Mu Yeme Ka Ku Tiya Ni Ka Buikolwiso Bo Bu Tezi

Ku Tusa Ba Banca ka Taelo Ya Ka Bunako

EPAFRASI ne li Mukreste wa mwa lilimo za mwanda wa pili ya n’a ile kwa Roma. Nihakulicwalo, ka mabaka a utwahala, n’a zwelapili ku nahana ka za kwa Kolose, ili muleneñi wa mwa Asia Minor. Na s’a kutalize taba ye nde kwa Makolose mi ku si na ku kakanya n’a tusize ba bañwi ba kwateñi ku ba balutiwa ba Jesu Kreste. (Makolose 1:7) Epafrasi n’a iyakatitwe hahulu ka za balumeli ba bañwi mwa Kolose, kakuli muapositola Paulusi n’a ba ñolezi liñolo inz’a li kwa Roma kuli: “Epafrasi . . . wa mi lumelisa . . . u nz’a mi lwanela kamita mwa milapelo, kuli mu yeme mu li ba ba petehile, mi mu ipeye ku feleleza kwa tato kaufela ya Mulimu.”—Makolose 4:12.

Ka ku swana, bondate ni boma ba Bakreste ba cwale ba lapelela bana ba bona ka cisehelo kuli ba be mwa buiketo bwa kwa moya. Bashemi bao ba satalala ku suña lilato la ku lata Mulimu mwa lipilu za bana ba bona kuli ba be ba ba tiile mwa tumelo.

Buñata bwa ba banca ba Sikreste se ba kupile tuso ka mwa ku talimanela ni matata e ba b’a nga ni ona kwa likolo ni ko kuñwi. Kalibe yo muñwi wa lilimo za buhulu ze 15 n’a bulezi kuli: “Matata a luna a sweli ku ba a maswe ni ku fita. Bupilo se bu sabisa hahulu. Lu tokwa tuso!” Kana likupo za ba banca ba ba cwalo ni litapelo za bashemi ba balumeli li alabilwe? Ee! Litaelo ze tomile fa Bibele se li filwe ka “mutanga ya sepahala, ya na ni kutwisiso.” (Mateu 24:45) Mwa taba ye ku taluswa lihatiso ze ñwi ze s’e tusize likiti-kiti za ba banca kuli ba ‘yeme ba li ba ba petehile.’ Ha lu nyakisiseñi ze ñwi za zona lihatiso zeo.

“Mu Bone . . . Lipaki Ze Nca Z’e 15,000!”

Mwa August 1941, baputehi ba ba fita fa 115,000 ne ba kopani mwa St. Louis, Missouri, mwa U.S.A., kwa mukopano o mutuna ka ku fitisisa wa Lipaki za Jehova o ne u kile wa eziwa haisali. Ka lizazi la ona la mafelelezo—“Lizazi la Banana”—banana ba ba fita fa 15,000 be ne ba inzi bukaufi ni libulelelo ne ba teelelize ka ku tala ku Joseph F. Rutherford ha n’a nze a bulela ka za taba ye li “Children of the King” (Bana ba Mulena). Bukaufi ni mafelelezo a ngambolo ya hae, Rutherford ya n’a li wa lilimo za buhulu ze 71 a bulela ka linzwi la bushemi kuli:

“Kaufel’a mina . . . banana ba ba lumezi . . . ku ipeya ku utwa Mulimu ni Mulena wa hae, shangwe mu yeme.” Banana ba yema ka nako ye swana. Muzwale Rutherford a huweleza a li, “Mu bone lipaki za Mubuso ze nca ze fita fa 15,000!” Ne ku bile ni ku kwashela ko kutuna. Mubuleli a ekeza kuli: “Mina kaufela ba ba ka lika mo mu konela kaufela ku taluseza ba bañwi ka za Mubuso wa Mulimu, shangwe mu bulele kuli Ee.” Banana ba alaba ka ku huweleza kuli “Ee!” Kacwalo a bonisa buka ye nca ye li Children, ili ye n’e amuhezwi ka ku kwashelelwa ka nako ye telele.

Hamulaho wa ngambolo ye nyangumuna yeo, munyololo o mutelele wa banana wa zamaya ku liba kwa libulelelo ili ko Muzwale Rotherford n’a ba fezi mpo ya kopi ya buka ye nca yeo. Kezahalo yeo ne i tahiselize baputehi ku lotisa miyoko. Yo muñwi ya n’a boni kezahalo yeo n’a ize: “Konji wa pilu ye omelezi ki yena ya n’a si ke a nyangumunwa ki ku bona ba banca [ha ba bonisa] sepo ye tezi ni tumelo ku Mulimu wa bona, Jehova.”

Kwa mukopano o sa libalwi w’o, ba banca ba ba fita fa 1,300 ne ba kolobelizwe ka ku ba sisupo sa buineelo bwa bona ku Jehova. Buñata bwa bona ba zwezipili ku ba ba ba tiile mwa tumelo ku to fita ni kacenu le. Ba tusa liputeho za mwa libaka za bona, ba itatela ku sebeleza fa Betele, kamba ku sebeza sina balumiwa mwa linaha li sili. Luli “Lizazi la Banana” ni buka ya Children ne li bile ni susuezo ye tuna kwa lipilu za ba banca ba bañata!

“Li Bonahala Ku Ba ze Tahanga ka Nako ye Swanela Luli”

Mwa ma-1970, Lipaki za Jehova ne ba hatisize libuka ze ñwi ze talu ze ne susuelize likiti-kiti za ba banca. Libuka zeo ne li Ku Teeleza ku Muluti Yo Mutuna, Bunca Bwa Hao Ku Fumana ku Bona Bunde bo bu Fitisisa, ni Buka Ya Ka ya Makande a Bibele. Mwa 1982 mwa magazini ya Awake! ne ku kalile ku hatiswa litaba za ka ku tatamana za “Young People Ask . . . ” Litaba zeo se li zusulusize cisehelo mwa lipilu za ba banca ni ba bahulu. Yo munca wa lilimo  za buhulu ze 14 n’a bulezi kuli: “Busihu ni busihu ni itumelanga ku Mulimu ka ku konahalisa kuli li hatiswe.” Musizana yo muñwi wa lilimo za buhulu ze 13 n’a ñozi kuli, “Ni lata hahulu litaba zeo. Li bonahala ku ba ze tahanga ka nako ye swanela luli.” Bashemi ni maeluda ba Sikreste ba lumela kuli litaba zeo li bile za ka bunako mi li na ni tuso.

1989 ha i to fita, litaba ze 200 za “Young People Ask . . . ” ne se li hatisizwe mwa Awake! Silimo seo, kwa Mukopano wa Sikiliti wa “Buineelo bwa Bumulimu,” ne ku zwisizwe buka ya Questions Young People Ask—Answers That Work. Kana i tusize ba banca ku zwelapili ku ba ba ba tiile mwa tumelo? Ba banca ba balalu ne ba ñozi kuli: “Buka ye i bile sisebeliso sa butokwa hahulu ku luna mwa ku utwisisa matata a luna ni ku ziba mwa ku talimanela ni ona. Lu itumela kwa buiyakato bwa mina kwa buiketo bwa luna.” Buñata bwa ba banca ba babali mwa lifasi kaufela ba lumelelana ni seo.

“Si Felisize Tala Ya Luna”

Mwa 1999, Lipaki za Jehova ne ba zwiselize ba banca nto ye ñwi hape ya taelo ya ka bunako. Ne li vidio ya Young People Ask—How Can I Make Real Friends? Ne i zusulusize hahulu cisehelo. Musizana wa lilimo za buhulu ze 14 n’a bulezi kuli, “Vidio ye i ni susuelize hahulu luli.” Me wa likwasha n’a talusize kuli: “I ka ba se siñwi sa lico za luna za kamita za kwa moya.” Kalibe yo muñwi n’a bulezi kuli, “Kwa tabisa ku ziba kuli Mulikan’a luna yo mutuna ka ku fitisisa, yena Jehova, wa lu lata luli ni ku babalela ba banca mwa kopano ya hae ya mwa lifasi kaufela.

Ki sifi se i petile vidio yeo? Ba banca ba bulela kuli: “I ni tusize ku tokomela be ni eza ni bona silikani, ku zibana ni ba bañwi kwa puteho, ni ku eza Jehova ku ba mulikan’a ka.” “I ni tusize ku itibelela kwa litaka.” “I ni tiisize mwa buitamo bwa ka bwa ku sebeleza Jehova ka mo ni konela kaufela.” Mi bosinyalana ba bañwi ne ba ñozi kuli: “Lu itumela hahulu ku mina kwa ku lu fa ‘sico’ se. Si felisize tala ya luna.”

“Mutanga ya sepahala, ya na ni kutwisiso,” ya tozizwe, u petile musebezi w’a filwe ki Mulimu ka ku fa sico sa kwa moya ka nako ye lukela ku ba ba si amuhela kaufela. Mi kwa nyakalalisa luli ku bona m’o ba banca ba sweli ku tusezwa ki taelo ya ka Mañolo kuli ba ‘yeme ba li ba ba petehile, mi ba ipeye ku feleleza kwa tato kaufela ya Mulimu’!