Igwa daw nin Ano Man na Talagang Makakapasararo sa mga Tawo?

ANO man an saindong paniniwala, maoyon gayod kamo na seguradong igwa nin mga namomoot sa katotoohan sa haros gabos na relihion. An mga tawong hararom an pagpahalaga sa kun ano an totoo asin andam na magsiyasat kaiyan manonompongan sa tahaw kan mga Hindu, Katoliko, Judio, asin iba pa. Pero, garo baga binabaranga kan relihion an katawohan. Ginagamit ngani nin nagkapira an relihion sa maraot na katuyohan. Posible pa daw na magkasararo an sinserong mga tawo hale sa gabos na relihion na namomoot sa kun ano an marahay asin totoo? Puede daw sindang tiriponon tanganing magibo an sarong katuyohan?

Abaa kanakapupurisaw na maheling na an relihion paorog nang paorog na iyo an dahelan nin pagkabaranga! Estudyare an nagkapira kan ralaban na ini. Nakikilaban an mga Hindu sa mga Budista sa Sri Lanka. An mga Protestante, Katoliko, asin Judio nagpabolos nin dugo sa manlaenlaen na ralaban. An mga “Kristiano” nakikilaban sa mga Muslim sa Bosnia, Chechnya, Indonesia, asin Kosovo. Asin kan Marso 2000, an duwang aldaw na mapait na paglalaban na konektado sa relihion an nagin dahelan nin pagkagadan kan 300 na taga Nigeria. Tunay nanggad, pinalaad kan relihiosong pagkaongis an kabangisan kan mga iriwal na ini.

Sa parate nanluluya an boot kan sinserong mga tawo sa karatan na ginigibo sa ngaran nin relihion. Halimbawa, dakol na parasimba an nabibigla sa pagkonsinte kan nagkapirang iglesia sa mga klerigo na seksuwal na nan-abuso nin mga aki. An iba pang mga may pagtubod napapasupog na marhay huli sa pagkabaranga sa laog nin dakol na Kristiano daang sekta nin huli sa mga isyu na siring kan homoseksuwalidad asin aborsion. Malinaw nanggad, an relihion dai napagsararo an katawohan. Pero, igwa nin tunay na mga namomoot sa katotoohan sa dakol na relihion, siring kan ipinaheheling kan minasunod na mga eksperyensia.

Naghimuyawot Sinda Para sa Katotoohan

Si Fidelia sarong sinsero asin debotong parasamba sa Iglesia Katolika ni San Francisco sa La Paz, Bolivia. Sia naglalaob sa atubangan kan imahen ni Maria asin ibinubugtak an pinakamarahay na klaseng mga kandila na mababakal nia sa atubangan kan krusipiho. Kada semana, nagdodonar sia nin dakolon na kakanon sa padi tanganing idistribwir sa mga dukha. Minsan siring, lima sa mga omboy ni Fidelia an nagadan bago pa sinda mabunyagan. Kan sinabihan sia kan padi na gabos sinda nagdudusa sa kadikloman sa Limbo, si Fidelia nag-isip-isip, ‘Kun an Dios marahay, taano ta siring kaiyan?’

Si Tara, sarong doktor sa medisina, pinadakula bilang sarong Hindu sa Kathmandu, Nepal. Nagsusunod sa dakol nang siglong mga kostumbre kan saiyang mga apoon, sia nagsasamba sa saiyang mga dios sa mga templong Hindu asin igwa nin mga idolo sa saiyang harong. Alagad si Tara nariribaraw kan mga hapot na siring kaini: Taano ta igwa nin grabeng pagsakit? Taano ta an mga tawo nagagadan? Dai sia nakakua nin nakakokontentong simbag sa saiyang relihion.

Si Panya, sa ibong na lado, nagdakula bilang sarong Budista sa sarong harong sa tampi nin kanal sa Bangkok, Tailandia. Tinokdoan sia na an pagdusa resulta kan mga gibong nakomiter sa nakaaging  mga buhay asin na an pakabutas dian makakamtan paagi sa paghale kan gabos na kamawotan sa sadiri nia. Arog kan iba pang sinserong Budista, tinokdoan siang hararom na igalang an kadonongan kan mga monghe na nakahalabang gubing na kolor amarilyo na nagduduman sa harong kada mag-aagahon para sa limos. Sia naggigibo man nin paghorophorop asin nagkokolekta nin mga imahen ni Budha sa pagtubod na nagtatao iyan nin proteksion. Pakatapos na maaksidente nin grabe na naparalisar sia poon sa piad paibaba, nagbisita si Panya sa mga monasteryong Budista, na sinserong naglalaom nin milagrosong pagpaomay. Dai sia nakakua nin pagpaomay o espirituwal na kaliwanagan. Imbes, sia nalantad sa espiritismo asin nagpoon na makisale dian.

Namundag si Virgil sa Estados Unidos asin nakiayon sa Itom na mga Muslim sa kolehio. May kaigotan niang idinistribwir an saindang mga babasahon, na naniniwala na an mga puti iyo an Diablo. Iyan, sa paghona ninda, an dahelan kun taano an mga puti ta naggibo nin kadakol na karatan tumang sa mga itom. Minsan ngani sinsero sa saiyang mga paniniwala, napupurisaw si Virgil kan mga hapot na: Paanong an gabos na puti nagin maraot? Asin taano ta an kadaklan kan sermon nakasentro sa kuarta?

Dawa ngani si Charo nagdakula sa Amerika del Sur na kadaklan Katoliko, sia sarong sinserong Protestante. Naoogma sia na bako siang kabtang kan idolatriya na nakapalibot sa saiya. Ikinaoogma ni Charo an pagsimba kada Domingo para sa seremonya na pano nin makosog na emosyon, kun saen sia nagkukurahaw nin “Aleluya!” asin nakikiayon sa relihiosong pag-awit asin pagbayle na kasunod kaiyan. Sinserong nagtutubod si Charo na sia ilinigtas na asin namundag giraray. Itinatao nia sa simbahan an ikasampulong kabtang kan saiyang entrada, asin kun naghahagad nin kontribusyon an saiyang paboritong ebanghelisador sa TV, pinapadarahan nia sia nin kuarta para sa mga aki sa Aprika. Minsan siring, kan hinapot nia an saiyang pastor kun taano ta pinapasakitan nin sarong Dios nin pagkamoot an mga kalag sa impierno, narealisar nia na mayo sia nin makahulogan na simbag. Sa huri, nadiskobre man nia na an saiyang mga kontribusyon dai ginamit sa pagtabang sa mga aki sa Aprika.

Maski ngani manlaenlaen an pinaghalean, an limang indibiduwal na ini nagkakaparareho sa sarong bagay. Namotan ninda an katotoohan asin sinserong hinanap an sadiosan na mga simbag sa saindang mga hapot. Alagad talaga daw na puede sindang magkasararo sa tunay na pagsamba? An hapot na iyan sisimbagon sa masunod na artikulo.

[Ritrato sa pahina 4]

Posible daw na magkasararo talaga an mga tawo na manlaenlaen an pinaghalean?

[Picture Credit Line sa pahina 3]

G.P.O., Jerusalem