Na go na le Selo se se ka Kopanyago Batho e le ka Kgonthe?

GO SA šetšwe gore ditumelo tša gago ke dife, mohlomongwe o dumela gore go swanetše go ba go e-na le barati ba therešo go mo e nyakilego go ba madumeding ka moka. Batho bao ba tlogago ba rata seo e lego therešo le ba ikemišeditšego go e tsoma ba ka hwetšwa gare ga ma-Hindu, Makatholika, ba-Juda le ba bangwe. Lega go le bjalo, bodumedi go bonala bo aroganya batho. Ba bangwe e bile ba diriša bodumedi bakeng sa merero e mebe. Na go tla ka gwa kgonega bathong ba botegago go tšwa madumeding ka moka bao ba ratago se se lokilego le seo e lego therešo gore e be ba kopanego? Na ba ka kopanywa gotee bakeng sa go phethagatša morero o swanago?

Ke mo go gakantšhago gakaakang go bona gore bodumedi ke bjo bo bakago karogano ka mo go oketšegilego! Ela hloko tše dingwe tša dikgohlano tše. Ma-Hindu a lwa le ma-Buddha kua Sri Lanka. Maprotestanta, Makatholika le ba-Juda ba tšholotše madi dintweng tše di fapa-fapanego. Bakriste ba mankekišane ba lwa le Mamoseleme kua Bosnia, Chechnya, Indonesia le Kosovo. Le gona ka March 2000, matšatši a mabedi a ntwa yeo e tswalanago le bodumedi a tlogetše ma-Nigeria a 300 a hwile. Ka kgonthe, lehloyo la bodumedi le hlohleleditše bošoro bja dikgohlano tše.

Batho ba botegago gantši ba nolwa moko ke bobe bjo bo dirwago leineng la bodumedi. Ka mohlala, batho ba bantši ba tsenago dikereke ba ferolwa dibete ke gore baruti ba gobošitšego bana ka tša botona le botshadi ba kgotleletšwe ka molao ke dikereke tše dingwe. Badumedi ba bangwe ba tshwenywa kudu ke dikarogano tše di lego gare ga dihlotswana tše dintši tša bao ba ipitšago Bakriste ditabeng tše swanago le bosodoma le go ntšhwa ga mpa. Go molaleng gore bodumedi ga se bja kopanya batho. Lega go le bjalo, go na le barati ba botegago ba therešo ditumelong tše dintši, bjalo ka ge diphihlelo tše di latelago di bontšha.

Ba be ba Hlologetše Therešo

Fidelia e be e le morapedi yo a botegago le yo a ineetšego Kerekeng ya Katholika ya San Francisco kua La Paz, Bolivia. O be a khunamela seswantšho sa Maria gomme a bea dikerese tše botse kudu tšeo a bego a ka kgona go di reka pele ga seswantšho sa Kriste a le sefapanong. Beke e nngwe le e nngwe, o be a neela dijo tše dintši kudu go moruti gore a di abele bahloki. Lega go le bjalo, bana ba bahlano ba Fedelia ba ile ba hwa pele ba ka kolobetšwa. Ge moruti a be a mmotša gore ba be ba tlaišega ka moka lefsifsing la Limbo, Fedelia o ile a ipotšiša ka gore, ‘Ge e ba Modimo a lokile, seo se ka direga bjang?’

Tara, e lego ngaka, o godišitšwe e le mo-Hindu kua Kathmandu, Nepal. A latela mekgwa ya bagologolo ba gagwe ya nywaga-kgolo e mentši, o ile a rapela medimo ya gagwe ditempeleng tša ma-Hindu gomme o be a e-na le medingwana legaeng la gagwe. Eupša Tara o be a gakantšhwa ke dipotšišo tše swanago le tše: Ke ka baka la’ng go e-na le tlaišego e kgolo gakaakaa? Ke ka baka la’ng batho ba e-hwa? O ile a hwetša go le thata go yena go ka hwetša dikarabo tše di kgotsofatšago bodumeding bja gagwe.

Ka lehlakoreng le lengwe, Panya o gotše e le mo-Buddha ntlong yeo e lego kgaufsi le mokero kua Bangkok, Thailand. O be a rutilwe gore tlaišego e bakwa ke ditiro tše dirilwego bophelong bja nako e fetilego le gore go lokologa go yona go ka hwetšwa ka go itokolla  dikganyogong ka moka. Ka go swana le ma-Buddha a mangwe a botegago, o be a rutilwe tlhompho e tseneletšego ya go hlompha baitlami ba banna ba dipurapura tše serolwana bao ba bego ba e-tla mo ntlong mantšiboeng a mangwe le a mangwe bakeng sa dimpho tša bahloki. O be a naganišiša gomme a kgoboketša diswantšho tša Buddha ka tumelo ya gore di tla mo šireletša. Ka morago ga go hwetša kotsi e šoro yeo e mo tlogetšego a golofetše go tloga lethekeng go ya tlase, Panya o ile a etela mafelo a bodula-noši a ma-Buddha, a e-na le kholofelo ya kgonthe ya phodišo ya mohlolo. Ga se a ka a fodišwa goba a hwetša tshedimošo ya moya. Go e na le moo, o ile a kgokaganywa le go dirišana le meoya gomme a thoma go nwelela go yona.

Virgil o belegetšwe United States gomme a tsenela sehlopha sa Mamoseleme a Maso kholetšheng. O be a aba dipuku tša ona ka phišego, tšeo di bego di re motho-mošweu ke Diabolo. Ba be ba nagana gore, leo ke lona lebaka leo ba bašweu ba dirilego dilo tše dintši tše sehlogo malebana le ba baso. Gaešita le ge a be a botegela ditumelo tša gagwe, Virgil o be a tshwentšwe ke dipotšišo tše: Go tla bjang gore ba bašweu ka moka e be ba babe? Le gona ke ka baka la’ng karolo e kgolo ya go rera ebangedi e tswalanywa le tšhelete?

Gaešita le ge a goletše Amerika Borwa yeo karolo e kgolo ya yona e lego Makatholika, Charo e be e le Moprotestanta yo a botegago. O be a thabetše go se be karolo ya go direla medimo ya diswantšho yeo e bego e mo dikologile. Charo o be a thabela go ya kerekeng Sontaga se sengwe le se sengwe tirelong yeo e bego e tletše ka go tutuetšwa maikwelong, mo a bego a goelela “Haleluya!” gomme a kopanela moopelong wa bodumedi le motantshong o bego o latela ka morago. Charo o be a dumela e le ka kgonthe gore o be a phološitšwe gomme o be a tswetšwe lefsa. O be a lefa karolo ya lesome ya ditseno tša gagwe kerekeng, gomme ge moebangedi yo a mo ratago wa TV a be a kgopela meneelo, o be a mo romela tšhelete bakeng sa bana ba Afrika. Lega go le bjalo, ge a be a botšiša moruti wa gagwe lebaka leo ka lona Modimo yo lerato a tlaišago batho diheleng, o ile a lemoga gore ga a na karabo e kgotsofatšago. Ka morago ga moo, o ile a ba a lemoga gore meneelo ya gagwe e be e sa dirišetšwe go thuša bana ba Afrika.

Gaešita le ge ba e-tšwa ditlogong tše sa swanego, batho ba ba bahlano ba be ba e-na le selo se tee se ba swanago ka sona. Ba be ba rata therešo gomme ba tsoma e le ka kgonthe dikarabo tše di nepagetšego dipotšišong tša bona. Eupša na ba ka kopanywa e le ka kgonthe borapeding bja therešo? Sehlogo se se latelago se tla araba potšišo yeo.

[Mothopo wa Seswantšho go letlakala 3]

G.P.O., Jerusalem

[Seswantšho go letlakala 4]

Na go a kgonega go batho ba ditlogo tše sa swanego gore e be ba kopanego e le ka kgonthe?