. Isaia chuan hetiang hian a hrilh lâwk a ni: “In mitin in Zirtîrtu Ropui chu a hmu tawh ang,” tiin. (Isaia 30:20, NW) A lei lam inawpna pâwl hmanga min zirtîrtu chu Jehova a ni tih pawm tûrin rinna a ngai a. (Matthaia 24:45-47) Pathian chu min Zirtîrtu Ropui anga hmu tih chu Bible zir ziahna leh Kristian inkhâwmnaa tel zat zatna mai a ni lo. Thlarau lama kan sâwtpui atâna Pathian min châwmna te hman ṭangkaina hi a ni. Entîr nân, thlarau lama kan tawlh bo loh nân Jehova’n Isua kal tlanga kaihhruaina min pêk zawng zawngte chu kan pawisa lehzual tûr a ni.—Hebrai 2:1.
14 Engemaw châng chuan thlarau lam chaw hlawkpui tak zet tûr chuan tih tak zeta beih a ngai ṭhîn. Entîr nân, Bible châng hriatthiam harsa kan tihna laite chu kan chhiar chhuak puat ringawt duh mai thei. Vênnainsâng leh Awake! magazine kan chhiar châng pawhin, kan tui zâwng ni lo thuziakte chu kan chhiar kân mai pawh a ni thei bawk. A nih loh leh Kristian inkhâwmna neih laiin thil dang kan ngaihtuah daih pawh a ni thei bawk. Mahsela, thusawi lai emaw, zir lai emaw ngun taka kan ngaihtuah chuan kan harh fîm reng thei a ni. Thlarau lam zirtîrna kan dawnte kan ngaihhlutna chuan Jehova chu min Zirtîrtu Ropui angin kan hmu tih a târ lang a ni.
Kan Chanchin Kan Sawi Ṭheuh Dâwn
15. Engtin nge mi ṭhenkhat chu Jehova’n anmahni hmu lo ang hrima an khawsak?
15 He ‘tâwpna hunah’ hian suahsualna a pun êm avângin, hmuh theih Lova chunga rinna neih chu a pawimawh lehzual a ni. (Daniela 12:4) Rinawmlohna leh mipat hmeichhiatna lama nungchang bawlhhlawhna chu a hluar zêl a. Mi dangin min hmu lo mah se, Jehova chuan min hmu reng a ni tih hriat reng hi a finthlâk a ni. Mahse, ṭhenkhatin hei hi an theihnghilh fo mai. Mi dangin an hmuh phâk lovah chuan Pathian thu nêna inkalh thiltihah an inhnamhnawih mai ṭhîn. Entîr nân, ṭhenkhat chuan mi tipawi thei intihhlimna leh internet te, television te, leh tûn lai khâwl chhuak dang dang-a lang saruak lem te chu an en ṭhîn a. Chûng thilte chu a rûka tih a nih avângin, ṭhenkhat chuan Jehova pawhin a hmu lo ang hrimin an khawsa mai ṭhîn a ni.
16. Jehova tehna chungnung takte mila nung tûrin engin nge min ṭanpui ang?
16 “Kan zain Pathian hnênah mahni chanchin kan sawi ṭheuh tûr a ni,” tia Paula sawi hi rilrua vawn reng a ṭha. (Rom 14:12) Sual kan tih apiangin Jehova laka ti kan ni tih kan hriat reng a ngai a. Chu mi hriatna chuan a dân ropui takte mila nung tûr leh nungchang bawlhhlawhte pumpelh tûrin min ṭanpui tûr a ni. Bible chuan hetiang hian min hriatnawntîr a: “Thil siam ama mithmuha lang lo rêng rêng a awm lo; kan chanchin kan thlenna tûra mithmuhah chuan engkim saruak leh inhawng sain a awm zâwk a ni,” tiin. (Hebrai 4:13) Ni e, Pathian hmaah chuan kan chanchin kan thlen tûr a ni a; mahse, a duhzâwng kan tih chhan leh a tehna felte thu hnuaia kan intukluh chhan bul ber chu Jehova kan hmangaih êm vâng a ni. Chuvângin, intihhlimna kan thlanna kawngah te, kan mipat hmeichhiatpui lote laka kan khawsak dânah te hian i fîmkhur hle ang u.
17. Eng ang ngaihvennain nge Jehova’n min thlîr reng?
17 Jehova chuan kan chungchâng hi a ngaihven êm êm a; mahse, min hrem theih nân kan thil tihsual hun a châng reng tihna a ni lo. Chutih ahnêkin, pain a fa thuâwih tak hnêna lâwmman pêk a duh ang hian, ngaihsak takin min thlîr reng zâwk a ni. Kan Pa vâna mi chu kan rinnain a tilâwm tih leh ṭhahnem ngai taka “zawngtute hnêna lâwmman pêk hmang a ni” tih hriat chu a va thlamuanthlâk êm! (Hebrai 11:6) Chuvângin, Jehova hnênah chuan rinna pumhlûm neiin, ‘thinlung ṭha famkimin a rawng i bâwl,’ ang u.—1 Chronicles 28:9.
18. Jehova’n min thlîr a, kan rinawmnate a chhinchhiah avângin eng thu tiam nge Pathian Lehkha Thu aṭangin kan dawn?
18 Thufingte 15:3 chuan: “LALPA mit chu hmun tinah a awm a, thil ṭha lo leh ṭha a enthla reng ṭhîn,” tiin a sawi. Ni e, Pathian chuan mi ṭha lote chu a enthla a, an nungchang mil zêlin an chungah thil a ti ṭhîn. Nimahsela, mi “ṭha” zînga kan tel chuan, rinawm taka kan thiltihte chu Jehova’n a chhinchhiah reng a ni tih kan chiang thei a ni. ‘Lalpaa kan thawhrimna chu a thlâwn lo,’ tih leh hmuh theih lova chuan ‘kan hnathawh leh a hming chunga hmangaihna kan lantîrte’ a theihnghilh lo tih hriat chu rinna tichaktu a va ni êm!—1 Korinth 15:58; Hebrai 6:10.
Jehova Chu Min Enfiah Tûra Sâwmin
19. Jehova laka rinna nghet tak avânga hlâwkna lo awm ṭhenkhatte chu eng nge ni?
19 Jehova chhiahhlawh rinawm kan nih avângin, atân kan hlu êm êm a. (Matthaia 10:29-31) Ani chu hmuh theih loh ni mah se, kan tân a takin, amah nên inlaichînna hlu tak chu kan nei thei a ni. Kan Pa vâna mi chunga chutiang rilru put chuan hlâwkna tam tak min pe a. Kan rinna chak tak chuan Jehova hmaa thinlung thianghlim leh chhia leh ṭha hriatna thiang tak nei tûrin min ṭanpui a ni. Rinna dik tak pawhin nun chi hniha nung lo tûrin min vêng bawk. (1 Timothea 1:5, 18, 19) Pathiana kan rinna nghet tak chuan kan bul vêla mite tân entawn tûr ṭha a siam theiin, chu chu an tân fuihna ṭha a ni thei a ni. (1 Timothea 4:12) Chu mai bâkah, chutiang rinna chuan Jehova thinlung tilâwmin, Pathian duhzâwng nungchang a siam bawk a ni.—Thufingte 27:11.
20, 21. (a) Engvângin nge Jehova min enthlâk reng chu a duhawm? (b) Sâm 139:23, 24 thu hi keimahniah engtin nge a taka kan hman theih?
20 Kan fing tak tak a nih chuan, Jehova min en rengna avângin kan lâwm ngei ang. Min en mai chauh ni lovin, kan ngaihtuahna leh thiltihte endik tûrin kan duh bawk ang. Kan ṭawngṭainaah Jehova chu ngun taka min en chhuak a, ngaihtuahna ṭha lo kan neih leh neih loh endik tûrin kan sâwm tûr a ni. Ani chuan kan buainate hmachhawn tûr leh a ṭûl anga insiamrem tûrin min ṭanpui thei chiang a ni. Fakna hla phuahtu Davida chu inrem takin hetiang hian a zai a: “Aw Pathian, ngun takin mi en chhuak la, ka thinlung hi hria ang che: mi fiah la, ka ngaihtuahnate hi hria ang che: tin, keimahah hian suahsualna kawng rêng rêng a awm nge awm lo, en la, chatuan kawngah chuan mi hruai ang che,” tiin.—Sâm 139:23, 24.
21 Davida chuan amahah “suahsualna kawng rêng rêng” a awm nge awm lo tih hre tûra ngun taka en chhuak tûrin Jehova chu a ngên a ni. Fakna hla phuahtu ang bawk hian ngaihtuahna dik lo kan neih leh neih loh hre tûra kan thinlung en chhuak tûrin Pathian chu kan duh ve hle lâwm ni? Chuvângin, min endik tûrin Jehova chu rinnain i ngên ve ang u. Thil dik lo engemaw vâng leh suahsualna kawng engemaw a awm vânga kan lungngaih chuan engtin nge ni ta ang? Chutianga kan awm a nih chuan, hmangaihnaa khat kan Pathian, Jehova hnênah tih tak zeta ṭawngṭai zêlin, leh a thlarau thianghlim kaihhruaina leh a Thu aṭanga fuihnate chu inngaitlâwm takin i zâwm ang u. Ani chuan min ṭanpui ang a, chatuan nunna hruaitu kawng chu zawh tûrin min ṭanpui ngei dâwn tih kan ring tlat thei a ni.—Sâm 40:11-13.
22. Hmuh theih Lova chungchângah eng thu tlûkna nge kan neih tûr?
22 Nie, a thil phûtte kan tlin phawt chuan Jehova chuan chatuan nunna min pe ngei ngei dâwn a. Mahse, tirhkoh Paula angin a thiltihtheihna leh a thuneihna chu kan pawm ngei tûr a ni. Tirhkoh Paula chuan heti hian a ziak a: “Lalber chatuana awm, chhe thei lo, hmuh theih loh, Pathian taka chauh chu chatuana chawimawi leh ropuiin awm rawh se. Amen,” tiin. (1 Timothea 1:17) Chutianga tih tak zeta Jehova zahna chu engtik lai pawhin i lantîr ang u. Eng pawh lo thleng se, hmuh theih Lova chu hmua tuar ṭan ṭan zêl kan tumna chu i tinghet reng ang u. (w01 6/15)
Engtin Nge I Chhân Ang?
• Mihringte tân Pathian chu eng anga hmuh theih nge ni?
• Jehova chu kan tân mi tak a nih chuan, tihduhdahna kan tawn hunah engtin nge kan awm ang?
• Min Zirtîrtu Ropui anga Jehova hmu tih chu eng tihna nge ni?
• Engvângin nge Jehova min endik nih chu kan duh ang?
[Zirlai Atâna Zawhnate]
[Phêk 14-naa milem]
Mosia chu Pharaoa chu hlau lovin, hmuh theih loh Pathian, Jehova chu hmu thei ang maiin thil a ti
[Phêk 17-naa milem]
Jehova’n min hmu lo ang hrimin thil i ti ngai lo vang u
[Phêk 19-naa milem]
Min Zirtîrtu Ropui anga kan hmuh avângin Pathian hriatna chu ṭhahnemngai takin kan zawng