Emang Ka Botlalo Le Ka Kgodišego E Tiilego

Go Thuša Bafsa ka Thuto e Lego Nakong

EPAFORA e be e le Mokriste wa lekgolong la pele la nywaga yo a bego a etetše Roma. Lega go le bjalo, ka lebaka le le kwalago, o be a fela a gopola ka Kolose, motse o lego Asia Minor. O boletše ditaba tše dibotse moo gomme ka ntle le pelaelo a thuša ba-Kolose gore e be barutiwa ba Jesu Kriste. (Ba-Kolose 1:7) Epafora o be a tloga a kgomega ka badumedi-gotee le yena ba Kolose, ke ka lebaka leo moapostola Paulo a ilego a ba ngwalela a le Roma gore: “Epafora . . . o le romela ditumedišo, ka mehla a katana legatong la lena dithapelong tša gagwe, e le gore mafelelong le ka ema ka botlalo le ka kgodišego e tiilego thatong ka moka ya Modimo.”​—Ba-Kolose 4:​12, NW.

Ka mo go swanago, bo-tate le bo-mma ba mehleng yeno ba Bakriste ba rapelela ka phišego boemo bjo bobotse bja moya bja bana ba bona. Batswadi ba ba katanela go bjala lerato la go rata Modimo ka dipelong tša bana ba bona e le gore e tle e be ba tiilego tumelong.

Bafsa ba bantši ba Bakriste ba ile ba kgopela thušo mabapi le go swaragana le ditlhohlo tšeo ba lebeletšanago le tšona sekolong le mafelong a mangwe. Ngwanenyana wa nywaga e 15 o itše: “Mathata a rena a a mpefala. Bophelo ke bjo bo tšhošago. Re nyaka thušo!” Na dikgopelo tša bafsa bao le dithapelo tša batswadi ba boifago Modimo di arabilwe? Ee! Thuto e theilwego Beibeleng e neilwe ka “molaki e a bôtêxaxo yo bohlale.” (Mateo 24:​45) Go hlaloswa mo ka tše dingwe tša dipuku tše di thušitšego bafsa ba dikete tše makgolo gore ‘ba eme ka botlalo le ka kgodišego e tiilego.’ A re hlahlobeng tše mmalwa tša dikgatišo tše.

‘Bonang Dihlatse tše Difsa tše 15 000!’

Ka August 1941, batheetši ba 115 000 ba ile ba bokana St. Louis, Missouri, U.S.A., bakeng sa kopano e kgolo kudu ya Dihlatse tša Jehofa yeo e bego e swerwe ka nako yeo. Letšatšing la mafelelo​—e lego “Letšatši la Bana”​—bana ba ka bago ba 15 000 ba be ba dutše kgaufsi le sethala ba theeditše ka kelohloko ge Joseph F. Rutherford a bolela ka sehlogo se se rego, “Bana ba Kgoši.” Pejana ga ge polelo ya gagwe e ka fela, Rutherford wa nywaga e 71 o ile a bolela ka lentšu la botate gore:

“Ka moka ga lena . . . bana, lena bao le dumetšego . . . go kwa Modimo le Kgoši ya gagwe, ke kgopela gore le emelele.” Bana ba ile ba emelela sammaletee. Ngwanabo rena Rutherford o ile a bolela gore, “Bonang, dihlatse tše difsa tšeo di fetago 15 000 tša Mmušo!” Go ile gwa opša magofsi. Seboledi se okeditše ka gore: “Ka moka ga lena bao le tlago go dira seo le ka se kgonago go botša ba bangwe ka mmušo wa Modimo . . . , ke kgopela gore le re Ee.” Bana ba ile ba arabela ka go hlaboša ba re “Ee!” Ke moka a lokolla puku e mpsha ya Children, yeo e amogetšwego ka go opša ga magofsi mo go tšerego nako e telele.

Ka morago ga polelo ye e tutuetšago, mothaladi o motelele wa bafsa o ile wa namela sethaleng, moo Ngwanabo rena Rutherford a ba filego kopi yeo e lego mpho ya puku e mpsha. Tiragalo ye e ile ya dira gore batheetši ba rothiše megokgo. Hlatse e nngwe yeo e bonego tiragalo ka mahlo e itše: “Ke feela motho wa pelo e thata yo a bego a ka se kgongwe ke go bona bafsa bao ba [bontšhago] kholofelo e feletšego le tumelo go Modimo wa bona, Jehofa.”

Kopanong yeo e sa lebalegego, bafsa ba 1 300 ba ile ba kolobetšwa e le pontšho ya boineelo bja bona go Jehofa. Ba bantši ba bona ba tšwetše pele ba tiile tumelong go fihla le lehono. Ba thekga diphuthego tša lefelong la gabo bona, ke baithapi ba Bethele goba ba dira e le baromiwa dinageng dišele. Ka kgonthe, “Letšatši la Bana” le puku ya Children di bile le mafelelo a sa lebalegego dipelong tša bafsa ba bantši!

“Go Bonala di E-tla ka Nako e Swanetšego”

Ka bo-1970, Dihlatse tša Jehofa di ile tša gatiša dipuku tše dingwe tše tharo tšeo di kgomilego dipelo tša bafsa ba dikete tše makgolo. Tšona ke Go Theeletša Morutiši o Mogolo, Bofsa bja Gago​—Go Holwa Kudu ke Bjona le Puku Ya-ka ya Ditaba tša Beibele. Lelokelelo la “Bafsa ba a Botšiša . . . ” le ile la thoma go tšwelela ka makasineng wa Phafoga! (wa Seisemane) ka 1982. Dihlogo tše di ile tša tsoša karabelo  e botse dipelong tša ba banyenyane le ba bagolo. Mmadi yo mongwe wa nywaga e 14 o itše: “Bošegong bjo bongwe le bjo bongwe ke leboga Modimo ka go dira gore di gatišwe.” Ngwanenyana wa nywaga e 13 o ile a bolela gore: “Ke rata dihlogo tše, go bonala di e-tla ka nako e swanetšego.” Batswadi le bagolo ba kgethilwego ba Bakriste ba dumelelana le taba ya gore dihlogo tše ke tše di lego nakong le tše di holago.

Ka 1989 dihlogo tše ka bago tše 200 tša “Bafsa ba a Botšiša . . . ” di be di šetše di tšweletše ka go Phafoga! (ya Seisemane) Kopanong ya Selete ya “Boineelo go Modimo” ngwageng wona woo, go lokolotšwe puku ya Dipotšišo tša Bafsa le Dikarabo tše Šomago. Na e thušitše bafsa go dula ba tiile tumelong? Bafsa ba bararo ba ngwadile gore: “Puku ye e bile thušo e makatšago kudu go rena go kwešišeng mathata a rena le go tseba kamoo re ka swaraganago le wona ka gona ka katlego. Re le leboga ka go kgomega ga lena ka boiketlo bja rena.” Babadi ba bantši bao e lego bafsa lefaseng ka bophara ba dumelelana le se.

“Se Tlošitše Tlala ya Rena”

Ka 1999, Dihlatse tša Jehofa di tšweleditše thušo e nngwe e lego nakong bakeng sa go ruta bafsa​—bidio ya Young People Ask​—How Can I Make Real Friends? E tsošitše karabelo ya phišego. Ngwanenyana wa nywaga e 14 o itše: “Bidio ye e nkgomile kudu pelong.” Mma yo a se nago molekane o boletše gore: “E tla ba karolo ya ka mehla ya dijo tša rena tša moya.” Mosadi yo mongwe yo e sa lego yo mofsa o boletše gore: “Go thabiša pelo go tseba gore Mogwera wa rena wa potego, Jehofa, ka kgonthe o a rata e bile o hlokomela bafsa ba lego ka mokgatlong wa gagwe wa lefaseng ka bophara.”

Ke eng seo bidio ye e se fihleletšego? Bafsa ba re: “E nthušitše go ba šedi ditlwaelanong tša-ka le ba bangwe, go katološa ka phuthegong le go dira Jehofa mogwera wa-ka.” “E nthušitše go emeletšana ka sebete le dithaka tša-ka.” “E dirile gore ke be yo a tiilego boikemišetšong bja-ka bja go hlankela Jehofa gakaone kamoo nka kgonago ka gona.” Banyalani ba bangwe ba ngwadile gore: “Re le leboga go tšwa dipelong tša rena bakeng sa go re nea ‘sejo’ se. Se tlošitše tlala ya rena.”

Ka go botegela ga gagwe thomo yeo a e filwego ke Modimo, “molaki e a bôtêxaxo yo bohlale” yo a tloditšwego o neile dijo tša moya tše di lego nakong bakeng sa bohle bao ba di amogelago. Le gona go thabiša gakaakang go bona kamoo thuto e bjalo ya Mangwalo e thušago bafsa lehono go “ema ka botlalo le ka kgodišego e tiilego thatong ka moka ya Modimo”!