Tile Lu Vough De Tenger Ga

U Wasen Ikyaior a Kwaghwan u sha Shighe Vough

EPAFERA lu Orkristu u sha derianyom u hiihii u yange za ken Roma yô. Nahan cii kpa, lu zeren henen kwagh u ken Kolose, gar ugen ken Ashia u Kiriki la kpii, man lu u á na un ibo ga. Yange pase loho u dedoo ker shi wase mbagenev ken Kolose ve hingir mbahenen mba Yesu Kristu je ka u henen a hen ga. (Mbakolose 1:7) Kwagh u mbananjighjigh a Epafera imôngo mba ken Kolose la yange nyian un ishima kpishi, di vough er a fatyô u nengen ken washika u Paulu nger ken Roma tindi a mi la nahan, ér: “Epafera, . . . ngu sughun ne. Ngu eren msen sha gbashima sha ci wen gbem sha u né tile né lu vough né kera tenger ga sha u eren ishima i Aôndo cii” yô.—Mbakolose 4:12.

Uter man ungô mba ve lu Mbakristu ainge kpaa kape ve shi eren msen didi sha ci u mkpeyol u ken jijingi u mbayev vev je la. Mbamaren mban ka ve nôngo sha u môôr mdoo u Aôndo doon or ishima la ken asema a mbayev vev mba kiriki mbara sha er vea hingir u tilen dông ken jighjigh yô.

Ikyaior i Mbakristu kpishi yange i sôn iwasen sha u hendan a mbamzeyol mba ka ve tagher a mi ken makeranta man ajiir agen la. Wankwase ugen u lun anyom 15 kaa ér: “Mbamzeyol asev mba hemban vihin seer a seer. Uma cieryol kpishi. Gba u a wase se!” I wase mbayev mban er ve sônon nahan la shi i ungwa mbamsen mba mbamaren mba civir Aôndo ve eren ne kpa? Een! Akaawan a a har sha Bibilo nga á i ne sha ikyev i “wanakiriki u jighjigh man u fan kwagh” yô. (Mateu 24:45) Kwaghngeren ne tese ityakerada i i wase ikyaior udubu imôngo sha u ‘tilen lun vough kera tenger ga’ yô. De se pande ityakerada ne kpuaa se nenge shami.

“Nenge, Mbashiada Mbahev . . . 15,000!”

Ken uwer u Agusutu 1941 la, iorov 115,000 kohol ken gar u St. Louis, Missouri, ken tar u U.S.A., hen mkohol u Mbashiada mba Yehova u hen shighe la yô lu u hemban kehen cii yô. Sha iyange i masetyô la yô lu—“Iyange i Mbayev”—mbayev 15,000 mba yange ve tema ikyua a tsembe u nan kwaghôron la kegh ato ving ungwa er Joseph F. Rutherford lu lamen sha itinekwagh i i kaa ér “Mbayev mba Tor” la. Ka za zurum u kwaghôron na una kuusu yô, Rutherford u yange lu anyom 71 la kaa sha imo i ter a ônov nahan ér:

“Ne . . . mbayev mba ne lumun . . . u ungwan imo i Aôndo man Tor na cii, nea lumun yô mough tile nen sha.” Mbayev mough sha kwa môm gbiaa. Anmgbian Rutherford maa kaa ér: “Nenge, mbashiada mbahev mba Tartor mba hemban 15,000!” Yange i num kuren ave kpulu kpulu. Or u nan kwaghôron la seer kaan wener: “Ne mba ne nôngo sha afatyô wen cii sha u ôron mbagen kwagh u Tartor u Aôndo cii . . . , nea lumun yô kaa nen ner Een.” Mbayev gema ger ding ér: “Een!” Nahan á kende takerada u he u i yer ér Children (Mbayev) la a tese ér i̱ nenge, nahan i lumun ú sha u kuren ave gbem.

Kwaghôron u tilen iyol ne been kera yô, ikyaior wa nongo gôgônan za suur sha tsembe, her ape Anmgbian Rutherford lu nan ve kôpi u takerada u he la gbilin la. Kwagh ne yange na mbaungwan haa mliam ashe. Orgen u yange nenge kwagh ne sha ashe na yô, kaa ér: “Ka or u nan cighir ishima tseegh ishima ia mgbegha nan sha u nengen er ikyaior lu [tesen] u suur sha Aôndo ve, Yehova a vangertiôr man jighjigh u nan la ga ye.”

Ken mkohol ne, ikyaior 1,300 er batisema sha u tesen ikyav i iyoltseghan ve sha ci u Yehova la. Kpishi ken ve tile dông ken jighjigh u nan her zan zan hegen. Mba suen atôônanongo a hen ityônya, shi mbagen na ayol ave sha u eren tom shin Betel, shin eren tom u mishen ken ityar igen. Sha mimi yô, “Iyange i Mbayev” man takerada u i yilan ér Children (Mbayev) la na ikyaior kpishi kwagh u vea hungur a mi mayange ga yô!

“Ka A Gba Van sha Shighe Vough Je”

Ken kwavanyom u 1970 la, Mbashiada mba Yehova seer gberen ityakerada itiar í í kôr ikyaior udubu imôngo ken asema yô. Ityakerada ne yô lu Listening to the Great Teacher (U Keghen Atô a Ortesen u Tamen) la man Your Youth—Getting the Best out of It (Iyev Ough—Er Ú Hemba Zuan a Kwagh u Injaa Ker La) man shi Takerada Wam ú Akaaôron a Bibilo la. Ken inyom i 1982 la gbaa kwaghngeren u i yilan ér “Young People Ask . . . ” (Mbayevikyaior Pine Ér . . . ) la gba duen ken magazin u Awake! la. Agbaa a kwaghngeren ne  kôr ikyaior ken asema kua mbaganden kpaa. Wanye u lun anyom 14 kaa ér: “Ka m sugh Aôndo hanma tugh sha er a ne í lu gberen akaangeren ne yô.” Gumkwase u lun anyom 13 kaa ér: “Akaangeren ne doom ishima je, ka a gba van sha shighe vough je.” Mbamaren man Mbakristu mbatamen mba i ver ve mbara lumun ér ngeren mban mba sha shighe vough man mba a mtser kpaa.

Ken inyom i 1989 la i due a agbaa a kwaghngeren a i yilan ér “Young People Ask . . . ” la kuma er 200 nahan ken Awake! Ken Mkohol u Vesen u “Mciviraôndo” u i zua ken inyom shon la, i due a takerada u i yer ér Questions Young People Ask—Answers That Work (Mbampin Mba Ikyaior I Pin—Man Mbamlumun Mba Vea Wase La). Kwagh la wase mbayev u tilen dông ken jighjigh u nan nena? Mbayev ikyaior utar yange ve nger ér: “Takerada ne ngu a inja hen vese kpishi sha u wasen se u kaven mbamzeyol asev man sha u fan er se hendan a ve yô. Se sugh ne sha er kwagh a gbe ne sha mkpeyol wase yô.” Ikyaior i ôron takerada ne sha tar kpishi lumun a kwagh ne.

“A Na Se Ide”

Ken inyom i 1999 la, Mbashiada mba Yehova due a kwaghwan u a lu sha shighe vough sha ci u ikyaior yô—ka tser u vidio u i yer ér Young People Ask—How Can I Make Real Friends? (Mbayevikyaior Pine Er—Á Er Nan Man Me Ya Azende a Mimi?) la. Ú kpoghor ior asema ve hingir saan saan. Gumkwase u lu anyom 14 kaa ér, “vidio ne kôron ken ishima tsugh tsugh.” Ngô u lun tswen kaa ér: “Vidio ne ia lu gbaa u kwaghyan wase u ken jijingi hanma shighe cii.” Gumkwase ugen kaa wener: “Ka kwagh u kundun iyol u fan e̱r se doo Yehova, Ijende yase i ishima ishima la ishima mimi man kwagh u ikyaior i ken nongo na u sha tar cii la a gbe un ishima nahan.”

Tser u vidio ne ú er nyi? Ikyaior kaa ér: “Ú wasem u veren ishima sha mba vea lu azende a am la, man u ningir zuan vea ior ken tiônnongo man u nan Yehova hingir ijende yam kpaa.” Yange ú wasem u tagher a mbakwar wam hemban.” “Ú nam m tile dông ken awashima wam u m we u eren Yehova tom sha afatyô wam cii la.” Shi yange nom ugen man kwase na ve nger ér: “Se mba sughun ne a ishima yase i môm cii sha ‘kwaghyan’ u ne ne se ne. A na se ide.”

“Wanakiriki u jighjigh man u fan kwagh” er tom u Aôndo a ne un la gba uwer ga, a na ior mba ve soo u yan kwagh la kwaghyan u ken jijingi sha shighe vough. Man ka kwagh u nan iember u̱ nengen er imba kwaghwan u ken Ruamabera la a lu wasen ikyaior ainge sha er vea ‘tile vough vea tenger ga sha u eren ishima i Aôndo’ nahan!