Tumindog na Lubos Asin May Marigon na Kombiksion

Pagtabang sa mga Hoben Paagi sa Napapanahon na Instruksion

SI Epafras sarong Kristiano kan enot na siglo na nagbiahe pasiring sa Roma. Minsan siring, may marahay na dahelan na nasa isip nia pirme an Colosas, sarong siudad sa Asia Minor. Ihinulit nia an maogmang bareta duman asin daing dudang natabangan an nagkapirang taga Colosas na magin disipulo ni Jesu-Cristo. (Colosas 1:7) Si Epafras biyong nahahadit manongod sa mga kapagtubod sa Colosas, huli ta hale sa Roma si apostol Pablo nagsurat sa sainda: “Si Epafras . . . nagpapaabot sa saindo kan saiyang mga pangungumusta, na danay na nagmamaigot para sa saindo sa saiyang mga pamibi, tangani na sa katapustapusi kamo makatindog na lubos asin may marigon na kombiksion sa gabos na kabotan nin Dios.”​—Colosas 4:12.

Siring man, an Kristianong mga ama asin ina sa presenteng panahon odok na namimibi para sa espirituwal na ikararahay kan saindang mga aki. An mga magurang na ini nagmamaigot na itadom sa puso kan saindang hoben na mga aki an pagkamoot sa Dios tangani na sinda magin marigon sa pagtubod.

Dakol na Kristianong hoben an naghagad nin tabang sa pagresolber sa mga problema na inaatubang ninda sa eskuelahan asin sa iba pang lugar. An sarong 15 anyos na daragita nagsabi: “An samong mga problema naggagrabe. An buhay nakatatakot na marhay. Kaipuhan mi nin tabang!” Nasimbag daw an mga kahagadan kan siring na mga hoben asin an mga pamibi kan diosnon na mga magurang? Iyo! An instruksion na basado sa Biblia itinao paagi sa “fiel asin may diskresion na oripon.” (Mateo 24:45) Sinasambit sa artikulong ini an nagkapirang literatura na nakatabang sa ginatos na ribong hoben tanganing “makatindog na lubos asin may marigon na kombiksion.” Estudyaran niato an pira sana sa mga publikasyon na ini.

“Uya . . . 15,000 na Bagong Saksi!”

Kan Agosto 1941, 115,000 na nag-atender an nagtiripon sa St. Louis, Missouri, E.U.A., para sa pinakadakulang kombension kan Mga Saksi ni Jehova na ginibo sagkod sa panahon na idto. Sa huring aldaw kaiyan​—“Aldaw kan mga Aki”​—mga 15,000 na aki na nagtutukaw harani sa plataporma an atentong nagdangog mantang si Joseph F. Rutherford nagpahayag sa temang “Children of the King” (sa Bicol, “Mga Aki kan Hade”). Sa pagtatapos kan saiyang pahayag, an 71 anyos na si Rutherford nagsabi sa garo sa amang tono:

“Gabos kamong . . . mga aki na uminoyon . . . na sumunod sa Dios asin sa saiyang Hade, tumindog tabi.” An mga aki tuminindog na garo sarong grupo. “Uya,” an kagsing ni Tugang na Rutherford, “labing 15,000 na bagong saksi kan Kahadean!” Nagkaigwa nin biglang pag-urupakan. Idinugang kan ispiker: “Gabos kamo na magibo kan makakaya nindo tanganing isabi sa iba an manongod sa kahadean nin Dios . . . , tabi magsabi nin Iyo.” An mga aki suminimbag nin makosog na “Iyo!” Dangan ipinaheling nia an bagong libro na Children, na inako paagi sa halawig na pag-urupakan.

Pakatapos kan nakapupukaw sa boot na pahayag na ini, sarong halabang linya nin mga hoben an nagsakat sa plataporma, kun saen itinao sa sainda ni Tugang na Rutherford an sarong regalong kopya kan bagong libro. Napaluha an mga nag-atender sa naheling nindang eksena. Nagsabi an sarong nakaheling mismo kan pangyayari: “Saro na mayong pagmate an solamenteng dai mapupukaw an puso sa pakaheling sa mga hoben [na nagpapaheling] nin biyong pagsarig asin pagtubod sa saindang Dios, si Jehova.”

Sa dai malilingawan na asambleang iyan, 1,300 na hoben an nabautismohan bilang simbolo kan saindang pagdusay ki Jehova. Dakol sa sainda an nagdanay na marigon sa pagtubod sagkod sa mismong aldaw na ini. Sinda nagsusuportar sa lokal na mga kongregasyon, mga boluntaryo sa Bethel, o naglilingkod bilang mga misyonero sa ibang mga nasyon. Tunay nanggad, an “Aldaw nin mga Aki” asin an librong Children nagwalat nin nagdadanay na impresyon sa puso nin dakol na hoben!

“Iyan Garo Baga Minaabot sa Tama Nanggad na Panahon”

Kaidtong mga taon nin 1970, nagpublikar an Mga Saksi ni Jehova nin tolo pang libro na nakapahiro sa puso kan ginatos na ribong hoben. Ini an Paghinanyog sa Dakulang Paratokdo, Your Youth​​—Getting the Best out of It, asin My Book of Bible Stories. Kan 1982 an serye kan “Young People Ask . . .” nagpoon na lumuwas sa magasin na Awake! Natudok kan mga artikulong ini  an puso kan mga hoben asin gurang. “Barobanggi nagpapasalamat ako sa Dios sa pagpublikar kaiyan,” sabi nin sarong 14 anyos. “Gustong-gusto ko an mga artikulo,” sabi nin sarong 13 anyos, “iyan garo baga minaabot sa tama nanggad na panahon.” An mga magurang asin an nombradong Kristianong kamagurangan minaoyon na an mga artikulong ini talagang napapanahon asin kapakipakinabang.

Pag-abot nin 1989 mga 200 na artikulo nin “Young People Ask . . .” an nagluwas na sa Awake! Sa “Diosnon na Debosyon” na Pandistritong Kombension kan taon na iyan, ilinuwas an librong Questions Young People Ask​​—Answers That Work. Natabangan daw kaiyan an mga hoben na magdanay na marigon sa pagtubod? Tolong hoben an nagsurat: “An librong ini marahayon na kayamanan sa samo sa pagsabot sa samong mga problema asin sa pag-aram kun paano ini aatubangon. Salamat sa pagmalasakit nindo sa samong ikararahay.” Kadakol na hoben na parabasa sa bilog na kinaban an minaoyon.

“Pinanigoan Kaiyan an Samong Pagkagutom”

Kan 1999, an Mga Saksi ni Jehova nagprodusir nin saro pang napapanahon na paagi nin instruksion para sa mga hoben​—an video na Young People Ask​​—How Can I Make Real Friends? Iyan nakapukaw nin entusiastikong reaksion. “An video na ini nakatudok nin biyo sa sakong puso,” sabi nin sarong 14 anyos. “Ini magigin regular na kabtang kan samong espirituwal na pagkakan,” sabi nin sarong nagsosolong ina. “Nakaoogmang maaraman na an satong pinakadayupot na Katood, si Jehova, totoong namomoot asin nagmamakolog sa mga hoben sa saiyang pambilog na kinaban na organisasyon,” sabi nin sarong hoben na babae.

Ano an nagibo kan video? An mga hoben nagsasabi: “Natabangan ako kaiyan na magmaan sa sakong kairiba, na humiwas sa kongregasyon, asin gibohon si Jehova na sakong katood.” “Natabangan ako kaiyan na manindogan sa sakong mga kairiba.” “Pinarigon ako kaiyan sa sakong determinasyon na maglingkod ki Jehova sa pinakamakakaya ko.” Asin sarong mag-agom an nagsurat: “Odok kaming nagpapasalamat saindo sa pagtao samo kan ‘kakanon’ na ini. Pinanigoan kaiyan an samong pagkagutom.”

Inootob an itinao nin Dios na sugo, an linahidan na “fiel asin may diskresion na oripon” nagtatao nin napapanahon na espirituwal na kakanon para sa gabos na maako kaiyan. Asin kanigoan an kagayagayahan na maheling kun gurano kanakatatabang sa mga hoben ngonyan an siring na sono sa Kasuratan na instruksion tanganing “makatindog na lubos asin may marigon na kombiksion sa gabos na kabotan nin Dios”!