Ẹfọn Ẹma, Ẹnyụn̄ Ẹtịm Ẹfiọk

Ndida Mme Ekemini Ntọt N̄n̄wam Mme Uyen

EPAPHRAS ekedi Christian akpa isua ikie oro akanamde isan̄ aka Rome. Nte ededi, ye eti ntak enye ama aka iso ndikere mban̄a Colossae, obio kiet ke Asia Minor. Enye ama ọkwọrọ eti mbụk do ndien nte eyịghe mîdụhe ama an̄wam ndusụk mbon Colossae ndikabade ndi mme mbet Jesus Christ. (Colossae 1:7) Epaphras ama enen̄ede ekere aban̄a mme ekemmọ andinịm ke akpanikọ ke Colossae, koro apostle Paul ama etie ke Rome ewet n̄wed ọnọ ẹsọk mmọ ete: “Epaphras . . . ete ẹkọm mbufo; enye edi owo emi an̄wanade kpukpru ini ke akam esie oyom ufọn mbufo: man mbufo ẹfọn ẹma, ẹnyụn̄ ẹtịm ẹfiọk ofụri uduak Abasi.”—Colossae 4:12.

Ukem ntre, mme ete ye eka ẹdide Christian mfịn ẹbọn̄ akam ifịk ifịk ẹban̄a mfọnọn̄kpọ eke spirit nditọ mmọ. Mme ete ye eka emi ẹkpep nditọ mmọ ndima Abasi man mmọ ẹkpesọn̄ọ ẹda ke mbuọtidem.

Ediwak uyen Christian ẹmeyom un̄wam ke ndise mban̄a mme n̄kpọ-ata oro mmọ ẹsisobode ke ufọkn̄wed ye ke mme itie en̄wen. N̄kaiferi kiet edide isua 15 ke emana ọkọdọhọ ete: “Mme mfịna nnyịn ẹtetịm ẹkpon. Uwem enen̄ede enyene ndịk. Nnyịn imoyom un̄wam!” Nte ẹbọrọ eben̄e utọ mme uyen oro ye akam mme ete ye eka oro ẹdide mbon oro ẹbakde Abasi? Ih! “Asan̄autom emi anamde akpanikọ, onyụn̄ enyenede ọniọn̄” ọmọnọ mme ntọt oro ẹkọn̄ọde ke Bible. (Matthew 24:45) Se itienede emi edi ndusụk n̄wed oro ẹn̄wamde ediwak tọsịn uyen ke mme itie ikie ‘ndisọn̄ọ nda ye ọkpọsọn̄ mbuọtidem.’ (NW) Ẹyak nnyịn idụn̄ọde ibat ibat ke otu mme n̄wed emi.

‘Sese, Mbufa Ntiense 15,000!’

Ke August 1941, owo 115,000 ẹma ẹsop idem ke St. Louis, Missouri, U.S.A., kaban̄a n̄kponn̄kan mbono eke Mme Ntiense Jehovah oro akanam ẹnịmde tutu esịm ini oro. Ke akpatre usen mbono oro—“Usen Nditọwọn̄”—n̄kpọ nte nditọwọn̄ 15,000 oro ẹketiede ẹkpere mbot utịn̄ikọ ẹma ẹtịm ẹnọ n̄kpan̄utọn̄ nte Joseph F. Rutherford eketịn̄de ikọ ke ibuotikọ oro “Nditọ Edidem.” Ke ekperede utịt utịn̄ikọ esie, Rutherford emi ekedide isua 71 ke emana ama ọdọhọ ke uyo ebietde eke ete, ete:

“Kpukpru mbufo . . . nditọwọn̄ oro ẹnyịmede . . . ndisụk ibuot nnọ Abasi ye Edidem esie, mbọk ẹdaha ẹda.” Nditọ oro ẹma ẹdaha ẹda nte owo kiet. Brọda Rutherford ama ofiori ete: “Sese, se iwakde ibe mbufa ntiense Obio Ubọn̄ 15,000!” Ẹma ẹkwak ubọk ọkpọsọn̄ ọkpọsọn̄. Etịn̄ikọ oro ama adian do ete: “Kpukpru mbufo oro ẹdinamde se mbufo ẹkemede nditịn̄ nnọ mbon en̄wen mban̄a Obio Ubọn̄ Abasi . . . , mbọk ẹdọhọ ih.” Nditọ oro ẹma ẹbọrọ ke ọkpọsọn̄ uyo ẹte, “ih!” Ekem enye ama owụt obufa n̄wed oro Children, emi ẹkemade ebe ke edimia ubọk ke anyan ini.

Ke edemede–owo-udọn̄ utịn̄ikọ emi okụrede, mme uyen oro ẹkedade ke anyan udịm ẹma ẹsan̄a ẹdọk mbot utịn̄ikọ, ndien Brọda Rutherford ama anyan idem obufa n̄wed oro ọnọ mmọ kiet kiet. Edinam emi ama anam mmọn̄eyet asiaha otuowo ke enyịn. Owo kiet oro okokụtde edinam oro ọkọdọhọ ete: “Owo oro enyenede esịt itiat kpọt ke esịt mîkpedemekede ndikụt mme uyen [ẹwụtde] ọyọhọ mbuọtidem ke Abasi mmọ, Jehovah.”

Ke enịm-mbụk mbono oro, uyen 1,300 ẹma ẹna baptism nte idiọn̄ọ uyakidem mmọ nnọ Jehovah. Ediwak mmọ ẹsọn̄ọ ẹda ke mbuọtidem tutu esịm mfịn emi. Mmọ ẹnọ un̄wam ke mme esop n̄kann̄kụk, ẹdi mbonutom unyịmesịt Bethel, mîdịghe ẹnam utom nte mme isụn̄utom ke esenidụt. Ke akpanikọ, “Usen Nditọwọn̄” ye n̄wed Children ẹma ẹnen̄ede ẹtụk esịt ediwak uyen!

“Etie nte Mmọ Ẹsidi ke Ata Nnennen Ini”

Ke mme iduọk isua 1970, Mme Ntiense Jehovah ẹma ẹsio n̄wed ita efen oro ẹketụkde esịt ediwak tọsịn uyen ke mme itie ikie. Mmọ emi ẹkedi Edikpañ Utöñ nö Aqua Andikpep, Uyen Fo—Ndibö se Itimde Ifön Ikan nto Enye, ye N̄wed Mi eke Mme Mbụk Bible. Ke 1982 ẹma ẹtọn̄ọ ndimịn̄ mme udịm udịm  ibuotikọ oro, “Young People Ask . . . ” (N̄kparawa Owo Ẹbụp . . . ) ke magazine Awake! Mme ibuotikọ emi ẹdemede udọn̄ ikpọ ye n̄kpri owo. Uyen kiet edide isua 14 ke emana ọkọdọhọ ete: “Mmesikọm Abasi kpukpru okoneyo ke ndinam ẹwet mmọ.” Uyen edide isua 13 ke emana ekewet ete: “Mmama mme ibuotikọ oro, etie nte mmọ ẹsidi ke ata nnennen ini.” Mme ete ye eka ye mbiowo Christian oro ẹmekde ẹnyịme ẹte ke mme ibuotikọ emi ẹsidi ke ekemini ẹnyụn̄ ẹnyene ufọn.

Etisịm 1989 ẹma ẹmịn̄ n̄kpọ nte ibuotikọ “Young People Ask . . . ” 200 ke Awake! Ke Mbono District “Uten̄e Abasi” eke isua oro, ẹma ẹsio n̄wed oro Mme Mbụme N̄kparawa Owo Ẹbụpde—Mme Ibọrọ Ẹnyenede Ufọn ke Ikọmbakara. Nte enye an̄wam mme uyen ndisọn̄ọ nda ke mbuọtidem? Uyen ita ẹkewet ẹte: “N̄wed emi edi utịbe utịbe inyene oro an̄wamde nnyịn ndifiọk mme mfịna nnyịn ye nte ikpesede iban̄a mmọ. Ẹsọsọn̄ọ ke ndikere mban̄a mfọnọn̄kpọ nnyịn.” Ata ediwak mme andikot ẹdide uyen ke ofụri ererimbot ẹnyịme ye emi.

“Enye Oyụhọ Udọn̄ Nnyịn”

Ke 1999, Mme Ntiense Jehovah ẹma ẹsio orụk ekemini ntọt efen ẹnọ mme uyen—vidio oro Young People Ask—How Can I Make Real Friends? Enye ama edemede udọn̄ mme owo. Uyen kiet edide isua 14 ke emana ọkọdọhọ ete: “Vidio oro ama enen̄ede otụk mi esịt.” Eka oro ọbọkde nditọ ikpọn̄ ọkọdọhọ ete: “Enye edidi ikpehe udia eke spirit nnyịn eke ofụri ini.” N̄kaiferi kiet ọkọdọhọ ete: “Edi n̄kpọ inemesịt ndifiọk nte ke ata Ufan nnyịn, Jehovah, enen̄ede ama onyụn̄ ekere aban̄a mme uyen ke esop esie eke ofụri ererimbot.”

Nso ke vidio emi anam? N̄kparawa owo ẹdọhọ ẹte: “Enye an̄wam mi ndikpeme nsan̄a mi, ndimehe ye kpukpru owo ke esop, ndinyụn̄ nnam Jehovah edi ufan mi.” “Enye an̄wam mi ndisọn̄ọ nda mbiọn̄ọ mme ubọkn̄ka mi.” “Enye anam mi nsọn̄ọ nda ke ubiere mi ndinam n̄kpọ Jehovah ke ofụri ukeme mi.” Ndien ebe ye n̄wan kiet ẹma ẹwet ẹte: “Nnyịn imenen̄ede ikọm mbufo ke ndinọ nnyịn ‘udia’ emi. Enye oyụhọ nnyịn.”

Nte ekemde ye utom emi Abasi ọnọde enye, “asan̄autom emi anamde akpanikọ, onyụn̄ enyenede ọniọn̄” oro ẹyetde aran ọmọnọ kpukpru mbon oro ẹnyịmede udia eke spirit ke edikem ini. Ndien nso n̄kpọ idatesịt ke edi ntem ndikụt nte mme utọ ntọt N̄wed Abasi emi ẹn̄wamde mme uyen mfịn ‘ndifọn mma, nnyụn̄ ntịm mfiọk ofụri uduak Abasi’!