D kell n yaas kãn-kãe wa d nee nebã nin sẽn pa ne a soabã!
D kell n yaas kãn-kãe wa d nee nebã nin sẽn pa ne a soabã!
“[A Moiiz] talla tẽeb kãn-kãe wa a yãa neba nin sẽn ka tõe n yã a soabã.”—HEBRE DÃMBA 11:27.
1. Togs-sãang bʋg la a Zezi maan Wẽnnaam wɛɛngẽ a Tãng zug Zãmsgẽ wã?
A ZEOVA yaa Wẽnnaam ning ninsaal nif sẽn pa ne wã. A Moiiz sẽn da wa n kos n na n yã a Zeova ziirã A leok-a lame: “Fo ka tõe n yã mam neng ye. Tɩ bõe, ninsaal ka tõe n yã maam n ket n vɩ ye.” (Yikri 33:20) Sẽn paase tʋm-tʋmd a Zã gʋlsa woto: “Ned nan ka yã Wẽnnaam abada ye.” (Zã 1:18) A Zezi Kirist sẽn da wa n yaa ninsaal tẽng zugã, yẽ mengã ra pa tõe n yã Wẽnnaam ye. La a Zezi Tãng zug Zãmsgẽ wã a yeela woto: “Bark bee pʋ-peelem dãmba zutu, tɩ bõe, bãmb na yã Wẽnnaam.” (Matɩe 5:8) Yaa bõe la a Zezi ra rat n yeele?
2. Bõe yĩng tɩ d pa tõe n yã Wẽnnaam ne d ninã?
2 Gʋlsg Sõamyã wilgdame tɩ ninsaal nif pa tõe n yã a Zeova ye. (Zã 4:24; Kolos rãmba 1:15; 1 Tɩmote 1:17) Woto, a Zezi ra pa yet tɩ tõnd sẽn yaa ninsaalbã sɩd ra tõe n yãa a Zeova ne d ninã ye. Yaa sɩda, kiris-neb nins sẽn zaeyã na n yãa Wẽnnaam a Zeova saasẽ, b sã n wa vʋʋg n lebg wa malɛk rãmbã. La ninsaalb nins sẽn yaa “pʋ-peelem dãmba” sẽn tar saagr n na n vɩɩmd tẽng zug wakat sẽn-kõn-sa wã me tõeeme n “yã” Wẽnnaam. Wãn to la rẽ tõeyã?
3. Wãn to la ninsaalb tõe n bãng Wẽnnaam zʋg-sõma sãnda?
3 D bãngda bũmb a Zeova wɛɛngẽ, d sã n maag d yĩng n ges bũmb nins a sẽn naana. D sã n maan woto, a pãngã tõe n yɩɩ bõn-kãseng d ninẽ, tɩ rẽ tus-d tɩ d sak n deeg t’a yaa Wẽnnaam sẽn yaa Naanda. (Hebre dãmba 11:3; Wilgri 4:11) Rẽ wɛɛngẽ, tʋm-tʋmd a Poll gʋlsame: “Tɩ bõe, bũmb nins sẽn naan hal dũniyã naanega wakata pukda Wẽnnaam zemsgo [“zʋg-sõma wã,” NW] nin sẽn ka tõe n yã ye, la bãmb pãnga sẽn ka sɛta la bãmb wẽnego [Wẽndlmã, NW ], hal tɩ b lebg vẽenes wa nin sẽn tõe n yã.” (Rom dãmba 1:20) Tõog n yã a Zeova zʋg-sõma wã rat n yeelame me tɩ f yãa Wẽnnaam wa a Zezi sẽn yeelã. Yãab kãng tika bãngr sẽn zems takɩ zugu, la yaa tẽebã wɛɛngẽ yãab ne “pʋ-tẽer nini.” (Efɛɛz rãmba 1:18) A Zezi goamã la a tʋʋmã leb n pukda yɛl wʋsg Wẽnnaam wɛɛngẽ. Woto yĩnga, a Zezi yeelame: “Ned ninga sẽn yã maam, a yãa m Ba.” (Zã 14:9) A Zezi puka a Zeova zʋg sõma wã tɩ zems zãnga. Woto, a Zezi vɩɩmã la a zãmsgã bãngr tõe n sõnga tõnd tɩ d yã bɩ d bãng Wẽnnaam zʋg-sõma sãnda.
Tẽeb yaa tɩlae
4. Wãn to la neb wʋsg wilgd tɩ b pa tar tẽeb rũndã-rũndã?
4 Rũndã-rũndã, tẽeb hakɩkã sɩd yaa kar-kare. A Poll yeelame: “Ka fãa n tar tẽeb ye.” (2 Tesalonik rãmba 3:2) Neb wʋsg fõr n kẽe b mens raab maaneg pʋgẽ n pa tar tẽeb ne Wẽnnaam ye. B sẽn maand yel-wẽnã la b pa tar tẽebã kɩtame tɩ b pa tõe n yã-a ne tẽeb nin ye, bala tʋm-tʋmd a Zã gʋlsame: “Ned ninga sẽn maand wẽnga, a nan ka yã Wẽnnaam ye.” (3 Zã 11) Neb a woto sẽn pa ne Wẽnnaam ne b ninã yĩnga, b maanda wa a pa ne b sẽn maandã ye. (Ezekɩɛll 9:9) B pa nand tẽebã yɛl ye, rẽ n so tɩ b pa tõe n paam ‘bãngr ning sẽn yit Wẽnnaam nengẽ wã’ ye. (Yelbũna 2:5) Rẽnd wa sẽn zemse, a Poll gʋlsame: “Ned ning sẽn tara tẽng zug yama ka reegd sẽn yit a Vʋʋsem Sõng nengẽ ye: dẽ zʋʋga a yam t’a ka tõe n deeg ye. Bũmba sẽn yɩɩd ninsaal yama, dẽnd a paam Wẽnd dẽnna n tõog n bãng b sẽn yala.”—1 Korẽnt dãmba 2:14, Sebr Sõngo.
5. Neb nins tẽebã yɛl sẽn pakã mii bõe?
5 La sã n yaa tẽebã yɛl n pak tõndo, wakat fãa d na n bãngame tɩ ba a Zeova sã n pa baood n na n gẽes tõnd kongrã, tagsa bɩ tʋlsem wẽns sã n wa tus tõnd tɩ d maan bũmbu a miimi. Sɩda, “Zusoaba nee ned sẽn maand bũmb ninga fãa. B geta a sẽn dabd zĩig ninga fãa.” (Yelbũna 5:21) D sã n wa maan yel-wẽnde, d rat n teka yam n bao a Zeova sugri, bala d nong-a lame n pa rat n sãam a sũur ye.—Yɩɩl Sõamyã 78:41; 130:3.
Yaa bõe n kɩtd tɩ d yals kãn-kãe?
6. Yals kãn-kãe rat n yeelame tɩ bõe?
6 Baa ne tõnd ninã sẽn pa ne a Zeova wã, bɩ d tẽeg wakat fãa t’a nee tõndo. D sã n tẽeg woto la d kɩs sɩd t’a pẽe neb nins fãa sẽn baood a sõngrã na n kɩtame tɩ d yals kãn-kãe n da vigs d tẽebã ne-a wã pʋgẽ ye. (Yɩɩl Sõamyã 145:18) D tõe n yɩɩ wa a Moiizi. A Poll gʋlsa woto yẽ wɛɛngẽ: “Ne tẽebo, yẽ yii Ezipt n ka zoe rĩma ye, la yẽ talla tẽeb kãn-kãe wa a yãa neba nin sẽn ka tõe n yã a soabã.”—Hebre dãmba 11:27.
7, 8. Bõe n kõ a Moiiz raood a Faraõ taoore?
7 A Moiiz tʋma tʋʋmd ning Wẽnnaam sẽn bobl-a sẽn yaa yiis Israɛll nebã Ezipt yembdẽ wã. Rẽ kɩtame t’a kẽng nin-toaag a Faraõ taoor naoor wʋsg na-zakẽ sẽn pid ne tũudum nin-kãsems la tãnsoben dãmba. Yaa wa bõn-naands la b ra tong na-zakã lals sɛɛgẽ. La baa ne ninsaal nif sẽn da pa ne a Zeova wã, a Moiiz ra miimi t’a sɩd ra beeme. La ra pa woto ne Ezipt wẽnnaam dãmbã sẽn da yaa wẽn-naands sẽn pa vɩ wã ye. Rẽnd a Faraõ sẽn pa kẽes a Moiiz rabeemã pa lingr ye!
8 Bõe n kõ a Moiiz raood t’a wa a Faraõ taoor n yɩlem naoor wʋsgo? Gʋlsg Sõamyã yeta tõnd tɩ “rao a Moiiz yaa sik-m-meng soab wʋsgo n yɩɩd neba fãa sẽn be dũniyã zugã.” (Sõdbo 12:3) Vẽenega, a Moiiz tẽebã sẽn tar pãngã la a sẽn kɩs sɩd tɩ Wẽnnaam da bee ne-a wã kõ-a-la pãng t’a tõog n gom “neba nin sẽn ka tõe n yã a soabã” yʋʋr yĩng Ezipt na-toaagã taoore. Ne manesem sãnda bʋs la neb nins sẽn ‘yãt’ Wẽnnaam ning ninsaalbã nin sẽn pa ne wã wilgd b tẽeb ne-a rũndã-rũndã?
9. Wãn to me la d tõe n ket n yas kãn-kãe?
9 Manesem a ye d sẽn tũnugd ne n wilg tẽeb la d ket n gãt kãn-kãe wa d nee nebã nin sẽn pa ne a Soabã yaa d sẽn na n moond ne raoodo, baa ne namsgã d sẽn paamd rẽ yĩngã. A Zezi keooga a karen-biisã woto: “Neba fãa na n kisga yãmb mam yʋʋra yĩnga.” (Luk 21:17) A leb n yeel-b-la woto: “Tʋm-tʋmd ka yɩɩd a zu-soab ye. Bãmb sã n nams maam, b na n namsa yãmb me.” (Zã 15:20) A Zezi goamã pidsame, a kũumã poor b sẽn nams a karen-biisã n bao n yɛɛs-ba, b sẽn yõg-b n sui roog la b pãb-bã. (Tʋʋma 4:1-3, 18-21; 5:17, 18, 40) Baa namsg wʋsg sẽn da wa wã, a Zezi tʋm-tʋmdbã la karen-biis a taabã kell n moona koe-noogã ne raoodo.—Tʋʋma 4:29-31.
10. Tõnd sã n kɩs sɩd t’a Zeova kogend-d lame, wãn to la rẽ sõngd tõnd koɛɛgã mooneg pʋgẽ?
10 Wala a Moiizi, a Zezi pipi karen-biisã tẽng zug bɛɛbã pa tõog n kẽes-b rabeem ye. A Zezi karen-biisã ra tara tẽeb ne Wẽnnaam, la rẽ kɩtame tɩ b maan sũ-mar tõog pʋgẽ, nams-toaag sẽn wa n wa b zugã. N-ye, b kẽnga taoor n yals kãn-kãe wa b nee a Soab ning nebã nin sẽn pa ne wã. Rũndã-rũndã, d sẽn mi wakat fãa t’a Zeova kogenda tõndã kõt-d-la raood la yẽesem d sã n wa moond Rĩungã. Wẽnnaam Gomdã yetame tɩ “ninsaal zoees wata ne yelle. La sẽn teegda Zusoaba tara laafɩ.” (Yelbũna 29:25) Woto yĩnga, d pa lebd poorẽ namsgã rabeem yĩng ye. D leb n pa zoet yãnd ne d koɛɛgã mooneg ye. Tõnd tẽebã tusd-d lame tɩ d kõ kasetã d yagsã, d tʋmd-n-taasã, d karen-bi-taasã la neb a taabã ne raoodo.—Rom dãmba 1:14-16.
Nebã nin sẽn pa ne a Soabã wilgda a nin-buiidã sore
11. Sã n yaa ne a Pɩɛɛr la a Ziidi, wãn to la neb kẽer sẽn da lagem ne kiris-neb tigingã wilg tɩ b pa tar tẽebo?
11 Tẽebã sõngda tõnd tɩ d ges tɩ ya a Zeova la a soab ning sẽn wilgd a tẽng zug siglgã sorã. Rẽ na n kɩtame tɩ d ra minim n wɩt neb nins sẽn tar taoor sobend tigingã pʋgẽ wã ye. Tʋm-tʋmd a Pɩɛɛr la a Zezi ma-biig a Ziid b yiibã fãa yeelame tɩ d gũus ne neb kẽer sẽn pa tar tẽeb sẽn gom n sãbg rap nins sẽn da lʋɩt taoor kiris-nebã sʋkã. (2 Pɩɛɛr 2:9-12; Ziid 8) Rẽ yĩnga, kongr gẽnesdb kãensã na n gomẽ-la woto a Zeova taoore, b sã n da tõe n yã-a-la ne b nin sɩda? Pa saagd ye! La b sẽn pa ne Wẽnnaamã yĩnga, nin-kãensã sẽn get yɛlã ne ninsaal tagsgã pa tags tɩ b segd n kolg n togsa a taoor ye.
12. Tags-bʋg la d segd n tall ne neb nins sẽn lʋɩt taoor tigingã pʋgẽ wã?
12 Yaa sɩda, kiris-neb tigingã neb yaa ninsaalb sẽn pa zems zãnga. Neb nins sẽn yaa kãsem dãmbã maanda tudgr tɩ wakat-wakat bɩ mat tõnd mengã. Baasg zãnga, a Zeova tʋmda ne rap a woto n kɩɩmd a bãgrã. (1 Pɩɛɛr 5:1, 2) Rap la pagb nins tẽebã yɛl sẽn pak n yɩɩdã sak n deegame tɩ kãsem dãmbã yaa bũmb a ye a Zeova sẽn tũnugd ne n wilgd a nin-buiidã sore. Woto yĩnga, d sẽn yaa kiris-nebã, d gũusdame n da yɩ wɩtba, neb sẽn nong yẽgeng sẽn pa tar waoogr ne segls nins b sẽn maan tɩ tũud ne Wẽnnaam sor-wilgrã ye. D sã n sakd neb nins sẽn lʋɩt taoor tõnd sʋkã, d wilgdame tɩ d nee a Soab ning nebã nin sẽn pa tõe n yã wã.—Hebre dãmba 13:17.
D ges Wẽnnaam wa d Karensaam Kãsenga
13, 14. Ges a Zeova wa Karensaam Kãseng rat n yeelame tɩ bõe ne yãmba?
13 Zĩig a to n baood tɩ d ges yɛlã ne tẽeb nini. A Ezai togsa woto bãngr-gomd pʋgẽ: “Yãmb ninã segd n yɩɩ nin sẽn yãt y Karen-saam Kãsengã.” (Ezai 30:20, NW ) Rɩlla d tall tẽeb n sak n deeg tɩ ya a Zeova la a soab ning sẽn zãmsd tõnd n tũnugd ne a tẽng zug siglgã. (Matɩe 24:45-47) Ges tɩ Wẽnnaam yaa d Karensaam Kãseng yɩɩda d ket n karemd Biiblã sõma la d kẽnd kiris-neb tigissã n pa vaandẽ ye. Rẽ rat n yeelame tɩ d rɩ tẽeb segls nins fãa Wẽnnaam sẽn maana nafa tɩ pidi. Wala makre, d segdame n tũ sor-wilgr ning a Zeova sẽn tũnugd ne a Zezi n kõtẽ wã n yɩɩd raasenkamã. Rẽ yaa sẽn na yɩl tɩ d ra wa bʋdg n bas tẽebã ye.—Hebre dãmba 2:1.
14 Wakat ninga rɩlla d maan modgr sõma sẽn na yɩl n dɩ tẽebã rɩɩb nafa tɩ pidi. Wala makre, d tõeeme n wa karemd Biiblã zĩis kẽer var-vare, n tẽed tɩ b võorã wʋmb yaa toogo. D sã n wa karemd Gũusg Gasgã la Reveillez-vous! wã sɛba, tõe tɩ d gãensda sõss kẽer menga, gom-zu-kãens sẽn pa noom-d wʋsgã yĩnga. Bɩ d tõeeme n bas tɩ d yamã gõod kiris-neb tigissã wakate. Baasg zãnga, d tõe n tika d yamã fãa tigissã zutu, d sã n maag d yĩng n bʋgs tagsa nins b sẽn wɛgsdã zutu. D sã n tar mi-beoog wʋsg ne tẽebã zãmsg d sẽn paamdã, wilgdame tɩ d sak n deegame tɩ ya a Zeova la d Karensaam Kãsenga.
D segd n kolg n togsame
15. Wãn to la neb kẽer maan wa a Zeova ra pa ne-ba?
15 Wẽngã sẽn yaa wʋsg ‘sɛɛbã wakat’ kãngã wã yĩnga, yaa tɩlae tɩ d tall tẽeb ne a Soab ning nebã nin sẽn pa ne wã. (Daniɛll 12:4) Pʋ-likã la yoobã bee zĩig fãa. Yaa sɩda, yaa yam tʋʋmd tɩ d tẽeg t’a Zeova geta tõnd tʋʋmã, baa ninsaalbã sã n pa tõe n yã-do. Kẽer yĩma rẽ. Neb a taabã sã n pa ne-ba, b tõe n talla manesem sẽn kɩɩsd Gʋlsg Sõamyã. Wala makre, kẽer pa tõog n yals kãn-kãe makr taoor ye. B gesa reem sẽn pa sõma la yoob yɛl b sẽn wilgd ordinatɛɛr dãmbẽ, televiziõ pʋgẽ bɩ ne manesem a taaba. F sẽn tõe n ges bõn-kãensã tɩ ned pa yã-fã yĩnga, kẽer maana wa a Zeova ra pa ne-b ye.
16. Bõe n segd n tus tõnd tɩ d tũ a Zeova noyã sẽn yaa sõma wʋsgã?
16 Yaa sõma tɩ d ning tʋm-tʋmd a Poll gom-kãensã d yamẽ: “Tõnd ned kam fãa na n togsa a meng yell Wẽnnaam taoore.” (Rom dãmba 14:12) D segd n bãngame tɩ d sã n beeg fãa, ya a Zeova la d beegda. D sã n mi rẽ, segd n kɩtame tɩ d tũ a noyã sẽn yaa sõma wʋsgã la d lak d mens ne tʋʋm-dẽgdo. Biiblã tẽegda tõnd woto: “Bõn-naandg ka be sẽn solg ne bãmb ye, bũmb fãa yaa bɛɛla la vẽenes ne tõnd sẽn na n togs a soab tõnd yɛla fãa wã.” (Hebre dãmba 4:13) Yaa sɩda, d segd n kolg n togsa Wẽnnaam, la sɩd-sɩda, yaa tõnd sẽn nong a Zeova wʋsgã n yaa bʋʋm kãseng ning sẽn kɩt tɩ d maand a raabã, la d tũud a no-tɩrsã. Woto yĩngã, d sã n wa yãkd reem n na n gese, bɩ d bãng n yãk sõma. Sẽn paase, d sã n yaa raoa, bɩ d tall yam d manesmã ne pagbã pʋgẽ, tɩ d sã n yaa pag me bɩ d tall yam, d manesmã ne rapã pʋgẽ.
17. Yaa ne yam bʋg buud la a Zeova get tõndo?
17 A Zeova sɩd rata tõnd neer sõma-sõma, la rẽ pa rat n yeel t’a gũudame tɩ d beeg t’a paam n sɩbg-d ye. Sẽn yaa lebende, yaa nonglem yĩng la a sẽn get tõndã. Yaa wa ba sẽn dat n keo a kom-sakdse. Ad sɩd kengda pɛlg tɩ d bãng tɩ d yĩngr Ba wã sũur nooma ne tõnd tẽebã la t’a yaa “neb nins sẽn baood bãmba roanda”! (Hebre dãmba 11:6) Bɩ d tall tẽeb zãng-zãng ne a Zeova, la d ‘sak-a ne d sũur fãa.’—1 Kɩbaya 28:9.
18. A Zeova sẽn get tõnd la a pa yĩmd d kɩs-sɩdã yĩnga, bas-m-yam bʋg la Gʋlsg Sõamyã kõt tõndo?
18 Yelbũna 15:3 yetame: “Zusoaba nee zĩiga fãa. Bãmb nee nin-wẽnsa ne nin-sõama wã fãa.” N-ye, Wẽnnaam ket n geta nin-wẽnsã n dond-b tɩ zems ne b tʋʋmã. La tõnd sã n bee “nin-sõama wã” sʋka, d tõe n kɩsa sɩd t’a Zeova pa yĩmd tõnd kɩs-sɩd tʋʋmã ye. D sẽn mi tɩ ‘tõnd sẽn tʋmd Zusoaba tʋʋma ka na n yɩ zaalma,’ la d sẽn mi t’a Soab ning nebã nin sẽn pa ne wã pa na n yĩm ‘tõnd tʋʋmda ne d nonglma tõnd sẽn wilg bãmb yʋʋra yĩngã’ sɩd kengda tõnd tẽebã sõma!—1 Korẽnt dãmba 15:58; Hebre dãmba 6:10.
D kos a Zeova t’a fees-do
19. Tẽeb sẽn tar pãng ne a Zeova tara nafa sãnda bʋse?
19 D sẽn ya a Zeova sõgen dãmb sẽn tar kɩs-sɩdã, d tara yõod wʋsg ne-a. (Matɩe 10:29-31) Baa ne tõnd sẽn pa ne-a wã, a tõe n yɩɩ vẽeneg ne-do, la d tõe n talla naneb wʋsg ne zems-n-taar ning d sẽn tar ne-a wã. D sã n tar manesem a woto ne d yĩngr Ba wã, d na n dɩɩ a nafa wʋsgo. Tõnd tẽebã sẽn tar pãngã sõngda tõnd tɩ d paam sũ-yɩlemd la sũur kaset sẽn yaa sõma a Zeova taoore. Tẽeb sẽn pa tar zãmb leb n sõngda tõnd tɩ d ra solgd n maand wẽng ye. (1 Tɩmote 1:5, 18, 19) Tõnd tẽeb sẽn pa vigsd ne Wẽnnaamã yaa mak-sõngo, la a tõe n kenga neb nins sẽn gũbg tõndã pɛlga. (1 Tɩmote 4:12) Sẽn paase, tẽeb kãngã buud kɩtdame tɩ f tall manesem sẽn tat Wẽnnaam yam, n noogd a Zeova sũuri.—Yelbũna 27:11.
20, 21. a) Bõe yĩng tɩ yaa sõma tɩ d paam t’a Zeova ges-do? b) Wãn to la d tõe n tũ Yɩɩl Sõamyã 139:23, 24?
20 D sã n sɩd tar yam, d sũur yɩta noog tɩ d paam t’a Zeova ges-do. D pa rat t’a ges-d bal ye, la d tʋllame me t’a fees-d tagsa wã la d tʋʋmã zãnga. Pʋʋsg pʋgẽ, d na maan neere, d sã n kos a Zeova t’a bao n ges d sã n pa tar tʋlsem sẽn pa zems d sũyã pʋsẽ. A sɩd tõe n sõng-d lame tɩ d mao ne d zu-loeesã la d maan remsg buud fãa sẽn segde. Yaa wa sẽn zems la yɩɩl gʋlsd a Davɩɩd sẽn yɩɩl woto wã: “Wẽnnaam, bɩ y fees maam n bãng m sũuri, mak-y maam n bãng m tagsgo n ges mam sã n tũuda so-wẽnga la y yãag maam sor sẽn ka sɛt pʋgẽ.”—Yɩɩl Sõamyã 139:23, 24.
21 A Davɩɩd da bõosa a Zeova t’a vaees a vɩɩmã pʋgẽ n gese ‘so-wẽng’ sã n ka be. Wa yɩɩl gʋlsdã, tõnd me baooda ne d sũur fãa tɩ Wẽnnaam bao d sũyã pʋsẽ n gese d sã n pa tar tʋlsem wẽns bɩ? Bɩ d kos a Zeova ne tẽeb t’a fees-do. La yɩɩr sã n namsd tõnd tudgr yĩng bɩ bõn-wẽng sẽn be tõnd pʋgẽ wã yĩnga? Bɩ d pʋʋs d Wẽnnaam a Zeova sẽn yaa nonglem soabã ne d sũy fãa, la d sak a vʋʋsem sõngã sor-wilgr la a Gomdã saglga. D tõe n kɩsa sɩd t’a na n teel-d lame, la a na n sõng-d lame tɩ d ket n tar manesem sẽn tar n debd vɩɩm sẽn pa sat zĩigẽ.—Yɩɩl Sõamyã 40:12-14.
22. Tõnd yam-yãkr d sẽn maan ne pa-vigsd segd n yɩɩ bõe ne a Soab ning nebã nin sẽn pa ne wã wɛɛngẽ?
22 N-ye, a Zeova na n ning-d-la bark n kõ-d vɩɩm sẽn pa satã, d sã n tũ noy nins a sẽn dat tɩ d tũ wã. Yaa sɩda, d segd n sak n deega a tõogã la a zu-sobendã, wa tʋm-tʋmd a Poll sẽn gʋls woto wã: “Bɩ Rĩma sẽn so zamaan fãa, sẽn ka kiida la ned sẽn ka yãta, sẽn yaa Wẽnnaam sẽn ka to wã paam waoogre la naam wakat sẽn ka sɛt ye. Amina!” (1 Tɩmote 1:17) Wakat fãa bɩ d tall waoogr ne d sũur fãa woto ne a Zeova. La sẽn wa n yaa to-to fãa, bɩ d ra tol n bas d yam-yãkr ning d sẽn maan ne pa vigsd n na n ket n yas kãn-kãe wa d nee a Soab ning nebã nin sẽn pa ne wã ye.
Wãn to la y na n leokẽ?
• Wãn to la ninsaalb tõe n yã Wẽnnaam?
• Tõnd sã n tẽed t’a Zeova sɩd beeme, d manesem na n yɩɩ wãn to, b sã n namsd tõnd d tẽebã yĩnga?
• Ges a Zeova wa tõnd Karensaam Kãseng rat n yeelame tɩ bõe?
• Bõe yĩng tɩ d segd n dat t’a Zeova fees-do?
[Zãmsgã sogsgã]
[Foto, seb-neng 14]
A Moiiz pa zoe a Faraõ ye, a maana wa a ra nee Wẽnd a Zeova, nebã nin sẽn pa ne wã
[Foto, seb-neng 17]
D ra tol n maan wa a Zeova pa ne-d ye
[Foto, seb-neng 19]
D baooda Wẽnnaam bãngrã ne d sũur fãa, bala d getame t’a yaa d Karensaam Kãsenga