Nyɛkɛ Nɔmimaa ni Mli Wa Adamɔa Shi Shiŋŋ

Nitsɔɔmɔ ni Yɔɔ Ebe Naa ni Akɛyeɔ Abuaa Oblahii kɛ Oblayei

EPAFRA ji klɛŋklɛŋ afii oha lɛ mli Kristofonyo ni fã gbɛ kɛtee Roma. Shi kɛlɛ, yɛ yiŋtoo kpakpa hewɔ lɛ, eesusu Kolose ni ji maŋtiase ni yɔɔ Asia Bibioo lɛ he lolo. Eshiɛ sanekpakpa lɛ yɛ jɛmɛ ni ŋwanejee ko kwraa bɛ he akɛ, eye ebua Kolosebii lɛ ekomɛi ni amɛbatsɔmɔ Yesu Kristo kaselɔi. (Kolosebii 1:7) Epafra miisusu nanemɛi heyelilɔi ni yɔɔ Kolose lɛ ahe waa diɛŋtsɛ, ejaakɛ bɔfo Paulo ŋma amɛ kɛjɛ Roma akɛ: “Epafra . . . ni daa nɛɛ epeleɔ nyɛhe yɛ esɔlemɔi amli, koni yɛ naagbee lɛ nyɛkɛ nɔmimaa ni mli wa adamɔ shi shiŋŋ yɛ Nyɔŋmɔ suɔmɔnaa nii fɛɛ mli lɛ, miibi nyɛ.”—Kolosebii 4:12, NW.

Nakai nɔŋŋ ŋmɛnɛŋmɛnɛ tsɛmɛi kɛ nyɛmɛi Kristofoi sɔleɔ waa diɛŋtsɛ kɛhaa amɛbii lɛ amumɔŋ hilɛ-kɛhamɔ. Nɛkɛ fɔlɔi nɛɛ bɔɔ mɔdɛŋ koni amɛdũ suɔmɔ kɛha Nyɔŋmɔ amɛwo amɛbii bibii lɛ amli bɔni afee ni amɛhe awa yɛ hemɔkɛyeli mli.

Kristofoi oblahii kɛ oblayei babaoo ebi koni aye abua amɛ ni amɛtsu naagbai ni amɛkɛkpeɔ yɛ skul kɛ hei krokomɛi lɛ ahe nii. Gbekɛ yoo ko ni eye afii 15 lɛ kɛɛ akɛ: “Wɔnaagbai lɛ amli miiwo wu. Shihilɛ efee gbeyei waa. Yelikɛbuamɔ he miihia wɔ!” Ani aha oblahii kɛ oblayei ni tamɔ nɛkɛ lɛ anibimɔi kɛ fɔlɔi asɔlemɔi ni damɔ Nyɔŋmɔjamɔ nɔ lɛ ahetoo? Hɛɛ! Akɛ ŋaawoo ni damɔ Biblia nɔ lɛ eha kɛtsɔ “tsulɔ anɔkwafo kɛ nilelɔ” lɛ nɔ. (Mateo 24:45) Nɔ ni anaa yɛ biɛ nɛɛ ji woji ni eye ebua oblahii kɛ oblayei akpei ohai abɔ koni ‘amɛkɛ nɔmimaa ni mli wa adamɔ shi shiŋŋ.’ Nyɛhaa wɔsusua nɛkɛ woji nɛɛ fioo komɛi ahe wɔkwɛa.

“Nyɛkwɛa . . . Odasefoi Heei 15,000!”

Toibolɔi 115,000 kpe yɛ August 1941 yɛ St. Louis yɛ Missouri, U.S.A., kɛha Yehowa Odasefoi akpee wulu ni atee kɛbashi nakai be lɛ mli lɛ mli nɔ ni da fe fɛɛ. Yɛ kpee lɛ naagbee gbi—“Gbekɛbii Agbi”—lɛ aaafee gbekɛbii 15,000 ni tara he ni bɛŋkɛ wiemɔ kpoku lɛ bo toi jogbaŋŋ beni Joseph F. Rutherford wie saneyitso ni ji “Maŋtsɛ lɛ Gbekɛbii” lɛ ahe lɛ. Yɛ Rutherford ni eye afii 71 lɛ wiemɔ lɛ naagbee gbɛ lɛ, efee egbee tamɔ tsɛ, ni ekɛwie akɛ:

“Nyɛ fɛɛ . . . ni ji gbekɛbii ni ekpɛlɛ nɔ . . . akɛ nyɛaabo Nyɔŋmɔ kɛ e-Maŋtsɛ lɛ toi lɛ, nyɛfainɛ nyɛtea shi nyɛdamɔa shi.” Gbekɛbii lɛ te shi amɛdamɔ shi ákɛ kuu kome. Nyɛminuu Rutherford kɛ gbee ni wa wie akɛ: “Nyɛkwɛa Maŋtsɛyeli lɛ he odasefoi heei ni fa fe 15,000!” Atswa dɛ waa diɛŋtsɛ. Wielɔ lɛ kɛfata he akɛ: “Nyɛ fɛɛ ni nyɛbaasumɔ ni nyɛgba mɛi krokomɛi Nyɔŋmɔ maŋtsɛyeli lɛ he sane lɛ . . . , nyɛfainɛ nyɛkɛɛa akɛ Hɛɛ.” Gbekɛbii lɛ kɛ gbee ni mli wa kɛɛ akɛ “Hɛɛ!” Kɛkɛ ni ekɛ wolo hee ni ji Children lɛ tsɔɔ, ni atswa dɛ yɛ he aahu.

Yɛ wiemɔ ni kanyaa mɔ nɛɛ sɛɛ lɛ, oblahii kɛ oblayei ni fa babaoo ni amɛto sɛrɛnɛɛ lɛ yadamɔ wiemɔ kpoku lɛ nɔ, ni Nyɛminuu Rutherford kɛ wolo hee lɛ ekome ke amɛteŋ mɔ fɛɛ mɔ. Shihilɛ lɛ ha yaafonui ba toibolɔi ahiŋmɛiiaŋ. Mɔ ko ni na nifeemɔ lɛ kɛɛ akɛ: “Mɔ pɛ ni nifeemɔ ni tamɔ nɛkɛ ni kɔɔ oblahii kɛ oblayei nɛɛ ahe [ni tsɔɔ] hekɛnɔfɔɔ kɛ hemɔkɛyeli ni mli wa yɛ Yehowa amɛ-Nyɔŋmɔ lɛ mli lɛ tsirɛŋ lɛ ji mɔ ni nyɛɛɛ ejie ehenumɔi akpo.”

Abaptisi oblahii kɛ oblayei 1,300 kɛfee amɛhenɔjɔɔmɔ kɛha Yehowa lɛ he okadi yɛ nakai kpee ni hiɛ kpaŋ nɔ lɛ shishi. Amɛteŋ mɛi babaoo efĩ shi shiŋŋ yɛ hemɔkɛyeli lɛ mli kɛbashi ŋmɛnɛ gbi nɛɛ. Amɛyeɔ amɛbuaa asafoi ni amɛyɔɔ mli lɛ, amɛji Betelbii ni kɛ amɛhe eha, loo amɛmiisɔmɔ ákɛ maŋsɛɛ sanekpakpa shiɛlɔi yɛ maŋsɛɛ shikpɔji anɔ. Lɛɛlɛŋ, “Gbekɛbii Agbi” lɛ kɛ wolo ni ji Children lɛ fee nɔ ko ni oblahii kɛ oblayei babaoo ahiɛ kpaŋ nɔ!

“Etamɔ Nɔ ni Amɛbashɛ Shi yɛ Be Naa Pɛpɛɛpɛ”

Yɛ afi 1970 afii amli lɛ, Yehowa Odasefoi fee woji etɛ hu amɛfata he, ni esa oblahii kɛ oblayei akpei ohai abɔ atsui he. Enɛɛmɛi ji Tsɔɔlɔ Kple lɛ Toiboo, Your Youth—Getting the Best out of It, kɛ Mi-Wolo ni Gbaa Biblia Mli Saji. Aje saji ni tsara nɔ ni ji “Young People Ask . . . ” (Oblahii kɛ Oblayei Biɔ Akɛ) lɛ shishi yɛ Awake! wolo tɛtrɛɛ lɛ mli yɛ afi 1982. Nɛkɛ saji nɛɛ étee gbekɛbii kɛ onukpai amiishɛɛ shi waa diɛŋtsɛ. Mɔ ko ni eye afii 14 lɛ wie akɛ: “Midaa Nyɔŋmɔ  shi daa gbɛkɛ akɛ eha akala.” Mɔ ko ni eye afii 13 lɛ kɛɛ akɛ: “Misumɔɔ saji lɛ waa, etamɔ nɔ ni amɛbashɛ shi yɛ be naa pɛpɛɛpɛ.” Fɔlɔi kɛ Kristofoi onukpai ni ahala amɛ lɛ, ekpɛlɛ nɔ akɛ nɛkɛ saji nɛɛ eba yɛ ebe naa pɛpɛɛpɛ ni amɛhe yɛ sɛɛnamɔ.

Beni shɛɔ afi 1989 lɛ, no mli lɛ “Young People Ask . . . ” lɛ mli saji aaashɛ 200 eje kpo yɛ Awake! lɛ mli. Ajie wolo ni ji Questions Young People Ask—Answers That Work lɛ kpo yɛ “Nyɔŋmɔ-jamɔ Hetuu-kɛhamɔ” Kpokpaa Wulu nɔ Kpee lɛ shishi nakai afi lɛ. Ani eye ebua oblahii kɛ oblayei koni amɛya nɔ ni amɛhe awa waa yɛ hemɔkɛyeli lɛ mli? Oblahii kɛ oblayei etɛ komɛi ŋma akɛ: “Nɛkɛ wolo nɛɛ efee gboshinii ni hi jogbaŋŋ diɛŋtsɛ kɛha wɔ ni wɔkɛaanu wɔnaagbai ashishi kɛ bɔ ni wɔɔfee wɔtsu he nii. Nyɛyiwaladɔŋŋ akɛ nyɛsusuɔ wɔhilɛ-kɛhamɔ he waa.” Nikanelɔi babaoo ni darako ni yɔɔ je lɛŋ he fɛɛ he lɛ kɛ enɛ kpãa gbee.

“Etsu Hɔmɔ ni Yeɔ Wɔ lɛ He Nii”

Yehowa Odasefoi fee nɔ kroko hu ni yɔɔ ebe naa ni tsɔɔ mɔ nii kɛha oblahii kɛ oblayei yɛ afi 1999, ni no ji—vidio ni ji Young People Ask—How Can I Make Real Friends? (Oblahii kɛ Oblayei Biɔ Akɛ—Te Mafee Tɛŋŋ Mabɔ Nanemɛi Kpakpai?) Etée miishɛɛ shi waa diɛŋtsɛ. Mɔ ko ni eye afii 14 lɛ kɛɛ akɛ: “Nɛkɛ vidio nɛɛ bote mitsui mli tɔ̃ɔ.” Yoogbayoo ko ni ewu eshi lɛ kɛɛ akɛ: “Ebaafee wɔmumɔŋ niyenii ni wɔyeɔ daa lɛ fã ko.” Oblayoo ko kɛɛ akɛ: “Eji nɔ ko ni taa mɔ tsuiŋ akɛ wɔɔle akɛ Wɔnaanyo ni hi fe fɛɛ ni ji Yehowa sumɔɔ oblahii kɛ oblayei lɛ ni yɔɔ ejeŋ muu fɛɛ gbɛjianɔtoo lɛ mli lɛ waa diɛŋtsɛ ni esusuɔ amɛhe waa diɛŋtsɛ.”

Mɛni vidio lɛ enyɛ etsu? Oblahii kɛ oblayei kɛɛ akɛ: “Eye ebua mi koni makwɛ minaanyobɔɔ jogbaŋŋ, koni malɛɛ minaanyobɔɔ lɛ mli yɛ asafo lɛ mli, ni maha Yehowa afee minaanyo.” “Eye ebua mi koni mikɛ ekãa ate shi ashi mitipɛŋfoi.” “Ewaje mi jogbaŋŋ yɛ mifai shi ni mitswa akɛ masɔmɔ Yehowa bɔ fɛɛ bɔ ni manyɛ lɛ mli.” Ni gbalashihilɛ mli hefatalɔi komɛi wie akɛ: “Wɔmiijɛ wɔtsuii amli wɔmiida nyɛ shi akɛ nyɛkɛ nɛkɛ ‘niyenii’ nɛɛ eha wɔ. Etsu hɔmɔ ni yeɔ wɔ lɛ he nii.”

Taakɛ eji anɔkwale yɛ nitsumɔ ni Nyɔŋmɔ kɛwo “tsulɔ anɔkwafo kɛ nilelɔ” ní afɔ amɛ mu lɛ dɛŋ lɛ he lɛ, amɛkɛ mumɔŋ niyenii ni yɔɔ ebe naa eha mɛi fɛɛ ni baakpɛlɛ nɔ. Ni kwɛ miishɛɛ ni eji nɛkɛ akɛ aaana bɔ ni Ŋmalɛ naa nitsɔɔmɔ nɛɛ yeɔ ebuaa oblahii kɛ oblayei ŋmɛnɛ koni ‘amɛkɛ nɔmimaa ni mli wa adamɔ shi shiŋŋ yɛ Nyɔŋmɔ suɔmɔnaa nii fɛɛ mli’!