Sea Gososo cu e Speransa di Reino!

DIA 10 di mart 2001, un ocasion gososo a trece 5.784 persona huntu den tres compleho cu e famia grandi di Betel ta usa den estado di New York. E ocasion tabata e graduacion di e di 110 klas dje scol di misionero Galad.

Carey Barber, miembro dje Cuerpo Gobernante di Testigonan di Jehova, a yama tur hende bon biní i a inaugurá e programa, bisando: “Nos ta contentu di sa cu te cu awor 110 klas di studiante di Galad a ser entrená como misionero i asigná na teritorionan rond mundu.”

Con pa Keda Gososo

Despues dje introduccion di ruman Barber, Don Adams a papia cu e auditorio, incluso e 48 graduadonan, riba e tema “E Bendicion di Jehova Ta Haci Nos Ricu.” Basando su discurso riba Proverbionan 10:22, el a recordá e auditorio cu Jehova ta apoyá i bendicioná su sirbidónan ora nan ta pone interesnan di Reino na promé lugá den nan bida. El a animá e studiantenan pa aceptá nan asignacion nobo cu e mésun buena gana cu apostel Pablo a desplegá ora el a haña invitacion pa “pasa pa Macedonia i yuda.” (Echonan 16:9) Pablo su buena gana pa predicá caminda el a ser mandá a resultá den hopi bendicion gososo, apesar di obstáculonan cu e mester a vence einan.

E graduadonan di e klas a caba cu nan cincu luna di estudio di Bijbel i di entrenamentu como preparacion p’e trabou di misionero. Tog Daniel Sydlik, miembro dje Cuerpo Gobernante di Testigonan di Jehova, a animá nan pa sigui siña. Papiando riba e tema “Sea Berdadero Disipel,” el a remarcá: “Ser disipel ta nificá obedecé Jesus su palabranan constantemente. E ta encerá nos buena gana pa semper scucha su palabranan, su mensahe i su siñansa.” El a indicá cu disipel di Cristo no ta tuma decision sin scucha bos di e Maestro; sabiduria divino ta un parti dje bida di Cristo. (Colosensenan 2:3) Ya cu ningun di nos no por tende e palabranan di Jesus un biaha so i concluí cu nos sa tur cos di dje, ruman Sydlik a animá e graduadonan pa sigui siña e berdad cristian cu lo resultá den libertad, i tambe aplik’é i siñ’é na otro hende.—Juan 8:31, 32.

Pa keda cu goso den e sirbishi di Dios, un persona mester ta dispuesto pa aceptá disiplina i coreccion. E instructor di Galad, Lawrence Bowen, a lansa e pregunta: “Boso Nirnan Lo Corigí Boso?” El a mustra cu Bijbel ta asociá nir figurativo cu e pensamentu i emocionnan di mas profundo di un persona. Nan por sirbi pa corigí un persona si conseho inspirá for di e Palabra di Dios a penetrá den e partinan mas profundo di su personalidad. (Salmo 16:7; Jeremías 17:10) Un curso di bida fiel di un hende por tin asta un efecto profundo riba Jehova. Despues di a lesa Proverbionan  23:15 i 16, e orador a puntra: “Boso nirnan lo corigí boso?” El a agregá: “Nos ta haci oracion pa esei ta e caso, i asina boso lo laga Jehova sinti un goso interno masha profundo. Boso lo conmové su emocionnan di mas profundo. Sí, ora boso pega lealmente na boso asignacion, boso lo haci e nirnan di Dios hubilá.”

E discurso final di e sesion aki di e programa tabata na encargo di Mark Noumair, kende a sirbi como misionero na Kenya promé cu el a bira instructor na Galad. Su discurso cu e título “Mihó Ta Loke Wowo Ta Mira,” a enfatisá e importancia di cultivá contentamentu. Na armonia cu Eclesiástes 6:9, ruman Noumair a recomendá: “Aceptá realidad. Esei ta nificá ‘loke wowo ta mira.’ En bes di sinta fantaseer riba algu cu bo kier haci pero cu bo no ta haciendo, concentrá riba e manera cu bo por saca lo máximo for di bo circunstancianan actual. Biba den un mundu di fantasia, dor di carga expectativanan irazonabel of pensa riba e factornan negativo di bo asignacion, solamente lo pone bo bira insatisfecho i malcontentu.” Sí, sin importá unda nos ta of den ki circunstancia, cultivando den nos propio circunstancianan un contentamentu basá riba nos relacion cu Dios ta traha lugá pa un spiritu gososo den sirbi nos Magnífico Creador.

Experencianan Gososo den Sirbishi di Reino i na Galad

Despues di e consehonan práctico via e discursonan ei, e studiantenan a relatá algun  experencia cu nan a disfrutá di dje den e ministerio público durante nan curso di cincu luna. Bou di direccion di Wallace Liverance, secretario dje Scol di Galad, e graduadonan a conta con nan a recomendá nan mes como ministernan di Dios. (2 Corintionan 4:2) Cerca algun persona nan por a apelá n’e concenshi cu Dios a duna hende. E experencianan di e studiantenan a mustra con nan a cuminsá studio di Bijbel cu personanan sincero cu nan a topa riba caya, den e ministerio di cas pa cas i den otro circunstancia. Na vários ocasion hende interesá a bisa cu e publicacionnan basá riba Bijbel di e organisacion di Jehova tin e zonido di berdad. Un doño di cas a reaccioná masha positivo riba un versículo di Bijbel en particular. Awor e ta studiando Bijbel cu Testigonan di Jehova.

Despues, Joel Adams a entrevistá graduadonan di Galad di klasnan anterior. Su tema tabata “Nunca Stop di Siña, Nunca Stop di Sirbi Jehova.” Esnan cu a ser entrevistá tabatin conseho oportuno pa e misioneronan nobo. Recordando e tempu cu e tabata miembro dje di 26 klas di Galad, Harry Johnson a bisa: “Nos a ser siñá cu Jehova semper a guia su pueblo i cu lo e sigui guia su pueblo. E siguransa ei a sirbi como un animacion atrabes di añanan.” William Nonkes, un miembro dje di 53 klas di Galad, a consehá e graduadonan: “E cos di mas importante ta pa keda corda principionan bíblico i aplicá nan den tur decision cu boso mester tuma den boso bida awor i pa semper. Esei lo pone boso pega na boso asignacion, i Jehova su bendicion ricu lo ta cu boso.”

“Fortificá pa Cumpli cu Jehova Su Boluntad” tabata e tema cu Richard Rian a scoge pa su parti riba e programa. Un ruman cu el a entrevistá tabata John Kurtz, un graduado dje di 30 klas, kende a traha mas cu 41 aña como misionero na Spaña. Ora a puntr’é tocante e programa di scol di Galad, ruman Kurtz a declará: “E buki di instruccion principal ta Bijbel. Huntu cu esei nos tin yudansanan pa studia Bijbel pa yuda nos comprendé Bijbel. Nan ta disponibel pa tur hende. No ta ningun informacion secreto ta ser duná na Galad. Nunca mi no ta cansa di enfatisá esaki, pasobra tur Testigo tin e informacion cu ta ser tratá na Galad, directamente na nan disposicion.”

Ruman Gerrit Lösch, miembro dje Cuerpo Gobernante di Testigonan di Jehova, a cera e programa spiritual cu e tema “Riba i Bou di e Alanan di Jehova.” El a splica con Bijbel ta usa e alanan di águila pa ilustrá e manera cu Jehova ta protehá i apoyá su fiel sirbidónan. (Deuteronomio 32:11, 12; Salmo 91:4) Tin bes e águila adulto ta span su alanan pa oranan largu pa protehá su yunan. De bes en cuando, un mama águila por asta pone su alanan rond di su yunan pa protehá nan contra bientu friu. Den un manera similar i na armonia cu su propósito, Jehova por sali na yudansa di su fiel sirbidónan, specialmente ora nan ta enfrentá pruebanan relacioná cu nan spiritualidad. Jehova no ta permití su sirbidónan ser tentá mas ayá di loke nan por soportá, pero e ta percurá tambe p’e salida pa nan por want’é. (1 Corintionan 10:13) Ruman Lösch a concluí bisando: “Pa keda spiritualmente protehá, nos tin cu keda bou dje alanan di Jehova. Esaki ta nificá cu nos no mester desaroyá un spiritu di independencia. Laga nos semper keda cerca di Jehova i su organisacion manera mama, sin separá nos mes for di nan guia i conseho amoroso.”

E presidente a lesa telegram i saludonan di rumannan rond mundu cu a deseá e graduadonan tur cos bon. Despues a parti diploma. Ora cu a establecé e Scol di Galad, e rumannan a pensa di tene solamente un cantidad limitá di klas durante un periodo di cincu aña. Pero Jehova Dios a laga e scol aki sigui funcioná pa 58 aña largu. Manera ruman Barber a bisa den su introduccion: “Esta un registro realmente maraviyoso e graduadonan di Galad a edificá desde 1943, ora cu Galad a ser inaugurá! Nan esfuersonan combiná tabatin como resultado cu literalmente cientos di miles di hende mansu riba tera a ser agregá n’e glorioso organisacion terenal di Jehova.” Sí, e scol di misionero aki a contribuí n’e echo cu miyones di hende ta gososo cu e speransa di Reino.

[Kuadro na página 24]

ESTADÍSTICANAN DJE KLAS

Cantidad di pais representá: 8

Cantidad di pais na cua a asigná nan: 18

Cantidad di alumno: 48

Edad promedio: 34

Promedio di aña den e berdad: 18

Promedio di aña den e ministerio di tempu completo: 13

[Plachi na página 25]

E di 110 Klas di Graduadonan dje Scol Bíblico di Galad di Watchtower

Den e lista aki bou, e rijnan ta numerá di dilanti bai patras, i e nombernan ta bai di robes pa drechi den cada rij.

(1) Vacek, E.; Madelin, L.; Evans, G.; Watanabe, K. (2) Trafford, P.; Turfa, J.; Wilson, P.; Williams, R.; Weber, A. (3) Johnson, T.; Hanau, K.; Mourlhou, F.; Charpentier, F.; Peckham, R.; Androsoff, P. (4) Seegers, T.; Seegers, D.; Bailey, P.; Bailey, M.; Madelin, K.; Lippold, E.; Lippold, T. (5) Evans, N.; Gold, R.; Bollmann, I.; Vacek, R.; Oundjian, J.; Wilson, N. (6) Turfa, J.; Zuidema, L.; Zuidema, R.; Bengtsson, C.; Bengtsson, J.; Galano, M.; Galano, L. (7) Peckham, T.; Mourlhou, J.; Charpentier, C.; Gold, M.; Bollmann, R.; Oundjian, F. (8) Weber, R.; Johnson, B.; Hanau, D.; Watanabe, Y.; Williams, R.; Trafford, G.; Androsoff, T.