Nyɛkɛ Maŋtsɛyeli Hiɛnɔkamɔ lɛ Anáa Miishɛɛ!

EJI miishɛɛ be ni ha toibolɔi 5,784 lɛ babua amɛhe naa yɛ March 10, 2001, yɛ tsũi etɛ ni New York States Betel weku ni da lɛ kɛtsuɔ nii lɛ mli. Be lɛ ji Gilead maŋsɛɛ sanekpakpa shiɛlɔi askul klas ni ji 110 lɛ nikasemɔ naagbee nifeemɔ lɛ.

Carey Barber, ni ji Yehowa Odasefoi a-Nɔyeli Kuu lɛ mlinyo lɛ, here mɛi lɛ fɛɛ atuu ni eje gbɛjianɔtoo lɛ shishi, beni ejaje akɛ: “Ehaa wɔnáa miishɛɛ akɛ wɔbaaná wɔle akɛ amrɔ nɛɛ atsɔse Gilead nikaselɔi aklas 110 akɛ maŋsɛɛ sanekpakpa shiɛlɔi ni atsu amɛ kɛtee shikpɔji ni yɔɔ je lɛŋ fɛɛ.”

Bɔ ni Aaafee Aná Miishɛɛ Daa

Yɛ Nyɛminuu Barber klɛŋklɛŋ wiemɔ lɛ sɛɛ lɛ, Don Adams kɛ toibolɔi lɛ ni nikaselɔi 48 ni gbeɔ nikasemɔ naa lɛ fata he lɛ wie saneyitso ni ji “Yehowa Jɔɔmɔ lɛ Feɔ Wɔ Niiatsɛmɛi” lɛ he. Beni ehaa ewiemɔ lɛ damɔɔ Abɛi 10:22 lɛ nɔ lɛ, ekai toibolɔi lɛ akɛ Yehowa wajeɔ etsuji, ni ejɔɔ amɛ kɛji amɛkɛ Maŋtsɛyeli nibii ye klɛŋklɛŋ gbɛhe yɛ amɛshihilɛi amli. Ewo nikaselɔi lɛ hewalɛ koni amɛkpɛlɛ nitsumɔ hee ni akɛwo amɛdɛŋ lɛ nɔ kɛ suɔmɔ mumɔ ni tamɔ nɔ ni bɔfo Paulo jie lɛ kpo beni afɔ̃ lɛ nine koni ‘eba Makedonia ni ebaye ebua’ lɛ nɔŋŋ eko. (Bɔfoi lɛ Asaji 16:9) Eyɛ mli akɛ shihilɛi ni mli wawai yɛ ni esa akɛ Paulo aye nɔ moŋ, shi jɔɔmɔi ni miishɛɛ yɔɔ mli babaoo jɛ suɔmɔ ni eyɔɔ akɛ ebaaya eyashiɛ yɛ he fɛɛ he ni abaakɛɛ eya lɛ mli kɛba.

Klasbii ni gbeɔ nikasemɔ lɛ naa lɛ mli bii egbe amɛ nyɔji enumɔ Biblia kasemɔ kɛ tsɔsemɔ yɛ hesaamɔ kɛha maŋsɛɛ sanekpakpa shiɛmɔ nitsumɔ lɛ naa. Shi kɛlɛ, Daniel Sydlik, ni ji Yehowa Odasefoi a-Nɔyeli Kuu lɛ mlinyo lɛ wo amɛ ŋaa ni amɛya nɔ amɛfee nikaselɔi. Beni ewieɔ saneyitso ni ji “Nyɛfea Anɔkwa Kaselɔi” lɛ he lɛ, ekɛɛ akɛ: “Kaselɔ feemɔ tsɔɔ toiboo ni abaafee aha Yesu wiemɔi lɛ daa. Nɔ ni fata he ji wɔsuɔmɔ mli ni wɔbaajɛ akɛ wɔbaabo ewiemɔi, eshɛɛ sane lɛ, kɛ etsɔɔmɔ lɛ toi daa.” Etsɔɔ mli akɛ Kristo kaselɔi lɛ efeee yiŋkpɛɛ ko ni amɛbooo amɛ Nuntsɔ lɛ gbee toi; akɛ Nyɔŋmɔ nilee lɛ ewo Kristo wala shihilɛ mli. (Kolosebii 2:3) Wɔteŋ mɔ ko bɛ ni baanu Yesu wiemɔi lɛ shikome pɛ kɛkɛ ní wɔmu sane naa yɛ sɛɛ mli akɛ wɔle nibii fɛɛ ni kɔɔ ehe, no hewɔ lɛ Nyɛminuu Sydlik wo mɛi ni egbe nikasemɔ naa lɛ hewalɛ koni amɛya nɔ amɛkase Kristofoi anɔkwale lɛ ni nɔ ni jɛɔ mli kɛbaa ji heyeli lɛ, ní amɛkɛtsu nii, ní amɛtsɔɔ.—Yohane 8:31, 32.

Bɔni afee ni aná miishɛɛ daa yɛ Nyɔŋmɔ sɔɔmɔ mli lɛ, ebiɔ ni mɔ asumɔ akɛ ebaakpɛlɛ tsɔsemɔ kɛ jajemɔ nɔ. Sanebimɔ ni Gilead nitsɔɔlɔ Lawrence Bowen tee lɛ shi ji akɛ: “Ani Osabai Baajaje Bo?” Etsɔɔ mli akɛ yɛ Biblia lɛ mli lɛ, akɛ mfoniri feemɔŋ sabai lɛ toɔ mɔ ko mligbɛ susumɔi kɛ henumɔi ahe. Amɛbaanyɛ amɛtsu nii kɛjaje mɔ ko kɛji ŋaawoo ni jɛ mumɔŋ ni jɛ Nyɔŋmɔ Wiemɔ lɛ mli lɛ egbu  shi kɛbote mɔ lɛ subaŋ lɛ mligbɛ hei srɔtoi lɛ mli tɔ̃ɔ. (Lala 16:7; Yeremia 17:10) Anɔkwayeli gbɛ ni mɔ ko nyiɛ nɔ lɛ baanyɛ asa Yehowa he waa diɛŋtsɛ po. Beni wielɔ lɛ ekane Abɛi 23:15, 16 lɛ sɛɛ lɛ, ebi akɛ: “Ani osabai baajaje bo?” Ekɛfata he akɛ: “Wɔmiisɔle akɛ amɛfee nakai, ni no lɛ obaaha Yehowa aná mligbɛ miishɛɛ mli niiashikpamɔ ni mli kwɔ waa yɛ emli. Obaata ehenumɔi ni mli kwɔlɔ waa lɛ ahe. Hɛɛ, obaaha Nyɔŋmɔ -sabai lɛ anya be mli ni okɛ anɔkwayeli kpɛtɛɔ onitsumɔ lɛ he lɛ.”

Mark Noumair, ni sɔmɔ akɛ maŋsɛɛ sanekpakpa shiɛlɔ yɛ Kenya dani ebatsɔ Gilead nitsɔɔlɔ lɛ kɛ gbɛjianɔtoo lɛ mli fã nɛɛ mli naagbee wiemɔ lɛ ha. Ewiemɔ ni yitso ji “Ehi Akɛ Hiŋmɛii lɛ Baana” lɛ ma bɔ ni ehe hiaa ni aná tsui ni nyɔɔ mɔ mli lɛ nɔ mi. Yɛ Jajelɔ 6:9 kɛ gbeekpamɔ naa lɛ, Nyɛminuu Noumair jie yi akɛ: “Kpɛlɛmɔ bɔ ni shihilɛ ji diɛŋtsɛ lɛ nɔ. No ji ‘hiŋmɛii ni naa nii lɛ.’ Yɛ nɔ najiaŋ ni obaalaka ohe yɛ nɔ ko ni obaasumɔ akɛ ofee shi ofeee lɛ he lɛ, ha ojwɛŋmɔ ahi shihilɛ ni oyɔɔ mli amrɔ nɛɛ ni oooná he sɛɛ jogbaŋŋ kɛmɔ shi lɛ nɔ. Ní obaahi shi yɛ lakamɔ jeŋ ko mli, ní ona gbɛkpamɔi ni nilee bɛ mli, loo ni obaasusu onitsumɔ lɛ he nibii ni haoɔ mɔ lɛ he lɛ baaha ofee mɔ ni tsui enyɔɔɔ emli ni naaa miishɛɛ.” Hɛɛ, ekɔɔɔ he eko he ni ekolɛ wɔyɔɔ loo shihilɛ mli ni wɔyɔɔ, ní wɔɔná tsui ni nyɔɔ mɔ mli yɛ Nyɔŋmɔ jamɔ gbɛfaŋ yɛ shihilɛ ni wɔ diɛŋtsɛ wɔyɔɔ mli lɛ mli lɛ haa wɔnáa miishɛɛ mumɔ yɛ sɔɔmɔ ni wɔkɛhaa wɔ-Bɔlɔ Kpeteŋkpele lɛ mli.

 Niiashikpamɔi ni Yɔɔ Miishɛɛ yɛ Maŋtsɛyeli Sɔɔmɔ lɛ Mli kɛ Agbɛnɛ yɛ Gilead

Yɛ ŋaawoo ni tamɔ nɛkɛ ni anyɛɔ atsuɔ he nii ni jɛ nakai wiemɔi lɛ amli lɛ sɛɛ lɛ, nikaselɔi lɛ gba niiashikpamɔi komɛi ni amɛná he miishɛɛ beni amɛkɛ amɛhe woɔ maŋ shiɛmɔ nitsumɔ lɛ mli yɛ amɛ nyɔji enumɔ nikasemɔ lɛ mli lɛ mli. Yɛ Wallace Liverance, ni ji Gilead Skul lɛ nɔ onukpa ni tsuɔ saji aŋmalamɔ he nii lɛ gbɛtsɔɔmɔ shishi lɛ, nikaselɔi ni gbeɔ nikasemɔ naa lɛ gba bɔ ni amɛkɛ amɛhe etsɔɔ akɛ amɛji Nyɔŋmɔ sɔɔlɔi lɛ. (2 Korintobii 4:2) Amɛnyɛ amɛkanya henilee ni mɛi komɛi yɔɔ ni Nyɔŋmɔ kɛha lɛ. Nikaselɔi lɛ aniiashikpamɔi lɛ tsɔɔ bɔ ni akɛ anɔkwafoi aŋkroaŋkroi ni akɛ amɛ kpe yɛ gbɛjegbɛi anɔ, yɛ shia-kɛ-shia sɔɔmɔ nitsumɔ lɛ mli, kɛ yɛ shihilɛi krokomɛi amli lɛ je Biblia mli nikasemɔi ashishi. Yɛ bei krokomɛi amli lɛ, gbɔmɛi ni yɔɔ wiemɔ lɛ he miishɛɛ lɛ kɛɛ akɛ Yehowa gbɛjianɔtoo lɛ Biblia kasemɔ he woji lɛ hiɛ anɔkwale lɛ. Shiatsɛ ko kpɛlɛ Biblia lɛ mli sane kuku ko nɔ yɛ gbɛ ni ja jogbaŋŋ nɔ. Amrɔ nɛɛ ekɛ Yehowa Odasefoi miikase Biblia lɛ.

No sɛɛ lɛ, Joel Adams bibii mɛi ni gbe Gilead nikasemɔ naa yɛ afii ni eho lɛ amli lɛ saji. Esaneyitso lɛ ji “Kaakpa Nikasemɔ, Kaakpa Yehowa Sɔɔmɔ.” Mɛi ni abibii amɛ saji lɛ hiɛ ŋaawoo ni sa yɛ be naa kɛha maŋsɛɛ sanekpakpa shiɛlɔi heei lɛ. Beni Harry Johnson kaiɔ gbii ni eho beni eji Gilead klas ni ji 26 lɛ mlinyo lɛ, ekɛɛ akɛ: “Atsɔɔ wɔ akɛ Yehowa enyiɛ ewebii ahiɛ daa ni ebaanyiɛ ewebii lɛ ahiɛ. Nakai hekɛnɔfɔɔ lɛ efee hewalɛwoo nɔ̃ yɛ afii ni eho lɛ amli.” William Nonkes, ni ji Gilead klas ni ji 53 lɛ mlinyo lɛ wo nikaselɔi ni egbe nikasemɔ naa lɛ ŋaa akɛ: “Nɔ ni fe fɛɛ lɛ, nyɛhaa Biblia mli shishitoo mlai ahia nyɛjwɛŋmɔi amli, ni nyɛkɛtsu yiŋkpɛi fɛɛ ni ebaabi ni nyɛfee lɛ ahe nii yɛ shihilɛ mli amrɔ nɛɛ kɛ daa. Nɔ ni baajɛ mli kɛba ji akɛ, nyɛbaanyɛ nyɛkpɛtɛ nyɛnitsumɔ lɛ he, ni Yehowa jɔɔmɔ babaoo lɛ kɛ nyɛ baahi shi.”

Wiemɔ ni Richard Rian ehala ákɛ egbɛfaŋnɔ yɛ gbɛjianɔtoo lɛ mli lɛ ji “Awo Amɛ Hewalɛ Koni Amɛfee Yehowa Suɔmɔnaa Nii.” Mɛi ni ebibii amɛ saji lɛ ateŋ mɔ kome ji John Kurtz, mɔ ni gbe klas ni ji 30 nikasemɔ lɛ naa, ni ekɛ nɔ ni fe afii 41 etsu nii yɛ Spain akɛ maŋsɛɛ sanekpakpa shiɛlɔ lɛ. Beni abi Nyɛminuu Kurtz nɔ ni kɔɔ Gilead nikasemɔ he lɛ, ekɛɛ akɛ: “Biblia lɛ ji nikasemɔ wolo titri. Kɛkɛ lɛ agbɛnɛ wɔyɛ Biblia kasemɔ woji koni eye ebua wɔ ni wɔnu Biblia lɛ shishi. Mɔ fɛɛ mɔ nine baanyɛ ashɛ nomɛi anɔ. Akɛ teemɔŋ sane haaa yɛ Gilead. Mikpaaa enɛ he wiemɔ ejaakɛ mɔ fɛɛ mɔ nine shɛɔ sane ni akɛhaa yɛ Gilead lɛ nɔ amrɔ nɔŋŋ.”

Nyɛminuu Gerrit Lösch, ni ji Yehowa Odasefoi a-Nɔyeli Kuu lɛ mlinyo lɛ, mu mumɔŋ gbɛjianɔtoo lɛ naa kɛtsɔ saneyitso ni ji “Yɛ Yehowa Fiji Anɔ kɛ Eshishi” lɛ ni ewie he lɛ nɔ. Etsɔɔ bɔ ni afee hebuu kɛ sɛɛfimɔ ni Nyɔŋmɔ kɛhaa etsuji anɔkwafoi lɛ he mfoniri yɛ Biblia lɛ mli kɛtsɔ okropɔŋ fiji lɛ nɔ. (5 Mose 32:11, 12; Lala 91:4) Bei komɛi lɛ okropɔŋ ni eda lɛ gbɛɔ efijiaŋ ŋmɛlɛtswai abɔ bɔni afee ni ekɛbu eshwiei ahe. Bei komɛi lɛ ekolɛ okropɔŋ nyɛ ko kɛ efiji baahà eshwiei lɛ anɔ kɛkpele koni ekɛbu amɛhe kɛjɛ kɔɔyɔɔ ni mli ejɔ ŋanii lɛ he. Nakai nɔŋŋ yɛ nɔ ni kɛ Yehowa yiŋtoo kpãa gbee lɛ naa lɛ, Yehowa baanyɛ ebaye ebua enɔkwa tsuji, titri lɛ be mli ni amɛkɛ mumɔŋ kaai kpeɔ lɛ. Yehowa eŋmɛɛɛ gbɛ koni aka etsuji fe bɔ ni amɛaanyɛ, shi moŋ ejeɔ gbɛ ko ehaa amɛ koni amɛje mli, koni amɛnyɛ mli amɛmɔ. (1 Korintobii 10:13) Nyɛminuu Lösch kɛ ewiemɔ lɛ ba naagbee akɛ: “Bɔni afee ni wɔkã he wɔná mumɔŋ hebuu lɛ, esa akɛ wɔkã he wɔhi Yehowa fiji ashishi. Enɛ tsɔɔ akɛ esaaa akɛ wɔnáa heyeli mumɔ. Nyɛhaa wɔkpɛtɛa Yehowa kɛ egbɛjianɔtoo ni tamɔ nyɛ ko lɛ he kpaakpa, wɔkatsi wɔhe kɛmiijɛ amɛ gbɛtsɔɔmɔ kɛ ŋaawoo ni suɔmɔ yɔɔ mli lɛ he.”

Sɛinɔtalɔ lɛ kane tɛligram kɛ ŋamɔi ni jɛ mɛi ni sumɔɔ amɛsane yɛ je lɛŋ fɛɛ lɛ aŋɔɔ. Kɛkɛ ni be shɛ kɛha yijiemɔ woji kɛhamɔ. Beni ato Gilead Skul lɛ shishi lɛ, no mli lɛ yiŋtoo ni ahiɛ kɛkɛ ji akɛ aná klas srɔtoi ni faaa yɛ afii enumɔ mli. Shi nɔ ni shɛɔ afii 58 nɛ lɛ Yehowa Nyɔŋmɔ eha skul lɛ kã he eeya nɔ. Taakɛ Nyɛminuu Barber wie yɛ ehiɛkpamɔ wiemɔ lɛ mli lɛ: “Mɛɛ nibii ni yɔɔ miishɛɛ waa diɛŋtsɛ ji nɔ ni aŋmala ashwie shi po nɛ yɛ nɔ ni mɛi ni egbe Gilead nikasemɔ naa lɛ etsu he nii lɛ he kɛjɛ afi 1943 beni aje Gilead shishi lɛ! Nɔ ni ejɛ amɛmɔdɛŋbɔɔ lɛ mli kɛba ji shikpɔŋ lɛ nɔ heshibalɔi akpei ohai abɔ ni amɛkɛbafata Yehowa gbɛjianɔtoo ni yɔɔ nyam lɛ he diɛŋtsɛ.” Hɛɛ, nɛkɛ maŋsɛɛ sanekpakpa shiɛlɔi nɛɛ eye ebua mɛi akpekpei abɔ ni amɛkɛ Maŋtsɛyeli hiɛnɔkamɔ lɛ miiná miishɛɛ.

[Akrabatsa ni yɔɔ baafa 24]

KLASBII LƐ AHE SAJI

Maji srɔtoi anɔ ni amɛjɛ kɛba: 8

Maji srɔtoi ni aha amɛ nitsumɔ yɛ mli: 18

Nikaselɔi lɛ ayifalɛ: 48

Afii abɔ ni amɛye lɛ mlijaa: 34

Afii abɔ ni amɛkɛhi anɔkwale lɛ mli lɛ mlijaa: 18

Afii abɔ ni amɛkɛsɔmɔ kɛ amɛbe fɛɛ mlijaa: 13

[Mfoniri ni yɔɔ baafa 25]

Buu-Mɔɔ Biblia Gilead Skul Klasbii ni Ji 110 ni Gbe Nikasemɔ Naa

Gbɛi ni yɔɔ shishigbɛ lɛ miitsɔɔ bɔ ni amɛdamɔ shi lɛ mli, kɛjɛ hiɛ kɛyaa sɛɛgbɛ, ni amɛgbɛi lɛ jeɔ shishi kɛjɛɔ abɛku kɛyaa ninejurɔgbɛ.

(1) Vacek, E.; Madelin, L.; Evans, G.; Watanabe, K. (2) Trafford, P.; Turfa, J.; Wilson, P.; Williams, R.; Weber, A. (3) Johnson, T.; Hanau, K.; Mourlhou, F.; Charpentier, F.; Peckham, R.; Androsoff, P. (4) Seegers, T.; Seegers, D.; Bailey, P.; Bailey, M.; Madelin, K.; Lippold, E.; Lippold, T. (5) Evans, N.; Gold, R.; Bollmann, I.; Vacek, R.; Oundjian, J.; Wilson, N. (6) Turfa, J.; Zuidema, L.; Zuidema, R.; Bengtsson, C.; Bengtsson, J.; Galano, M.; Galano, L. (7) Peckham, T.; Mourlhou, J.; Charpentier, C.; Gold, M.; Bollmann, R.; Oundjian, F. (8) Weber, R.; Johnson, B.; Hanau, D.; Watanabe, Y.; Williams, R.; Trafford, G.; Androsoff, T.