Stanap Strong Olsem Bigman Mo Bilif Fulwan

Givim Nambawan Advaes Blong Halpem Ol Yangfala

EPAFRAS i wan Kristin long faswan handred yia we i wokbaot i go long Rom. Oltaem hem i stap tingtingbak long wan taon blong Esia Maena, hemia Kolosi. ?From wanem? Hem i bin prij long ples ya mo hem i bin givhan long sam man Kolosi blong oli kam disaepol blong Jisas Kraes. (Kolosi 1:7) Epafras i wari from ol Kristin brata blong hem long Kolosi. Taswe taem aposol Pol, we i stap long Rom, i raetem wan leta i go long olgeta long Kolosi, hem i talem se: “Epafras ya we hem tu i wan man blong yufala, hem tu i talem halo long yufala. Hem i wan man blong wok blong Jisas Kraes, we oltaem hem i stap prea strong from yufala. Hem i stap askem long God, blong bambae yufala i stanap strong long bilif blong yufala, [“stanap strong olsem bigman mo bilif fulwan,” NW ] we yufala i kasemgud fasin blong Masta blong yumi mo yufala i savegud hem, mo we bambae yufala i strong blong mekem olgeta samting we God i wantem.”—Kolosi 4:12.

Sem mak tede, ol Kristin papa mama oli prea from ol pikinini blong olgeta blong bambae oli save stanap strong long bilif. Oli traehad blong givhan long ol pikinini blong olgeta blong oli laekem tumas Jeova, olsem nao, bambae oli kam strong moa long bilif.

Plante yangfala Kristin oli askem narafala blong givhan long olgeta, blong winim ol traem we oli kasem long skul mo long ol narafala ples. Wan gel we i gat 15 yia i talem se: “Ol problem blong mifala i stap kam plante tumas. Mifala i fraet. !Mifala i nidim help!” ?Olsem wanem? ?Prea blong ol papa mama i gat ansa blong hem? ?Ol yangfala ya oli kasem samting we oli nidim? !Yes! “Slef we i stret mo waes” i givim ol nambawan advaes blong Baebol blong givhan long olgeta. (Matiu 24:45, NW ) Long ples ya, i gat pija blong sam buk we oli bin givhan long plante taosen yangfala blong ‘stanap strong olsem bigman mo bilif fulwan.’ I gud yumi luk sam long ol buk ya.

“!Yufala i Luk . . . 15,000 Niufala Witnes!”

Long Ogis 1941, wan bigfala grup blong 115,000 man oli joen wanples long St. Louis, Missouri, Amerika, long wan bigfala asembli blong ol Witnes blong Jeova. Asembli ya i bigwan moa i bitim ol narafala asembli bifo long taem ya. Laswan dei blong hem, hem i “Dei Blong Ol Pikinini.” I gat samwe long 15,000 pikinini we oli sidaon long fored blong platfom, mo oli lesin long wan tok we Joseph F. Rutherford i givim. Nem blong tok ya se: “Ol Pikinini Blong King.” Klosap long en blong tok blong hem, Brata Rutherford, we long taem ya i gat 71 yia, i toktok olsem wan papa, i se:

“Yufala . . . ol pikinini we i agri . . . blong obei long God mo King we hem i putumap, plis yufala i stanap.” Ol pikinini ya oli girap evriwan wantaem. Wetem bigfala voes, brata ya i talem se: “Yufala i luk. !I gat moa long 15,000 niufala witnes blong Kingdom!” Olgeta man oli klaphan bigwan. Nao Brata Rutherford i talem se: “Yufala evriwan we i glad blong talemaot Kingdom blong God long narafala, . . . plis yufala i talem yes.” Nao olgeta pikinini ya oli singaot bigwan se “!Yes!” Afta long samting ya, hem i soemaot niufala buk ya we nem blong hem Children, mo evriwan i klaphan bigwan.

Afta long tok ya, wan longfala laen blong ol yangfala oli wokbaot i go long fored blong Brata Rutherford, blong hem i givim niufala buk ya long wanwan blong olgeta. Mo samting ya i mekem wota blong ae i ron long ae blong olgeta we oli stap lukluk. Wan man we i stap long taem ya i talem se: “man we hat blong hem i strong olsem ston, hem nomo i no save krae taem hem i luk ol yangfala ya we oli stap soemaot se oli trastem mo oli gat strongfala bilif long God blong olgeta, Jeova.”

Mo long asembli ya tu i gat, 1,300 yangfala we oli givim laef blong olgeta long Jeova mo oli tekem baptaes. Plante long olgeta ya oli holem strong bilif kam kasem tede. Oli wok blong givhan long ol kongregesen blong olgeta, oli wok long Betel, mo tu, oli misinari long narafala kantri. Yes, “Dei Blong Ol Pikinini” mo niufala buk ya Children i samting we ol pikinini ya oli neva save fogetem.

“I Luk Olsem Se Oli Stap Kam Long Stret Taem”

Afta long yia 1970, ol Witnes blong Jeova oli wokem tri niufala buk we oli tajem hat blong plante taosen yangfala. Olgeta ya i gat, Listening to the Great Teacher, Your Youth—Getting the Best out of It, mo My Book of Bible Stories. Long 1982, oli stat blong putum “Ol Yangfala Oli Askem . . . ” long ol Wekap! Ol haf ya oli tajem hat blong ol yangfala mo ol olfala tu. Wan  gel we i gat 14 yia i talem se: “Evri naet mi talem tangkiu long God we i mekem se oli prentem ol buk ya.” Wan narafala yangfala we i gat 13 yia i talem se: “Mi mi laekem tumas ol haf insaed, i luk olsem se oli stap kam long stret taem nomo.” Ol Kristin elda mo ol papa mama oli agri fulwan se ol haf blong buk ya oli kamaot long stret taem mo oli givhan bigwan.

Long 1989, samwe long 200 haf blong “Ol Yangfala Oli Askem . . . ” oli bin kamaot long Wekap! Ale, long Distrik Asembli ya “Fasgud Long God,” niufala buk ya i kamaot we nem blong hem Questions Young People Ask—Answers That Work. ?Samting ya i givhan long ol yangfala blong stanap strong long bilif? Tri yangfala oli raetem se: “Buk ya i givhan bigwan long mifala blong kasem save long ol problem blong mifala, mo blong stretem olgeta. Tangkiu tumas we yufala i tingbaot mifala.” Plante narafala yangfala raon long wol oli agri long samting ya tu.

“Mifala i No Moa Hanggri”

Long 1999, ol Witnes blong Jeova oli wokem wan narafala samting blong givhan long ol yangfala. Hemia video kaset ya Young People Ask—How Can I Make Real Friends? Samting ya i rili mekem oli haremgud. Wan yangfala we i gat 14 yia i talem se: “Video kaset ya i go stret long hat blong mi.” Wan mama we i stap lukaot long ol pikinini hem wan, i talem se: “Kaset ya i olsem wan kakae we bambae mifala i tekem oltaem blong stap strong long bilif.” Wan yangfala woman i talem se: “I gud tumas blong save olsem wanem fren blong yumi, Jeova, hem i rili laekem mo lukaot gud long ol yangfala mo long kampani blong ol man blong hem raon long wol.”

?Video kaset ya i givhan long wanem saed? Ol yangfala oli talem se: “Hem i givhan long mi blong lukaot gud long ol fren we mi mi joen wetem olgeta, i mekem mi mi traem save moa ol yangfala brata sista long kongregesen, mo tu, i pulum mi blong mekem Jeova i kam olsem beswan fren blong mi.” “Hem i halpem mi blong no folem fasin blong ol fren blong mi.” “Hem i halpem mi blong mekem wok blong Jeova, go kasem mak we mi mi naf blong mekem.” I gat wan narafala man wetem woman blong hem, tufala i talem long saed blong kaset ya se: “Mitufala i tangkiu wetem fulhat blong mitufala from we mitufala i save kasem ol nambawan ‘kakae ya.’ Naoia, mifala i no moa hanggri long saed blong spirit.”

God i givim wok long “slef we i stret mo waes,” blong hem i givim ol gudfala kakae blong Baebol long evriwan we oli wantem. !Yumi glad tumas blong luk olsem wanem ol nambawan advaes ya oli stap givhan long ol yangfala tede blong ‘stanap strong olsem bigman mo bilif fulwan long wil blong God’!