Kia Mou Apa Kore ma te Ki i te Kite

Tauturuanga i te Au Mapu ma te Ikuiku Anga i te Tuatau Tau

E KERITITIANO a Epaphera o te anere mataiti mua tei teretere atu ki Roma. Inara, no tetai tumu meitaki, te oki ua ra tona manako ki muri ki Kolosa, e oire i Asia Minora. Kua tutu aere ana aia i te tuatua meitaki i reira e kare e ekoko anga e kua tauturu atu i etai au Kolosa ra kia riro mai ei au pipi na Iesu Karaiti. (Kolosa 1:7) Te manako maata ra a Epaphera no te aronga irinaki i Kolosa, e kua tata atura te apotetoro ko Paulo mei Roma kia ratou e: “Ko Epaphera . . . te aroa atu nei ia kotou, e te tauta marie anga i te pure ia kotou kare e tivata, kia mou apa kore rai kotou ma te ki i te kite i te au anoano katoa o te Atua ra.”​—Kolosa 4:12.

Pera katoa oki, te pure akatenga nei te au metua tane e te au metua vaine Kerititiano o teia tuatau nei no te oraanga pae vaerua o ta ratou tamariki. Te tauta nei teia au metua kia akatupuia te aroa no te Atua i roto i te ngakau o ta ratou au tamariki kia ngaueue kore ratou i roto i te akarongo.

E manganui te au mapu Kerititiano tei pati i te tauturu i te akonoanga i te au akaaoanga te aro ra ratou i te apii e i tetai atu au ngai. Kua tuatua tetai tamaine e 15 mataiti e: “Te kino ua atu nei to matou manamanata. E oraanga mataku tikai. Te inangaroia nei e matou te tauturu!” Kua pauia ainei te au pati anga a taua au mapu ra e te au pure a te au metua tu akono Atua ra? Ae! Kua orongaia mai te ikuiku anga akatumuia o te Pipiria na roto i “te tavini akono meitaki e te pakari.” (Mataio 24:45) Ko etai o te puka tei kitea i konei kua tauturu i te au mapu e anere ua atu i te tauatini kia ‘mou apa kore ma te ki i te kite.’ Ka akara ana tatou e tokoiti ua o teia au puka nei.

“I na . . . e 15,000 Au Kite Ou!”

Ia Aukute 1941, kua akaputuputu mai e 115,000 aronga matakitaki ki St. Louis, Missouri, U.S.A., no te uruoaanga maata rava atu a te Au Kite o Iehova tei raveia i taua taime ra. I te ra openga​—“Te Ra no te Tamariki”​—te akarongo meitaki ra etai 15,000 tamariki te noo vaitata ra i te paata kia Joseph F. Rutherford i te tuatua anga no runga i te tumu tuatua “Te Tamariki a te Ariki.” Te vaitata anga ki te openga o tana tuatua, kua tuatua atura a Rutherford e 71 mataiti ra na roto i tetai reo metua tane e:

“Ko kotou katoatoa . . . te au tamariki tei akatika . . . kia akarongo ki te Atua e tana Ariki ra, ka tu mai ki runga ine.” Kua tu te au tamariki ma te kopapa okotai. “I na,” i tuatua mai ei te Taeake ko Rutherford, “e maata ua atu e 15,000 au kite ou ki te Patireia!” Kua tangi maata mai te pokarakara. Kua kapiti mai te vaa tuatua e: “Ko kotou katoatoa te ka rauka ia kotou i te akakite atu ki tetai ke ra no runga i te Patireia o te Atua . . . , e tuatua mai e Ae ine.” Kua ariu mai te tamariki ma te reo maata e “Ae!” Kua akaari mai aia i reira i te puka ou Children, tei arikiia ma te pokarakara anga roa ra.

I muri ake i teia tuatua akakeu anga, kua aere atu te aronga mapu na roto i tetai raini roroa ki te paata, i te oronga mai anga te Taeake ko Rutherford i ta ratou kopi oronga ua o te puka ou ra. Kua akakeu aueia te aronga matakitaki ra. Kua akakite mai e tai kite mata ki te tupu anga e: “Ko tetai ngakau toka anake ua te ka kore e akakeuia i te tupu anga o te mapu [i te akaarianga] i te irinaki anga mou e te akarongo ki to ratou Atua ra, kia Iehova.”

I taua akaputuputu anga akamaaraia, e 1,300 mapu tei papetitoia i te akatutu anga i to ratou akatapu anga kia Iehova. E manganui o ratou tei vai ngaueue kore i te akarongo e tae ua mai ki teianei ra. Te turu nei ratou i te au putuputuanga o te reira ngai, e ei aronga tauturu i te Betela, me kare te tavini ra ei au mitinari i te au enua ke. E tikai, kua akaruke mai “Te Ra o te Tamariki” e te puka Children i tetai manako anga openga ki te au ngakau ou e manganui ra!

“I te Akara Anga Kua Tae Mai Ratou i te Tuatau Tau Tikai”

I te tuatau 1970, kua nenei akaou te Au Kite o Iehova e toru puka tei itae i te au ngakau o te aronga mapu e anere ua atu i te tauatini ra. Ko te Listening to the Great Teacher, Your Youth​—Getting the Best out of It, e te My Book of Bible Stories te reira. I te 1982 kua akamata te au tuanga “Young People Ask . . . ” i te mama mai i roto i te makatini Awake!  Kua akakeuia e teia au atikara nei tetai tangi anga akarongo i roto i te au ngakau o te aronga ou e te pakari. “I te au po ravarai kua akameitaki au i te Atua no te tata anga ia ratou,” i tuatua mai ei tetai e 14 mataiti. “Kua reka au i te au atikara,” i tata ei tetai e 13 mataiti, “i te akara anga kua tae mai ratou i te tuatau tau tikai.” Kua akatika te au metua e te aronga pakari Kerititiano ikiia ra e kua tau tikai teia au atikara e kua puapingaia.

I te 1989 kua mama mai etai 200 atikara “Young People Ask . . . ” i roto i te Awake! I te Uruoaanga Tapere o te “Akono i te Atua” o taua mataiti ra, kua tukunaia mai te puka Questions Young People Ask​—Answers That Work. Kua tauturu ainei te reira i te au mapu kia vai ngaueue kore i roto i te akarongo? Kua tata mai e toru mapu: “E puka meitaki teia puka kia matou te akamaramaanga i to matou au manamanata e te kiteanga e e akapeea me akono ia ratou. Te akameitakiia atu nei kotou no te manako mai anga kotou i to matou tu.” Kua akatika rai te aronga tatau ou e manganui ra o te ao nei.

“Kua Akamerengoia to Maua Matepongi”

I te 1999, kua nenei akaou te Au Kite o Iehova i tetai tu ikuiku anga tau no te au mapu​—te vitio Young People Ask​—How Can I Make Real Friends? Kua akatupuia tetai pau anga oraora. “Kua aere tika mai ki toku ngakau teianei vitio,” i tuatuai tetai e 14 mataiti ra. “Ka riro ia ei tuanga putuputu i roto i ta matou kaikai anga pae vaerua,” i akakite mai ei tetai mama kare i akaipoipo. “E ngakau pumaana i te kite e te aroa ra e te manako tikai maira to tatou Oa meitaki, ko Iehova, i te mapu i roto i tana akaaereanga i te ao nei,” i tuatuai tetai vaine mapu.

Eaa ta te vitio i akatupu? Te karanga ra te aronga mapu: “Kua tauturu ia iaku kia matakite i taku kapiti anga, kia maora i roto i te putuputuanga, e kia akariro ia Iehova ei oa noku.” “Kua tauturuia au kia tu atu i toku au taeake ra.” Kua akariro te reira iaku kia ngaueue kore i te tauta anga au kia tavini meitaki ia Iehova i te ka rauka iaku ra. E kua tata mai tetai nga tokorua akaipoipo e: “Te akameitaki atu nei mei to maua ngakau no te orongaanga mai kia maua i teianei ‘kai.’ Kua akamerengoia to maua matepongi.”

Te tika ra ki tana akauenga oronga ia mai e te Atua, kua oronga mai te “tavini akono meitaki e te pakari” tei akatainuia ra i te kai vaerua tau na te katoatoa te ka ariki i te reira. E mei teaa ra te rekareka i te kite anga e akapeea taua ikuiku anga Tuatua Tapu i te tauturuanga i te aronga mapu i teia tuatau nei kia ‘mou apa kore ma te ki i te kite i te au anoano katoa o te Atua ra’!