De Lepi Sma Di Abi Wan Tranga Bribi

Yepi Yongu Sma Nanga Leri Di Kon na a Reti Ten

EPAFRAS ben de wan fosi yarihondro Kresten di ben go na Rome. Ma toku a ben tan prakseri Kolose, wan foto na ini Pikin Asia. A ben preiki a bun nyunsu drape èn a ben yepi wan tu Kolosesma fu tron disipel fu Yesus Krestes (Kolosesma 1:7). Epafras ben broko en ede trutru nanga den tra bribiman na ini Kolose, bika na ini Rome na apostel Paulus ben skrifi den: „Epafras . . . e seni taki unu odi. Ala ten a e meki furu muiti fu begi gi unu, so taki te fu kaba, unu kan de lepi sma di abi wan tranga bribi na ini ala sani di Gado wani.”—Kolosesma 4:12.

Na ini a ten disi, Kresten papa nanga mama e begi fayafaya tu taki a sa go bun na yeye fasi nanga den pikin fu den. Den papa nanga mama disi e du muiti fu meki den yonguwan fu den lobi Gado na ini den ati so taki den sa abi wan tranga bribi.

Furu yongu Kresten aksi yepi fu handri nanga den problema di den e miti na skoro èn na tra presi. Wan meisje di abi 15 yari ben taki: „Den problema fu wi e kon moro seryusu. A libi e gi gro skin. Wi abi yepi fanowdu!” Piki ben kon gi den sani di den sortu yongu sma disi ben aksi èn gi den begi fu den papa nanga mama di e dini Gado? Iya! „A getrow èn koni srafu” ben gi leri di komoto na Bijbel (Mateus 24:45). Na artikel disi e kari wan tu buku di yepi furu hondro dusun yonguwan fu „de lepi sma di abi wan tranga bribi”. Meki wi go luku wan tu fu den buku disi.

„Luku . . . 15.000 Nyun Kotoigi!”

Na ini augustus 1941, so wan 115.000 sma ben kon makandra na ini St. Louis, Missouri, Amerkankondre, gi a moro bigi kongres fu Yehovah Kotoigi di ben hori na a ten dati. Na tapu a lasti dei — „A Dei fu den Pikin” — so wan 15.000 pikin ben sidon krosibei fu a podium èn ben poti ala den prakseri arki Joseph F. Rutherford di a ben taki fu a tori „Pikin fu a Kownu”. Na a kaba fu a lezing fu en, Rutherford di ben abi 71 yari ben taki leki wan papa:

„Un pikin . . . di agri . . . fu gi yesi na Gado nanga en Kownu, opo tanapu grantangi.” Leki wán man ala den pikin ben opo tanapu. „Luku”, Brada Rutherford ben taki, „moro leki 15.000 nyun kotoigi gi a Kownukondre!” Dan den sma ben bigin naki anu bun tranga. Dan a takiman ben taki: „Grantangi, taki Iya, un alamala di wani du san un man fu fruteri tra sma abra Gado Kownukondre.” Dan den pikin ben piki bun tranga „Iya!” Baka dati a ben sori a nyun buku di nen Kinderen (Pikin-nengre), èn den ben naki anu bun langa gi dati.

Baka a lezing disi di ben naki sma ati, dan wan langa lin fu yongu sma ben waka kon na tapu a podium, èn dan Brada Rutherford ben gi den a nyun buku. A sani disi ben meki den sma di ben drape ben e krei. Wan fu den sma di ben si a sani disi ben taki: „Soso wan sma di no abi firi no ben o firi na ini en ati te a ben si yongu sma e sori tranga frutrow nanga bribi na ini a Gado fu den, Yehovah.”

Na a prenspari kongres dati, 1300 yongu sma ben dopu fu sori taki den gi den libi abra na Yehovah. Furu fu den tan tranga na ini a bribi te leki now. Den e yepi na ini den eigi gemeente, den na friwani wrokoman na Bethel, noso den e dini leki zendeling na dorosei kondre. Iya, gi wan langa ten „A Dei fu den Pikin” nanga a buku Kinderen ben abi krakti tapu na ati fu furu yongu sma!

„A Gersi Leki den Buku Kon na a Reti Ten”

Na ini den yari na baka 1970, Yehovah Kotoigi tyari ete dri buku kon na doro di ben doro na ati fu furu hondro dusundusun yongu sma. Den na Naar de Grote Onderwijzer luisteren (Arki a Bigi Leriman), Maak je jeugd tot een succes (Den Yongu Yari fu Yu — Meki Den Abi Bun Bakapisi), nanga Mi boekoe nanga bijbel tori. Na ini 1982 den artikel „Yongu Sma E Aksi . . . ” ben bigin kon de ini a tijdschrift Ontwaakt! Den artikel disi ben naki na ati fu yongu sma nanga owru sma èn ben meki den handri  fayafaya. „Ibri neti mi e taigi Gado tangi taki den artikel kon na doro”, na so wan yongu sma di abi 14 yari ben taki. „Mi lobi den artikel”, na so wan meisje di abi 13 yari ben taki, „a gersi leki den buku kon na a reti ten”. Papa nanga mama nanga den Kresten owruman e agri taki den artikel disi ben kon na a reti ten èn taki den bun.

Na ini a yari 1989, so wan 200 „Yongu Sma E Aksi . . . ” artikel ben kon ini Ontwaakt! Na a „Gi Di Sma E Gi Densrefi na ini a Dini fu Gado” Distrikt Kongres fu a yari dati, a buku Wat jonge mensen vragen — Praktische antwoorden (Yongu Sma E Aksi—Piki Di E Wroko) ben tyari kon na doro. A ben yepi furu yongu sma fu tan tranga na ini a bribi? Dri yongu sma ben skrifi: „A buku disi na wan kefalek bigi yepi gi wi fu frustan den problema fu wi èn fu sabi san fu du nanga den. Grantangi taki unu e broko un ede nanga wi fu meki sani waka bun gi wi.” Furu yongu leisiman na heri grontapu e agri nanga disi.

„A De San Wi Abi Fanowdu”

Na ini a yari 1999, Yehovah Kotoigi ben meki wan tra sani fu gi yongu sma leri na a reti ten — a video Young People Ask—How Can I Make Real Friends? (Yongu Sma E Aksi—Fa Mi Kan Meki Trutru Mati?) A ben meki taki sma ben handri nanga prisiri na tapu. „A video disi naki mi ati trutru”, na so wan meisje fu 14 yari ben taki. „A video disi sa de wan doronomo pisi fu den sani di mi e nyan na yeye fasi”, na so wan mama di de en wawan ben taki. „A switi fu sabi taki wi moro bun Mati, Yehovah, lobi wi trutru èn e broko en ede nanga den yongu wan fu en organisâsi na heri grontapu”, na so wan yongu uma ben taki.

San a video disi du? Yongu sma e taki: „A yepi mi fu luku bun suma na mi kompe, èn a ben yepi mi fu abi kontakti nanga moro sma na ini a gemeente, èn a ben yepi mi fu meki Yehovah tron mi mati.” „A yepi mi fu man taki sondro frede nanga den speri fu mi.” „A ben tranga a bosroiti di mi ben teki fu dini Yehovah na a moro bun fasi fa mi man.” Èn wan trowpaar ben skrifi: „Grantangi trutru taki unu gi wi a ’nyanyan’ disi. A de san wi abi fanowdu.”

Soleki fa Gado ben komanderi den, a salfu „getrow èn koni srafu” gi yeye nyanyan na a reti ten na ala sma di wani teki en. Èn a e gi furu prisiri srefisrefi fu si fa den leri fu Bijbel e yepi yongu sma fu „de lepi sma di abi wan tranga bribi na ini ala sani di Gado wani”!