Tšwelang Pele le Tiile Bjalo ka Bao ba Bonago yo a sa Bonwego!
Tšwelang Pele le Tiile Bjalo ka Bao ba Bonago yo a sa Bonwego!
“[Moše] a xomarêla Eo a sa bonwexo byalo ka e ke ó a mmôna.”—BA-HEBERE 11:27.
1. Ke mantšu afe a kgethegilego mabapi le Modimo ao Jesu a a boletšego Thutong ya gagwe ya Thabeng?
JEHOFA ke Modimo yo a sa bonagalego. Ge Moše a be a kgopela go bona letago la Gagwe, Jehofa o arabile ka gore: “Sefahloxô sa-ka O ka se kê wa kxôna xo se bôna; ka xobane motho a ka se kê a mpôna a phela.” (Ekisodo 33:20) Le gona moapostola Johane o ngwadile gore: “Xa xo e a bilexo a bôna Modimo le neng.” (Johane 1:18) Ge Jesu Kriste e be e le motho mo lefaseng, le yena ga se a ka a kgona go bona Modimo. Lega go le bjalo, Thutong ya gagwe ya Thabeng, Jesu o itše: “Ba lehlôxônôlô ké ba pelo-thsekexi xobane bôná-bao ba tlo bôna Modimo.” (Mateo 5:8) Jesu o be a bolela’ng?
2. Ke ka baka la’ng re sa kgone go bona Modimo ka mahlo a rena a nama?
2 Mangwalo a hlaola Jehofa e le Moya o sa bonagalego. (Johane 4:24; Ba-Kolose 1:15; 1 Timotheo 1:17) Ka gona, Jesu o be a sa bolele gore rena batho ge e le gabotse re ka bona Jehofa ka mahlo a rena a nama. Ke therešo gore Bakriste ba tloditšwego ba tla bona Jehofa Modimo legodimong ka morago ga go tsošwa e le dibopiwa tša moya. Eupša batho ba “pelo-thsekexi” le bao ba nago le kholofelo ya go phela ka mo go sa felego mo lefaseng le bona ba kgona go “bôna” Modimo. Se se kgonega bjang?
3. Batho ba ka kwešiša bjang dika tše dingwe tša Modimo?
3 Re ithuta selo se itšego ka Jehofa ka go hlahloba ka kelohloko dilo tšeo a di bopilego. Ka go dira bjalo re ka kgahlišwa ke matla a gagwe gomme ra tutueletšega go dumela go yena e le Modimo Mmopi. (Ba-Hebere 11:3; Kutollo 4:11) Tabeng ye, moapostola Paulo o ngwadile gore: “Hleng tše di sa bonwexo tša [Modimo], e lexo matla a neng le neng, le bomodimo bya xaxwe, le tšôna xo tloxa thlolong ya lexohle, ba ka di hlatha ka xo bôna ditirô tša xaxwe.” (Ba-Roma 1:20) Ka gona mantšu a Jesu a lego mabapi le go bona Modimo a akaretša bokgoni bja go kwešiša dika tše dingwe tša Jehofa. Go bona mo go bjalo go theilwe tsebong e nepagetšego gomme go kwešišwa ka tsela ya moya ka “mahlô a pelo.” (Ba-Efeso 1:18) Mantšu le ditiro tša Jesu le tšona di utolla mo gontši ka Modimo. Ka baka leo, Jesu o itše: “E a bonexo Nna ó bone Tate.” (Johane 14:9) Jesu o ile a bonagatša semelo sa Jehofa ka mo go phethagetšego. Ka gona, go tseba bophelo bja Jesu le dithuto tša gagwe go ka re thuša go bona goba go lemoga dika tše dingwe tša Modimo.
Go Kwešiša le go Leboga Dilo tša Moya go Bohlokwa
4. Go hloka kwešišo le tebogo ka dilo tša moya go bontšhwa bjang ke ba bantši lehono?
4 Lehono tumelo le boemo bja moya bja kgonthe di a hlokwa e le ka kgonthe. Paulo o itše: “Tumêlô xa se ya bohle.” (2 Ba-Thesalonika 3:2) Ba bantši ba nweletše ka mo go feletšego go phegeleleng dilo tša bona ka noši gomme ga ba dumele go Modimo. Boitshwaro bja bona bja sebe le go hloka kwešišo le tebogo ka dilo tša moya go ba thibela go mmona ka mahlo a kwešišo, ka gobane moapostola Johane o ngwadile gore: “Mo-dira-bobe xa a ešo a bôna Modimo.” (3 Johane 11) Ka ge batho ba bjalo ba sa bone Modimo ka mahlo a bona a nama, ba dira dilo bjalo ka ge eka ga a bone seo ba se dirago. (Hesekiele 9:9) Ba tšeela dilo tša moya fase, ka gona ba ka se kgone go hwetša tsebo ya “xo tseba Modimo.” (Diema 2:5) Ka gona, Paulo o ngwadile ka mo go swanelago gore: “Xe e le motho [wa nama, NW], tša Môya wa Modimo xa a di fihlele; ó hwetša è le bošilo; xa a kxone xo di lemoxa, xobane di hlathwa ka mokxwa wa Môya.”—1 Ba-Korinthe 2:14.
5. Batho bao ba sekametšego dilong tša moya ba lemoga ntlha efe?
5 Lega go le bjalo, ge e ba re sekametše dilong tša moya, ka mehla re tla dula re hlokometše gore gaešita le ge Jehofa e se Modimo wa go swaya diphošo, o a tseba ge re dira go ya ka dilo tše di fošagetšego le dikganyogo. Ka kgonthe, “ ’tsela tša monna di bônwa ke Morêna! Ó hlatha dinaô tša xaxwe ka moka.” (Diema 5:21) Ge e ba sebe se ka re fenya, re tutueletšega go itshola le go tsoma tebalelo ya Jehofa ka gobane re a mo rata gomme ga re nyake go mo kweša bohloko.—Psalme 78:41; 130:3.
Ke Eng Seo se re Tiišago?
6. Go tia go bolela’ng?
6 Gaešita le ge re sa kgone go bona Jehofa ka mahlo a rena, anke ka mehla re duleng re gopola gore yena o a re bona. Go lemoga go ba gona ga gagwe le kgodišego ya gore o kgaufsi le bohle bao ba mmitšago go tla re thuša gore re tie—re tiile e bile re sa šišinyege go mmotegeleng ga rena. (Psalme 145:18) Re ka ba bjalo ka Moše yoo Paulo a ngwadilego ka yena gore: “Ké ka tumêlô xe a khuduxa Egipita à sa boife boxale bya kxoši, a xomarêla Eo a sa bonwexo byalo ka e ke ó a mmôna.”—Ba-Hebere 11:27.
7, 8. Ke eng seo se baketšego sebete seo Moše a bilego le sona pele ga Farao?
7 Ka go phetha thomo ya gagwe yeo a e neilwego ke Modimo ya go etelela ba-Isiraele pele go ba ntšha bokgobeng bja ba-Egipita, Moše o be a fela a tšwelela pele ga Farao wa nkgwete lekgotleng la bogoši leo le nyeumago ka baetapele ba bodumedi le ba tša bohlabani. Mohlomongwe mabotong a ngwako wa bogoši go be go e-na le medimo ya diswantšho yeo e thadilwego ka go betlwa. Eupša Jehofa gaešita le ge a sa bonagale e be e le wa kgonthe go Moše, ka go se swane le medimo ka moka ya diswantšho yeo e emelago medimo e sa phelego ya Egipita. Ga go makatše ge Moše a se a ka a tšhošwa ke Farao!
8 Ke eng seo se ilego sa nea Moše sebete sa go tšwelela pele ga Farao leboelela? Mangwalo a re botša gore “Mošê e be e le monna yo bolêta ruri xo fetiša batho ka moka ba lefase.” (Numeri 12:3) Go molaleng gore boemo bja gagwe bja moya bjo bo tiilego le kgodišego ya gore Modimo o be a e-na le yena di neile Moše matla a nyakegago bakeng sa go emela ‘Yo a sa bonwego’ pele ga kgoši e šoro ya Egipita. Ke ditsela dife tše dingwe tšeo ka tšona bao ba ‘bonago’ Modimo yo a sa bonwego ba bonagatšago tumelo ya bona go yena lehono?
9. Tsela e nngwe yeo ka yona re ka tšwelago pele re tiile ke efe?
9 Tsela e nngwe ya go bontšha tumelo le go tšwela pele re tiile bjalo ka ge eka re bona Yo a sa bonwego ke ka go bolela ka sebete go sa šetšwe tlaišo. Jesu o lemošitše barutiwa ba gagwe gore: “Le tlo ba ba ba hloilwexo ke bohle ka ’baka la Leina la-ka.” (Luka 21:17) O ile a ba botša gape gore: “Mohlanka xa a fete mong wa xaxwe. Xe Nna ba nthlomere, le lena ba tlo Le hlômara.” (Johane 15:20) Ka go dumelelana le mantšu a Jesu, kapejana ka morago ga lehu la gagwe barutiwa ba gagwe ba ile ba tlaišwa ka mokgwa wa go tšhošetšwa, go golegwa le go bethwa. (Ditiro 4:1-3, 18-21; 5:17, 18, 40) Gaešita le ge go be go e-na le lephoto la tlaišo, baapostola ba Jesu le barutiwa ba bangwe ba ile ba tšwela pele ba bolela ditaba tše dibotse ka sebete.—Ditiro 4:29-31.
10. Ke bjang go bota ga rena tlhokomelo e šireletšago ya Jehofa go re thušago bodireding bja rena?
10 Ka go swana le Moše, balatedi ba pele ba Jesu ba be ba sa tšhošwe ke manaba a bona a mantši a bonagalago. Barutiwa ba Jesu ba be ba dumela go Modimo, gomme ka baka la seo ba ile ba kgona go kgotlelela tlaišo e šoro yeo ba ilego ba lebana le yona. Ee, ba ile ba tšwela pele ba tiile bjalo ka ge eka ba bona Yo a sa bonwego. Lehono, go dula re lemoga ka mehla tlhokomelo ya Jehofa e šireletšago go a re tiiša, go re nea sebete le go hloka poifo modirong wa rena wa go bolela ka Mmušo. Lentšu la Modimo le bolela gore “xo boifa batho xo wetša moreong; xo pholoxa e a bô΄taxo Morêna.” (Diema 29:25) Ka baka leo, ga re gomele morago ka go boifa tlaišo; e bile ga re lešwe dihlong ke bodiredi bja rena. Tumelo ya rena e re tutueletša go nea bohlatse ka sebete go baagišani, bašomi-gotee le rena, bao re tsenago sekolo le bona le ba bangwe.—Ba-Roma 1:14-16.
Yo a sa Bonwego o Hlahla Batho ba Gagwe
11. Go ya ka Petro le Juda, ke bjang ba bangwe bao ba bego ba kopanela le phuthego ya Bokriste ba ilego ba bonagatša go hloka kwešišo le tebogo ka dilo tša moya?
11 Tumelo e re thuša go bona Jehofa e le yena yo a hlahlago mokgatlo wa gagwe wa lefaseng. Ka go rialo re phema go ba le boemo bja kgopolo bja go swaya bao ba rwelego boikarabelo ka phuthegong diphošo. Bobedi moapostola Petro le ngwanabo Jesu ka mmagwe, e lego Juda ba ile ba lemoša ka ba bangwe bao ba bego ba hlaelelwa ke kwešišo le tebogo ka dilo tša moya moo ba ilego ba bolela gampe ka banna bao ba etelelago pele gare ga Bakriste. (2 Petro 2:9-12; Juda 8) Na baswaya-diphošo bao ba be ba ka bolela ka mokgwa woo mahlong a Jehofa ge nkabe e be e le yo ba kgonago go mmona? Le gatee! Eupša ka ge Modimo a sa bonagale, banna bao ba nama ba ile ba palelwa ke go ela hloko boikarabelo bja bona go yena.
12. Ke boemo bofe bja kgopolo bjoo re swanetšego go ba le bjona ka bao ba etelelago pele ka phuthegong?
12 Ke therešo gore phuthego ya Bokriste e dirilwe ka batho bao ba sa phethagalago. Bao ba hlankelago e le bagolo ka dinako tše dingwe ba ka dira diphošo tšeo di re kgomago ka go lebanya. Lega go le bjalo, Jehofa o diriša banna ba bjalo e le badiši ba mohlape wa gagwe. (1 Petro 5:1, 2) Banna le basadi bao ba sekametšego dilong tša moya ba lemoga gore ye ke tsela e nngwe yeo Jehofa a hlahlago batho ba gagwe ka yona. Ka gona, bjalo ka Bakriste re phema moya wa go swaya diphošo le wa go belaela gomme re bontšha go hlompha dithulaganyo tšeo Modimo a di dirilego bakeng sa go hlahla batho ba gagwe. Ka go kwa bao ba etelelago pele gare ga rena, re bontšha gore re bona Yo a sa bonwego.—Ba-Hebere 13:17.
Go Bona Modimo e le Mohlahli wa Rena yo Mogolo
13, 14. Go bona Jehofa e le Mohlahli yo Mogolo go bolela’ng go wena?
13 Go na le karolo e nngwe yeo e nyakago temogo ya moya. Jesaya o porofetile ka gore: “Mahlo a lena e swanetše go ba [mahlo] a a bonago Mohlahli wa lena yo Mogolo.” (Jesaya 30:20, NW) Go nyakega tumelo go lemoga gore Jehofa ke yena a re rutago ka mokgatlo wa gagwe wa lefaseng. (Mateo 24:45-47) Go bona Modimo e le Mohlahli wa rena yo Mogolo go bolela se se fetago go fo kgomarela mekgwa e mebotse ya go ithuta Beibele le go ba gona dibokeng tša Bokriste ka mehla. Go bolela go diriša ka mo go tletšego ditokišetšo tša Modimo tša moya. Ka mohlala, re swanetše go ela hloko ka go fetiša kamoo go tlwaetšwego tlhahlong yeo Jehofa a e neago ka Jesu e le gore re se ke ra aroga moyeng.—Ba-Hebere 2:1, bapiša le NW.
14 Ka dinako tše dingwe go nyakega gore go dirwe boiteko bjo bo kgethegilego bakeng sa go holwa ka mo go tletšego ke dijo tša moya. Ka mohlala, re ka ba le tshekamelo ya go bala ka go feta feela dipego tše itšego tša Beibele tšeo re hwetšago go le thata go di kwešiša. Ge re bala dimakasine tša Morokami le Phafoga!, mohlomongwe re bile re tshela dihlogo tše itšego ka gobane taba e bolelwago e sa re kgahliše ka mo go kgethegilego. Goba re ka dumelela menagano ya rena go lelera ge re le dibokeng tša Bokriste. Lega go le bjalo, re ka dula re phafogile ge e ba re naganišiša ka dintlha tšeo di ahla-ahlwago. Tebogo ya rena e tseneletšego bakeng sa tlhahlo ya moya yeo re e hwetšago e bontšha gore re lemoga gore Jehofa ke Mohlahli wa rena yo Mogolo.
Re Swanetše go Ikarabela
15. Ba bangwe ba ile ba itshwara bjang bjalo ka ge eka Jehofa ga a ba bone?
15 Go ba le tumelo go Yo a sa bonwego go bohlokwa, kudu-kudu ka ge bobe e le bjo bo atilego kudu gakaakaa mo ‘lebakeng le la bofelo.’ (Daniele 12:4) Go se botege le boitshwaro bjo bo gobogilego bja botona le botshadi ke tšeo di apareditšego. Ee, ke ga bohlale go gopola gore Jehofa o bona ditiro tša rena gaešita le ge batho ba sa kgone go re bona. Ba bangwe ba lahlegetšwe ke go lemoga therešo ye. Ge batho ba bangwe ba sa ba bone, ba ka kopanela boitshwarong bjo e sego bja Mangwalo. Ka mohlala, ba bangwe ga se ba lwantšha teko ya go bogela boithabišo bjo bo gobatšago le diswantšho tše di kgothaletšago bootswa go Internet, thelebišeneng le mehuteng e mengwe ya thekinolotši ya sebjale-bjale. Ka ge go kopanela dilong tše bjalo go ka dirwa ka sephiring, ba bangwe ba ile ba itshwara bjalo ka ge eka Jehofa ga a bone boitshwaro bja bona.
16. Ke eng seo se swanetšego go re thuša go dumelelana le ditekanyetšo tša Jehofa tše di phagamego?
16 Ke mo gobotse go dula re gopola mantšu a moapostola Paulo a rego: “Motho mang le mang wa rena ó tlo iphetolêla pele xa Modimo.” (Ba-Roma 14:12) Re swanetše go lemoga gore nako e nngwe le e nngwe ge re dira sebe, re senyetša Jehofa. Go tseba se go swanetše go re thuša go dira ka go dumelelana le ditekanyetšo tša gagwe tše phagamego le go phema boitshwaro bjo bo sa hlwekago. Beibele e re gopotša gore: “Xa xo sebopya se se kaxo mo širêla; tšohle ó di bôna di hlobotše di khurumolotšwe. Xomme ké Yêna-eo re naxo le taba le Yêna.” (Ba-Hebere 4:13) Ke therešo gore re swanetše go iphetolela go Modimo, eupša ga go na pelaelo gore lerato la rena le le tseneletšego la go rata Jehofa ke lona e lego lebaka le legolo leo ka lona re dirago thato ya gagwe le go kwa ditekanyetšo tša gagwe tša go loka. Ka gona anke re dirišeng bohlale ditabeng tše bjalo ka kgetho ya rena ya boithabišo le tsela yeo re itshwarago ka yona ge re e-na le ba bong bjo bo fapanego.
17. Jehofa o re lebelela ka kgahlego ya mohuta mang?
17 Jehofa o na le kgahlego e tseneletšego ka rena, eupša seo ga se bolele gore o letetše gore re dire diphošo e le gore a ka kgona go re otla. Go e na le moo, o re lebelela ka go bontšha go tshwenyega ka lerato, mo go swanago le ga tate yo a nyakago go putsa bana ba gagwe bao ba kwago. Ke mo go homotšago gakaakang go tseba gore Tatago rena wa legodimong o thabišwa ke tumelo ya rena le gore “ba ba Mo nyakaxo ó a ba putsa”! (Ba-Hebere 11:6) Anke re bontšheng tumelo e feletšego go Jehofa gomme re mo “hlankêlê ka pelo yohle.”—1 Koronika 28:9.
18. Ka ge Jehofa a re bona e bile a lemoga potego ya rena, ke kgonthišetšo efe yeo re e hwetšago ka Mangwalong?
18 Diema 15:3 e re: “A mo xo fêla, mahlô a Morêna; a okametše ba babe le ba bolo [“ba lokilego,” PK].” Ee, Modimo o tšwela pele a lebeletše batho ba babe gomme o dirišana le bona go ya ka boitshwaro bja bona. Lega go le bjalo, ge e ba re le gare ga “ba lokilego,” re ka kgonthišega gore Jehofa o ela hloko ditiro tša rena tša go botega. Ke mo go matlafatšago tumelo gakaakang go tseba gore ‘go itapiša ga rena ga se ga lefeela Moreneng’ le gore yo a sa bonwego a ka se ‘lebale mediro ya rena le lerato le re itapišitšego ka lona leineng la gagwe’!—1 Ba-Korinthe 15:58; Ba-Hebere 6:10.
Go Laletša Jehofa Gore a re Hlahlobe
19. Mehola e mengwe yeo e tlišwago ke tumelo e tiilego go Jehofa ke efe?
19 Ka ge re le bahlanka ba Jehofa bao ba botegago, re bohlokwa go yena. (Mateo 10:29-31) Gaešita le ge a sa bonagale, e ka ba wa kgonthe go rena gomme re ka tšeela godimo tswalano ya rena e bohlokwa le yena. Go ba le boemo bja kgopolo bjo bo bjalo ka Tatago rena wa legodimong go re tlišetša mehola e mentši. Tumelo ya rena e tiilego e re thuša go ba le pelo e hlwekilego le letswalo le lebotse pele ga Jehofa. Gape tumelo e se nago boikaketši e re thibela go phela maphelo a mabedi. (1 Timotheo 1:5, 18, 19) Tumelo ya rena e sa šišinyegego go Modimo e bea mohlala o mobotse gomme e ka kgothatša bao ba re dikologilego. (1 Timotheo 4:12) Go feta moo, tumelo e bjalo e godiša boitshwaro bjoo Modimo a bo amogelago, e lego seo se thabišago pelo ya Jehofa.—Diema 27:11.
20, 21. (a) Ke ka baka la’ng e le mo go rategago gore leihlo la Jehofa le le šeditšego le re lebelele? (b) Re ka diriša bjang Psalme 139:23, 24 go rena ka noši?
20 Ge e ba re le bohlale e le ka kgonthe, re thabela gore Jehofa o a re hlokomela. Ga se feela gore re nyaka gore a re bone eupša gape re kganyoga gore a hlahlobe dikgopolo le ditiro tša rena ka mo go tseneletšego. Ge re rapela, re dira gabotse go laletša Jehofa gore a re hlahlobe gomme a bone ge e ba re e-na le ditshekamelo le ge e le dife tše di fošagetšego. Ka ntle le pelaelo a ka re thuša go lebeletšana le mathata a rena le go dira diphetogo le ge e le dife tše di nyakegago. Ka mo go swanetšego, mopsalme Dafida o opetše ka gore: “Modimo, mphêtlêkê, O tsebê pelo ya-ka; O ntekê O tsebê dikxopolô tša-ka. O mpônê xe nka ba wa tsela e mpe, O nkišê tseleng e sa felexo.”—Psalme 139:23, 24.
21 Dafida o ile a kgopela Jehofa gore a mo fetleke gomme a bone ge e ba go be go e-na le “tsela e mpe” go yena. Ka go swana le mopsalme, na ga re hlologele gore Modimo a fetleke dipelo tša rena gomme a bone ge e ba re e-na le maikemišetšo a fošagetšego? Ka gona, ka tumelo anke re kgopeleng Jehofa gore a re hlahlobe. Eupša go thwe’ng ge e ba re tshwenyegile ka go belaela ka phošo e itšego goba go e-na le selo se sengwe seo se re jago ka gare? Gona a re tšweleng pele re rapela Modimo wa rena yo lerato, Jehofa, ka go tšwa pelong gomme ka boikokobetšo re latele tlhahlo ya moya wa gagwe o mokgethwa le keletšo ya Lentšu la gagwe. Re ka kgodišega gore o tla re thuša gomme o tla re thuša le go phegelela tsela yeo e tla lebišago bophelong bjo bo sa felego.—Psalme 40:11-13.
22. Boikemišetšo bja rena e swanetše go ba bofe mabapi le Yo a sa bonwego?
22 Ee, Jehofa o tla re šegofatša ka bophelo bjo bo sa felego ge e ba re fihlelela dilo tšeo a di nyakago. Ee, re swanetše go dumela matla a gagwe le matla a gagwe a taolo, go etša ge moapostola Paulo a ile a dira ge a be a ngwala gore: “Yêna Kxoši Ra-mabaka-a-neng-le-neng, Yêna Modimo wa xo se fetoxe, wa xo se bônwe ke motho, a a xodišwê a rêtwê xo ya xo ile le neng le neng. Amene.” (1 Timotheo 1:17) Anke ka mehla re bontšheng poifo e bjalo e tšwago pelong bakeng sa Jehofa. Le gona go sa šetšwe seo se ka diregago, anke le ka mohla re se ke ra šišinyega boikemišetšong bja rena bja go tšwela pele re tiile bjalo ka bao ba bonago Yo a sa bonwego.
O tla Araba Bjang?
• Batho ba kgona bjang go bona Modimo?
• Ge e ba Jehofa e le wa kgonthe go rena, re tla itshwara bjang ge re tlaišwa?
• Go bolela’ng go lebelela Jehofa e le Mohlahli wa rena yo Mogolo?
• Ke ka baka la’ng re swanetše go kganyoga gore Jehofa a re hlahlobe?
[Dipotšišo tša Thuto]
[Seswantšho go letlakala 18]
Moše a sa tšhošwe ke Farao, o ile a dira eka o be a kgona go bona Jehofa, Modimo yo a sa bonagalego
[Seswantšho go letlakala 21]
Anke le ka mohla re se ke ra dira eka Jehofa ga a bone seo re se dirago
[Seswantšho go letlakala 23]
Re tsoma tsebo ya Modimo e le ka kgonthe ka gobane re mo lebelela e le Mohlahli wa rena yo Mogolo