کامل ہو کر پورے اعتقاد کیساتھ قائم رہیں

نوجوانوں کی بروقت ہدایت سے مدد کرنا

پہلی صدی کا ایک مسیحی،‏ اپفراس روم آ گیا تھا۔‏ تاہم،‏ معقول وجہ کی بِنا پر اُسے ایشیائےکوچک کے شہر کُلسّے کی یاد آتی رہی۔‏ وہ وہاں خوشخبری کی منادی کر چکا تھا اور بِلاشُبہ اُس نے کُلسّے کے بعض اشخاص کی یسوع مسیح کے شاگرد بننے میں مدد بھی کی تھی۔‏ (‏کلسیوں ۱:‏۷‏)‏ اپفراس کُلسّے کے ساتھی ایمانداروں کی بابت گہری فکر رکھتا تھا کیونکہ روم سے پولس رسول نے اُنہیں لکھا:‏ ”‏اؔپفراس .‏ .‏ .‏ تمہیں سلام کہتا ہے۔‏ وہ تمہارے لئے دُعا کرنے میں ہمیشہ جانفشانی کرتا ہے تاکہ تم کامل ہو کر پورے اعتقاد کے ساتھ خدا کی پوری مرضی پر قائم رہو۔‏“‏—‏کلسیوں ۴:‏۱۲‏۔‏

اسی طرح،‏ زمانۂ‌جدید کے مسیحی والدین خلوصدلی سے اپنے بچوں کی روحانی بہبود کیلئے دُعا کرتے ہیں۔‏ یہ والدین اپنے بچوں کے دلوں میں خدا کیلئے محبت پیدا کرنے کی کوشش کرتے ہیں تاکہ وہ ایمان میں مضبوط ہو جائیں۔‏

بیشتر مسیحی نوجوانوں نے سکول میں اور دیگر جگہوں پر درپیش چیلنجوں کا مقابلہ کرنے کیلئے مدد کی درخواست کی ہے۔‏ ایک ۱۵ سالہ لڑکی نے بیان کِیا:‏ ”‏ہمارے مسائل سنگین ہوتے جا رہے ہیں۔‏ ہمیں زندگی سے خوف آنے لگا ہے۔‏ ہمیں مدد کی ضرورت ہے!‏“‏ کیا ایسے نوجوانوں کی درخواستوں اور خداترس والدین کی دُعاؤں کا جواب ملا ہے؟‏ جی‌ہاں!‏ ”‏دیانتدار اور عقلمند نوکر“‏ نے بائبل پر مبنی ہدایت فراہم کی ہے۔‏ (‏متی ۲۴:‏۴۵‏)‏ اس مضمون میں متذکرہ مطبوعات نے ہزاروں نوجوانوں کی ”‏کامل ہو کر پورے اعتقاد کیساتھ قائم“‏ رہنے میں مدد کی ہے۔‏ آئیے ان میں سے چند مطبوعات پر غور کریں۔‏

‏”‏دیکھو .‏ .‏ .‏ ۰۰۰،‏۱۵ نئے گواہ!‏“‏

اگست ۱۹۴۱ میں سینٹ لوئیس،‏ میسوری،‏ یو.‏ایس.‏اے.‏ میں یہوواہ کے گواہوں کے کنونشن پر ۰۰۰،‏۱۵،‏۱ لوگ حاضر ہوئے۔‏ یہ اُس وقت تک منعقد ہونے والا سب سے بڑا کنونشن تھا۔‏ کنونشن کے آخری دن—‏”‏یومِ‌اطفال“‏—‏پر پلیٹ‌فارم کے قریب بیٹھے ہوئے کوئی ۰۰۰،‏۱۵ بچے بڑے غور سے جوزف ایف.‏ رتھرفورڈ کی تقریر سن رہے تھے جسکا عنوان تھا:‏ ”‏بادشاہ کے فرزند۔‏“‏ اپنی تقریر کے اختتام پر ۷۱ سالہ رتھرفورڈ نے پدرانہ لہجے میں کہا:‏

‏”‏براہِ‌مہربانی وہ تمام بچے جو خدا اور اُسکے بادشاہ کی فرمانبرداری کرنا چاہتے ہیں کھڑے ہو جائیں۔‏“‏ تمام بچے ایک ساتھ کھڑے ہو گئے۔‏ ”‏دیکھو،‏“‏ بھائی رتھرفورڈ نے کہا،‏ ”‏بادشاہت کے ۰۰۰،‏۱۵ سے زائد نئے گواہ!‏“‏ پورا سٹیڈیم تالیوں سے گونج اُٹھا۔‏ اسکے بعد مقرر نے کہا:‏ ”‏آپ میں سے جو دوسروں کو خدا کی بادشاہت کی بابت بتانے کی ہر ممکن کوشش کرینگے .‏ .‏ .‏ وہ براہِ‌مہربانی کہیں ’‏جی‌ہاں۔‏‘‏ “‏ بچوں نے گرمجوشی سے باآوازِبلند ”‏جی‌ہاں“‏ کہا!‏ پھر اُس نے نئی کتاب چلڈرن کی رُونمائی کی جسکے کافی دیر بعد تک تالیاں بجتی رہیں۔‏

اس تحریک‌انگیز تقریر کے بعد،‏ نوجوان ایک لمبی قطار میں پلیٹ‌فارم تک گئے اور بھائی رتھرفورڈ سے نئی کتاب کی ایک ایک کاپی بطور تحفہ حاصل کی۔‏ اس منظر کو دیکھ کر حاضرین کی آنکھیں بھر آئیں۔‏ اس موقع کا ایک عینی شاہد بیان کرتا ہے:‏ ”‏وہ کوئی پتھردل انسان ہی ہوگا جو یہوواہ خدا پر اپنا پورا ایمان اور بھروسا ظاہر کرنے والے نوجوانوں کے اس منظر سے اثرپذیر نہ ہوا ہو۔‏“‏

اِس یادگار اسمبلی پر ۳۰۰،‏۱ نوجوانوں نے یہوواہ کیلئے اپنی مخصوصیت کی علامت میں بپتسمہ لیا۔‏ ان میں سے بہتیرے آج تک اپنے ایمان پر قائم رہے ہیں۔‏ وہ مقامی کلیسیاؤں کی حمایت کرتے ہیں،‏ بیت‌ایل میں رضاکار کارکُن ہیں یا پھر دوسرے ممالک میں مشنریوں کے طور پر خدمت انجام دے رہے ہیں۔‏ واقعی،‏ ”‏یومِ‌اطفال“‏ اور کتاب چلڈرن نے کئی نوجوان دلوں پر دائمی اثر ڈالا تھا!‏

‏”‏یہ بالکل موزوں وقت پر پہنچتے ہیں“‏

یہوواہ کے گواہوں نے ۱۹۷۰ کے دہے میں تین اَور کتابیں شائع کیں جنہوں نے ہزاروں نوجوانوں کے دلوں کو موہ لیا۔‏ یہ لیسننگ ٹو دی گریٹ ٹیچر،‏ یؤر یوتھ—‏گیٹنگ دی بیسٹ آؤٹ آف اِٹ اور بائبل کہانیوں کی میری کتاب تھیں۔‏ سن ۱۹۸۲ سے جاگو!‏ رسالے میں سلسلہ‌وار مضامین ”‏نوجوان لوگ پوچھتے ہیں .‏ .‏ .‏“‏ شائع ہونے لگے۔‏ اِن مضامین نے نوجوانوں کے  علاوہ عمررسیدہ لوگوں کے دلوں پر بھی گہرا اثر کِیا ہے۔‏ ایک ۱۴ سالہ نوجوان نے بیان کِیا:‏ ”‏مَیں اِن کی اشاعت کیلئے ہر رات خدا کا شکر ادا کرتا ہوں۔‏“‏ ایک ۱۳ سالہ لڑکی کا کہنا ہے کہ ”‏مجھے یہ مضامین بیحد پسند ہیں جو بالکل موزوں وقت پر پہنچتے ہیں۔‏“‏ والدین اور کلیسیائی بزرگ تسلیم کرتے ہیں کہ یہ مضامین بروقت اور مفید ثابت ہوئے ہیں۔‏

سن ۱۹۸۹ تک جاگو!‏ میں ”‏نوجوان لوگ پوچھتے ہیں .‏ .‏ .‏“‏ کے عنوان کے تحت تقریباً ۲۰۰ مضامین شائع ہو چکے تھے۔‏ اسی سال میں ”‏خدائی عقیدت“‏ ڈسٹرکٹ کنونشن پر کتاب کوسچنز ینگ پیپل آسک—‏آنسرز دیٹ ورک کی رُونمائی ہوئی۔‏ کیا اس کتاب نے نوجوانوں کی ایمان میں مضبوط رہنے کیلئے مدد کی؟‏ تین نوجوانوں نے لکھا:‏ ”‏یہ کتاب ہمارے لئے اپنے مسائل کو سمجھنے اور ان سے نپٹنے میں ایک شاندار اثاثہ ثابت ہوئی ہے۔‏ ہماری فلاح کیلئے فکرمندی دکھانے کا شکریہ۔‏“‏ دُنیا کے بیشمار نوجوان قاری اس بات سے متفق ہیں۔‏

‏”‏اُس نے ہماری بھوک مٹا دی“‏

یہوواہ کے گواہوں نے ۱۹۹۹ میں ویڈیو ینگ پیپل آسک—‏ہاؤ کین آئی میک ریئل فرینڈز؟‏ کی صورت میں نوجوانوں کیلئے مزید بروقت ہدایت فراہم کی۔‏ اسے بہت زیادہ پذیرائی حاصل ہوئی۔‏ ایک ۱۴ سالہ لڑکی نے کہا:‏ ”‏اس ویڈیو نے مجھ پر بہت گہرا اثر کِیا۔‏“‏ ایک تنہا ماں نے بیان کِیا،‏ ”‏یہ ہماری روحانی غذا کا باقاعدہ جز ہوگی۔‏“‏ ایک نوجوان خاتون نے کہا،‏ ”‏یہ جانکر دل خوشی سے لبریز ہو جاتا ہے کہ ہمارا بہترین دوست یہوواہ اپنی عالمگیر تنظیم کے نوجوانوں کیلئے واقعی محبت اور فکر رکھتا ہے۔‏“‏

اس ویڈیو نے کیا کام سرانجام دیا ہے؟‏ نوجوان بیان کرتے ہیں:‏ ”‏اس نے اپنی رفاقت کی بابت محتاط رہنے،‏ کلیسیا میں کشادہ دل بننے اور یہوواہ کو اپنا دوست بنانے کے سلسلے میں میری مدد کی ہے۔‏“‏ ”‏اس نے ہمسروں کے دباؤ کا مقابلہ کرنے میں میری مدد کی ہے۔‏“‏ ”‏اس نے پورے دل سے یہوواہ کی خدمت کرنے کے میرے عزم کو مضبوط کِیا ہے۔‏“‏ اس کے علاوہ ایک شادی‌شُدہ جوڑے نے لکھا:‏ ”‏ہم ایسی ’‏غذا‘‏ فراہم کرنے کیلئے تہِ‌دل سے آپکے شکرگزار ہیں۔‏ اس نے ہماری بھوک مٹا دی ہے۔‏“‏

خداداد تفویض کو وفاداری سے پورا کرتے ہوئے ممسوح ”‏دیانتدار اور عقلمند نوکر“‏ نے اُن تمام لوگوں کیلئے بروقت روحانی خوراک فراہم کی ہے جو اسے خوشی سے قبول کرتے ہیں۔‏ نیز یہ دیکھ کر کتنی خوشی ہوتی ہے کہ ایسی صحیفائی مشورت نوجوانوں کی ”‏کامل ہو کر پورے اعتقاد کے ساتھ خدا کی پوری مرضی پر قائم“‏ رہنے میں مدد کر رہی ہے!‏